Sikap Ndahiken Dahin Pelayananen (Efesus 4:11-16

PERPULUNGEN JABU-JABU

GEREJA GBKP

TANGGAL 28 FEBUARI – 5 MARET 2016.

Efesus 4:11-16.

Tema : Sikap Ndahiken Dahin Pelayananen.

LATAR BELAKANG.

1.      Sijadi bahan oratenta sendah eme kata ajar rasul Paulus man perpulunge Efesus tupung ia ibas penjara denga. Tuhu la lit persoalan-persoalan sibali ras persoalan siinanami perpulungen-perpulungen sideban kerna pengajaran sipapak, khususna kerna sunat. Tapi siitekanken Paulus eme kerna nggeluh ibas persadan, khususna makeken pemere-pemere Kristus ibas perpulungen. Enda itekanken Paulus sebab anggota perpulungen Efesus asalna kalak kristen asal Jaudi ras kalak kristen si la kalak Jahudi. Kegeluhen perpulungen tuhu-tuhu nggeluh ibas persadan.

2.      Pemere-pemere Dibata (karunia-karunia) ertujun majekken kula ni Kristus. emaka siutamana kal, tetap njaga kiniersadan ibas perpulungen  alu makeken pemere-pemere Krisatus e, ula meganjang ukur. Perpulungen arus nggejapken ras meteh kerna pemere-pemere Dibata si lit bas ia gelah sikap ndahiken dahin pelayanan. Maksudna eme gelah anggota perpulungen alu ersada arih, sisampat-sampaten gelah lit pertumbuhen kiniteken man anggota perpulungen. Kiniteken anggota perpulungen ibas sada paksa seh ku tingkat kedewasaan Kristus si serta.

3.      Fungsi pemere-pemere sipelain-lain si lit ibas anggota perpulungen eme ibas rangka mperlengkapi ras ngajari anggota perpulungen kerna kebenaran. Alu bage anggota perpulungen lanai i jole-joleken ibas erbage-bage pangajaren sipapak. Sebab anggota perpulunge  Efesus nggo ngangkai ras meteh kerna ajaren situhu-tuhu. Bagepe kiniteken anggota perpulungen tuhu-tuhu megegeh ras tetap erpengarapen man Kristus ngenca.

4.      Ibas rangka majekken kula ni Kristus, bagepe gelah seri pengangkai kerna Anak Dibata, maka ibereken Kristus Rasul, Nabi, Perberita Simehuli,  si mpermakani perpulungen ras guru-guru. Alu enda maka lit 5 jabatan siitempatken Tuhan i tengah-tengah perpulungen gelah perpulungen erdewasana kinitekenna eme 1) Rasul : Kalak singidah  secara langsung Yesus Kristus ras megi kai siikataken Yesus. Ibas sejarah keselamaten, lit sepuluh telu rasul ngenca. 2). Nabi : Fungsi nabi eme ndatken pengenehen ras peseh pengenehen e man anggota perpulungen. Bagepe jadi pengantara antara Tuhan ras perpulungen. 3). Perberita Simehuli : Nehken Kata Dibata man anggota perpulungen sue ras sura-sura Tuhan. 4). Permakan : Ngepkep anggota perpulungen, gelah anggota perpulungen tetap nggeluh ibas persadan ras Yesus Kristus. Bagepe adi jumpa perbeben ras kiniseran, anggota perpulungen  la mbiar sebab lit Permakan situhu-tuhu sibanci nampati ia. 5). Guru : Tugas guru eme ngajari anggota perpulungen kerna kata Dibata, gelah anggota perpulungen ndatken kepetaren guna ndalankenca. Jadi alu sikap pelayananna maka litna proses pertumbuhen ku kedewasaan Kristus si serta. Alu kata sideban alu litna sisampat-sampaten ibas ngelai, janah tehna tanggungjawabna ibas pelayanan maka kegeluhen perpulungen sada paksa seh ku tingkat kesempurnaan Kristus.

5.      Majekken kula ni Kristus e ibenaken ibas Takal kula e (Yesus Kristus). Yesus Kristus me si mereken kepentaren ras si menghubungken ras mereken gegeh man kerina anggota perpulungen termasuk pelayan-pelayan ibas pelayanenna, gelah kerina anggota perpulungen terjaga ras nggeluh ibas kiniersadan.

