Rabu, 26 Agustus 2015

Tinepa Si Erkawiten (Mazmur 104:10-18)



PERPULUNGEN JABU-JABU
GEREJA GBKP
TANGGAL 30 AGUSTUS – 5 SEPTEMBER 2015.
Mazmur 104 : 10 – 18.

Tema : Tinepa Si Erkawiten

LATAR BELAKANG
1.      Sijadi ogenta eme sada ende-enden pujin man Tuhan erkite-kiteken . Tuhan njadiken doni ras isina  erkawiten kerina. Janah kerina enda mereken kegeluhen man tinepaNa, khususna man manusia, asuhe-asuhen ras perik-perik. Kai siijadiken Tuhan jadi ulu kegeluhen.  Alu bage banci sikataken Tuhan simereken kegeluhen man tinepaNa.
2.      Ibas pemazmur ngendeken ende-enden pujin kerna Tuhan singgo njadiken langit ras isina, bagepe ijagai ras iberekenNa kegeluhen man TinepaNa e, maka alu sendirina ngataken maka Tuhan e erkuasa man doni enda, janah tinepaNa e patuh man Tuhan. Sebab ibas kepercayaan kuno lit singatakenca maka lit dibata-dibata sideban sinjadiken doni enda.
3.      Puji-pujin kerna Tuhan sinjadiken doni ras isina kerina iendeken tupung kebaktin ibas rumah pertoton, gelah sireh ibas kebaktin banci ngangkai kerna kuasa ras keleng ate Tuhan man manusia.
4.      Situhuna ibas ende-enden pujin enda ngatakenca adi la erkiteken Tuhan maka manusia la lit ertina nggeluh ibas doni enda. Sebab kegeluhen manusia tergantung man tinepa Tuhan sideban. Manusia la ngasup ngandalken dirina sendiri guna mereken kegeluhen man bana. Emaka tanggungjawab manusia eme ngataken bujur man Tuhan, bagepe tutus ersembah man baNa saja. Ibas ketutusan manusia ersembah man Tuhan maka ulihna eme pasu-pasu.
5.      Kepatuhen manusia nandangi Tuhan, teridah ibas uga manusia njaga ras melestariken tinepa Tuhan sideban. Memang ibas Tuhan njadiken nuruh manusia gelah njaga ras ngusahai tinepaNa (band. Kejadin 1:28), labo berarti manusia banci rate-ate. Manusia arus tuhu-tuhu  njaga kelangsungen nggeluh tinepa Tuhan. Sebab ibas manusia njaga ras ngusahai (memelihara), maka kelangsungen nggeluh manusia banci terjamin.

APLIKASI
            Adi siperdiateken ras sirenungken kerna tinepa Tuhan, maka  lit siklus kegeluhen teridah i je. Alu bage sada ras sidebanna erkawiten. Emaka adi ceda sada rante kegeluhen, maka banci mpengaruhi kegeluhen manusia ras doni enda. Janah sibanci mpengaruhi  kegeluhen alu global doni enda eme kita manusia. Sebab bas manusia lit kepentaren ras mandat khusus siibereken Tuhan, Emaka adi rangap kita, bagepe la kita mbiar man Tuhan, maka siakap nge tinepa Tuhan sideban la lit ertina. Tinepa Tuhan sideban jadi pelengkap saja man kita manusia. Adi enda sijadi maka manusia nggo jadi raja/tuan ibas doni enda.
            Erkiteken manusia nggo jadi raja/tuan maka kerina si lit ibas doni enda arus patuh man bana, dingen mereken kegeluhen man manusia e. Emaka siidah doni enda sitangtangna mehuli, nggo jadi ceda. Kerangapen manusia me sierbahanca bage. Ibas situasi sibage, apakah kita tetap denga ibas pemikiren mengekploitasi tinepa Tuhan sideban guna pemuasan dirinta saja ? tentuna kita arus mengubah cara rukurta. Adi ateta nggeluh alu dame ras tenang, maka kita arus njaga kelestarian doni enda. Lingkungen arus tetap sirawat ras sipekena-kena. Kerangen arus sijaga gelah lanai lit penebangan kayu secara liar, rsd. Tentuna enda banci jadi adi kita nggeluh erkemalangan man Tuhan. Kita nggeluh mbiar man Tuhan. Sebab adi kita nggeluh mbiar ras mehamat man Tuhan maka mbiar kang kita ncedai tinepaNa.

