Kamis, 22 Januari 2015

Pasar Bebas AFTA (1 Raja-Raja 5:1-12)


BAHAN PERPULUNGEN JABU-JABU
GEREJA GBKP
TANGGA 25 – 31 JANUARI 2015

1 Raja – Raja 5 : 1 – 12.
 
Tema : Pasar Bebas AFTA
 
LATAR BELAKANG
1.      Ibas oratenta sendah eme turi-turin kerna Salomo majekken Rumah Pertoton ras perpanjangan kerja sama bangsa Israel ras Raja Hiram. Hiram eme raja bangsa Tirus. Raja Hiram nggo cukup ndekah erteman ras raja Daud.
2.      Pembangunan Rumah Pertoton nggo irencanakan Daud, tapi erkite-kiteken la ibere Tuhan Daud simbangunsa, tapi Salomo anakna, emaka ibas perkunjungan balasan kerajaan Israel ku kerajaan Tirus, teridah meriah kal ukur raja Hiram, sebab iidah raja Hiram e, raja Salomo tuhu-tuhu pentar ras la kal atena ncedai hubungan singgo cukup ndekah ibangun.  Meriah ukur raja Hiram idahna uga raja Salomo eme sekalak raja Israel sipentar ras megegeh, tapi la ipakena kepentaren ras gegehna e guna nindas bangsa sideban, tapi njadiken  persadan singgo tercipta, guna saling menguntungkan sada ras sidebanna (sisampat-sampaten).
3.      Ibas perkunjungan balasan e, utusan raja Salomo ngatakenca kerna sura-sura mbangun Rumah Pertoton. Emaka pindona gelah raja Hiram banci nampatisa arah nikapken kayu  Pinus. Sebab kayu - kayu Pinus i Libanon nari e tuhu-tuhu mejile. Kayu pinus e megegeh ras merim. Bagepe ipindona gelah kalak Tirus sinabahsa, sebab kalak Tirus ahli ibas perkayuaan.
4.      Meriah ukur raja Tirus kerna pemindon raja Salomo, janah erpadan raja Tirus kayu pinus e banci itaruhken seh ku ingan i ja ate raja Salomo namakenca.Saja lit pemindon raja Tirus man raja Salomo eme gelah raja Salomo nikapken nakan man suruh-suruhen si erdahin guna naruhken k yu pinus e. Kerja sama enda irealisasikan kedua belah pihak, janah iterusken ku perjanjin kedua negara.
5.      Kepentaren siibereken Tuhan man raja Salomo mabai raja Salomo ibas mbangun rumah pertoton ngasup bekerja sama ras raja Hiram.

APLIKASI
            Asean Free Trade Area (AFTA) eme salah sada bentuk kerja sama negara-negara Asean. Janah AFTA enda ibenaken tahun 2015 enda. AFTA ntah pe perdagangan bebas enda sada pihak memang mengntungkan man banta, tapi ipihak lain banci ka merugiken man banta. Saja siniharapkan ula min melala kita rugi. Ibas erti kata subuk produk lokal bagepe sumber daya manusianta terabaikan, ntah pe la nai lako, erkite-kiteken talu bersaing ras produk bagepe SDM luar negeri. Emaka ibas mengantisipasi enda la saja kualitas produk lokal SDM nta harus itingkatkan gelah ngasup bersaing ras produk bagepe SDM luar negeri, tapi pe moral ras kiniteken pe harus tuhu-tuhu megegeh.
            Selaku kalak kristen kita harus mpersiapken dirinta alu etos kerja sierpalaskan mbiar man Tuhan. Memang ibas dunia perdagangan, tuhu siidaramina eme keuntungan, tapi ula min perayakan keuntungan idatken alu menghalalkan kerina cara. Ibas kita mbiar man Tuhan, maka siilakoken kita eme ngaloken produk luar negeri alu meriah ukur ras selektip, tapi pe sipaling penting eme kepercayaan kalak sideban man banta tsijaga. Bagepe erkiteken nggo melala produk-produk luar negeri nari, maka ula min ceda kinitekenta, siperdiatekenlah kai siiperlukan kita ras keluarganta, gelah kita ipasu-pasu Tuhan.

Pdt. Steven Kumenit, STh.M.Min.

Selasa, 20 Januari 2015

Orang Benar Di Temani Tuhan (Mazmur 17:8-15)

KHOTBAH TANGGAL 25 JANUARI 2015
GEREJA GBKP
=============================================================
Invocatio   :     Tetap lah ukurndu, tek lah. Janah inget! Ikutken kerina undang-undang si ibereken suruh-suruhenKu Musa man bandu. Sada bagin pe ola lupaken, maka ku japa pe kam lawes, jadi bagi sura-surandu (Josua 1:7).
Ogen         :     Perbahanan Rasul-Rasul 16:4-15 (Antophonal).
Khotbah    :     Mazmur 17:8-15.
Tema         :     Kalak Bujur Itemani Tuhan.

