Kamis, 25 Agustus 2016

Tema : Kiniulin Tinepa Dibata (Mazmur 104:1-35)



PERPULUNGEN JABU-JABU
GEREJA GBKP
TANGGAL 28 AGUSTUS – 3 SEPTEMBER 2016.
Mazmur 104 :1-35.

Tema : Kiniulin Tinepa Dibata.

LATAR BELAKANG
1.      Sijadi oratenta sendah eme “kekaguman” pemazmur kerna tinepa Dibata, emaka ibas kinitekenna pemazmur ngerana kerna tinepa Dibata alu bahasa puisi.
2.      Pemazmur  nuriken kerna kuasa Dibata sinjadiken doni ras kerina isina, janah tinepa Dibata enda la saja mejile tapi kerina lit fungsi ras maknana. Kerina tinepa Dibata iatur khusus guna kebutuhen tenepaNa. Erkiteken sie me kerina patuh man Tuhan.
3.      Pemazmur ngajuk man tendina gelah muji Tuhan. Palas muji Tuhan eme erkiteken Dibata e mulia, emaka ate pemazmur kidekah geluhna rende atena man Tuhan. Janah pengarapen pemazmur gelah puji-pujinna ialoken Tuhan.
4.      Ibas pemazmur  ngataken kerna uga jilena tinepa Tuhan, bagepe Dibata jine sinjadiken kerina e, maka ate Dibata ngataken man manusia, la lit Dibata si deban si seri ras Dibata siisembahna. Bagepe la lit Dibata sideban ntah tan manusia siikut muat bagin ibas Dibata njadiken doni ras kerina isina. Emaka Dibata sinjadiken doni ras kerina isina e siarus isembah.
5.      Kerina siitepa Dibata mejile.erkiteken sie ipindoken pemazmur gelah Dibata ngkernepken kalak perdosa ras kalak jahat. Sebab erkiteken kalak perdosa ras kalak  jahat me maka kiniulin Tuhan e banci ceda. Kalak perdosa ras kalak jahat la ngergai tinepa Tuhan ras la mehamat man Tuhan, erkiteken sie la ia mbiar erbahan sijahat i lebe-lebe Tuhan, khususna ncedai kai singgo ibahan Tuhan. Ibas cedana tinepa Tuhan maka mpengaruhi kai singgo iaturken Tuhan man tinepaNa.

APLIKASI
            Adi siperdiateken kerna tinepa Dibata, janah sibandingken kai siikataken ibas kejadin 1, maka dat kesimpulan, kerina tinepa Dibata mejile. Janah kerina tinepa Dibata  saling berhubungan sada ras sidebanna. Enda ibahan Dibata gelah kita manusia banci nggeluh ibas doni enda, dat kebutuhen guna nggeluh ibas tinepa Dibata nari. Tapi kegeluhen manusia la terjeng e saja, tapi tugas manusia (kita) eme njaga ras ngusahai tinepa Dibata e (band. Kejadin 1:28).
            Kiniulin tinepa Dibata arus arus sikataken bujur, sebab Dibata siisembah kita e, Dibata sierkuasa ras Dibata siperkeleng. Arah tinepaNa kita banci nggeluh. Tapi pengataken bujurta man Tuhan, la saja terjeng perkatan, tapi arus arah perbahanan. I ja kita arus njaga ras melestarikan tinepa Tuhan si mejile e. Tapi siidah nterem denga kita si la nggit njaga tinepa Dibata simejile e, sebab lit denga penebangan-penabangan kayu i karangan secara liar (ilegal loging), mbuang sampah sembarangan, rsd. Situhuna perbahanen sibage eme perbahanan sila mbiar man Tuhan. Erkiteken sie me tugas ras tanggungjawabta eme ertoto man Tuhan gelah Tuhan mpersingeti ia, gelah ngadi ibas perbahanen sibage. Bagepe arus pang kita ngataken man senina turangta gelah ula nari erbahan si la mehuli, sincedai tinepa Tuhan. Sebab adi mpediat senina turangta tetap ncedai, bagepe la lit tanggungjawabta njaga tinepa Tuhan, maka kita sirugina, sebab sada paksa terjadi banjir, persediaan lau  berkurang, janah banci ka keri, bagepe lapisan oson singgo bocor banci ergalangna, alu bage panas matawari lanai lit penghalangna, sierbahanca ngisa kita tading ibas doni enda. Jadi guna njaga kiniulin Dibata arus lit tanggungjawabta, bagepe kegeluhen simbiar man Tuhan.