Pdt. Steven Kumenit, STh.M.Min.

Kamis, 20 Agustus 2015

Njagai Kesehatan Kula (Daniel 1:11-16)



PERPULUNGEN JABU-JABU
GEREJA GBKP
TANGGAL 23 – 29 AGUSTUS 2015.
Daniel 1 : 11 – 16.

Tema : Njagai Kesehatan Kula.

LATAR BELAKANG
1.      Nebukadsnesar selaku raja Babel ersura-sura nambahi pegawaina, emaka isuruhna Aspenas guna ndarami calon-calon pegawaina e, alu kriteria mejile rupana ras pentar, mbages pemetehna, pedas nangkap pelajaren, janah la lit sitik pe man pandangen i bas kulana. Alu kriteria enda maka dat me empat anak perana eme Daniel, Hananya, Misael, ras Asari, janah empat anak perana enda isambarina gelarna alu gelar kalak Babel. Perintah raja maka calon pegawai enda harus ididik sedekah 3 tahun, janah harus man pangan sintabeh siisikapken kerajaan Babel. Tapi peraturan enda“itolak” Daniel ras teman-temanna.
2.      Enda ibahan erkiteken Daniel ras teman-temanna eme anak perana situtus ras sierkiniteken, emaka peraturan-peraturan kerna pangan tuhu-tuhu iperdiatekenna. Sebab  peraturan kerna pangan enggo isuratken ibas peraturan agama Jahudi (band. Imamat 11; Ulangen 14). Tujunna gelah tetap lit kebadiaan nggeluh, emaka kula la banci imelketi hanya erkiteken pangan.
3.      Situhuna pemindon Daniel ras teman-temanna la man pangan siisikapken raja (kerajaan) la ialoken, tapi erkiteken terjadi kesepakaten eme gelah penjaga mpepayo daging kula Daniel ras teman-temanna sedekah sepuluh wari saja lebe, kenca sie penjaga muat sada keputusen kerna sie. Tapi kenca sepuluh wari iidah penjaga maka daging kula Daniel ras teman-temanna jilen adi ibandingken ras anak perana sideban, emaka ipediat penjaga e Daniel ras teman-temanna man gule-gulen saja sedekah ibas pendidiken.
4.      Empatna anak perana Jahudi enda ibereken Tuhan pemeteh siluar biasa. Khusus man Daniel itambahken Tuhan pemeteh ntah pe kebeluhen kerna pengenehenen ras banci ngoge nipi.
5.      Adi sioge terdahuen maka Daniel ras teman-temanna e lebih pentar asangken anak-anak sideban si sada pendidiken ras ia. Janah sie labo hasil pengajaren kalak Kasdim tapi erkiteken pemere (penyataan) Dibata. Perlu siteh kalak kasdim enda eme sada kelompok tertentu siterdiri ibas para imam ntah pe peramal Babel. Sipendahinna eme menilik bintang-bintang (astrologi),si mpebetehken  nasib bangsa-bangsa ntahpe  nasib kalak ibas wari-wari sirehna ras erbahan ilmu sihir. Kalak enda mpergunaken  tulisan khusus eme  cuneiform ras bahasa sumer sicukup kuno ras misterius.

APLIKASI
            Kesahaten kula penting kal ibas kegeluhenta, sebab adi sehat kita maka banci kita ngelakoken aktivitasta sitep-tepwari, termasuk ku gereja ras perpulungen sideban.
            Salah sada sibanci erbahanca kita sakit eme arah pangan. Erkiteken sie kita arus mperdiateken kerna panganta, apakah pangan e mpereh pinakit ntah lang. Sipenting man banta eme kita banci njaga kesehaten kulanta. Sebab payo kerina pangan banci ipan, apa lagi selaku kalak kristen la nai lit pangan siipantangken agamanta. Tapi amin gia bage, kita arus njaga kesehatenta, sebab lit nge pangan (daging, ikan) adi mbuesa sipan, banci mpeturah pinakit bas kita. Emaka pangan la ate keleng, tapi kelengilah daging kulata. Sebab adi sakit kita, maka melala sen sipedarat kita, ntah banci saja kita terkena stroke ras mate. Emaka ibas rangka njaga kesehaten, sipaling penting man banta, sehat lebe pertendinta, sebab ibas sehat pertentinta, maka ngasup kita nulak kerina tawaran-tawaran doni enda, termasuk pangan-pangan.

