Kelengilah Rumah Pertoton (Mazmur 84:1-5)

PERPULUNGEN JABU-JABU

GEREJA GBKP

TANGGAL 2 – 8 AGUSTUS 2015.

Mazmur 84 :1-5.

Tema : Kelengilah Rumah Pertoton.

LATAR BELAKANG  

1.        Enda sada Masmur siiendeken bani Korah, janah enda pe biasa igelari ende-enden ziarah. Maksudna ende-enden siiendeken paksa perdalanen ku Yerusalem (Sion), khususna ku Rumah Pertoton.

2.      Perlu siteh bani Korah enda, sada terpuk ibas terpuk kalak Lewi sierdahin ibas rumah pertoton.

3.      Bangsa Israel si merap ibelang-belang doni enda, tep-tep tahun lit telu kali ia ku Yerusalem guna ertoto ras ersembah man Tuhan Dibata ibas Rumah Pertoton eme wari raya Paskah, Kerja Rani, ras wari raya Sapo-sapo, sebab rumah pertoton ingan Dibata, janah enda merupaken sada undang-undang siharus ipatuhi bangsa Israel ( Ulangen 16:1-17). Tujun kerina enda eme ibas rangka mpehagaken Tuhan Dibata.

4.      Pemasmur nggejapken maka reh deherna ia ku Rumah pertoton reh gegehna ia, sebab si reh ku Rumah Pertoton enda eme kalak siertedeh ate jumpa ras Tuhan. Kalak sireh erpengakap maka adi jumpa ras Tuhan lit sada kemalemen ate, janah la lit ingan sideban sibanci mereken kemalemen ate e, asangken i Rumah Tuhan. Emaka amin gia cuaca cukup melas, tapi ipasu-pasu Tuhan ia, emaka ngasup ia erdalan ku Rumah Pertoton. Janah enda situhuna pengalamen kiniteken bangsa Israel (band. Bangsa Israel ndarat i taneh mesir nari. Ibas paksa suari, Tuhan erdalan alu binangun embun, janah ibas berngi Tuhan mereken binangun api). Enda me situhuna ungkapen pemasmur kerna pengkelengi Tuhan man kalak si reh ku Rumah Pertoton (band. Ayat 7).

5.      Erkite-kiteken Rumah Pertoton ingan tading Tuhan, maka pemazmur lit ibas ketedehen ate jumpa ras Tuhan. Ketedehen ate simbages e teridah arah tendi ras daging pemazmur siersurak, sebab siijumpaina la saja rumah pertoton singgo ndekah isura-surakenna, tapi erkite-kiteken ibas Rumah pertoton banci ia jumpa ras Tuhan.

 APLIKASI

            Secara sederhana banci sikataken rumah pertoton/ gereja eme ingan ersembah man Tuhan. Bagepe ibas teologi Padan sindekah rumah pertoton eme rumah Tuhan. Jadi rumah pertoton eme sada ingan si la saja terjeng ingan ersembah tapi ingan kita banci jumpa ras Tuhan. Erkiteken sie selaku kalak kristen kita arus ngkelengi rumah pertoton. Ibas kita ngkelengi rumah pertoton maka lit ketedehen ate guna reh ku rumah pertoton.

            Pengertin ngkelengi rumah pertoton eme kita arus ngerawatsa melebihi rumahta sendiri, sebab i je ingan perjumpan ras Tuhan. Ibas kita ngerawat Rumah Pertoton berarti lit i je sada kehamatenta man Tuhan.

            Ngkelengi Rumah pertoton la saja ngerawat bangunanna tapi pe ngerawat iventaris si lit ibas rumah pertoton. Sebab kerina iventaris eme guna menunjang perdalanen kebaktin, bagepe gelah anggota perpulungen lebih ngangkai kerna pengkelengi Tuhan man banta. Emaka adi lit bangunan gereja ras iventaris singgo ceda, pedaslah sipekena ntah iganti. Bagepe adi perlu itambah iventaris, marilah siarihken guna nambahisa. Janah enda kerina la saja tanggungjawab serayan Tuhan.Tapi tanggungjawab kerina anggota perpulungen.