LATAR BELAKANG
1.      Bahan khotbahta sekali enda eme pertoton raja Daud mindo penampat man Tuhan, sebab pemazmur ituduh ersalah, janah msuh-musuhna tetap ngayak-ngayak pemazamur. Pemazmur ianggap ersalah oleh raja Saul, emaka ate raja Saul munuh Daud.
2.      Raja Daud tuhu-tuhu nandai Tuhan alu payo, emaka pemindon raja Daud eme gelah Tuhan ngkawali ia ras muniken Daud iteruh kabeng Tuhan. Adi Daud ikawali ras lit teruh kabeng Tuhan, maka la lit sada jelma pe singasup meneken ia, sebab Tuhan pasti nampati Daud. Tuhan pasti naluken ise saja si atena ngelawan Daud. Adi nggo ibas perlindungan Tuhan maka ise siatena ngelawan Daud, nggo jadi imbang Tuhan. Janah la lit kuasa manusia singasup naluken kuasa Tuhan.
3.      Perlu siteh lit dua hal siisimbolkan Daud kerna perlindungan Tuhan eme ngkawali anak mata. Anak mata eme salah sada bagin tubuh sicukup penting emaka harus ilindungi. Daud iumpamakan bagi anak mata siharus ikawali Tuhan gelah aman. Bagepe kerna kabeng Tuhan.  I Rumah Pertoton je lit tabut perjanjian. Ibas penutup peti perpadanan e, je terukir dua gambar mahluk si lit kabengna. Kabeng enda simbol perlindungan Tuhan untuk peti perpadanan e. Jadi adi ibas pertoton Daud, ipindona gelah itaruhken Tuhan ia ibas kabeng Tuhan, berarti ate Daud gelah Tuhan saja sitetap simelindungi ia.
4.      Pertoton Daud enda la saja mindo pengkawali ras penemani Tuhan, tapi pe pindona gelah Tuhan ngelawan musuh-musuhna. Ipindo Daud gelah kalak jahat harus ilawan ras ihukum gelah kalak bujur tetap nggeluh. Ipindo Daud gelah lit penghukuman man kalak jahat, sebab Daud erpengakap Tuhan ngenca sibanci menghukum, labo manusia.
5.      Pemazmur tek maka  ibas perlindungan Tuhan ia pasti selamat, janah ibas penghukuman Tuhan maka kalak jahat masap me ibas doni enda, alu bage kalak bujur saja sitetap nggeluh i tengah-tengah doni enda bagepe  nggeluh ibas persadan ras Tuhan. Bagepe kalak singgeluh ibas kebujuren ras ndalanken kai singena ate Tuhan meriah ukur Dibata.
 
APLIKASI
            Pertoton Tuhan Yesus ope denga Ia nangkih ku Surga eme gelah Bapa nemani kalak si tek ibas doni enda (Yoh 17:15). Enda ngatakenca, la ate Tuhan,  kita kalak sitek man baNa nggeluh ibas kematen. Sebab kegeluhen ibas doni enda dem denga alu perbeben ras kiniseran, janah banci saja erkiteken perbeben ras kiniseran e, kita banci ndabuh ku bas dosa. Jadi, i jenda Tuhan tetap ncidahken maka Ia tetapsetia nemani kita. Emaka la perlu aru ateta ntah mbiarsa ibas kita jumpa perbeben ras kiniseran, sebab lit kap Tuhan sitetap nampati kita.
            Siinget min Tuhan e Imanuel (Matius 1:23), emaka adi jumpa perbeben ras kiniseran ertotolah kita mindo penampat man Tuhan,ula man dibata-dibata doni enda. Janah tek kita ibas penampat Tuhan. Tapi pe harus siinget penampat Tuhan man banta adi kita tetap nggeluh ibas persadan ras Ia, dingen ndalankan kai singena ateNa. Jadi nggeluh ibas doni enda harus tetap optimis, emaka ngasupkita ndalani geluhta tep-tep wari alu mbiar ras erkemalangan man Tuhan.

Pdt. Steven Kumenit, STh.M.Min

Kamis, 15 Januari 2015

Persadanta Ras Jesus Erbahan Kita Megegeh (Lukas 22:14-20)


PEKAN PENATALAYANAN

GEREJA GBKP

SABTU, WARI VII, 24 JANUARI 2015

Khotbah : Lukas 22: 14-20

 

Tema : Persadanta Ras Jesus Erbahan Kita Megegeh

 

LATAR BELAKANG

1.      Sijadi bahan khotbahta sendah kejadinna tupung wari Paskah kalak Yahudi. Wari raya Paskah kalak Yahudi eme mperingeti keselamatan bangsa Israel i taneh Mesir nari. Sebab tupung sie binangun pintun rumah-rumah kalak Israel itamaken dareh, emaka adi nggo reh Tuhan guna munuh kerina anak dilaki sintua, maka rumah keluarga kalak Israel ibentasi Tuhan (Band. Keleuaran 12). Ibas wari raya e, kerina kalak Yahudi harus ngerayakenca. Janah biasana kerina kalak Yahudi sitading ibelang-belang doni enda reh ku Yerusalem guna ngerayaken  wari Paskah. Yesus pe reh guna ngerayakan Paskah e.

2.      Wari raya Paskah irayakan tupung  berngi, janah ibenakan wari Paskah e, kenca itiup sangkakala perak.

3.      Ibas ngerayakan Paskah, kalak Israel motong biri-biri, jenari ipanggang, kenca sie ipan. Dareh domba ngingetken kerna keselamatan tupung  bangsa Israel nggeluh I taneh Mesir.

