Kiniersadan Ajar – Ajar Yesus (Yohanes 17:21-26)

PERPULUNGEN JABU-JABU (PJJ)

GEREJA GBKP

TANGGAL 26 MARET – 3 APRIL 2017.

Johanes 17 : 21 – 26.

Tema : Kiniersadan Ajar – Ajar Yesus.

LATAR BELAKANG

1.      Sada wari ope wari raya Paskah kalak Yahudi, Yesus ras ajar-ajar man ras-ras. Jenari kenca dung man Yesus ngerana man ajar-ajarNa, sebab keleng kal ateNa ajar-ajarNa seh ku kedungenna. Janah ibas palas keleng ate eme gelah Yesus la sirang ras ajar-ajarNa, ertoto Yesus man BapaNa i surga.

2.      Yesus ertoto man BapaNa i Surga, sebab iteh Yesus nggo seh paksana Yesus nadingken doni enda. Yesus ipermuliaken. Yesus ipermuliaken arah kematenNa. Erkiteken sie me salah sada siitotoken Yesus eme kerna kerina kalak sitek man baNa. Kerina kalak si tek man Yesus arus nggeluh ibas persadan. Siimaksudken nggeluh ibas persadan eme, ersada sapih-sapih ia kalak sitek, bagepe ersada kerina kalak sitek ras Yesus Kristus. Persadan arus megegeh ras la terpisahken sada ras sidebanna, bagi Bapa ersada ras Yesus Kristus (model persadan).

3.      Persadan kalak si tek, la saja terjeng persadan organisasi, tapi persadan keleng ate. Janah ibas persadan keleng ate enda sipatna misioner. Emaka keleng ate arus teridah ibas persadan. Ibas kata sideban persadan e  arus irakut ibas keleng ate, gelah doni enda tek maka Yesus Kristus tuhu-tuhu isuruh Dibata ku doni enda. Sebab bagi siteh nterem kalak Yahudi la tek maka Yesus eme Mesias si ipadanken Dibata. Erkiteken sie me atena munuh Yesus.

4.      Persadan kalak si tek man Yesus Kristus arus berbeda ras persadan doni enda. Persadan si lit ibas doni enda la bo erpalaskan keleng ate. Emaka adi idahna kerna persadan sierpalasken keleng ate situhu-tuhu mehuli, maka tek ia man Yesus ras nggeluh me ia ibas persadan kalak si tek man Yesus Kristus e.

5.      Pertoton Yesus nandangi kerina kalak si tek la saja terjeng ibas doni enda. Tapi pe gelah kalak si tek banci nggeluh ras Yesus ibas surga. Tujunna gelah kalak si tek tuhu-tuhu ngidah kemuliaan siibereken Bapa man Yesus. Idah kerina kalak si tek, maka Yesus tuhu-tuhu keke ibas si mate nari, janah nangkih ku surga ras nggeluh ibas surga.

APLIKASI

            Pertoton Yesus enda memotivasiken gereja-gereja gelah tetap erdalan sebage gereja eme nehken kai singena ate Tuhan. sebab siidah genduari mekatep gereja tergoda ku bas nggeluh erbana-bana, emaka lit gereja pecah. Bagepe seh genduari, tempah teridah mesera gereja nggeluh ibas persadan. Enda erkiteken dogma simbedakenca. Emaka ula min kita “terpenjara” ibas dogma masing-masing. Tapi kita arus nggeluh ibas saling menghargai ras saling mengakui.

            Kita enda ajar-ajar Yesus, emaka selaku ajar-ajar Yesus siarus siperdiateken man banta eme persadan. Janah persadan enda la saja terjeng persadan lahiriah ntah formal ngenca, sebab adi enda sidalanken, maka sijadi bas gereja eme perpecahan. tapi persadan sierpalasken keleng ate ngerakut kita guna sitedehen ras sikeleng-kelengen. Janah ibas persadan  erpalasken keleng ate enda arus teridah ibas perbahanen-perbahanen.

            Persadan gereja arus ngikuti aturen siberlaku i tengah-tengah gereja singgo iputusken ras-ras. La banci ngikuti aturen sendiri, la banci nggeluh egois, nggeluh sektoral/partikularis. Emaka penting bas kita selaku ajar-ajar Yesus nggeluh ibas persadan gereja arus lit bas kita eme keleng ate Kristus ras nggeluh ibas kiniteruken ukur, ras patuh ibas aturen persadan gereja. Tuhu ibas kita lit perbedaan cara rukur, karakter, status sosial, tapi labo berarti enda simabai kita ibas perbedaan prinsip nggeluh ibas gereja. Tapi justru gereja si mpersadaken kerina perbedaan e. Gelah ersada kita kerina (Ut Omnes Unum Sint).

            Nggeluh ibas persadan gereja situhu-tuhu sierpalasken keleng ate, kita arus termotivasi nggeluh ibas persadan situhu-tuhu, janah ras-ras ngelakoken simehuli, kebujuren ras kekelengen, gelah doni  meteh maka persadan enda erkiteken Yesus. Alu bage ngena ate kalak nggeluh ibas persadan e. Bagepe ibas kita ndalanken persadan gereja alu mehuli maka kita pasti nggeluh ras Yesus i surga. Kita pe ikut ipermuliaken.

Pdt. Steven Kumenit, STh.M.Min.