Ergunalah Man Kalak Sideban (1 Korinti 10:31-33, 11:1)

BAHAN PJJ GEREJA GBKP

TANGGAL 2 – 8 NOPEMBER 2014

1 KORINTI 10: 31-33, 11:1.

Tema : Ergunalah Man Kalak Sideban.

LATAR BELAKANG

1.      Sijadi bahan oratenta sendah eme kata persinget rasul Paulus man Perpulungen i Korinti kerna ngergai kalak sideban ras uga cara memuliaken Tuhan  ibas nggeluh ibas persadan. Ibas ngergai kalak sideban ula erbahan kitik ukur kalak erkite-kiteken pangan.ras inemen. Tapi arah pangan ras inemen enda tama pujin min Tuhan. Ibas erti kata kalak kristen tuhu-tuhu nggo merdeka tapi, tapi ula min kemerdekaan e sipake alu la ngergai kalak sedeban, khususna kalak Jahudi.

2.      Kata persinget enda ipeseh rasul Paulus sebab ibas perpulungen Korinti lit persoalen kerna banci ntah lang kalak kristen man daging singgo pernah ipersembahken man “berhala” , man ibas  rumah kalak si la tek man Yesus, bagepe man daging siitukur ibas tiga, rsd. Persoalen enda la saja terjeng banci ntah lang, tapi persoalen keselamaten. Sebab lit kalak kristen simenganut ajaren Judaisme, melarang kerina enda, sebab nina, keselamaten situhu-tuhu la saja tek man Yesus tapi harus pe menghindari man pangan singgo ipersembahken man berhala ras siidayaken i tiga, rsd.

3.      Ibas keputusen sidang para rasul ras penatua i Yerusalem ngataken maka pangan kai pe banci ipan, saja kalak siman kerina pangan harus ngergai ras nghamati kalak si la banci man pangan tertentu.  Ibas erti kata ula min anggota perpulungen si mantangken pangan tertentu ngelarang anggota perpulungen si banci man kerina pangan. Bagepe sebalikna anggota perpulungen sibanci man kerina pangan, ula min ia man i lebe-lebe kalak si mantangken pangan tertentu.

4.      Kata persinget siipeseh Paulus enda ertujun gelah ikaten persadan ras pembangunan kula ni Kristus tetap maju. Kalak kristen harus njaga persadan, emaka harus saling menjaga perasaan sada ras sideban. Kalak kristen harus ncidahken kekelengen man temanna sisada perpulungen.

5.      Gelah perpulungen ngangkai sienda, ipindoken Paulus gelah perpulungen ngusih kai siibahan Paulus sendiri. Paulus ibas rangka keselamaten jelma sinterem, iergainakalak sideban. Sebab la ate Paulus kitik ukur kalak. Emaka anggota perpulungen pe harus tuhu-tuhu ngergai temanna. Bagepe kegeluhen simeganjang ukur ras egois, simementingken diri sendiri harus iambengken, gelah kegeluhen persadan teridah ibas perpulungen. Jadi perpulungen harus belajar menyenangkan kalak sideban ntah pe ngergai kalak sideban. Alu perpulungen erbahan sibage maka anggota perpulungen nggo memuliaken Tuhan.

APLIKASI

            Sipaling penting ibas kegeluhenta eme nggeluh ibas persadan. Inti nggeluh ibas persadan eme nggeluh ibas kiniteken man Tuhan ras nggeluh ibas keleng ate. Sebab keleng ate e me singerakut persadan e. Bagepe harus siinget ibas kegeluhenta selaku kalak kristen, lit min buah sibanci inanami kalak sideban. Ibas erti kata erguna min kita man kalak sideban. Lit nanamna kegeluhenta man kalak sideban. Alu enda berarti kita harus jadi sira ras terang doni.

            Ibas eteta jadi erguna man kalak sideban, maka siharus lit man banta eme ula kepentingen dirinta saja siiukuri, tapi siutamakanlah kepentingan kalak sideban. Bagepe sisampati temanta simbutuhken penampat. Alu enda siibahan maka tentuna kita nggo memuliaken Tuhan.

Pdt. Steven Kumenit, STh.M.Min

Ngasup Ngergai Kemanusiaan (Yunus 4:1-11)

BAHAN PJJ GEREJA GBKP

TANGGAL 26 OKTOBER – 1 NOPEMBER 2014

Juna 4 : 1 – 11

Tema : Ngasup Ngergai Kemanusiaan

LATAR BELAKANG

1.      Sijati oratenta sendah eme sada protes ras merawa nabi Juna  man Tuhan erkiteken kebijaken Tuhan si la surung menghukum kalak Niniwe erkite-kiteken kalak Niniwe jera ibas dosana nari. Ate Nabi Juna,  kalak Ninewe harus ihukum mati (kernepken). Jadi penungkunen man banta dosa-dosa kai saja siilakoken kalak Ninewe maka merawa Tuhan man bana, janah ate Tuhan menghukum kalak Ninewe e. Dosa siibahan Kalak Ninewe eme munuh, perguak, pinangko/perampok, erlua-lua, dem alu paci macik (band. Nahuk 3:1-4).

