Doni Kalak Mate (Ibrani 11:13-16)

PERPULUNGEN JABU-JABU

GEREJA GBKP

TANGGAL 3 – 9 MEI 2015.

Heber 11:13-16.

Tema : Doni Kalak Mate.

LATAR BELAKANG

1.      Secara umum banci sikataken surat Heber enda ialamatken man kalak Jahudi sienggo jadi Kristen, sipaksa sie ngenanami kiniseran, janah ia enggo rukur mulihi ras erpengakap maka agama Yahudi ndauh ulin asangken  jadi kalak kristen.

2.      Ibas situasi sibagenda me penulis Heber mereken pergegeh man kalak kristen asal Yahudi, khususna uga erkiniteken man Dibata, bagepe  gelah ula  sia-sia kalak sierkiniteken man Tuhan. Erkiteken sie me penulis ncidahken  piga-piga kalak situtus ibas erkiniteken man Tuhan, janah kerina jelma siikataken penulis enda tuhu-tuhu itandai perpulungen.

3.      Penulis alu tegas nekanken kerna inti erkiniteken. Inti erkiniteken eme nggeluh ibas pengarapen nandangi kai si la idah, ras kalak si tutus nggeluh ibas pengarapen erkiteken kinitekenna man Tuhan datkenna pasu-pasu ibas Dibata nari. Enda me siilakoken para tokoh ibas padan sindekah. Enda itekanken gelah kalak kristen banci meteh kiniteken para tokoh ibas padan sindekah e, bali nge ras kiniteken ibas kalak “si genduari”.

4.      Kiniteken siimaksudken penulis man kalak kristen Yahudi eme labo patuh nandangi kerina peraturan keagamaan, ntah ngikuti kerina ajaren agama saja tapi tetap tek nandangi Dibata amin gia Dibata e la iidah. Ibas tutus erkiniteken man Dibata nge maka Dibata erngena ate man kalak kristen. Enda nggo lit contohna eme kegeluhen nini-nini bangsa Yahudi, emaka kalak si tutus ras tetap erpengarapen man Dibata saja nge  singgeluh ras Dibata, ntah pe jadi bagin ibas bangsa Dibata.

5.      Arah enda situhuna ngataken man kalak Kristen maka lit situhuna ingan siisikapken Dibata nandangi kalak si tek man baNa ras tetap erpengarapen man baNa. Enda me janji Tuhan man kalak si tek. Jadi alu pengarapen me maka kalak Kristen asal Yahudi tetap erpengarapen, gia sada paksa ia mate, maka nggo lit ingan sienggo isikapken Tuhan sijadi sekerajangen kalak si tek.

APLIKASI

            Ibas pengakun kiniteken Rasuli, je lit sada kalimat “reh me ia pagi ngeranaken kalak singgeluh ras singgo mate”. Adi erpalasken enda maka subuk kalak singgo mate bage pe singgeluh, ringan/lit ibas doni enda denga. Bagepe siertiken maka ibas kekeken Yesus Kristus ibas simate nari, maka kalak singgo mate pe ndatken kekeken kula.

            Man kalak singgo mate kepeken nggo isikapken Tuhan sada kuta (Heber 11:16), alu bage tentuna kita lanai perlu  mbiar sebab kalak singgo mate ibas Yesus Kristus nggeluh ibas ketuahen (Band. Ketangkasen 14:13), sebab ibas padan Yesus, Ia lawes nikapken ingan man banta (Band. Yohanes 14:2), maka reh me Ia pagi ngalo-ngalo kalak simate ibas Yesus Kristus.

            Ibas pemahaman enda maka banci sikataken, kenca Yesus ngeranaken kalak singgo mate ras singgeluh denga maka lit dua ingan man kalak singgo mate, eme kalak sila tek man Tuhan, kenca ia mate kegeluhenna eme i neraka, Tapi kalak situhu-tuhu nggeluh mbiar ras erkemalangan man Tuhan, kenca ia mate kegeluhenna eme nggeluh ras Tuhan i Surga.  

Pdt. Steven Kumenit, STh, M.Min.

Ngerencanaken Perbeliten Ras Masa Depan Bas Jabu Alu Payo (Kejadian 41:53-57)

PERPULUNGEN JABU-JABU

GEREJA GBKP

TANGGAL 26 APRIL – 2 MEI 2015.

Kejadin 41 : 53 – 57.

