Dibata Si Kutandai (Yohanes 4:21-26, 34)

PERPULUNGEN JABU-JABU

GEREJA GBKP

TANGGAL 19 – 25 FEBUARI 2017.

Yohanes 4:21-26, 34.

Tema : Dibata Si Kutandai.

LATAR BELAKANG

1.      Sijadi bahan oratenta sendah eme bagin percakapen Yesus ras diberu Samari ras ajar-ajar Yesus i sumur Jakup, tupung Yesus ibas perdalanen ku Galilea.

2.      Tupung Yesus kundul i tepi sumur Jakup, reh sekalak diberu Samaria siatena muat lau i je. Erkiteken wari e nggo ciger, nina Yesus man diberu Samaria e, ntah lau ndu sitik. Labo lau siibereken diberu Samaria tapi sada “statmen” nina, kam kalak Jahudi, aku kalak Samaria ngkai maka ipindondu lau man bangku. Perlu siteh, ilebe-lebe kalak Jahudi, kalak Samaria eme kalak perdosa ras najis, emaka la nggit kalak Jahudi “bergaul” ras ia. Tapi nina Yesus, adi tehndu kerna pemere Dibata ras itandaindu ise simindo lau e man bandu, tentuna ipindondu man bana lau si mereken kegeluhen. Perlu siteh man kalak Samaria, sumur Jakup eme sumur simereken kegeluhen man bana, sebab amin gia paksa perlego, lau sumur e la keri, emaka kerina muat lau i je, termasuk mereken inemen man  asuh-asuhen. Emaka nina diberu Samaria lit kin siterbelinen asangken sumur Jakup enda ? nina Yesus aku me lau kegeluhen, Ia me siipadanken Tuhan. Ate Yesus ngataken sie, gelah diberu Samaria (Sikhar) meteh kerna pasu-pasu Tuhan siterbeleinen. Tuhu, sumur Jakup e merupaken pasu-pasu Tuhan, tapi lit siterbelinene pasu-pasu Tuhan e, eme Yesus Kristus.

3.      Nina Yesus o bibi, teklah kam man bangku, sebab reh me pagi kalak lanai ersembah ibas deleng ah (ingan ersembah kalak Samaria), ras lanai kalak ersembah i Jerusalem (ingan ersembah kalak Jahudi), tapi ersembah man Dibata. Kesah Si Badia singajari uga searusna ersembah man Dibata alu payo. Emaka adi sinen terdauhen,  diberu enda jadi tek ras merubah perbahanen geluhna, jadi nggeluh si mehuli siersaksi kerna Yesus.

4.      Ate Yesus ngataken man diberu Samaria e, ersembah si payo labo itentuken arah ingan, tapi ersembah sipayo kenca iya ipinpin salu Kesah Si Badia. Bagepe Yesus mpetandakan diriNa man diberu Samaria e, gelah diberu e sadar ras jera.Alu bage erberita diberu e man kalak sideban.

5.      Kenca dung Yesus ngerana ras diberu Samaria, reh ajar-ajarNa maba nakan, emaka nina ajar-ajarNa,  o guru man kita. Tapi nina Yesus lit kap panganku si la itehNdu. Tapi erkite-kiteken nggo sisungkun-sungkunen ia, maka nina Yesus panganku eme  ngikutken peraten Dibata ras ndungi dahin siiberekenNa man bangku. Jenda Yesus ngerana man ajar-ajarNa, maka dahinNa eme ngelakoken persuruhen Dibata, eme ngelai i tengah-tengah doni enda, guna keselamatan manusia. Jadi nina Yesus pendahinNa e, panganNa.  Alu bage Yesus mereken sada pengajaren man ajar-ajarNa kerna peraten Tuhan. Ras mpetandakan alu jelas ise situhuna Ia. 

APLIKASI

            Jadi penungkunen man banta, nggo kin sitandai Dibatanta e. Secara sederhana banci sikataken, Dibatanta e me Dibata sitelu sada. Dibata Bapa, Anak ras Kesah Si Badia. Dibata sitandai kita eme Dibata sierkuasa, siperkeleng ras simereken kegeluhen ras keselamatan man banta. Bagepe Dibata e Dibata si Badia. Janah ibas Tuhan maka la kita muas ras melihi. Ibas kita nandai Dibata alu payo maka nggit ras pang kita ersaksi kerna Ia ibas kegeluhenta tep-tep wari.

            Kita banci saja lenga mbages ras payo penandainta man Tuhan, tapi ibas kegeluhenta tep-tep wari sadar ntah la sadar, situhuna Tuhan nggo mpetandaken diriNa man banta. Dibata erdahin ibas kegeluhenta tep-tep wari i jaga ras ikawaliNa. Ipasu-pasuna kita. Tapi lenga sibuka pusuh ras ukurta, emaka tampah kurang penandaita man Dibata. Erkiteken kurang penandainta man Dibata emaka lit denga senina turangta jemak “jimat-jimat”. Lit denga make pelaris adi ia perbinaga. Bagepe lit denga mindo penampat man kuasa-kuasa doni enda, rsd.

            Ibas kita nandai Tuhan alu payo, maka nggit kita ngelakoken sinehuli si ngena ate Tuhan. Kita nggit ngelakoken peraten Tuhan, guna kiniulin/keselamatanta ras doni enda.

Pdt. Steven Kumenit, STh.M.Min.