Selasa, 28 Februari 2017

Kesangapen Sekalak Diberu (Hakim-Hakim 4:4-10)



PERPULUNGEN JABU-JABU
GEREJA GBKP
TANGGAL 5 – 11 MARET 2017.
Hakim – Hakim 4 : 4-10.

Tema : Kesangapen Sekalak Diberu.

LATAR BELAKANG
1.      Bangsa Israel selaku bangsa Tuhan nggo erdosa i lebe-lebe Tuhan. Erkiteken sie me Dibata mereken bangsa Israel man Jabin, sekalak raja kalak Kanaan. Iperentahna bangsa israel alu kejam, janah mesui kal ate bangsa Israel ibahanna. Emaka erlebuh bangsa Israel mindo penampat man Tuhan.
2.      Dibata megiken pemindon bangsa Israel, emaka isuruhNa Debora, sekalak nabiah guna mbebasken bangsa Israel. Emaka Debora si nggo dat perentah Tuhan e, nuruh si Barak anak Abinoam gelah muat sepuluh ribu kalak ibas suku Naptali ras Sebulon nari guna erperang ras Sisera puanglima Jabin. Tapi tempa-tempa barak la percaya diri, emaka ipindona gelah Debora pe ikut. Tapi nina Debora la bo kam kari si dat kehamatan tapi aku (Debora).
3.      Amin gia isuruh Tuhan Debora ras Barak erperang ngelawan puanglima Sisera, tapi labo berarti kemenangan sibakal idat Debora ras Barak erkiteken kepentarenna, tapi erkiteken kuasa ras kehebaten Tuhan. Debora, Barak ras tetera e alat Tuhahn ngenca.
4.      Kehebatan kai pe siimiliki puanglima Sisera, adi Tuhan nggo muat sada kepetusen guna mbebaskan bangsaNa, ise pe la banci nahansa.
5.      Debora eme alat Tuhan guna mpeseh sura-sura Tuhan. Janah tujun Tuhan gelah bangsana nggeluh ibas kebebasan. Erkiteken sie maka Debora patuh man Tuhan, emaka erkiteken Tuhan berpihak man bangsa Israel, janah sura-sura Tuhan mbebasken bangsa Israel, maka pang Debora mimpin tentera guna ngelawan puanglima Sisera.

APLIKASI
            Temanta kesangapan sekalak diberu eme ketika diberu banci ncidahkan ras mengeksplore eksistensina ibas kegeluhenna tep-tep wari. Isamping sie diberu eme jadi ibu rumah tangga simehuli, ngasup ndungi masalah-masalah si lit (rumah tangga), bagepe jadi teman si cocok man perbulangan ibas ndalankan kai singena ate Tuhan. Jadi ezer (penolong).
            Kesangapan si deban man sekalak diberu eme adi deberu mereken kesempatan ras menghargai man dilaki ibas ndahiken dahin-dahin tertentu, simerupakan dahin dilaki. Tapi kesangapan simbelin man sekalak diberu eme ibas kepatuhen man Tuhan Dibata.
           
Pdt. Steven Kumenit, STh.M.Min.

Nggeluh Ibas Perkuah Ate Dibata (Roma 5:12-19)



KHOTBAH MINGGU TANGGAL 5 MARET 2017.
GEREJA GBKP
Invocatio    :    Ia kap Dibata si dem perkuah ate. Labo kam itadingkenNa, labo kam ikernepkenNa. La Ia lupa perpadanen si ipadankenNa jine ras nini-ninindu (Ulangan 4:31).
Ogen          :    Mazmur 32:1-11 (Tunggal).
Khotbah     :    Roma 5:12-19 (Anthiponal).
Tema          :    Nggeluh Ibas Perkuah Ate Dibata.

