Kamis, 26 Februari 2015

Kalak Kristen Si Payo (Matius 5:3-13)



BAHAN PERPULUNGEN JABU-JABU
GEREJA GBKP
TANGGAL 1 – 7 MARET 2015.
Matius 5 : 3 – 13.

Tema : Kalak Kristen Si Payo.

1.      Oratenta sekali enda eme sada bagin ibas khotbah Yesus i datas uruk. Janah penekanenna eme gelah jelma sinterem nggeluh ibas kemalemen ate ras arus jadi sira nandangi doni enda.
2.      Ibas khotbah  Yesus khususna nggeluh ibas kemalemen ate, lit 3 hal sijadi penekanen eme 1).  Ayat 3-6 : Kemalemem ate nandangi kalak siigejapkenna ia labo kai pe i lebe-lebe Dibata, sebab ibas kondisi sibagenda tentuna ia tetap nggeluh ibas erkiniteken ras erpengarapen man Tuhan saja, bagepe nggeluh ibas kiniteruken ukur ras nggeluh ibas kepatuhan man Tuhan saja. Bagepe nandangi kalak sierceda ate erkiteken dosa, iapuli Dibata me ia. Pengapul situhu-tuhu ibas Dibata ngenca. Bagepe nggeluh ibas kiniteruken ukur berarti ndatken padan Dibata (band. Maz.37:11).  Bagepe nandangi kalak simuas melihi nehken peraten Tuhan. Kalak sibage eme kalak sikatawari paksa pe nehken peraten Tuhan ngenca. 2). Ayat 7-10 : Kalak siperkeleng eme kalak singasup ngenen kiniseran kalak sideban,emaka isampatina kalak sibage. Bagepe nandangi kalak simeciho pusuh peratenna eme kalaksituhu-tuhu nggeluh ibas Tuhan saja,la terkontaminasi geluhna ibas doni enda. Bagepe nandangi kalak sierbahan perdamen : kalak singgit nampati kalak sideban gelah nggeluh dame, bagepe la nggit erbahan perubatan ibas kegeluhenna. Bagepe nandangi kalak singenanami kiniseran : lit saja pengangkan,   ibas kalak Jahudi eme penghinaan eme perbahanan sikejam. Emaka penghinaan bali kap jahatna ras penyembahan berhala, bagepe pertumpahan darah. Kiniseran siimaksudken jenda eme erkiteken kalak sideban. 3). Ayat 11-12 : Enda sada motivasi gelah jelma sinterem ras ajar-ajarna ersikap nandangi keadaan sibakal muncul, sibanci erbahanca nggeluh ibas kiniseran. Sebab kalak sigeluhna bage, maka idatkenna me rudang-rudang kegeluhen. 4). Ayat 13: Sada penekanan gelah kegeluhen kalak sitek harus aktif ndalanken peraten Dibata gelah inanami kalak. Kegeluhen kalak sitek arus nggeluh mereken erti man kalak sideban, sebab adi lang maka sira e iambengken kalak, jenari idedehi kalak.
3.      Khotbah Yesus i datas uruk ibenai alu pengajaren kerna kemalemen ate. Kemalemen ate ibas cakap Junani eme Makarios. Situhuna pengertin enda la saja ndatken kemalemen ate tapi pe ndatken pasu-pasu bas Tuhan nari. Ibas khotbah enda ate Tuhan Yesus gelah kerina siatena nggeluh ibas kemalemen ate maka leben ia arus ndatken pasu-pasu Tuhan ras nggeluh ibas Kinirajaan Surga.
4.      Pengajaren kerna kemalemen ate siibereken Yesus la seri ras suka cita, tapi kemalemen ate sipatna lebih mbages asangken suka cita, sebab sipatna kekal.
5.      Pengajaren Yesus enda mabai gelah jelma snterem ras ajar-ajar Yesus berbeda min ras kalak farisi sigeluhna pekulah-kulah. Tapi siitekanken Yesus gelah jelma sinterem ras ajar-ajar Yesus arus tuhu-tuhu nggeluh ibas kata Dibata dingen ndalanken alu bulat ukur.

