Perbahanan Dibata Jadi Adat Kegeluhen (Keluaran 12:21-28)

SERMON KHOTBAH TANGGAL 4 OKTOBER 2015.

KLASIS MEDAN KUTA JURUNG

Invocatio  :    Tapi man banta sada ngenca Dibata, eme Bapanta. Ibas Ia nari me rehna si nasa lit. Janah kempak Ia me perlawesta. Janah sada ngenca Tuhan, eme Jesus Kristus. Arah Ia me kerina sinasa lit ijadiken, dingen arah Ia kita Nggeluh (1 Korinti 8:6).

Ogen        :    Mazmur 150:1-6 (Responsoria).

Khotbah   :    Keluaran 12: 21-28 (Tunggal).

Tema        :    Perbahanen Dibata Jadi Adat Kegeluhen.

LATAR BELAKANG

1.      Kalak Israel tading i Mesir nggeluh alu kiniseran, sebab itindes bangsa Mesir ia, emaka tangis tuhu-tuhu kalak Israel i Mesir. Kalak Israel ndatken kiniseran erkite-kiteken, lit pergantin rezim kekuasaan. Pergantin raja. Raja simbaru lanai meteh kerna turi-turin keberadaan kalak Israel. Bagepe pe hubungan bangsa Mesir ras Jusup. Emaka terganggu akapna ngenen keberadaan kalak Israel. Jada tangtangna, kalak Israel nggeluh alu teneng ras dame. Tapi erkiteken mbiar raja maka itindesna kalak Israel. Kepeken tangis kalak Israel ibegi Dibata, emaka iangkat Tuhan Musa guna mimpin kalak Israel ndarat i Mesir nari (band. Kel.3:9). Janah sebage pemimpin kalak Israel ras patuh man perintah Tuhan, maka Musa ras Harun ngadap man raja Mesir ras mindo gelah ipelepasna kalak Israel, tapi la ibere raja Mesir.

2.      Erkite-kiteken mekeng raja Mesir, lalap pemindon Tuhan la iberena, maka nembeh ate Tuhan man bana. Emaka lit siwa mara icidahken Tuhan, tapi kerina mara e la erbahanca surut ukur raja, sebab nggo ipemersik Tuhan ukur raja Mesir (band. Kel. 11:10). Erkiteken sie me,  ate Tuhan bahan sada nari ukumen, janah ukumen enda la saja iberena lawes kalak Israel, tapi pe ipelawesna (band. Kel.11:1). Erkiteken sie me ersura-sura Tuhan guna munuh kerina anak dilaki sintua, subuk manusia bage asuh-asuhen, bagepe kerina dibata-dibata bangsa Mesir, kalak Israel saja si lang. Emaka  kalak Israel arus mereken tanda dareh i lebe-lebe pintun rumahna, gelah adi idah Tuhan tanda e isilahiNa, emaka selamat kerina anak sintua kalak Israel.

3.      Sura-sura ukumen Tuhan e ipeseh Musa man kerina kalak Israel emaka kerina kalak Israel ngikutken kai siiperentahken Tuhan arah Musa. Janah enda jadi Paskah si pemena ibahan kalak Israel. Ibas Paskah e, kalak Israel arus geleh sada biri-biri ntah sada anak kambing,  jenari dareh biri-biri ntah pe kambing e isapuken i binangun pintun rumah. Gelah enda jadi tanda man Tuhan.

4.      Selain perintah kalak Israel arus erbahan Paskah, lit perintah sideban eme adi kalak Israel nggo bengket ku taneh siipadanken Tuhan eme taneh Kanaan maka merupaken sada kewajiban kalak Israel ngerayaken Paskah, janah enda jadi adat ibas keagamaan kalak Israel. Tujunna eme gelah kalak Israel mpehagaken Tuhan. Tentuna kalak Israel mpehagaken Tuhan erkite-kiteken kalak Israel nggo meteh uga kuasa ras keleng ate Tuhan man bana. Ibas kuasa ras keleng ateNa, maka ipelepasNa kalak Israel ibas taneh perbudaken nari ku taneh Kanaan.

