Rabu, 25 Mei 2016

Persembahen Si Payo(Mazmur 50:1-23)



PERPULUNGEN JABU-JABU
GEREJA GBKP
TANGGAL 29 MEI – 4 JUNI 2016.
Mazmur 50:1-23.

Tema : Persembahen Si Payo.

LATAR BELAKANG
1.      Sijadi bahan oratenta sendah eme ende-enden siiendeken bani Asap i rumah pertoton. Bani Asap eme kesusuren suku lewi siertugas khusus nyikapken musik ras mimpin ibadah ibas rumah pertoton. Tugas enda ibereken man bana tupung raja Daud jadi raja bangsa Israel (band. 1 Kronika 6:39-43, 16:4-5,37).
2.      Ibas ende-enden enda bani Asap enda, ituriken kerna kuasa Tuhan. Tuhan sitading ibas rumah pertoton eme i Sion ngadili bangsaNa. Erkite-kiteken bangsaNa lanai setia ibas padanna siisehkenna tupung bangsa Israel erpadan ras Tuhan i deleng Sinai. Ibas perpadanan  i deleng Sinai, bangsa Israel erpadan man Dibata, maka nggit ia ngelakokenca (Kel. 24:1-8). Tapi ibas kinatana, kegeluhen bangsa Israel nggeluh alu dosa.
3.      Ibas kinilasetiaan bangsa Israel ncikep perpadanen e, reh Dibata man bangsa Israel guna mindo pertanggungjawabanna. Sebab Dibata siisembah bangsa Israel, labo Dib ata sisinik saja, tapi Dibata sitetap peduli kerna kegeluhen bangsa Israel. Emaka ibas rangka ngadili bangsa Israel idiloNa langit ras doni jadi saksi. Bagepe isuruh Tuhan gelah langit ras doni ndilo kerina bangsaNa ku adep-adepenNa.
4.      Ibas pengakap bangsa Israel, adi ia nggo ersembah man Tuhan, bagepe nggo nehken persembahen, subuk persembahen tutungen bagepe persembahen pengalemi dosa, maka kegeluhen bangsa Israel nggo bersih i lebe-lebe Dibata, kepeken lang. Persembahen tutungen, bagepe persembahen pengalemi dosa nggo jadi persembahen formalitas, bagepe tempa – tempa nggo jadi sogok man Tuhan.. Padahal asuh-asuhen , perik-perik siipersembahken bangsa Israel ras kerina isi doni enda, Dibata kap siempuna. Emaka Dibata ngerana man bangsa Israel ngataken nggo salah kam ertiken kerna nehken persembahen. Nehken persembahen labo berarti gelah Dibata dat nakan. Ate Dibata gelah persembahen bangsa Israel tuhu-tuhu bermakna maka bangsa Israel harus nggeluh ibas pengataken bujur, nggeluh bujur ras setia. Persembahen la banci ipisahkan ras kegeluhen tep-tep wari.
5.      Kegeluhen bangsa israel simerupakan bangsa Tuhan arus tuhu-tuhu patuh ras setia man Tuhan saja. Ula bagi kalak si la nandai Tuhan. Kalak si la nandai Dibata eme kalak jahat. Janah ihukum Tuhan ia. Adi reh penghukuman Tuhan, ise pe la ngasup nampatisa. Emaka bangsa Israel ula jadi kalak jahat. Erkiteken sie kegeluhen bangsa Israel arus nggeluh alu dem pengataken bujur. Ibas erti kata kai pe si jadi, termasuk perbeben ras kiniseran, bangsa Israel Israel arus reh man Dibata saja guna mindo penampat man baNa. Bagepe persembahen siisehken bangsa Israel arus tuhu-tuhu alu dem pengataken bujur. Ibas pusuh sibersih nari, bagepe patuh ngikutken Tuhan, maka kegeluhen bangsa Israel dem alu keselamaten ibas Tuhan nari.

