Tuhan Kap Si Engkelini Kita (Yeremia 33:14-16)

KHOTBAH TANGGAL 29 NOPEMBER 2015.

GEREJA GBKP

Invocatio    :    Jenari nina Jesus, "Dage ersikap-sikaplah sabap la ietehndu warina ntah pe jamna Tuhan reh (Matius 25:13).

Ogen          :    1 Tesalonika 3:9-13 (Tunggal).

Khotbah     :    Jeremia 33:14-16 (Tunggal).

Tema          :    Tuhan Kap Si Engkelini Kita.

LATAR BELAKANG

1.      Adi siperdiateken bahan khotbahta enda, situhuna la terlepas ibas ayat 1 nari, emaka situhuna bahan khotbahnta enda Kata Dibata tupung Jeremia ibas penjara. Ate Tuhan gelah bangsa Israel ras Juda ipinpin sekalak raja siadil ras bujur, emaka ate Tuhan ngangkat sekalak raja siadil ras bujur ibas kesusuren Daud. Bagepe kalak Isreal ras Juda ipulahi ibas pembuangan, jenari nggeluh alu dame. Erkiteken kegeluhen sidame, siipinpin sekalak raja sibujur ras adil, maka enda jadi sada berita man kalak sideban, emaka minter isimpulkan kalak, enda kerina erkite-kiteken Tuhan singkelini ia.

2.      Ibas bahan khotbahnta sekali enda adi megermet kita, maka enda situhuna kata pengapul Jeremia man bangsa Israel sikentisik nari ihukum Tuhan. Sebab penghukuman Tuhan la terelakkan/terhindari nari. Akibatna kota ras benteng ceda. Tapi ibas paksa siitentuken Tuhan kerina singgo ceda salih jadi mehuli ras kegeluhen bangsa Israel ras Juda nggeluh ibas kedamen ras kemakmuran. Jadi kenca pembuangan i Babel bangsa Israel ipulihken Tuhan.

3.      Ibas kata pengapul enda, ate Yeremia gelah bangsa Israel ras Juda banci mpersiapken diri ibas penghukuman Tuhan ras tetap njemak padan Tuhan kerna penampat Tuhan nandangi bangsa Israel ras Juda ibas pembuangan, gelah bangsa Israel ras Juda tetap ernalem man baNa saja.

4.      Raja bangsa Israel ras Juda la saja terjeng minpin secara politik ras administrasi, tapi pe uga gelah bangsa Israel nggeluh ibas kebujuren erpalaskan sura-sura Tuhan. Emaka sipaling penting sekalak raja eme njagai kiniteken wargana alu erpalasken erkiniteken man Tuhan.

5.      Ate Tuhan gelah bangsa Israel ras Juda jadi bangsa sindalanken kai singena ate Tuhan, eme nggeluh bujur ras dame, enda me situhuna salah sada tujun bangsa Israel ibaba Tuhan i Babel.

APLIKASI

1.      Temanta eme Tuhan kap singkelini kita. Tema enda situhuna mpersingeti kita mulihi kerna eksistensi kegeluhenta singgo iselamatkan Tuhan. Genduari selaku kalak singgo iselamatkan tentuna kita arus ndalanken singena ate Tuhan ibas kegeluhenta tep-tep wari.

2.      Persoalan kegeluhen tentuna lit bas kita, tapi pernah kin sigejapken, kita banci pula ibas perbeben ras kiniseran erkite-kiteken Tuhan singkelini kita?. Bagepe erkiteken nggo sidalanken kegeluhen singena ate Tuhan. Nggeluh kita ibas kebujuren ras keadilan. Alu bage kalak sideban ngataken Tuhan kap singkelini kita, labo erkiteken gegeh ras kepentarenta. Jadi perlu siteh ibas minggu Adven enda, tentuna kita ipersingeti mulihi maka kita enda lit ibas 2 makna Adven, eme sipemena Adven nggo terealisasi ibas diri Yesus Kristus. Tapi Adven sipeduaken eme kita sangana nimai kerehen Yesus peduakaliken. Ibas Adven sipeduakaliken enda me bagi siisingetkan Paulus gelah kegeluhen kalak kristen tetap min nggeluh ibas kebadiaan. Alu bage, ibas kerehenNa peduakaliken, kita banci jadi sikerajangenNa. Tapi perlu siteh kerehen Tuhan peduakaliken, la sada pe kita metehsa, emaka kita tetap ersikap-sikap. Siimaksudken ersikap-sikap eme kita arus tetap nggeluh ibas kebadiaan ras tetap nggeluh ertedeh ate man baNa. Kita arus nggeluh bersih, emaka adi lit perbahanen sisalah ras dosa, arus kita jera ras tetap ernalem man Tuhan. Alu bage la perlu kita mbiar sebab bias minak lampu silit bas kita.