4.      Mesikel kal Yesus ngerayakan Paskah ras ajar-ajarNa, sebab ibas perayaan Paskah siilakoken Yesus ope kiniseranNa lit makna pengajaran man ajar-ajarNa. Sebab perayaan Paskah Yesus ras ajar-ajar Na e eme siterakhirna (Paskah perpisahan), sebab kenca sie Yesus ndatken kiniseran ras mate. Bagepe i je iajarkanna man ajar-ajar maka, perayaan Paskah la saja sebage  peringet-ingeten kuasa ras keleng ate Tuhan nandangi bangsa Israel i Mesir, tapi pe ngatakan kerna kegeluhen ibas Kinirajaan Surga.

5.      Kenca Yesus ngerana, ibahan Yesus Lakon Persadan Si Badia. Janah ibas Lakon Persadan Si Badia enda iingetk n Yesus roti ras anggur e ngelambangken tubuh ras darehNa. Kematen Yesus erkite-kiteken keleng kal ate Tuhan man manusia. Emaka ibas palas keleng ateNa enda me, isuruh Yesus gelah ajar-ajarNa nggit berkorban guna keselamatan doni enda.

 

APLIKASI

            Ibas tradisi gerejanta (gereja Protestan) 2 sakramen ngenca siiakui eme lakon pridin ras lakon persadan si badia. Secara umum 2 sakramen enda ermakna teologi si seri eme tanda keleng ate Tuhan man manusia. Tapi secara prinsip berbeda. Khusus kerna lakon persadan si badia eme tanda kerna pengurbanan Yesus I kayu persilang. Roti ngelambangkan daging/kula Yesus, janah anggur ngelambangkan dareh Yesus.

            Ibas kita muat bagin ibas lakon persadan si badia berarti la saja kita mperingeti kerna kematen Tuhan Yesus tapi kita nggeluh ibas persadan ras Yesus Kristus. Emaka kegeluhenta nggo ersada ras Yesus Kristus. Ibas persadan ras Yesus enda me kita ipengasup guna ngelakoken kai simehuli singena ate Tuhan. Ibas persadan ras Yesus, kita ngasup nggeluh ibas persadanta sapih-sapih kita manusia. Jadi penungkunen ngkai maka banci bage ? sebab Yesus eme simada kuasa.Kuasa Yesus ngasup memotivasi kita guna ngelakoken simehuli. Bagepe erkiteken persadanta ras Yesus maka kita ibereken kepentaren, sierbahanca turah pengertin simehuli kerna nggeluh ibas persadan.  Emaka adi reh man banta perbeben ras kiniseran, ngasup kita babasa,lit bas kita ketabahan ras kesabaran. Janah erkiteken kita nggeluh ibas persadan ras Yesus maka lit buahna (band. Yohanes 15).

 

Pdt. Steven Kumenit, STh.M.Min.

Ermeriah Ukurlah Ibas Tahun Jobel (Imamat 25:8-17)


 PEKAN PENATALAYANAN

GEREJA GBKP

JUMAT, WARI VI, 23 JANUARI 2015

Invocatio      :   Endekenlah ende-enden si mbaru man baNa, alu mejile kuitlah kulcapi janah ersuraklah meriah (Mazmur 33:3).

Ogen            :    Perbahanen Rasul-Rasul 15:1-11

Khotbah       :    Imamat 25:8-17.

Tema            :    Ermeriah Ukurlah Ibas Tahun Jobel.

 

LATAR BELAKANG

1.      Ibas perdalanen bangsa Israel ku taneh Kanaan, ngadi me bangsa Israel i gunung Sinai, janah ope denga iterusken bangsa Israel perdalanenna, Tuhan ngerana man Musa selaku pemimpin bangsa Israel. Inti percakapan  Tuhan ras Musa eme kerna sada peraturan ntah pe undang-undang wari sabat, khususna kerna taneh ras tahun Yobel eme tahun pembebasen taneh.

2.      Sijadi bahan khotbahta eme sada peraturan kerna tahun Yobel ntah pe tahun penangtangan. Tahun Yobel jadi sada peraturan man bangsa Israel, ibas rangka gelah bangsa Israel tetap memiliki tanah pusakana. Perlu siteh tupung bangsa Israel bengket ku taneh Kanaan, ibereken Tuhan tanah Kanaan e sue ras 12 suku si lit, emaka kerina keluarga bangsa Israel dat bagin ibas taneh Kanaan, gelah bangsa Israel banci ngusahai taneh e emaka keluarga bangsa Israel banci nggeluh arah taneh siiusahaina.

3.      Tahun Yobel eme tahun penangtangan, ija kerina tanah singgo idayakan pemilikna harus iulihken. Enda merupaken sada hukum, emaka ibas tahun Yobel enda (tahun pe 50 ken), Musa harus niup sangkakala si ngatakenca kerna tahun penangtangan nggo seh, emaka kerina bangsa Israel harus patuh nandangi tahun penangtangan enda. Iba tahun penangtangan enda, teridah kepeken siidayakan keluarga bangsa Israel labo tanah, tapi hasil tanah e, emaka erga tanah ihitung sue ras hasil, bagepe seh ngayak piga tahun maka she ku tahun Yobel. Jadi ergana itentukan piga dekah seh ku tahun Yobel.