Pdt. Steven Kumenit, STh.M.Min.

Minggu, 16 Agustus 2015

Ergakenlah Kemerdekaan ( Ulangan 6:10-15)



PERPULUNGEN JABU-JABU
GEREJA GBKP
TANGGAL 16 – 22 AGUSTUS 2016.
ULANGAN 6 : 10 – 15.

Tema : Ergakenlah Kemerdekaan.

LATAR BELAKANG
1.      Sijadi oratenta sendah eme pidato Musa man bangsa Israel sisangana ngadi i dataren Moab,si nandangi bengket ku taneh Kanaan. Tanah siipadanken Tuhan man bangsa Israel.
2.      Ibas khotbah Musa, lit kata persinget  man bangsa Israel gelah bangsa Israel bengket ku taneh Kanaan ula lupaken Tuhan. Sebab taneh sibakal ibengketina dem alu dadih ras tengguli. Ibas erti kata melala barang-barang mejile, lit kuta, sumur ras peken anggur, taneh mehumur, rsd. Enda kerina la bekas bangsa Israel sibahanca, tapi kerina enda pemere Dibata. Erkiteken sie me maka bangsa Israel arus tutus ersembah man Tuhan saja.
3.      Kata persinget Musa sideban eme adi bangsa Israel ersembah man Dibata sideban eme Dibata kalak Kanaan maka ihukum Tuhan ia kerina, sebab Dibata siisembah bangsa Israel eme Dibata sipencemburu. Maksud Tuhan sipencemburu eme erkiteken bangsa Israel iistilahken sabage ndehara, janah Tuhan eme perbulangen. Emaka selaku perbulangen nandangi ndehara, tuhu-tuhu perbulangen ngkelengi ndeharana. Ndehara merupaken hak mutlak perbulangen, emaka la ate perbulangen ndeharana memilih perbulangen sideban (nembah man dibata-dibata sideban). Sebab adi enda terjadi maka reh pernembeh Tuhan man ndehara sebab ndeharana nggo erlua-lua.
4.      Erkite-kiteken Dibata nggo mpedarat bangsa Israel  ibas taneh Mesir nari, bagepe bangsa Israel nandangi bengket ku taneh Kanaan, taneh singgo ibereken Tuhan man bangsa Israel, simelala hasil tanehna, maka bangsa Israel isuruh Musa gelah mbiar man Tuhan saja. Sebab ibas bangsa Israel mbiar man Tuhan saja maka pasu-pasu Tuhan tetap maler man bangsa Israel. Bagepe penemani ras perlindungen Tuhan man bangsa Israel tetap iberekenNa.
5.      Ibas bangsa Israel mbiar man Tuhan, berarti la lit Dibata sideban seakan Tuhan. Emaka bangsa Israel kenca bengket ras ngiani taneh Kanaan, bangsa Israel ersembah man Tuhan saja ras ndalanken kai singena ateNa ibas kegeluhen bangsa Israel tep-tep wari.

APLIKASI
            Kita bangsa Indonesia patut ngataken bujur man Tuhan, sebab nggo iarak-arak Tuhan bangsanta,emaka genduari nggo berumur 70 tahun. Umur 70 tahun eme sada umur singgo cukup meganjang, janah searusna min bangsanta nggo nggeluh ibas kemerdekaan situhu-tuhu. Tapi siidah ras sigejapken, melala denga siarus ipekena, subuk ibas bidang ekonomi, hukum, pendidikan, agama, rsd.
            Kita kerina erpengarapen maka lit min bas negaranta kegeluhen si mehuli, kegeluhen simereken masyarakat nggeluh alu teneng ras dame. Emaka siarus ilakoken kita selaku kalak kristen eme arus tetap inget Tuhan. Sebab kemerdekaan bangsa Indonesia eme pemere Tuhan. Emaka kita arus tetap ernalem man Tuhan ras ula terpengaruh ibas perbahanen-perbahanen si lamehuli. Kalak kristen arus nggeluh erkemalangan man Tuhan saja. Kalak kristen arus jadi sira ras terang nandangi masyarakat isekelewetna. Enda me bentuk pengargaanta nandangi kemerdekaan singgo ibereken Tuhan man bangsanta.

Pdt. Steven Kumenit, STh.M.Min.

