Gereja Ras Diakonia (Matius 25:31-46)

PERPULUNGEN JABU-JABU

GEREJA GBKP

TANGGAL 23 – 29 OKTOBER 2016.

Matius 25 : 31-46.

Tema : Gereja Ras Diakonia.

LATAR BELAKANG

1.      I uruk Seton Yesus mereken sada gambaran kerna wari pendungi man ajar-ajarNa. Ibas wari pendungi pagi, reh Yesus i Surga nari ku doni enda selaku raja  ras kundul ibas kursi kinirajaanNa guna ngakimi manusia. Emaka manusia ibas doni enda ibagi jadi dua terpuk pagi, janah iandingken bali ras permakan nerapken biri-biri ras kambing. Biri-biri arah kemuhen, kambing arah kawes.

2.      Terpuk biri-biri si lit ibas kemuhen ndatken pasu-pasu, emaka nggeluh ibas kinirajaan surga, tapi kambing si lit ibas kawes, nggeluh ibas penghukumen i api si la ernimpet-nimpet.  Alu bage gambaran kerna wari pendungi enda, merupakan penggenapan ibas perkatan Yesus man ajar-ajar tupung Yesus ras ajar-ajar i daerah Kesarea, Filipi (band. Matius 16:27).

3.      Kalak siipasu-pasu saja si bengket ibas kinirajan Surga. Kalak sindatken pasu-pasu erkite-kiteken idalankenna perbahanen-perbahanen singena ate Tuhan, khususna mpraktekken kekelengen alu nampati kalak si deban alu la ngarapken upah ras ngenen latar belakang keluarga. Penampatna erpalaskan pusuh si ersuruh. Tapi sebalikna, si la ngelakoken perbahanen si mehuli eme kekelengen nandangi kalak sideban simbutuhken penampat ndatken penghukumen ibas Tuhan nari, sebab ia egois.

4.      Perbahanan nandangi kalak simbutuhken penampat, merupaken perbahanen singelai Yesus. Sebab kalak siimarginalkan (terpingirkan, la diate kalak), bagepe sisakit, simanjang-anjang, si lit ibas penjara, rsd sindalankan kata Dibata eme senina Yesus.

5.      Alu mbages, ituriken Yesus kerna perbahanen simehuli siicidahken alu meriah ukur ras la pekulah-kulah man senina Yesus, berarti kita nggo ngelakoken perbahanen simehuli man Yesus sendiri. Alu bage lit persadan si la terpisahkan ibas kegeluhen Yesus ras seninaNa.

APLIKASI

            Salah sada tugas gereja eme Diakonia. Diakonia eme tanda gereja nggeluh ibas keleng ate man warga gereja ntah ise gia simbutuhken penampat. Ibas nehken kekelengen (diakonia), gereja la banci rayo-ayo. Bagepe ibas gereja nehken diakonia, maka singaloken diakonia e banci nggejapken kerna keleng ate Tuhan seh man bana. Alu bage ngataken bujur ia man Tuhan.

            Ibas tata gerejanta ngataken maka sebagian besar agaran pelayanan gereja, subuk perencanaan bagepe realisasi arus igunaken ibas pelayanan kekelengen. Alu bage ngataken maka penting kal diakonia ibas pelayanan gereja.

            Memang adi siidah pelayanan diakoninta sedekah enda, sebagin besar masih bersifat diakoni karitatif, eme diakoni man kalak sakit, ceda ate, sindatken musibah, rsd. Padahal kita nggo banci ngelaksanakan diakonia tranformatif, eme diakonia sibanci mereken serpang pulah nandangi kalak si nggeluh ibas perbeben. Bagepe gelah ia banci nggeluh mandiri.

            Perlu siinget ibas kita nehken pelayanan diakoni, berarti kita nggo ngelai Yesus. Alu bage kita banci nggeluh ibas surga, sebab ipasu-pasuNa kita.

Pdt. Steven Kumenit, STh.M.Min.