3.      Erkite-kiteken kita nggeluh ibas 2 makna Adven, maka la masalah man banta adi sangana kita nggeluh ibas minggu Adven, je ka kita erbahan Natal. Tapi ula min erkiteken perayaan Natal, kita lanai nggeluh badia ras bujur. Emaka ibas Adven si pemena enda, ula min kegeluhenta erkiniteken man Tuhan ceda. Tapi marilah tetap kita nggeluh ibas kegeluhen sibujur ras adil. Alu bage penggejapenta, Tuhan singkelini kita. Bagepe kalak sideban ngataken Tuhan kap singkelini kita.

Pdt. Steven Kumenit, STh.M.Min.

Kinirajaan La Ermasap-Masap (Daniel 7:9-14)

KHOTBAH MINGGU TANGGAL 22 NOPEMBER 2015.

GEREJA GBKP

Invocatio    :    Jesus Kristus reh denga pagi jadi Hakim nandangi kalak si nggeluh ras si enggo mate (2 Timotius 4:1a).

Ogen          :    Lukas 12:25-43 (Antiponal).

Khotbah     :    Daniel 7:9-14 (Tunggal).

Tema          :    Kinirajaan La Ermasap-Masap.

LATAR BELAKANG

1.      Sijadi khotbahnta eme sada bagin sila terpisahken ibas ayat 1 nari, eme pengenehenen Daniel tupung ia medem. Janah enda terjadi ibas tahun pertama pemerintahen Belsyazar, raja Babel.

2.      Ibas pengenehenen Daniel, idahna lit 4 rubia-rubia simelambangkan 4 kerajaan silih berganti erkuasa (band. Ayat 1-8). Empat kerajaan siimaksudken eme Babel, Media, Persia, Yunani. Janah bangsa Israel nggeluh iteruh kuasa 4 kerajaan e.

3.      Ibas bahan khotbahta teridah 2 hal eme 1). Kuasa 4 kerajaan italuken ras ihukum sue kitap-kitap. Kuasa 4 kerajaan e ikernepken. 2). Kerehen anak manusia, janah lit kuasa, kehamatan ras kinirajaan. Tujun kerehenNa eme gelah kerina manusia nembah man baNa. Sada perbedaan, 4 kerajaan banci masap amin gia megegeh secara manusia, tapi kinirajaan siibaba manusia e, la ermasap-masap.

4.      Kerajaan ibas doni enda iwakali 4 kerajaan, kepeken terbatas kuasana ibas doni enda, janah la kekal. Tapi kerajaan siibaba anak manusia eme kerajaan ras kuasa si kekal si la ermasap-masap.

5.       

APLIKASI

1.      Sekali enda teridah ibas minggu pendungi gereja, kerajaan ras kuasa doni enda banci masap. Tapi kerajaan Tuhan la ermasap-masap. Adi kerajaan ras kuasa doni enda banci masap ngkai maka kita harus ernalam man bana. Tapi mari kita ernalem ibas kerajaan si la ermasap-masap. Kinirajaan si la ermasap-masap, Rajana eme Yesus Kristus. Tapi kalak sibanci nggeluh ibas kinirajaan si la ermasap-masap eme kalak singgeluh ras Yesus, kalak singelakoken kai singena ate Tuhan. Ope denga kita bengket ibas kinirajaan Tuhan si la ermasap-masap e, tentuna kita arus mentasi proses pengadilan Tuhan. Janah ibas pengadilan Tuhan, i je ibuka Tuhan kitapNa, guna ngenen kai saja singgo ilakoken kita ibas doni ena.