Kamis, 06 Agustus 2015

Warga Negara Si Payo (Roma 13:1-7)



PERPULUNGEN JABU-JABU
GEREJA GBKP
TANGGAL 9 – 15 AGUSTUS 2015.
Roma 13: 1-7.

Tema : Warga Negara Si Payo

LATAR BELAKANG
1.      Isuruh Paulus perpulungen Roma, khususna pribadi lepas pribadi selaku kalak kristen arus patuh man pemerintah. Sebab ibas patuh man pemerintah, berarti kalak kristen patuh pe man Tuhan, sebalikna ibas kalak kristen la patuh man pemerintah, berarti kalak kristen la patuh man Tuhan. Enda ikataken Paulus sebab pemerintah eme persuruhen Tuhan ibas doni enda.
2.      Engkai maka kalak kristen arus patuh man pemerintah ? sebab karya Tuhan erdahin ibas pemerintah. Emaka ibas kalak kristen patuh, berarti mengakui otoritas pemerintah ras mbiar man Tuhan erkite-kiteken pusuh peraten siersuruh. Jadi ibas kalak kristen nggeluh ibas kepatuhan  simurni man pemerintah maka kalak kristen la nggit ngelakoken si la mehuli selaku warga negara. Bagepe selaku warga negara simehuli teridah ibas nggit nggalar pajak.
3.      Situhuna kai siikataken Paulus enda, labo erkiteken sada tuntutan selaku warga negara, tapi peraten Tuhan nandangi kerina kalak si tek man baNa. Ate Tuhan  gelah kerina kalak kristen arus ncidahken kinitekenna ibas kegeluhenna sitep-tep wari. Tuhu pemerintah  sindalanken kebijaken-kebijakan ibas rangka minpin ras ngaturken sada-sada bangsa, tapi situhuna pemerintah eme alat ntah persuruhen Dibata ngenca.
4.      Erkiteken pemerintah eme persuruhen Dibata maka tugas pemerintah eme nehken kiniulin man kerina manusia, termasuk kalak kristen. Erkiteken sie me maka kalak si ersalah patut ihukum sue ras undang-undang siberlaku ibas negara e. Gia, lit kuasa man pemerintah guna ngukum sesekalak jelma,khususna sierbahan salah (melanggara hukum), tapi kalak kristen la perlu mbiar. Kalak kristen arus tetap ndalanken kai simehuli.bagepe kai siipindo pemerintah, khususna pajak. Sebab salah sada fungsi pajak gelah efektifitas roda pemerintahan banci erdalan. I je me ipindo kepatuhen situhu-tuhu ibas kalak kristen nari. Sebab adi kalak kristen la nggalar pajak maka selaku warga negara Roma, berarti kalak kristen la patuh, janah banci saja ibas kinilapatuhen man pemerintah e, kalak kristen subuk secara perseorangan bagepe secara konstitusi ihukum ntah pe ihambat perkembangenna. Sebab lit hak pemerintah kerna sie.  
5.      Ibas kalak kristen patuh man pemerintah ras ndalanken tanggungjawab selaku warga negara alu mehuli maka ipuji pemerintah me kalak kristen. Alu bage keberadaan ras perkembangen kekristenan ibas kota Roma banci erdalan alu mehuli.

APLIKASI
            Ibas tanggal 17 Agustus enda kita mperingeti kemerdekaan bangsa Indonesia pe 70 tahun ken. Ibas wari kemerdekaan enda kita ipersingeti mulihi kerna peranenta selaku warga negara Indonesia. Kita selaku warga negara Indonesia arus patuh nandangi pemerintah, bagepe ndalanken tanggungjawabta selaku warga Indonesia, termasuk nggalar pajak.
            Ibas kepatuhenta nandangi pemerintah berarti kita nggo ndalanken tanggungjawabta selaku kalak kristen si tek man Tuhan. Sebab kalak sitek man Tuhan arus mengaplikasiken kinitekenna ibas kegeluhenna tep-tep wari. Sebab perlu siteh perkembangen bangsa, ntah pe ibas rangka kiniulin bangsa  maka ipindo keterlibatanta selaku warga negara situtus. Emaka ibas kepatuhen ras ketutusenta nandangi pemerintah ras kebijakenna, maka kita nggo patuh man Tuhan.

Pdt. Steven Kumenit, STh. M.Min