4.      Ibas merealisasikan peraturan enda, maka kalak Israel harus mbiar man Tuhan, sebab ibas bangsa Israel mbiar man Tuhan e, khususna kalak bayak la ia ndarami keuntungan arah nipu  kalak simusil sindayaken tanehna e. Bagepe erkiteken mbiar ia man Tuhan, itehna maka taneh e milik Tuhan, janah ibereken Tuhan man bangsa Israel, emaka bangsa Israel bertanggungjawab man Tuhan.

5.      Ibas bangsa Israel patuh nandangi hukum tahun Yobel enda, maka bangsa Israel ipasu-pasu Tuhan. Bagepe bangsa Israel tetap memiliki tanah pusaka bekas pemere Tuhan man bana.

 

APLIKASI

            Adi ngerana kita kerna tahun Yobel bagi siimaksudkan padan sindekah, khususna Imamat 25:8-17 tentuna  enda lanai lit sijumpai ibas kegeluhenta sigenduari. Tapi siimaksudkan tahun Yobel ibas oratenta emeerkiteken lias ras perkuah ate Tuhan nge maka kita nggo nggeluh ibas pembebasan. Kita pe nai nggeluh ikuasai dosa, maka kita nggeluh ibas kuk perhambaan dosa, tapi ibas kematen ras kekeken Yesus Kristus maka kita nggo jadi manusia bebas. Geluhta tuhu-tuhu nggo igalari lunas alu dareh Yesus. Ibas pemahaman enda me maka berlaku me tahun Yobel.

            Tuhan nggo mbebasken gerejaNa ibas kuk perhambaan dosa nari, kemusilan,penindasan, kiniseran rsd, khususna gereja GBKP,emaka siidah perkembangan kalak sitek man Tuhan ibas erkiniteken nggo cukup maju. Tapi lit denga nge dosa, kemiskinan, penindasaan ras pinakit sosial sidebanna sirusur memenjarakan kita, emaka ibas moment tahun Yobelium 125 tahun GBKP enda, mari sirayakan alu dem pengataken bujur, ras ukur meriah tandana kita nggo mbebas ibas belenggu-belenggu si mbelenggu kita. Kerina enda banci silakoken adi bas kita nggeluh biak kekelengen ras mbiar man Tuhan.

 

Pdt. Steven Kumenit, STh.M.Min.

 

Selasa, 13 Januari 2015

Nggeluh Ibas Tempas Dibata (“Berbudaya”) (Kejadian 1:26-28)


PEKAN PENATALAYANAN

GEREJA GBKP

KAMIS, WARI V, 22 JANUARI 2015

Invocatio   :    Perukurenndu bali min ras perukuren Kristus Jesus (Pilipi 2:5)

Ogen         :    Efesus 4:17-24.

Khotbah    :    Kejadin 1:26-28.

Tema         :    Nggeluh Ibas Tempas Dibata (“Berbudaya”)

 

LATAR BELAKANG

1.      Ibas bahan khubahnta ituriken kerna Dibata jadiken manusia sue ras tempasna (Imago Dei). Ibas Dibata njadiken manusia, sipaling utama eme biak Dibata nggeluh ibas diri manusia. Bagepe erkiteken tempat Dibata enda me maka manusia merupaken mahkluk si iharapken Dibata guna erperan ibas doni enda. Erkiteken sie me manusia itugasken ntah pe jadi perpanjangen tangan Tuhan guna njaga ras ngusahai tinepa Dibata si nggo leben lit asangken manusia.

2.      Manusia ijadiken Dibata sue ras tempasNa ngataken maka manusia jadi wakilNa guna ngkuasai  doni ras nggeluh ibas doni nari (dat nakan). Jadi tuhu-tuhu manusia mpunyai hubungan secara istimewa ras Tuhan.

3.      Ibas Dibata njadiken manusia, merupakan sada turi-turin singatakenca maka manusia eme puncak ibas penciptaan Tuhan, janah Tuhan mereken mandat sepenuhna man manusia guna ngkuasai ras njagai tinepa Tuhan. Memang pemeliharaan ciptaan Tuhan, Tuhan sendiri sindahikenca/ngaturkenca, tapi ibas perukuren Tuhan, berekenNa ciptakenNa manusia, sebage tanda kehadiranNa ibas doni enda. Perlu siteh makna gambar ibas paksa sie ngatakenca erkite-kiteken sekalak raja la banci hadir ije, maka ikirimken me patung raja ibelang-belang kekuasaanna. Bageme makna kahadiran manusia ibas doni enda sebage wakil Tuhan ibas doni enda.

4.      Erkiteken manusia wakil Tuhan maka lit perintah Tuhan siharus ilakoken manusia eme njagai ras ngusahai tinepa Tuhan sideban. Manusia harus melestarikan tinepa Tuhan gelah la ceda. Bagepe manusia ibere nggeluh ibas kai singgo itepa Tuhan. Selaku wakil Tuhan ibas doni enda, maka manusia harus ndalankan perintah Tuhan e alu meteruk ukur ras dem tanggungjawab.

5.      Tuhan ciptakan manusia memang nggo lit ibas perencanaanNa, emaka kenca nggo dung Dibata njadiken isi doni enda, maka ijadikenNa manusia, emaka kenca manusia ijadiken, maka manusia isuruh Tuhan njagai ras ngusahaisa. Enda sada perintah Tuhan man manusia. Emaka kelangsungan nggeluh tinepa Tuhan sideban lit ibas tan manusia. Guna njaga ras ngusahai enda me manusia harus make karakter Tuhan singgo ibereken Tuhan ibas diri manusia, gelah kai siisuraken Tuhan kerna doni tinepa Tuhan enda banci seh.