2.      Yesus eme Raja ibas Kinirajaan si la ermasap-masap. Ibas Yesus lit kuasa i surga bage pe i doni, tentuna kita banci bengket ibas kinirajaan Tuhan adi kita ernalem saja man baNa. Kekuatiren kerna doni enda la erbahanca kita sirang ras Tuhan, tapi tetap ukurta ras Tuhan, emaka amin gia lit perbeben ras kiniseran, kita tetap ernalem man Tuhan saja. Erkiteken Yesus e Raja maka tentuna ngasup nge ipulahiNa kita ibas erbage-bage perbeben ras kiniseranta.

3.      Gelah kita banci nggeluh ibas Kinirajaan Yesus emaka kita arus pepulung kebayakan surga, tutus ras tetap erjaga-jaga, sebab kerehen anak manusia pagi reh. Kerehen Anak manusia e ngadili kita kerina. Pengadilan Anak manusia sue ras kitap-kitap si lit bas Ia.

4.      Lit sada tanggungjawabta ibas doni enda eme ncidahken man doni enda tanda-tanda Kinirajaan si la ermasap-masap e arah pengarapen man Tuhan, kebujuren, ketutusen ras adil, ndalanken kekelengen, rsd. Ula kita mbiar ndalanken sie, sebab ibas kita ngelakoken sie kita banci bengket ibas Kinirajaan si la ermasap-masap e.

5.      Ibas pendungi tahun gereja enda, biasana sue ras tradisi kerina gereja, ngoge senina turangta singgo leben ngadap man Tuhan. Senina turangta siidilo Dibata erbage-bage umurna, lit si singuda denga, lit ka singgo metua.  Tujunna gelah warga runggun banci meteh kegeluhenta ibas doni enda terbatas ntah pe la kekal. Erkiteken terbatas maka arus lit simehuli singena ate Tuhan siarus ilakoken, gelah kita nggeluh ibas Kinirajaan si la ermasap-masap e. Kearun ate siberlebihen singkuasai ukurnta mabai kita ernalam man kuasa-kuasa doni enda. Tapi marilah kita ernalem man kuasa Tuhan, sebab Ia me Raja ibas doni ras i Surga (band. Matius 28:18). Bagepe ula kita mbiar adi kita mate, sebab adi tutus, bujur ras adil siidalanken kita ibas kegeluhenta, kita pasti bengket ibas Kinirajaan si la ermasap-masap.

Pdt. Steven Kumenit, STh.M.Min.

Jaga Ras Kelengilah Kulandu (Daniel 1:11-21)

KHOTBAH TANGGAL 8 NOPEMBER 2015.

GEREJA GBKP

Invocatio    :    Nina Daniel man penjaga e, "Pepayolah kami i bas sepuluh wari enda. Bereken gule-gulen saja pangan kami dingen lau saja inemen kami (Daniel 1:12).

Ogen          :    2 Raja-Raja 20:1-11 (Tunggal).

Kotbah       :    Daniel 1:11-21 (Tunggal).

Tema          :    Jaga Ras Kelengilah Kulandu.

LATAR BELAKANG

1.      Nebukadnesar selaku raja Babel ersura-sura nambahi pegawaina, emaka isuruhna Aspenas guna ndarami calon-calon pegawaina e, alu kriteria mejile rupana ras pentar, mbages pemetehna, pedas nangkap pelajaren, janah la lit sitik pe man pandangen i bas kulana. Alu kriteria enda maka dat me empat anak perana eme Daniel, Hananya, Misael, ras Asari, janah empat anak perana enda isambarina gelarna alu gelar kalak Babel eme Beltasar, Saderah, Mesah ras Abednego. Perintah raja maka calon pegawai enda harus ididik sedekah 3 tahun, janah harus man pangan sintabeh siisikapken kerajaan. Tapi peraturan enda “itolak” Daniel ras teman-temanna. Daniel ras teman-temanna la terpengaruh kerna tawaran dahin. Kriteria  mejile rupana ras pentar, mbages pemetehna, pedas nangkap pelajaren, janah la lit sitik pe man pandangen i bas kulana gelah banci ngelai raja.

2.      Enda ibahan erkiteken Daniel ras teman-temanna eme anak perana situtus ras sierkiniteken, emaka peraturan-peraturan kerna pangan tuhu-tuhu iperdiatekenna. Sebab  peraturan kerna pangan enggo isuratken ibas peraturan agama Jahudi (band. Imamat 11; Ulangen 14). Tujunna gelah tetap litna kebadiaan nggeluh, emaka kula la banci imelket hanya erkiteken pangan.

