Suruh-Suruhen Si La Perlu I Suruh (1 Korinti 6:1-4)

PEKAN PENATALAYAN

GEREJA GBKP

WARI VII, SABTU 23 JANUARI 2016

Invocatio    :    Kam me si pemenana kal ndahiken dahin e, labo saja ndahikenca, tapi pe ukur ersuruh ndahiken dahin e i bas kam me si pemenana turah (II Korinti 8:10b).

Ogen          :    Jesaya 6:1-8.

Renungan   :    1 Korinti 4:1-4.

Tema          :    Suruh-Suruhen Si La Perlu I Suruh.

LATAR BELAKANG

1.      Sijadi bahan perenungenta sendah eme sada apologet/pembelaan Paulus man piga-piga/kelompok singelawan ia. Sebab persoalan si lit ibas perpulungen Korinti, salah sadana eme litna kelompok-kelompok. Lit kelompok kefas, lit kelompok Apolos ras kelompok Paulus. Pengikut-pengikut kelompok enda saling bersaing ras membanggakan diri. Erkiteken sie me lit simeragukan kerasulan ras pendahin Paulus.

2.      Ibas apologet/pembelaan enda alu tegas Paulus ngataken perpulungen arus ngakui kerna eksistensina selaku rasul. Selaku rasul lit wibawana tersendiri khususna ibas ertanggungjawab kerna rahasia Dibata.Selaku rasul dahinna eme ncidahkan kerna rahasia Dibata sue ras sura-sura Dibata, labo erpalaskan kepentaran manusia. Erkiteken sie me perpulungen arus tek kerna pemberitaan Berita Si Meriah siipesehna.

3.      Nina Paulus Penghukuman labo tugas manusia, emaka salah nge adi manusia alu make kepentarenna ngadili ia alu ngataken Paulus la terteki. Erkiteken la terteki maka Paulus la lit hakna mberitaken Berita Si Meriah. Paulus la menyangkal kerna kesalahan. Tapi nina Paulus pelayananna tuhu-tuhu bersih. Janah adi salah, la lit hak manusia singadili ia, tapi Tuhan. Sebab Tuhan ngenca siberhak ngadili ia. Janah pengadilan Tuhan paksa kerehen Tuhan peduakaliken i doni enda. Erkiteken sie nina Paulus ula biasakan ngukum kalak ope denga reh paksana eme ibas kerehen Tuhan peduakaliken.

4.       Paulus ngataken enda gelah kelompok-kelompok si lit ibas perpulungen ula nari rubat erkite-kiteken mengidolakan salah sada rasul, tapi perpulungen Korinti arus ngenen rasul-rasul singelai i tengah-tengah perpulungen eme suruh-suruhen Kristus dingen pengurus erta-erta Tuhan siertanggungjawab kerna rahasia Dibata. Dahin sideban eme gelah perpulungen nggeluh selaku gereja ras bertumbuh ibas kedewasaan kiniteken.

5.      Bagepe ate Paulus gelah perpulungen meteh kerna tanggungjawab manusia ras Tuhan. Tanggungjawab manusia eme megiken pengajaran rasul-rasul kerna rahasia Dibata ras ndalankenca ibas kegeluhenna tep-tep wari. Janah tanggungjawab Dibata eme salah sadana menghukum manusia si ersalah man baNa. Jadi penghukuman eme hak preogatif Tuhan.

APLIKASI

            Ibas pemahaman teologi pelayanan GBKP, kerina kita (warga gereja) eme suruh-suruhen Dibata. Jadi suruh-suruhen Dibata la saja pendeta, pertua ras diaken. Emaka dahin suruh-suruhen eme ndahiken kai siisurah-surahken Tuahnna eme Tuhan.