 

APLIKASI

            Kenca Tuhan njadiken kita, maka harus siinget karakter Tuhan lit bas kita. Jenari perlu siteh lit sada perintah ntah pe tugas siharus idalanken eme njagai ras ngusahai doni enda. Njagai ras ngusahai doni enda harus make budaya Tuhan eme alu dem keleng ate, gelah tercipta sada keharmonisan ibas doni enda, lit sada ketergantungan si la banci terpisahkan sada ras sidebanna.

            Budaya lit berhubungan ras manusia, sebab kai silakoken manusia menciptakan budaya, emaka budaya la pernah statis. Janah budaya sijadi erkiteken perkembangan pola pikir ras perbahanan manusia banci negatif, banci kapositif. Janah  budaya sinegatif banci erbahan kita ndabuh ku bas dosa. Emaka sipaling penting man banta ciptakanlah budaya simehuli singena ate Tuhan.

            Kita enda manusia siberbudaya, emaka marilah kita nggeluh alu berbudaya, khususna simehuli. Marilah sikembangkan budaya si lit alu erpalaskan karakter Tuhan si lit bas kita. Alu bage kita ngasup nggeluh berbudaya alu mbiar ras erkemalangan man Tuhan.

 

Pdt. Steven Kumenit, STh.M.Min.

Megermetlah Ngaturken Perdalanen Geluh (Amsal 23:17-23)


SERMON PEKAN PENATALAYANAN

GBKP KAMPUNG SUSUK

RABU, WARI IV, 21 JANUARI 2015.

Invocatio    :    Terpaksa igegehindu erdahin alu curcur panasndu, gelah taneh enda banci mereken ulihna man bandu, seh mulih ka kam ku taneh, sabap i je nari kam ijadiken. I bas taneh nari kam ijadiken, janah jadi taneh ka kam mulihken (Kejadin 3:19).

Ogen           :    Lukas 14:28-32).

Khotbah      :    Kuan-Kuanen 23:17-23.

Tema           :    Megermetlah Ngaturken Perdalanen Geluh.

 

LATAR BELAKANG

1.   Secara umum kitab Amsal enda sifatna mereken pendidikan. Tapi labo saja pendidikan secara umum tapi pendidikan sierpalasken teologis. Sebab memang enda hasil penggejapen kegeluhen raja Salomo nari. Emaka pendidikan e sifatna mereken keselamaten man ise saja situhu-tuhu ngkelengi pendidiken (hikmat) e.

2.   Maksud oratenta enda eme gelah anak sejak dini terhindar ibas erbage-bage bentuk perbahanen sibanci mereken kecedan man dirina bagepe ibas kegeluhenna sitep-tep wari. Cara sitepat guna menghindari e eme alu mereken pendidiken moral. Sebab alu pendidiken e, manusia banci meteh apai sibanci, janah apai si la banci.

3.   Secara khusus ibas oratenta, orang tua mereken kata persinget man anak gelah anak bani terhindar ibas kemusilan. Emaka siharus ihindari eme kebiasaan pemabuk ras merangap. Maksudna Sebab nggeluh mabuk-mabukan ras merangap eme sada kebiasaan singambur-ngamburkan sen, janah kegeluhen sibage, erbahanca kalak jadi mekisat erdahin. Padahal salah sada pasu-pasu Tuhan man manusia eme arah erdahin. Jadi sen singgo ipepulung keri erkite-kiteken mabuk. Emaka gelah ula jadimusil ula pertemani kalak pemabuk,sebab adi pertemani kalak pemabuk, banci kita terpengaruh. Jadi hindari sibage. Sebab harus siinget erkiteken mabuk-mabuk e banci ncedai masa depan geluhta. Emaka gelah terhindar ibas sibage, kepentaren harus tuhu-tuhu nggeluh ibas diri anak, gelah anak banci terhindar ibas hal-hal sincedai dirina.

4.   Bahan khotbahta enda pe la saja ngajarken man anak gelah megermet ibas kegeluhenna tep-tep wari, tapi pe ngajarken man anak gelah anak mehamat man orang tua, sebab erkiteken bapa nge maka anak nggeluh I je. Maksudna enda,  erkiteken buah cintah kasih antara Bapak ras nande nge maka sekalak anak tubuh ibas doni enda. Bagepe ibas anak nghamati orang tuana nge maka anak nggo ndalanken hukum pe 5 ken ibas 10 pedah Dibata. Bagepe erkiteken anak nghamati orang tua maka ipasu-pasu Tuhan alu mereken  umur sigedang  man anak e (band. Ulangan 5:16). La saja anak ndatken kemalemen ate erkite-kiteken pasu-pasu Tuhan man bana, tapi pe orang tua ndatken kemalemen ate erkite-kiteken anak nghamati orang tuana.