Tema : Ngerencanaken Perbeliten Ras Masa Depan Bas Jabu Alu Payo

LATAR BELAKANG

1.      Yusup labo kalak Mesir, tapi erkiteken kepentaren si lit bas ia, khususna ngasup ngoge kai erti nipi raja maka Yusup iangkat jadi wakil raja. Jabatan selaku Wakil raja cukup penting, sebab Jusup bertanggungjawab langsung man raja, jenari selaku wakil raja,  ise pe la banci erbahan kai pe adi la nungkun lebe man Yusup.

2.      Pengangkatan Yusup jadi wakil raja Mesir ertujun guna ngaturken bangsa Mesir gelah nggeluh adil ras makmur, apai ka ibas menghadapi sada kiniseran ibas 7 tahun si reh, eme kelihen si mesangat. Sebab ibas nipi raja Mesir, singgo ioge ntah pe iantusi Yusup ngataken maka bangsa Mesir 7 tahun nggeluh alu riba-iba pangan, janah pitu tahun kenca sie, bangsa Mesir nggeluh ibas kiniseran.

3.      Selain Yusup iangkat jadi wakil raja ras nggo ibereken raja otoritas penuh (kuasa) guna merentah, bagepe gelar Yusup isambari alu gelar kalak Mesir  eme Sapnat Panea, siartina Dibata ngerana, Ia nggeluh, bagepe ibereken raja sekalak diberu guna jadi ndehara Yusup eme Asenat, siertina Milik Neit (Dewi kalak Mesir).

4.      Ibas umur telu puluh tahun Yusup nadingken istana raja guna erdahin mpesikap gelah rakyat Mesir la kelihen kenca bangsa Mesir bengket ku bas pitu tahun kiniseran (nggeluh ibas kelihen). Cara kerja ntah pe teknik siilakoken Yusup e me bagi siikatakenna man raja eme mpepulung seperlima ibas ulih peraninna guna jadi persediaan. Ipepulung Yusup kerina bahan pangan e,  janah itamaken ku lumbung si lit ibas tep-tep kuta. Emaka kenca reh bencana kelihen singkenai bangsa Mesir ras bangsa-bangsa sidebanna, bangsa Mesir nari ngenca sitetap lit persedian panganna, bangsa Mesir la nggeluh ibas kelihen sebab lebih nggo persediaan panganna.  Erkiteken tersedia kerina bahan pangan ibas bangsa Mesir, maka situasi enda terberita seh ku bangsa – bangsa sideban, emaka reh me  kerina bangsa-bangsa sideban  guna nukur nakan ku Mesir.

5.      Ngenen kai siilakoken Yusup nandangi bangsa Mesir, situhuna pengrealisasian ibas sura-sura Dibata nandangi bangsa Mesir, khususna man Yusup. Sebab alu la igejap raja Mesir, peraten Tuhan nggo erdalan. Tuhan make bangsa Mesir guna mengrealisasikan rencana Tuhan simbelin eme pemeliharaan man anak-anakNa (nen 45:5-8; 50:19-20).

APLIKASI

            Kegeluhen keluarga la saja nggeluh ibas paksa genduari saja, tapi pe nggeluh ku bas wari-wari sinandangi reh. Emaka kita selaku keluarga arus ka ngasup ngaturken pemere Tuhan (erta) guna kegeluhenta ku masa depan. Emaka penting kal man banta kuga maka kita banci nimpan sebagin arah penghasilenta (menabung).

            Kerna kegeluhen masa depan  labo siteh, emaka penting kal man banta erjaga-jaga, gelah adi reh man banta situasi  si la bagi ukurta, nggo min lit persiapenta. Jadi penting situhuna man banta uga kita ngelitken manajemen keluarga. Alu litna manajemen keluarga, janah litna disiplin ibas manajemen keluarga e, keluarga banci terhindar ibas “kelihen” (band. Bahan oratenta).

            Tentuna gelah kita ngasup ngaturken perbelitenta, maka kita arus makeken kepentaren sirehna ibas Dibata nari. Adi kita ngerana kerna kepentaren Dibata, maka kita arus mbiar ras erkemalangen man baNa, teridah pe ibas pemaken pemere-pemere Dibata e alu ertanggungjawab. Janah ciri kalak simalang man Tuhan, ngasup ngkuasai dirina alu la nggeluh boros tupung melala rezekina, tapi pe ngasup nisihkenkenca gunawari-wari sinandangi reh.

Pdt. Steven Kumenit, STh.M.Min.

