Lakokenlah Kai Si Itotokenndu Man Dibata (Mazmur 67:1-8)

KHOTBAH TANGGAL 1 MEI 2016.

GEREJA GBKP

Invocatio    :    Janah adi ipindondu la idatndu, sabap erkiteken tujunndu la mehuli; kai si ipindondu guna pesenangken dirindu saja ngenca (Jakup 4:3).

Ogen          :    Yohanes 14:23-29 (Tunggal).

Khotbah     :    Mazmur 67:1-8 (Responsoria).

Tema          :    Lakokenlah Kai Si Itotokenndu Man Dibata.

LATAR BELAKANG

1.      Sijadi bahan khotbahnta sendah eme ende-enden pengataken bujur, siiendeken ibas rumah pertoton tupung wari raya sapo-sapo. Ibas ende-enden pengataken bujur enda, pemazmur ncidahkan piga-piga hal eme a). Gelah Dibata ncidahkan kiniulinNa alu masu-masu kerina manusia. Alu bage peraten Tuhan itandai kerina kalak, bagepe kerina bangsa meteh maka sada ngenca Tuhan singasup ngkeleni manusia eme Tuhan Dibata. b). Sada harapan gelah kerina bangsa-bangsa muji ras ngataken bujur man Dibata. c). Sada pengajuk gelah kerina bangsa-bangsa ersurak ras rende alu meriah ukur, sebab Dibata bujur ibas erbahan keputusen, bagepe bangsa-bangsa Tuhan kap sinjujurkenca. d). Pasu-pasu Tuhan teridah arah iberekenNa taneh simehuli ras ndatken ulih simehuli.

2.      Pemazmur nggejapkan, janah enda sada ungkapan kiniteken nari, tanah siiani bangsa Israel eme pemere Dibata, enda erkiteken keleng ate Tuhan man bangsa Israel. Janah la saja terjeng taneh simehumur siibereken Tuhan, tapi kai siisuan (juma) bangsa Israel ipasu-pasu Tuhan, emaka bangsa Israel ndatken ulih juma simehuli sierbahanca kesejahteraan ekonomi tercukupi.

3.      Penggejapen pemazmur la lit Dibata sideban seakan Dibata siisembahna sibanci mereken kiniulin man manusia. Erkiteken sie me maka bangsa  Israel arus ngataken bujur man Tuhan saja, alu bage tetap ipasu-pasu Tuhan kegeluhen bangsa Israel, termasuk juma bangsa Israel.

4.      Ibas pasu-pasu Tuhan man bangsa Israel, maka bangsa Israel ndatken kecukupen ras pengajaran kerna keleng ate Tuhan. Alu bage bangsa Israel nggeluh ibas kemalamen ate. Ibas kegeluhen sibagenda, iidah bangsa-bangsa sideban, alu bage bangsa-bangsa sideban banci meteh kerna keleng ate Tuhan, janah nggit ia muji ras ngataken bujur man Tuhan. Ibas bangsa-bangsa si deban muji ras ngataken bujur man Tuhan berarti bangsa-bangsa sideban ngakui kerna kuasa ras keleng ate Tuhan.

5.      Keleng ate Tuhan erdahin arah taneh. I ja Tuhan simasu-masu kerina taneh ibas doni enda, emaka manusia banci ndatken kecukupen arah taneh singgo ipasu-pasu Tuhan e. Alu bage pasu-pasu Tuhan, la saja terjeng man bangsa Israel, tapi pe man kerina bangsa. Bagepe Tuhan siisembah pemazmur, la saja Tuhan bangsa Israel, tapi pe man kerina bangsa-bangsa. Erkiteken sie me maka pemazmur ngajuk kerina bangsa-bangsa gelah muji ras ngataken bujur man Tuhan ras kerina manusia mpehagaken Tuhan.

