Landek Dingen Rende Dem Pengataken Bujur (Mazmur 149:1-9)

KHOTBAH MINGU TANGGAL 2 OKTOBER 2016.

GEREJA GBKP

Invocatio    :    Ercakap-cakaplah kam sapih-sapih kam alu make masmur, ende-enden pujin dingen ende-enden pertendin. Endekenlah ende-enden ras masmur man Tuhan alu ukur dem ngataken bujur (Efesus 5:19).

Ogen          :    2 Samuel 6 : 1-5 (Tunggal).

Khotbah     :    Mazmur 149:1-9 (Antiponal).

Tema          :    Landek Dingen Rende Dem Pengataken Bujur.

LATAR BELAKANG

1.      Undangan guna muji Tuhan. Muji Tuhan arus i tengah-tengah perpulungen bangsa si tutus. Palas muji Tuhan eme erkite-kiteken : a). Ia si nepa manusia (band. Kejadin 1:26). b). Tuhan e raja. c). Tuhan simereken kemenangan.

2.      Puji Tuhan erkiteken ngena ate Tuhan bangsaNa. Tuhu bangsa Israel itindas ras lemah, tapi erkiteken bangsa Israel eme bangsa Tuhan maka Tuhan selaku Raja bangsa Israel jadi pemimpin guna mbalas kerina singgo ibahan bangsa-bangsa doni enda nandangi bangsa Israel.

3.      Ate Tuhan gelah bangsa Israel ngangkat bangsa Israel ibas “keterpuruken”/lemah nari jadi megegeh, menang ras jadi hakim. Alu kata sideban ipehaga Tuhan bangsa Israel, janah ipeteruk Tuhan bangsa sindube ngukum ras nerang ia. Janah bangsa Israel jadi alat Tuhan guna ngukum bangsa sideban. Penghukumen enda la saja terjeng rajana, tapi seh ku kerina rayatna. Bangsa Israel jadi alat Tuhan guna maba keadilen ku tengah-tengah doni enda.

4.      Ibas rangka jadi alat Tuhan guna ngukum bangsa sideban, bangsa Israel la banci make pikirenna saja, ntah pe ate-atena saja, tapi arus ibas kepemimpinen Tuhan. Arus sue ras perentah Tuhan. Ibas bangsa Israel ngikutken perentah Tuhan, maka bangsa Israel ndatken kemenangan.

5.      Ibas bahan khotbahnta sekali enda, situhuna pemazmur la saja ngajuk man kerina bangsa Israel gelah muji man Tuhan, tapi lebih asangken sie, bangsa Israel arus mengandalkan Tuhan ras ngikutken perentah Tuhan gelah bangsa Israel nggeluh ibas kemenangan. Emaka bangsa Israel nggeluh badia ras tutus. Kehadiren Tuhan i tengah-tengah bangsaNa maba pasu-pasu man bangsa Israel.

APLIKASI

            Landek dingen rende alu dem pengataken bujur eme sada ekspresi ntah pe ncidahken kiniteken man Tuhan. Ibas kita landek dingen rende alu dem pengataken bujur, berarti siakui Tuhan sinepa kita, bagepe Tuhan eme Tuhanta sinemani ras sinegu-negu kita ibas kegeluhenta tep-tep wari. Erkiteken, rende eme ekspresi kiniteken maka ibas kita rende arus ibas pusuh ras kiniteken nari.

            Ibas kebaktin minggu landek lenga semal ibas gerejanta, tapi ibas kebaktin-kebaktin i luar kebaktin minggu nggo nterem silakokenca. Sebab budaya landek lenga lit ibas kebaktin minggu. Tapi ibas khotbahta sekali enda nekankan ibas kita rende arus min alu dem pengataken bujur gelah Dibata simasu-masu kita. Bagepe landek ras rende alu dem pengataken bujur, situhuna ngataken man banta, ibas kita ersembah man Tuhan arus alu meriah ukur, sebab kita ersembah ras jumpa ras Tuhan ras guna Tuhan.

Pdt. Steven Kumenit, STh.M.Min.

Bujur Makeken Sukat-Sukat (Lukas 3:7-14)

PERPULUNGEN JABU-JABU

GEREJA GBKP

TANGGAL 2 – 8 OKTOBER 2016.

Lukas 3: 7-14.

Tema : Bujur Makeken Sukat-Sukat.

