Sabtu, 25 Juni 2016

Rutang Si Megegeh Nampati Si La Megegeh (2 Korintus 8:13-15)



PERPULUNGEN JABU-JABU
GEREJA GBKP
TANGGAL 3 – 9 JULI 2016.
2 Korinti 8 : 13-15.

Tema : Rutang Si Megegeh Nampati Si La Megegeh.

LATAR BELAKANG.
1.      Kenca kita tek man Yesus Kristus selaku Tuhan, maka kita la saja jadi gereja siteridah (nen = lembaga), tapi kita pe jadi gereja si la teridah. Janah kita nggeluh ibas sada persadan. Ikatan sada persadan “menembus ruang ras waktu”. Ibas erti kata, kalak sitek man Yesus Kristus nggo nggeluh ibas sada kula. Emaka adi lit anggota kula simesui, maka anggota kula sideban ikut nggejap kinisuin e. Ibas palas enda me maka rasul Paulus mpersingeti mulihi, bagepe mereken sada motivasi man perpulungen Korinti gelah perpulungen Korinti mereken penampat man senina turangna i Yerusalem si sangana nggeluh ibas perbeben simesangat.
2.      Kalak Kristen Yahudi sitading i Yerusalem sangana nggeluh ibas kelihen erkite-kiteken lit “penganiayaan/penindasan ras perjarahan”.  Emaka tanggungjawab kiniteken kalak kristen sitading i daerah Akaya ras Makedoni eme nampati alu materi. Alu sisampati kalak kristen si lit i Yerusalem, maka bebanna menahang, emaka lanai teralang kerna persadan ras mberitaken Berita Si Meriah.
3.      Ibas perpulungen Korinti lit sada persoalan, khususna kerna mpepulung dana guna nampati senina turangna si lit i Yerusalem. Persoalanna labo erkiteken perpulungen Korinti la lit sen. Perlu siteh perpulungen Korinti eme perpulungen sicukup bayak. Saja siterjadi eme ndekasa akap Paulus perpulungen mpepulung dana e.
4.      Ibas palas enda ipersingeti Paulus mulihi perpulungen Korinti, bagepe imotivasiken Paulus  gelah perpulungen Korinti banci mereken lebih asangken perpulungen-perpulungen si lit i Makedoni. Erkiteken sie me itekanken Paulus maka tujun mere, la saja terjeng nampati, tapi gelah lit keseimbangan nggeluh. Bagepe ibas perpulungen nehken pemerena, maka nggeluh me sisampat-sampaten. Bagepe labo erkiteken mere maka perpulungen Korinti jadi musil. Situhuna ibas nehken penampat, maka undang-undang kekelengen nggo isehken perpulungen Korinti.
5.      Nggeluh enda bagi roda pedati, emaka banci saja, ibas wari – wari sireh perpulungen Korinti ka siberkekurangan ntah pe nggeluh ibas kemusilan. Emaka tanggungjawab kalak Kristen i Yerusalem ka nampati perpulungen Korinti. Enda me respon kiniteken ibas kegeluhen kalak kristen.

APLIKASI
            Keleng ete eme karakter kalak sitek man Yesus Kristus (kalak kristen). janah keleng ate enda arus teridah ibas kegeluhenta tep-tep wari. Keleng ate ndilo kita gelah kita ngasup erdiate man temanta manusia, khususna simbutuhken penampat.
            Keleng ate mabai kita tetap nggeluh ibas sada kula eme gereja, bagepe merespon pendilo gereja guna ikut berperan serta nandangi pelayanan. Sebab subuk i tengah-tengah persadan gerejanta bagepe, i darat gereja, ncukup nterem senina turangta simbutuhken penampat. Memang ibas gerejanta lit diakonia, tapi nehken diakonia secara aturen la bias. Emaka pendilo keleng ate man banta banci ngkurangi beban senina turangta siisampati kita.
            Lit sada istilah, adi nampati ula bereken nurung, tapi berekenlah kawil. Memang enda mejile ibas rangka transformasi kegeluhen, janah la nggeluh ibas ketergantungan man kalak sideban. Sada sisi enda mejile, tapi ibas sisi sideban, lit memang siarus isampati alu materi (nen = langsung). Tapi ibas kita nampati arus sinen kerna kebutuhen, gelah bermanfaat man kalak siisampati kita. Janah inget kerna nampati, labo terjeng bagin kalak bayak saja, tapi kita kerina arus muat bagin. Saja man kalak simelala pemere Dibata, melala ka pemindon keleng ate. Janah ingetlah ibas kita ngasup mere berarti lit bas kita, janah kita igolongkan megegeh. Janah kalak siisampati igolongken sangana ibas lemah, ntah pe kekurangen. Enda me siikataken rutang simegegeh nampati si la megegeh. Teklah, ibas kita nampati, la kita kekurangan, sebab ngena ate Tuhan kerna sie, emaka ipasu-pasu Tuhan kita. Alu bage kita tetap nggeluh ibas kecukupan.

