Rabu, 27 Juli 2016

Njaga Kebadian Perkakas Rumah Pertoton (Bilangan 3:5-10)



PERPULUNGEN JABU-JABU
GEREJA GBKP
TANGGAL  31 JULI – 6 AGUSTUS 2016.
Bilangan 3:5-10.

Tema : Njaga Kebadian Perkakas Rumah Pertoton

LATAR BELAKANG
1.      Kemah perjumpaan eme cikal bakal rumah pertoton si lit ibas Yerusalem.Ikataken kema perjumpaan sebab tupung sie bangsa Israel ibas perdalanan i Mesir nari ku taneh Kanaan, tanah siipadanken Tuhan. Bagepe ingan ersembah ras nehken persembahen man Tuhan. Kemah perjumpaan enda banci ibongkar. Ibas erti kata adi bangsa Israel ibas perdalanan maka kema perjumpaan enda ibongkar janah isusun rapi gelah iangkut. Tapi adi bangsa Israel ngadi maka kemah perjumpaan ibangun mulihi. Kemah Perjumpaan eme ingan perjumpan Tuhan ras bangsa Israel. Bagepe ingan ersembah ras nehken persembahen man Tuhan.
2.      Erkiteken kemah perjumpaan ingan ersembah ras nehken persembahen, maka tentuna lit barang-barang ibas kema perjumpaan siipake guna  ersembah man Tuhan. Alu bage barang-barang e, la saja terjeng pendukung ibas peribadatan bangsa Israel, tapi merupakan bagin si la terpisahkan ibas kema perjumpaan. Emaka kerina barang-barang ibas kema perjumpaan e badia.
3.      Dibata e me Dibata Si Badia ras Dibata ibas kiniraturen. Emaka ate Dibata kerina si lit ibas kema perjumpaan tetap bersih ras badia, bagepe lit min si khusus ndahiken dahin-dahin keimaman ras singurusi kemah perjumpaan rikutken alat-alatna kerina.
4.      Suku Lewi ibas bilangan suku-suku Israel la dat  bagin ibas taneh pusaka, bagepe la jadi tentera bangsa Israel,sebab nggo ikhususken Tuhan  guna ngurusi kema perjumpan ras perkakas-perkakasna (band. Bilangan 2:49-51). Erkiteken sie me, isuruh Tuhan siMusa gelah kalak Lewi erdahin guna nampati imam Harun. Memang secara umum kalak Lewi itugasken guna nampati imam Harun. Tapi secara khusus, dahin suku Lewi ibas kema perjumpan eme : 1). Ndahiken dahin-dahin siiperluken ibas kema perjumpan. 2). Ndalanken tugasna guna imam-imam ras guna perpulungen kerina. 3). Ngurusi alat-alat si lit ibas kema perjumpan. 4). Ndalanken tugas guna kalak Israel sidebanna.
5.      Suku Lewi saja sibanci erdahin ibas kema perjumpan. Adi lit kalak sideban/suku sideban sindahiken dahin, ia arus ibunuh. Sebab suku Lewi ngenca siikhususken Tuhan.  Suku Lewi ngelaksanaken dahin ntah pe kewajiban-kewajiban Harun ras perpulungen, bagepe njagai ntah pe  ngerawat alat-alat si lit ibas kema perjumpan. Emaka situhuna dahin kalak Lewi, arah njaga ras ngerawat alat-alat si lit ibas kema perjumpan, maka subuk imam bagepe perpulungen banci ersembah man Tuhan alu mehuli.