APLIKASI
            Tuhu kerina kita ersura-sura ndatken kemalemen ate. Tapi  nterem denga nge kita ndarami kemalemen ate ibas doni enda nari, sierbahanca kita la sidat kemalemen ate situhu-tuhu. Kemalemen ate situhu-tuhu eme nggeluh ras Tuhan bagepe ndalanken peratenNa alu bulat ukur.
            Ibas ndalanken peraten Tuhan e, situhuna nggo ibereken Tuhan kepentaren man banta gelah kita ngasup ndalanken ras ndarami kemalemen ate situhu-tuhu.  Tentuna ibas kita ndarami kemalemen ate situhu-tuhu e me kita nggo ncidahken eksistensinta selaku kalak kristen sipayo. Memang ibas kita ndalanken peraten Tuhan melala percuban-percuban sibanci menggagalken kita selaku kalak kristen sipayo. Tapi teklah kita, ibas kita tetap nggeluh ibas KataNa maka kita ngasup ngalaken kerina tantangan-tantangan e.

Pdt. Steven Kumenit, STh.M.Min.

Selasa, 17 Februari 2015

Nggeluh Bujur Mbaba Kealemen Ate (Matius 24:45-51)



PERPULUNGEN JABU-JABU 
GEREJA GBKP
TANGGAL 22 - 28FEBUARI 2015.
Matius 24 : 45 – 51.

Tema : Nggeluh Bujur Mbaba Kealemen Ate

LATAR BELAKANG
1.      Ibas uruk Seton Yesus mereken kata ajar man ajar-ajarNa. Salah sada kata ajar siibereken Yesus man ajar-ajarNa eme kerna wari pendungi pagi. Ibas wari pendungi pagi, je lit wari penghukuman,emaka ise sisetia ndahiken dahin pelayanani pasu-pasu Tuhan ia. Tapi ise si la setia, ndatken penghukuman ia.
2.      Situhuna Yesus la saja ngerana kerna wari pendungi, tapi Yesus ngerana uga seharusna kenca Yesus lanai ibas doni enda maka kalak sitek man baNa, arus ngelakoken simehuli singena ateNa. Sebab kenca Yesus nadingken doni enda maka dahin pelayanan e idahiken kalak sitek.
3.      Ipebetehken Yesus kerna kerehenNa peduakaliken ku tengah-tengah doni enda, ise pe la metehsa (band. Luk. 12:40). Emaka selaku kalak sitek, arus tetap setia ndalanken pendilo Tuhan gelah kenca Tuhan reh peduakaliken ibas doni enda, kalak sitek banci nggeluh ras Yesus ibas surga. Tapi sebalikna kalak sisetia ndalanken dahin simehuli singena ate Tuhan, ipercayakan Tuhan guna ndahiken dahin siterulin ras terbelinen ka. Enda me pasu-pasu Tuhan nandangi kalak sisetia.
4.      Kerehen Tuhan peduakaliken ibas doni enda eme sada kepastin. Emaka nggeluh setia ras bujur arus ilakoken kalak sitek, sebab man bana nggo ibereken Tuhan tugas guna ngelai ibas doni enda. Kepercayaan singgo ibereken Tuhan arus imanfaatkan sebaik mungkin. Bagepe kesempatan guna erbahan simehuli. Sebab kesetiaan kalak sitek arus teridah amin gia tuanna la i je.
5.      Ikataken Yesus kerna kerehenNa man ajar-ajar, labo terjeng njabab penungkunen ajar-ajarNa (band Matius 24:3), tapi mereken sada motivasi man ajar-ajar gelah ajar-ajar kenca Yesus lanai ibas doni enda arus setia ndahiken dahin Tuhan ibas doni enda, gelah ajar-ajar terhindar ibas hukuman Tuhan nari.

