Jagai Kulandu (Amsal 23:19-21; 1 Korintus 6:19-20).

PERPULUNGEN JABU-JABU

GEREJA GBKP

TANGGAL 7 – 13 AGUSTUS 2016.

Kuan-Kuanen 23:19-21; 1 Korinti 6 :19-20.

Tema : Jagai Kulandu.

LATAR BELAKANG

A.    Kuan-Kuanen 23:19-21.

1. Sada kata ajar kalak pentar nandangi anak, khususna anak kalak Israel. Tujun kata ajar enda gelah anak-anak banci nggeluh ibas keselamatan. Emaka gelah selamat maka siarus iperdiateken eme lagu langkah tep-tep wari, ntah pe perdalanen geluh. Sebab ibas isekitar kegeluhen manusia melala si la mehuli si banci saja adi la megermet anak-anak ndabuh ku bas kejahatan. Erkiteken sie me kohelet (pengamsal) mpersingeti gelah jadilah kalak pentar. Gelah jadi kalak pentar maka aus erkemalangan man Tuhan (band. Kuan-Kuanen 1:7). Kepentaren banci pebetehken man anak-anak uga searusna nggeluh selaku anak-anak Dibata, si arus tetap nggeluh bersih ras badia.
2. Siarus ihindari anak-anak eme mabuk ras merangap. Janah biak enda lit man kalak jahat. Emaka ula pertemani kalak jahat. Ilarang anak-anak kalak Israel pertemani ras kalak jahat, gelah ula terikut biak-biak kalak jahat. Sebab adi terikut maka siilakoken eme mabuk ras merangap. Enda ngenca siipikirkenna. Alu bage lanai nggit erdahin. Padahal gelah tercukupi kebutuhen ekonomi keluarga arus lit etos kerja. Jadi arus erdahin. Tapi erkiteken pikiren ipengaruhi alkohol bagepe rangap, maka la nai nggit erdahin. Biak bagenda erbahanca jadi kalak musil ras lanai ergonce.
3. Tujun kata ajar enda gelah anak-anak kalak Israel nggeluh erkemalangan man Tuhan ras praktekken nggeluh erkemalangan man Tuhan ibas kegeluhenna tep-tep wari. Alu bage anak-anak kalak Israel tetap nggeluh ibas keselamatan, sebab terhindar ia ibas kegeluhen si la mehuli.

B.     1 KORINTI 6:19-20.

1. Perpulungen Korinti salah ngertiken  kerna teologi kemerdekaan siisehken Paulus man perpulungen Korinti. Akapna adi nggo merdeka berarti bebas ngelakoken kai pe, termasuk erlua-lua. Erkiteken sie nggo lit perpulungen erlagu la mehuli. Erkiteken sie Paulus mereken sada pengertin kerna kula. Kula manusia eme rumah pertoton Kesah Sibadia.
2. Kula manusia simerupaken kalak si tek man Yesus Kristus eme sada ikaten sila terpisahken ras Yesus Kristus, sebab Yesus Kristus eme Takal, janah kalak si tek eme kula. Janah enda kerina erkiteken keleng ate Tuhan man manusia. Keleng ateNa icidahken tupung i kayu persilang. I kayu persilang kalak si tek nggo i tukur alu meherga. Emaka kula manusia sitangtangna la badia, nggo ipebadiakan Tuhan. Emaka ula nari perpulungen erbahan si la mehuli eme erlua-lua. Sebab kula kalak si tek nggo jadi rumah Kesah Sibadia. Ibas perpulungen njaga kebadiaan kula maka alu sendirina perpulungen nggo mpermuliaken Tuhan.

APLIKASI

            Kulanta eme meherga sebab itebus alu erga simeherga arah pengurbanen Yesus Kristus i kayu persilang, i uruk Golgota. Bagepe kulanta enda nggo ibersihken ibas dosa nari, emaka kulanta enda nggo badia. Emaka arus sijaga kulanta enda gelah tetap bersih ras badia.

            Perlu siteh doni enda sanggup mereken kesenangen-kesenangen man banta, termasuk kesenangen kula. Tapi enda kerina la saja kesenangen sesaat, tapi erbahan kulanta enda jadi melket. Adi nggo melket berarti kita nggo erdosa. Adi nggo erdosa berarti lanai lit inganta ibas surga (band. Roma 6:23), pala kita ngaku dosa ras jera, jenari nggeluh bersih ras badia.

            Ibas Tuhan mbersihken kulanta, maka alu sendirina kulanta enda nggo badia, sebab Kesah Si Badia nggo ringan ibas kulanta. Erkiteken Kesah Si Badia nggo ringan bas kulanta, maka searusna min subuk ukur bage perbahanen siibahan kita eme guna kemuliaan Tuhan. Sebab Kesah Si Badia singerajai kulanta enda. Kesah Si Badia singajari kita guna ngelakoken kai singena ate Tuhan. Emaka gelah tetap bersih ras badia kulanta enda, arus sipediat Kesah Si Badia erdahin, janah siikuti kai siikataken Kesah Si Badia. Ibas kita mpediat Kesah Si Badia erdahin, maka kita nggo jadi kalak pentar. Janah perlu siteh kegeluhen kalak sipentar eme mbiar ras erkemalangan man Tuhan. Kalak pentar ngangkai maka kegeluhenna, bagepe kula enda guna kemulian Tuhan. Emaka kegeluhen kalak pentar, lalap nggeluh megermet, sebab siteh, ibas doni enda melala siding-siding iblis sibanci nirangken kita ras Yesus Kristus selaku takal kula.

Pdt. Steven Kumenit, STh.M.Min.