Pdt. Steven Kumenit, STh.M.Min.

Rabu, 22 Juni 2016

Dibata Si Nikapken Benih (2 Korintus 9:10-11)



PERPULUNGEN JABU-JABU
GEREJA GBKP
TANGGAL 26 JUNI – 2 JULI 2016.
2 Korinti 9 :10 – 11.

Tema : Dibata Si Nikapken Benih.

LATAR BELAKANG
1.      I Yerusalem terjadi kelihen simesangat, emaka selaku kalak kristen, janah enda pendilo keleng ate, bagepe penggajapen sada kula, idilo guna nehken penampat keleng ate, emaka Paulus reh ku tengah-tengah kalak kristen i daerah Akaya ras Makedoni guna mindo penampat gelah perpulunge-perpulungen i daerah Akaya ras Makedoni banci nampati senanina turangna si lit i Yerusalem. Janah perpulungen kalak kristen si lit i Akaya ras Makedoni nggit muat bagin ibas nampati senina turangna si sangana nggeluh ibas perbeben simesangat i Yerusalem.
2.      Sijadi oratenta sendah eme sada motivasi rasul Paulus man perpulungen i Korinti si lenga ngelaksanakan pepulung dana guna ibereken man senina turangna si lit i Yerusalem.
3.      Gelah perpulungen Korinti pedas merealisasikan pendilo kalak kristen kerna keleng ate, bagepe merefleksikan keleng ate Kristus si lit bas dirina man kalak simbutuhken penampat, maka Paulus mereken palas teologis kerna erti mere. Mere alu erpalaskan kiniulin erbahanca la mbiar-mbiar nampati man kalak simbutuhken penampat. Sebab kalak kristen nggo nggejapken uga mbelinna perkuah ate ras pasu-pasu Tuhan. Kalak Kristen nggeluh ibas pemeliharaan Tuhan. Emaka la ate Tuhan kalak kristen ndatken kemalun erkite-kiteken nampati kalak sideban. Dibata bayak kap. Janah Dibata nggo nikapken man kerina kalak kristen benih man kalak simerdang ras nakan si man pangan. Alu bage kerina nggo isikapken Tuhan,emaka la perlu mbiar ibas mere, sebab e guna pelayanan gereja.
4.      La itekankan Paulus kerna asakai siarusna ibereken perpulungen ibas nampati senina turana si lit i Yerusalem, tapi sijadi penekanan Paulus eme gelah perpulungen pedas nehken penampatna, apai ka perpulungen Korinti berbeda ekonomina ras perpulungen si lit i daerah Makedoni. Bayaken perpulungen Korinti asangkan perpulungen siidaerah Makedoni. Adi perpulungen i daerah Makedoni nggo ndalankenna pemerena (band. 2 Korinti 8:1). Maka searusna min perpulungen Korinti nggo ngelaksanakenca. Perpulungen Korinti eme persadan singgeluh erpalaskan keleng ate ras pasu-pasu Tuhan, emaka selaku kalak kristen mere merupakan sada kemalemen ate, janah kemalemen ate e la erpeltep-peltep. Lit lalap. Janah enda me bentuk kiniulin ras karakter kalak kristen.
5.      Dibata tetap mperdiateken kalak simere alu palas keleng ate ras ukur meriah. Emaka kalak simere alu ukur meriah ras la erpalaskan jungut-jungut ipasu-pasu Tuhan ia. Enda me siimaksudken ibas ayat 10. Enda iberekan Tuhan, sebab kalak kristen nggo merealisasikan karakter Tuhan ibas kegeluhenna.