APLIKASI
            Selaku kalak sitek arus ngangkai maka kerehen Yesus peduakaliken ibas doni enda merupakan sada kepastin. Janah kerehenNa eme ibas rangka ngeranaken kalak singgeluh ras singgo mate. Kalak singgeluh ibas kebujuran ras kesetiaan man Tuhan ngenca singgeluh ras Tuhan i Surga. Tapi sebalikna kalak singelakoken kinilabujuren ras si la ngena ate Tuhan, ndatken penghukuman ibas Tuhan nari. Jadi ula siakap kenca kita mate, maka lanai lit hubungenta ras Tuhan. Lit nge. Sebab ibas kerehen Tuhan peduakaliken ibas doni enda, singgo mate pe iadili Tuhan.
            Ibas nimai kerehen Tuhan, maka siarus ilakoken kalak sitek eme arus nggeluh bujur. Sebab ibas kita nggeluh bujur berarti kita setia ibas pendilo Tuhan, ras ertanggung jawab ibas keselamatan singgo iberekenNa man banta. Bagepe ibas  kita nggeluh bujur maka kita nggo ersaksi kerna Yesus ibas kegeluhenta, emaka la saja tupung kita nggeluh ibas doni enda kita ndatken pasu-pasu Tuhan nari, tapi pe kenca reh Yesus Kristus ibas doni enda, kita nggeluh ras Yesus i Surga. Enda me kemalemen ate sialoken kita, adi kita nggeluh bujur ibas kegeluhenta tep-tep wari.

Pdt. Steven Kumenit, STh.M.Min.

Selasa, 10 Februari 2015

Ngiah-Ngiahi Alu Tutus (1 Timotius 4:13-16)



PERPULUNGEN JABU-JABU 
GEREJA GBKP
TANGGAL 15 – 21 FEBUARI 2015.
1 Timotius 4:13-16.

Tema : Ngiah – Ngiahi Alu Tutus.

LATAR BELAKANG
1.      Enda kata pergegeh  Rasul Paulus man Timotius sisangana erdahin i Epesus, gelah Timotius ndalanken tanggungjawabna alu ketetapan ukur. Sebab lit piga-piga hal sibanci erbahanca Timotius “kiam” ibas pelayanenna, eme : 1). Litna guru-guru palsu. 2). Kegeluhen erkiniteken perpulungen. 3). Kiningudaan Timotius. Banci saja erkiteken Timotius nguda denga, janah melala beban ras masalah siihadapina ibas pelayanan, erbahanca Timotius surut ibas pelayanenna.
2.      Ibas kata pergegeh enda, Paulus mereken sada kata persinget kerna tanggungjawab Timotius siharus idahikenna, subuk secara pribadi bagepe guna perpulungen. Secara pribadi : 1). Timotius arus tetap ngoge pustaka sibadia. Fungsi ngoge pustaka si badia gelah Timotius banci meteh ajaren situhu-tuhu ras spiritualitas Timotius pe terbangun. Jenari ibas pemeteh siidat arah ngoge Pustaka Si Badia, Timotius banci ngajarken isi ras pengajaran situhu-tuhu man anggota perpulungen. 2). Timotius arus njaga dirina ras kai siiajarkenna man perpulungen. Sebab tupung sie lit ajaren-ajaren sipapak siberkembang, emaka Timotius arus mperdiateken gelah ajaren siiajarken Timotius tetap jadi jemaken perpulungen.  3). Gelah Timotius ula menyia-nyiakan pemere siibereken Dibata man bana. Secara perpulungen : 1). Timotius arus ngiah-ngiahi anggota perpulungen guna nggit iajari. 2). Gelah anggota perpulungen tetap nggeluh ibas keselamaten kenca megiken pengajaren siisehken Timotus.
3.      Ibas pelayanan i Epesus, amin gia lit tantangan-tantangan, tapi Timotius arus jadi teladan man anggota perpulungen, gelah anggota perpulungen nghamati Timotius, sebab lit wibawa tersendiri ibas diri Timotius. Emaka nggit perpulungen ngikuti ajakan ras pengajaran sisehken Timotius. Emaka anggota perpulungen terhindar ibas ajaran-ajaran sipapak nari.
4.      Paulus mpersingeti mulihi man Timotius gelah Timotius termotivasi ibas melayani, emaka makna penangkuhen ras talenta si lit bas Timotius iangkat Paulus . Ibas diri Timotius lit talenta ngelai man perpulungen, bagepe Timotius nggo idilo guna ngelai i tengah-tengah perpulungen arah penangkuhen pertu-pertua. Jadi situhuna ibas penangkuhen lit makna utusen ibas ngelai.
5.      Sebage serayan siharus njaga kiniteken perpulungen, maka siharus iperdiateken Timotius eme tetap megegeh ibas erkiniteken man Tuhan, ras tetap setia ibas pendilo pelayanan, sebab lit 2 hal kewajiban Timotius eme 1). Njaga kiniteken perpulungen. 2).  Jadi teladan man anggota perpulungen. Maksud jadi teladan eme, Timotius harus ncidahken kinitekenna ibas kegeluhen sitep-tep wari. Ibas kegeluhen e arus teridah spritualitas Timotius ras ketutusenna erdahin.

