Persepuluhen (Ulangan 14:22-29)

PERPULUNGEN JABU – JABU

GEREJA GBKP

TANGGAL 5 – 11 JUNI 2016.

Ulangan 14: 22-29

Tema : Persepuluhen.

LATAR BELAKANG

1.      Ope bengket bangsa Israel ku tanah Kanaan, tupung bangsa Israel ngadi-ngadi i dataran Moab, ngerana Musa kerna Persepuluhen ras makna persepuluhen. Persepuluhen merupaken sada peraturen siarus isehken bangsa Israel tep-tep tahun. Janah ibas bangsa Israel nehken persepuluhen bearti bangsa Israel patuh man Tuhan saja.

2.      Ibas bangsa Israel nehken persepuluhen, i je lit sada pengakun maka amin gia bangsa Israel nggo tading ras ngusahai taneh Kanaan, tapi kerina e pemere Dibata. Alu bage bangsa Israel ngaku maka Dibata ulu kegeluhenna. Bagepe arah persepuluhen, bangsa Israel ngataken bujur man Tuhan. Erkiteken sie me bangsa Israel arus mereken persepuluhen man Tuhan ibas ulih jumana nari. Bangsa Israel arus maba ulih jumana man Tuhan ibas Rumah Pertoton.

3.      Persepuluhen siibaba bangsa Israel, subuk ulih juma bagepe asuh-asuhen, ibas rangka pesta ibas Rumah Pertoton. Pesta ibas rumah pertoton eme tanda maka bangsa Israel patuh ras erkemalangan man Tuhan saja. Ibas pesta enda la saja iikuti simaba persepuluhen e, tapi pe ikut sierdahin ibas Rumah Pertoton eme kalak Lewi, bagepe kalak Lewi sitading ibas kutana. Sebab kalak Lewi la lit erta ntah pe taneh pusaka, sebab ibas pembagin tanah Kanaan, kalak Lewi la dat sebab ia ikhususken guna erdahin ibas Rumah Pertoton saja. Tapi lit ka sada peraturen singaturken maka adi kalak Israel ingan tadingna ndauh ibas Rumah Pertoton nari, maka persepuluhen ulih jumana banci idayakan, janah baba tukurna ku Rumah Pertoton. ibas Rumah Pertoton kai siakap merincuh banci situkur, gelah ikut ibas pesta ndai.

4.      Ibas peraturan sideban, kerna persepuluhen iatur tep-tep ujung tahun peteluken, maka persepuluhen e ikhususken man kalak Lewi, kalak pertandang, kalak melumang ras diberu balu-balu. Perlu siteh, subuk kalak Lewi, kalak pertandang, kalak melumang ras diberu balu-balu igolongkan kalak musil, emaka perlu isampati.

5.      Ibas peraturan kerna Persepuluhen man bangsa Israel iartikan la saja nehken persepuluhen bentuk kepatuhan ras kehamatan bangsa Israel man Tuhan, tapi pe nehken persepuluhen eme sada bentuk perhatin bangsa israel nandangi kalak musil.

APLIKASI

            Persepuluhen merupakan sada bentuk kepatuhenta man Tuhan, sebab persepuluhen eme persuruhen Tuhan man banta. Saja seh genduari nterem denga kita kalak kristen si lenga mereken persepuluhen, ntah la murni mereken persepuluhen. Ibas kepatuhenta man Tuhan, maka kegeluhenta ipasu-pasu Tuhan. Bagepe ibas kita nehken persepuluhen berarti kita nggo muat bagin ibas pelayanan gereja Tuhan. Sebab persepuluhen siisehken kita, fungsina eme guna pelayanan i tengah-tengah gereja. Adi siidah ibas ibas oratenta sendah, maka salah sada fungsi persembahan persepuluhen eme guna kalak Lewi, kalak pertandang, kalak melumang ras diberu balu-balu. Berarti lit pelayanan diakonia ntah pe pelayanan kekelengen. Ibas aturan gerejanta genduari pelayanan kerna kekelengen arus ipebue (band. Tatalaksana Pasal 1.4).

            Ibas kita nehken persepuluhen, selain tanda kepatuhan man Tuhan, tapi pe merupakan pengatakan bujurta man Tuhan. Emaka Ibas kita nehken persepuluhen arus arah ukur meriah ras dem pengatakan bujur. Sebab ibas kita nehken persepuluhan alu ukur meriah ras dem pengatakan bujur maka meriah ka ukur Dibata ngaloken persepuluhenta e. Alu bage ipasu-pasuNa kita.

Pdt. Steven Kumenit, STh.M.Min