Etika Kerja Kalak Kristen (Amsal 20:13; Kejadian 3:17-19)

PERPULUNGEN JABU-JABU

GEREJA GBKP

TANGGAL28 JUNI – 4 JULI 2015.

Kuan-Kuanen 20:13; Kejadin 3:17-19.

Tema : Etika Kerja Kalak Kristen

LATAR BELAKANG

A.    Kuan – Kuanen 20:13.

1. Salah sada tujun kitab Kuan-kuanen eme gelah lit sada keberhasilan, sebab kitab Kuan-kuanen enda nuratken piga-piga petunjuk guna nggeluh ibas keberhasilan. Gelah she ku je, maka kitab Kuan-kuanen enda rusur ncidahken hal si positif ras negatif, gelah simegi (anak) banci meteh simehuli ras ndalanken simehuli, sebab si mehuli e mpereh keberhasilan.  Ipihak si deban tujun  Kuan-kuanen enda guna mendidik anak-anak.
2. Ibas oratenta pengamsal mereken sada kata pejemba man  anak-anak gelah mperdiateken waktu. Waktu e penting ibas kesuksesan. Sebab waktu berhubungen ras erdahin. Emaka kalak simpergunaken waktu simehuli guna erdahin, ia me kalak si mejingkat. Ulin kalak simejingkat erdahin eme cukup nakanna. Emaka isehken  man anak-anak gelah ula dekahen   medem  asangkan waktu erdahin. Sebab adi dekahan medem, ulihna eme kemusilen.

B.     Kejadin 3:17-19.

1. Manusia (Adam ras Hawa) nggo ngelakoken dosa. Nggo ipanna buah kayu si lit i tengah peken, siilarang Tuhan. (band. Pohon pengetahuna yang baik dan jahat). Erkiteken sie merawa Tuhan, emaka ihukunma manusia alu 1).  Erdahin guna ngusahai kidekah geluh manusia. 2). Dukut-dukut ras Sinuan-sinuan erduri turah ibas taneh enda. 3). Arus gegehina erdahin alu curcur panas seh mate gelah dat hasil. Maksudna segedang-gedang geluh manusia, kebutuhenna tergantung  ku bas taneh nari.
2. Manusia erdahin gelah manusia banci ndatken kebutuhen-kebutuhenna tep-tep wari. Memang ope denga manusia erdosa. Paksa ia tading i peken Eden. Kebutuhen-kebuthenna terpenuhi kerina, janah la perlu manusia erdahin alu latih. Isekitarna nggo tersedia, dahinna terjeng njaga ras ngusahai ngenca.
3.  Hukuman siibereken Tuhan man manusia, gelah manusia sadar maka adi erdosa man Tuhan lit hukumenna. Emaka ibas ia erdahin ndarami ras ndatken kebutuhen geluhna, manusia arus nggeluh patuh ras erkemalangan man Tuhan, gelah ipasu-pasu Tuhan kegeluhenna.

APLIKASI

Ibas pemahaman Calvin kerna erdahin eme kalak siipilih Dibata teridah ibas kegeluhenna sitep-tep wari, termasuk ibas erdahin. Emaka kalak si tutus erdahin, aktif bekerja keras, ncidahken bukti man dirina sendiri ras man kalak sideban maka ia eme kalak siterpilih, tapi sebalikna kalak sibiasa-biasa saja ras ncidahken kemalasan banci sipastiken ia sekalak sikena sumpah/kutuk.

Ibas zaman sigenduari teridah reh teremna kalak siperkisat, janah adi ia erdahin, siibahanna eme si la ngena ate Dibata, eme korupsi ntah pe erbahan si la bujur. Enda tentuna la mehuli. Memang perlu kita sen, tapi ula min erkiteken sen e sirang kita ras Tuhan. Tapi marilah selaku kita kalak kristen harus erdahin, lapangan pekerjaan melala, janah adi erdahin kita arus sidahiken alu mehuli, sebab ibas kita erdahin berarti kita enggo patuh man Tuhan, janah erdahin merupaken sada ibadah man Tuhan.