Mbungkar Ras Mpekena Perbahanen Si La Payo (Yeremia 1:10-19)

KHOTBAH MINGGU TANGGAL 23 OKTOBER 2016

GEREJA GBKP

 Invocatio   :    Enda me sabapna maka la kami erleja-leja dingen la lesek ate kami. Aminna pe kula kami enda reh burukna reh dekahna, tapi ukur kami tep-tep wari ipelimbarui (2 Korinti 4:16).

Ogen          :    Epesus 4:23-31 (Responsoria)

Khotbah     :    Jeremia 1:10-19 (Tunggal).

Tema          :    Mbungkar Ras Mpekena Perbahanen Si La Payo.

LATAR BELAKANG

1.      Bangsa Yehuda eme bangsa Tuhan, siidilo guna jadi alatNa, bagepe siarus patuh man Tuhan ngenca. Tapi ibas kinatana bangsa Yehuda nggo nggeluh erbana-bana. Bangsa Yehuda nggo nundalken Tuhan, mpersembahken persembahen-persembahen man dibata-dibata sideban, erbahan gana-gana ras ersembah man gana-gana. Tuhu-tuhu bangsa Yehuda nggo ngelanggar pedah 1 ras 2 ibas sepuluh pedah Dibata. Emaka bangsa Yehuda nggo erbahan dosa. 

2.      Ibas situasi ras keadaan bangsa Yehuda sibage rupana, Tuhan ndilo Yeremia, anak imam Hilkia siringan i kuta Anatot i negeri Benyamin jadi nabi. Jenari amin gia Jeremia nguda denga tapi ibereken Tuhan kuasa nandangi bangsa-bangsa ras kerajaan-kerajaan lako mbungkarken dingen ngeruntuhken, lako ngkernepken dingen ngeradasken, lako manteki dingen nuan. Ibas erti kata, Jeremia arus mpeseh sura-sura Tuhan man bangsa Yehuda eme ate Tuhan nghukum bangsa Yehuda, tapi kenca sie Tuhan mereken pemulihen ras mbangun mulihi bangsa Yehuda gelah jadi bangsa sierkemalangen man Tuhan.

3.      Ope denga Jeremia erdahin selaku nabi, lit dua pengenehenen siibereken Tuhan man bana, eme ciken kayu ketapang, simerupaken simbol  rencana Tuhan nandangi bangsa Yehuda. Pohon ketapang eme pohon sileben bersemi (ertunas) ibas musim semi. Pengenehenen sipeduaken eme i utara nari reh me ukumen si luam lako ngukum kerina negeri enda. ertina Tuhan ndilo raja-raja ibas utara nari (Babel) guna ngukum bangsa Yehuda.

4.      Ibas pendilo Jeremia jadi nabi, ibereken Tuhan sada perintah ras ketetapan ukur man Jeremia. Perintah Tuhan eme Jeremia arus mpeseh kai siiperentahken Tuhan man bana. Ola mbiar. Amin gia kerina kalak siringan ibas negeri Yehuda, subuk raja, pegawai, imam-imam ras kerina penduduk, ngelawan Jeremia, sebab Tuhan ras Jeremia. Ugapa pe gegehna “musuh-musuh” Jeremia, erkiteken lit gegeh ras itemani Tuhan ia, maka Jeremia pasti menang. Tapi adi mbiar konsekwensina eme tupung Jeremia i tengah-tengah kalak Yehuda, Jeremia jadi mbiar. Maksudna, tangtangna tuhu Jeremia mbiar ngenen keadaan ras situasi kalak Yehuda si lanai mbiar man Tuhan, sibanci saja kesahna jadi taruhenna. Bagepe erkiteken Jeremia nguda denga. Budaya ras adat kalak Yehuda, “orang tua” (tua-tua) sibanci mereken perentah ras nasehat, labo kalak singuda denga. Emaka sada kearun ate ras kebiaren man Jeremia ibas nehken kata Dibata, la ibegiken kalak. Tapi erkiteken nggo ipetetapken Tuhan ukur Jeremia, i ja Tuhan ras Jeremia, maka Jeremia nggit ras pang. Jadi adi la ndalanken persurehen Tuhan maka reh mbiarna Jeremia tupung i tengah-tengah kalak Yehuda. Janah Jeremia ihina, la iergai ras la ihamati kalak.

