Nggeluh Radu Sikeleng-Kelengen (Matius 22:34-40)

PERPULUNGEN JABU-JABU

GEREJA GBKP

MATIUS 22: 34-40.

Tema : Nggeluh Radu Sikeleng-Kelengen.

LATAR BELAKANG

1.      Kerehen Yesus ibas doni enda eme ibas rangka keselamatan manusia. Tapi imam-imam kepala, guru-guru agama, kalak Farisi ras Kalak Saduki la alokenna,emaka ibas kerina kesempaten icubaina Yesus, alu tujun adi Yesus ersalah maka Yesus itangkap ras ibunuh.

2.      Palas enda me paksa Yesus i rumah pertoton i Yerusalem nungkun sekalak guru agama guna ncubai Yesus. Penungkunenna eme perentah apai sipentingna ibas undang-undang agama. Erjabab Yesus Kelengilah Tuhan Dibatandu, asa ukurndu,asa tendindu,asa gegehndu lit (band. Ulangan 6:5 ras kelengilah temanndu manusia bagi kam ngkelengi dirindu sendiri (band. 19:18).  Jawaban Yesus enda ibuatNa arah Padan Sindekah (Undang-undang Musa).

3.      Paksa sie merupakan sada kebiasaan man guru-guru agama  ipindo guna meringkas ibas undang-undang nari  sada ntah dua kalimat. Fungsina gelah simegi ras sinungkun banci ngangkai erti undang-undang e ibas kegeluhenna tep-tep wari. Bagepe kalak Farisi mbedakan  antara hukum mbelin ras kitik, ntah pe hukum si penting ras si kurang penting.

4.      Jawaban  Yesus, kerna hukum e merupakan sada hukum sipenting ibas kegeluhen beragama kalakYahudi. Sebab ibas kegeluhen agama kalak Yahudi, perintah guna ngkelengi Tuhan eme perintah Tuhan (band. 10 pedah Dibata). Emaka enda arus iajarkan orang tua man anakna.Bagepe  enda sipemena iajarkan tupung anak-anak Israel ndatkan pelajaran agama. Bagepe iogeken ibas tep-tep wari sabat. Ipihak sideban enda merupakan sada syema ntah pengakun kiniteken bangsa Israel. Sebab bangsa Israel hanya iajarkan ras hanya banci sada Tuhan saja. Erkiteken sie me dilaki kalak Yahudi singgo dewasa berkewajiban mengucapkan syema ntah pe pengakun kiniteken enda tep-tep wari.  Pengertin ngkelengi Tuhan, eme la saja arah kata tapi arah perbahanen tep-tep wari. Jadi kerina totalitas geluhta arus teridah kalak Yahudi ngkelengi Tuhan. Alu kata sideban lit bas kalak Israel/Jahudi perbahanen-perbahanen keleng ate. Bagepe ngkelengi manusia eme hukum siseri pentingna ras hukum ngkelengi Tuhan. Maksudna lit perbahanen keleng ate,arus lit perbahanen simehuli sierpalasken keleng ate. Kalak Jahudi arus berusaha ngelakoken kai simehuli ras sierguna nandangi temanna manusia. Janah teman manusia la saja terjeng sapih-sapih kalak Jahudi. Tapi arus idalankan nandangi si la kalak Jahudi pe.

5.      Nina Jesus : 2 palas  undang-undang agama enda me siibereken Musa ras nabi-nabi. Maksudna inti kerina undung-undang agama bagepe nabi-nabi lit ibas keleng ate. Erkiteken sie me kalak Jaudi arus patuh ras ndalankenca.

APLIKASI     

            Sekali enda kita ngerana kerna sikeleng-kelengen. Memang siidah nggeluh sikeleng-kelengen bagi kita kalak kristen arus idalanken alu bulat ukur. Sebab siidah nterem kalak kristen la siangkan, bagepe keluarga kristen rubat, seh ku perbulangan ras ndehara sirang (cerai). Situhuna adi sinen arah pengogenta, enda jadi erkite-kiteken la nggeluh bas kita undang-undang kekelengen e. Cuba min nggeluh bas kita undang-undang kekelengen e man banta, maka mbiar kita rubat ras temanta, ntah pe rubat ibas keluarganta. Janah adi rubat kita, nggit kita mindo maaf ras ngalemi salah temanta, ras nggit kita nggeluh alu meteruk ukur.  Rubat ras la siangkan, ras la nggit kita erdame, erkite-kiteken la tutus kita ngkelengi Tuhan ras temanta manusia. Memang rusur sibegi kata Dibata ibas kebaktin, khususna kerna ngkelengi Tuhan ras teman manusia, tapi kepeken enda hanya konsumsi pemeteh saja, laerbuah ibas kegeluhenta tep-tep wari. Si pasti adi lalit bas kita sikeleng-kelengen, maka situhuna kita nggo erdosa man Tuhan. Emaka marilah sipegegehi man banta undang-undang kekelengen enda. Alu bage kita banci sikeleng-kelengen.

Pdt. Steven Kumenit, STh.M.Min.