3.      Situhuna pemindon Daniel ras teman-temanna la man pangan siisikapken raja (kerajaan) itolak, tapi erkiteken terjadi kesepakaten eme gelah penjaga mpepayo daging kula Daniel ras teman-temanna sedekah sepuluh wari saja, kenca sie penjaga muat sada keputusen kerna sie. Kenca sepuluh wari iidah penjaga maka daging kula Daniel ras teman-temanna jilen adi ibandingken ras anak perana sideban, emaka ipediat penjaga e Daniel ras teman-temanna man gule-gulen saja sedekah ibas pendidiken.

4.      Empatna anak perana Jahudi enda ibereken Tuhan pemeteh siluar biasa. Khusus man Daniel itambahken Tuhan pemeteh ntah pe kebeluhen kerna pengenehenen ras banci ngoge nipi.

5.      Daniel ras telu teman-temanna  lebih pentar asangken anak-anak sideban si sada pendidiken ras ia. Emaka Daniel ras temanna ialoken jadi pegawai istana. Bagepe beluhen 10 kali lipat beluhen asangken pegawai (guru-guru) raja sideban. Janah sie labo hasil pengajaren kalak Kasdim (guru-guru) tapi erkiteken pemere (penyataan) Dibata. Perlu siteh kalak kasdim enda eme sada kelompok tertentu siterdiri ibas para imam ntah pe peramal Babel. Sipendahinna eme menilik bintang-bintang (astrologi), si mpebetehken  nasib bangsa-bangsa ntahpe  nasib kalak ibas wari-wari sirehna ras erbahan ilmu sihir. Kalak enda mpergunaken  tulisan khusus eme  cuneiform ras bahasa sumer sicukup kuno dan misterius.

APLIKASI

            Kerina pinakit banci ipepalem Tuhan. Jadi la lit simetahat ibas Tuhan. Jadi penungkunen man banta, arah bahan khotbahta memang icidahkan lit siipantangkan, tapi arah Matius 5:11, i je ikataken kerina pangan banci ipan. Saja harus siinget labo kerina erguna man kulanta.

            Kesehaten penting man banta, sebab adi sakit kita, maka agak sulit kita beraktifitas, bagepe melala pengeluaran ibas rangka pepalem pinakitta e. Emaka lit pepatah ngataken sedia payung sebelum hujan. Ibas erti kata sebelum kita sakit, lebih dahulu sijaga kulanta enda, gelah sehat kita. Tapi adi kita sakit maka sipaling penting man banta inget Tuhan. Kita arus ertoto man Tuhan, gelah ipepalem Tuhan pinakitta.

            Perlu siinget nterem kalak sakit erkiteken la sijaga pangan silit. La tertahanken kita man pangan sisearusna la perlu melala sikonsumsi ras singgo ianjurken dokter la banci ikonsumsi. Emaka sipenting man banta sijaga ras sikelengi kulanta gelah tetap kita sehat. Ibas kita njaga ras ngkelengi kulanta maka pola makan kita teratur.

            Bagepe perlu siinget ibas kita njaga kesehatenta, labo berarti gelah la kita mate, lang. Tapi gelah sehat kulanta, janah banci sidahiken dahin-dahin Tuhan ibas doni enda. Adi soal kematen, e hak preogatif Tuhan. Tuhan sinentuken katawari kita mate. Bagepe adi sakit kita, cepatlah kita ertambar, janah adi sehat marilah reh kita ku rumah pertoton guna ngataken bujur man Tuhan. Emaka gelah kita tetap sehat maka siarus iperdiateken eme pangan ras gaya hidup konsumtif (suka makan). Kita arus berolah raga. Bagepe kita arus nggeluh erkemalangan man Tuhan, gelah kita ndatken kepentaren guna njaga ras ngkelengi kulanta, sebab kita sakit la saja terjeng pangan-pangan, tapi pe banci erkiteken sideban eme pikiran (stres), rsd. Bagepe banci kita ersembah man Tuhan ras mengaplikasiken kata Dibata ibas kegeluhenta tep-tep wari. Alu bage kai siikataken Mazmur 128:1-2) jadi sikerajangenta, sebab banci saja erkiteken sakit, sen sipepulungta keri, erkite-kiteken ertambar.

Pdt. Steven Kumenit Tarigan, STh.M.M.Min