            Jadi ibas kita erdahin, la saja guna kita, tapi guna kemulian Tuhan. Emaka ibas kita erdahin, arus sicidahken etika erdahin eme 1). Tutus erdahin. 2). Jujur. 3). Tepat waktu. 4). Erdahin alu meriah ukur.5). rsd.

Pdt. Steven Kumenit, STh.M.Min.

Erti Ras Makna Liturgi (Yesaya 6:1-8)

PERPULUNGEN JABU-JABU

GEREJA GBKP

TANGGAL 21-27 JUNI 2015.

Jesaya 6:1-8.

Tema : Erti Ras Makna Liturgi

LATAR BELAKANG

1.      Bangsa Yehuda selaku bangsa Tuhan nggo nggeluh erbana-bana, lanai mbiar man Tuhan. Ibas kegeluhen bangsa Jehuda, la lit keadilan, kalak sierkuasa menindas si lemah, pejabat erbahan koropsi, nembah man berhala, bagepe tupung bangsa Mesir ras Samaria atena nerang bangsa Yehuda, padin akapna mindo penampat man bangsa Asyur asangkan man Tuhan. Kegeluhen sibage, searusna la lit man bangsa Yehuda. Erkite-kiteken sie  maka merawa Tuhan man bana. Emaka Ate Tuhan menghukum bangsa Yehuda. Emaka guna mpeseh berita penghukuman enda, Tuhan ndilo Yesaya jadi nabiNa.

2.      Ibas pendilo Tuhan man Jesaya, ibenaken alu sada pengenehenen Jesaya. Iidah Jesaya Tuhan ras malekatNa ibas Rumah Pertoton. Erkiteken  nggo idahna Tuhan maka igejapna maka sekali enda, ia mate, sebab la saja erkite-kiteken ia erdosa, tapi pe Jesaya tading ras bangsa sierdosa. Bagepe Tuhan sendiri singatakenca ise pe singidah Ia, maka ia arus mate (band. Keluaran 33:20). Tapi reh Maleket Serafim,  ibuatna rara ibas batar-batar persembahen  nari, jenari ikuitna bibir Jesaya alu rara e, emaka dosa-dosa Jesaya nggo masap. Kenca Jesaya ipebadiaken, ibegina sora Tuhan, nina: ise ndia Ku suruh? Ise ndi nggit maba berita ibas aku nari ? emaka ialoi Jesaya : enda aku suruhlah aku.

3.      Jesaya nggit iutus erkite-kiteken lit kesadaran diri guna jadi alat Tuhan ras mperobahi kegeluhen bangsa Jehuda singgo erdosa man Tuhan. 

4.      Jesaya ibadiaken Tuhan, sebab selaku nabi arus nggeluh badia gelah lajadi batu antuken nandangi bangsa Jehuda. Kegeluhen si badia mereken sada kinipangen guna nehken sura-sura Dibata man bangsa Jehuda.

5.      Pengenehenen Jesaya enda terjadi ibas Rumah pertoton tupung kebaktin.

APLIKASI

            Seh genduari lit denga anggota perpulungen sikurang denga pengangkanna kerna liturgi. Akapna liturgi eme ngoge pustaka Si Badia, bagi siterjadi ibas kebaktin Natal. Padahal liturgi ipahami ibas 2 hal, eme : 1). Pelayanan kita, ntah pe pengabdian kita man Tuhan guna kiniulin doni enda. 2). Tata cara ibas kebaktin. Janah 2 pengertin enda la banci ipisahkan. Sebab kenca kita ersembah man Tuhan ibas kebaktin, maka selanjutna, kita arus ncidahken ntah pe mengaplikasikan ibas kegeluhenta si tep-tep wari.

            Liturgi ibas kebaktinta arus merupaken sada ikaten siutuh ras berkesinambungan. Sebab adi la lit keutuhan ras ikaten siberkesinambungan, maka kebaktinta la lit ertina. Bagepe penempatan ende-enden arus cocok ras unsur-unsur liturgi. Emaka liturgi penting ibas kebaktin.