LATAR BELAKANG
1.      Bahan khotbahnta sekali enda ngerana kerna salah sada teologi Paulus eme kerna perkuah ate (pembenaran - Sola Gratia). Ibas teologi Paulus enda, ate Paulus ngataken maka keselamatan manusia erkiteken perkuah ate Tuhan, la bo erkiteken gegeh ras kengasupen manusia.
2.      Pembenaren/Sola Gratia ibereken Tuhan erkite-kiteken manusia kenca nggeluh ibas dosa, manusia la ngasup nelamatken diri, ntah pe nggeluh ibas keselamatan. Erkiteken manusia nggo erdosa, maka manusia e nggeluh ibas kematen. Sebab manusia la  ngasup la erbahan dosa.
3.      Paulus nuriken kerna asal usul dosa. Awalna dosa ngkenai sekalak manusia (Adam) tupung Adam itamaken Tuhan i Peken Eden. I peken Eden nggo ilarang Tuhan gelah Adam la banci pan pohon simereken pemeteh kerna sibujur ras sijahat  (Kej.2:16-17). Larangan e ibas rangka nguji kerna kepatuhen manusia, sebab ibas kepatuhenna e teridah Adam patuh nandangi perentah Dibata. tapi enda la teridah man Adam.  Adam la patuh man Tuhan. Adam ndabuh ku bas dosa. Emaka tempas Dibata man manusia (Adam) ceda. Erkiteken Adam manusia si pemena nggo erdosa, dungna kesusurenna ikut erdosa (dosa turunan). Emaka ibas manusia nggo erdosa maka kegeluhen manusia lalap mpraktekkan si la ngena ate Tuhan. Yohanes Calvin ibas bukuna Institutio ngataken : dosa turunan adalah suatu kerusakan dan kebejatan kodrat kita yang turun temurun, yang sudah tersebar ke semua bagian jiwa, dan membuat kita pertama-tama layak ditimpa kemurkaan Allah, kemudian menimbulkan dalam diri kita perbuatan-perbuatan yang oleh Alkitab dinamakan “perbuatan-perbuatan daging”.
4.      Erkiteken dosa maka manusia nggeluh ibas kematen (bdk. Roma 6:23), tapi erkiteken lias ras perkuah ate Tuhan, ibereken Tuhan sada pemere man manusia, siarusna la metunggung manusia ngalokenca eme manusia ibenarken. Manusia i benarken ibas kematen Yesus Kristus (Adam si peduaken). Ibas kematen Yesus Kristus, kerina dosa manusia lanai iperhitungken Tuhan. Tuhan lanai ertaktak ibas kerina dosa-dosa manusia.
5.      Ibas manusia ibenarken berarti manusia nggo ialoken Tuhan. Jadi pembenaren simerupaken lias ate Tuhan man manusia merupaken sada keselamatan man manusia, sebab dosa-dosa manusia nggo ialemi Tuhan. ibas erti kata ibas kepatuhen Yesus Kristus nandangi Bapa sinuruh Ia, maka manusia nggo iperembakkan ras Dibata.



ALIKASI  
            Perlu siteh adi kita ngerana kerna dosa, la lit istilahna kitik ntah mbelin, janah dosa eme simereken kematen man banta. Alu bage kita lanai nggeluh ibas keselamatan. Tapi kita banci tetap nggeluh ibas keselamatan, adi kita jera ibas dosa-dosa nari. Tapi arus siteh lebe ibas lias perkua ate Tuhan kita nggo nggeluh ibas keselamatan. Adi nai kegeluhenta nggeluh ibas pernembeh ate Tuhan, tapi erkiteken kita nggo ibenarken arah Yesus Kristus maka kita nggo nggeluh ibas kebenaren.
            Perlu siteh perbahanen si la ngena ate Dibata (dosa), tentuna lit hukumenna, tapi erkiteken perkuah ate Dibata, kita iselamatkan. Emaka kita singgo nggeluh ibas perkuah ate Dibata arus ikuti kai siisura-suraken Dibata. Bagepe kita singgeluh ibas perkuah ate Dibata arus pe sikataken arah kata ras perbahanen, gelah kalak sideban pe meteh kerna keselamatan singgo ibereken Tuhan man banta. Emaka ipraktekkenna nggeluh ibas perkuah ate eme la egois, cian, rsd.
            Kalak singgeluh ibas perkuah ate Tuhan, berarti la atena sea-sea ken kerna kegeluhenna, nggeluh ibas pengataken bujur. Sebab  kita enda nggo ceda, kita situhuna la ngasup ndatken keselamatan, janah tek kita adi nggeluh ibas dosa, maka kita nggeluh ibas kiniseran, ras la lit kemalemen ate/kesangapan. Siakuken i lebe-lebe Dibata ras jera ibas dosa-dosa nari ras ialemi Dibata dosanta maka kita banci nggeluh ibas kesangapan. Tapi ipersingeti man banta adi nggo ialemi Dibata dosanta, maka ula nari sibahan dosa ibas kegeluhenta.
            Uga pa pe mbelinna dosa, hebatna dosa, tapi mbelinen perkuah ate Tuhan, sebab perkuah ate Tuhan mpereh keselamatan. Tapi dosa mbabai kita lalap ersalah si banci mabai kita la saja sakit, tapi lebih asangken sie eme kematen. Emaka ula kita menganggap enteng ibas kita nggeluh ibas dosa.