APLIKASI.
            Persembahan kalak kristen ras persembahan bangsa Israel berbeda kal. Adi persembahan bangsa Israel erpalasken ikatan perpadanan, emaka sipatna badia ras ritual. Erkiteken sie persembahen kalak Israel melala bentukna, ras nggo iatur ibas aturen agamana. Termasuk kalak bayak ras kalak musil mpersembahkan persembahan. Persembahan kalak bayak la seri ras kalak musil, sebab kalak musil la ngasup tukur biri-biri, emaka persembahenna perik ngenca. Tapi persembahan kalak kristen erpalaskan ibas pengataken bujur erkite-kiteken kita nggo leben ngaloken pemere simbelin ibas Dibata nari, eme persembahan Yesus Kristus selaku biri-biri Dibata. Emaka kulanta nggo jadi bersih ras badia.
            Persembahen sipayo eme persembahen sipehagaken Tuhan, emaka persebahanen sipayo  arah pusuh ras dem pengataken bujur, bagepe erpalasken kiniteken. Emaka persembahen sipayo la itentuken jumlah ntah pe nominal. Bagepe tuhu-tuhu sibereken simehuli man TUhan Bagepe la erpalaskan status ekonomi. Ibas erti kata banci saja status ekonominta biasa-biasa saja, tapi persembahenta galangan asangkan persembahen keluarga kalak bayak. Bagepe ibas persembahen si payo, kita banci ngangkai maka la saja persembahen uang ntah pe inatura (hasil bumi) siipersembahkan ibas gereja, tapi uga kegeluhenta tuhu-tuhu ersembah man Tuhan. Geluhta tuhu-tuhu bersih.

Pdt. Steven Kumenit, STh.M.Min.      

Selasa, 24 Mei 2016

Itandai Dingen Iikutken Bangsa Doni Enda Kam (1 Raja-Raja 8:22-23; 41-43)



KHOTBAH TANGGAL 29 MEI 2016.
GEREJA GBKP
Invocatio      : Laweslah ku kerina bangsa manusia, bahanlah ia jadi ajar-ajarKu: Peridiken ia ibas gelar Bapa, gelar Anak, ras gelar Kesah Si Badia, janah ajari ia ngikutken kerina si enggo Kupedahken man bandu. Janah ingetlah! Aku tetap kap ras kam seh ku kedungen jaman." (Matius 28:19-20).
Ogen        :    Lukas 7:1-10 (Tunggal).
Khotbah   :    1 Raja – Raja 8:22-23, 41-43 (Tunggal).
Tema        :    Itandai Dingen Iikutken Bangsa Doni Enda Kam.

LATAR BELAKANG
1.      Sijadi bahan khotbahnta sendah eme pertoton raja Salomo kenca nggo dung rumah pertoton siibangunna. Jadi banci sikataken pertoton Salomo tupung peresmian rumah Pertoton. Raja Salomo ertoto i lebe-lebe batar-batar. Batar-batar eme ingan persembahen.
2.      Ibas pertoton raja Salomo, teridah kerna fungsi Rumah Pertoton. Rumah pertoton la saja ikhususken man bangsa Israel, tapi man kerina bangsa pe. Bagepe Dibata e, Dibata guna kerina bangsa. Dibata siuniversal.  Tentuna kerehen bangsa sideban ku rumah pertoton sebab tehna, Tuhan sierkuasa tading ibas rumah Pertoton (band. Kel. 25:8-9; 1 Raja-Raja 8:1-3). Bagepe Dibata e, Dibata guna kerina bangsa-bangsa. Emaka ibas pertoton raja Salomo nina : Adi lit bangsa si deban ringan i bas taneh si ndauh megi berita kerna kemulianNdu ras perbahanen-perbahanenNdu, jenari reh nembah man baNdu janah ertoto i bas Rumah Pertoton enda, begikenlah pertotonna i Surga, i ja Kam ringan. Begikenlah ia janah bahanlah man bana bagi si ipindona man baNdu, gelah kerina bangsa i doni enda nandai Kam janah ngikutken Kam, bagi si ibahan bangsaNdu Israel. I je ietehna maka Rumah Pertoton si enggo kupajekken enda me ingan ersembah man baNdu.
3.      Ibas pemindon siirealisasikan Tuhan, maka bangsa sideban ngangkai kerna Dibata e, Dibata sierkuasa ras perkeleng, tuhu-tuhu mereken ras masu-masu kegeluhenna. Tapi sipaling penting ibas pemindon bangsa-bangsa e, ibas rangka kegeluhen kedamen ras kemalemen ate. Jadi ibas Rumah pertoton lit magnet nandangi kalak sideban (band. Yesaya 2:3).
4.      Pertoton Raja Salomo mbuka perukuren bangsa Israel eme maka Tuhan e Tuhan sierkuasa ibas Surga ras doni. Gelah bangsa Israel enda patuh ras tetap erkemalangan man Tuhan. Pertoton Raja Salomo enda tentuna arah pengalaman kinitekenna, i ja Dibata tuhu-tuhu ng kelengi ras nampati kalak si reh nembah man Tuhan.
5.      Memang tupung sie isekelewet bangsa Israel ersembah man dibata-dibata sideban. Tapi amin gia lit dibata-dibata sideban, tapi Tuhan siisembah bangsa Israel eme Tuhan sierkuasa simelebihi kuasa dibata-dibata sideban.

