Selasa, 26 Mei 2015

Meriahlah Ras Kerina Jelama (Pluralisme) - Roma 12:14-18



PERPULUNGEN JABU-JABU
GEREJA GBKP
TANGGAL 31 MEI – 6 JUNI 2015.
Roma 12 : 14-18

Tema : Meriahlah Ras Kerina Jelama (Pluralisme)

LATAR BELAKANG
1.      Secara umum banci sikataken perpulungen Roma labo Paulus simantekisa, tapi lit piga-piga alasan engkai maka Paulus nulis surat man perpulungen Roma, bagi siibahanna man perpulungen-perpulungen siipantekina, iantara alasen si lit eme la saja Paulus mpersiapken kerehenna man perpulungen Roma, tapi ate Paulus gelah perpulungen Roma banci lebih nggejapken kerna perkuah ate Tuhan si mbelin siisehkenNa man perpulungen Roma. Tujunna eme gelah perpulungen Roma termotivasi erbahan simehuli singena ate Tuhan, selaku kalak sitek man Yesus Kristus. Ibas erti kata “pembenaran” sienggo ibereken Tuhan, harus teridah ibas kegeluhen tep-tep wari.
2.      Paulus mereken kata kata persinget gelah perpulungen nggeluh sikeleng-kelengen sapih-sapih ia kalak kristen, tapi uga kekelengen e arus teridah pe nandangi kalak sideban, khususna kalak siernembeh ate man bana. Enda ikataken Paulus, sebab paksa sie perkembangen kekristenan ndatken tantangan-tantangan sicukup mbelin ibas kalak darat nari, subuk ibas pemerintah nari, bagepe kalak sideban. Tantangan-tantangan enda banci erbahanca turah emosi man kalak kristen. Erkiteken nggo emosi maka kalak kristen melasken kata sumpah/“kutuk” nandangi kalak siernembeh ate man bana. Perlu siteh ibas pasu-pasu ras sumpah/kutuk eme sada persoalen siserius. Sebab ibas kita mbelasken pasu-pasu berarti mbaba kemalemen ate nandangi kalak sideban. Tapi adi sibelasken kata kutuk, berarti mbaba kecelakaan nandangi kalak sideban.
3.      Enda ipersingeti Paulus gelah perpulungen Roma meteh, ia berbeda ras kalak sideban. Perpulungen Roma eme kalak kristen. Selaku kalak kristen, karakter Kristus arus nggeluh bas ia. Ibas erti kata, kalak kristen la banci kejahatan/penganiayaan siseh man bana  alu mbalas alu cara numpahi/ “mengutuk” man musuh e, tapi arus masu-masu ia (band. Lukas 23:34).
4.      Ipihak sideban selaku perpulungen biak nggeluh sada penggejapen arus teridah ras ipraktekken. Selaku kalak kristen nggeluh sada penggejapen mbaba ikateken siharmonis. Bagepe ngerakut persadan sapih-sapih kalak kristen. Emaka penting man kalak kristen nggeluh ibas kiniteruken ukur sada ras sidebanna. Tapi sebalikna adi lit simeganjang ukur maka enda banci mpeturah perpecahan ibas gereja.
5.      Mbalas kejahaten alu kejahatan merupaken hal sisalah. Erkiteken,  kalak sitek harus tetap njaga hubungen persadan ras kalak sideban, labo saja sapih-sapih ia perpulungen, tapi pe nandangi kalak sideban, gelah ngena ate kalak nandangi kegeluhen ras biak kalak sitek man Tuhan Yesus Kristus. Sebab selaku kalak sitek kedamen merupaken hal siharus ipegeluhken ibas perpulungen ras ibas masyarakat.