APLIKASI
            Ibas oratenta sekali enda kita ibabai kerna tanggungjawabta selaku kalak sierkiniteken man Yesus Kristus guna ngenen uga pentingna alat iventaris si lit ibas gereja. Perlu siteh lebe, gereja eme ingan kebaktin perpulungun (Koinonia). Erkiteken gereja eme ingan kebatin, maka gereja arus iangkai la saja terjeng gedung perjumpan, tapi ingan perjumpan kita ras Tuhan ibas kebatin. Emaka gedung e badia.
            Gedung gereja lit peranan si penting ibas pembentukan kiniteken ras spitualitasta, sebab i je lit kebaktin eme ertoto, rende ras megiken kata Dibata. Tujun kerina e gelah kita kerinabanci erbagesna pengangkanta kerna kita selaku imago Dei. Bagepe ibas rangka melengkapi ras mendukung peribadatan gelah seh tujun e, maka ilitken alat-alat guna itamakan ibas gereja ras ipake ibas pelayanan gereja. Jadi alat-alat la terjeng pelengkap ngenca, tapi pelengkap ras pendukung ibas pelayanan gereja. Emaka dahin kita selaku kalak sierkiniteken eme uga gelah kita banci ngerawat barang/ perkakas rumah pertoton tetap badia. Tuhu secara khusus lit serayan Tuhan sierdahin ras ertanggungjawab ibas pelayanan i gereja. Tapi adi la sisampati pelayanan serayan Tuhan e, khususna njaga ras ngerawat perkakas si lit ibas rumah pertoton, maka banci ceda. Emaka ibas rangka gelah perkakas ibas rumah pertoton tetap badia, si arus ilakoken eme : 1). Siertiken gereja eme ingan ersembah man Tuhan ras ingan perjumpan kita ras Tuhan. 2). Ula kotori gereja. 3). Ula ngerana semberangan. Ibas erti kata siergai gereja e badia. 4). Sehkenlah persembahen guna pekena-kena rumah pertoton. 5). Ula cedai iventaris gereja ras pakeken alat iventaris bagi arusna. 6). Asesoris gereja arus ipake sue ras tema gereja. 7) Reh kita ku gereja. 8). Lit perhatin ras kerina runggun gereja mperdiateken kerna keadaan gereja. 9). Kita gereja situhu-tuhu arus badia, gelah gedung gereja ikut badia, rsd.  

Pdt. Steven Kumenit, STh.M.Min.

Selasa, 26 Juli 2016

Ergaken Ras Pebadiaken Rumah Pertoton (Yohanes 2:13-17)



KHOTBAH TANGGAL 31 JULI 2016.
GEREJA GBKP
Invocatio    :    Madin sada wari i bas RumahNdu, asangken seribu wari i bas ingan si deban. Madin tedis i bas gerbang Rumah Dibatangku, asangken ringan i bas rumah kalak jahat (Mazmur 84:11).
Ogen          :    Nehemia 7:70-73 (Tunggal).
Khotbah     :    Johanes 2:13-17 (Tunggal).
Tema          :    Ergaken Ras Pebadiaken Rumah Pertoton.