APLIKASI
            Temanta sendah Itandai dingen iikutken bangsa-bangsa doni enda Kam.  Situhuna arah tinepa Dibata ibas doni enda banci siangkai kerna kuasa Dibata. Tapi guna njelasken kerna kuasa ras keleng ate Tuhan e, nggo idiloNa kita guna mberitaken kuasa ras keleng ate Tuhan man kerina manusia (band. Matius 28:19-20).
            Ibas pelayanan keselamatan Tuhan Yesus ibas doni enda teridah tuhu kerna kuasa ras keleng ate Tuhan, emaka gelar Tuhan terberita. Emaka tupung Yesus  i Kapernaum, reh suruh-suruhen perwira, gelah Yesus nggit pepalem perwira, atasenna  sisangana sakit, janah menam mate pe. Janah nggit Yesus pepalem perwira e erkite-kiteken teridah man perwira e piga-piga hal :
1.      Perwira roma eme kalak kafir, janah pang ia mindo penampat man Yesus.
2.      Meteruk ukur perwira e jumpa ras Yesus meteruk ukur ia.
3.      Erkeleng ate nandangi juak-juak ras suruh-suruhen.
4.      Perwira e tek nandangi kuasa Yesus.
5.      Perwira e nggit mbangun rumah pertoton kalak Yahudi.
             Arah sienda, banci sikatakan kalak sideban banci nandai Tuhan, arah kegeluhenta. Emaka mari sijagai Imago – Dei ibas dirinta. Alu bage terdilo kalak sideban reh ku Tuhan  ras iikutkenNa Tuhan. Alu bage kegeluhenta i tengah-tengah doni enda nggeluh ibas kemalemen ate ras keselamatan.

Pdt. Steven Kumenit, STh.M.Min.

Rabu, 18 Mei 2016

Dibata Telu Sada (Yohanes 16:12-15)



KHOTBAH TANGGAL 22 MEI 2016.
GEREJA GBKP
Invocatio    :    Mula-mulana ijadiken Dibata langit ras doni. Doni lume denga, la lit tempasna. Lawit si mbelang ergalumbang itutupi gelap mesangat, janah kesah Dibata kelaling-kelaling i babo lau engkuasaisa (Kejadin 1:1-2).
Ogen          :    Mazmur 8:21-10 (responsoria).
Khotbah     :    Johanes 16:12-15 (Tunggal).
Tema          :    Dibata Telu Sada.