APLIKASI
            Kenca Tuhan ndilo kita jadi kalak kristen ras nggeluh ibas persadan ras Ia. Maka pemeliharaan Tuhan nggeluh bas kita. Emaka selaku kalak kristen arus nandai Tuhan alu tuhu-tuhu. Ise kin Tuhan siisembah kita, sebab penting man banta kerna sie. Cuba sinen ibas perdalanan kegeluhen manusia, kenca Tuhan ndilo anak-anakNa (band. Abraham, bangsa Israel, Elisa, diberu balu-balu sinehken persembahen, rsd) isikapken Tuhan kerina kebutuhen-kebutuhenna. Sipenting man banta eme nggeluh alu pengarapan man baNa saja ras ndalanken peratenNa.
            Ibas pemeliharaan Tuhan man banta, teridah ras tergejap maka tuhu-tuhu keleng kal ate Tuhan man banta. Emaka jadi penungkunen man banta, kaleng kin ateta man Tuhan. Adi keleng ateta man Tuhan, siarusna min teridah ibas kita nehken persembahen ras nggit nampati senina turangta alu meriah ukur ras la jungut-jungut.
            Adi ngenara kita kerna benih, maka kita ngerana kerna kegeluhen ras pasu-pasu Tuhan. Kegeluhen siimaksud eme nggeluh bagi singena ate Tuhan ras nggeluh ras Yesus i Surga. Bagepe pasu-pasu eme kita ngaloken pasu-pasu ibas Tuhan nari, bagepe kita jadi pancur pasu-pasu man kalak sideban.
            Temanta sendah eme Dibata nikapken benih. Ertina Dibata nikapken kegeluhen man banta ras man kalak sideban. Jadi ibas kita ncidahken kerna karakter kristen eme mere alu melumbar ibas palas keriahen ras la jungut-jungut, maka Dibata masu-masu kita ras iperdiateken Tuhan kegeluhenta genduari ras sipagin. Bagepe arus sigejapken maka nterem kalak simbutuhken benih. Janah benih e nggo isikapken Tuhan ibas kita nari. Emaka ibas kita nngerdangken benih, berarti kita nggo jadi pancur pasu-pasu Tuhan man kalak sideban. Jadi perlu ipersingeti kami man banta, ula ibas kita ngerdangken benih alu jungut-jungut ntah pe bagi terpaksa. La meriah ukur Tuhan kerna sibage.

Pdt. Steven Kumenit, STh.M.Min.

Kamis, 16 Juni 2016

Mpelimbarui Budaya (Matius 12:1-8)



PERPULUNGEN JABU-JABU
GEREJA GBKP
TANGGAL 19 – 25 JUNI 2016.
Matius 12 : 1-8.

Tema : Mpelimbarui Budaya.