APLIKASI

            Pasu-pasu Tuhan nggo seh man banta kerina. Pasu-pasu Tuhan teridah ibas kerina dampar, termasuk kegeluhenta, bagepe penemani Tuhan man banta seh genduari, emaka salah nge pengangkanta adi siakap pasu-pasu Tuhan hanya terjeng materi ngenca. Sebab adi terjeng materi ngenca maka banci saja kita kecewa (band. Invocatio).

            Perlu siteh maka kegeluhenta la saja terjeng ibas doni enda, tapi nggeluh ras Yesus Kristus i Surga. Emaka ibas rangka kita banci nggeluh i surga maka penting ibas kegeluhenta nggeluh alu ngataken bujur man Tuhan ras ngelakoken kai sibujur ras singena ate Tuhan. Janah ula sangsi ras mbiar sebab Kesah Si Badia pengasup kita guna ngelakoken sibujur ras singena ate Tuhan. Bagepe adi keleng kal ateta man Tuhan maka siarus lit bas kita eme sikeleng-kelengen sapih-sapih kita manusia, bagepe ndahiken dahinta erpalaskan mbiar man Tuhan. Alu bage banci kita ngaloken kemalemen ate ibas Tuhan nari.

            Lakoken kai siitotokenndu man Tuhan, ertina maka Tuhan saja siiandalkan, bagepe silakoken kai sitotoken kita alu erpalaskan kebujuren ras singena ate Tuhan. Kita arus tutus erdahin, bagepe tutus nandangi kai sitotoken kita.

            Perlu siteh, ertoto eme sada tanda maka kita tuhu-tuhu bergantung man Tuhan saja. Bagepe mari kita erlajar ibas kita ertoto. Kita pe arus ertotoman Tuhan  kerna si la bagi ukurta si seh man banta, sebab arus siimani banci saja sura-sura Tuhan sangana erdahina ibas kegeluhenta. Alu bage banci kita ngataken bujur ibas keadaan ras situasi siuga pe si lit man banta.

Pdt. Steven Kumenit, STh.M.Min.

           

Kenangkihen Yesus Ku Surga Jadi Keriahen Ukur (Lukas 24:50-53)

PERPULUNGEN JABU – JABU

GEREJA GBKP

TANGGAL 1 – 7 MEI 2016.

Lukas 24 : 50 – 53.

Tema : Kenangkihen Yesus Ku Surga Jadi Keriahen Ukur.

LATAR BELAKANG

1.      Kematen Yesus Kristus erbahanca ajar-ajar Yesus nggeluh ibas kebiaren. Tapi kenca Yesus keke ibas simate nari, janah Yesus ncidahken baNa man ajar-ajarNa, siperpudina eme Yesus ncidahken diriNa man ajar-ajarNa, tupung ajar-ajarNa pulung i salah sada rumah i Yerusalem, erbahanca Meriah kal ukur ajar-ajar. Tapi isamping sie mamang ka atena. erkiteken sie me ajar-ajar la tek  adi si tedis i lebe-lebena kerina eme Yesus singgo keke ibas simate nari. Tapi kenca ibukaken Yesus perukuren ajar-ajarNa, maka tek ia kerina, tuhu Yesus nggo nggeluh sue ras kai siinggo ikatakenNa ibas  Pustaka Si Badia.

2.      Kenca dung Yesus ncidahken diriNa man kerina ajar-ajarNa, ibaba Yesus ajar-ajarNa ku Betani jenari ipasu-pasuNa, janah asum Yesus masu-masu ajar-ajarNa, sirang ia ras ajar-ajarna, jenari nangkih Yesus ku Surga. Alu bage Yesus mulih ku inganNa ndube (band. Yohanes 3:13), jenari ibas pasu-pasu Yesus man ajar-ajarNa, Yesus mereken sada ketetapan ukur (keyakinan) man ajar-ajarNa guna ndalankan persuruhenNa eme guna mberitaken Berita si Meriah.

