Ngerunggui Dahin Gereja Rikutkren Sura-Sura Dibata (Kisah Para Rasul 15:1-21)

PERPULUNGEN JABU-JABU

GEREJA GBKP

TANGGAL 5 – APRIL 2015

Perbahanen Rasul-Rasul 15:1-21.

Tema : Ngerunggui Dahin Gereja Rikutkren Sura-Sura Dibata

LATAR BELAKANG

1.      Perkembangan kalak sitek man Yesus i Antiokia tuhu-tuhu mengalami kemajun. Tapi reh kalak Farisi singgo tek man Yesus ku Antiokia ngataken maka keselamatan sisempurna arus isunatken. Pengajaren enda eme pengajaran Judaisme. Jadi situhuna amin gia kalak Farisi enda nggo tek man Yesus, tapi kebiasaan-kebiasaan agama Yahudi, tetap denga mpengaruhi ia.

2.      Kalak Farisi si reh i Yudea nari, labo berarti la ia setuju lit kalaksi labo kalak Yahudi jadi kalak sitek man Yesus Kristus,tapi pindona gelah sunat enda arus ka jadi bagin ibas kegeluhenna. Memang kalak Kristen asal Farisi enda la menyangkal litna kuasa pengorbanan Yesus Kristus ibas pengalemi dosa, tapi tek ka ia hanya arah isunatken ka maka Kristus mereken keselamatan man kalak si labo kalak Yahudi.

3.      Pengajaren enda ilawan Paulus ras Barnabas emaka terjadi me perjengilan i je, sidungna sepakat perpulungen i Antiokia gelah masalah enda ibaba ku Yerusalem guna icakapken ibas persidangen. Sijadi penungkunen man banta engkai masalah enda ibaba ku Yerusalem ? sebab i Yerusalem me pusat agama kristen tupung sie.

4.      Ibas persidangan i Yerusalem tuhu-tuhu percakapan kerna sunat ras la sunat man kalak si labo kalak Yahudi tuhu-tuhu jadi perdebaten siserius, sierbahanca Petrus selaku pimpinan gereja arus ngerana guna mereken sada masukan man peserta sidang kerna kegeluhen kalak si la kalak Yahudi singgo tek. Intina kal Petrus ngerana eme ula kal mberatken kalak  si la kalak Yahudi enda alu ngikuti hukum isunat, saja sipindo man kalak si la kalak Yahudi enda gelah tuntutan-tuntutan sideban ilakokenna, khususna ula man dareh,  ula man pangan singgo leben ipersembahaken man dibata-dibata palsu ras ula erlagu la mehuli.

5.      Ibas sidang i Yerusalem teridah Tuhan labo  mbeda-bedaken antara kalak Yahudi ras la kalak Yahudi. Ibas Kesah  Si Badia Tuhan  nggo meruntuhken tembok pemisah antara Yahudi ras la kalak Yahudi janah nggeluh ibas perkuah ate Tuhan saja. Jadi si labo kalak Yahudi jadi tek man Yesus,enda erkite-kiteken pendilo Tuhan gelah  terjadi persadan simbaru, sitetap ngakuken Yesus eme Tuhan ibas kegeluhenna tep-tep wari.

APLIKASI

            Perdalanen pelayanen gereja arus nge tetap ievaluasi ras icakapken ibas sidang – sidang sue ras tingkaten si lit ibas gereja GBKP eme runggun, klasis ras sinode. Sibanci ikut ibas sidang enda eme serayan Tuhan ngenca.Tapi adi lit sada-sada hal siarus icakapken, maka sidang banci ndilo peserta sidang si la serayan Tuhan. Bagepe sidang ibas gereja banci ncakapken kerna masalah-masalah silit i tengah-tengah gereja.

            Masalah ibas gereja banci terselesaiken,erkite-kiteken singerunggi ibas masalah e me serayan Tuhan. Selaku serayan Tuhan maka palas ngerunggui eme kata Dibata ras Tata gereja. Erkiteken  kata Dibata ras Tata gereja sijadi palas ngerunggui maka iarapken peserta sidang singerunggui masalah-masalah alu rukur rembang tengah, bagepe makeken kepentaren siikuasai Kesah Si Badia. Ibas penyelesaian masalah alu mehuli maka gereja Tuhan banci nggeluh ibas persadan simegegeh, bagepe nggeluh alu sikeleng-kelengen.

            Tgl 11-18 April enda gereja GBKP erbahan sidang Sinode si pe 35 ken. Sidang Sinode eme Sidang tertinggi ibas gereja GBKP.Ibas sidang enda lasaja ncakapken kerna pelayanan, bagepe masalah silit ibas gereja, tapi pe milih Moderamen simbaru sierdahin 5 tahun ke depan. Emaka marilah kita kerina selaku ngawan perpulungen notoken gelah sidang Sinode ras perayaan Jubileum 125 tahun banci erdalan alu mehuli.