LATAR BELAKANG
1.      Yesus Kristus eme Tuhan, tapi la teraloken kalak kalak Yahudi khususna kalak Parisi, emaka idaramina kesempatan guna ncubai Yesus, bagepe ndaramina kesempaten guna ngenen kesalahan Yesus. Adi datna kesalahan Yesus, maka e dalanna guna mbaba Yesus ku bas pengadilan agama (sahendrin), gelah ibas pengadilen agama e, Yesus banci ihukum. Emaka tupung  wari sabat, Yesus mentas arah perjuman gandum, iidah kalak Parisi ajar-ajar Yesus mutiken gandum. Emaka nina kalak Parisi man Yesus nehenlah, ajar-ajarNdu nggo erbahan kai si labanci ibahan ibas wari sabat.
2.      Kalak Parisi la ngataken man Yesus nehenlah ajar-ajarNdu nggo nangko gandum, tapi mutik gandum  tupung wari sabat. Sebab iteh kalak parisi lit  undang-undang singaturken, adi lit kalak simelihe, janah mentas ia ibas juma gandum, banci iputikna gandum jenari ipanna. Siilarangna eme ula muat gandum alu sabi (band. Ulangan 23:25). Emaka siibelinkan kalak Parisi eme mutik gandum tupung wari sabat. Man kalak Parisi mutik gandum bali ras erdahin. Padahal ibas aturen sabat , kalak Yahudi la banci erdahin ibas wari sabat. Memang ibas undang-undang wari sabat, khusus kalak Parisi, lit 39 perbahanan singgo iaturna si labanci ilakoken kalak Yahudi. Mutik gandum termasuk ibas si 39 perbahanan siilarang.
3.      Perlu siteh wari sabat memang ibereken Tuhan man bangsa Israel, gelah bangsa Israel nghamati wari sabat. Ibas bangsa Israel nghamati wari sabat, bangsa Israel la banci erdahin, sebab wari sabat nggo ipebadiaken Tuhan (band. Keluaren 20: 8-11).
4.      Ibas masalah enda, ngerana Yesus. Yesus la bo mpermasalahken kerna wari sabat, tapi lit si lebih penting, janah enda banci ilakoken amin gia ibas wari sabat eme kerna melihe ras keleng ate. Ajar-ajar Yesus mutiken gandum erkite-kiteken melihe, labo erkiteken erdahin. Emaka nina Yesus, raja Daud pe pernah ngelakoken sibage ibas wari sabat, tupung raja Daud ras teman-teman melihe, bengket raja Daud ras teman-temanna ku rumah pertoton, ibuatna roti singgo ipersembahkan man Dibata. Padahal ibas aturenen agama, roti siipersembahkan man Dibata, imam-imam saja sibanci man roti e (band 1 Samuel 21:1-6).  Kai siibahan Daud e, iteh kalak Parisi, janah perbahanan Daud  la ikategoriken dosa.
5.      Kerehen Yesus labo guna ncedai wari sabat, tapi Yesus eme Anak Manusia, janah Ia kap Tuhan singkuasai wari sabat. Ibas erti kata, Yesus kap simereken wari sabat man kalak Israel (Yahudi) guna keselamatan manusia. Bagepe erkiteken wari sabat bagin ibas Taurat, janah kerehen Yesus ibas rangka nggenepi taurat e, maka wari sabat erfungsi guna kemuliaanNa. Ibas rangka gelah Anak Manusia ipermuliakan.

APLIKASI
            Secara sederhanan banci sikataken budaya eme hasil karya manusia guna idalanken. Emaka budaya banci berbeda-beda sue ras ingan ras daerahna. Emaka kita kerina nggeluh ibas budaya e. Erkiteken budaya nggo menyatu ras kegeluhen manusia, maka banci saja budaya e jadi identas manusia e. Contoh budaya Karo. Maka kerina kalak Karo nggo menyatu ras budaya e. Emaka la heran GBKP tetap melestarikan budaya Karo e. Janah enda me salah sada bentuk  gereja GBKP ndalanken pelayananna. Saja secara umum lit budaya simehuli ras lit ka si la mehuli. Emaka peranan gereja, termasuk kita arus mpelimbarui budaya si la mehuli e. Kita selaku gereja arus pang mpelimbarui budaya si la mehuli, sincedai kiniteken bagepe tatanan kegeluhenta. Jadi budaya e banci iikuti ras idalank adi budaya e tuhu-tuhu mejile ras ibas rangka kesejahteran ras  keselamatenta.
            Ibas budaya kalak Karo nggo melala ipelimbarui gereja, eme maba manuk mbur. Genduari maba manuk mbur tetap ilakoken tapi alu bentuk kebaktin. Bagepe Nengget. Nengget biasana ilakoken guna jabu si la lit pupusna. Genduari nengget lit denga ilakoken tapi la bagi sinai, tapi siilakoken eme kenca seh i rumah jabu siman dahi e, sibahan kebaktin eme rende ras ertoto, rsd. Jadi kita singgo ipelimbarui alu Kata Dibata, arus ka nggasup mpelimbarui si la mehuli, gelah kita tetap nggeluh ibas persadan ras Tuhan.

Pdt. Steven Kumenit, STh.M.Min.

Rabu, 08 Juni 2016

Mpersembahkan Si Mehulina (Bilangan 28: 26-31)



PERPULUNGEN JABU-JABU
GEREJA GBKP
BILANGAN 28 : 26-31.