5.      Ibas pendilo Tuhan man Jeremia jadi NabiNa, ngataken nembeh ate Tuhan man bangsaNa sierbahan dosa ras lanai nggit megiken kataNa. Emaka penghukumen Tuhan man bangsa Yehuda ibas rangka gelah bangsa Yehuda jadi bangsa si badia ras ersembah man Tuhan saja.

APLIKASI

            Kalak kristen eme bangsa Tuhan (band. 1 Petrus 2:9), janah selaku bangsa Tuhan arus nggeluh badia, bagepe ndalanken kai singena ate Tuhan. Erkiteken sie me kalak kristen nggo ipelimbarui Tuhan arus tetap make manusia simbaru eme Imago Dei (segambar ras Tuhan). Kegeluhen si male arus itadingken, jenari ula nari ngelakoken kai si la ngena ate Tuhan, simerupaken biak manusia si male (band. Ogen).

            Khotbahnta sekali enda eme sehubungen ras reformasi gereja. Perlu siteh, ibas tanggal 31 Oktober 1517, Martin Luther mereformasi gereja Khatolik, situpung sie mereken pemahaman ras pengajaren si papak kerna penghapusan dosa. Penghapusan dosa/pengalemi dosa simerupaken hak preogatif Tuhan, nggo ibuat gereja. Sebab ibas rangka ndatken sen melala, Paus Leo X ras Uskup Agung Albrecht dari Mainz ras ibas rangka pembangunan gedung gereja Santa Petrus i Roma, maka idayaken surat penghapusan dosa/siksa man anggota gereja, ise sinukur surat enda maka ia masuk surga. Ia dua ngenca arih. La ilibatkenna uskup-uskup ras kalak kristen. Martin Luther ibas cerama ras khotbahna menentang sie. Bagepe lit 95 dalil siitempelken Martin Luther ibas pintun gereja Schlosskirche i witterberg. Maksud 95 dalil eme menentang alu mereken landasan teologi sibenar kerna penghapusan dosa. Piga-piga dalil siitulis Martin Luther eme :  1. Paus tidak memiliki kekuatan maupun kuasa untuk mengampuni kesalahan apa pun, kecuali yang telah ia diberikan dengan otoritasnya sendiri, atau oleh peraturan. Tuhan dan Guru kita Yesus Kristus, ketika Ia mengucapkan"Bertobatlah," dan seterusnya, menyatakan bahwa seluruh hidup orang-orang yang percaya harus diwarnai dengan pertobatan. 2. Kata ini tidak boleh dimengerti mengacu kepada hukuman sakramental; maksudnya, berkaitan dengan proses pengakuan dan pelepasan(dosa), yang diberikan oleh imam-imam yang dilakukan di bawah pelayanan imam-imam. 3. Dan, pertobatan tidak hanya mengacu pada penyesalan batiniah;tidak, penyesalan batiniah semacam itu tidak ada artinya, kecuali secara lahiriah menghasilkan pendisiplinan diri terhadap keinginan daging. 4. Jadi, hukuman itu terus berlanjut selama ada kebencian pada diri sendiri - maksudnya, penyesalan batin yang sejati berlanjut: yaitu, sampai kita masuk ke dalam kerajaan surga. 5. Paus tidak memiliki kekuatan maupun kuasa untuk mengampuni kesalahan apa pun, kecuali yang telah ia diberikan dengan otoritasnya sendiri, atau oleh peraturan. 6. Paus tidak memiliki kuasa untuk mengampuni dosa apa pun, kecuali dengan menyatakan dan menjaminnya te1ah diampuni Allah; atau setidaknya ia dapat memberikan pengampunan pada kasus-kasus yang menjadi tanggungjawabnya, dalam kasus tersebut, jika kuasanya diremehkan, kesalahan akan tetap ada. 7. Allah tidak pernah mengampuni dosa apa pun, tanpa pada saat yang sama Dia menundukkan diri manusia itu, merendahkan diri dalam segala sesuatu, kepada otoritas imam, wakilnya. 8. Peraturan pengakuan dosa hanya dikenakan pada orang yang hidup dan tidak seharusnya dikenakan pada orang yang mati; menurut peraturan tersebut. 9. Oleh karena itu Roh Kudus berkarya dalam diri Paus melakukan hal yang baik bagi kita, sejauh dalam keputusannya, Paus selalu membuat perkecualian terhadap aturan tentang kematian dan nasib seseorang. 10. Imam-imam bertindak salah dan tanpa pengetahuan, jika dalam kasus orang yang sekarat, mengganti hukuman kanonik dengan api penyucian.

