Rabu, 28 Oktober 2015

Mediate Nandangi Unit Pelayanan Diakonia GBKP (Filpi 2:1-5)



PERPULUNGEN JABU-JABU
GEREJA GBKP
TANGGAL 1 – 7 NOPEMBER 2015.
Pilipi 2:1-5.

Tema : Mediate Nandangi Unit Pelayanan Diakonia GBKP.

LATAR BELAKANG
1.      Enda merupaken nasehat rasul Paulus man perpulungen Pilipi, sebab enggo iidah Paulus perpulungen Pilipi enda lit ibas “bahaya perpecahen” (band. Pilipi 4:2-3). Enda ipeseh Paulus labo saja erkiteken perpulungen pilipi enda cukup mperdiateken Paulus, khususna paksa Paulus lit ibas penjara, tapi idah Paulus selaku gereja, harus nggeluh bagi biak Kristus, Sebab Kristus kepala gereja.
2.      Kai siikataken Paulus man perpulungen Pilipi enda, gelah perpulungen Pilipi banci nginget mulihi kerna biak ras karakter kalak si tek man Yesus Kristus (biak kalak kristen). Bagepe nasehat enda sekaligus mereken motifasi gelah tetap erjuang ras tetap nggeluh erbahan kekelengen. Sebab ibas perbahanen sibage maka terjaga nge persadan si enggo tercipta.
3.      Kekelengen ibas Kristus harus nggeluh bas pusuh ras peraten perpulungen Pilipi gelah perpulungen Pilipi nggejapken maka kalak sideban lebih meherga asangken ia.  Alu bage la lit sideban sibanci ilakokenna asangken nggeluh ibas persadan ras nggeluh ibas sada misi ras visi.
4.      Ijenda Paulus ngataken kerna biak-biak kegeluhen selaku perpulungen Kristen. Selaku kalak kristen harus min lit pengapul ibas Kristus, sikeleng-kelengen ras saling memotivasi sada ras sidebanna, Nggeluh ibas Kesah si Badia , bagepe nggeluh ibas kiniteruken ukur, bagepe nggeluh ibas sada arih,  janah sipaling penting eme nggeluh ibas Kristus. Adi biak kristen enda tetap nggeluh bas perpulungen Pilipi maka sijadi  eme kegeluhen perpulungen Pilipi ngasup ncidahken kegeluhen si la egois ras la lit kiniganjangan ukur tapi alu meteruk ukur, ngenen kalak sideban lebih mehuli janah tetap mperdiateken kalak sideban (lit rasa kepedulian).
5.      Perbahanen sibage merupaken perbahanen Kristus. Emaka Paulus mendorong gelah teladan Kristus enda nggeluh ibas perpulungen. Alu bage perpulungen tetap nggeluh ibas kiniersadan.

APLIKASI
            Ibas rangka tergejap ras ernanam kehadiran gereja i tengah-tengah doni enda, maka tri tugas gereja ipegegehi GBKP. Salah sada tri tugas gereja eme Diakonia. Janah ibas bidang Diakonia enda ibentuk piga-piga unit pelayanan eme Alpha Omega (simenangani siberkebutuhen khusus), PPOS (simenangani Orang tua lanjut usia), Panti Asuhan (Simenangani anak-anak), HIV/ AID, rsd.
            Siniharapken, kita selaku angota perpulungen , mperdiateken unit-unit pelayanan Diakonia enda. Sebab unit pelayanan Diakonia enda eme salah sada ujung tombak pelayanan gereja. Jadi penungknen man banta, uga carana  mperdiateken unit-unit pelayanan Diakonia enda. Secara sederhana kita arus notoken gelah senina turangta simenangani unit-unit pelayanan Diakonia enda erdahin alu erpalaskan mbiar man Tuhan ras alu meriah ukurna. Bagepe kita arus ikut muat bagin alu sen. Sebab memala sen siibutuhken unit-unit pelayanan enda. Isamping sie, tentuna kita selaku gereja subuk ibas tingkat runggun, bagepe PJJ kita arus merealisasikan kegiaten-kegiaten diakonia. Memang lit hambatan-hambatan sirusur ngambati kita ibas ndalanken program-program diakonia. Tapi sekali enda kita ipersingeti marilah kita ersada ukurta, ras nggeluh bagi biak Kristus eme nggit erkorban guna kalak sideban, gelah kalak sideban selamat. Adi perukurenta bali ras perukuren Kristus maka pelayanan diakonia banci erdalan alu mehuli, sebab nggeluh bas kita kekelengen. Gelah perukurenta bali ras perukuren Kristus, maka siarus ibahan kita eme nggeluh ersada ras Kristus.

Pdt. Steven Kumenit Tarigan, STh.M.Min.  