APLIKASI
            Arus siinget kita nggeluh ibas kinierbagen, subuk sara, golongan ras agama. Sebab memang bage kin bentuk negaranta. Tapi sigejap min ibas litna kinierbagen enda, sada hal banci mbaba kiniulin, tapi ipihak sideban rentan alu masalah.
            Persoalen sijadi ibas kita nggeluh ibas kinierbagen, lit sierpengakap maka ia simejilena, ntah pe ia siarus man ikutenken. Ntah pe ibas nggeluh beragama, atena agamana saja siarus nggeluh i je, emaka agama sideban, termasuk agama kristen la banci nggeluh i Indonesia enda. Emaka siidah seh genduari cukup mesera agama kristen majekken gedung gereja, erkiteken la dat ijin ibas pemerintah nari. Bagepe promosi jabatan man kalak kristen rusur dat hambatan, rsd. Kerina enda mbaba emosi man banta. Tapi arus siinget, amin gia lit masalah man banta ibas nggeluh ibas kinierbagen e, ula min bene kinitekenta, tapi kita arus tetap megegeh, kita tetap arus ertoto man Tuhan, ras ula kal sibalas kejahatan alu kejahatan. Sebab ibas kita ngelakoken sibage maka ngena ate kalak man banta. Bagepe ipihak sideban kita arus menghargai kalak sideban, subuk budayana ras agamana. Gelah kita tetap nggeluh sikeleng-kelengen ibas bermasyarakat ras beragama.

Pdt. Steven Kumenit, STh.M.Min.  

Rabu, 20 Mei 2015

Idemi Kesah Si Badia (Galatia 5:22-26)



PERPULUNGEN JABU-JABU
GEREJA GBKP
TANGGAL 24-30 MEI 2015.
Galati 5:22-26

Tema : Idemi Kesah Si Badia

LATAR BELAKANG
1.      Secara umum Kitab Galati enda eme surat rasul Paulus man perpulungen Galati, janah fungsina eme guna menasehati perpulungen, sebab paksa sie lit kelompok kristen asal Yahudi sitetap njemak ajaran agama Yahudi. Ajaran enda ngataken keselamatan labo bias adi terjeng tek man Yesus Kristus saja, tapi pe harus ngikuti Taurat, khususna kerna sunat, emaka ajaran enda erbahan “kebingungan man perpulungen, bagepe nggo lit siterikut kubas ajaran e. Bagepe masalah sideban eme lit “hasutan-hasutan” gelah perpulungen ngelawan Paulus, sebab Paulus labo rasul.  Enda ibahan Paulus sebab, perpulungen Galati, Paulus sendiri kap simantekisa.      
2.      Ibas pandangan Paulus kerna kalak si enggo tek man Tuhan Yesus Kristus eme bebas ibas kutukan Hukum taurat. Siimaksudkan kutukan hukum Taurat eme sada pandangan singataken maka arah hukum taurat, ntah ibas patuh ndalanken hukum taurat  ngenca maka manusia banci selamat.  Paulus ngataken enda sebab keselamatan labo arah ndalanken hal-hal si formalitas agama khususna kerna sunat, tapi kerna tek man Tuhan saja. Jadi kalak si enggo bebas lanai ia terikat man hukum taurat tapi ndalanken kai singena ate Tuhan. Janah enda me siikataken pendahin Kesah Si Badia.
3.      Paulus mereken penjelasan kerna makna kalak si enggo tek man Yesus Kristus, ija kalak si enggo tek man Yesus Kristus berarti “kerincuhen daging”  lanai ngkuasai dirina, sebab sipat-sipat kedagingan enggo mate i kayu persilang, tapi si lit eme ulih Kesah Si Badia. Ulih Kesah Si Badia lit erkiteken batang si mejile, janah batang e eme Yesus Kristus (band. Yohanes 15).
4.      Paulus makekan kata buah (band. Bahasa Karo = ulih) gelah mpertegas kerna makna buah, ija buah e la pernah iban, tapi jadi alu sendirina. Sehubungen ras si enda, ate Paulus ngataken man perpulungen perbahanan simehuli jadi alu sendirina erkiteken nggeluh ras Jesus Kristus. Janah Ulih Kesah Si Badia sipatna eme mpersadaken manusia ras Jesus.
5.       Nasehat Paulus man perpulungen i Galati enda khususna kerna ulih Kesah si Badia eme gelah pepulungen nggeluh ibas ulu kegeluhen eme Kesah Si Badia. Jadi, kegeluhen situhu-tuhu merupaken penekanan Paulus. Perpulungen Galati enggo nggeluh erpalasken Kesah Si Badia emaka ula min bene keselamaten e erkiteken  kerincuhan dagingna. Sebab adi bas perpulungen lit meganjang ukur, la lit kekelengen, la lit kesabaren, erbahan si la mehuli ras la ngasup ngkuasai dirina, rsd berarti nggo ngelawan Kesah Si Badia, emaka ije lanai lit keriahen ras kemalemen ate. Jadi alu litna ulih Kesah Si Badia ibas diri anggota perpulungen maka siterjadi i tengah-tengah perpulungen eme hubungen si harmonis, bagepe perpulungen ndalanken kai siisura-suraken Kesah Si Badia, alu bage maka la bo sia-sia kematen Yesus Kristus i kayu persilang.