            Erbahan liturgi kebaktin, la kerina banci. Kalak singgo ndatken pendidikan teologi ngenca sibanci erbahan liturgi kebaktin. Sebab kalak si nggo ndatken pendidikan teologi, nggo tehna susunan liturgi simehuli. Bagepe adi anggota perpulungen ngikuti kebaktin alu unsur-unsur si lit ibas liturgi, bagepe kai siikataken ibas liturgi e, maka anggota perpulungen pasti ndatkenna kemalemen ate. Salah sada contoh eme anggota perpulungen arus ngikuti kebaktin ibas votum nari seh ku pemasu-masun. Bagepe kai siikataken ibas liturgi eme tedis ras kundul, rsd. Arus iikuti anggota perpulungen. Sebab kerina e lit makna.

            Adi siperdiateken oratenta, maka si la banci lang siarus lit ibas liturgi eme 1). Puji-pujin man Dibata, erkiteken Dibata e Badia. 2). Lit penggejapen, kita enda kalak si erdosa/Pengakun Dosa bas kita nari. 3). Pengalemi Dosa ibas Tuhan nari. 4). Ndengkehken Kata Dibata. 5). Pendilo guna iutus. 6). Ngendesken diri ibas pendilo ras pengutusen Dibata.

            Ngenen sienda maka ibas kebaktinta, arus terjadi sibage, emaka kegeluhenta ersembah man Tuhan, la terjeng ibas kebaktin saja, tapi kenca kita dung kebaktin, nggit kita ngelakoken simehuli singena ate Tuhan, tandana kita nggo iutus Tuhan.

Pdt. Steven Kumenit, STh.M.Min.   

Nehken Persepuluhen Alu Pusuh Si Bujur (Matius 23:23)

SERMON PJJ GBKP RUNGGUN KAMPUNG SUSUK

TANGGAL 14 – 20 JUNI 2015.

Matius 23 :23.

Tema : Nehken Persepuluhen Alu Pusuh Si Bujur.

LATAR BELAKANG

1.      Yesus ngerana man jelma sinterem ras man ajar-ajarNa, sekaligus mengkritik kegeluhen guru-guru agama. Sebab lit “kekecewaan” Yesus man guru-gurur agama.  ras kalak Farisi. Kekecewaan Yesus eme searusna min guru-guru agama ras kalak Farisi simeteh kerna hukum Taurat arus nggeluh mehuli, tapi kinatana lang. Erkite-kiten sie me, nina Yesus cilaka me kam guru-guru agama ras kalak Farisi. Adi si oge mulai ayat 13 – 27, lit 7 kali Yesus ngataken cilaka man guru-guru agama ras kalak Farisi. Janah sijadi oratenta, cilaka sipelimaken

2.       Yesus ngataken Cilaka man guru-guru agama ras kalak Farisi erkite-kiteken kemunafikenna. Perbahanenna la sue ras perkatanna. Melala siiajarkenna, tapi la bo ipraktekenna. Perbahanen-perbahanenna terjeng gelah iidah kalak , ia kalak simehuli, kalak situtus ibas beragama. Ibas  perbahanen-perbahanan sipekula-kula, siicidahken guru-guru agama ras kalak Farisi e, nggo iola-olangi kalak gelah ola bengket ibas Kinirajaan Surga.

3.      Khusus ibas oratenta, kerna persembahen persepuluhen siipersembahken guru-guru agama ras kalak Farisi, enggo iaplikasikenna seh ku rempah-rempah/bumbu dapur, sienda la salah. Tapi siikritik Yesus eme kerna sipenting ibas undang-undang lanai iperdiatekenna eme nehken keadilan, keleng ate ras kinibujuren la idalankenna.

4.      Guru-guru agama ras kalak Farisi ibas kegeluhen agama Jahudi eme ipercayaken ngerunggui masalah-masalah siterjadi ibas kalak Jahudi. Tapi ibas kinatana, la irungguina alu bujur. Erkiteken sie me hak sesekalak jelma guna ndatken keadilan lanai lit.