            Erpalasken reformasi gereja enda, kita selaku gereja arus mereformasi (mulihi ibas kegeluhen si badia – Imago Dei), kerna kai sisedekah enda siakap salah eme perbahanen-perbahanen manusia male (praktek-praktek dosa), bagepe cara kita ersembah man Tuhan. Bagepe ibas sedekah enda ibas muat keputusen BPMR ngenca ntah sekalak ntah dua serayan saja. Kita slaku gereja/bangsa Tuhan arus nggeluh badia emaka ibas pendilo Tuhan man banta, kita arus pang ngataken kerna si la payo, si la benar, la adil, la bujur siipraktekken senina turangta. Tapi dahinta la saja ngataken kerna kesalahan kalak, tapi uga kita banci mpepalem pusuhna, ntah pe banci mereken serpang pulah gelah senina turangta alu meriah ukur ersembah ras ernalem man Tuhan saja. Gelah kita nggeluh badia, la banci 1 ntah 2 kali saja sipeseh kerna dosa ras kesalahan temanta, tapi arus rusur siingetken (band. Invocatio). Jenari kita arus ngataken situhu-tuhu kerna sisalah. Nggo saatna sibereken nakan man anggota perpulungen.  La perlu kita mbiar ibas kita mpeseh kata kebenaren, sebab Tuhan ras kita.  Gelah kita kerina banci ndalanken kata Dibata ibas kerina kegeluhenta tep-tep wari. Lanai bas kita cian ate, perampus, pernembeh, siisak-isaken, sicekurak-cekuraken, ras lanai lit sierelem-elem.  Enda me siikataken ibas temanta Mbungkar ras mpekena perbahanen si la payo.

Pdt. Steven Kumenit, STh.M.Min.

Idilo Guna Jadi Pasu-Pasu (1 Petrus 2:9-10)

PERPULUNGEN JABU-JABU

GEREJA GBKP TANGGAL 16 – 22 OKTOBER 2016.

1 Petrus 2:9-10.

Tema : Idilo Guna Jadi Pasu-Pasu.

LATAR BELAKANG

1.      Sijadi bahan oratenta sendah eme kata pergegeh, bagepe mereken sada pengangkan kerna status kalak sitek man Yesus. Tujunna la saja gelah kalak si tek simerap i belang-belang bagin utara Asia kitik ndatken pergegeh, tapi pe gelah tehna kerna Statusna siberbeda ras kalak si la tek man Yesus Kristus.

2.      Lit piga-piga status kalak si tek man Tuhan eme 1). Bangsa pilihen Tuhan. Nai Dibata nggo milih bangsa Israel jadi bangsa pilihenNa. Genduari ipilih Tuhan kalak si tek man Yesus jadi bangsaNa. Pemilihen Tuhan man kalak sitek jadi bangsaNa, erkite-kiteken ate Dibata kerina kalak sitek man Yesus Kristus jadi anggota simbaru ras ngelambangkan kerajaan Dibata. Emaka selaku bangsa pilihen Tuhan, labo itonjolken kerna negara yang berdaulat ras politikna, tapi sada persadan si tuhu-tuhu tek ras patuh ibas kepemimpinen Tuhan. 2). Imam-Iman Raja. perlu siteh ibas kegeluhen bangsa Israel si banci jadi imam ras melayani man Tuhan eme keturunen Lewi ngenca. Janah siipersembahkan imam eme asuh-asuhen.  Tapi genduari, kenca nggo tek man Tuhan, ijadiken Tuhan kerina kalak sitek jadi imam. Maksudna kerina kalak si tek banci melayani Tuhan ras ndeher man Tuhan, bagepe banci mpersembahkan pujin ras keleng ate nandangi sapih-sapih manusia man Tuhan. 3). Anak-anak Dibata si ipilih guna meritaken perbahanen-perbahanen Dibata simbelin. Kalak si tek man Yesus Kristus nggo nggeluh ibas keluarga Tuhan. Tuhan jadi Bapa, kalak si tek jadi anak. Tapi jadi anak arus ndalanken persuruhen Bapa, eme mberitaken perbahanen Tuhan simbelin. Melala perbahanen Tuhan simbelin, iantarana eme uga Tuhan reh ku doni enda guna nelamatkan manusia. Bagepe Yesus Kristus nggo mate ras keke ibas simate nari, ras lit tanda-tanda sengget siibahan Dibata gelah kita terkelin, rsd.