5.      Adat keagamaan, Paskah enda arus ilakoken Israel, sebab enda merupaken perintah Tuhan. Bagepe Paskah eme sada perayaan singingetken keselamaten siibereken Tuhan man bangsa Israel. Erkiteken sie me kerina kalak Israel ibas kerina generasi banci meteh kerna perbahanen Tuhan e, jenari tetap Tuhan e jadi Tuhanna. La lit dibata-dibata sideban ibas kegeluhenna. Jadi ibas adat keagamaan enda me kalak Israel banci lebih ngangkai kerna Tuhan, emaka Tuhan ngenca isembahna. Alu kata sideban adat keagamaan enda, jadi sara guna nuriken kuasa Tuhan, bagepe jadi sarana ipake Tuhan gelah kalak Israel ersembah man Tuhan saja.

APLIKASI

            Adi kita ngerana kerna adat, berarti secara sederhana kita ngerana kerna aturen. Janah berhubungen ras khotbahta, khususna tema khotbahnta, maka ate gelah perbahanen-perbahanen Dibata jadi adat kegeluhen. Maksudna kerina kuasa ras keleng ate Tuhan jadi bagin ibas kegeluhenta. Alu kata sideban perbahanen-perbahanen Tuhan ibas kegeluhenta tep-tep wari arus sikataken bujur. Ibas pengataken bujur enda merupaken sada puji-pujinta man Tuhan (band. Ogen). Tentuna enda banci jadi adi sibiasakan ibas kegeluhenta. Kebiasaan enda me siigelari adat kegeluhenta. Alu bage la lit Tuhan sideban si lit bas kita. Kita ras keluarganta tetap ersembah man Tuhan. La malem ateta adi ibas kegeluhen la sipuji ras sipehaga Tuhan ibas kerina aktivitas geluhta eme ibas pendahinta, bagepe ibas keluarganta, sibahan kebaktin keluarga, ras tetap kita reh ku kebaktin minggu ras PJJ, janah adi isungkun anak-anakta ras kalak sideban, engkai maka arus ngelakoken simehuli ras ku kebaktin, nindulah erkiteken Tuhan ngkelengi kita, erkiteken Tuhan nggo nelamatken kita, erkiteken seh genduari kita nggeluh. Bagepe adi tetap sidalanken kai singena ate Tuhan alu meriah ukur, maka kita tetap nggeluh ras Tuhan. Jadi adat kegeluhen kalak kristen eme nggit muji Tuhan ibas rumah pertoton ras ibas kegeluhenta tep-tep wari. Amin gia jumpa perbeben ras kiniseran, kalak kristen arus nggeluh muji Tuhan.

Pdt. Steven Kumenit Tarigan, STh.M.Min.

Budaya ras Injil (Matius 5:17-20)

PERPULUNGEN JABU-JABU

GEREJA GBKP

TANGGAL 4 – 10 OKTOBER 2015.

Matius 5: 17 – 20.

Tema : Budaya Ras Injil

LATAR BELAKANG

1.      Bahan oratenta sekali enda eme salah sada bagin ibas khotbah Jesus i datas uruk. Janah sekali enda Jesus mereken sada penjelasan kerna hubungenNa ras undang-undang Musa ras siiajarkan nabi-nabi. Nina Jesus, IA reh labo guna ncedai undang-undang Musa ras kitab nabi-nabi, tapi ibas rangka nehken kai singgo isuratkenna. Enda ikataken Jesus, sebab lit pengangkan kalak Jahudi, kerehenNa nggo ncedai undang-undang Musa ras kitab nabi-nabi.

2.      Amin gia teridah beda pengajaren Jesus ras guru-guru agama, bagepe kalak farisi, tapi labo berarti pengajaren Jesus ncedai undang-undang Musa ras kitab nabi-nabi. Emaka gelah la salah pengertin ajar-ajar ras jelma sinterem, ituriken Jesus hubungenNa ras undang-undang Musa ras kitab nabi-nabi.

3.      Sada penegasan Jesus kerna undang-undang Musa ras kitab nabi-nabi eme sedekah langit ras doni lenga masap maka berlaku denga undang-undang Musa ras kitab nabi-nabi. Saja ibas Jesus kerina e igenapi. Ibas erti kata undang-undang Musa ras kitab nabi-nabi jadi kuh ibas diri Jesus. Emaka ajar-ajar Jesus ras jelma sinterem banci ndalanken kerina e arah kai singgo iajarken Jesus. Emaka kalak sila ndalanken, la nggeluh ibas keselamatan, tapi si, ia nggeluh ibas keselamatan. Maksud Jesus ibas  njelasken sie, gelah ajar-ajarNa ras jelma sinterem meteh maka sada titik pe la banci beneken ajaren undang-undang Musa ras kitab nabi-nabi. Kerina kalak arus patuh ibas ndalankenca. Memang tuhu teridah pengajaran Jesus tempa-tempa berbeda ras undang-undang Musa ras kitab nabi-nabi,tapi situhuna pengajaren Jesus e merupaken inti ibas undang-undang Musa.