LATAR BELAKANG

1.      Sijadi bahan oratenta sendah eme sada pendahin Yohanes Peridiken kenca ia idilo Tuhan guna mpersiapken ndalan man Tuhan (band. Kerehen Yesus Kristus), gelah ibas kerehen Tuhan Yesus, bangsa Israel nggo nggeluh ibas kebadiaan. Alu bage bangsa Israel banci ngalo-ngalo Yesus Kristus (Mesias) alu meriah ukur ras dem pengataken bujur. Sebab Mesias nggo ndekah itimai bangsa Israel.

2.      Khotbah Yohanes Peridiken kerna kegeluhen sibujur ras badia bagepe keleng ate, mabai ku keselamatan. Erkiteken sie me nterem kalak Yahudi reh ku Yohanes peridiken i lau Yordan mindo gelah ia iperidiken. Nggeluh badia ras bujur berarti arus jera ibas perbahanen-perbahanen si la ngena ate Tuhan. Tandana nggo jera maka arus iperidiken. Sebab adi nggo iperidiken maka arus teridah perubahan nggeluh ibas manusia (kalak Israel). Perubahan e me nggeluh bujur, badia ras nehken keleng ate, arus nampati kalak sideban simbutuhken penampat. Jadi peridin la terjeng formalitas ngenca. Peridin jadi formalitas adi kalak Israel erpengakap ia keturunan Abraham si dat prioritas ibas keselamatan, emaka situhuna la perlu ia iperidiken.

3.      Keselamatan la erpalaskan kesusuren (band = Nepotisme). Tapi keselamatan idatken erpalasken nggeluh bujur, badia ras nehken kekelengen. Emaka salah nge adi kalak Yahudi erpengakap ia kesusuren Abraham, janah la teridah ibas perbahanen simehuli singena ate Tuhan. Ibas palas enda me nina Yohanes, kapak nggo sikap guna nabah batang kayu si la mehuli (ayat 9). Jadi lit penghukuman man manusia si la ndalanken keadilan ras kebujuren. Jadi keselamatan arus ibas totalitas nggeluh manusia (pusuh, perukuren, kata ras perbahanen).

4.      Lit dua pendahin sinembeh kal bangsa Yahudi eme pemungut cuke ras tentera. Nembeh kalak Yahudi man pemungut cuke, erkite-kiteken lit “pemerasan” man masyarakat. Cuke siipindona la bagi arusna, sebab ipindona lebih asa patutna. Janah enda ikategoriken dosa. Nembeh kalak Yahudi man kalak Yahudi si jadi tentera Roma, erkite-kiteken tentera eme alat/persuruhen pemerintah Roma. Tupung sie kalak Yahudi iteruh kuasa kerajaan Romawi. Bagepe melala tentera simenindas rayat.

5.      Yohanes Peridiken la mpersalahkan pendahin pemungut cuke ras tentera, saja siipindona eme ula pindo mbuen asa singgo itentuken. Bagepe selaku tentera, maka arus ncidahken keadilen ras kebujuren. Ula lit penindasan ras korupsi. Adi bage siidalanken maka subuk pemungut cuke ras tentera nggeluh ibas keselamaten.

APLIKASI

            Seh genduari siidah, sibegi denga, ntah pe sipraktekken kerna korupsi. Perlu siteh korupsi eme sada pendahin si la ngena ate Tuhan. Korupsi mpebayak diri sendiri, kelompok alu cara si la patut, eme muat sen si la sekerajangenna,  penindasan ras kinilaadilen. Korupsi eme ersenang-senang ibas penderitaan kalak sideban. Erbage-bage kalak simprakteken korupsi, eme  erkite-kiteken kebutuhen ekonomi sila tercukupi, la nggejapken bias kai singgo lit bas ia, rsd.