LATAR BELAKANG
1.      Wari raya Paskah eme salah sada wari raya simbelin ibas bangsa Yahudi, janah kerina kalak Yahudi sitading i ja pa pe arus reh ku Yerusalem guna ngerayaken ras nehken persembahen ibas Rumah Pertoton i Yerusalem. Man kalak Yahudi lit 3 wari raya si mbelin siarus irayaken i Yerusalem eme Wari Raya Paskah, Pentakosta ras wari raya Sapo-sapo.
2.      Yesus Kristus selaku kalak Yahudi tetap ikut ibas aturen agama eme ngerayaken wari raya Paskah kalak Yahudi i Yerusalem. Wari raya Paskah kalak Yahudi eme wari raya guna mpehagaken Tuhan, sebab Tuhan nggo mulahi bangsa Israel ibas perbudaken i Mesir nari.  (Keluaren 12:27; Imamat 23:5).
3.      Kenca  Yesus seh i Yerusalem ibas rumah Pertoton idapetina kalak erbinaga lembuh, biri-biri ras nderapati. Bagepe lit i je kalak kundul si dahinna nukari sen. Kerina enda isetujui imam kepala. Ibas situasi sibage rumah pertoton siarusna ingan Dibata, janah ibas rangka ersembah man Tuhan, bagepe ingan nehken persembahen nggo lanai teridah kerna makna rumah pertoton. padahal man kalak Yahudi rumah pertoton eme symbol kemegahan ibas kiniteken ras pengerapan kerna kehadiran Tuhan (band. Kel. 25:8-9). Alu bage rumah pertoton lanai badia, sebab nggo gejek kal nggo bagi pajak. Emaka merawa Yesus, iligasina kerina asuh-asuhen si lit i rumah pertoton, janah isuruh Yesus gelah iangkat ras ibaba ku darat kerina barang-barang binaga kalak e.
4.      Man kalak Yahudi nehken persembahan lit aturenna arus badia. Bagepe persembahen enda itentuken imam kerna banci ntah lang persembahen e, khususna persembahen lembu, biri-biri ras nderapati. Sebab ersembahen e la saja terjeng persembahen pengataken bujur tapi persembahen pengalami dosa. Bagepe kalak Yahudi berkewajiban mbayar tanggungjawabna eme persembahen guna rumah pertoton. Persembahen guna rumah pertoton arus badia. Janah siikataken badia arus ngunaken mata uang Yahudi sejati eme syikal. Memang tupung sie melala mata uang siberedar eme mata uang Romawi, Yunani, Persia, rsd. Tapi kerina mata uang e ianggap kafir, emaka la banci imasukkan ibas peti persembahen. Bagepe mata uang syikal tupung sie nggo cukup mesara ndatkenca.
5.      Erkite-kiteken persembahen asuh-asuhen itentuken imam-imam, ras persembahen syikal sebage persembahen badia, bagepe lit ketentun kalak Yahudi si reh ibas ingan sindauh nari banci nukur asuh-asuhen i rumah pertoton (band. Ulangan 14:24-25). Erbahanca melala perbinaga ibas rumah pertoton. Asuh-asuhen ras duit syikal siidayaken meherga kal, emaka melala keuntungen siidat perbinaga.

APLIKASI
            Rumah pertoton berbeda ras ingan kalak jahat. Sebab rumah pertoton eme ingan Tuhan. Erkiteken rumah pertoton ingan Tuhan maka rumah pertoton e badia, sebab Tuhan e Tuhan si Badia.
            Genduari rumah pertoton eme Yesus Kristus (band. Yohanes 2:19-22; 1 Korinti 6:19). Bagepe rumah pertoton  iertiken gereja, sebab kepala gereja eme Yesus Kristus.  Bagepe  gereja eme ingan ersembah ras nehken persembahen man Tuhan. Gereja eme sentral peribadatan kalak si tek man Yesus Kristus. Emaka tentuna erkiteken gereja ingan sentral ibas kegeluhen kalak sitek, maka gereja arus sipekena-kena (irawat).  Jadi penungkunen man banta, ise siertanggungjawab pekena-kena gereja. Tentuna kita kerina. Jadi labo majelis gereja ntah pendeta ngenca. Majelis gereja bertanggungjawab merawat, erkiteken tanggungjawab organisasi, gelah gereja enda ifungsiken secara maksimal, bagepe terbangun ntah pe lit pembangunan kiniteken man kerina runggun gereja.
            Erkiteken gereja ingan persadan kebaktin (koinonia), maka tentu gereja arus ipekena-kena si berbeda ras rumahta. Gelah ibas kita ersembah lit kenyamanan si banci mabai erdeherna kita ersembah man Tuhan. Alu bage sidat kedamen ras kemalemen ate.
            Adi siperdiateken ibas ogenta (Nehemia 7:70-73), maka kerina ertanggungjawab mereken ongkos guna pekena rumah pertoton, ibas pemerintah nari, kepala-kepala terpuk ras ibas bangsa nari. Alu bage kerina bertanggungjawab. Soal esa kai tanggungjawabta, tentuna sue ras pemere Dibata man banta , janah bereken simetunggungna man Tuhan.
            Ibas rangka ngergaken ras pebadiaken rumah pertoton eme : 1). Siertiken gereja eme ingan ersembah man Tuhan ras ingan perjumpan kita ras Tuhan. 2). Ula kotori gereja. 3). Ula ngerana semberangan. Ibas erti kata siergai gereja e badia. 4). Sehkenlah persembahen guna pekena-kena rumah pertoton. 5). Ula cedai iventaris gereja ras pakeken alat iventaris bagi arusna. 6). Asesoris gereja arus ipake sue ras tema gereja. 7) Reh kita ku gereja. 8). Lit perhatin ras kerina runggun gereja mperdiateken kerna keadaan gereja. 9). Kita gereja situhu-tuhu arus badia, gelah gedung gereja ikut badia.   