APLIKASI

            Ibas kegeluhen bergereja tentuna arus siangkai, kita enda sada kula, janah Kristus Takal kula e. Arah Takal enda me maka terbangun me kula simehuli. Emaka searusna min kerina warga gereja arus patuh man Takal gereja.

            Ibas rangka gelah kita kerina seh ku tingkat kedewasaan Kristus si serta, ntah pe nggeluh ibas kesempurnaan Kristus, maka man banta iberekenna pemere-pemere sipelain-lain, bagepe secara khusus idilona serayanNa eme Pendeta, Pertua ras Diaken. Fungsi kerina enda eme ibas rangka ndahiken dahin pelayanan i tengah-tengah gereja Tuhan. Tapi amin gia lit man banta pemere-pemere Kristus si pelain-lain, bagepe litna serayan Tuhan eme Pendeta, Pertua ras Diaken, labo berarti enda nuduhken litna ganjang teruken ibas perpulungen, lang. Kita kerina seri, sebab kita kerina idilo ras ibereken Tuhan pemere-pemereNa gelah sikap kita ndahiken dahin pelayanan ibas gereja. Sebab selaku warga gereja kita kerina arus ngelai. Saja litna Pendeta, Pertua, ras Diaken ibas rangka mperlengkapi warga gereja, gelah warga gereja ikut muat bagin ibas pelayanan-pelayanan i tengah-tengah gereja. Bagepe gelah sikap pelayanan i tengah-tengah gereja maka Pendeta, Pertua ras Diaken (nen = Majelis Runggun) arus ngaturken pemere-pemere si pelain-lain enda alu mehuli. Adi nggo iatur, jenari sikap pelayanan ibas gereja maka terjadi me peningkaten kiniteken man warga gereja. Alu bage warga gereja jadi gereja si Misioner. Siimaksudken gereja si misioner eme gereja sidewasa, si anggotana ikut muat bagin ibas pelayanan-pelayanan gereja alu meriah ukur ras meteruk ukur, bagepe la gampang warga gereja ijole-joleken alu erbage-bage pengajaren si papak. Perpulungen tuhu-tuhu nggeluh ibas pengangkai kerna Anak Dibata sibenar ras mehuli. Bagepe perpulungen nggeluh ibas persadan selaku kula ni Krisus.

Pdt. Steven Kumenit, STh.M.Min.

Aron Dibata Kap Kita Majekken Kula Ni Kristus (1 Korintus 3:8-11)

PERPULUNGEN JABU-JABU

GEREJA GBKP

TANGGAL 21-27 PEBUARI 2016.

1 Korinti 3 : 8 – 11

Tema : Aron Dibata Kap Kita Majekken Kula Ni Kristus.

LATAR BELAKANG

1.      Lit sada persoalen i tengah-tengah kegeluhen perpulungen Korinti, eme litna kelompok-kelompok. Lit kelompok Apolos, kelompok Paulus ras kelompok kefas. Kelompok enda saling membanggakan idolana. Tapi la igejapna kegeluhen sibage mpengaruhi nggeluh kiniersadan perpulungen. Adi kegeluhen sibage ipediat maka kegeluhen persadan gereja banci ceda. Emaka lanai bagi gereja, nggo bagi persadan biasa si lit ibas doni enda. Padahal adi ngerana kerna gereja maka kita ngerana kerna persadan. Adi gereja lanai nggeluh ibas persadan maka gampang kal ajaran-ajaran sipapak bengket, bagepe makna pendilo Tuhan nandangi gereja eme nehken keselamatan ibas doni enda, la tersehi, sebab persadan gereja lalap rubat.

2.      Ibas rangka sie me Paulus mereken kata ajar kerna eksistensi pelayananna ras Apolos. Paulus la menyangkal pelayanan singgo ipeseh Apolos. Tapi nina Paulus, Ia ras Apolos sada aron, sierdahin ibas juma siseri eme i perpulungen Korinti. Bagepe perpulungen Korinti eme juma ras bangunan Dibata, janah palas bangunan Dibata nggo itamakan Paulus. Ibas erti kata perpulungen  nggo tek man Yesus Kristus erkite-kiteken pelayanan siisehken Paulus. Enda me siutama ibas bangunan Dibata. Jenari sinerusken mbangunan e eme Apolos. Alu bage, ate Paulus ngataken man perpulungen Korinti, ia ras Apolos saling melengkapi ibas pelayanen.