2.      Nabi Juna ipilih Tuhan gelah mpeseh berita penghukuman Tuhan, tapi kiam ia ku Sepanyol, erkite-kiteken iteh Nabi Juna kerna keleng ate Tuhan. Ija adi lit kalak sijera maka ialemi Tuhan dosa-dosana. Bagepe ibas Nabi Juna kiam ku Sepanyol gelah Tuhan menghukum kalak Niniwe. Kerna sienda nggo menyangkut masalah pribadi, sebab bangsa Niniwe enda eme musuh bangsa Israel.

3.      Jadi penungkunen. Engkai kalak Niniwe, kenca ibegina berita penghukuman Tuhan siipeseh nabi Juna,  nggit jera kalak? Terjadi pertobatan masal. Padahal kalak Niniwe enda la sada kiiteken ras nabi Juna ntah pe kalak Israel. Tentuna enda harus siidah ibas sejarah bangsa Niniwe. Niniwe enda eme ibu kota kerajaan Asyur. Asyur pernanerang Israel,emaka kalak Israel iambengken ku Asyur ntah pe ku Babel. Asyur ntah pe Babel ipake Tuhan guna nerang bangsa Israel. Erkiteken sie me bangsa Israel termasuk nabi Juna ersura-sura gelah kalak Niniwe enda ikernepken Tuhan, labo sebalikna eme pengampunan ibas Tuhan nari. Jadi situhuna lit dendam masa lalu. Bagepe  kerna kuasa ras keleng ate Tuhan nggo ibegina.

4.      Tuhan mereken sada pengertin man nabi Juna, maka situhuna la lit hak nabi Juna merawa man baNa erkite-kiteken la surung Tuhan ngkernepken kalak Niniwe, sebab Tuhan e, la saja Tuhan bangsa Israel, tapi Tuhan kerina bangsa, emaka adi lit sijera, tentuna Tuhan erkeleng ate man bana.

5.      Lit empat hal sierbahanca Tuhan la surung ngkernepken kalak Niniwe eme 1). Litnana pertobatan masal man kalak Niniwe. 2).  Kuta Niniwe kuta simbelin. 3).  Lit 120.000 danak-danak si langa meteh apai si salah ras apai sibenar. 4). Mbue asuh-asuhen i je. Enda sijadi pertimbangen Tuhan, sebab ibas terjadi pertobatan maka kalak Niniwe tentuna nggeluh ibas keleng ate, kebujuren ras keadilan. Bagepe lit sada harapan maka kenca danak-danak e nggo dewasa,  ia banci  jadi kalak situhu-tuhu nggeluh ibas kebujuren ras keadilan. Enda tentuna iajari kalak singgo jera kerna uga seharusna nggeluh selaku manusia

APLIKASI

            Ibas zaman genduari, sijadi tantangan man banta eme ngergai kerna kemanusiaannta e, sebab adi sinen ibas keadaan genduari lanai kita siergai, emaka la saja terjadi bas kita kinilabujuren, penindasan, tapi pe pembunuhen. Kegeluhen kita selaku manusia tempa-tempa lanai lit ergana.

            Ibas negaranta gelah kita banci ngergai kemanusiaanta, ngo iatur ibas undang-undang Hak Azazi manusia. Emaka ise singelanggar HAM ia harus ihukum. Tapi amin gia nggo lit Undang-undang HAM, tapi nterem denga kita singelanggar Undang-undang HAM e. Emaka gelah kita tuhu-tuhu ngergai kemanusiaan e, harus lit bas kita sada pengangkan manusia e tempas Dibata, emaka ise sila ngergai kemanusiaan e, berarti ia la ngergai Tuhan, bagepe la ia mbiar man Tuhan.  Bagepe Kita banci ngergai temanta manusia, adi bas kita nggeluh positif thingking ras meteh kita enda seri i lebe-lebe Tuhan.

Pdt. Steven Kumenit, STh.M.Min

Mbela Si Benar (Ester 4:12-14)

BAHAN PJJ GEREJA GBKP

TANGGAL 19 – 25 OKTOBER 2014.

Ester 4:12-14.

