Ngenanami Lias Ate Dibata(Filipi 1:3-11)

KHOTBAH TANGGAL 6 DESEMBER 2015.

GEREJA GBKP

Invocatio      : Jesus Kristus me si maba kita bengket ku bas lias ate Dibata erkiteken kinitekenta. Janah i bas lias ate Dibata e me kita nggeluh dingen ringan. Dage meriah ukurta sabap lit pengarapenta maka kita ikut dat bagin i bas kemulian Dibata (Roma 5:2).

Ogen        :    Maleaki 3:1-4.

Khotbah   :    Filipi 1:3-11

Tema        :    Ngenanami Lias Ate Dibata.

LATAR BELAKANG

1.      Surat Paulus ibas penjara nari, alu tujun mereken pergegeh gelah perbahanan simehuli simerupaken pemere Dibata man perpulungen Filipi tetap idahiken perpulungen seh wari kerehen Kristus peduakaliken.

2.      Perpulungen Filipi tuhu-tuhu dat ingan tersendiri ibas pusuh Paulus, sebab perpulungen Filipi  rusur nampati Paulus, subuk ibas pelayanan, bagepe tupung Paulus ibas penjara. Erkiteken sie me Paulus ertoto gelah keleng ate si lit ibas perpulungen la statis, tapi banci ertambah-tambah seh ku wari kerehen Kristus. Bagepe gelah perpulungen banci ngangkai kerna eksistensi kalak kristen singgeluh ibas doni enda. Alu ngasupna perpulungen milih simehuli,  maka kegeluhen perpulungen Filipi nggeluh alu la erpandangan ras bersih.

3.      Ibas pertoton Paulus nandangi Perpulungen Filipi enda gelah perpulungen Filipi nggeluh ibas Kristus. Sebab perlu siteh ibas kerehen Kristus peduakaliken i tengah-tengah doni enda, i je lit pengadilen,  emaka sibanci nggeluh ras Yesus eme kalak sidahiken dahin simehuli, litna pengangkan sipayo kerna Kristus, bagepe nggeluh alu bersih.

4.      Paulus amin gia lit ibas penjara tapi tetap denga njaga ndahin pelayanan, gelah perpulungen tetap termotivasi ndalanken lias ate Dibata singgo mbereken man perpulungen. Jadi amin gia Paulus ibas penjara, tetap denga ngataken bujur man Tuhan erkiteken perpulungen Filipi.

5.      Lias ate Tuhan nggeluh man perpulungen Filipi, janah enda situhuna buah ibas persadan ras Yesus Kristus. Buah enda me siarus tetap ipelihara ras arus inanami kalak, alu bage, perpulungen Filipi katawari paksa pe tetap ndalanken kerna simehuli singena ate Tuhan.

APLIKASI

1.      Kerehen Yesus Kristus peduakaliken eme sada kepastin, janah kerehenNa radu ras pengadilen. Ibas pengadilen e maka kalak sibersih saja me si bengket ras Yesus Kristus. Jadi ibas wari pengadilen tuhu-tuhu ibersihken Tuhan, termasuk pe i je serayan Tuhan (imam).

2.      Kita kerina nggo ngenanami lias ate Dibata, tapi apakah lias ate Dibata e sipergunaken guna simehuli ntah uga ? tapi sipasti adi ateta nggeluh ras Yesus, maka sipaling penting man banta pengangkanta kerna Tuhan harus benar, sebab enda banci mabai kita ibas kegeluhenta tep-tep wari. Sebab alu pengangkan sipayo kerna Tuhan, maka mbiar kita ngelakoken si la mehuli si langena ate Tuhan. Tapi ateta nggeluh ibas bersih. Emaka ibas kerehen Yesus peduakaliken kita banci atan ibas Surga.

3. Harus sigejapken kita enda nggo ngenanami lias ate Tuhan. Lias ate Tuhan simbelin eme keselamatan, emaka dahikenlah dahin keselamatan e ibas kegeluhenta tep-tep wari gelah kita la erpandangan ibas kerehen Yesus kristus peduakaliken.

Pdt. Steven Kumenit, STh.M.Min