            Temanta sendah eme bujur makeken sukat-sukat. Adi kita ngerana kerna sukat-sukat, berarti kita ngerana kerna “batas ras takaran”. Emaka bujur makeken sukat-sukat lebih tepat ibas bidang ekonomi. Sebab ibas bidang ekonomi (pedagang ras usaha) arus lit sukat-sukatna. Tapi secara umum banci iartiken ibas  kerina pendahinta. Sebab ibas pendahin lit aturen/hukum siarus idalanken secara bersama ntah pe pribadi. Sukat-sukat enda me sijadi rel/patron ibas kita erdahin. Adi kita pegawai berarti lit gaji sue ras golongan/masa kerja kita. Adi kita pedagang lit timbangan guna ngukur berat/ringanna barang guna itukur. Kerina enda la banci itukangi ntah pe ilewati kita. Sebab adi silewati alu la iteh pemimpin ntah pe siempuna kebijakan (pemerintah), berarti kita nggo lewati sukat-sukat e. Bagepe marilah ibas kita ndatken kesempaten guna nampati kalak sideban, ula kita merangap, sierbahnca siarusna temanta ndatken penampat, tapi nggo sipotong baginna. Alu bage kita nggo erdosa. Adi nggo erdosa berarti ibas kerehen Yesus Kristus peduakaliken ibas doni enda, kita pasti ihukum. Emaka adi kita nggo Yesus Kristus eme Tuhan ras keselamatenta maka bujurlah kita ibas makeken sukat-sukat. Alu bage la saja kita sisenang, tapi kalak sideban pe ikut senang. Kalak sideban la itindas ras la itokohi. Jadi ibas kita bujur ibas makeken sukat-sukat maka kita nggo jadi alat kedamen ras kebujuren ibas doni enda. Emaka malem ateta nggeluh ibas kebujuren ras keadilen.

Pdt. Steven Kumenit, Sth.M.Min.

Tumpak-Tumpak Perberita Si Meriah (Roma 15:30-33)

KHOTBAH TANGGAL 25 SEPTEMBER 2016

GEREJA GBKP

Invocatio :    O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli (3 Yohanes 1:2).

Ogen        :    Heber 13:16-21 (Anthiponal).

Khotbah   :    Roma 15:30-33 (Tunggal).

Tema        :    Tumpak-Tumpak Perberita Si Meriah.

LATAR BELAKANG.

1.      Sijadi bahan khotbahnta sendah eme sada pemindon Paulus gelah perpulungen Roma notoken ia, gelah ia banci terkelin ibas bahaya sirehna ibas kalak Yudea si lenga tek man Yesus Kristus, janah anak-anak Dibata si i Yerusalem ermeriah ukur ngaloken pendahin Paulus. Bagepe adi kin enda sura-sura Dibata, maka banci Paulus reh ndahi perpulungen Roma. (Paulus la ngerana kerna ancaman ajaran-ajaran Palsu)

2.      Pemindon Paulus gelah kalak sitek man Yesus si lit i Roma gelah ras-ras ertoto, perpulungen notoken ia gelah tupung Paulus seh i Yerusalem, dahin Paulus banci lancar ras aman. Sebab lit sada dahin siarus isehken Paulus i Yerusalem eme naruhken penampat singgo ipepulung kalak kristen si lit i propensi Makedoni ras Akaya. Sebab kalak si tek ibas dua propensi enda nggejapken ia sada kula ras kalak si tek si lit i Yerusalem sisangana ngenanami kiniseran. I Yerusalem terjadi kelihen si mesangat sierbahanca nterem kalak si tek man Yesus Kristus jadi musil. Ate Paulus gelah ia banci selamat ibas rencana pembunuhan kalak Yahudi si la tek man Yesus Kristus. Tek Paulus ibas kuasa Tuhan ngenca maka ia banci pulah ibas kerina rencana-rencana kejahatan si irancang kalak si la tek man Tuhan Yesus Kristus. Memang lit alasan Paulus mindo gelah ia terkelin ibas bahaya si reh ibas kalak Yahudi si la tek man Yesus Kristus, sebab nggo piga-piga kali lit percuban ntah rencana pembunuhan kalak Yahudi si la tek man Yesus Kristus man Paulus, tapi la berhasil (Perbahanen Rasul-Rasul 9:29; 20:3). Bagepe adi nggo seh penampat kalak si tek si lit Propinsi Makedoni ras Akaya, alu meriah ukur ialoken kalak si tek si lit i Yerusalem penampat e.

3.      Perlu siteh Paulus lenga pernah ku Roma, janah mbelin kal sura-sura Paulus reh ku Roma guna mberitaken Berita Si Meriah. Amin gia situhuna nggo nterem kalak sitek man Yesus Kristus i Roma. Bagepe Roma eme tujun akhir Paulus ibas mberitaken Berita si Meriah.

4.      Ketedehen ate Paulus guna reh ku Roma, banci terealisasi adi Paulus ras kalak si tek i Roma ras-ras ertoto. Sebab adi ras-ras ertoto berarti la saja Paulus siertedeh ate ku Roma, tapi pe kalak si tek si i Roma ertedeh ate nandangi Paulus, alu bage kerina tantangan-tandangan ras persoalan siihadapi Paulus banci pulah, bagepe Berita si Meriah banci erbarna.