Tema : Mpersembahkan Si Mehulina

LATAR BELAKANG
1.      Siman oratenta sendah eme sada peraturen man bangsa Israel kerna kerja rani. Kerja rani siibahan bangsa Israel eme bangsa Israel arus ngendesken persembahen simbaru man Tuhan ibas kebaktin. Janah tupung kebaktin bangsa Israel la banci erdahin. Bangsa Israel tuhu-tuhu arus ngatakan bujur man Tuhan, sebab Tuhan nggo masu-masu jumana.
2.      Persembahan kerja rani enda ilakoken bangsa Israel, kenca 7 minggu bangsa Israel ngelakoken wari raya Paskah. Sebab ibas aturen agama bangsa Israel, janah enda merupakan sada perintah Tuhan, i ja bangsa Israel arus ngerayakan 3 wari raya eme wari raya roti la tama ragi (Paskah), wari raya sapo-sapo ras wari raya Pentakosta. Emaka kerina bangsa Israel si tading ibelang-belang doni enda arus reh ku Israel ersembah man Tuhan ibas rumah pertoton. Persembahan kerja rani enda eme wari raya siilakoken 1 wari ngenca.
3.      Ibas bangsa Israel nehken persembahen kerja rani, kepeken la terjeng ulih juma saja, tapi pe bangsa Israel arus bahan persembahan tutungen jadi persembahen simerim iakap Tuhan. Persembahen enda eme 2 jenggi lembu singuda denga, sada bajar biri-biri, ras pitu anak biri-biri bajar siumurna sada tahun, kerina enda si la lit pandangan, bagepe korban sajian ras minakna. Alu bage meriah ukur Tuhan. Perlu siteh fungsi persembahen enda ibas rangka pengalemi dosa secara umum si la isengaja bangsa Israel.
4.      Erkiteken kebaktin nehken persembahan kerja rani badia, maka bangsa Israel arus pe badia. Emaka gelah bangsa Israel badia, bangsa Israel arus mpersembahken sada bajar kambing jadi persembahen pengalemi dosa. Persembahen pengalemi dosa enda, labo bereken bage-bage saja, tapi arus ibas acara pembersihen dosa. Fungsi acara pembersihen dosa gelah bangsa Israel nggeluh ibas kebadiaan. Sebab sadar ntah la sadar, banci saja bangsa Israel nggo ngelakoken dosa sisipatna secara khusus. Alu bage meriah ukur Dibata ngaloken persembahan kerja rani bangsa Israel. Tapi silebih penting, erkiteken enda merupakan kebaktin, janah ibas kebaktin bangsa Israel jumpa ras Tuhan, maka bangsa Israel tuhu-tuhu arus badia, sebab Tuhan e Badia.
5.      Ibas bangsa Israel erbahan kerja rani, berarti bangsa Israel nggeluh ibas sada Tuhan ngenca. Bagepe nggeluh ibas kehamatan ras kepatuhan man Tuhan saja. Sebab nehken kerja rani merupakan perintah Tuhan man bangsa Israel.

APLIKASI
            Ibas kalender gerejawi GBKP bulan enda arus ilakoken persembahen kerja rani. Persembahen kerja rani eme tanda keriahen ukurta man Tuhan, sebab Tuhan nggo masu-masu pendahin ras jumanta. Genduari ibas kita nehken persembahen kerja rani nggo bervariasi. Lit kita sinehken persembahen ibas kebaktin minggu arah amplob saja, tapi lit ka sinehken persembahan kerja rani alu ipestakan. Situhuna apai pe mehuli nge. Sipenting ibas kita nehken persembahen kerja rani, sehkenlah persembahan simehulina ibas ulihta nari. Sebab arah persembahan banci siteh kerna kehamatanta man Tuhan. Adi mehamat kita man Tuhan berarti ibas keriahen ukur sibereken persembahan simehulina man Tuhan. Sebab ibas kita mereken persembahan man Tuhan berarti ateta mpehagakan Tuhan. Emaka meriah ukur Tuhan, jenari alokenNa persembahenta, jenari ipasu-pasuNa kita.
            Persembahen simehulina eme persembahen singgo ipersiapken i rumah nari. Ibas erti kata persembahen e tuhu-tuhu nggo iserapkan ibas keuanganta si lit. Bagepe siipersembahkan kita eme simehulina ibas kai si lit bas kita. Bagepe sibereken ibas pusuh sidem pengataken bujur ras meriah ukur.

Pdt. Steven Kumenit, STh.M.Min.