Jabu Si Sempabu (Harmonis) - Mazmur 128:1-6

PERPULUNGEN JABU-JABU

                                                                      GEREJA GBKP

TANGGAL 19 – 25 APRIL 2015.

Mazmur 128:1-6.

Tema : Jabu Si Sempabu (Harmonis)

LATAR BELAKANG

1.      Sijadi oratenta sendah eme berhubungen erat ras mazmur pasal 1 ras pasal 127, sinekanken kerna ulih kalak sierkemalangen man Tuhan. Kalak sierkemalangen man Tuhan, sierdalan sue ras peraten Tuhan ngaloken pasu-pasu ibas jabuna ras sebage warga kota Yerusalem. Alu bage pemazmur ngajarken “cara hidup” simehuli, simpereh kemalemen ate.

2.      Mazmur enda merupakan sada pernyataan kiniteken ija Dibata situhu-tuhu ras banci terteki lalap masu-masu ise saja si enghamati Ia, si mbiar man Tuhan. Mbiar man Tuhan la saja terjeng mbiar ntah ras patuh nandangi sejumlah perentahNa, tapi harus teridah ibas “cara nggeluh” simenempatkan Tuhan idas kerinana.

3.      Cara nggeluh mbiar ras erkemalangen man Tuhan, anak jabuna pe (ndehara ras anak) ikut mbiar man Tuhan, bagepe jadi keriahen tersendiri nandangi sekalak bapa, sebab ndehara tehna kai siibahanna ibas jabuna, anak jadi masa depan ras kelanjuten nggeluh keluarga sierkemalangen man Tuhan.

4.       Lit dua simbol siicidahken pemazmur nandangi bapa si erkemalangan man Tuhan, janah enda eme ulih bapa sierkemalangan man Tuhan, sebab ibas kegeluhenna peraten Dibata saja siidalanken bas jabuna. Simbol eme : 1). Ndehara bali ras anggur simeramis. Enda ibuat ibas latar belakang kegeluhen kalak Jahudi, selaku petani anggur. Batang anggur mbutuhken “tunjangan/penopang” (perbulangen), tapi lalap mere asangken ngalo. Maksudna tetap mereken keriahen ras kemalemen ate nandangi perbulangenna (band. Kuan-Kuanen  Pasal 31). 2). Anak-anak bali ras tunas batang zaitung isekelewet mejana. Sada simbol kerna pasu-pasu Tuhan sitetap ras “daya hidup ras kelanjutan hidup keluarga.

5.      Kalak sierkemalangen man Tuhan, ipasu-pasu Tuhan ia. Janah idahna kesangapen Yerusalem (kebaikan umat Tuhan), cawir metua.

APLIKASI

            Keluarga si sempabu eme sura-suranta kerina. Janah selaku keluarga kristen gelah lit keharmonisen maka kita harus mbiar ras erkemalangengen man Tuhan. Em sebabna ersura-sura kita gelah jabunta ipasu-pasu Tuhan. Ersura-sura kita ope denga kita bengket ibas ikaten perjabun reh kita ku gereja guna ngaloken pasu-pasu idur Dibata nari. Janah lebe-lebe Tuhan ras isaksiken perpulungen, erpadan kita guna nggeluh setia seh Dibata nirangken alu kematen.

            Keluarga sisempabu eme tanggungjawab perbulangen ras ndehara, janah masing-masing mensyukuri kai si lit bas ia, jadi la sada pihak ngenca. Alu bage perbulangen ras ndehara nggeluh kai si lit bas ia ras nggeluh erpalasken keleng ate. Maksudna perbulangen ras ndehara nggejapken kemalemen ate ibas  kai si lit (materi) bas ia. Sienda labo berarti menutup kemungkinen keluarga ersura-sura guna ndatken erta, tentu enda banci-banci saja asal  ula ka enda jadi perayaken sierbahanca perbulangen ras ndehara, bagepe anak lanai sicocoken.

            Kerina keluarga, pasti memiliki problemna masing-masing, saja ula min problem enda dungna jadi palas man keluarga kristen lanai siangkan. Tapi ibas kerina problem silit kita ngasup ngatasisa alu erpengarapen man Tuhan. Emaka si paling penting man keluarga kristen pegeluhlah spiritualitas keluarga, pendidiken agama kristen harus lit I tengah-tengah jabu. Alu bage kerina isi jabu banci memahami kerna problem si lit, janah ras-ras ngatasisa.