3.      Situhuna kai siilakoken Paulus ras Apolos ibas pelayanen i tengah-tengah perpulungen Korinti merupaken sada biak dahin ras tujun serayan Tuhan ibas ngelai. Sebab serayan si ngelai eme pendilo Tuhan, emaka serayan e la erdahin sisada-sisada tapi saling melengkapi gelah pajek kula Kristus. Emaka adi perpulungen Korinti ngelawan sura-sura Dibata ras tujun pelayanen e, berarti perpulungen Korinti nggo ngelawan Dibata.

4.      Amin gia Paulus ras Apolos eme aron Dibata, labo berarti kai singgo lit ibas perpulungen bekas pedahinna, lang. Kerina e erkite-kiteken lit sada palas eme Yesus Kristus, janah Dibata sipeturahsa. Emaka subuk Paulus ras Apolos la lit siganjang teruken, sebab erdahin guna Dibata, ras ibereken Tuhan upah rikutken pendahinna.

5.      Ibas kata ajar siibereken Paulus enda man perpulungen Korinti, sada harapan gelah perpulungen lanai mpersoalkan kerna eksistensi Paulus ras Apolos, bagepe nggo banci ngadi nggeluh sician-cianen sierbahanca saling bermusuhen sada ras sidebanna. Tapi perpulungen Korinti arus ngangkai maka ia eme juma Dibata, janah Tuhan nggo ndilo serayanna guna erdahin sebage aron Dibata gelah perpulungen Korinti nggeluh selaku gereja ras tetap nggeluh ibas keselamaten.

APLIKASI

            Adi siperdiateken kerna visi GBKP 5 tahun ku lebe eme kerna Aron Dibata. Enda iangkat gelah gereja GBKP banci jadi pasu-pasu man isi doni enda. Emaka adi kita ngerana kerna gereja tentu kita lit i bas.

            Kita enda aron Dibata kap. Sebab Tuhan nggo ndilo kita la saja ndatken keselamatan, tapi gelah kita pe ikut muat bagin ibas dahin keselamatan i tengah-tengah doni enda. Alu bage kita la banci sinik saja selaku kalak kristen. Janah secara khusus,kita nggo ibereken Dibata pemere-pemere Kesah si pelain-lain ibas rangka ikut muat bagin i tengah-tengah pelayanan gereja. Jadi, kita selaku warga gereja arus terlibat aktif ibas kerina kegiatan-kegiatan gereja. Ibas kita kerina muat bagin ibas pelayanan gereja maka alu ras-ras kita nggo mbagun kula ni Kristus. Kula ni Kristus siibagun kita alu ras-ras tentuna megegeh, sebab lit ibas ikaten persadan sinteguh, bagepe ibas palas Yesus Kristus.

            Selaku aron Dibata berarti lit sada perayakan siarus idahiken eme pesikap juma Dibata. Ise juma Dibata e. Juma Dibata eme kita ntah pe gereja (runggun). Janah arus pe sisadari ras sikataken bujur man Tuhan, sebab nggo idiloNa kita jadi aronNa. Berarti kita enda ilayakkan guna erdahin ibas jumaNa. Sebab banci saja idiloNa kalak sideban jadi aronNa. Tapi diloNa kita. Emaka mari kita erdahin ibas pelayanan Tuhan alu la sician-cianen, tapi alu persadan ras keharmonisan. Alu bage pajek me kula Ni Kristus.

Pdt. Steven Kumenit, STh.M.Min.

Tetap Ibas Kristus (Berdiri Teguh) - Filipi 3:17 - 4:1)

KHOTBAH TANGGAL 21 FEBUARI 2016.

GEREJA GBKP

Invocatio    :    Tetaplah paguh kinitekenndu janah lawanlah imbangndu e, sabap ietehndu maka teman-temanndu si sada kiniteken i belang-belang doni enda ngenanami kiniseran bagi si inanamindu (1 Petrus 5:9).

Ogen          :    Kejadian 15:1-12; 17-18 (Tunggal).

Khotbah     :    Pilipi 3:17-4:1 (Responsoria).

Tema          :    Tetap Ibas Kristus (Berdiri Teguh).