4.      Undang-undang Musa ras kitab nabi-nabi sada sarana gelah kalak Jahudi banci ngidah keselamatan, emaka arus ndalanken alu tuhu-tuhu, la banci ndalanken secara lahiriah saja. Ibas maksud eme reh Jesus gelah kalak Jaudi banci ngidah undang-undang Musa ras kitab nabi-nabi lit ibas diri Jesus. Alu bage kalak Jahudi banci nggeluh ibas keselamaten.

5.      Ajar-ajar Jesus ras jelma sinterem arus tutusan ndalanken undang-undang Musa ras kitab nabi-nabi asangkan guru-guru agama ras kalak Farisi, gelah ajar-ajar Jesus ras jelma sinterem banci bengket ku bas Kinirajan Surga. Guru-guru agama ras kalak Farisi tuhu kalak enda meteh kerna undang-undang Musa ras kitab nabi-nabi, bagepe iajarkenna man kalak sideban, tapi ibas ndalankenca, guru-guru agama ras kalak farisi lang.

APLIKASI

            Sada penungkunen, apakah budaya ras Injil bertentangan ntah uga. Adi dogma denominasi gereja sideban, ipertentangkenna. Nina, budaya la banci nggeluh ibas Injil. Emaka makna Injil memasapkan budaya. Sebab idah denominasi gereja e, budaya eme produk agama sidekah emaka arus imasapkan.

            Ibas gereja GBKP, budaya eme bagin si la terpisahkan ras kegeluhen manusia, janah enda merupaken pemere Tuhan. Emaka idah gereja budaya enda arus ilestariken. Bagepe budaya ipake gereja guna nehken peraten Tuhan. Emaka budaya-budaya si la mehuli, subuk budaya klasis, bagepe budaya modern arus iterangi gereja alu Kata Dibata.

            Perlu siteh injil la banci lepas/terpisahkan ras budaya. Sebab injil arus nggeluh ibas diri manusia. John S. Mbiti secara apik mendefinisi kebudayaan sebagai pola kehidupan manusia dalam menanggapi lingkungan kehidupan manusia, yang diekspresikan dalam bentuk-bentuk fisik seperti agrikultur, seni, teknologi; dalam relasi antarmanusia seperti institusi, hukum, kebiasaan; dan dalam bentuk refleksi atas seluruh kenyataan seperti melalui bahasa, filsafat, agama, nilai-nilai spiritual dan pandangan dunia. Ibas palas enda maka Injil arus nggeluh ibas kegeluhen budaya.

Pdt. Steven Kumenit, STh.M.Min.

Erberita Dingen Ersaksilah (Kisah Para Rasul 26:16-18)

PERPULUNGEN JABU-JABU

GEREJA GBKP

TANGGAL 27 SEPTEMBER – 3 OKTOBER 2015.

Perbahanen Rasul-Rasul 26:16-18.

Tema : Erberita Dingen Ersaksilah.

LATAR BELAKANG

1.      Sijadi oratenta sendah eme kesaksin Rasul Paulus kerna uga ia jera ras jadi suruh-suruhen Dibata guna naksiken kerna Yesus Kristus i lebe-lebe raja Agripa.

2.      Perlu siteh Paulus i lebe-lebe Raja Agripa eme Raja kalak Roma, erkite-kiteken Paulus itangkap ras ipenjaraken. Janah raja Agripa mereken sada kesempaten man Rasul Paulus gelah rasul Paulus banci mbela dirina, janah adi pembelaan Paulus teraloken raja Agripa maka rasul Paulus ibebasken ibas penjara nari. Paulus itangkap ras ipenjaraken,erkite-kiteken la meriah ukur kalak Yahudi nandangi Paulus.Paulus nai sada kelompok ras ia guna ngelawan ajaren Yesus, tapi erkite-kiteken Paulus nggo jera, kelompok enda memusuhi Paulus. Emaka tupung Paulus i rumah Pertoton, reh piga-piga kalak Yahudi i propensi Asia nari, jenari ajuk-ajukna jelma sinterem gelah Paulus itengkap. Tuduhenna eme iajari Paulus jelma sinterem guna ngelawan bangsa Yahudi, ngelawan undang-undang Musa ras ngelawan Rumah Pertoton (band. Perbahanen 11:28).