APLIKASI
            Ibas kita mperingeti  minggu nusurna Kesah Si Badia, maka perlu siteh Kesah Si Badia eme Tuhan sendiri. Janah fungsi Kesah Si Badia nampati kita gelah kita tetap nggeluh badia ras nggeluh ibas persadan ras Jesus Kristus.
            Adi siperdiatekenkegeluhen kalak kristen, nterem denga simprakteken kegeluhen si la ngena ate Tuhan. Situhuna perbahanen sibage ngataken maka ia lenga idemi Kesah Si Badia. Sebab kalak siidemi Kesah Si Badia eme kalak situhu-tuhu nggeluh ibas simehuli (band. 9 ulih Kesah Si Badia ibas Galati 5:22-23).
            Adi ateta nggeluh ibas Kesah Si Badia maka kita arus mpediat Kesah Si Badia erdahin bas pusuhta. Carana Kesah Si Badia nggeluh eme kita arus ertoto, tutus ku perpulungen ras ku kebaktin gereja. Kerina enda arus ilakoken alu meriah ukur. Sebab ibas kita tutus maka terjadi me internalisasi kegeluhen. Emaka lanai kita simerentah dirinta, tapi nggo Tuhan. Alu bage kita idemi Kesah Si Badia. Adi nggo idemi Kesah Si Badia maka alu sendirina lit me bas kita nari ulih Kesah Si Badia.

Pdt. Steven Kumenit, STh.M.Min.

Sabtu, 16 Mei 2015

Ertoto Guna Aron Dibata (1 Korintus 3:8-9)



PEKAN DOA
GEREJA GBKP
WARI VII, 23 MEI 2015
Invocatio    :    Sekalak-sekalakkam arus mperdiateken keperlun kalak sideban (Roma 12:16a)
Ogen          :    1 Petrus 2:9-10.
Renungan   :    1 Korinti 3:8-9.
Tema          :    Ertoto Guna Aron Dibata.