5.      Sada harapan man Paulus, kenca ia erbahan perdalanen sicukup ndauh eme ibas daerah Makedoni ras Akaya ku Yerusalem, jenari Yerusalem ku Roma, bagepe melala perbeben ras kiniseran siihadapi Paulus, maka banci pekesahken alu senang i Roma. Ibas erti kata i Roma sada arapen Paulus gelah la lit kesukaran-kesukaran ibas pelayanan, si bali ijumpaina ibas ingan sideban, khususna kalak si la tek man Yesus siatena mpersulit pelayanenna ras siberencana munuh ia.

APLIKASI

Berita Si Meriah eme salah sada gegeh Dibata, sebab arah Berita Si Meriah, kalak si lenga tek man Yesus Kristus, banci tek. Bagepe kalak simonce-once kiniktekenna, banci tetap ukurna. Alu bage arah Berita Si Meriah kita kerina banci nggeluh ibas keselamatan.

            Ibas rangka sie me maka Dibata nggo ndilo kita kerina guna mpeseh Berita Si Meriah man kerina jelma. Tapi secara khusus, Dibata nggo ndilo serayanNa gelah Berita Si Meriah banci erdalan alu mehuli. Sebab kenca Dibata ndilo serayanNa, maka ipesikapna serayanNa guna nehken Berita Si Meriah. Alu bage serayan Tuhan tuhu-tuhu nggo mpersiapken dirina guna ndalanken dahin nehken Berita Si Meriah. Tapi mekatep melala kendala-kendala ras percuban sibanci ngagalken Berita si meriah e, subuk bas diri sendiri, bagepe arah kalak sideban. Persoalan ras perbeben nggeluh banci erbahanca perberita Si Meriah jadi mekisat ras mbiar. Emaka selaku warga gereja arus nampati serayan Tuhan gelah kai pe persoalan siihadapina, banci ia megegeh ras tetap ukurna ndahiken dahin mberitaken Berita si Meriah. Penampat warga gereja eme 1). Pertoton. Warga gereja arus ikut notoken perberita Si Meriah gelah kuasa Dibata arah Kesah Si Badia banci mereken kepentaren man serayanNa ibas nehken Berita Si Meriah, gelah ise simegi Berita Si Meriah e malem atena ras meriah ukurna. Bagepe Kesah Si Badia sinemani ras ngarak-ngarak serayanNa ibas nehken Berita Si Meriah, gelah adi lit si ate ngagalken Berita Si Meriah, banci ipelawes Tuhan. 2). Diakonia. Diakonia eme salah aplikasi kekelengen. Emaka adi lit simbutuhken penampat, janah enda nggo isepakati ibas sidang Majelis runggun, ntah pe ibas perpulungen Jabu-jabu, maka arus idukung kerina warga gereja. 3). Patuh ras ikutken kata serayan Tuhan/Pemimpin (Band. Ogen).  4). Dana/Materi. 5). Ibas kai si la ngasup idahiken serayan Tuhan, i je iarapken perpulungen numpak-numpak serayan Tuhan. Termasuk perpulungen mehamat man serayan Tuhan. Ibas erti kata erkiteken serayan Tuhan bekas pilihen Tuhan arah perpulungen, maka tanggungjawab perpulungen eme ula pekitik serayan Tuhan ibas kegeluhen perpulungen.

            Bentuk penampat simehuli siibereken/siidalanken warga gereja, maka warga gereja nggo numpak-numpak perberita Si Meriah (serayan Tuhan).

Pdt. Steven Kumenit, STh.M.Min.

Kutatang-Tatang Kam Seh Metua (Yesaya 46:3-4)

PERPULUNGEN JABU-JABU

GEREJA GBKP

TANGGAL 25 SEPTEMBER – 1 OKTOBER 2016.

Yesaya 46:3-4.

Tema : Kutatang-Tatang Kam Seh Metua.

LATAR BELAKANG

1.      Kinilapatuhan bangsa Israel man Tuhan, mabai bangsa Israel iambengken ku Babel. Tujun bangsa Israel iambengken i babel, gelah bangsa Israel banci ngenen mulihi kerna hubungenna ras Tuhan. Bangsa Israel banci jerah, jenari mindo pengalemi dosa man Tuhan, jenari ndalanken simehuli singena ate Tuhan ibas kegeluhenna tep-tep wari. Sebab tujun Tuhan ndilo bangsa Israel jadi bangsaNa, gelah bangsa Israel jadi alatNa guna keselamatan i doni enda. Emaka kegeluhen sibadia ras patuh man Tuhan arus nggeluh man bangsa Israel.