Pdt. Steven Kumenit, STh.M.Min.

Rabu, 17 Agustus 2016

Rukur Ras Erdahin Guna Kiniulin Bangsa (Nehemia 2:1-18)



PERPULUNGEN JABU-JABU
GEREJA GBKP
TANGGAL 21 – 27 AGUSTUS 2018
Nehemia 2:1-18.

Tema : Rukur Ras Erdahin Guna Kiniulin Bangsa.

LATAR BELAKANG
1.      Erkite-kiteken kinilasetiaan bangsa Yehuda man Tuhan, maka ipake Tuhan bangsa babel guna ngukum bangsa Yehuda. Emaka ibas tahun 586 SM, reh kerajaan Babel nyerang bangsa Yehuda. Kuta Yerusaem sontar, pintu-pintu gerbang keri ipan api, bagepe nterem kalak Yehuda ibaba ku Babel jadi tabanan. Tapi kenca idah Tuhan nggo bias bangsaNa nggeluh ibas taneh pembuangen i Babel, maka ipekeke Tuhan ukur raja Persia eme Kores, emaka ibahanna surat ras iogena ibelang-belang kerajaanna. Surat e ngataken gelah bangsa Yehuda nggo banci mulih ku Yerusalem ras mbangun rumah pertoton (Esra 1:1-4). Tapi pembangunan kuta Yerusalem, rumah pertoton, bagepe  tembok ras gerbang Yerusalem la bagi siniharapkan, melala kendala-kendala, termasuk lit bangsa isekelewet bangsa Yehuda megombang man bangsa Yehuda.
2.      Ibas palas enda me Nehemia sekalak kalak Yehuda sidahinna juru minum raja Artaserses, raja Persia, apai ka kenca ibegina arah seninana eme Hanani kerna keadaan kuta Yerusalem tuhu-tuhu ceda kal ate Nehemia, janah enda teridah ibas ayona. Ayo Nehemia serbut kal. Emaka tupung Nehemia ngelai, idah raja ayo Nehemia serbut, emaka isungkun raja ia, janah ijabab Nehemia kerna situasi ras keadaan senina turangna, bagepe kuta Yerusalem si ceda. Janah mindo ijin Nehemia man raja, adi banci raja mereken ijin man bana guna mulih ras pekena kuta Yerusalem. Kenca isungkun raja piga dekahna Nehemia i Yeruslem guna mbangun kuta, minter ibere raja ijin, bagepe ibereken raja surat pengantar guna gebernur ras penjaga kerangan. Kerina enda ibas rangka nampati pembangunan kuta ras tembok Yerusalem si ceda.
3.      Tangtangna mbiar Nehemia tupung isungkun raja kerna ayo Nehemia si serbut. Bagepe ibas rangka mpeseh sura-surana guna mbangun kuta Yerusalem, tembok Yerusalem ras pintu-pintu gerbang. Sebab nggo pernah ipengadi raja pembangunan tembok Yerusalem ras pintu-pintu gerbang. Alasan ipengadi eme adi nggo kenca terbangun tembok Yerusalem ras pintu-pintu gerbangna, maka bangsa Yehuda nggo lit sada pertahanan simegegeh ras banci memberontak man kerajaan Persia. Sebab tembok ras pintu gerbang salah sada sentral ibas kegeluhen bangsa Yehuda. Mbiar Nehemia adi ipesehna kari sura-surana, banci saja nembeh ras merawa raja man bana. Erkiteken sie ertoto Nehemia man Tuhan. Kenca ertoto Nehemia maka ipesehna sura-surana e. Kenca ibegi raja, maka ibere raja pemindon Nehemia.
4.      La saja raja simereken ijin, tapi pe ratu. Sebab peranan ratu raja cukup penting ibas pengambilan keputusan raja. Banci saja erkiteken keleng kal raja man ratu, maka keputusan raja ipengaruhi ratu. Tapi ijin Nehemia guna mbangun kuta Yerusalem ibere ijin ratu pe.
5.      Kenca seh Nehemia i Yerusalem minter isiarina kuta Yerusalem, janah rukur Nehemia uga carana mbungun kuta Yerusalem e. Kenca sie minter ikatakenna man senina-seninana, man imam-imam, pemimpin-pemimpin, pegawai-pegawai ras man kalak sideban siatena juat bagin ibas dahin. Kerina ikataken Nehemia. Lit dua hal siikatakenna e me 1). Nehenlah uga susahna genduari sebab lenga ipekena gerbang ras Tembok Yerusalem, emaka marilah sipekena. 2). Kerina dahin enda erkiteken Tuhan sinampatisa.