LATAR BELAKANG
1.      Perpulungen Korinti eme perpulungen siipanteki Paulus ibas kurang lebih tahun 50 SM,  paksa perdalanen missionaris peduaken guna nehken Berita si meriah. Tapi ibas perdalanen waktu, perpulungen Korinti nggeluh ibas kelompok-kelompok. Lit kelompok Apolos, lit kelompok Petrus/Kefas ras lit kelompok Paulus. Telu kelompok enda la sicocoken (labo Paulus, Apolos ras Petrus/kefas si la cocoken e tapi pengikut-pengikutna). Tentuna ibas situasi sibagenda banci mpengaruhi kegeluhen persadan gereja ras dungna gereja banci pecah. Padahal selaku gereja harus min nggeluh sikeleng-kelengen ras nggeluh ibas persadan. 
2.      Ibas situasi sibagenda reh surat Paulus guna mpersingeti perpulungen Korinti, gelah perpulungen Korinti banci ngangkai eksistensina  selaku kalak sierkiniteken man Tuhan Dibata. Ibas nggambarken kerna kiniteken perpulungen Korinti, Paulus ngataken maka perpulungen Korinti lenga dewasa kegeluhen pertendinna, emaka Paulus ngerana man perpulungen bagi ngerana man kalak si medanak denga kinitekenna man Kristus. Emaka susu dungna inemenna siibereken Paulus, labo nakan keras. Alu kata sideban Paulus la banci ngerana man perpulungen Korinti selaku “manusia rohani”, sebab si lit man perpulungen eme cian ate ras perselisihan. Enda ikataken Paulus erkiteken Perpulungen Korinti “kepentaren doni ras kesenangen doni siiayakina”.  Jadi memang Paulus agak kecewa, sebab kepeken perpulungen lenga berubah. Seharuna perpulungen kenca ngaloken Kristus, lit sada perubahan ibas kegeluhenna. Biak-biak daging (doni) lanai erkuasa ibas kegeluhenna, tapi enda lit denga.  
3.      Memang lit sada perbedaan ibas gaya ngelai antara Paulus ras Apolos, tapi labo berarti gaya e erbahanca perpulungen nggeluh ibas kelompok-kelompok, lang.  Harus siteh Paulus ras Apolos eme serayan Tuhan, janah erdahin sue ras “talenta” siibereken Tuhan gelah kiniteken perpulungen jadi dewasa.
4.      Guna ngambarken dahin masing-masing, Paulus makeken gambaran dunia pertanian, ija Paulus si nuan janah Apolos siniramsa, enda ate Paulus gelah perpulungen meteh maka subuk Paulus ras Apolos eme sada kesatuan ibas pelayanan. Jadi amin gia Paulus leben reh asangken Apolos, labo berarti kai sienggo isuanken Paulus bene, lang, kerina enda  lebih bertumbuh ibas pelayanan Apolos, emaka ula min perpulungen mebeda-bedaken kerina enda, terlebih nggeluh ibas sada golongan.
5.      Penekanan Paulus sipaling inti eme Dibata. Sebab penggejapen Paulus pertumbuhen perpulungen e erkiteken Dibata, Dibata sipeturahsa, labo Paulus ntah pe Apolos. Paulus ras Apolos eme sada aron, emaka la lit siganjang terukan ibas ia duana. Emaka situhuna la lit ertina pendahin Paulus ras Apolos adi Dibata la erperan.

APLIKASI
            Adi  ngerana kita kerna gereja maka kita ngerana kerna persadan, emaka biak kegeluhen ibas gereja eme nggeluh ras-ras, labo nggeluh sisada-sisada. Kegeluhen nggeluh ras-ras lebih banci mbue terdahiken ras mpercepat dahin-dahin gereja tersehi. Emaka kegeluhen sisada-sisada (egois),  simementingken diri sendiri ntah pe kelompok harus iambengken. Sebab kegeluhen sibage peturah perpecahen ibas persadan gereja.
            Kegeluhen bersinergi (kegiatan yang dilakukan secara bersama-sama), e harus nggeluh ibas gereja, sebab ibas pelayanan gereja banci sikataken kerina berhubungen. Emaka subuk seksi-seksi silit, bagepe kategorial ras perpulungen jabu-jabu harus lit kerja sama ibas pelayanan. Janah enda me siikataken Aron Dibata.
            Arus siinget Fungsi gereja eme menghadirkan Syalom Tuhan i tengah-tengah doni enda. Ntah pe menhadirkan Kerajaan Tuhan ibas doni enda. Erkiteken sie me kita selaku Aron Tuhan (kalak si tek) arus la erngadi-ngadi ras la ermedu-medu ndalanken ras mpraktekken keleng ate Tuhan i tengah-tengah doni enda. Sebab selain kita Aron Tuhan, kita enda eme bangsa pilihen Tuhan singgo iselamatken guna mberitaken perbahanen-perbahanen Tuhan simbelin. Alu bage kita manusia nggeluh ibas keselamaten.

 Pdt. Steven Kumenit, STh.,M.Min.