LATAR BELAKANG.
1.      Bahan khotbah eme percakapan ntah sada penjelasan Yesus man ajar-ajarNa kerna pendahin Kesah Si Badia. Janah enda ope denga Yesus nangkih ku Surga.
2.      Dosa mambai manusia la ngasup ngangkai kerna eksistensi Yesus Kristus, tapi arah Kesah Si Badia ipetangkasNa ise Yesus e, bagepe Kesah Si Badia mpermuliakan Yesus arah  mberitaken ise situhuna Yesus e.
3.      Kesah Si Badia ngerana kerna kebenaren si lit ibas Yesus Kristus. Yesus eme Dibata sireh ku doni enda, tuhu-tuhu pribadi sibenar. Bas Yesus lit kebenaren. Kebenaren bas Yesus enda me sila terangkai nterem jelma, khususna imam-imam kepala, pemimpin kalak Yahudi ras kalak Farisi, emaka Yesus selaku Mesias itulakna. Ibas penulaken enda ngatakenca, maka perukuren manusia la ngasup ngangkai kerna kebenaren Dibata.
4.      Yesus eme kebenaren,  ngasup terangkaisa adi Kesah Si Badia singajarisa. Kesah Si Badia ngkuasai pusuh ras peraten manusia, termasuk ajar-ajar Yesus. Emaka ipetangkas Kesah Si Badia me ise situhuna Yesus e.
5.      Kesah Si Badia berfungsi sebage Parakletos nandangi ajar-ajar Yesus, bagepe man kerina kalak si tek baNa. Yesus Kristus ipermuliaken Dibata arah nangkih ku Surga maba kecedan ate man ajar-ajar, sebab arus sirang ras Yesus. Tapi ibas Kesah Si Badia, ajar-ajar Yesus ndatken pengapul ras gegeh guna mberitaken kerna eksistensi Yesus.  Janah pengajaren Kesah Si Badia e labo ate-ateNa saja, tapi kerina enda ikatakenNa kerna kai siibegiNa ras inandangi jadi. Enda me palas ajar-ajar Yesus ndatken gegeh guna mberitaken kerna Yesus singgeluh ras singgo nangkih ku Surga.

APLIKASI
            Dibata telu sada, seh genduari tetap denga iperdebatan khususna si kurang denga ngangkai kerna Dibata telu sada. Secara sederhana Dibata telu sada nerangken kerna Bapa, Anak ras Kesah Si Badia. Dibata Telu Sada (Trinitas). Ngerana kerna Dibata Telu sada em Allah Bapa, Allah Anak dan Allah Roh Kudus (I Yohanes 5:7; Yohanes 10:30; II Korintus 13:14; Matius 3:16-17).  Allah Bapa adalah Allah yang menciptakan langit dan bumi dan segala isinya yang memelihara sampai akhir zaman (Kejadian 1:1-31). Allah Anak adalah Yesus Kristus; Anak Allah yang tunggal (Yohanes 1:14) yang menyatakan pekerjaan dan kehendak Allah di dalam dunia (Yohanes 4:34). Dialah Penebus dosa kita (Matius 1:21) melalui kelahiran, kematian, kebangkitan, kenaikanNya ke Sorga serta kedatanganNya kembali. Allah Roh Kudus adalah pribadi Allah; Roh Allah dan Roh Kristus (Roma 8 : 15 - 17). Dialah Penolong dan Penghibur yang dikaruniakan untuk mengajar, mengingatkan orang percaya akan kehendak Allah dan ajaran Yesus Kristus, dan menanamkan serta memelihara iman sampai kedatangan Yesus Kristus kembali (Yoh 14:26; II Korintus 3:17).
            Tentuna kita selaku kalak sitek man Yesus arus ngataken bujur man baNa, sebab ibas Dibata telu sada kita ngasup ngangkai kerna kuasa ras keleng ate Tuhan man banta. Alu bage, lanai perlu aru ateta nggeluh ibas doni enda, sebab ibas kuasa ras keleng ateNa, kita banci megegeh nggeluh ibas doni neda. Janah adi lit perbeben ras kiniseran, pasti isampatiNa kita. Lebih asangken sie Kesah Si Badia mereken gegeh man banta guna tetap nggeluh ibas pengarapen seh Yesus Kristus reh peduakaliken ibas doni enda.

Pdt. Steven Kumenit, STh.M.Min.

Keterkelinen Erkiteken Lias AteNa (Efesus 2:4-9)



PERPULUNGEN JABU – JABU
GEREJA GBKP
TANGGAL 22 – 28 MEI 2016.
Epesus 2 : 4 – 9.

Tema : Keterkelinen Erkiteken Lias AteNa.