Pdt. Steven Kumenit, STh.M.Min.      

Ngelawan Kuasa Gelap (Efesus 6:10-13)

PERPULUNGEN JABU-JABU

GEREJA GBKP

TANGGAL 26 JULI – 1 AGUSTUS 2015.

Epesus 6 : 10 – 13.

Tema : Ngelawan Kuasa Gelap

LATAR BELAKANG

1.      Perkembangan gereja ibas abad sipemena termasuk gereja i Epesus, tuhu-tuhu dat tantangan ibas erbage-bage “aras”, subuk pemerintah, penguasa-penguasa  bagepe iblis sierdahin ibas kelompok-kelompok jelma guna meneken ntah pe guna ngkernepken kalak sitek.

2.      Ibas situasi sibagenda reh Paulus arah suratna, mpersingeti perpulungen Epesus gelah perpulungen Epesus enda meteh kepeken lit musuh siatena ngelawan ia katawari paksa pe. Erkiteken sie Rasul Paulus mereken sada masukan uga carana ngelawan musuh e. Ibuat Paulus sada kebiasaan ibas dunia militer guna melukisken uga gelah kalak kristen tetap menang ngelawan musuh-musuh si lit.

3.      Kata persinget enda, secara tidak langsung ikataken Paulus situhuna kegeluhen kalak kristen lit iantara dua kuasa sibertentantangan, eme kuasa iblis ras kuasa Tuhan. Tapi selaku kalak si tek man Tuhan kuasa Tuhanlah siharus iandalanken. Pengalaman si lit kuasa iblis talu ibahan kuasa Tuhan. Saja ibas perdalanen kegeluhen kuasa iblis tetap erdahin guna naluken pengikut-pengikut Kristus. Enda me  musuh e ras siharus italuken kalak sitek. Maksudna gelah perpulungen Epesus sienggo nggeluh ibas kemerdekaan/keselamaten ulanai jadi hamba iblis, tetap min perpulungen Epesus megegeh. Erkiteken sie me senjata siibereken Tuhan man kalak si tek harus ipake guna ngelawan musuh e. Jadi kekuatan iblis la banci ilawan alu gegeh ras kepentaren manusia, tapi harus ilawan alu kuasa Tuhan. Modal enda lit bas perpulungen, sebab perpulungen nggeluh ibas persadan ras Tuhan.

4.      Perpulungen Epesus arus megegeh ngelawan musush-musuh. Sebab musuh perpulungen labo manusia, tapi kuasa pemerintah-pemerintah,  kuasa penguasa-penguasa, ras kuasa doni sigelap bagepe kesah sijahat. Intina perpulungen isuruh gelah erperang ngelawan kuasa setan. La bo ngelawan pemerentah. Adi pemerintah ibas la banci ilawan sebab pemerintah eme wakil Tuhan ibas doni enda (band. Roma 13:1). Siarus ilawan eme kuasa pemerintah ras penguasa. Iblis nggo makeken kuasa pemerintah ras penguasa guna ngelakoken si la mehuli eme menindas kalak kristen.  Jadi Musuh kalak si tek labo dirina sendiri, ntah pe hal-hal lahiriah/ siteridah (manusia), tapi lebih mbages eme hal-hal si la teridah, sierdahin ibalik kerina e eme iblis. Iblis ngasup ngkuasai jelma ras kegeluhenna, bagepe ngkuasai  ingan-ingan tertentu. Kalak si tek harus erperang ngelawan kerina enda, gelah perpulungen tetap nggeluh selaku gereja. Bagepe i suruh Paulus gelah perpulungen mpergunaken senjata-senjata rohani. Senjata e lanai perlu idarami ija banci ibuat, tapi senjata e nggo ibereken Dibata man manusia sitek man bana, jadi tading mpergunakenca. Perlengkapen perang ras senjata-senjata Dibata eme 1). ketuhu-tuhun jadi bentingndu. 2).  Kinibujueren jadi baju besi. 3). Keriahen ukur  guna meritaken Berita si meriah. 4). Kemalemen ate jadi sepatu. 5). Kiniteken jadi ampang-ampang. 6). Keterkelinen jadi topi waja. 7). Kata Dibata jadi pedang. Kerina enda harus ilakoken alu ertoto. Kerina enda harus ipake adi reh kari paksa (wari) sijahat.