Pdt. Steven Kumenit, STh.M.Min.

Rabu, 20 Juli 2016

Iperdameken Ibas Kristus (Kolose 1:15-23)



PERPULUNGEN JABU-JABU
GEREJA GBKP
TANGGAL 24-30 JULI 2016.
KOLOSE 1:15-23

Tema : Iperdameken Ibas Kristus

LATAR BELAKANG
1.      I perpulungen Kolose lit sada ajaran sipapak  singatakenca maka ibas Kristus kalak si tek banci ndatken kerina siiperlukenna. Memang teridah enda la salah, tapi sisalahna eme Kristus la idahna selaku Tuhan. Kristus idahna terjeng salah sada ibas manifestasi (perwujudan/gambaran) Dibata ngenca. Janah Kristus eme sekalak si lit supranatural (lit kuasa si melebihi manusia). Emaka gelah banci ndatken kai siisura-suraken, khusus kerna keselamatan maka arus reh ku Kristus. Yesus banci nampati manusia nggeluh ibas keselamatan. Jadi Yesus terjeng penampat saja, labo ulu keselamatan, janah manusia siberupaya ndatken keselamatan. Bagepe ajaran sipapak e la ngenen maka Yesus eme Dibata jine.
2.      Ajaran sipapak enda, tentuna mpengaruhi kerna eksistensi kiniteken perpulungen. erkiteken sie me maka Paulus mereken pengangkan si payo kerna ise situhuna Kristus. Kristus eme gambaran Dibata siteridah. Situhuna ibas rangka keselamatan ibas doni enda, maka Dibata siringan ibas Kinirajaan Surga reh ku doni enda ibas rupa manusia, eme Kristus. Adi Dibata la teridah, maka erkiteken keleng ate Tuhan maka manusia banci ngidah Dibata ibas Kristus. Emaka ibas Kristus kuh Dibata, ntah pe kepenuhan Dibata me Kristus e. Emaka Kristus simerupaken Dibata jine, Ia la ijadiken, tapi Kristus sinjadiken kerina sinasa lit. Ope denga lit kerina sinasa lit, Kristus nggo lit, sebab Ia sinjadiken kerina sinasa lit e. Bagepe kenca ijadiken kerina sinasa lit, itamaken Kristus ibas ingan sipayo. Bagepe kerina ijadikenna guna Ia. Emaka kerina tinepa patuh man baNa.
3.      Tole, Paulus mereken pengangkan kerna Kristus ibas gereja. Takal gereja eme Kristus. Gereja eme persadan kalak si tek. Kristus me siminpin gereja, gelah gereja simerupaken kula Kristus nggeluh ibas persadan, ras tetap nggeluh ibas keselamaten.
4.      Amin gia manusia tinepa Dibata (Kristus), ras sikerajangan Dibata, tapi erkiteken dosa, emaka manusia sirang ras Dibata, tapi erkiteken Kristus, Anak Dibata, maka ipedameken mulihi hubungen manusia ras Dibata. I uruk Golgota, AnakNa ipakuken i kayu persilang, ibas rangka nebusi kerina dosa manusia, bagepe gelah manusia la dat hukumen ibas Dibata nari. Emaka ibas Kristus nggo mpedameken manusia ras Dibata, la saja manusia mulihi jadi sikerajangenNa, tapi pe manusia nggo nggeluh ibas perkuah ateNa, terhindar ibas penghukumen Dibata nari. Bagepe ijadiken Dibata manusia e nggeluh alu Badia.
5.      Paulus mereken kata pergegeh man perpulungen Kolose gelah perpulungen tetap nggeluh alu pengarapen bagi tangtangna perpulungen ngaloken Berita Si Meriah, sebab la kap sia-sia Berita si Meriah e. Berita Si Meriah nggo mbar ku belang-belang doni. Alu bage perpulungen la nai perlu sangsi kerna erkiniteken ras erpengarapen man Yesus Kristus.