            Situhuna ngidah perkembangan gereja, khususna gereja GBKP kita enda nggo ikategoriken dewasa. Emaka situhuna selaku gereja si nggo dewasa kita enda nggo ikataken missioner. Adi nggo dewasa/missioner maka nggo siteh kai tanggungjawabta selaku warga gereja eme ngelai guna Tuhan. Sebab melala denga senina turangta subuk i darat perpulungen, bagepe i bas perpulungen siarus man layani. Emaka selaku warga gereja situtus, kita arus erkomitmen muat bagin ibas pelayanan i tengah-tengah gereja.

            Suruh-suruhen Tuhan la perlu isuruh lebe maka idahikenna. Tapi suruh-suruhen Tuhan arus proaktif  ibas pelayanan. Keterlibatan kita penting kal ibas pelayanan, sebab erteremna simuat bagin ibas pelayanan, ernahangna pelayanan ibas gereja. Janah arus siinget, ibas kita ndahiken dahin Tuhan arus erpalaskan keleng ate ras meriah ukur, la banci erkiteken keterpaksaan. Emaka ipasu-pasu Tuhan kita ibas pelayanan. Jenari ibas kerehenna peduakaliken ibas doni enda, idapatina kita la ersalah ras bersih.

Pdt. Steven Kumenit, STh.M.Min.

Ngelai Jesus Alu Kiniliten (“Persembahen Ras Keuangan Gereja). (Lukas 8:1-3)

PEKAN PENATALAYANAN

GEREJA GBKP

WARI VI, JUMAT  22 JANUARI 2016.

Invocatio    :    Alu ukur meriah kupersembahken persembahen man baNdu, dingen ngataken bujur man baNdu, sabap mehuli kap Kam o TUHAN (Mazmur 54:8).

Ogen          :    Mazmur 22:26-32.

Renungan   :    Lukas 8:1-3.

Tema          :    Ngelai Jesus Alu Kiniliten (“Persembahen Ras Keuangan Gereja).

LATAR BELAKANG

1.      Ibas rangka keselamatan manusia ras doni enda, maka reh Tuhan ku tengah-tengah doni enda jadi seri ras manusia eme Yesus Kristus. Bagepe kerina kuasa lit ibas Yesus Kristus. Erkiteken keselamaten e me maka isiari Yesus kota ras kuta. Tujunna eme nehken Berita Si Meriah kerna Kinirajan Dibata, emaka adi lit kalak si tek man baNa maka selamat me ia. Bagepe adi lit manusia sitertaban erkiteken dosa ras erkiteken panakit ibebasken ras ipepalemNa.

2.      Ibas Yesus nehken Berita Si Meriah kerna Kinirajaan Dibata ikut pe ajar-ajarNa, sebab ajar-ajar Yesus khusus ipilih Tuhan guna nampati ia, sekaligus mpersiapkan ajar-ajar guna nehken Berita Si Meriah pagi. Tapi siidah jenda selain ajar-ajar Yesus, lit pe sitek man Yesus eme Diberu-diberu singgo iselamatkan Yesus erkite-kiteken ikuasai setan ras pinakit, eme Maria (si igelari Magdalena), Johana ndehara Kusa menteri Herodes, Susana, rsd. Diberu-diberu enda ngikutken kai siiajarken Yesus alu meriah ukur, sebab sada respon kiniteken man Yesus.

3.      Amin gia tujunna bali ajar-ajar ras diberu-diberu singikutken Yesus, tapi lit sada perbedaan eme adi ajar-ajar memang ipersiapkan guna ngelai pagi, emaka kerina kebutuhenna isikapken Yesus arah pelayanan, tapi diberu-diberu e amin gia  la ngikut Yesus guna ngelai secara langsung  tapi alu meriah ukur isampatina Yesus alu erta-ertana.

4.      Diberu-diberu singgo tek e  tuhu-tuhu nampati pelayanan Yesus alu erta-ertana sebage respon maka ia nggo iselamatken. Memang Yesus eme Tuhan, kerina kuasa lit bas Ia. Situhuna alu kuasaNa e kerina kebutuhen Yesus terpenuhi. Tapi i jenda ipediat Yesus diberu-diberu e nampati Yesus ras ajar-ajarNa  alu erta-ertana. Tujun kerina e gelah manusia mpermuliakan Tuhan la saja arah kata, kula, tapi alu erta pe.