Selasa, 27 Oktober 2015

Kekelengen Si La Erbaleng (Roma 12:9-13)



KHOTBAH TANGGAL 1 NOPEMBER 2015
GEREJA GBKP
Invocatio    :    Erjabap Raja e nina, 'Kukataken man bandu: Kai si ibahanndu man sekalak si musilna i bas seninangKu enda, e me si tuhuna perbahanenndu man bangKu (Matius 25:40).
Ogen          :    Ulangan 10:16-22 (Tunggal).
Khotbah     :    Roma 12:9-13 (Anthiponal).
Tema          :    Kekelengen Si La Erbaleng.

LATAR BELAKANG
1.      Paulus ngerana man perpulungen Roma kerna eksistensi kalak kristen. Selaku kalak kristen arus teridah ibas perkatan ras perbahanan. Enda situhuna aplikasi ibas persesembahen singgeluh rikutken singena ate Tuhan (ayat 1).
2.      Tole ipersingeti Paulus man perpulungen Roma kerna kegeluhen ibas persadan (Gereja): a). Keleng ate ola pekulah-kulah. b). Cigalah atendu kerna sijahat. c). Persadalah dirindu ras simehuli. d). Sikeleng-kelengenlah kam bagi siersenina. Silebe-lebenlah ibas pehaga teman. e). Ola mekisat, tapi tutuslah kam erdahin.  f). Ergiah-giahlah ukurndu ibas dahinken dahin Tuhan. g). Meriahlah atendu ibas kam erpengarapen. i). Megenggenglah kam ibas kiniseranndu. j). Ertotolah man Dibata la ergadi-ngadi. k). Raskenlah kinilitenndu ras temanndu si sada kiniteken. l). Alokenlah kalak si reh kesilang ku rumahndu). Jadi lit 11 pengajaren guna ncidahken persembahen singgeluh rikutken singena ate Tuhan.
3.      Arah enda ate Palus gelah persadan kalak si tek (Gereja) megegeh, ndalankan keleng ate ras tetap erpengarapen man Tuhan amin gia nggeluh ibas perbeben ras kiniseran.
4.      Janah perlu siteh perpulungen Roma nterem kalak Jahudi. Ibas kalak Jahudi, salah sada siarus iperdiaten eme kalak pertandang, janah enda tanggungjawab siarus ilakoken bangsa Jahudi.
5.       Jadi amin ia situhuna kalak kristen sangana ibas jajahan kalak Roma ras nggeluh ibas kiniseran, ula tadingken eksistensi kalak kristen eme nehken keleng ate, tetap erdahin, megegeng ibas kiniseran ras tetap ertoto man Tuhan.

APLIKASI
·         Ibas ogen, bangsa Israel ibas proses ncidahkan ras mpraktekken kekelengen, tapi ibas khotbahta iajuk nehken kekelengen nandangi orang tua (PPOS), anak melumang (Gelora Kasih) ras distabilitas/anak sikebutuhan khusus (YKPC). Jadi penungkunen man banta engkai maka kita arus ncidahkan kekelengen ? sebab Dibata eme Dibata sierkeleng ate.
·         Kekelengen si la erbaleng berarti kekelengen si la terbatas, maksudna la saja ibas jabu, kade-kade tapi ise simbutuh penampat perlu sikelengi alu la mengharapkan imbalan (upah). Bagepe ula min nehken kekelengen erkiteken legalisme (nggo iatur ibas aturen) ras nepotisme.
·         Amin gia situhuna kekelengen si la erbaleng la terbatas, tapi ibas kesempaten enda kita ngerana kerna kekelengen nandangi 3 hal eme gelora kasih, PPOS ras YKPC. Janah GBKP ncidahkan keleng ate nandangi  kalak simbutuhken kekelengen eme arah mendirikan  unit pelayanan Panti Asuhan, PPOS ras YKPC. Gelah subuk orang tua bagepe anak ras anak cacat tersampati.
·         Siperlu iinget, ibas kita nehken keleng ate eme arus  tepat waktu, tepat daya ras tepat guna gelah ernanam man kalak sideban.
·         Tapi nehken kekelengen arus ibas pusuh siersuruh, emaka biak selaku kalak Karo silenga aloken Berita Simeriah arus itadingken eme salah sada, masih ngenen ise kin siman sampaten. Jadi kekelengen arus irealisasiken, la bo gelah kalak nggo tersampati,tapi enda me pendilonta ibas nehken kekelengen arah nampati unit pelayanan Gelorah Kasih, PPOS ras YKPC. Emaka marilah ibas kita er-Natal siingetlah 3 unit enda. Jenari sibahanlah enda jadi orat geluhta selaku kalak kristen eme sisampat-sampaten, jadi la saja tupung kita er-Natal. Janah keluarga silit orang tua ras anakna ibas 3 unit enda, tetaplah mperdiateken tanggungjawabna.