5.   Kepentaren eme pemeteh ras pengertin kerna sibenar, adil, janah enda rehna ibas Tuhan nari. Emaka kalak sidalanken kepentaren ibas kegeluhenna tep-tep wari, berarti mbiar ia man Tuhan (band. Amsal 1:7). Tapi sebalikna amin gia nggo lit bas anak kepentaren ras pengertinna, tapi adi la idalankenna maka kepentaren si lit bas ia, idayakenna man doni enda. Erkiteken nggo idayakenna kepentaren e maka lanai lit bas anak e kerna kebenaren, pengertin kerna simehuli, emaka anak jadi kalak si la erguna ras mperehken kecedan ras kemusilan.

APLIKASI

            Doni enda banci mabai kita sirang ras Tuhan, erkiteken sie Yesus ertoto man BapaNa isurga gelah Tuhan tetap nemani kita (band. Yohanes17:15). Emaka gelah kita terhidar ibas si la mehuli nari, maka sipaling penting kita harus nggeluh alu pentar. Sebab kepentaren e ngajarken man banta, maka adi sidalankan kerna si la mehuli, maka kita sirang ibas persadan ras Tuhan. Adi kita nggo sirang ras Tuhan maka penghukuman nari ngenca sikerajangenta (band. Roma 6:23). Enda me siharus ndauh bas kita nari. Erkiteken sie me maka kepentaran harus tetap nggeluh man banta. Uga carana gelah kepentaren tetap nggeluh man banta ? 1). Kegeluhenta harus nggeluh ibas erkemalangan man Tuhan. 2). Kita harus bergaul ras kalak bujur ras adil. 3). Nggeluh ibas tuntunan Tuhan (band. Jakup 1:5).

 

Pdt. Steven Kumenit, STh.M.Min.

     

Malem Ate Kalak Sindalanken Kekelengen (Mazmur 112:1-9)


PEKAN PENATALAYANAN

GEREJA GBKP

SELASA, WARI III, 20 JANUARI 2015

Invocatio    :    Si peduaken bali ras si ndai e me, 'Kelengilah temanndu manusia bagi kam ngkelengi dirindu (Matius 22:39).

Ogen           :    Keluaren 23:1-9.

Khotbah      :    Mazmur 112:1-9.

Tema           :    Malem Ate Kalak Sindalanken Kekelengen.

 

LATAR BELAKANG

1.      Sijadi bahan khotbahnta sekali enda eme sada ungkapan pemazmur kerna kemalemen ate. Kemalemen ate banci sidat adi kalak ernalem man Tuhan, mbiar man Tuhan. Sebab kalak siernalem man Tuhan tuhu-tuhu lit bas ia biak  mehamat ras patuh nandangi kerina perentah Tuhan. Kalak siernalem man Tuhan kegeluhenna tetap erpengendes man Tuhan.

2.      Pemazmur nggejapken, kalak siernalem man Tuhan kegeluhenna ipasu-pasu Tuhan. Erkiteken ipasu-pasu Tuhan  maka kegeluhen pemazmur nggeluh ibas kemalemen ate. Erkiteken sie me isuruhna man bangsa Israel tetap muji Tuhan.

3.      Pemazmur nggejapken seakatan Tuhan la lit sideban sibanci mereken kemalemen ate situhu-tuhu. Tuhan saja sumber kemalemen ate. Janah kemalemen ate siibereken Tuhan tuhhu-tuhu murni. Saja kemalemen ate siibereken Tuhan man sesekalak jelma banci inanamina adi ia erkemalangan man Tuhan saja. La lit Dibata sideban bas geluhna.

4.      Pasu-pasu Tuhan lasaja terjeng erta kebayakan, sebab erta kebayakan salah sada simbol/ bukti pasu-pasu Tuhan.tapi pe tole menyangkut keluarga,sebab anak-anakna erkuasa i negeri. Enda maksudna erkiteken orang tua simbiar man Tuhan, tehna tanggungjawabna eme ngajarken nggeluh erkemalangan man Tuhan, maka keluarga ras anak-anak pe mbiar man Tuhan. Anak-anak ibereken sada kepentaren. Sebab bena-bena kepentaren eme erkemalangan man Tuhan (Mazmur 111:10). Erkiteken kepentaren enda me maka ipercayaken bangsa guna minpin ras erkuasa ibas negeri (band. Kegeluhen Daniel).  Pasu-pasu Tuhan sideban sialoken kalak siernalem man Tuhan eme nggeluh ibas kesabaren. Sebab igejapken pemazmur kalak sierkemalangan man Tuhan lenga tentu kegeluhenna gampang-gampang saja, sada paksa jumpa perbeben ras kiniseran. Ibas situasi sibagenda rupana, pemazmur nggeluh ibas kesabaran, sebab tek ia penampat Tuhan. Tek ia Tuhan la pernah nadingken anak-anakna sindatken perbeben ras kiniseran. Bagepe kalak siernalem man Tuhan tetap ndalanken  kebajikan/perbahanan simehuli. Kalak siernalem man Tuhan, bas ialit biak-biak Tuhan eme perkeleng. Nggit nampati kalak si lit ibas masalah. Janah penampat siibereken  la terjeng mereken ndalan keluar secara kata-kata, tapi pe nggit mereken pinjaman sen. Jadi tuhu-tuhu kalak sierkemalangan man Tuhan melumbar ia mere man ise saja simbutuhken penampat.

5.      Jadi kemalemen ate siigejapken pemazmur la saja ngaloken pemere-pemere Tuhan, tapi ngasup nggeluh ibas kesabaren ras pengarapen ibas penampat Tuhan, bagepe ngasup mpergunaken pemere-pemere Tuhan guna simehuli, termasuk nampati teman simbutuhken penampat.