5.      Keselamatan singgo ibereken Tuhan man diberu-diberu e irespon alu totalitas geluhNa, termasuk arah erta.

APLIKASI

            Arus siinget gereja eme kula Kristus. Bagepe gereja idilo Tuhan ibas rangka keselamatan i tengah-tengah doni enda. Emaka kerina kalak sitek simerupaken gereja e sendiri arus ikut muat bagin ibas pelayanan. Pelayanan siibahan kita eme i peken anggur Tuhan eme i doni enda. Jadi pelayananta simerupaken gereja amin gia nandangi manusia ras doni enda, tapi situhuna nandangi Tuhan. Em sebabna nina Paulus erdahin tempa-tempa kam ngelai guna Tuhan, labo guna manusia.

            Pelayanan gereja tentuna arus itunjang alu dana. Sebab alu litna dana, maka program pelayanan ibas gereja banci tersehi. Janah arus siteh pelayanan gereja siertanggungjawab eme ibas warga gereja sendiri. Emaka ipersingeti kita alu tema ngelai Yesus alu kiniliten gelah tanggungjawabta selaku warga gereja arus isehken. Kita arus tutus nehken persembahan. Bagepe selaku organisasi, simengelola keuangan arus makeken keuangan gereja ibas rangka pelayanan,emaka transparan keuangan penting. Alu bage kita kerina tuhu-tuhu ngelai Tuhan. Bagepe kita kerina nggo memuliaken Tuhan alu kiniliten si lit.

Pdt. Steven Kumenit, STh.M.Min

Ngelai Segedang Geluh (Kisah Para Rasul 9:36-43)

PEKAN PENATALAYANAN

GEREJA GBKP

WARI V, KAMIS 21 JANUARI 2016.

Invocatio    :    Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban (1 Korinti 13:13).

Ogen          :    1 Raja-Raja 17:7-16.

Renungan   :    Perbahanen Rasul-Rasul 9:36-43

Tema          :    Ngelai Segedang Geluh.

LATAR BELAKANG

1.      Nusurna Kesah Si Badia la njadiken kalak si tek ngasup ngerana alu erbage-bage cakap Kesah ngenca, tapi pe Kesah Si Badia mpengasup kalak si tek erbahan keleng ate nandangi kalak si deban. Enda me situhuna si ilakoken Tabita/ Dorkas. Tabita siikuasai Kesah Si Badia nggo nampati kalak musil, khususna diberu balu-balu simusil. Penampat siibereken Tabita eme mereken uis (Pakaian).

2.      Kegeluhen manusia lit batasna ibas doni enda, la terkecuali Tabita/Dorkas. Kenca Tabita piga-piga dekah sakit, maka mate ia. Kematen Tabita/Dorkas erbahanca nterem kalak singandung ras erceda ate erkite-kiteken igejapna keleng ate singgo ipeseh Tabita/Dorkas man bana. Kiniulin singgo ilakoken Tabita/Dorkas erbahanca morah ate kalak sideban adi sirang ras ia. Emaka amin gia secara agama Jahudi mait Tabita nggo iperidi janah nggo nandangi ikuburken, tapi lit denga arapan ras sura-sura gelah Tabita/Dorkas enda nggeluh denga.

3.      Petrus siibereken Tuhan kuasa tupung sie lit i Lida, janah erkite-kiteken i Lida lit tanda kuasa siicidahken Petrus alu pepalem si Eneas ibas pinakit lumpuhna nari, janah perbahanen enda nggo mbar seh ku Jope, emaka ajar-ajar Tuhan si lit i Jope nuruh gelah 2 kalak lawes ngelegi Petrus.