2.      Kenca kurang lebih 40 tahun bangsa Israel i Babel, bangsa Israel nggo mulai jungut-jungut. Bangsa Israel nggo mulai mpertanyakan kerna eksistensi Tuhan. Lit simuat kesimpulan maka Tuhan la ngasup mbebasken ia, sebab kuasa Tuhan terbatas ngenca. Kuasa Tuhan terjeng i Yerusalem ngenca. Erkiteken sie me nggo li siersembah man dibata-dibata kalak Babel.

3.       Kuasa kerajaan Babel nggo ndabuh ku raja Kores, kerajaan Persia. Erkiteken kerajaan babel nggo italuken raja kores, maka alu sendirina pe, bangsa Israel si sangana itaban i Babel jadi tabanen Kerajaan Persia.

4.      Ibas kuasa Persia enda me, ipepulung Tuhan bangsa Israel, jenari ngerana Tuhan arah nabiNa, ibas rangka mpegegehi bangsa Israel gelah tetap megegeh ras ersembah man Tuhan, bagepe tetap mengandalkan Tuhan ibas kerina kegeluhen bangsa Israel.

5.      Tuhan sinepa langit ras doni siisembah bangsa Israel berbeda ras dibata-dibata bangsa Babel. Dibata-dibaa bangsa Babel terbatas ras la nggeluh. Tapi Dibata kalak Israel eme Dibata singgeluh ras perkeleng. Amin gia bangsa Israel nggo erdosa, tapi keleng ate Tuhan tetap ras ia. Dibata njaga ras nemani, bagepe mereken kemalemen ate man bangsa Israel. Dibata similih bangsa Israel, emaka penjagan ras penemani Tuhan mulai ibas bertin nari. Ibas erti kata mulai ibas Abraham, Isak ras Jakup seh jadi bangsa Israel. Ibas keleng ate Dibata, ipedaratna bangsa Israel ibas taneh perbudaken nari, Mesir ras taruhkenna ku taneh Kanaan. Erkiteken bangsa Israel eme bangsaNa (anakNa), maka seh rasa lalap Tuhan tetap nemani ras njagai, bagepe mereken sada kemalemen ate man bangsa Israel. Enda ibahasakan alu Kutatang-tatang, Kuembah-embah, Kuangkip-angkip ras Kukelini.

APLIKASI

            Kutatang-tatang seh metua, situhana enda kata “hiasan” singataken maka Tuhan tetap berimanuel ras kita. Sebab kenca idilona kita jadi anak-anakNa, maka ateNa gelah kita nggeluh ibas mejuah-juah. Tuhu Tuhan igejapken Tuhan perdalanen anak-anakNa (kita), sada paksa jumpa perbeben ras kiniseran, sierbahanca kote, aru ate, bagepe mbiar ndalani wari-wari kegeluhenta. Erkiteken sie me ibas pertoton Tuhan Yesus man Bapa sini Surga, nina la kupindo gelah ipedaratNdu ia (kalak si tek) ibas doni enda nari, tapi si Kupindo man baNdu eme gelah ikawaliNdu ia, ibas sijahat nari (Band. Yohanes 17:15).

            Iteh Tuhan maka kita enda lemah, la kita ngasup ngelawan kuasa doni enda. emaka ibas kelemahan enda me banci mabai kita ku bas Dosa. Adi kita nggo nggeluh ibas dosa maka kita sirang ras Tuhan.

            Sekali enda kita isingetken mulihi kerna keleng ate Tuhan man kita anak-anakNa. Tuhan siperkeleng nggo mbentuk kita tupung kita ibas bertin nari, emaka kenca kita tubuh seh ertambah-tambah umurta, seh kita jadi lansia gelah kita banci ncidahkan kualitas kiniteken. Emaka situhuna la lit alasan man banta ngerana la kita ngasup erbahan simehuli. Perlu siteh ibas Tuhan berimanuel man banta, berarti itatang-tatangNa kita gelah kita ngasup ngelawan perbeben ras kiniseran, bagepe erbage-bage percuban siatena nirangken kita ras Tuhan. Emaka nggeluhlah kita ras Tuhan gelah Tuhan tetap natang-natang kegeluhenta.

Pdt. Steven Kumenit, STh.M.Min.