Pdt. Steven Kumenit, STh.M.Min.

Lias Ate Dibata Erdahin Ibas Aku (1 Korinti 15:3-11)

PERPULUNGEN JABU-JABU

GEREJA GBKP

TANGGAL 29 MARET – 4 APRIL 2015.

1 Korinti 15 : 3 – 11

Tema : Lias Ate Dibata Erdahin Ibas Aku

LATAR BELAKANG

1.      Perpulungen Korinti, Paulus sendiri simantekisa,tapi ibas perkembangen kekristenan i Korinti, kepeken lit anggota perpulungen Korinti si nggo terpengaruh kubas ajaran-ajaran sipapak, emaka tempa-tempa lit penolakan kerna ajaran kristen situhu-tuhu  kerna kekeken kula (Band. Ayat 12).  Erkiteken sie me Paulus mereken sada pengangkan kerna erti ras makna kematen bagepe kekeken Yesus ras hubunganna ras kalak si nggo tek man baNa.  Gelah perpulungen lebih ngangkai kerna hubungen e, maka ituriken Paulus kerna kematen ras kekeken Yesus singgo iberitakenna man perpulungen Korinti.

2.      Perpulungen Korinti nggo ngaloken Berita Simeriah janah enda labo terjeng ajaren ntah pe doktrin saja, tapi enda merupaken keselamaten man kalak si tek, termasuk perpulungen Korinti, adi tetap tek man Yesus Kristus.

3.      Kematen ras kekeken Yesus eme sada berita situhu-tuhu, janah lit saksina. Nterem kalak singidah Yesus Kristus mate ras keke ibas simate nari, janah sebagian besar para saksi-saksi e nggeluh denga. Emaka adi sangsi denga perpulungen e kerna kematen ras kekeken Yesus, banci denga perpulungen nungkun man para saksi singgeluh denga genduari.

4.      Sada tujun ibas Paulus nuriken kerna makna kematen ras kekeken Yesus ibas simate nari eme gelah perpulungen tetap ncikep kebenaren ras keselamaten singgo ialokenna. Bagepe ula nari terpengaruh ibas ajaren sipapak.

5.      Paulus la saja nuriken kerna inti iman kristen, tapi pe Paulus nuriken kerna kerasulenna. Janah alu meteruk ukur ikatakenna maka ia rasul simeterukna adi ibandingken ras rasul-rasul sideban. Tapi amin bage gia, kerasulenna labo erkiteken pemindonna, tapi erkiteken lias ras perkuah ate Tuhan saja. Sebab secara latar belakang kegeluhen rasul Paulus, iame singayak-ngayak perpulungen Tuhan guna isiksa ras ibunuh. Tapi erkiteken perkuah ate Tuhan nge maka ia nggo jadi rasul. Erkiteken pendilo Tuhan, maka rasul Paulus ndahiken dahinna alu tutus melebihi rasul-rasul sideban. Enda ilakokenna ibas rangka keselamaten manusia. Bagepe iturikenna kerasulenna gelah perpulungen ula sangksi kerna kerasulenna ras pelayanenna. Sebab lit perberita-perberita si Meriah erdahin guna diri sendiri, tapi rasul Paulus erdahin la bo ngarapken upah, tapi ibas rangka keselamaten manusia.

APLIKASI

            Adi siukuri kerna eksistensita, situhuna wajar nge kita nggeluh ibas pernembeh ate Tuhan, sebab silakoken kita eme kegeluhen si la ngena ate Tuhan. Kita selaku manusia tinepaNa la meteh kerna kebenaren, emaka lalap erbahan dosa. Erkiteken sie me kita ndauh ras Tuhan. Tapi erkiteken lias ras perkuah ateNa maka reh Tuhan ibas rupa manusia eme Yesus Kristus guna nelamatken kita kalak perdosa.

            Keselamatan ibereken Tuhan man banta arah kematen ras kekekenNa. Enda ilakokenNa erkiteken keleng kal ateNa man banta. Janah enda me siarus iangkai  kita selaku manusia singgo iselamatken. Jadi secara sederhana ngataken la kal ate Tuhan kita bene ibas dosa nari, sebab sikerajangenNa kap kita. Keleng kal ateNa man banta. Erkiteken keleng kal ate Tuhan man banta, maka ula kal si sia-siaken. Tapi arus jadi pergegeh man banta guna ngelakoken simehuli singena ateNa. Sebab ibas keleng ateNa man banta e, maka ijagai ras iberekenNa kepentaren man banta guna ngelakoken kai singena ate Tuhan. Janah adi jumpa kita perbeben ras kiniseran, erlebuh kita man Tuhan, emaka isampatiNa kita. Enda me gegeh kalak kristen.