APLIKASI
Salah sada tanggungjawab anggota perpulungen eme tutus erkiniteken. Janah tutus erkiniteken teridah min ibas ketutusan reh ku kebaktin, subuk kebaktin minggu, PJJ ras PA. Bagepe reh ibas kegiaten-kegiaten gereja singgo iaturken runggun gereja. Tapi mekatep lit anggota perpulungen la reh ibas kegiaten enda. Memang kenca isiksiki kerna alasanna maka la ia reh ku kegiaten gereja, banci erbage-bage sebabna eme : kesibuken ibas erdahin, lit masalah, subuk pribadi bagepe keluarga. Lit anggota perpulungen simesisat, rsd. Tentuna ibas anggota perpulungen la reh ibas kegiaten gereja, banci merugiken man bana, sebab banci saja kiniteken anggota perpulungen la berkembang, janah la begikenna pengajaren situhu-tuhu siiajarken gereja arah khotbah ras pengejapen kerna kata Dibata. Emaka tanggungjawab anggota perpulungen eme uga gelah anggota perpulungen sila reh ku kegiaten gereja (kebaktin), banci ia reh. Sebab arus siinget simegegeh rutang nandangi si la megegeh. Emaka tanggungjawabta eme ngiahi-ngiahisa alu saber ras tutus nandangi anggota perpulungen sibage gelah ia banci reh ibas kebaktin minggu ras ibas kegiaten gereja sidebanna.
Memang tuhu lit anggota perpulungen sila cukup iiahi sada ntah dua kali ngenca, tepi arus iahi lalap, janah enda memang perlu kesabaren ras ketutusen ibas ngiahi temanta e gelah banci ras kita ibas kebaktin ras kegiaten gereja singgo iaturken runggun gereja.alu bage banci ibegina kata Dibata ras tetap nggeluh ibas persadan ras Tuhan. Bagepe ibas kita ngiahi temanta, la saja terjeng jumpa ibas dalan, ntah pe tupung kita lawes ku perminggun, jenari simbel ras temanta maka siiahi ia, tapi reh kita ku rumahna, jenari ngerana-ngerana kita, gelah siteh pe kerna perbeben ras kai sierbahanca tempa mekisat ia ku gereja ras ku kegiaten gereja sideban. Alu bage banci sibereken dalan keluarna. Enda me siigelari perkunjungan Rumah Tangga.

Pdt. Steven Kumenit, STh. M.Min.

Kamis, 05 Februari 2015

Nggeluh Ersada Ras Dibata (Kejadian 5:21-24; Ibrani 11:5-6)



BAHAN PERPULUNGEN JABU-JABU
GEREJA GBKP
TANGGAL 8 – 14 FEBUARI 2015
Kejadin 5:21-24; Heber 11:5-6.