APLIKASI
            Kejatuhan manusia (kita) ibas dosa, erbahanca  kita patut ndatken penghukuman ibas Tuhan nari. Patut kita nggeluh ibas pernembeh ate Tuhan. Tapi erkiteken keleng ate Tuhan, maka la ate Tuhan kita ihukumNa. La ate Tuhan kita sirang ras Ia, sebab kita enda sikerajangenNa. Emaka palas sierbahanca kita la banci nggeluh ibas persadan ras Ia, bagepe nggeluh ermusuhen ras Tuhan, nggo imasapkan Tuhan eme dosa. Alu rehna Yesus Kristus, janah nggit Yesus Kristus mpedameken kita ras Tuhan alu ngkorbanken diriNa i uruk Golgota.
            Ibas kita nggo nggeluh ibas persadan ras Tuhan, maka tentuna kita arus ngataken bujur man baNa. Tanda kita ngataken bujur man baNa, kita la banci ngelakoken kai si la ngena ate Tuhan, gelah kita tetap nggeluh ibas persadan ras Ia. Emaka paksa reh Yesus Kristus peduakaliken ibas doni enda, kita banci nggeluh ras Ia i Surga.
            Bagepe bujur sikataken man Tuhan erkiteken Kristus maka kita ndatken keselamatan. Amin bage gia, lit denga ibas doni enda, senina turangta si lenga tek man Yesus selaku Tuhan sinelamatken doni enda. Tentuna enda pilihenna, amin gia situhuna, ibas kinitekenta ngatakenca pilihenna e salah.
            Perbedaan kiniteken erbahanca terjadi lasiangkan, janah enda me mekatep jadi ibas negaranta. Tapi arus ka sigejapken, agama lit peranen simbelin ibas memajukan bangsa ras negara. Emaka amin gia la seri kinitekenta, lit ka kita nggejapken maka padin kita lanai ncakapken perbedaan kiniteken, tapi uga ncakapken ras diskusiken kerna peranen agama ibas memajuken bangsa ras negara. Bagepe gelah litna perdamen i tengah-tengah doni enda. Ibas sie maka iarapken adi lit kita itenahken ibas diskusi kerna dialog antar iman, rehlah kita gelah kita banci nggeluh berdampingan sada ras sidebanna.

Pdt. Steven Kumenit, STh.M.Min.

Selasa, 19 Juli 2016

Gereja Sindahiken DahinNa (Lukas 4: 38-41)



KHOTBAH TANGGAL 24 JULI 2016.
GEREJA GBKP
Invocatio    :    Ngena ateku man kalak si tutus; kubere ia tading i bas rumahku. Kalak si geluhna la erpandangen, kubere ia ngelai aku (Mazmur 101:6).
Ogen          :    Perbahanen Rasul-Rasul 1:6-11 (Responsoria).
Khotbah     :    Lukas 4: 38-41 (Tunggal).
Tema          :    Gereja Sindahiken DahinNa.

LATAR BELAKANG
1.      Kenca dung Yesus ngajar ras pelawes setan  i Rumah Pertoton i Kapernaum, berkat Yesus ku rumah Simon. Kepeken i rumah Simon, mami Simon sangana sakit mekelek (demam keras), emaka ipidoken kade-kade mami Simon gelah ipepalem Yesus Mami Simon. Emaka ipepalem Yesus mami Simon. Janah mami Yesus malem, minter ia ngelai Yesus. Emaka kuasa pinakit ngasup italuken Yesus.
2.      Gelar ras kuasa Yesus nggo mbar i Kapernaum, emaka kenca matawari nggo sundut kerina kalak maba kade-kadena si sakit man Yesus, gelah ipepalem Yesus ia keriana. Perlu siteh ngkai maka ibaba kalak kerina kade-kadena kenca matawari nggo sundut. Sebab ibas paksa e me kalak Yahudi nggo banci beraktifitas ras erdahin. Ope sie wari sabat denga.  Adi wari sabat, kalak Yahudi ilarang erdahin.
3.      Kuasa Yesus selaku Mesias ras Anak Dibata, ngasup pepalem kalak si sakit ras mpelawes setan-setan si lit bas manusia. Kerina setan-setan serko janah nina kam kap Anak Dibata. Alu bage situhuna iteh setan-setan kerna eksistensi Yesus selaku Anak Dibata. Tapi pengakun kerna eksistensi Yesus selaku Anak Dibata gelah Yesus la ngukum ia.
4.      Yesus eme Anak Dibata ras Mesias, la saja eksistensi siibereken Dibata man baNa, tapi lit kuasa guna mbebasken kerina bangsa ibas penindasen nari, termasuk mbebasken manusia ibas penindasan setan-setan nari.
5.      Isuriangi Yesus setan-setan e, sebab ate setan-setan e mpengaruhi Yesus, gelah Yesus la mpergunaken kuasaNa guna ngukum ia.