Pdt. Steven Kumenit, STh.M.Min.

Keselamaten Si Tuhu-Tuhu (Efesus 2:1-10)

PERPULUNGEN JABU-JABU

GEREJA GBKP

TANGGAL22 – 28 MARET 2015.

Epesus 2:1-10.

Tema : Keselamaten Si Tuhu-Tuhu.

LATAR BELAKANG

1.      Iperpulungen Epesus, subuk kalak kristen asal Yahudi ras la kalak Yahudi nggeluh ibas kiniersadan, janah pertumbuhen gereja tuhu-tuhu nggeluh. Ibas pertumbuhen gereja enda maka fungsi ras tanggungjawab gereja banci tersehi. Tapi Paulus sadar maka kiniersadan gereja banci sontar adi anggota perpulungen nggeluh egois ras la harmonis. Erkiteken sieme Paulus ibas penjara nari mpersingeti perpulungen gelah nggejapken ise ia situhuna.

2.      Amin gia teridah surat Paulus enda tempa-tempa itujuken man kalak kristen siasalna la kalak Yahudi nari, tapi situhuna enda itujuken man kerina perpulungen, emaka nina Paulus man perpulungen, nai kita ersalah ras erdosa. Maksudna ope denga kalak kristen tek man Yesus perbahanan-perbahanan si la ngena ate Tuhan nge sirusur ilakoken. Ope denga jadi kalak kristen perpulungen Epesus patuh nandangi pemimpin penguasa – penguasa si lit ibas awang-awang eme iblis. Erkiteken kegeluhenna sibage me maka situhuna patut nge ndatken pernembeh ibas Tuhan nari. Tapi erkiteken perkuah ate Tuhan saja, maka Tuhan la nai ertaktak nandangi pelanggaran ras dosa sipernah ilakoken ope denga jadi kalak kristen.

3.      Kegeluhen kalak si la tek man Yesus ikuasai iblis. Perukurenna pe nggo ikuasai iblis emaka la nai itehna apai sibenar sisue ras peraten Dibata. Tuhu-tuhu iperbudak iblis emaka nggit ngelakoken dosa. Kegeluhen sibagenda me ikataken Paulus mate pertendinna.

4.      Perkuah ate Kristus nelamatkan kerina kalak si tek man Yesus Kristus (band. Yohanes 3:16). Bagepe erkiteken tek man Yesus nge maka perpulungen Epesus lanai mate pertendinna tapi ipegeluh Tuhan asum Dibata mpekeke Kristus ibas simate nari. Maksudna tanda perpulungen tek man Yesus, perpulungen arus iperidiken, makana makna e peridin eme la saja mbersihken dosa-dosa, tapi pe kalak si nggo tek e nggo mate ras Yesus ibas kematenNa, janah keke ka ras Yesus ibas kekekenNa (band. Roma 6:4). Ibas sienda me perpulungen Epesus arus ngataken bujur man Tuhan.

5.      Ipersingeti Paulus maka keselamaten singgo inanami perpulungen Epesus, labo erkite-kiteken bekas perbahanen ras ulih pendahin perpulungen Epesus, tapi pelin-pelin perkuah ate Tuhan saja. Janah tujunna eme guna ndahinken dahin-dahin simehuli singgo irencanaken Dibata eme keselamaten doni enda.

APLIKASI

            Keselamaten situhu-tuhu reh ibas Tuhan nari ngenca. Kalak si tek man Yesus Kristus ndatken keselamatan. Memang doni enda pe banci mereken keselamatan, tapi enda sesaat ngenca. Tapi siibereken Tuhan man banta eme keselamatan ibas doni ras i surga. Sebab arus siteh kegeluhenta la saja terjeng nggeluh ibas doni enda ngenca, tapi pe i surga. Janah guna ndatken kegeluhenta isurga arus ka nge icidahken tupung kita nggeluh ibas doni enda. Maksudna ibas kita erkiniteken man Tuhan, arus teridah ibas kegeluhenta tep-tep wari.

            Memang ibas kita ncidahken keselamaten i tengah-tengah doni enda, melala tantangan-tantangan sierbahanca mesera siakap sidahiken-dahin Tuhan ibas doni enda. Tapi adi kita tetap ernalem man Tuhan maka kerina tantangan-tantangan sie banci sibentasi. Erkiteken Tuhan mereken man banta kepentaren ras kinigenggengen guna ndalani simehuli ras singena ate Tuhan.

Pdt. Steven Kumenit, STh.M.Min      

Ersada Arih Ibas Dahin Dibata(Efesus 4:11-13)

PERPULUNGEN JABU-JABU (PJJ)

GEREJA GBKP

TANGGAL 15 – 21 MARET 2015.