Pdt. Steven Kumenit, STh.M.Min.

Selasa, 21 Februari 2017

KataNdu Kap Tendang Man Nahengku (Mazmur 1:`1-6; 119:105)



PERPULUNGEN JABU – JABU
GEREJA GBKP
TANGGAL 26 FEBUARI – 4 MARET 2017.
Masmur 1:1-6; 119:105

Tema : KataNdu Kap Tendang Man Nahengku.

LATAR BELAKANG.
A.    Mazmur 1:1-6.
  1. Mazmur enda igolongken mazmur kepentaren, erkitekiteken pemazmur ncidahken kegeluhen kalak sipatuh man Tuhan ras kalak jahat ras akibatna. Kegeluhen kalak sipatuh man Tuhan ndatken pasu-pasu Tuhan nari, tapi kalak jahat ihukum Tuhan. kalak simatuhi undang-undang la saja ndatken kemalemen ate, tapi ngasup ngalaken erbage-bage tantangen. Megegeh ngalaken erbage-bage tantangan erkite-kiteken kita nggeluh ras Tuhan.
  2. Pemazmur ngidah guna ndatken kemalemen ate, arus patuh man Tuhan ras ula megiken ranan kalak jahat ras kalak simegombang man Dibata. Ibas erti kata kalak sipatuh man Tuhan harus steril ibas  ibas perbahanen-perbahanen si la ngena ate Tuhan. Kalak sipatuh man Tuhan ula terpengaruh ajakan-ajakan ras teladan kalak jahat, sebab ajakan-ajakan ras teladan kalak jahat mpereh hukuman ibas Dibata nari.
  3. Ranan kalak jahat ras kalak simegombang man Dibata eme kepentaren doni ras manusia. Tapi kegeluhen kalak sipatuh man Tuhan ngidah ibas matuhi undang-undang Tuhan (Taurat) ras ngerenungken suari ras berngi, kalak sipatuh man Tuhan ndatken kai si isura-suraken Tuhan ibas kegeluhenna ras nggit ndalankenca. Sebab ibas ndalanken kai siisura-suraken Tuhan berarti kegeluhen kalak sibenar ipasu-pasu Tuhan. Undang-undang  Tuhan eme sura-sura Dibata sitertulis, janah enda merupaken peraturen, larangan, petunjuk, peringaten ras pengajaran Tuhan gelah kegeluhen bangsa Israel nggeluh alu mejuah-juah. Undang-undang Tuhan secara tertulis ibereken Tuhan man bangsa Israel arah Musa, tupung bangsa Israel ngadi i deleng Sinai. Emaka pemazmur ngenen undang-undang Tuhan e merupaken pemere Tuhan simeherga kal man bangsa Israel, emaka harus idalanken.