5.      Ate Yesus gelah jelma sinterem ras ajar-ajarNa banci meteh maka nehken persembahen persepuluhen aruslah iikuti perbahanen simehuli. Sebab sia-sia me persepuluhen siisehkenna adi la idalanken keadilan, keleng ate ras kinibujuren. Guru-gurur agama ras kalak Farisi mpraktekken kinilaadilen, la lit kekelengen ras la lit kebujuren bas ia.

APLIKASI

            Arah oratenta sekali enda, kita ipersingeti gelah ibas kita nehken persepuluhen arus rikutken pusuh sibujur ras perbahanen simehuli.

            Adi ngerana kita kerna idealna nehken persepuluhen, eme sada ibas sepuluh nari, ntah sepuluh persen. Tapi ibas kinatana, kita lenga pang nehken persepuluhen alu cara sibage. Padahal ibas kita nehken persepuluhen i je lit pengataken bujur man Melkisedek (band. Kej.14:20), gelah lit persediaan nakan ibas Rumah Tuhan (Maleaki 3:6-12), guna Tuhan (Imamat 27:30). Janah kegunan  persepuluhen e ibereken man kalak Lewi (Bilangan 18:21,24; Ulangan 18:1-8), bagepe man kalak pertandang, anak melumang ras diberu balu-balu (Ulangan 14:29; 26:12). Tapi man gerejanta (GBKP) persepuluhen lanai iendesken bagi siikataken ibas pustaka Si Badia ndai, tapi kerina enda ipakeken ku bas pelayanan gereja GBKP.

            Erkite-kiteken persebahan persepuluhen merupaken ketetapen Tuhan, maka kita selaku kalak kristen arus ngendesken persepuluhen man Tuhan arah gerejaNa, gelah sipake guna pelayanan-pelayanan gereja Tuhan. Persoalenna nterem denga kita masih mpersoalken kerna nehken persepuluhen. Lit simpersoalken kerna  bruto ntah netto ibas penghasilanta nari. Bagepe kerna jumlah. Tapi erkite-kiteken nggo ndekah kita mpraktekken persepuluhen enda, emaka ula nari min kita mpersoalken kerna sie. Tapi marilah sibuat baginta guna nehken persepuluhen simulai ibas kejujuren ras pusuh simeciho nehken persepuluhen e, gelah kita ipasu-pasu Tuhan, bagepe pelayananta gereja banci erdalan. Alu bage termulia Tuhan ibas kita nehken pesepuluhen.

Pdt. Steven Kumenit, STh.M.Min.

Pehaga Dibatandu; Sehkenlah Kerja Ranindu (Ulangan 16: 9 – 12; 2 Korinti 9:6-9)

PERPULUNGEN JABU-JABU

GEREJA GBKP

TANGGAL 7 – 13 JUNI 2015.

Ulangan 16: 9 – 12; 2 Korinti 9:6-9.

Tema : Pehaga Dibatandu; Sehkenlah Kerja Ranindu

LATAR BELAKANG

A.    Ulangan 16:9-12.

1.      Kitab ulangen enda berisiken pidato Musa man bangsa Israel sisangana ngadi-ngadi i dataran Moab. Pidato enda ipeseh Musa erkiteken : 1). Bangsa Israel nandangi bengket ku taneh Perpadanen Dibata eme Kanaan. 2). Erkiteken bangsa Israel si lit paksa e eme tading angkatan si mbaru, janah angkatan enda la megiken kerna kai perpadanan bangsa Israel ras Tuhan, bagepe undang-undang siharus idalanken bangsa Israel kenca bangsa e bengket ras ngiani taneh Kanaan. Jadi situhuna isi kitab Ulangan enda eme “pengulangan” ibas padan ras undang-undang Tuhan.