LATAR BELAKANG
1.      Ibas penjara nari Paulus mereken sada penjelasan man perpulungen Epesus kerna keselamatan singgo ialoken perpulungen Epesus. Keselamatan sienggo ialoken perpulungen Epesus erkite-kiteken lias ras keleng ate Tuhan, labo erkiteken bekas perbahanen manusia (perpulungen Epesus).
2.      Situhuna ope denga perpulungen Epesus tek man Yesus Kristus, pertendin kalak Epesus mate kap, emaka siilakoken kalak Epesus eme salah ras dosa. Perbahanen sibage patut ngaloken pernembeh Dibata. Tapi erkiteken kalak Epesus nggo tek man Yesus Kristus, maka kiniteken enda me sierbahanca kalak Epesus nggeluh ibas persadan ras Yesus Kristus, emaka ibas lias ate Tuhan, kalak Epesus nggeluh ibas keterkelinen.
3.      Keterkelinen sialoken perpulungen Epesus, erktite-kiteken  lias ate Dibata si la ersibar, janah mbelin kal keleng ateNa man perpulungen Epesus. Ate paulus  ngataken enda gelah perpulungen Epesus meteh uga belinna keleng ate Tuhan siseh man bana. Janah keterkelinen ibere Dibata man kalak si tek man Yesus Kristus ngenca, amin gia ia la kalak Yahudi. Sebab la ngena ate Dibata bangsa ntah pe kalak si la kalak Yahudi nggeluh ibas kiniseran erkiteken pernembeh ate Tuhan.
4.      Kegeluhen perpulungen Epesus kenca tek man Yesus Kristus, la saja bebas ibas pernembeh ate Tuhan, tapi perpulungen Epesus lanai nggeluh ibas kematen pertendin, emaka kematen kula lanai jadi kebiaren, sebab Kristus nggo naluken kuasa kematen, bagepe erkiteken kalak si tek man Yesus Kristus nggo nggeluh ibas persadan ras Yesus Kristus, emaka ibas kekeken Yesus Kristus, kalak si tek man baNa pe pagi ipekeke ibas simate nari. Bagepe kalak si tek ras Yesus kundul ia ras Dibata ibas ingan simeganjangna eme Surga. Ibas erti kata kalak si tek ras nggeluh ibas persadan ras Yesus Kristus ndatken kegeluhen si rasa lalap si la erkeri-kerin.
5.      Keterkelinen singgo ialoken perpulungen Epesus, mereken  pengangkan, maka situhuna erkiteken tek man Yesus nge maka perpulungen selamat, emaka ula meganjang ukur ntah pe muji bana, tapi siarus ilakoken perpulungen eme ngataken bujur ras ndalanken kai singena ate Tuhan. Ibas kegeluhen tep-tep wari ula nari ngelakoken perbahanen-perbahanan dosa, bagi siilakoken perpulungen Epesus ope denga tek man Yesus Kristus.

APLIKASI
              Kegeluhen manusia la saja terjeng ibas doni enda, tapi nggeluh i Surga. Kalak singgeluh i Surga adi kita nggeluh ibas keselamatan. Janah keselamatan e banci sialoken adi tek kita man Yesus Kristus. Janah patut nge kita ngataken bujur man Tuhan sebab ibas lias ras perkuah ateNa kita nggo iselamatkenNa. Dibata nelamatkan kita arah pengorbanenNa i Kayu persilang. Janah ibas kematenNa, ke-akunta, ntah pe dosa-dosanta ikut ibas kematenNa, tapi ibas kekekenNa ibas simate nari, kita pe ikut ibas kekekenNa. Maksudna, kita nggo nggeluh ibas keselamatan. Alu bage ngataken maka keselamatan singgo lit bas kita, erkite-kiteken kiniteken bagepe lias ras perkuah ate Tuhan. Emaka payo nge kai siikataken Marten Luther, keselamatan manusia erkite-kiteken kiniteken ras lias ate (Sola Fide : hanya kerna iman ras sola gratia : hanya kerna anugerahNya).
            Adi keterkelinenta erkite-kiteken Tuhan, maka patut nge kita ngataken bujur man Tuhan. Tandana kita ngataken bujur man Tuhan , kita arus ngelakoken kai singena ate Tuhan.

Pdt. Steven Kumenit, STh.M.Min.