5.      Erkite-kiteken kuasa iblis gegehen asangken kuasa manusia, maka kuasa iblis ngasup italuken kalak kristen adi megegeh persadan kalak kristen ras Tuhan Sebab ibas kuasa Tuhan ngenca maka iblis banci italuken.

APLIKASI

            Amin gia iblis nggo italuken Jesus, tapi tetap denga seh genduari iblis erdahin guna nirangken kita ras Tuhan. Erkiteken sie sijumpai denga nge kalak kristen mpraktekken ilmu kedukunan (okultisme), ibas rangka ndatken sura-sura daging/doni. Bagepe lit kalak kristen iseluki setan. Enda kerina ibas rangka gelah kita ikuasai iblis. Kita jadi pengikut iblis.

            Selaku kalak kristen situtus, enda merupaken musuhta siarus ilawan, gelah la ikuasaina kita, la isirangkenna kita ras keselamaten singgo ibereken Tuhan man banta. Emaka cara kita ngelawan si iblis eme 1). Persadanta ras Tuhan arus megegeh. Kita arus mindo penampat man Tuhan gelah Tuhan nampati kita ibas kita ngelawan iblis e. 2).  Arus makeken kerina senjata siibereken Tuhan man banta (band. Ayat 14-17).

Pdt. Steven Kumenit, STh.M.Min.

           

Gereja Si Dewasa (2 Timotius 2:1-7)

PERPULUNGEN JABU-JABU

GEREJA GBKP

TANGGAL 19 – 25 JULI 2015.

2 TIMOTIUS 2:1-7.

Tema : Gereja Si Dewasa

LATAR BELAKANG

1.      Sijadi oratenta sendah eme sada bagin ibas kata pergegeh rasul Paulus nari man Timotius, sisangana melayani i perpulungen Epesus. Sipaksa si e lit ajaran-ajaran sipapak eme Judaisme, Gnostik, bagepe sangana ibas tekanan gelah nadingken berita Si Meriah, rsd. Alu tujun gelah Timotius ibas pelayanenna tetap termotivasi ibas ngelai.

2.      Ibahan Paulus kata pergegeh gelah Timotius tetap nginget erkiteken lias ate Tuhan singgeluh ibas Timotius maka ia megegeh. Lias ate Tuhan eme sada pasu-pasu Tuhan singgeluh ibas diri Timotius. Sebab ibas lias ate, Timotius nggeluh ibas persadan ras Yesus Kristus. Emaka amin gia jumpa erbage-bage perbeben ras kiniseran, isampati Tuhan Timotius gelah tetap megegeh ras ngelai ibas perpulungen. Jadi alu litna lias ate Tuhan maka Timotius banci mengatasi ntah pe bentasi erbage-bage kiniseran ras perbeben ibas pelayanenna.

3.      Tole ipegegehi Paulus si Timotius alu ngataken ibas ngelai arus tutus, sebab keselamaten lit ibas Yesus Kristus siarus ipeseh Timotius. Jenari tugas enda, merupaken tugas kerina kalak si tek. Emaka tuga Timotius selain ngelai i perpulungen, arus pe mpersiapken kalak sideban jadi perberita simeriah. Janah enda arus iseleksi jelmana, gelah ise siipilih Timotius,tuhu-tuhu idalankenna tanggungjawabna alu mbiar ras erkemalangan man Tuhan. Sebab Berita Simeriah eme berita keselamatan.

4.      Gelah Timotius megegeh icontohken Paulus uga kerna kegeluhen laskar, bagepe sekalak atlet siikut ibas perlumban. Janah selaku perjuma, ndatna bagin sipemena ibas ulih jumana nari. Enda njelasken  selaku laskar maka ia arus patuh man komendanna. Bagepe sekalak atlet arus tutus latihen gelah dat juara. Enda kerina mbaba kiniseran, sebab arus mengesampingkan kegiaten-kegiaten si deban. Bagepe ibas nehken Berita si Meriah. Timotius arus tutus, amin gia lit ibas kiniseran, sebab melala siman jumpan, termasuk guru-guru palsu ras ajarenna. Tapi ibas kesabaren ras tetap erdahin maka Timotius pasti dat juara.