 

APLIKASI

            Kekelengen eme sada karakter kristen, siharus sincidahken ibas kegeluhenta tep-tep wari. Bagepe kekelengen e ulih Kesah Si Badia (band. Galati 5:22). Jadi nehken kekelengen eme tugas selaku  kalak kristen.

            Nehken kekelengen harus min ndarat ibas pusuhta nari, emaka ibas kita nehken kekelengen ula min lit bas kita nari ngarapken balas bas manusia, tapi tuhu-tuhu murni guna nampati. Gelah lit pengertinta  kerna sibage tentuna harus sigejapken lebe, kita nehken kekelengen erkite-kiteken nggo leben kita ikelengi Tuhan. Kita ndatken kekelengen ibas Tuhan nari erkite-kiteken mekuah ate Tuhan nandangi kita.

            Kita banci ndalanken kekelengen adi mbiar kita man Tuhan. Sebab ibas kita mbiar man TUhan maka kita nggit ndalanken kai siiperentahkenNa. Erkite-kiteken kita banci ndalanken perentah Tuhan je me sigejapken kemalemen ate,sebab kita banci muat bagin ibas sura-sura Tuhan simbelin nandangi kerina tinepaNa.

 

Pdt. Steven Kumenit, STh.M.Min.

Dibata Nehken PadanNa, Tetap Ukurta (Josua 21:43-45)


BAHAN PEKAN PENATALAYANAN

GEREJA GBKP

SENIN, WARI II, 19 JANUARI 2015

Invocatio   :    Tek Abraham man Dibata, janah ipasu-pasuNa ia. Bage me pe kerina kalak si tek man Dibata ipasu-pasu bagi Abraham (Galati 3:9).

Ogen         :    Mazmur 65:5-14.

Khotbah    :    Josua 21:43-45.

Tema         :    Dibata Nehken PadanNa, Tetap Ukurta.

 

LATAR BELAKANG

1.      Ndauh ope bangsa Israel jadi sada bangsa, arah nini-nini bangsa Israel, tanah Kanaan nggo ipadanken Tuhan jadi sikerajangan bangsa Israel (Band. Kejadin 12:7). Emaka kenca kesusuren Abraham jadi sada bangsa, Ibaba Tuhan me  bangsa Israel ku Taneh Kanaan, janah ibereken Tuhan taneh Kanaan e man bangsa Israel guna iiani ras ngusahai taneh e.

2.      Taneh Kanaan ibagi sue ras jumlah suku bangsa Israel eme 12 suku bangsa. Kepeken la saja taneh siibereken Tuhan man bangsa Israel tapi pe kerna  keamananna. Emaka ibas bangsa Israel ngiani taneh Kanaan e bangsa Israel nggeluh alu aman, sebab Tuhan kap sinjagai ia. Perlu siteh, amin gia bangsa Israel nggo ngiani taneh Kanaan, tapi  lit denga musuh-musuh bangsa Israel si lenga italuken, emaka musuh-musuh enda me sirusur  ngelawan ras atena naluken bangsa Israel, tapi erkiteken Tuhan sinjaga bangsa Israel, maka kerina musuh-musuh bangsa Israel talu ibahan Tuhan.

3.      Padan Tuhan isehken man Abraham ras kesusuren Abraham (bangsa Israel) adi kesusuren Abraham tetap patuh man Tuhan, Tuhan tuhu-tuhu jadi Tuhanna sedekah geluhna. Enda me palas maka Tuhan mereken keamanan man bangsa Israel sedekah ia tading I taneh Kanaan.

4.      Padan Tuhan la saja mereken taneh Kanaan ras Keamanan man bangsa Israel sedekah tading i taneh Kanaan tapi pe pasu-pasu Tuhan guna kesejahteraan bangsa Israel eme mereken kemajun pertanian ras ekonomi bangsa Israel.

5.      Ibas kesetiaan Tuhan nandangi PadanNa, maka bangsa Isreal nggo banci ngiani taneh Kanaan alu mejuah-juah. Tapi bangsa Israel harus nginget, maka bangsa israel lit ibas perlindungen Tuhan gelah bangsa Israel sadar maka ia eme bangsa Tuhan, bangsa Israel alat Tuhan, siharus ndalanken sura-sura Tuhan i tengah-tengah doni enda. Emaka sipaling penting man bangsa Israel ibas njaga kesetiaan Tuhan, bagepegelah bangsa Israel nggeluh alu mejuah-juah, maka bangsa Israel harus setia ka ibas perpadanan singgo irakut nini-ninina ndube (band. Kejadin 17).