LATAR BELAKANG

1.      Bahan khotbahnta sekali enda eme kata ajar rasul Paulus man perpulungen Pilipi gelah perpulungen Pilipi ngusih kerna keteladanan Paulus singgo ncidahkan selaku kalak singgeluh ersada ras Yesus Kristus. Enda ikatakenna gelah perpulungen Pilipi ula terpengaruh ras nggeluh bagi kalak sedeban si la nggeluh ersada ras Yesus Kristus secara benar. Kalak si bage eme penyesat. Kalak si terjeng ngukuri ras ndalanken peraten kula.

2.      Kata ajar enda Ibas rangka gelah perpulungen tetap nggeluh selaku warga Surga, maka penting man perpulungen Pilipi ngusih kegeluhen Paulus bagepe ngusih kalak singgeluh ibas persadan ras Kristus Yesus. Sebab adi perpulungen ngusih kegeluhen Paulus maka perpulungen tetap nggeluh ibas persadan ras Yesus Kristus ras tetap jadi warga Surga. Sebab Paulus nggo ncidahken kerna kai sibenar ibas kegeluhen selaku kalak sitek man Yesus Kristus. Ibas kegeluhen Paulus, nai akapna benar eme matuhi hukum taurat secara lahiriah emaka igasgasi ras ibunuhna ise si jadi pengikut Kristus, tapi kenca ialokenna Kristus, kerina e akapna bodoh ras sia-sia.

3.      Kalak singajari ras ndalanken sie taurat, khususna sunat, jadi siutama ras sinentuken keselamatan man manusia, kalak sibage eme imbang  kayu persilang Kristus. Maksudna ibas kayu persilang Kristus, Kristus nggo mbebasken ras nelamatkan kita ibas ikaten-ikaten doni, janah nggo nggeluh ibas persadan ras Ia, bagepe kalak siiselamatkan nggo jadi warga Surga. Emaka adi lit denga sindalanken pengajaran si la tuhu-tuhu (papak), maka kalak sibage penyesat, janah perlawesna kempak kebenen. Siimaksudken kempak kebenen eme lit penghukuman ras la nggeluh ibas kegeluhen simulia si bali ras Kristus Yesus. Padahal kegeluhen kalak si tek eme lit min sada perubuhan tep-tep wari gelah kegeluhen kalak si tek seh ku tingkat kedewasaan Kristus si serta (band. Epesus 4:13).

4.      Perpulungen Pilipi arus tetap megegeh ras ula terpengaruh ibas erbage-bage pengajaran si papak. Gelah perpulungen Pilipi tetap nggeluh ibas pengarapen man Yesus Kristus, perpulungen ula nggit ikut ras ndalanken si sia-sia.

5.      Amin gia Paulus ngerana gelah perpulungen njaga kiniersadaan ras kristus. tapi lit silebih penting siisingetken Paulus man perpulungen Pilipi eme kerehen Yesus Kristus si nelamatkan manusia. Emaka perpulungen Pilipi arus tetap tek ras nggeluh ibas persadan ras Ia. Sebab ibas Yesus lit kuasa guna njadiken kita seri ras Ia. Enda me siipindo Paulus man perpulungen Pilipi.

APLIKASI

            Nai ope denga kita jadi kalak sitek, kita  ndauh ras Yesus Kristus. la nggeluh ibas persadan ras Yesus Kristus. tapi genduari kita nggo nggeluh ibas persadan ras Yesus Kristus. janah kita nggo nggeluh ibas ikaten perpadanan ras Yesus Kristus, eme kalak singgeluh setia ras ndalankan singena ate Tuhan, nggeluh ras Yesus i bas Surga.