5.      Alu kata pergegeh enda ate Paulus gelah Timotius simerupaken anak kekelengenna ibas Yesus Kristus, tetap berjuang ras tutus ngelai amin gia jumpa perbeben ras kiniseran. Sebab la kap sia-sia kalak sierdahin ibas mberitaken Berita Si Meriah, sebab man bana ibereken Tuhan mahkota kemenangan.

APLIKASI

            Bahan PJJnta sekali enda berhubungan ras GBKP Njayo. Ibas kalender gereja GBKP, minggu enda kita mperingeti 74 tahun GBKP njayo. GBKP njayo ibas tanggal 23 Juli 1941 ibas sidang Sinode I i Sibolangit. Janah selaku gereja singgo njayo maka GBKP arus ngurus dirina sendiri.

            Selaku gereja singgo njayo maka arus teridah ibas pelaynenna tep-tep wari, khususna ibas mberitaken Berita Si Meriah gelah doni enda nggeluh ibas keselamaten. Tuhu ibas mberitaken keselamaten, melala tantangan-tantangan. Tapi adi kita tetap nggeluh ibas pengarapen man Tuhan, maka kerina perbeben ras kiniseran banci sibentasi.  Ipihak sideban banci saja amin gia kita nggo njayo, tapi kita lenga dewasa. Status lenga dewasa enda me simekatep jadi perbeben ibas gereja.

            Adi sinen ibas umur GBKP Njayo, searusna min kita nggo dewasa. Gereja singgo dewasa berarti terlibat aktif ibas pelayanan tri tugas gereja, ras keuangan. Gereja singgo dewasa berarti anggotana pe nggeluh ibas erpengarapen man Tuhan saja, ras nggeluh ibas sikeleng-kelengen. Siimaksudken nggeluh ibas sikeleng-kelengen, la saja terjeng sisampat-sampaten, tapi pe arus saling mpegegehi sada ras sidebanna.

            Timotius banci megegeh kinitekenna erkite-kiteken : 1). Nini tudungna ras nandena kalak situtus, emaka iajarina Timotius uga nggeluh ibas kata Dibata. 2). Lit singajari ia gelah tetap tutus ibas erkiniteken eme Paulus. 3). Timotius sendiri nggeluh ibas mbiar ras erkemalangan man Tuhan. Emaka kai pe sireh man Timotius, ibas pelayanenna, tetap iendeskenna man Tuhan saja. Jadi anggota perpulungen arus nggejapken ibas ia ndatken perbeben ras kiniseran, e kerina ibas rangka memproes kita nggeluh ibas kedewasaan kiniteken. Emaka amin gia lit perbeben ras kiniseran, kita tetap hadir ibas perpulungen guna ersembah man Tuhan.

Pdt. Steven Kumenit, STh.M.Min.

           

Peningkaten Ekonomi Ngawan Ni Perpulungen (Amsal 6:6-11)

PERPULUNGEN JABU-JABU

GEREJA GBKP

TANGGAL 12 – 18 JULI 2015.

Kuan – Kuanen 6 : 6 – 11.

Tema : Peningkaten Ekonomi Ngawan Ni Perpulungen.

LATAR BELAKANG

1.      Adi siperdiateken kerna sura-sura Dibata, maka la ate Dibata tinepaNa (manusia) nggeluh ibas kekurangen, bagepe jadi musil. Perbahan sie “ibereken”  Dibata tinepaNa sideban guna ikuasai  (Kej. 1:28-29). Bagepe adi siperdiateken uga Dibata mereken man bangsa Israel taneh perjanjin (taneh Kanaan), ras mbagi-mbagikenca sue ras suku bangsa (kecuali suku Lewi), ibas rangka mereken kegeluhen man bangsa Israel.