Tema : Mbela Si Benar

LATAR BELAKANG

1.      Bahan oratenta sendah eme sada kata persinget Mordekai man Ester. Mordekai eme bapa angkat Ester. Kitik-kitik nari Ester nggo iasuhi Mordekai, sebab bapa ras nande Ester nggo mate. Bapa Ester eme senina Mordekai.

2.      Ipersingeti Mordekai si Ester sitading iistana selaku ratu gelah Ester erbahan sada perbahanen eme njumpai raja ras kataken kerna permasalahan siterjadi nandangi kalak Yahudi sitading ibelang-belang kerajaan Persia. Ipersingeti Mordekai si Ester sebab iidah Mordekai tempa-tempa Ester  mbiar njumpai raja. Ester erbahan bage, sebab lit sada peraturen Istana, ise saja singadap man raja, tapi la idilo raja, maka kalak e harus ihukum mate, pala idudurken tongkat emas kerajaan man bana lako ndilosa.

3.      Kalak Yahudi i belang-belang kerajaan Persia ndatken perbeben simesangat, sebab Haman ndatken kuasa ibas raja nari guna ngelakoken siakapna mehuli. Akap mehuli siimaksudken raja eme ibas rangka kemajun ras kesejahteraan kerajaan Persia. Tapi kuasa siibereken raja e ipake Haman guna munuh kerina kalak Yahudi si lit ibas kerajaan Persia. Ibahanna bage sebab merawa ia man Mordekai, sebab Mordekai la nggit nembah man bana. Mordekai selaku kalak Yahudi murupaken sada pantangen adi manusia isembah. Tuhan ngenca sipatut isembah. Jadi situhuna enda dendam pribadi Haman man Mordekai.

4.       Kata persinget nandangi Ester selaku kalak Yahudi gelah  Ester sader kerna statusna. Bagepe gelah sader Ester adi la isampati Ester tentuna lit penampat sideban. Enda secara la langsung, ate Mordekai ngataken kerna kuasa Tuhan sibanci nampati bangsaNa. Tapi Ester pe harus nggejapken maka ia jadi ratu banci saja guna nampati kalak Yahudi. Sebab alu lit kuasa selaku ratu, banci Ester melindungi kalak Yahudi simerupaken bangsa Tuhan. Bagepe soal kematen Ester la itentuken raja, tapi ija pa pe banci Ester mate. Emaka situhuna kebiaren Ester la merupaken sada alasen sitepat.

5.      Ate Mordekai gelah Ester erbahan sada tindaken sipedas guna nelamatken kegeluhen kalak Yahudi. Sebab kai siibahan Haman lamerupaken sada kebenaren. Kalak Yahudi la ersalah. Bagepe perbahanen Ester sitempa-tempa sinik saja erkiteken mbiar, tentuna sada hal sisalah, sebab Ester hanya menyelamatken diri sendiri saja.

APLIKASI

            Cukup nterem kita kalak kristen simbiar menyuaraken suara kebenaren ras mbela kebenaren. Padahal adi ketidak benaren sipediat, maka la saja ketidak benaren tumbuh subur ibas negaranta, ntah pe banci ketidak benaren bengket ibas gereja. Tapi pe melala korban-korban akibat ketidak benaren e. Emaka kita selaku kalak kristen harus pang menyuaraken kebenaren ras mbela kebenaren. Sebab enda merupaken karakter kita selaku kalak kristen. Kebenaren e eme karakter Tuhan sendiri. Emaka kita harus lawan ketidak benaren e.

            Harus siinget ketidak benaren eme kesalahan. Emaka adi la kita mbela sibenar berarti kita ikut bersesongkol ras ketidak benaren e. Tapi sebalikna ibas kita mbela sibenar berarti kita ikut ras ndalanken kebenaren e, bagepe kita ngelawan ketidak benaren ibas doni enda. Emaka ibas kita mbela si benar, maka lit me pagi kalak sipang ndalanken kebenaren ibas kegeluhenta tep-tep wari.

Pdt. Steven Kumenit, STh.M.Min.

Ipasu-Pasu Guna Jadi Pasu-Pasu (2 Raja-Raja 4:1-17)

BAHAN PJJ GEREJA GBKP

TANGGAL 12 – 18 OKTOBER 2014.

II Raja – Raj 4: 8 – 17.

Tema : Ipasu-Pasu Guna Jadi Pasu-Pasu.

LATAR BELAKANG

1.      Paksa nabi Elisa ku Sunem, reh sekalak diberu bayak nenahken ia guna man i rumahna, janah mehuli kal pengalo-ngali diberu bayak e man Elisa,emaka tep-tep kali Elisa ku Sunem, i rumah diberu bayak e Elisa man.