Ertoto Guna Program Pelayanan GBKP (Mazmur85:9-14)



PEKAN DOA
GEREJA GBKP
WARI VI, JUMAT 22 MEI 2015.
Invocatio    :    Adi kam tetap ibas aku dingen katangKu tetap nggeluh ibas kam, banci ipindondu kai pe atendu, janah ialokenndu me kai siipindondu e (Jahanes 15:7).
Ogen          :    Matius 5:13-16.
Khotbah     :    Mazmur 85:9-14.
Tema          :    Ertoto Guna Program Pelayanan GBKP

LATAR BELAKANG
1.      Secara umum banci sikataken Mazmur 85 enda eme Mazmur perngandungen, erkite-kiteken kenca bangsa Israel mulih ibas taneh pembuangen nari eme Babel. Idapeti bangsa Israel taneh kemulihenna nggo ceda.ibas suasana sibage ertoto pemazmur simewakili bangsa Israel gelah Tuhan mperdiateken kegeluhen bangsaNa.
2.      Pemazmur tek maka Tuhan tading denga i Israel, janah nggo ersikap guna ngkelengi kalak situtus. Perlu siteh siimaksudken Tuhan tading denga i Israel erkite-kiteken rumah pertoton Tuhan i Sion, i Yerusalem, janah Rumah Pertoton e,  je me Tuhan ringan.
3.      Ibas pengakun Pemazmur banci lit pemulihen man bangsa Israel adi bangsa Israel jera ibas dosa nari, ras tutus ndalanken kai singena ate Tuhan. Pemazmur ngidah, Pemulihen hanya banci lit adi bangsa Israel megiken kai siisura-suraken Tuhan. Erkiteken sie me ersura-sura kal pemazmur megiken Kata Tuhan ras dalankenca. Je me ketedehen ate Pemazmur nandangi Kata Tuhan. Sebab sada ngenca sura-surana eme nggeluh ibas pemulihen. Sebab ibas pemulihen, lit i je kedamen ras kemalemen ate. Ipihak sideban, iinget pemazmur denga kerna padan Tuhan. Padan Tuhan eme berekenna kedamen man bangsa Israel adi bangsa Israel nadingken dosa-dosana. Enda ikataken Tuhan sebab la kal ate Tuhan bangsaNa nggeluh ibas dosa ras la lit ibas kedamen.
4.      Keleng ate Tuhan la ibereken Tuhan bage-bage saja, tapi iberekenNa adi bangsa Israel nggit jera ras ndalanken kataNa.  Jadi kalak simbiar ras nggit nggeluh ibas keselamatan saja ibereken Tuhan keleng ateNa e, khususna keadilan ras kedamen.
5.      Keleng ate Tuhan simbaba kedamen ras keriahen ukur, la saja man manusia saja, tapi pe man teneh. Sebab taneh banci mereken hasil, emaka sampur hasil juma bangsa Israel. Alu bage kai sipernah inanami bangsa Israel ndube kerna kesejahteraan, bagepe keadilan ras kedamen nggeluh mulihi.

APLIKASI
            GBKP eme alat Tuhan guna nelamatken manusia ras doni enda. Ibas rangka sie me maka gereja GBKP, subuk tingkat Sinodal, Klasis ras Runggun arus erbahan program. Janah program enda banci nggeluh adi idalanken runggun gereja, bagepe anggota perpulungen. Memang secara klasik, program pelayanan la erdalan erkite-kiteken keuangan la lit. Tapi situhuna adi sinen terdauhen, masalahna labo ibas keuangan, tapi ibas kita. Mekatep la erdalen program e erkite-kiteken la nggit kita dalankenca. Erkiteken sie me merupaken sada kearusen man banta guna notoken program pelayanan gereja gelah banci erdalan alu mehuli. Ibas program enda erdalan maka adi anggota perpulungen ngikuti alu mehuli ka maka kiniteken  anggota perpulungen erdewasana, bagepe secara umum kita banci muat bagin ibas program-program sosial eme nampati senina turangta sikena musibah banjir, taneh longsor, gunung meletus, rsd.
            Bagepe ibas kita ertoto guna program pelayanen gereja, gelah program-program gereja tuhu-tuhu menyentuh pelayanan anggota perpulungen ras guna keselamaten jelma sinterem.

Pdt. Steven Kumenit, STh.M.Min.