Aron Dibata Si Nggit Ras Tutus Erlajar Mandiri (Lukas 19:1-10)

PEKAN PENATALAYANAN

GEREJA GBKP

WARI III, SELASA 17 JANUARI 2017.

Invocatio    :    Bena-bena kepentaren e me erkemalangen man TUHAN . Man kalak si erkemalangen man baNa iberekenNa kap pemeteh si mehuli. Terpujilah Dibata seh rasa lalap (Mazmur 111:10).

Ogen          :    Yohanes 3:1-10.

Khotbah     :    Lukas  19:1-10.

Tema          :    Aron Dibata Si Nggit Ras Tutus Erlajar Mandiri.

LATAR BELAKANG

1.      Eksistensi Yesus selaku Tuhan ras sierkuasa nggo mbar ku belang-belang Yerusalem ras sekitarna. Emaka tupung Yesus bengket ku Yerikho, nterem kalak reh guna ngenen Yesus. Erkiteken nteremna jelma, maka Zakeus erkiteken gendek nangkih ia ku batang kayu guna ngenehen Yesus.

2.      Ibas ketutusen Zakeus ngenen Yesus, dungna Yesus pe ngenen Zakeus. Emaka nina Yesus, o Zakeus nusurlah kam ibas pohon e, ateKu kesilang ibas rumahndu. Seh Kal riahna Zakeus e. Emaka kenca Yesus seh i rumahna, janah man ras minum, bagepe erberngi, maka nina Zakeus man Yesus, setengah ibas erta-ertangku nari ku sumbangken man kalak musil, janah adi lit kalak si ku tipu, ku ulihken empat kali lipat. Perjumpan Yesus ras Zakeus i rumah erbahanca terjadi perubahan nggeluh man diri Zakeus. Emaka nina Yesus man Zakeus, sendah ketuahen rumah enda.

3.      Ibas Yesus kesilang ras man ras minum i rumah Zakeus, lit si jungut-jungut eme pemimpin-pemimpin kalak Yahudi, ras jelma sinterem. Sebab kecewa kalak enda erkiteken Yesus kesilang i rumah Zakeuas. Sebab ibas pengakap kalak e, Yesus eme kalak mbelin ras badia, emaka la pantas kesilang i rumah Sakeus, siakap kalak enda kalak perdosa.

4.      Perlu siteh dahin Sakeus eme pemungut cuke. Dahin enda eme dahin sila isenangi masyarakat, sebab dahin enda eme rekanan (teman) pemerintah, khusus kerna cuke. Biasana pemungut cuke enda ipindona lebih asa patutna, emaka meherga akap masyarakat, termasuk masyarakat musil. Bagepe adi lit siterlambat galar pasti reh petugas pemungut cuke alu mindo make cara-cara si la isenangi masyarakat. Itambah ka denda. Erkiteken sie la saja pendahin enda ibenci masyarakat, tapi pe pendahin enda igolongkan dosa. Emaka kalak sipendahinna pemungut cuke, ia igolongken kalak perdosa.

5.      Kerehen Yesus ibas doni enda la guna kalak si serta, tapi guna kalak si erdosa ras singgit ngakuken perlatunggungna. Emaka ibas pengakun Sakeus guna mereken setengah ibas ertana kerina man kalak musil ras ngulihken empat kali lipat man kalak adi lit siitipuna, ngatakenca nggo terjadi pertobatan man diri Sakeus. Erkiteke sie terjadi me keselamatan i ibas rumah Sakeus sebab Sakeus kesusuren Abrahap pe. Maksudna Sakeus eme kalak Yahudi singgeluh ibas perpadanan Dibata. Bagepe bagin ibas anggota pilihen Dibata.

APLIKASI

            Yesus eme Tuhan merupaken pengakunta selaku kalak sitek man baNa. Pengakun enda arus tuhu-tuhu teridah ibas kegeluhenta tep-tep wari. Kita arus ngelakoken kai singena ate Tuhan. Sebab ibas kita ndalanken kai singena ate Tuhan maka kita banci nggeluh ibas keselamatan. Bagepe gelah tuhu-tuhu alu meriah ukur ras kiniteruken ukur ndalanken kai singena ate Tuhan, maka penting man banta nggeluh peduakaliken. Ibas erti kata ndalanken kai singena ate Tuhan arus ibas kegeluhen si jera. Nggeluh ibas pertobatan.

            Yesus eme Tuhan, bagepe ibas kita tek ras ndalkanken kai singena ate Tuhan nge maka kita banci nggeluh ibas keselamatan. Penungkunen man banta uga carana gelah  banci siteh  kai simehuli ras kai singena ate Tuhan. Jawaban sederhana eme 1). Kita arus mbiar ras erkemalangan man Tuhan saja. 2). Mari kita tutus erlajar kerna kata Dibata. sebab ibas kita erlajar kerna kata Dibata ras ngerenungken suari ras berngi, terjadi me bas dirinta penandai sipayo kerna Tuhan. sebab salah sada kita banci jumpa ras Tuhan eme alu nggitna kita erlajar kerna kata Dibata. Emaka marilah tutus erlajar alu mandiri. Janah perlu siteh ibas kita erlajar alu tutus maka kita banci dat kepentaren.

Pdt. Steven Kumenit, STh.M.Min.