Pdt. Steven Kumenit,STh.,M.Min.

Ula Jadi Cakap (1 Samuel 2:22-26)

PERPULUNGEN JABU-JABU

GEREJA GBKP

TANGGAL 12 – 18 APRIL 2015.

1 Samuel 2 : 22 – 26.

Tema : Ula Jadi Cakap.

LATAR BELAKANG

1.      Keluarga Eli eme keluarga imam. Kegeluhen selaku imam arus nggeluh badia, sebab imam eme pengantara bangsa Israel ras Tuhan. Bagepe mimpin ibadah, emaka ndahin imam eme dahin sisangat penting kal, sebab menyangkut spiritualitas bangsa Israel.

2.      Anak Eli eme Hopni ras Pinehas lanai ncidahken kegeluhen si Badia selaku imam, emaka nggo jadi cakap (batu antuken) nandangi bangsa Israel. Lit dua hal siiilakoken Hopni ras Pinehas eme jadi cakap man bangsa Israel eme kai sijadi sikerajangen Tuhan itangkona. Maksudna ijenda adi ibas bangsa Israel nehken persembahen gelehen, daging simehuli ipersembahken man Tuhan, tapi daging simehuli em sibuat Hopni ras Pinehas. Bagepe Hopni ras Pinehas enda nggo erlua-lua ras diberu-diberu singelai ibas dalan bengket ku rumah pertoton. Kerina enda iidah bangsa Israel. Erkiteken perbahanen Hopni ras Pinehas nggo jadi cakap bangsa Israel,emaka ilaporkenna man Eli selaku bapana.

3.      Eli Selaku orang tua itegurna nge anak-anakna, janah teguran enda mereken sada pengertin simendasar kerna keselamatan manusia. I ja adi sekalak erdosa man temanna manusia, banci ia isampati Tuhan. Tuhan banci mereken pengalemi dosa man bana, adi sierdosa e ngakuken kerina dosana i lebe-lebe Tuhan. Tapi adi manusia erdosa man Tuhan, tentuna la lit si banci nampati ia. Kerina siikataken  Eli, la ibegiken anak-anakna, sebab nggo ikerasken Tuhan pusuh kalak enda, sebab ate Tuhan ngukum ia alu munuhsa. Hopni ras Pinehas mate erkite-kiteken kinilapatuhenna man Tuhan.

4.      Dosa-dosa siilakoken Hopni ras Pinehas ilakokenna alu terang-terangen, emaka selaku imam, enda me merupaken dosa simbelinna siilakoken Hopni ras Pinehas selaku imam.

5.       Dahin pelayanan imam i Silo arus tetap lit, emaka ibas Tuhan ngg o netapken Hopni ras Pinehas arus ihukum mati,  Samuel ipersipken guna jadi imam, emaka spiritualitas Samuel secara pribadi ngena kal ate bangsa Israel ras Tuhan. Enda jadi erkite-kiteken Samuel sekalak mbiar ras erkemalangen man Tuhan.

APLIKASI

            Selaku orang tua tentuna ersura-sura gelah anak-anakna kerina nggeluh alu mehuli. Moral ras etika tuhu-tuhu teridah min bas anak-anak.

            Pembentuken moral ras etika man anak-anak ibenaken irumah ntah pe ibas jabu, sebab keluarga eme  insititusi terkecil, bagepe keluarga eme gereja sikitik. Erkiteken keluarga erperan penting, emaka sipemena si ngelakoken pendidikan anak eme orang tua sendiri. Emaka penting kal orang tua mperdiateken  perkembangan anak, subuk i rumah sendiri, bagepe i luar rumah.

            Peran orang tua eme la saja mereken pendidikan formal man anak-anak, tapi pe pendidikan agama. Pendidikan agama banci ilakoken arah ngerana kerna keleng ate Tuhan nandangi keluarga (band. Ulangan 6:7), ertoto ras-ras, bagepe ibadah keluarga. Kegeluhen sibagenda me situhuna banci mbentuk karakter anak ku kegeluhen singena ate Tuhan. Adi la sibahan bage, maka anak-anak pagi banci nggeluh la bagi siniarapken orang tua. Kegeluhen anak-anakta jadi cakap man masyarakat ntah pe anggota perpulungen, sebab siilakoken anak-anakta eme kegeluhen si la ngena ate Tuhan.

Pdt. Steven Kumenit, STh.M.Min.