4.      Kenca seh Petrus i rumah Tabita/Dorkas nterem kalak i je, emaka minter Petrus nangki ku datas rumah ingan mait Tabita/Dorkas iamparken. Kenca sie isuruh Petrus gelah kerina kalak ndarat ibas ruangan e nari. Jenari ertoto pe Petrus man Tuhan, janah alu kuasa Tuhan nina “O Tabita kekekenlah”, emaka minter medak mata Tabita/Dorkas. Tabita/Dorkas nggeluh mulihi. Tuhu meriah ukur kalak sipulung i je sebab Tabita/Dorkas banci denga ras ia kerina.

5.      Perbahanan Tuhan arah Petrus simpekeke Tabita/Dorkas singgo mate mpekeke kiniteken kalak sinterem, emaka nterem kalak  tek man Yesus Kristus. Tambah jumlahna kalak si tek man Yesus Kristus.

APLIKASI

            Melala bentuk ngelai, salah sada bentuk ngelai eme nehken keleng ate, ntah pe erdiakonia secara pribadi. Bagepe nehken keleng ate alu ncidahken keprihatinenta man kalak sisusah ras sierceda ate ntah pe kalak si lit ibas kepiceten nggeluh. Emaka kita ipersingeti ibas dua hal eme sipemena adi lit buatenta mari sisampati senina turangta simbutuhken penampat. Arus siinget nterem senina turangta situhu-tuhu membutuhken penampat. Janah penampat siibereken kita arus tuhu-tuhu erpalasken keleng ate ibas Tuhan nari. Sebab keleng ate ibas Tuhan nari erbahan kita ngasup mere alu ukur meriah ras la alu terpaksa. Tuhu-tuhu murni sebab ndarat ibas kiniteken nari. Bagepe arus siinget ibas kita nampati temanta labo itentuken alu jumlahna, tapi kesungguhenta nampati ia. Sipeduaken, kita arus erdiate ras mediate nandangi kalak silit ibas perbeben ras kiniseran. Sebab kalak singgeluh ibas perbeben ras kiniseran tentuna butuh pengapul, emaka adi lit kalak si lit ibas perbeben ras kiniseran, bagepe lit ibas ceda ate, maka sepatutnalah kita ibas paksae megegeh kinitekenta arus nikapken waktunta reh ku rumah temanta sierceda ate, ntah pe silit ibas perbeben ras kiniseran guna ikut nggejapken perbeben geluh, janah ertoto kita gelah keluarga e ipegegehi Tuhan ras iapuli Tuhan. Ibas perbahanen sibage tentuna nterem kalak singena ate man persadanta. Bagepe arus siinget perbahanen siibahan kita eme ibas rangka kemulian Tuhan.

Pdt. Steven Kumenit, STh.M.Min.

Beritakenlah Kiniulin Dibata (“Berita Si Meriah”). (2 Timotius 4:1-5)

PEKAN PENATALAYANAN

GEREJA GBKP

WARI IV, RABU 20 JANUARI 2016.

Invocatio    :    Aku ibahan Dibata jadi si erdahin guna perpulungen. Dahin ibereken Dibata man bangku guna keperlunndu. Dahin e mpembarken kata Dibata alu serta (Kolose 1:25)

Ogen          :    Jesaya 48:2-21

Renungan   :    II Timotius 4:1-5.

Tema          :    Beritakenlah Kiniulin Dibata (“Berita Si Meriah”).

LATAR BELAKANG

1.      Secara umum kitab Timotius enda igolongkan ibas kitab Pastoral, sebab bentukna eme mpegegehi semangat ras kiniteken Timotius ibas ngelai i perpulungen Epesus.

2.      Ibas kata pergegeh enda Paulus ngataken man Timotius maka reh denga pagi Jesus, janah ibas kerehenNa berhubungen ras pengadilan. Kalak situtus ndalanken kai singena ate Tuhan me sindatken keselamatan, tapi si la ngelakoken singena ate Tuhan ihukum. Janah ula erpengakap maka adi nggo mate nggo dung sikerajangenta. Tapi arus sikataken maka Tuhan e la saja Tuhan nandangi kalak singgeluh, tapi pe nandangi kalak simate. Emaka amin gia nggo mate pe, pagi tetap nge iadili Tuhan. Erkiteken sie me maka Timotius arus mpeseh kerna Kinirajaan Tuhan (Keselamaten).