Epesus 4 : 11 – 13

Tema : Ersada Arih Ibas Dahin Dibata

LATAR BELAKANG

1.      Secara umum : Kota Epesus eme sada kota sicukup meriah, janah cukup terkenal paksa sie. Sebab merupaken salah sada pusat penyembahen. Emaka cukup melala ijumpai ingan-ingan penyembahen man Dewi Diana. Tapi kenca reh Rasul Paulus i je, iajarken Rasul paulus kerna keselamaten si tuhu-tuhu, nterem jelma si tek man Jesus Kristus, termasuk piga-piga guru sibaso si lit i je. Janah erkiteken tek ia man Jesus Kristus, maka itutungna me kerina buku-buku mantrana.

2.      Surat Epesus enda ikirimken Paulus ibas penjara nari, guna mereken nasehat ras motivasi man perpulungen i Epesus selaku kula Kristus gelah tetap nggeluh sue ras pendilo Tuhan bagi tangtangna nai. Janah ibas rangka njagai pengajaren situhu-tuhu, ibas perpulungen e lit erbage-bage pemere Dibata, khususna kerna jabatan-jabaten ibas perpulungen eme rasul, nabi, perberita simehuli, permakan ras guru. Jabatan-jabatan enda fungsina eme memperlengkapi anggota perpulungen, gelah anggota perpulungen seh ku tingkat kedewasaan Kristus si serta. Alu bage kerina anggota perpulungen nggeluh ibas pelayanen Kristus i tengah-tengah perpulungen Tuhan. Alu kata sideban anggota perpulungen harus mbangun kula ni kristus. Erkiteken sie me maka ia kerina harus iperlengkapi.

3.      Paulus ngingetken anggota perpulungen, selaku kula ni kristus siertujun gelah kerina anggota perpulungen bergerak ku sada tujun. Tujun siimaksud Paulus eme ersada ibas kiniteken ras ersada ibas penandai kerna Anak Dibata.  Emaka ibas pengajaren ras pengepken pemimpin-pemimpin perpulungen enda saja me siharus iikutkenna. Alu bage ibas sada paksa perpulungen Epesus banci dewasa, janah seh ku tingkat kedewasaan Kristus siserta.

4.      Sipaling penting ibas perpulungen nggeluh ibas kiniersadan ras sada penandaina kerna Anak Dibata maka, perpulungen lanai i jolah- joleken alu  pengajaren- pengajaren si papak, tapi justru ngasup bertahan ras naluken kerina e. Siimaksudken Paulus kerna ajaren sipapak eme ajaren kafir, ajaren bidat (band. Kolose 2:8). Ajaren e tuhu-tuhu membahayaken.

5.      Pembangunan e ibenaken ibas Takal kula e (Yesus Kristus). Yesus Kristus me si mereken kepentaren ras si menghubungken ras mereken gegeh man kerina anggota perpulungen termasuk pelayan-pelayan ibas pelayanenna, gelah kerina anggota perpulungen terjaga ras nggeluh ibas kiniersadan. Enda itekanken sebab paksa sie enggo terjadi persadan simehuli antara kalak Yahudi ras kalak non Yahudi.

APLIKASI

            Secara sederhana banci sikataken litna serayan Tuhan erkite-kiteken Dibata sindilo ras similih, bagepe itempatken Tuhan ibas sada-sada ingan (gereja) ibas rangka majekken kula ni Kristus gelah anggota perpulungen seh ku tingkat kedewasaan Kristus siserta. Ibas rangka sie tentuna serayan Tuhan ibas ngelai i tengah-tengah perpulungen arus nggeluh ibas kiniersadaan. Kegeluhen iibas kiniersadaan la saja terjeng sapih-sapih serayan Tuhan, tapi ras anggota perpulungen pe.

            Memang ibas ngelai i tengah-tengah Perpulungen, Tuhan nggo mereken erbage-bage pemere ibas rangka mperlengkapi serayanNa ngelai i tengah-tengah gerejaNa. Pemere-pemere e mereken gegeh ras ki inggiten guna ngelai.

            Pelayanan serayan Tuhan ibas gereja perlu ndatken masukan-masukan ibas anggota perpulungen nari, gelah serayan Tuhan pe ngelai sue ras kebutuhen perpulungen.

            Salah sada ingan ntah sarana keterlibatan anggota ngawan ibas pelayanan gereja eme Musyawarah Ngawan. Emaka runggun gereja arus memanfaatkan Musyawarah Ngawan enda alu mehuli gelah kai siniarapken Yesus nandangi perpulungenNa banci seh, eme anggota perpulungen nggeluh mbiar ras erkemalangan man baNa saja. Bagepe lit pertumbuhan kiniteken bas anggota perpulungen e.

Pdt.Steven Kumenit, STh