3.      Siidah i jenda, Paulus jadi sierdahin Yesus Kristus labo erkiteken pilihenna, tapi enda erkiteken ia itangkap Yesus tupung perdalanenna ku Damaskus ibas rangka ndarami kalak si tek man Yesus Kristus, bagepe ajar-ajar Yesus. Adi Paulus jumpa ras ajar-ajar ras kalak sitek, maka minter itangkapna, bagepe ipenjarakenna ras pe ibunuhna. Sebab pengajaren Yesus singgo berkembang arus ipengadi. Salah sada dalan pengadi berita kerna Yesus Kristus eme arah nangkap ras munuh ajar-ajar ras kerina kalak si tek man Yesus Kristus.

4.      Erkiteken Paulus  nggo jadi  sierdahin Yesus, maka Paulus ndalanken kai singgo iperentahken Yesus man bana, eme ersaksi kerna Yesus Kristus tupung Yesus nggeluh denga. I ja tupung Yesus Nggeluh denga, melala tanda-tanda sengget siibahanNa. ipepalemNa kalak sakit, ipelawes Yesus setan-setan, bagepe ipekeke Yesus kalak singgo mate, rsd. Enda jadi erkite-kiteken Yesus eme Tuhan jine. Yesus eme Mesias. Bagepe iberitaken Paulus kai sinandangi jadi nandangi manusia ras doni enda. Siimaksudken eme kerna kerehen Yesus peduakaliken ibas doni enda, emaka manusia arus jera ras ndalanken keleng ate ibas doni enda, emaka banci ia nggeluh ras Yesus ibas Surga.

5.       Ibas Paulus nggo jadi sierdahin Tuhan, maka kegeluhen Paulus tuhu-tuhu nggo ijagai Tuhan, khususna ibas sura-sura pembunuhan kalak Jahudi ras kalak sideban nari.

APLIKASI

            Erberita dingen ersaksi kerna  Yesus Kristus eme Tuhan eme dahin kerina anggota perpulungen (gereja). Emaka kerina anggota perpulungen arus ndahiken dahin enda. Erberita ras ersaksi la saja arah kata tapi pe arus arah perbahanen. Sebab berita singgeluh eme perbahanen. Emaka adi sipahami enda, maka kerina anggota perpulungen kegeluhenna eme ersaksi.  Tujun ibas kita ersaksi eme gelah kerina kalak kristen ergegehna ras tetap erpengarapen man Yesus saja, amin gia melala perbeben ras kiniseran siijumpai kita. Bagepe gelah kalak sideban  banci tandaina Yesus Kristus gelah ia jadi kalak situtus ras erpengarapen man Tuhan.

            Sura-sura Tuhan gelah kerina kita banci nggeluh ibas Surga. Gelah nggeluh ibas surga maka kita arus tek man Yesus Kristus. Sebab arah Yesus saja kita banci selamat (band. Yohanes 3:16; 14:6). Emaka tugasta selaku kalak kristen eme erberita ras ersaksi. Memang ibas kita erberita ras ersaksi lit tantangan-tantangan. Tapi teklah kita,  itemani ras ijagai Tuhan kita. Alu bage kita tetap nggeluh ibas keselamatan, janah kalak sideban pe terselamatkan. Marilah kita jadi saksi-saksi Kristus ibas kegeluhenta tep-tep wari.

Pdt. Steven Kumenit, STh.M.Min.

Kebaktin Ibas Jabu (Mazmur 78:5-8)

PERPULUNGEN JABU-JABU

GEREJA GBKP

TANGGAL 20 – 26 SEPTEMBER 2015.

Mazmur 78 : 5 – 8.

Tema : Kebaktin Ibas Jabu.

LATAR BELAKANG

1.      Sijadi bahan oratenta sendah eme sada bagin ibas  ende-enden Asap. Asap eme  keturunan kalak Lewi. Kalak Lewi enda me itugasken Tuhan guna erdahin ibas Rumah Pertoton. Emaka bani Asap enda rusur rende ibas kebaktin i Rumah Pertoton. termasuk oratenta sendah eme ende-enden siiendeken ibas rumah Pertoton.