3.      Petrus mereken sada pengertin, maka kalak si tek nggo nggeluh ibas keselamatan. Nai ope tek man Yesus Kristus, kita nggeluh ibas kegelapan (dosa : perbahanen-perbahanen si langena ate Tuhan). Tapi erkiteken perkuah ate Tuhan, kita nggeluh ibas keselamatan (Terang). Nina Yesus : Aku me Tarng Doni (Yoh. 9:5). Emaka nggeluh ras Yesus berarti nggeluh ibas terang (keselamatan).

4.      Nggeluh ibas terang (keselamatan), berarti arus ndalanken perbahanen-perbahanen Terang (moral/etika). Ibas erti kata kalak si tek man Yesus Kristus la banci ngelakoken praktek-praktek kegelapan, sebab kalak si tek nggo idilo ras nggo nggeluh ibas terang.

5.      Kenca kalak si tek nggo nggeluh ibas terang, maka lit kepentaren bas ia. Alu bage iangkana maka ia banci selamat erkiteken perkuah ate Tuhan.

APLIKASI

            Patut sikataken bujur man Tuhan, sebab kita nggo jadi bangsa pilihenNa ras imam Raja, bagepe jadi anakNa. Kita nggo nggeluh ibas keselamatan. Tapi kita pe arus nggejapken selaku kalak si tek man Tuhan, selaku bangsa pilihen Tuhan, maka kita alu sendirina nggo jadi alatNa guna mberitaken keselamatan i tengah-tengah doni enda. Kita jadi alat pasu-pasu Tuhan nandangi temanta manusia ras doni enda.

            Jadi alat pasu-pasu Tuhan berarti kita arus ngelakoken simehuli singena ate Tuhan. Moral ras etikanta arus mehuli. Keluarganta pe arus mehuli, gelah jadi contoh man kalak sideban. Kita arus pang ngataken sibenar, tuhu ibas paksa ras kalimat sitengteng, gelah kalak sideban lanai nggeluh mpraktekkan perbahanen-perbahanen si la ngena ate Tuhan (kegelapen). Emaka la saja kita singgeluh ibas keselamatan, temanta pe ikut ibas keselamatan. Marilah kita jadi alat pasu-pasu Tuhan.

Pdt. Steven Kumenit, STh.M.Min.   

Tetaplah Erberita (Roma 15:15-21)

KHOTBAH MINGGU TANGGAL 16 OKTOBER 2016.

GEREJA GBKP

Invocatio    :    O TUHAN , i bas perpulungen bangsandu kumomoken, berita si mehuli kerna keselamaten si iberekenNdu. IetehNdu kap e TUHAN , maka la pernah aku ngadi ngerana kerna si e (Mazmur 40:10).

Ogen          :    Mazmur 34:1-15 (Responsoria).

Khotbah     :    Roma 15: 15-21 (Tunggal).

Tema          :    Tetaplah Erberita.

