Selasa, 13 Desember 2016

Ia Me Anak Dibata Si Erkuasa (Roma 1:1-7)



KHOTBAH MINGGU
TANGGAL 18 DESEMBER 2016.
GEREJA GBKP
Invocatio    :    Tapi genduari kam enggo ibebasken i bas dosa nari, janah kam enggo jadi "budak" Dibata. Asilna man bandu e me kap, kam nggeluh khusus guna Dibata. Si enda mabai kam ku kegeluhen si tuhu-tuhu si rasa lalap (Roma 6:22).
Ogen          :    Mazmur 80:1-7 (Responsoria)
Khotbah     :    Roma 1:1-7 (Tunggal).
Tema          :    Ia Me Anak Dibata Si Erkuasa.

LATAR BELAKANG
1.      Perpulungen Roma, labo Paulus simatekisa, emaka secara pribadi kurang penandai Paulus kerna kecibal perpulungen Roma. Ipihak sideban lit sura-sura Paulus guna reh ku Roma. Ibas palas enda me Paulus ngirimken surat man perpulungen Roma guna petandaken ise ia ras pelayananna, bagepe kerna Kristologi. Alu bage Perpulungen Roma banci ngaloken Paulus tupung Paulus reh ku Roma. Jadi banci sikataken surat Paulus enda ibas rangka mpersiapkan dirina  ndahi perpulungen Roma.
2.      Eksistensi Paulus ibas nehken Berita Simeriah rusur dat tantangan. Emaka gelah la jadi polemik ibas kerehenna i Roma, maka nina, ia me suruh-suruhen Yesus Kristus ras rasul singgo iserapken Dibata guna mberitaken Berita Si Meriah. Siimaksudken suruh-suruhen (budak = Doulos) Yesus Kristus eme litna “ketaklukkan” ras kepatuhan nandangi tuanna. Bagepe suruh-suruhen sada dahin sibanci ikataken rendah. Ibas PL suruh-suruhen banci itukur ras la lit hakna. Rasul eme sekalak siipilih ras iutus guna ndahiken dahin siistimewa. Jadi, rasul eme sekalak siipilih  guna mberitaken Berita kerna Yesus Kristus.
3.      Yesus Kristus eme manusia janah tubuh ibas kesusuren Daud, Tapi erkiteken Kesah Si Badia, tangkas man banta maka Ia anak Dibata sierkuasa. Enda teridah ibas kematen ras kekekenNa. Ate Paulus, gelah perpulungen Roma banci meteh maka Yesus tuhu kesusuren Daud, janah kerehen Yesus Kristus tuhu-tuhu nggo ipadanken Dibata arah nabi-nabi. Nabi-nabi ernubuat kerna kerehen Mesias. Alu kata sideban kerehen Kristus ibas doni enda ibas rupa manusia eme penggenapan ibas nubuat nabi-nabi kerna Mesias, eme padan kerna keselamatan ibas Dibata nari man kerina manusia. Emaka kerehen Yesus Kristus merupaken sada rencana Dibata guna manusia ras doni enda.
4.      Ibas rangka keselamatan manusia, maka ipilih Tuhan Paulus jadi rasulna, janah enda merupakan hak istimewa man Paulus. Sebab igejapken Paulus situhuna merupaken sada keuntungen man bana ibas mberitaken Berita si Meriah. Bagepe ate Paulus ngataken maka situhuna jabatan rasul erkiteken Tuhan simerekensa. Tuhan similih ise sitepat jadi rasulNa.
5.      Keselamatan siibereken Tuhan, la ikhususken man bangsa Israel (Yahudi) saja tapi man kerina bangsa-bangsa (keselamatan universal), gelah kerina bangsa-bangsa tek man Yesus Kristus ras nggeluh ibas keselamatan, termasuk perpulungen Roma. Alu bage perpulungen Roma arus nggejapken kemalemen ate erkite-kiteken keselamatan singgo ibereken Tuhan man bana.

APLIKASI
            Ibas lias ras ate Tuhan, kita kerina nggo iselamatken Tuhan, janah enda me palas kita nggeluh ibas kemalemen ate. Janah patut kita ngataken bujur man Tuhan sebab Tuhan siisembahkan kita eme Yesus Kristus merupakan Tuhan sierkuasa bagepe sitetap nemani kita (Imanuel). Alu bage erkiteken Tuhan sierkuasa maka la perlu kita mbiar ras aru ateta sebab ugapa pe mbelinna perbeben ras kiniseran banci isampati Tuhan ras ibereken serpang pulah.
            Ibas minggu Adven enda kita ipersingeti, adi kita jumpa perbeben ras kiniseran ku ise kita mindo penampat. Perlu siteh Yesus Kristus siisembah kita eme Tuhan sierkuasa nandangi kerina kuasa-kuasa si lit ibas doni enda. Alu bage uga pape hebatna perbeben ras kiniseran ula bene ukurta. Ula sipindo penampat man kuasa-kuasa doni enda, tapi marilah sipindo penampat man Tuhan Yesus Kristus. Alu bage ibas kerehenNa pedua kaliken i doni enda kita banci ndatken kegeluhen situhu-tuhu si rasa lalap.

Pdt. Steven Kumenit, STh.M.Min.