APLIKASI
            Tanggungjawab mbangun kuta ras bangsa Indonesia la saja tanggungjawab pemerintah, tapi tanggungjawab kerina anak bangsa, termasukkita. Memang payo lit pemerintah, tapi kita kerina arus ras-ras ertanggungjawab mbangun bangsa.
            Bangsa Indonesia melala denga man pekenan ras i bangun, gelah tuhu-tuhu bangsa Indonesia jadi bangsa simaju ras makmur. Bagepe kegeluhen anak bangsa, nggeluh alu sejahtera. Emaka siarus lit man banta eme rasa memiliki bangsa Indonesia, ras lit penggejapen bas pusuhta ceda ateta ngenen keadaan bangsanta e ibas situasi ras kondisi negara Indonesia. Sebab melala siterjadi ibas bangsanta, sisearusna min la lit man banta selaku bangsa si nggo merdeka eme kinilaadilen, penindasan, supremasi hukum sikurang, KKN lit denga, rsd. Emaka selaku gereja, kita arus nggeluh bujur ras nggit ikut muat bagin ibas pembangunan, la saja terjeng rukur tapi nggit erdahin. Sebab perlu siteh, adi mehuli bangsanta, maka kita ka sinanamisa si mehuli e.

Pdt. Steven Kumenit, STh.M.Min.

Senin, 15 Agustus 2016

Bapa Si Melias (Lukas 15:11-24)



KHOTBAH TANGGAL 21 AGUSTUS 2016.
GEREJA GBKP
Invocatio :    Untung kap anak si erbapaken kalak bujur, dingen si ndalanken perbahanen si bujur (Kuankuanen 20:7).
Ogen        :    Kejadin 13:1-12 (Tunggal).
Khotbah   :    Lukas 15:11-24 (Tunggal).
Tema        :    Bapa Si Melias

LATAR BELAKANG
1.      Sijadi bahan khotbahnta sekali enda eme sada perumpaan siibahan Yesus guna njabab sada komplen ntah pe jungut-jungut kalak parisi ras guru-guru agama tupung Yesus kundul ras kalak perdosa, bagepe  man ras-ras (ayat 3).
2.      Ate Yesus arah perumpamaan enda, ngataken tuhu si ras Ia eme kalak perdosa, tapi labo berarti arus i “jauhi ntah pe arus ihindari” tapi arus ialoken, sebab tupung kalak perdosa megiken pengajaren Yesus,e ngatakenca ia nggo jera ras mulih ibas persadan ras Tuhan. Memang perlu siteh, man kalak Parisi ras guru-guru agama kalak perdosa igolongkan ibas golongan najis, emaka la banci ndeher ras kalak perdosa.
3.      Perumpamaan anak si bene enda, ngataken maka tuhu ia nggo nila erkiteken kerangapenna kerna erta, tapi situhuna erta ras kerangapan la mbaba kesenangen si rasa lalap. Bagepe erta ras kerangapan sipatna sementara saja. Bagepe nggeluh i luar Tuhan la mbaba keriahen tapi kiniseran.
4.      Bapa siperkeleng ras si melias eme mereken kehendak bebas man anakna, janah, Amin gia anakNa nggo erbahan salah, tapi erkiteken nggo jera ras nggit mulih, tetap ialo-alo bapana. Janah meriah ukur bapana erkiteken sadar anakna kerna kesalahan siibahanna. La lit penghukuman ibas bapa nari. Erkiteken sie me meriah ukur bapana, maka ibahan bapa sada pesta, bagepe ibere bapa uis simejilena, bagepe sada cincin ras sepatu man anakna. Cincin ngataken maka anak e ndatken sada kedudukan si meganjang ibas keluarga. Bagepe sepatu ngataken anak e sebagai sada keluarga, la budak. Sebab biasana adi budak la ersepatu.
5.      Kiniseran siinanami anak singuda la erbahanca ia putus asa, tapi sadar ia, maka i rumah bapana melala pangan sibanci ipanna, emaka reh ia ku rumah bapana, janah nina aku nggo erdosa man Dibata ras ersalah man bandu. Ibas penggejapan erdosa ras ersalah enda me, erbahanca meriah ukur bapana, sebab sadar anakna kerna dosa ras kesalahanna.