Pdt. Steven Kumenit Tarigan, STh.M.Min.

Kamis, 22 Oktober 2015

Erti Puasa (Esra 8:21-23; Matius 9 : 1-2)



PERPULUNGEN JABU-JABU
GEREJA GBKP
TANGGAL 25 – 31 OKTOBER 2015.
Esra 8:21-23; Matius 9 : 1-2.

Tema : Erti Puasa.

LATAR BELAKANG
A.    Esra 8:21-23.
  1. Erkiteke-kiteken bangsa Israel nggeluh erbana-bana, lanai megikenna kai sura-sura Tuhan maka, ihukum Tuhan me bangsa Israel. Bentuk penghukuman Tuhan eme bangsa Israel i baba ku Babel, jadi tabanan bangsa babel. Tapi erkiteken lias ras perkuah ate Tuhan, janah idah Tuhan maka nggo bias penghukuman bangsa Israel, maka Tuhan make raja Kores ras Darius lako mbebaskan bangsa Israel, janah bangsa Israel nggo banci mulih ku Yerusalem ersembah man Tuhan.
  2. Ibas perdalanen mulih ku Yerusalem, tentuna melala musuh ras perampuk sibanci ngelawan ras munuh bangsa Israel. Alu bage bangsa Israel banci saja la seh i Yerusalem, ntah pe kerina barang-barang siibabana i Babel nari nggo irampuk kalak Jahat. Erkiteken sie me tupung bangsa Israel ngadi i lau anak Ahawa, isuruh Esra gelah kerina bangsa Israel erpuasa ras ertoto. Tujun erpuasa eme gelah Tuhan nuduhken dalan siaman ras ngkawali bangsa Israel. Alu bage bangsa Israel banci seh i Yerusalem alu mejuah-juah. Emaka adi sioge terdauhen, maka erkiteken bangsa Israel erpuasa ras ertoto, ituduhken ras ikawali Tuhan me, emaka seh me bangsa Isreal i Yerusalem alu mejuah-juah.

B.     Matius 9:1-2.
  1. Kerehen Jesus Kristus ku doni eme ibas rangka keselamatan. Janah keselamatan enda la saja keselamatan secara rohani,tapi pembebasan ibas ikaten-ikaten jasmani (pinakit). Sebab ibas zaman Jesus Kristus, lit kalak sierpengakap maka lit piga-piga pinakit isebabken dosa nari. Salah sada pinakit eme pangpangan.
  2. Melala tanda-tanda sengget siibahan Jesus, eme pepalem kalak sakit, pelawes sedan-sedan ras mpekeke kalak singgo mate. Erkite-kiteken melala tanda-tanda sengget siibahan Jesus e me maka nggo mbar kuasa Jesus. Erkiteken sie me ku ja Jesus lawes, nterem kalak reh ndahi Ia lako mindo penampat man baNa.
  3. Ibas oratenta ikataken kenca Jesus seh i kutaNa. Jadi penungkunen i ja kuta Jesus e ? memang ibas Pustaka Si Badia ikataken, Jesus tubuh i Betlehem, janah mbelin i Nazaret. Tapi siimaksudken i jenda eme i Kapernaum, sebab rusur Jesus reh i Kapernaum. I kuta  Kapernaum enda me itaruken kalak sekalak sipangpangan man Jesus, jenari nina Jesus tetapkenlah ukurndu o anakKu, sebab dosandu nggo ialemi. Ibas sie la saja kesembuhan jasmani siibereken Jesus man kalak sipinakit pangpangan e, tapi pe Jesus mereken kesembuhan jiwa/rohani.

APLIKASI
            Temanta sedah kerna erti pusa. Emaka adi ngerana kita kerna puasa, lit sada penungkunen. Apakah puasa e la man ras la minem ? tentuna lang. Sebab ibas piga-piga kesaksin alkitab, lit piga-piga erti kerna puasa, lit puasa la man ras minem, lit puasa Osarilah rante pengiket janah agui baban kinibujuren, janah bebaskenlah kalak si idehkendu (Jesaya 58:6), rsd. Tapi mari sinen erti puasa ibas esra nari. Isuruh Esra erpuasa ibas rangka gelah Dibata tetap erngena ate man bangsa Israel ras tetap itemani ras ijagai Tuhan ia seh ku Jerusalem. Jadi erti erpuasa ibas rangka relasi sitetap antara kita ras Tuhan. Siimaksudken relasi eme lit hubungan rohani kita ras Tuhan. Alu bage erti puasa sihakiki eme mindo Tuhan tetap ras kita ras lit kesembuhan jiwa/rohani.

Pdt. Steven Kumenit Tarigan, STh.M.Min.  