2.      Selain e erkiteken biak Dibata eme Dibata sierdahin, maka ate Dibata gelah manusia pe ngikuti biakNa. Erkiteken sie manusia banci dat nakan adi ia erdahin ibas doni enda. Ibas erti kata guna ncukupi keperlun manusia, maka manusia harus erdahin. Adi la erdahin maka bahaya kelihen ras kemusilen mengancam ia.

3.      Mekisat eme bena-benana reh kemusilen, erkiteken sie pengamsal mpersingeti bangsa Israel gelah mperdiateken enda.  Erkiteken sie pengamsal mereken contoh perkis, gelah manusia termotivasi guna erdahin ras menatalayanken kegeluhenna sue ras kinilitenna. Perkis erdahin guna ndarami keperlunna. Perkis amin gia la lit pemimpinna tapi tetap ia erdahin. Perkis erdahin la saja guna keperlun sesaat ngenca, tapi ia erdahin mpepulung nakan gelah reh musim perudan, bias nakan bas ia. Sebab adi reh musim perudan mesera sitik ndarami nakan. Jadi ibas diri perkis lit manajemen erdahin. Erkiteken sie maka lalap lit persediaan pangan bas ia, emaka la ia kelihen ibas keadaan kai.

4.      Perlu siteh ibas padan sindekah kemusilen isebabken minimal dua hal, eme : sipemena : Penindasen. Kalak sierkuasa ras si lit senna, guna ndalanken sura-surana banci ia menindas masyarakat, sidungna masyarakat jadi musil. Sipeduaken. Kemusilen erkiteken mekisat.

5.      Ibas aturan moral simehuli siidalanken manusia, maka manusia ngasup mendisiplinkan dirina, erkiteken sie munduk-unduk ibas suasana jam erdahin harus ibeneken, sebab munduk-unduk eme salah sada buah ibas biak simekisat nari.

APLIKASI

            Adi sinen cara perkis maka peningkaten ekonomi, la saja ibas erdahin nari, tapi manajemen erdahin ras keuangan iperluken. Perkis tehna lit sada paksa ia la banci erdahin erkite-kiteken cuaca, emaka tupung cuaca perlego, je ia erdahin pepulung nakan. Arah enda siidah maka sisadari kita sada paksa lanai banci erdahin, apakah erkiteken sakit, ntah pe pensiun, emaka tupung sehat denga kita, kita arus erdahin guna pepulung erta. Jadi kita arus meteh memanfaatkan waktu ras peluang guna ndatken erta, ras mengatur erta sipepulung kita e guna kebutuhenta, subuk paksa sigenduari bagepe paksa sireh.

            Ibas kita ngasup pepulung erta ras memanajemen keuangenta maka ekonomi keuangenta banci meningkat. Emaka mari simanfaatkan potensita guna ndarami sen. Tapi perlu siteh ibas kita ndarami sen arus sierpalasken peraten Tuhan. Memang ibas kita ndatken pemere Tuhan arah erdahin tentuna bervariasi, sada paksa pendapatenta galang, sada paksa sitik. Tapi ibas variasi pentapatenta, kita arus memanajemen keuangenta, lit sen siarus isisihken kita, sijadi tabungenta.

JAWABAN DISUKUSI
1. Minimal 5 hal penyebab maka ia la tutus rasla mejingkat ibas pendahinna eme
    -  Situhuna la ia kalak kristen situtus, sebab adi kalak kristen maka iangkana erdahin eme persuruhen   
       Dibata, bagepe pemere Dibata ras pendilo Dibata. Emaka arus erdahin tempa-tempa erdahin guna   
       Tuhan labo guna manusia.
    -  Adi ia edahin ibas perkantoran, Perayakenna jabatan, emaka adi la dat jabatan maka frustrasi ntah  
       masa bodoh ia erdahin.
    -  Nggo puas ibas kai si lit bas ia, sebab banci saja ia bayak.
    -  Narkoba.
2. -  Siarus ilakoken gereja eme : Mbentuk CU/Koperasi. Bagepe erbahan ceramah.
    -  Siarus ilakoken kita eme : Mencari peluang, mengatur keuangan gelah la besar pasak dari pada tiang.

Pdt. Steven Kumenit, STh.M.Min.