3.      Kenangkihen Yesus ku Surga siisaksiken ajar-ajarNa eme pemuliaan man Yesus singgo keke ibas simate nari. Pemuliaan man Yesus, erkite-kiteken Yesus patuh man BapaNa sinisurga ibas ndalanken pelayanan keselamatan i doni enda. Amin gia Yesus arus ngenanami kiniseran ras mate, tapi tetap peraten Bapa siidahikenNa. Emaka pemuliaan Yesus ngatakenca Yesus nggo menang ibas kuasa kematen nari, jenari kundul me Yesus arah kemuhen Bapa i Surga (band. Mazmur 68:19a, 110:1; Perbahanen 7:56).

4.      Kesirangan Yesus ras ajar-ajarNa, la erbahanca ceda ate ajar-ajar, tapi ajar-ajar nggeluh ibas keriahen ukur, sebab nggo idahna maka Yesus eme tuhu-tuhu Mesias ntah pe Tuhan, jenari kenangkihen Yesus ku Surga ibas rangka nikapken ingan man kerina kalak si tek man baNa (band. Yohanes 14:3).

5.      Erkite-kiteken Yesus eme Tuhan maka isembah ajar-ajarNa Ia, bagepe gedang-gedang wari, ipujina Dibata ibas Rumah Pertoton. Ajar-ajar Yesus lanai mbiar ncidahken dirina man pemimpin-pemimpin kalak Yahudi, imam-imam kepala. Bagepe perlu siteh ajar-ajar Yesus muji Tuhan i rumah pertoton, erkite-kiteken rumah pertoton eme ingan Dibata.

APLIKASI

            Kenangkihen Yesus ku Surga maba keriahen man banta, sebab kita tek man baNa. Bagepe keriahenta la saja terjeng ipegeluhNa mulihi ibas simate nari  adi kita mate ope kerehen Yesus peduakaliken ku doni enda. Tapi ibabaiNa kita nggeluh ras Ia ibas Surga. Sebab kenangkihen Yesus ku Surga eme guna nikapken ingan man banta (Yohanes 14:3; Efesus 2:4-6).

            Tanda keriahen ukur arus teridah ibas : 1). Kita arus ersembah man baNa i gereja. Bagi ajar-ajar Yesus ipujina Dibata gedang-gedang wari i rumah Pertoton, maka kita pe arus muji Dibata i Gereja. 2). Arus ncidahken kebujuren ras ersaksi kerna Yesus eme Tuhan ibas kegeluhenta tep-tep wari.

            Yesus nggo nangkih ku Surga, tapi erpadan Ia guna reh mulihi ku doni enda. ibas kerehenNa sipeduakalikan, tentuna berhubungan ras penghakiman. Emaka adi tuhu meriah ukurta erkite-kiteken kenangkihen Yesus ku Surga, maka kita arus tetap ncidahkan ras ndalankan kai singena ate Tuhan. Adi lang maka ibas penghakiman Tuhan e, kita lanai iatanken nggeluh ras Ia i Surga. Emaka ope terlambat, marilah sidalankan kai singena ate Tuhan ibas kegeluhenta tep-tep wai.

Pdt. Steven Kumenit, STh.M.Min.

Kekelengen Si Serta (Matius 5:38-47)

PERPULUNGEN JABU-JABU

GEREJA GBKP

TANGGAL 24 – 30 APRIL 2016.

Matius 5 : 38 – 47.

Tema : Kekelengen Si Serta.

LATAR BELAKANG

1.      Ibas oratenta sendah, eme sada bagin ibas khotbah Yesus i datas uruk. Janah sekali enda iajarkan Yesus kerna eksistensi anak-anak Dibata. Anak-anak Dibata arus berbeda kalak jahat

2.      Ibas kegeluhen kalak Yahudi lit hukum pembalasan (band. Kel.21:23-24). Janah makna hukum pembalasan enda eme membatasi balas dendam ras kekerasan sue ras aturen silit. Emaka kenca ibalas kejahatan e, persoalan si lit banci dung. Tapi situhuna hukum pembalasan enda erbahan lanai lit ingan nandangi perbahanan keleng ate. Padahal kekelengen eme undang-undang siarus idalankan anak-anak Dibata (band. Matius 22:37-40).