LATAR BELAKANG

1.      Secara umum banci sikatakan perpulungen Roma, labo rasul Paulus simantekisa. Bagepe lit sura-sura simbelin ibas Paulus nari guna reh ku Roma. Emaka sijadi bahan oratenta eme salah sada bagin ibas Paulus mpetandaken dirina ras pelayananna, gelah perpulungen Roma lebih meteh kerna eksistensi rasul Paulus. Alu bage la lit penolakan-penolakan kenca rasul Paulus seh i Roma.

2.      Paulus mpersingeti perpulungen Roma nina erkiteken lias ate Tuhan nggo ngangkat Paulus jadi pejabat Kristus (rasul). Guna jadi imam man kalak si la kalak Yahudi. Perlu siteh, nai Paulus eme salah sada kalak singhambat perkembangan kekristenan, la saja ipenjarakenna tapi pe ibunuhna. Tapi kenca jumpa ras Yesus Kristus ibas perdalanan Paulus ku Damaskus, maka terjadi pertobatan ibas Paulus. Janah Tuhan ngangkat Paulus jadi perberita Si Meriah (band. Perbahanen Rasul-Rasul 9:3-19). Janah Paulus erdahin mberitaken Berita si meriah nandangi kalak si la kalak Yahudi (Band. Galati 1:16; 2:9).

3.      Paulus jadi imam simeritaken Berita simeriah man kalak si la bo kalak Yahudi gelah kalak si labo kalak Yahudi la saja tek man Yesus Kristus, tapi nggeluh bersih. Alu bage enda jadi persembahen singena ate man Tuhan. Iangkat Paulus kata imam, sebab nterem anggota perpulungen Roma kalak kristen asal Yahudi nari. Janah fungsi imam lanai asing man bana. Perlu siteh imam ibas agama Yahudi eme ngelai Tuhan alu njaga gelah ritus-ritus (upacara-upacara agama/ibadah) singgo iatur ibas taurat ipatuhi. Bagepe imam-imam mpersiapken persembahen ras kurban guna Tuhan. Jadi Paulus eme pelayan siertugas nandangi kalak si la bo kalak Yahudi, gelah kalak si la kalak Yahudi banci ialoken Tuhan (selamat).

4.      Paulus sebage imam, berarti jadi serayan Tuhan man kalak si la bo kalak Yahudi, emaka kai siibahan Tuhan man bana, e kang siikataken Paulus ibas nehken Berita Si Meriah. Bagepe ibas nehken Berita Si Meriah icidahken Paulus kata ras perbahanan arus seri, ras pe tanda-tanda sengget kalak si la kalak Yahudi tek man Tuhan, jenari nggeluh ibas keselamatan.

5.      Isingetken Paulus mulihi man perpulungen Roma, ia tetap ibas konsep pelayanan beritaken Berita Si Meriah eme nandangi kalak si lenga pernah megiken gelar Yesus. Gelah Berita Si Meriah banci tersehi ku kerina kuta-kuta. Tujunna gelah kalak si lenga megiken gelar Yesus banci tek ibas pelayanan Paulus ras kuasa Kesah Si Badia simereken gegeh ras kengasupen man kalak gelah tek man Tuhan Yesus Kristus.

APLIKASI

            Temanta sendah Tetaplah Erberita. Enda berhubungen ras minggu Sending. Perlu siteh dahin meritaken Berita Si Meriah (bah. Yunani = Euangelion) eme dahin tep-tep kalak si tek sebab nggo ngaloken kepastin keselamatan ibas Tuhan Yesus. Nina Tuhan Yesus : ingetlah kalak sitek ngenca ngaloken kegeluhen situhu-tuhu si la erkeri-kerin (Yohanes 6:47). Bagepe nina Paulus, kiniteken rehna arah megi Berita e, janah isi Berita e me Kata kerna Kristus (Roma 10:17). Emka uga kalak banci tek man Yesus ras selamat, adi la si beritaken/momoken kerna Yesus eme Tuhan ras Juru selamat manuisa ras doni enda. alu bage dahin gereja, kalak si tek la banci ngadi Erberita Si Meriah.