2.      Ibas piga-piga kali Elisa man i rumah diberu sibayak e, kepeken lit sada penggejapen man diberu bayak e maka Elisa e sekalak si badia, erkiteken sie ersura-sura ia la saja terjeng nikapken man man Elisa, tapi pe bereken siterulin. Emaka ibas pusuhna adi reh sekali nari Elisa i rumahna maka lit ingan/kamar sikhusus man Elisa, emaka sura-surana e ikatakenna man perbulangenna, ras iueken perbulangenna,emaka ibas Elisa reh ku Sunem singga ia i rumah diberu bayak e nggo lit kamar, lengkap ras peralatan  kamar. Ibas keriahen ukur ngalo-ngalo Elisa, ate Elisa lit siharus bereken man keluarga e, emaka idilo Elisa si Gehasi guna nungkun kai siate ibereken Elisa man keluarga e. Tapi Erkiteken palasna ngalo-ngalo Elisa alu meriah ukur selaku kalak sibadia maka la lit sura-surana guna mindo kai pe man Elisa.

3.      Selaku kalak bayak tentuna lit tanggungjawabna man pemerintah eme pajak, erkiteken sie maka ate Elisa ibas rangka mbalas kerina kelatihenna (nen = ngalo-ngalo Elisa alu meriah ukur) idahi Elisa raja ntah panglima tentera guna ncakapken kerna tanggungjawab diberu bayak e kerna pajak. Ibas erti kata gelah lit kebijaken tersendiri sibanci ibahan pemerintah kerna pajak nandangi diberu bayak e. Tapi erkiteken la lit sura-surana ibalik nikapken ingan simehuli ras ngalo-ngalo Elisa, maka la lit pemindon. Tapi situhuna lit perbeben man diberu bayak e, tuhu kerna erta lit bas ia, tapi kerna anak jadi perbeben keluarga e sebab keluarga enda la lit anakna. Diberu bayak e la banci mupus.  Emaka ibas kuasa Dibata si lit man Elisa, ikatakenna maka tahun sireh keluarga enda ndatken pupus. Sebab anak, ibas hal enda anak dilaki  merupaken harapen kerina keluarga. Arah  anak  maka lit kelangsungen garis keturunen. Bagepe anak dilaki merupaken sada pelindung ras menanggung hidup sekalak nande singgo metua ras singgo mbalu.

4.      Keluarga Diberu bayak enda eme keluarga situtus ras erkemalangan man Tuhan, emaka selaku keluarga sierkemalangan man Tuhan tehna kai tanggungjawabna nandangi suruh-suruhen Tuhan (nabi). Bagepe ibas oratenta icidahken kerna kuasa Tuhan silit man Elisa. Arah kuasa Tuhan Elisa mereken sada padan maka ibas tahun sireh diberu bayak enda ndatken pupus. Janah adi sioge terdauhen keluarga enda ipasu-pasu Tuhan alu mereken sada anak dilaki. Enda me upah man keluarga diberu bayak erkiteken nggo ngalo-ngaloElisa alu meriah ukur.

5.      Keluarga diberu bayak enda nggejapken maka kai si lit bas ia eme ibas Dibata nari, emaka ibas diberu bayak ngalo-ngalo Elisa alu meriah ukur, erkiteke-kitaken igejapkenna kai si lit bas ia harus pe inanami kalak sideban. Erta harus ipake guna kemulian Tuhan.

APLIKASI

            Harus sigejapken maka kita kerina nggo ngaloken pasu-pasu idur Dibata nari.  Secara umum lit 4 pengertin pasu-pasu Tuhan ibas dirinta, eme 1). Kegeluhenta nggo ipasu-pasu Tuhan, ija Tuhan lanai ertaktak kerna dosa-dosanta, emaka ialemi ras iselamatken Tuhan kita kerina. Enda merupaken pasu-pasu Tuhan simbelinna ibas dirinta.  2). Itemani ras ikawali Tuhan kita. Emaka adi jumpa perbeben ras kiniseran, janah erlebuh kita mindo penampat man baNa, isampatiNa kita. 3). Iberena gegeh ras kesehaten bagepe nggeluh ibas pengarapen man baNa. 4). IberekenNa kebutuhenta ras erta guna ipakeken ncukupi kebutuhen keluarganta.

            Kerina pasu-pasu Tuhan enda, tentuna lit sura-sura Tuhan man banta eme kita jadi alatNa man kalak sideban. Kita harus nampati kalak sideban alu kai silit bas kita. Kita harus jadi alat pasu-pasu Tuhan nandangi kalak sideban, gelah kalak sideban nggejapken lias ras perkuah ate Tuhan. Emaka pujina Tuhan ibas kegeluhenna.

Pdt. Steven Kumenit,STh.M.Min.