3.      Pengajaran Yesus nandangi jelma sinterem kerna kekelengen eme  anak-anak Dibata arus patuh nandangi aturen pengalemi ibas Dibata nari. Janah ibas pengajaran Yesus kerna kekelengen, labo berarti anak-anak Dibata “la banci ngelawan”. Tapi selaku anak-anak Dibata pembalasan siibereken anak-anak Dibata eme arah keleng ate. Sebab hukuman pembalasan eme hak Dibata.

4.      Situhuna hukum pembalasan enda, eme tanggungjawab hakim. I ja kenca sesekalak jelma ia ipekpek seh ipenna penggel, ntah pe matana ceda, maka ibas pengadilan, hakim berhak ngukum alu penggelken ipen, ntah ncedai mata simekpek ndai. Tapi dungna ibas kegeluhen tep-tep wari kalak Yahudi, enda nggo jadi tempa-tempa sada keharusan siarus ilakoken kalak Yahudi. Tapi ibas perkembanganna, kalak siihukum erkiteken ersalah ia, janah ipen arus ipenggelkan, bagepe mata arus igancih, banci igancih alu sen. Bagepe perlu siteh adi lit kalak simekpek pipi,  merupakan sada penghinaan si mbelin man kalak Yahudi.  Bagepe erkiteken kalak Yahudi lit iteruh kuasa bangsa Romawi, maka ibas aturen/hukum Roma, tentera Romawi banci memaksa sesekalak jelma maba barang bawaanna sejauh 1,5 km.

5.      Adi siperdiateken ibas kegeluhen Yesus, pengajaran Yesus kerna kekelengen nandangi jelma sinterem la tuhu, sebab tupung Yesus itangkap, janah i lebe-lebe imam si mbelin, lit sekalak imam marap Yesus, tapi la ibere Yesus kurum/pipiNasi deban iparap, tapi itegurNa (band. Yohanes 18:22-23). Ibas palas enda, kita arus ngenen hukum kekelengen enda ibas 2 hal, eme lit keleng ate silembut ras keras. Kerina enda ibas rangka mperbaiki sesekalak jelma. Bagepe pengajaran enda, ibas rangka gelah anak-anak Dibata dem kesabaran ras keleng ate nandangi kalak jahat. Alu bage lit perbedaanna anak-anak Dibata ras kalak jahat. sebab adi seri anak-anak Dibata ras kalak jahat, guna kai Tuhan mbalas keleng ate anak-anak Dibata e. Sebab keleng ate anak-anak Dibata la banci terjeng sapih-sapih anak-anak Dibata ngenca, tapi pe arus seh ku kalak jahat, termasuk simusuhi, simekpek kita ras sierbahan kejahatan man banta, sierbahanca kita nggeluh ibas kiniseran. Perlu siteh keleng ate Tuhan seh man kerina jelma termasuk man kalak jahat, enda teridah arah Tuhan mereken matawari man kalak jahat, ras udan man kalak si la bujur. Ibas perbahanan simehuli, sabar, megenggeng ras dem keleng ate maka serta me keleng ate anak-anak Dibata. Enda me siarus icidahkan anak-anak Dibata, sebab anak-anak Dibata eme Imago-Dei. Jadi, keleng ate si seri ras Dibata, situhuna lit bas  kita.

APLIKASI

            Kekelengen eme karakter Tuhan singgo nggeluh ibas kegeluhenta selaku anak-anak Dibata. Sebab kekelengen siserta si lit ibas Dibata nari nggo berekenNa man banta. Sebab tupung Dibata njadiken kita sentudu ras tempasNa, bagepe iembuskenNa napas kegeluhen (band. Kej.1:27; 2: 7), maka kekelengen Tuhan e nggo nggeluh bas kita. Persoalanna, kekelengen e lanai teridah man banta erkite-kiteken dosa. Erkiteken dosa me maka kita lanai nggeluh bagi Imago – Dei.