            Berita si Meriah arus isehken man kerina jelma, janah Berita siarus iberitaken/momoken eme Yesus Kristus eme Tuhan ras Juru selamat manusia. Janah enda berita simehuli.erkiteken sie me ula ngadi Beritaken Berita Simeriah (band. Invacatio). Berita si Meriah ibas rangka keselamatan ras kemalemen ate kalak simegiken Berita Si Meriah, sebab i je serpang pulah adi kita jumpa perbeben, ras lit mujizat-mujizat man banta. Sebab banci saja adi kita sakit, kita banci madan ibas sakit nari.

            Mari sinen kerna tangtangna reh perberita si Meriah ku tengah-tengah kita eme Pdt. H.C Kruyjt (1890-1892) ras Nicolas Pontoh (1890-1906), Pdt. J.K. Winjegarden (1892-1894), guru injil Benyamin Wenas (1891-1899), Johan Pinontoan (1891-1892), Hendrik Pesik (1891-1894), Pdt. Meint Joustra (1894-1900), Pdt. J.H. Neumann (1900-), Pdt. E.J. Van den Berg (1904-1935), Pdt. L. Bodaan (1909-1928). Adi sinen kerina enda Berita Simeriah lalap siberitaken, jenari tersampat kita, la saja kerna soal keselamatan, tapi pe soal kesehatan, pendidikan ras ekonomi. Bagepe siidah perberita Si Meriah tutus kal, emaka semangat enda arus nggeluh bas kita. Erberita Si Meriah la saja terjeng mbangun gereja ntah pe soal fisik, tapi situhuna simendasar eme kiniteken/spiritualitas.

            Tetaplah Erberita la saja terjeng ku darat saja, tapi pe ku bas pe arus tetap. Ibas kita tetap nehken Berita Si Meriah maka kenca ia tek, ia pe ikut ibas nehken Berita Si Meriah, alu bage kita kerina muat bagin ibas Berita Si Meriah. Tapi perlu siinget ibas kita erberita Si Meriah, la saja mberitaken kerna kai siinanami kalak, tapi uga kuasa Tuhan singgo sinanami kita. Jadi lit kesaksin pribadi. Emaka situhuna Erberita bali nge ras kita ersaksi.

            Perlu siteh melala kalak kristen simonce-once kiniteken,  melala perosalan-persoalan bas geluhta, sierbahanca erbeban berat, lit dosa siilakoken kita, bagepe lit kuasa-kuasa kegelapan. Ibas peroalan-persoalan enda, kita arus peseh Berita Si Meriah gelah kerina peroalan banci iampekenna man Tuhan, ras isampati Tuhan kita, alu bage banci kita pulah ibas erbage-bage perbeben ras kiniseran nari, termasuk ialemi Tuhan salah dosanta. Melala cara ras metode ibas nehken Berita si Meriah eme arah PRT, ngerana-ngerana ras temanta, er-PI ku kuta, rsd. Janah perlu siteh pe ibas nehken Berita Berita Si Meriah lit kontek ras jamanna siberbeda, emaka arus sisehken ibas konteksna.

            Ibas kita nehken Berita Si Meriah la saja terjeng kata tapi pe arah perbahanan (band. Ayat 18). Emaka penting bas kita keluarga si harmonis, perbahanen simehuli (Moral/etika). Bagepe siidah  gereja GBKP la saja berita siipeseh, tapi lit perbahanen eme lit pendidikan, diakonia (panti asuhen, Yapos, Alfa Omega), termasuk diakonia tranformatif, bagepe Peningkaten ekonomi jemaat (CU. Bank), kesehaten (lit runggun mbuka klinik), bagepe mberatas pinakit sosial, termasuk Narkoba ras HIV/AIDS.

            Gelah kita banci erberita si Meriah, maka kita arus nggeluh ersada ras Tuhan, bagepe sigejapken pendilo Tuhan man banta eme ibas rangka ndahiken dahin-dahin Tuhan. Emaka gereja arus mpersiapken warga gereja guna mberitaken berita si meriah. Antara lain gereja mpersiapkan wargana eme alu pembinaan, kursus, katekisasi, rsd. Alu bage lit kininggiten ras meriah ukur ndahiken dahin berita si meriah e.

Pdt. Steven Kumenit, STh.M.Min.