APLIKASI
            Tuhan siisembah kita eme Tuhan siperkeleng ras melias. Enda teridah tupung kita nggeluh ibas dosa, tetap denga Tuhan ndarami kita gelah kita mulih kempak Ia. Perbahanen Tuhan simbelin eme reh Ia ku tengah-tengah doni enda jadi seri ras manusia, janah erdahin Ia ibas rangka keselamatan manusia. I uruk Golgota mpersembahken diriNa gelah kita terkelin.
            Genduari kita nggo nggeluh ibas keterkelinen, tapi tetap sigejap lit denga salah ras dosa siibahan kita sisengaja ntah la sengaja i lebe-lebe Tuhan, Bapanta si melias e. Tapi amin bage gia, Bapa Si Melias e tetap denga mereken kesempaten man banta, gelah kita banci rukur mulihi kerna salah ras dosanta e, jenari jera kita ras mulih ku Bapa. Perlu siteh Bapa tetap ngalo-ngalo kita, janah meriah ukurNa ngalo-ngalo kita sijera ras nggit robah.
            Minggu enda minggu Mamre. Emaka piga-piga biak Bapa si melias eme Bapa sirembang tengah adi lit anakna rubat (band. Ogen). Bagepe nggit mengampuni adi lit anak erbahan salah ras mindo maaf. Termasuk nggit mindo maaf adi kita (bapa) sisalah. Bagepe mereken kesempatan man anak milih masa depanna, termasuk pendidikan ras pendahin anak.
            Perlu siteh isekelewetta melala sibanci erbahanca anak nggeluh ibas perbeben ras kiniseran. Genduari uga carana gelah perbeben ras kiniseran banci menyadarkan anak gelah nggeluh ibas keleng ate Tuhan, la nggeluh ibas dosa. Tentuna enda mulai ibas pendidikan agama keluarga, khususna bapa (Ulangan 6:7; Kuan-kuanen 19:18). Bagepe pendidikan non formal, eme bapa jadi teman nandangi anak ras perbulangan nandangi ndehara ras jadi bapa man anak.
Bagepe gelah bapa e jadi bapa si melias, maka sipaling penting man Mamre eme mbiar ras erkemalangan man Tuhan, sebab melias merupakan bagin ibas nggeluh ibas kepentaren.

Pdt. Steven Kumenit, STh.M.Min.

Rabu, 10 Agustus 2016

Ku Begi Pertangis Bangsangku (Keluaran3:7-17)



PERPULUNGEN JABU – JABU
GEREJA GBKP
TANGGAL 14 – 20 AGUSTUS 2016.
Keluaren 3:7-17.

Tema : Ku Begi Pertangis Bangsangku.