            Ibas keleng ate Tuhan, kita nggo ipelimbaruiNa. Emaka ate Tuhan kekelengen siserta silit bas kita arus nggeluh mulihi. Tandana nggo nggeluh kekelengen e, ibas kita mpraktekkan kekelengen e ula alu pekulah-kulah. Sebab perlu siteh ibas kita ncidahkan kekelengen alu serta, maka kita nggo nampati temanta, bagepe nggo kita nelamatkan ia, termasuk man simusihi kita. Tuhu banci saja ninta mesera ndalankenca e. Payo, adi la  nggit kita ndalankenca. Tapi adi nggitlah, pasti kepentaren ibas Tuhan nari singajari kita, ras Kesah Si Badia ngasup ngkuasai pusuh ras peratenta. Emaka ngasup sidalanken kekelengen si serta e. Kekelengen siserta mabai kita nggeluh sikeleng-kelengen ras sisampat-sampaten. Alu bage kegeluhen ibas jabu, gereja ras masyarakat, nggeluh alu harmonis.

Pdt. Steven Kumenit, STh.M.Min.

Man Kalak SiipilihNa, IberekenNa kemenangan (Kisah Para Rasul-Rasul 11:1-18)

KHOTBAH TANGGAL 24 APRIL  2016.

GEREJA GBKP

Invocatio    :    Lakokenlah e, erkiteken kam kap sikerajangen TUHAN Dibatandu. IpeserapNa kam i bas kerina bangsa-bangsa i doni enda nari jadi bangsaNa khusus (Ulangan 7:6).

Ogen          :    Yesaya 1:10-20 (Anthiponal).

Khotbah     :    Perbahanen Rasul-Rasul 11:1-18 (Tunggal).

Tema          :    Man Kalak SiipilihNa, IberekenNa kemenangan.

LATAR BELAKANG

1.      Sijadi bahan khotbahta sendah eme sada bagin si la terpisahkan ibas pasal 10 nari, i ja Petrus mperidiken Kornelius ras isi jabuna ini rumah Kornelius. Kornelius eme sekalak komendan ibas pasukan tentera Romawi. Jadi ia kalak Roma. Tapi kai siilakoken Petrus jadi polemik (masalah) man rasul-rasul ras kalak si nggo tek i Yudea. Emaka kenca Petrus mulih ku Yudea, ipandangina k ai singgo ilakoken Petrus i rumah Kornelius.

2.      Pantang kal man kalak Yahudi kesilang i rumah la kalak Yahudi. Ibas pengangkan kalak Yahudi, kalak si la kalak Yahudi eme kalak kafir, emaka igelarina biang. Enda ilakoken kalak Yahudi sebab ibas Hukum Taurat melarang kalak Yahudi ergaul ras kalak si la kalak Yahudi ntah pe man pangan si nggo i jemak kalak si la kalak Yahudi. Sebab pangan si nggo ijemak kalak si la kalak Yahudi nggo lanai bersih  ntah pe lanai tahir (band. Imamat pasal11-18). Alu bage kalak si nggo bengket ras man pangan si nggo i jemak kalak si la kalak Yahudi, otomatif ia lanai bersih (lanai tahir) . Emaka Petrus pe lanai tahir. Janah biasana man kalak Yahudi, lit aturen agama kerna pentahiran. Situhuna banci kalak Yahudi man pangan singgo i jemak kalak si la kalak Yahudi, adi kalak si la kalak Yahudi nggo iproselitkan, nggo isunat.