APLIKASI
            Perlu siteh maka gereja eme bekas pendilo Tuhan guna ersaksi kerna Yesus selaku Mesias. Emaka subuk istitusi bagepe pribadi la banci lang arus ersaksi kerna Yesus ibas tri tugas gereja eme Marturia, Koinonia ras Diakonia. Janah perlu siteh tri tugas gereja enda sedigan pe nggeluh ibas diri gereja
            Kerehen Yesus ibas doni enda eme i bas rangka nelamatkan doni enda, bagepe gelah Imago – Dei si lit bas manusia (kita) teridah alu jelas. Janah dahin keselamatan e nggo iendesken man gereja, termasuk man GBKP. Janah adi kita ngerana kerna GBKP, berarti kita ngerana kerna dirinta sendiri selaku gereja situhu-tuhu. Sebab gereja eme persadan kalak si tek siidilo jadi sikerajangenNa, janah Yesus Kristus takalna. Bagepe ibas rangka nehken keselamatan ibas doni enda gereja (kita), lalap ipelimbarui ibas Kesah Si Badia gelah gerejaNa jadi sira ras terang ibas doni enda. Dahin gereja eme ibas rangka mproklamirken nilai-nilai Kerajaan Dibata si teridah ibas Yesus Kristus eme keleng ate, berpihak nandangi kalak miskin, lemah ras kalak siipinggirken gelah incidahken kebenaren ras keadilan (band. Pokok-pokok pengakuan iman GBKP tentang Gereja, hal. 14).
            Gereja GBKP, arus tuhu-tuhu ndahiken dahin Tuhan, emaka program-program pelayanan arus tuhu-tuhu teridah ras irealisasiken. Janah gereja nggo ibereken Tuhan kuasa guna ndahiken dahinNa. Alu bage subuk anggota runggun /gereja bagepe doni enda banci nggejapken kerna keleng ate Tuhan, ras nggeluh ibas keselamatan. Program gereja ku bas eme, kita arus mengunjungi kalak sakit, senina turangta si lit ibas penjara, ndahi kalak sierceda ate, perkunjungan rumah tangga,  er – PI, bagepe nggit nggeluh ibas persadan alu ersembah man baNa ras lit pembinaan nandangi anggota runggun, nampati kalak miskin,  rsd. Program keluar, kita arus mpekena-kena lingkungen inganta tading, ula ikut ibas pendilo doni enda eme KKN, penindasan, judi, penyalagunaan Narkoba, rsd. Emaka kalak sindahiken dahin Tuhan, tentuna ndatken pasu-pasu ibas Tuhan nari, sebab ngena ate Tuhan kalak situtus (band. Invocatio). Emaka arus siinget ibas ndahiken dahin Tuhan, lit pengurbanan waktu, tenaga, ras keuangan. Bagepe, ula min  ibas kita ngelai erkiteken lit arapen-arapen doni.
            Ndahiken dahin Tuhan arus alu saber ras meteruk ukur ras tek man kuasa Tuhan, sebab ibas kuasaNa, ibas Kesah Si Badia kita itemaniNa, gelah banci berhasil ibas kerina pelayanenta.

Pdt. Steven Kumenit, STh.M.Min.