2.      Ibas oratenta sekali enda ngerana kerna kerja rani. Kerja rani ilakoken ntah pe ikira ibas pitu minggu kenca rani gandum ntah pe 50 wari kenca Paskah.  Janah tujun kerja rani eme guna mpehaga Tuhan. Erkiteken sie me kerja rani enda harus ilakoken alu meriah i adep-adepen Tuhan radu ras anak-anak ibas tep-tep jabu, bagepe suruh-suruhen si lit ibas jabu, ras kalak Lewi, kalak pertandang, anak melumang ras diberu balu-balu sitading i rumah bangsa Israel. Bagepe  ilakoken ibas rumah Pertoton. Kerja rani la banci ilakoken ibas rumah-rumah bangsa Israel, ntah pe ibas ingan ersembah si deban, tapi harus ibas rumah pertoton (ingan ersembah). Persembahen Kerja Rani arus alu ukur meriah ras buena rikutken pasu-pasu siiberekenNa man bangsa Israel. Persembahen ukur meriah enda ertujun guna 1). ngataken bujur man Tuhan erkiteken enggo ipasu-pasu Tuhan jumana. 2). Mindo man Tuhan gelah ipasu-pasu Tuhan tole jumana gelah ibas tahun si reh, reh buena hasil gandumna.

3.      Ibas ngerayaken kerja rani enda, bangsa Israel harus tetap nginget maka budak kap ia nai i Mesir, tapi erkiteken keleng ate Tuhan, maka bangsa Israel nggeluh bebas ras banci “memiliki” juma sendiri. Emaka la banci lang bangsa Israel harus patuh ras ersembah man Tuhan saja. Bagepe kerja rani enda memotivasi bangsa Israel gelah tetap ersembah man Tuhan saja.

B . 2. Korinti 9:6-9.

1.      Erkite-kiteken i Yerusalem lit terjadi sada “musibah” eme kelihen simesangat, maka ibas sada keputusan, kerina kalak kristen arus pepulung kolekte guna nampati temanna si lit i Yerusalem janah siertugas pepulung kolekte nandangi kalak kristen asal non Jahudi eme Paulus. Tapi kenca piga-piga paksa, perpulungen si lit i daerah Makedoni nggo pepulung kolektena tapi perpulungen Korinti lenga pepulungna. Erkiteken sie me reh Paulus arah suratna mpersingeti perpulungen gelah pedas ipepulungna kolekte e.

2.      Kata persinget ras motivasi siibereken Paulus eme gelah perpulungen ula ertaktak nandangi pemerena e. Tapi berelah sue ras ukur si ersuruh. Sebab dahin kalak si tek eme merefleksiken perkuah ate Tuhan erdiate nandangi kalak simbutuhken penampat. Emaka la banci kalak kristen nggeluh ibas cian ate sierbahanca jungut-jungut ntah pe mere alu terpaksa. Sebab ibas kalak kristen mere sue ras pemerena, maka ipasu-pasu Tuhan ia. Kalak kristen ula mbiar ibas nehken penampatna. Ula mbiar kekurangen adi mere. Lang. Sebab Tuhan siersemulih kerina e. Emaka kerina keperlun kalak kristen tetap icukupi Tuhan.

APLIKASI

            Gereja GBKP tep-tep tahun ngelakoken kerja rani, janah nggo nge lit peningkaten ibas kita erbahan kerja rani. Runggun-runggun nggo mulai erlumba-lumba erbahan kerja rani, labo guna ncidahken man kalak kerna kehebatenna e, tapi erkiteken anggota perpulungen nggo meteh kerna palas ras guna kai kalak kristen erbahan kerja rani.

            Kerja rani eme tanda pengataken bujur kalak kristen erkite-kiteken Tuhan nggo masu-masu juma ras pendahinta. Emaka ibas pengataken bujur enda kita ngataken kerina enda erkite-kiteken Tuhan.

            Sekali enda kita ipersingeti ka tole, maka nggo seh paksana kita erbahan kerja rani. Emaka marilah sipesikap pusuh ras ukurta guna erbahan kerja rani. Marilah ibas kita erbahan kerja rani kita mpehagaken Tuhan. Alu bage ipasu-pasu Tuhan kita. Ula mbiar sebab Dibata tetap mperdiateken kita. Adi kita mere alu pusuh siersuruh, janah rikut bagi kai singgo ipadanken kita, maka pasu-pasu Tuhan maler me man banta. Icukupi Tuhan kerina keperlun-keperlunta. Sebab la bo ate Tuhan, anak-anakNa ndatken kemalun hanya erkite-kiteken mpehagaken Ia arah kerja rani.

Pdt. Steven Kumenit, STh.M.Min.