2.      Ende-enden siiendeken bani Asap enda mereken sada motivasi ntah pe pengajuk man bangsa Israel gelah tetap nggeluh ibas tanggungjawab selaku bangsa Tuhan. I ja selaku bangsa Tuhan, tugas orang tua eme ngajarkan anak-anak gelah nggeluh erkemalangan man Tuhan. Pengajaran nggeluh erkemalangan man Tuhan erpalaskan  Taurat. Pengertin nggeluh erkemalangan man Tuhan eme Tuhan saja siikelengina. Erkiteken sie me tanggungjawab orang tua eme ngajarkan anak-anak i ja pape; sangana ibas rumah, ibas perdalanen, subuk sangana ngadi-ngadi, ntah pe sangana erdahin (Ulangan 6:7). Alu bage anak-anak banci meteh kerna perbahanen simbelin siilakoken Tuhan man bangsa Israel. Jadi arah pengajaren kerna karya-karya Tuhan siisehkenNa man bangsa Israel, anak-anak banci ngkelengi Tuhan.

3.      Tujun sideban karya-karya Tuhan ipeseh man anak-anak, gelah generasi ku generasi bangsa Israel banci meteh kerna perbananen Tuhan e. Alu bage bangsa Israel banci nggeluh badia ras tetap tek man Tuhan.

4.      Taurat Tuhan iajarkan man angkaten ku angkatan bangsa Israel, gelah angkatan simbaru jadi angkatan sibadia, situhu-tuhu nggeluh ibas peraten Tuhan. La bagi nini-ninina ndube. Nini-nini bangsa Israel, kegeluhenna nggo nggeluh alu erbana-bana. Adi siperdiateken kerna kegeluhen nini-nini bangsa Israel, tupung ibas perdalanen ku tanah Kanaan lalap jungut-jungut, la nggit nggeluh ibas kiniseran. Erkiteken sie me lalap Tuhan merawa man bana. Perbahanen sibage ula min lit ibas angkatan sigenduari ras siarah pudi, gelah pasu-pasu Tuhan tetap maler man bangsa Israel.

5.      Taurat Tuhan siialoken bangsa Israel tupung bangsa Israel i deleng Sinai, arus iajarkan man bangsa Israel angkatan demi angkata. Hanya Taurat Tuhan e me sibanci njagai kegeluhen bangsa Israel selaku bangsa Tuhan. Emaka bangsa Israel arus tutus ngajarkenca man anak-anak.

APLIAKSI

            Ibas kebaktin i je lit rende, ertoto ras  Kata Dibata. Janah fungsi kerina e ngajarken ras mpersingeti kita gelah kita nggeluh badia ras ndalanken kerna Kata Tuhan ibas kegeluhenta tep-tep wari. Isamping sie kebaktin eme ersembah kita man Tuhan, bagepe ateta jumpa ras Tuhan. Emaka selaku keluarga kristen arus erbahan  kebaktin keluarga. Bentuk kebaktin keluarga la perlu seri ras kebaktin minggu i gereja, tapi sederhana saja,eme rende,  ertoto, ngoge Pustaka Si Badia, adi lit renungan, oge buku renungan e, jenari ertoto ka. Kegeluhen sibage mbabai kita selaku  keluarga kristen terbiasa megiken Kata Dibata, jenari Kata Dibata e tersuan ibas pusuhta, jenari ibas pusuhta e siikuasai Kesah Si Badia nuruh kita erbahan simehuli singena ate Tuhan. Bagepe arah kita rusur megiken Kata Dibata singajari kita nggeluh ersembah ras erkemalangan man baNa saja, maka kinitekenta erwarina, erdewasana. Bagepe arus siteh ulih sideban ibas kita rusur erbahan kebaktin eme jabunta nggeluh ibas persadan (harmonis), ras jabunta ipasu-pasu Tuhan. Sebab meriah ukur Tuhan erkite-kiteken idahNa kita anak-anakNa lalap ersembah  man baNa janah man baNa saja kita ernalem. Emaka marilah sibiasakan  keluarganta erbahan kebaktin. Kabtin keluarga banci sibahan ibas jam erpagi-agi ntah pe berngi, ntah pe erpagi-pagi ras berngi. Sekali nari adi kita tetap erbahan kebaktin keluarga maka la ateta ncedai gelar Tuhan ras kegeluhen jabunta.

Pdt. Steven Kumenit, STh.M.Min.