B.     MAZMUR 119:105.
  1. Mazmur enda merupakan perenungen kerna undang-undang Tuhn (taurat). Pemazmur tek, Tuhan nggo mpebetehken kebenaren ras sura-suraNa salu tulisan. Emaka arus iikuti.
  2. Undang-undang Tuhan (taurat) merupakan kata Dibata janah sipatna petunjuk kegeluhen. Janah undang-undang Tuhan (taurat) la saja terjeng perangkat hukum ntah peraturan guna iikuti gelah bangsa Israel ndatken pasu-pasu Tuhan (perkenanan Tuhan). Bangsa Israel nggo ndatken pasu-pasu Tuhan (perkenanan Tuhan),tupung bangsa Israel ndarat ibas taneh perbudaken nari, bangsa Mesir. Tapi undang-undang Tuhan (taurat) eme nampati bangsa Israel tetap ibas pasu-pasu Tuhan (perkenanan Tuhan). Emaka kata Dibata mereken pengertian ras menuntun kalak benar gelah terhindar ibas pernembeh ras rawa Dibata nari.

APLIKASI   
            Kata Dibata eme Yesus Kristus. sebab ibas Yohanes 1:14 nina kata e nggo jadi manusia. Bagepe Yesus eme terang doni (Yoh.8:12). Alu bage secara sederhana ngataken ise singgeluh ras Yesus, berarti ia nggeluh ibas terang. Adi nggeluh ibas terang berarti kita banci meteh kerna kebenaren situhu-tuhun.
            Adi kita nggeluh ibas KataNa, maka kita nggeluh ibas kemalemen ate. Janah adi tetap ateta nggeluh ibas kemalamen ate, siarus ibahan kita eme meriah min ukurta ngoge pustaka si badia janah ngerenungken suari ras berngi, ula kita megiken ranan kalak perdosa, ula erteman ras kalak simegombag man Dibata. Tapi tetap min kita nggeluh ibas undang-undang Tuhan eme kerna kekelengen (bdk. Matius 22:37-40).
            Nggeluh ras Tuhan berarti nggeluh ras patuh nandangi kai siiperentahkenNa man banta. Alu bage kita nggeluh ibas orat nggeluh selaku kalak kristen. Kita arus nggeluh ibas disiplin rohani

Pdt. Steven Kumenit, STh.M.Min

Idilo Guna Pehuliken (Mazmur 2:1-12)



KHOTBAH TANGGAL 26 FEBUARI 2017.
GEREJA GBKP
Invocatio    :    Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken (Kuan-Kuanen 10:22).
Ogen          :    2 Petrus 1:16-21 (Anthiponal)
Khotbah     :    Mazmur 2:1-12 (Tunggal).
Tema          :    Idilo Guna Pehuliken.