3.      Persoalan siihadapi Timotius eme pengajaran si papak. Tekanan-tekanan banci erbahanca kendor kiniteken Timotius, sebab nguda denga ia. Emaka ibas situasi siugapa pe, termasuk si la bagi ukur, Berita Simeriah arus ipeseh/pembarken. Janah salah sada bentuk pembarken Berita simeriah eme ncidahkan salah kalak ras mpersingeti ia. La terjeng je, adi nggo sicidahkan ras sipersingeti maka tugas selanjutna eme mpegegehisa alu pengajaren situhu-tuhu. Enda idalaken alu kesabaren. Ibas ndalanken sie, lit sada arapan gelah perpulungen Epesus nggeluh ibas keselamaten, sebab lit pertobaten.

4.      Kesempaten siibereken Dibata man Timotius guna ngelai i Epesus arus mpergunakan waktu alu mehuli, sebab sada paksa lit kari kalak lanai nggit megiken pengajaran situhu-tuhu. Adi nggo bage maka tentuna keselamatan lanai jadi sekerajangenna. Padahal, Jesus erkeleng ate man kerina manusia. Tanda keleng ate  Tuhan e, berekenna kesempatan man kerina manusia guna jera. Enda me dahin Timotius.

5.      Ate Paulus man Timotius, amin gia melala tantangan-tantangan ibas pelayanan, tapi kata Dibata arus tetap ipeseh. Kata Dibata eme mabai perpulungen gelah tetap nggeluh ibas persadan ras Yesus Kristus. Bagepe perpulungen tetap ngkelengi Kata Dibata, emaka nggit ia megiken Kata Dibata. Ibas perpulungen megiken Kata Dibata, perpulungen banci ngukurisi suari ras berngi (band. Mazmur 1:3), jenari idalankenna. Emaka perpulungen lanai atena megiken pengajaran si la tuhu siibaba guru-guru palsu, sibanci erbahanca perpulungen sirang ras Tuhan.

APLIKASI

            Dahin mberitaken Berita si Meriah eme dahinta ras. Jadi la saja dahin serayan Tuhan,tapi dahin kerina warga gereja. Tujun ndahiken Berita Si meriah gelah kerina kita nggeluh ibas keselamatan. Persoalenna nterem denga warga gereja la muat bagin ibas ndahiken dahin enda. padahal adi sioge ibas 1 Petrus 2:9, kerina kita ertanggungjawab nehken Berita Si Meriah sebab enda respon kiniteken erkite-kiteken kita nggo iselamatkan Tuhan. Bagepe gelah kalak sideban pe nggeluh ibas keselamatan. Apai ka menaken tahun 2016 enda tanggungjawabta eme mpetetap ukur warga gereja gelah ia tetap njemak kata Dibata ibas ndalani tahun enda. Bagepe kita arus pang ngataken sibenar ibas kegeluhenta, sebab nterem denga warga gereja mpraktekken kerna si la mehuki si langena ate Dibata.

            Keselamatan eme milik kerina jelma. Tapi banci saja keselamatan lanai jadi sikerajangenta erkite-kiteken kita ngelakoken si la mehuli si langena ate Tuhan. Jadi banci saja lit warga gereja nggo ntabeh akapna ngelakoken si la mehuli si la ngena ate Tuhan, janah la akapna salah e. Tuhu-tuhu nggo ikuasai dosa, maka si la mehuli si la ngena ate Tuhan, nggo benar akapna. Je me tugasta mpersingeti ia. Bagepe arus kita kerina ngelai alu persada arihta ibas nehken kata Dibata. Alu bage pendilo Tuhan nandangi kita kerina nggo ipeseh, emaka kita jadi alat Tuhan ras pancur pasu-pasu Tuhan nandangi kalak sideban.

Pdt. Steven Kumenit, STh.M.Min