Tema : Nggeluh Ersada Ras Dibata

LATAR BELAKANG
A.    Kejadin 5:21-24.
  1. Ibas bahan oratenta enda, ncidahken kerna kegeluhen Enoh singgeluh ibas persadan ras Tuhan. Erkiteken persadan ras Tuhan e me ia iangkat ku surga. Enoh iangkat Dibata labo erkiteken mate, tapi nggeluh denga.
  2. Enoh nggeluh ibas persadan ras Tuhan 300 tahun dekahna, ncidahken ncukup ndekah enoh erkiniteken man Tuhan. Ibas 300 tahun e, tuhu-tuhu Enoh ngelakoken kai singena ate Tuhan. Amin gia situhuna kegeluhen isekelewetna ngelakoken kai si la ngena ate Tuhan tapi Enoh la terpengaruh ibas kegeluhen sibage. Bagepe Enoh mengecam kegeluhen si la ngena ate Tuhan siilakoken manusia paksa sie. Ibas kegeluhen Enoh sierkiniteken man Tuhan ras ndalanken singena ate Tuhan, iangkat Tuhan si Enoh. Enoh la mate. Enoh iangkat Tuhan, berarti Enoh terhindar ibas kematen, simerupaken simbol dosa. Jadi erkiteken kegeluhen Enoh situhu-tuhu erkiniteken man Tuhan, maka la ia nggit ngelakoken kai si la ngena ate Tuhan, emaka ngena ate Tuhan man bana. Emaka persadan Enoh ras Tuhan la saja terjeng ibas doni enda tapi pe ibas surga.

B.     Heber 11:5-6
  1. Situasi kalak kristen siasalna agama Jahudi nari nggeluh ibas perbeben ras kiniseran, erkite-kiteken perkembangan kalak kristen ihambat pemerintah ras litna perlawanan ibas agama Jahudi nari, emaka kalak kristen nggo mulai putus asa, nggo mulai nggeluh egois ras lanai teridah kemajun kinitekenna.
  2. Ibas situasi sibage penulis mereken sada pergegeh ras motivasi gelah tetap nggeluh erkiniteken man Tuhan amin gia reh erbage-bage perbeben ras kiniseran ras ula terpengaruh ibas situasi si lit ibas sekelewetna. Gelah tetap megegeh kalak kristen paksa sie, penulis mereken sada contoh kerna kiniteken Enoh. Erkiteken Enoh erkiniteken man Tuhan maka ia iangkat ku Surga.
  3. Kiniteken eme sada syarat gelah kalak sierkiniteken nggeluh ibas persadan ras Tuhan, subuk ibas doni enda bage i surga. Emaka iarapken kalak kristen tetap nggeluh ibas erkiniteken man Tuhan, amin gia lit perbeben ras kiniseran, sebab ibas kalak kristen erkiniteken man Tuhan, kalak kristen ipengasup ras ibereken kepentaren ngalaken kerina pengaruh-pengaruh doni enda. Emaka ibas kalak kristen nggeluh ibas erpengarapen man Tuhan ras tetap ndalanken kai singena ate Tuhan, kegeluhen si la ermasap-masap banci sialoken.

APLIKASI
            Kegeluhen kalak kristen eme kegeluhen si la terpisahkan ras Tuhan. Sebab kalak kristen (kita) eme kula ni Kristus. Kegeluhen ibas persadan ras Tuhan mabai kita nggeluh megegeh, erpengarapan ras nggeluh ibas pemasu-masun Tuhan. Bagepe nggeluh la ermasap-masap. Tapi ibas kinata nggeluh, nterem kalak kristen ndabuh kubas dosa erkite-kiteken ndalanken kai si la ngena ate Tuhan.
            Nggeluh ibas persadan ras Tuhan, berarti kita harus mengandalkan Tuhan ibas kegeluhenta tep-tep wari. Memang ibas kita nggeluh ersada ras Tuhan, kita harus nadingken biak-biak doni ras kegeluhen si la ngena ate Tuhan. Ibas kita ndalanken sibage maka kita ibereken Tuhan upah eme pasu-pasu Tuhan ras kegeluhen si la ermasap-masap.

Pdt. Steven Kumenit, STh.M.Min.