LATAR BELAKANG
1.      Bahan khotbahnta sekali enda igolongken mazmur kerajaan, sebab mazmur enda iendeken tupung pengangkatan/penobatan/pengurapan sekalak raja bangsa Israel.
2.      Bangsa Israel selaku bangsa Tuhan lit bangsa-bangsa taklukan sikatawari paksa pe ersura-sura naluken bangsa Israel (mperontak/melepaskan diri). Erkiteken sie, ibas mazmur enda sekalak raja siitangkuhken ngendeken mazmur enda, sekaligus kata persinget man bana, i ja lit raja-raja ras penguasa-penguasa bangsa-bangsa taklukenna siatena memborontak ras erpakat naluken bangsa Israel. Tapi amin gia lit sura-sura sibage, kerina e sea-sea, sebab siihadapina eme Tuhan ras raja siipilih ras iurapiNa. Tuhan bangsa Israel eme Tuhan si dem kuasa. La lit kuasa ibas doni enda, termasuk kuasa bangsa-bangsa/ pemerintah doni enda si ngasup naluken kuasa Tuhan. Bagepe raja siipilih Tuhan ngasup naluken ntah pe gagalken sura-sura bangsa-bangsa e, sebab bas raja e lit kepentaren, bagepe Tuhan ikut erperang ras bangsa Israel. Ibas kata sideban Tuhan nemani raja siipilihNa e.
3.      Perlu siteh maka bangsa Israel eme bangsa Tuhan, maka raja bangsa Israel eme raja siipilih Tuhan ras iurapiNa. Alu bage hubungan raja bangsa Israel ras Tuhan, bali ras hubungan anak ras bapa. Janah megegeh kal kuasa nandangi bangsa Israel ras nandangi bangsa sideban.
4.      Kerina sura-sura bangsa-bangsa siatena ngelawan Tuhan, itawai Tuhan, sebab akapna la iteh Tuhan ras ngasup ia naluken kuasa Tuhan e. Tuhan sikundul ibas kursi kinirajanNa e meteh kerina sura-sura bangsa-bangsa e. Erkiteken sie ipebetehken Tuhan man bangsa-bangsa e, i ja raja bangsa Israel, Ia sinangkuhkenca, emaka kai siipindo raja e ibere Tuhan. Janah enda me simomoken raja man bangsa-bangsa e. Alu bage ise siatena ngelawan raja bangsa Israel, berarti ia ngelawan kuasa Tuhan.
5.      Lit kuasa simejin si la ngasup italuken kuasa-kuasa doni enda, termasuk kuasa pemerentah doni enda, emaka gelah bangsa-bangsa la kena rawa (hukuman) Tuhan, padin bangsa-bangsa e ngakui kerna kuasa Tuhan. Emaka raja bangsa Israel ngataken man bangsa-bangsa e, sembahlah Tuhan alu gentar ras mbiar man Tuhan saja maka bangsa-bangsa e banci teneng. Adi bangsa-bangsa tetap ibas sura-surana, tentuna kena rawa Dibata bangsa-bangsa e. Adi nggo seh rawa Dibata, uga pa pe mate me bangsa-bangsa e. Emaka dalan satu-satunya eme ernalem man Tuhan saja gelah bangsa-bangsa ndatken kemalemen ate. Sebab kedamen/kemalamen ate bangsa-bangsa, labo sidat arah memerdekan diri alu memberontak man Tuhan, tapi arah ernalem man baNa saja.

APLIKASI
            Secara umum khotbahnta eme pilihen ras penangkuhen  Tuhan nandangi sekalak raja. ndahin raja siipilih ras siitangkuhken raja eme mpekena-kena ras minpin alu bujur gelah masyarakat banci nggeluh ibas kedamen ras ketenangen.
            Tapi secara khusus ngerana kerna Yesus simerupaken Tuhan idilo ras sitangkuhken guna nelamatkan kerina bangsa. Ia jadi Raja kerina bangsa. Tapi lit si la nggit nggeluh ibas pemerentahenNa. Enda teridah arah perbahanen-perbahanen tep-tep wari.
            Yesus Kristus jadi raja gelah kai si nggo ceda erkiteken dosa, jadi mehuli, emaka kerehen Yesus ku doni enda guna mpehuliken kai singgo ceda.
            Geduari siidah melala kekacauan si terjadi ibas doni enda, khususna ibas negaranta. Enda jadi erkiteken persengkokolan si lit. Alu bage kita harus sigejapken maka kita enda idilo ras ipilih guna mpehuliken kerina singgo ceda. Ibas arti kata arah kata ras perbahanen teridah min kerna simehuli bas kita. Lit kegeluhen sibujur bas kita. Moralnta teridah i tengah-tengah kegeluhen eme moral simehuli.
            Tapi harus siinget ugapa pe hebatna penguasa-penguasa ermupakat guna kepentingan pribadi. Tetap la banci naluken kuasa ras sura-sura Tuhan guna simehuli. Janah guna sie me kita ipilih gelah kita ngasup naluken kerina si la mhuli.
            Jera ras ernalem man Tuhan merupaken jalan satu-satunya guna ndatken kemalemen ate, labo arah kebayaken. Erkiteken perayaken kebayakan ras sura-sura daging maka, melala kita erpekat ngelawan Dibata. Adi enda lalap sibahan maka reh me pagi hukumen Tuhan. janah hukumen Tuhan maba kematen man banta.

Pdt. Steven Kumenit, STh.M.Min