3.      Petrus mpertanggungjawabkan kai siilakokenna. Situhuna secara pribadi sebage kalak Yahudi la nggit Petrus bengket ras man ras keluarga Kornelius. Tapi kerina enda erkiteken Tuhan sinuruhsa maka bengker ras man ia i rumah jabu Kornelius. Awalna itulak Petrus, tapi erkiteken nina Tuhan kai siikataken Dibata bersih ula ikataken Petrus meluat. Janah nina Petrus, ula kam sangsi kerina sebab lit enam kalak si jadi saksi.

4.      Kai siilakoken Petrus, kerina bekas persuruhen Dibata. Bagepe ituriken Petrus, tupung ia ngerana nusur Kesah Si Badia man kerina kalak si pulung i rumah Kornelius, bagi tangtangna Kesah Si Badia nusur man kerina rasul-rasul bagepe kalak si tek i Yerusalem. Jenari nina, ku inget kai sipernah ikatakan Yesus eme Yohanes mperidiken alu lau, tapi kam pagi mperidiken alu Kesah. Kai siituriken Petrus jelas kerina ras lit saksina. Emaka tangkas man kerina rasul-rasul ras kalak si tek kai palas Petrus bengket ras man, bagepe mperidiken keluarga Kornelius.

5.      Kerina kalak si pulung muji Dibata, sebab nggo tangkas man bana, kerina si labo kalak Yahudi pe nggo ibereken Dibata dalan jera gelah dat kegeluhen. Alu bage keselamatan la saja terjeng man kalak Yahudi saja, tapi man kalak si tek man Yesus Kristus.

APLIKASI

            Keselamatan, labo ikhususken man sekalak jelma ntah sada suku, tapi man kerina kalak sitek man Yesus Kristus. la erdobahan kita i lebe-lebe Dibata. Tapi amin gia keselamatan nggo ibereken Tuhan man banta, arus ka siikuti aturen ntah pe arus idalanken kai singena ate Tuhan. Kata ras perbahanen arus sedalanen. Bagepe ibadahnta la saja terjeng ibadah formal, tapi arus teridah ibas kegeluhenta tep-tep wari. Ibadah formal la banci sipisahkan ras kegeluhenta tep-tep wari. Emaka adi sinen ibas ogen, je teridah percuma kepeken tutus kita beribadah, tapi tetap denga sidalankan kai si la ngena ate Tuhan. Kalak si la ngena ate Tuhan berarti ende-endenta ras persembahenta la ialoken Tuhan. Ciga ras mutah ate Dibata ngenen kerina formalitas ibadahnta, adi la lit perubahan secara signifikan ibas kegeluhenta sitep-tep wari. Emaka ibas liturginta lit pengakun dosa, simanfaatkan e, janah tuhu-tuhu jerahlah kita. Janah teridah min ibas kegeluhenta tep-tep wari.

            Kita nggo ipilih Dibata, kita nggo nggeluh ibas keselamatan. Amin bage gia tentuna lit tantangan ras kiniseran si banci ngkenai kita. Tapi erkiteken Tuhan ras kita, tentuna kita banci ndatken kemenangan. Sebab lit kepentaran bas kita. Bali ras Petrus ndatken kemenangan ibas pikiran Yudaisme si leket ertahun-tahun, si banci mereken kematen man bana. Petrus ndatken kemenangan erkite-kiteken ia ngaloken kepentaren ibas Tuhan nari, janah idalankenna kai siikatakan Tuhan.

            Gelah kita nggeluh ibas kemenangan maka pola pikirta arus pola pikir Kristus. emaka ibas pola pikir Kristus, si lit bas kita eme nggeluh ibas persadan, sikeleng-kelengen, nggeluh ibas kiniteruken ukur ras nggeluh ibas kesabaran. Bagepe ula ibas ketutusenta ersembah man Tuhan, ula ka sipandangi kalak sikurang tutus beribadah, tapi marilah sisampati kalak si kurang tutus gelah ia bali ka ras kita ibas ketutusen ersembah man Tuhan.

Pdt. Steven Kumenit, STh.M.Min.