            Bagepe kita arus meteh kenca kita iselamatkan Yesus Kristus, kita nggo jadi warga surga. Selaku warga Surga, maka biakta arus ncidahkan biak Surga eme nggeluh badia. Emaka amin gia kita nggeluh ibas doni enda, tapi arus siinget kita enda warga surga. Tuhu nggeluh ibas doni enda melala tantangan-tantangan, tapi selaku warga surga arus siinget lit sada perayakenta eme kenca reh Yesus Kristus peduakaliken kita banci atan ibas surga, sebab je inganta. Kita nggo terdaftar selaku warga surga. Emaka erkiteken kita nggo warga surga, janah sangana nimai kerehen Yesus Kristus peduakaliken, gelah kita pe iubah ibas kemulianNa, maka kai pe masalah ras tantangenta, kita harus tetap nggeluh ras Yesus. Kita harus megegeh (teguh). Ula sempat masalah ras tantangan kegeluhen erbahanca kita lanai jadi warga surga. Harus siinget kita enda kesusuren Abraham kap, maka kita pe nggeluh ibas ikaten perpadanen, maka tentuna bagi Abram tek man padan Dibata, maka kita pe arus tek ibas kuasa Dibata, gelah ipasu-pasu Tuhan kita. Bagepe cuba sinen kerna kegeluhen Yesus, kerehenNa ku doni ibas rangka nelamatkan kita, tapi nterem kalak si la nggit ngaloken Ia, emaka Yesus nggeluh ibas kiniseran, puncakNa eme kayu persilang, tapi dungna Yesus ipermuliakan i Surga. Emaka selaku kalak si tek selain kita harus tegar menghadapi kiniseran, ipihak sideban kita pe harus jadi contoh man kalak sideban uga seharusna menghadapi kiniseran e. Alu bage kalak sideban ndatken contoh simehuli, emaka adi reh man bana perbeben ras kiniseran, banci ia berdiri teguh, sebab Yesus sinampati ia. Emaka harus siinget ibas kita nggeluh ibas persadan ras Yesus ula siakap kita banci senang-senang saja, tapi justru kita pe ndatken kiniseran, tapi erkiteken kita nggeluh ibas persadan ras Yesus Kristus, maka ngasup kita, ntah pe banci kita berdiri teguh menghadapi persoalan ras kiniseran si lit. Janah arus sinen perbeben ras kiniseran ula jadi “gelap” man banta. Ibas erti kata ula siakap, kenca kita jumpat perbeben ras kiniseran la lit dalan keluarna. Lit nge. Emaka tetaplah ukurta, janah nungkun man Yesus ras ndalanken perentah Tuhan.  Alu bage ibas kerehen Yesus pedua kaliken ibas doni enda, kita ipermuliakenNa ras nggeluh ibas Surga. Enda me adi kita la ermusuhen ras Tuhan. Tapi adi kita jadi imbang Tuhan, erkite-kiteken silakoken si la mehuli ras si la ngena ate Tuhan, bagepe la kita ngasup nggeluh ibas perbeben ras kiniseran, maka perlawesta kempak kebenen.

Pdt. Steven Kumenit, STh.M.Min.  

Ku Baba Man Tuhan Ulih Simehulina (Ulangan 26:1-11)

KHOTBAH TANGGAL 14 FEBUARI 2016.

GEREJA BATAK KARO PROTESTAN (GBKP)

Invocatio    :    Labo perban lit si kurang i bas Ia maka ialokenNa persembahen manusia, sabap Ia jine kap mereken kegeluhen, kesah, ras kerina keperlun manusia (Perbahanan Rasul-Rasul 17:25).

Ogen          :    Roma 10:8b-13 (Tunggal).

Khotbah     :    Ulangan 26:1-11 (Tunggal).

Tema          :    Ku Baba Man Tuhan Ulih Simehulina.

LATAR BELAKANG.

1.      Enda kata persinget ras kata ajar Musa sekaligus kata-kata perpisahan man bangsa Israel, ope bangsa Israel bengket ku taneh Kanaan, tanah siipadanken Tuhan. Taneh si dem alu dadih ras tengguli. Kata ajar Musa enda ipeseh paksa bangsa Israel ngadi-ngadi i dataren Moab. Jadi merupaken persiapan bangsa Israel bengket ku tanah Kanaan.

2.      Ibas bangsa Israel nggo bengket ras ngiani tanah Kanaan maka ulih sipemena siiperani ibas  jumana arus ipersembahken man Tuhan. Makna ipersembahkan man Tuhan eme ngataken bujur man Tuhan sebab Tuhan nggo njadiken bangsa Israel bangsa simbelin, ras nggo lit sada ingan sitetap, sebab marenda nini-nini bangsa Israel kalak Nomade (perlajang). Bagepe nggo  mbebasken bangsa Israel ibas taneh perbudakan nari. Kerina enda erkite-kiteken perkuah ras keleng ate Tuhan.

3.      Persembahan ulih sipemena ibereken man Tuhan simbebasken ras sinaruhken bangsa Israel ku taneh Kanaan. Sebab perlu siteh tanah Kanaan, labo tanah si la lit pendudukna, tapi nterem pendudukna ras lit agamana, bagepe lit dibatana. Erkiteken sie me bangsa Israel arus mereken ulih jumana man Tuhan sinaruhken ia ku taneh Kanaan, labo man dibata kalak Kanaan.