LATAR BELAKANG
1.      Bangsa Tuhan nggo cukup ndekah tading i bangsa Mesir, mulai zaman Jusup nari. Janah  tangtangna kegeluhen bangsa Tuhan i Mesir nggeluh alu mehuli ras dame, tapi kenca erkuasa sekalak raja si la meteh sitik pe kerna sejarah Jusup ibas bangsa Mesir, maka mulai je nari bangsa Tuhan nggeluh ibas kiniseran. Sebab nina nggo nterem kalak Israel i Mesir, maka isuruhna kalak Israel jadi budak, erdahin i kuta-kuta pitom ras Ramses guna majekken bangunan-bangunan ras erdahin bas juma. Bagepe isuruh raja man kerina bidan-bidan i Mesir adi tubuh anak dilaki ibas diberu kalak Israel nari, minter ibunuh (band. Kel.1:8-16). Tangis tuhu-tuhu kalak Israel erkiteken kiniseran siinanamina e.
2.      Tangis kalak Israel seh ku Dibata, emaka idiloNa Musa guna jadi perpanjangan tanNa guna ngadap man raja Firaun, gelah raja Firaun banci pelepas kalak Israel ndarat ibas taneh perbudaken nari, ku tanah Kanaan. Tanah siipadankan Tuhan man nini-nini kalak Israel guna iiani. Taneh si sampur dadih ras tengguli.
3.      Lit perbeben man Musa ibas ngaloken dahin siibereken Tuhan man bana eme : a). Musa nggejapken la lit erganana ia i lebe-lebe raja Firaun. Tapi ipetetap Tuhan ukur Musa alu ngataken, Tuhan ras ia. b). La tek kalak Israel man Musa, kerna pendilo Tuhan guna mbebasken bangsa Israel. Ipetetapken Tuhan ukur Musa alu ngataken, kataken man kalak Israel, Aku Dibata nini-ninindu eme Dibata Abraham, Isak ras Jakup sinuruh aku njumpai kam.
4.      Ibas ingan simeganjangna, Tuhan megiken penderkuh ras pertantangis bangsaNa. Emaka nusur Tuhan guna mbebasken bangsaNa. Tuhu-tuhu la ate Tuhan bangsaNa itindes bangsa si deban ras nggeluh ibas kiniseran. Pembebasen siate Tuhan mbereken man bangsa Israel, gelah bangsa Israel banci nggeluh alu teneng ras dame, bagepe banci ersembah man Tuhan alu meriah ukur.
5.      Pembebasan si irencanaken Tuhan man bangsa Israel erkite-kiteken, la ate Tuhan bangsaNa nggeluh ibas kiniseran. Bagepe, ate Tuhan naruhken ku ingan si kin nggo ipadankenNa man Abraham.

APLIKASI
            Secara universal banci sikataken, bangsa Indonesia eme bangsa Tuhan. Tuhan simbebasken ras memerdekaken bangsa Indonesia ibas bangsa si deban nari. Emaka pemerintah pe eme wakil Tuhan ibas doni enda (band. Roma 13:1).
            “Ku Begi pertangis bangsangKu”. Tema enda ngataken, maka Tuhan siisembah kita eme Tuhah simperdiateken bangsaNa. La ate Tuhan bangsaNa nggeluh ibas kiniseran. Bagepe ibas Tuhan megi pertangis bangsaNa, maka minter Tuhan erdahin guna mereken serpang pula man bangsaNa. Erkiteken sie, sipaling penting man bangsaNa eme tek ras patuh man Tuhan saja. Adi bangsaNa (kita), megiken kataNa ras ndalanken kebujuren, keadilen ras sikeleng-kelengen. Rsd, maka ibas kita ndatken perbeben ras kiniseran,pasti Dibata reh nampati kita.
            Bangsa Indonesia nggo merdeka ras nggo berumur 71 tahun. Tapi siidah melala denga man pekenan. Subuk pembangunan si lenga merata, hukum si rayo-ayo denga, bagepe lit denga penindasen, rsd. Enda kerina ngataken maka bangsa Indonesia lenga merdeka secara universal.
            Teklah kita, ibas perdalanen berbangsa ras bernegara, nggo ibegiken Tuhan penderkuh bangsaNa. Emaka adi sinen genduari, nggo mulai kalak sierbahan penindasen, bagepe mpraktekken kegeluhen si la adil, nggo mulai dat hukumen ibas pemerintah nari. Emaka siarus lit man banta eme, ibas perbeben ras kiniseran, kita arus tenang ras megenggeng, janah tetap ertoto gelah Dibata simasu-masu bangsa Indonesia.

Pdt. Steven Kumenit, STh.M.Min.