 

APLIKASI

            Adi sinen ibas sejarah perpadanan Tuhan, siibenaken arah Abraham (band. Kejadin 17) seh ku Yesus, bagepe penemani Tuhan man banta arah Kesah Si Badia, maka dat sada kesimpulan, Tuhan la pernah mobah ibas padanNa. Kesetiaan Tuhan ibas PerpadananNa man banta la saja mereken keamaman, tapi pe kejuah-juahen ras ketetapan ukur. Sebab ateNa gelah kita nggeluh ibas keselamatan. Emaka amin gia kita jumpa perbeben ras kiniseran,adi kita erlebuh man Tuhan maka minter isampatiNa. Bagepe adi nggo erdosa, tapi adi reh kita man Tuhan mindo pengalemi dosa, maka ialemiNa nge kita. Jadi ate Tuhan, kita enda tinepaNa, ras kita enda sikerajangenNa, la ateNa kita bene ibas persadan e, tapi sebalikna gelah erteguhna nge persadanta ras Ia. Emaka tetaplah ukurta ibas ndalani wari-wari enda, sebab Tuhan tetap ras kita. PadanNa tetap nemani ras mereken keselamatan man banta. Saja ibas kesetiaan Tuhan tetap nemani ras masu-masu kita, kita pe harus setia ka ersembah man baNa, janah ndalanken kai singena ateNa ibas kegeluhenta tep-tep wari.

 

Pdt. Steven Kumenit, STh.M.Min 

Idilo Guna Jadi Pasu-Pasu (Kejadian 12:1-3)

BAHAN PEKAN PENATALAYANAN
GEREJA GBKP
MINGGU, WARI I, 18 JANUARI 2015.
==========================================================================
Invocatio   :     Kerina bangsa-bangsa mindo denggo bangKu gelah Kupasu-pasu ia bagi enggo Kupasu-pasu kesusurenndu e me perban kam erkemalangen man perentahKu (Kejadin 22:18).
Ogen         :     Roma 8:28-30
Khotbah    :     Kejadin 12:1-3.
Tema         :     Idilo Guna Jadi Pasu-Pasu.

 

LATAR BELAKANG
1.      Tuhan ndilo Abram paksa Abram  tading  i Haran denga. Sura-sura Tuhan gelah Abram nadingken kuta Haran ras njadiken sada bangsa simbelin. Ibas pendilo Tuhan man Abram enda, lit sada padan Tuhan man bana eme pasu-pasu Tuhan. Pasu-pasu Tuhan lit 4 hal eme : 1). Nterem ibahan Tuhan sinursur Abram. 2). Tuhan masu-masu ras ibahanNa terberita gelar Abram. 3). Arah Abram, nterem kalak dat pasu-pasu. 4). Ipasu-pasu Tuhan kalak simasu-masu Abram, tapi isumpahi Tuhan kalak sinumpahi Abram.

2.      Pendilo Tuhan man Abram ibas rangka gelah kerina manusia ndatken pasu-pasu ibas Tuhan nari, ntah pe ndatken keselamaten. Sebab ate Tuhan manusia tinepaNa e  nadingken dosana, janah nggeluh ibas pasu-pasu Tuhan.

3.      Pendilo Tuhan man Abram, la saja nadingken kutana, tapi pe nadingken  kiniteken siianut Abram ras keluargana tupung i Ur kasdim seh i Haran. Sabab pendilo Tuhan man Abram, ibas rangka njadiken Abram jadi alat Tuhan, emaka gelah ipasu-pasu Tuhan, maka Abram harus nadingken kiniteken ras agamana tupung ia tading i Urkasdim ras Haran janah man Tuhan saja Abram  harus ersembah.

4.      Sura-sura Tuhan simbelin e ipercayakenNa man Abram, tapi gelah tetap ukur Abram ngaloken pendilo Tuhan e, nina Tuhan kupasu-pasu kalak simasu-masu kam, tapi kusumpahi kalak sinumpahi Abram. Enda merupaken sada bentuk penemani Tuhan man Abram. Bagepe gelah gelar Abram terberita.

5.      Pemilihan Abram jadi alat Tuhan guna masu-masu kerina manusia eme hak preogatif Tuhan.Sebab banci saja lit sada penungkunen, ngkai maka la Lut ntah sidebanna. Tentuna enda harus sinen ibas kedaulatan Tuhan. Bagepe kenca Tuhan milih Abram ras mereken padan man Abram, mulai I je nari me pemasu-masun Tuhan man kerina manusia,sebab mulai I je nari Abram nadingken kutana, janah alu demkepatuhen iikutkenna perintah Tuhan.

 

APLIKASI

            Harus sisadari kita enda pe nggo idilo Tuhan selaku anak-anakNa. Kita jadi kristen erkite-kiteken pendilo Tuhan man man banta. Tapi pe harus siinget pendilo Tuhan man banta ibas rangka jadi alat Tuhan gelah kalak sideban pe ndatken pasu-pasu bas Tuhan nari.

            Adi sioge ibas 1Petrus 2:9, I je ikataken kita enda bangsa pilihen Tuhan, bagepe kita idilo Tuhan ibas sigelap nari bengket ku Terang ibas rangka mberitaken perbahanen-perbahanen Tuhan simbelin. Enda me dahinta selaku kalak singgo ipilih Tuhan. Kita harus mberitaken Berita simehuli man kalaksideban. Kita harus mberitaken kerna Yesus Kristus selaku Tuhan ras Juru Selamatta. Alu bage ise sitek man Yesus ndatken keselamatan (Band. Yohanes 3:16). Bagepe tanggungjawabta tole eme mereken sada ketetapan ukur man kalak sideban, kerna Tuhan ras kita (Band. Matius 1:23). Alu bage la aru ateta ndalani kegeluhen I tengah-tengah doni enda. Ibas perbahanen sibageme kalak sideban ipasu-pasu Tuhan arah kita.

 

Pdt.Steven Kumenit, STh.M.Min