4.      Perintah Musa enda, la saja bangsa Israel nehken ulih jumana selaku persembahan man Tuhan. Tapi bangsa Israel arus pe ersembah man Tuhan.

5.      Keleng ate Tuhan singgo masu-masu bangsa Israel juma ras nggo ndatken ulih ibas juma nari, maka bangsa Israel arus ermengkah ras ngataken bujur. Kerina enda arus ilakoken alu meriah ukur. Kerina bangsa Israel arus meriah ukur sebab enda merupakan pesta. Bagepe kalak Lewi ras kalak pertandang arus nggejapkenna kerna pesta keriahen e. Engkai kalak Lewi ras kalak pertandang arus ikut ibas pesta meriah ukur enda. sebab kalak Lewi la lit taneh Pusaka ibas taneh Kanaan, ia ikhususkan ibas pelayanan rumah pertoton. Bagepe kalak pertandang arus isampati sebab  la lit rumahna, janah enda merupakan sada perenungan man bangsa Israel sebab ia pe nai kalak pertandang nge.

APLIKASI

            Ibas perdalanen waktu siidalani kita, la masalah adi sisungkun mulihi kerna pengakunta ndube,tupung kita ingawanken eme tek nge kita man Dibata sisada Bapa, Anakna Yesus Kristus ras Kesah Si Badia. Penungkunen enda penting. Sebab ibas perdalanen waktunta banci saja pengakunta e lanai teridah ibas kegeluhenta. Siilakoken kita eme si la mehuli si la ngena ate Tuhan.. Adi tek kita man Tuhan, maka tentuna siidalanken kita eme keleng ate, kebujuren ras nggit ersembah man Tuhan, bagepe nggit kita nehken persembahan man Tuhan alu meriah ukur.

            Temanta eme sada statmen (pernyataan) kerna er-Tuhan. Kubaba man Tuhan Ulih simehulina. Adi la kita tek ras la lit komitmenta Er-Tuhan maka tentuna la kita nggit baba man Tuhan simehulina si lit bas kita, khususna persembahen. Emaka wajar nge siidah ibas persembahan si la mehuli (simerigat, male, lanai lako, rsd). Padahal persembahan eme aplikasi kiniteken.

            Nandai Tuhan penting kal man banta, sebab ibas kita nandai Tuhan ras ndalanken kai singena ate Tuhan, maka nggit kita mere simehuli man Tuhan. Janah perlu siinget kai si lit bas kita eme ibas Tuhan nari. Pemere Tuhan man banta erkiteken ate Tuhan gelah tercukupina kebutuhenta, janah banci pe kita ersembah man Tuhan ras nehken persembahan simehuli man Tuhan.

            Lit sada perbedaan persembahan kalak kristen ras agama suku nai. Adi persembahan agama suku eme bentukna sogok. Tapi persembahan kristen eme persembahan pengataken bujur erkiteken Tuhan nggo masu-masu kita. Nggo leben Tuhan nehken persembahan guna keselamatenta. Siinget erkiteken keleng ate Tuhan, nggit Ia ngkorbanken diriNa guna keselamatenta.Emaka ula kita nehken persembahan bagi agama suku nai eme mengharapkan balasan/imbalan. Tapi alu meriah ukur ras dem pengataken bujur. Amin gia situhuna la mengharapkan imbalan, tapi erkiteken persembahenta erkiteken persuruhen kiniteken, maka Dibata masu-masu kita. Emaka malem ateta. Bagepe semakin banyak persembahenta, semakin banyak ka pasu-pasu Tuhan man banta.

            Nehken persembahen arus alu meriah ukur janah tujunna man Tuhan, labo man dibata-dibata sideban. Bagepe sipenting ibas kita ermeriah ukur maka kalak Lewi ras kalak pertandang arus ikut ermeriah ukur. Berarti kenan pe, ibas kita nehken persembahan, subuk persembahan minggu, bagepe persembahan pengataken bujur eme serayan Tuhan ras Diakonia. Jadi lit penggunaan man serayan (Pendeta, Pertua, Diaken), bagepe diakonia, Marturia ras Koinonia.

Pdt. Steven Kumenit, STh.M.Min.