Jumat, 16 Oktober 2015

Kam Kemegahenku Ibas Yesus (1 Tesalonika 2:9-19)



PERPULUNGEN JABU – JABU
GEREJA GBKP
TANGGAL 18 – 24 OKTOBER 2015.
1 Tesalonika 2:9-19.

Tema : Kam Kemegahenku Ibas Yesus.

LATAR BELAKANG
1.    Ibas perpulungen Tesalonika nggo lit kelompok singajuk-ngajuk perpulungen gelah ngelawan Paulus. Cara kalak enda ngelawan Paulus eme alu ngataken kerasulan Paulus la tuhu ras motivasi Paulus ngelai eme ibas rangka ndarami keuntungen pribadi. Erkiteken sie me arah surat enda Paulus mbela dirina. Ibas pembelaan diri Paulus i je ikataken maka pelayanenna tuhu-tuhu murni, janah ibas rangka ncukupi kebutuhenna tep-tep wari Paulus harus erdahin suari ras berngi.
2.    Pendahin Paulus eme erbahan tenda. Hasil ibas pendahin enda ipakena guna ncukupi kebutuhenna tep-tep wari. Enda ibahanna gelah perpulungen siilayanina, termasuk perpulungen Tesalonika la iberatken. Janah pendahin Paulus enda enggo iteh perpulungen pe (band. Ayat 9). Pendahin enda sengaja itonjolkan Paulus man perpulungen Tesalonika gelah perpulungen banci meteh kerna sie, bagepe ate Paulus gelah perpulungen banci mbedaken ia ras perberita si reh i tengah-tengah perpulungen sipelin-pelin ndarami keuntungen pribadi arah pelayanenna.
3.    Perpulungen  ras Tuhan sendiri sijadi saksi kerna pelayanen situhu-tuhu si la ndarami keuntungen siilakoken Paulus. Enda idalanken Paulus guna ngaloken pendilo ras pengutusen Tuhan man dirina guna mberitaken Berita si Meriah man kalak si la kalak Jahudi.
4.      Bagepe ituriken Paulus uga bentuk pelayanenna man perpulungen i Tesalonika. Paulus bagi sekalak bapa man perpulungen (anak), mabai dingen ipetetap Paulus ukur perpulungen, bage pe ipindo Paulus gelah perpulungen nggeluh rikutken si ngena ate Dibata, e me Dibata si ndilo perpulungen gelah ikut ngenanami kemalemen ate i bas KinirajanNa ras KemulianNa. Jadi dahin Paulus la saja terjeng manteki perpulungen, tapi kenca sie lit sada perawaten man/pendampingen perpulungen, subuk ibas moral, ajaren, bagepe kiniteken. Enda kerina ibahan Paulus erkiteken keleng ate.
5.      Sijadi oratenta sendah la saja merupaken sada pembelaan Paulus, tapi pe mereken motivasi man perpulungen gelah tetap tutus erkiniteken man Tuhan. Sebab kenca perpulungen tek man Yesus Kristus, berarti perpulungen enggo idilo ku bas KinirajaanNa ras kemulianNa. Maksudna gelah perpupulungen banci meteh maka kerina kalak sienggo ipilih Dibata ipermuliakan ibas KinirajanNa, amin gia lit cubaan-cubaan ras kiniseran erkite-kiteken la meriah ukur kalak nandangi kiniersadan perpulungen ras Jesus Kristus. Siimaksudken Paulus perpulungen ibas njaga keselamatanna lit siatena ndabuhken ia eme kalak Jahudi. Kalak Jahudi reh ibas rangka pesega-sega perpulungen.

APLIKASI
Kita kerina eme tinepa Dibata, janah seri kita i lebe-lebe Dibata. Emaka sarusna min kegeluhenta eme nggeluh ibas persadan ras sikeleng-kelengen. Tapi siidah, lit denga  kita si la siangkan ras rubat. Tentuna enda jadi erkite-kiteken kurang siergan, bagepe la kita ngasup ngaloken temanta bagi kai si lit bas ia. Bagepe keegoisenta cukup mpengaruhi caranta rukur. Seharusna min kegeluhen sibage lanai nggeluh bas kita sebab, kegoisenta ntah pe keakunta nggo ikut isalibken ibas kematen Jesus Kristus. Singgeluh bas kita eme kegeluhen singena ate Tuhan. Kegeluhen sikeleng-kelengen ras sierga-ergan. Bagepe arus siangkai maka kegeluhen bas persadan mabagi kita rukur temanta eme kemegahanta. Erkiteken temanta e maka kita isampatina. Erkiteken temanta maka kai sikurang bas kita tertutupi. Emaka ibas pemahamenta sibage, kegeluhenta nggeluh ibas persadan ras kiniseran.
  
Pdt. Steven Kumenit,Tarigan STh.M.Min.