Gereja Si Maba Kejuah-Juahen Nandangi Bangsa Ras Negara (Daniel 6:4,10, 19-28)

PERPULUNGEN JABU-JABU (PJJ)

GEREJA GBKP

TANGGAL 20 – 26 AGUSTUS 2017.

Daniel 6:4,10, 19-28.

Tema : Gereja Si Maba Kejuah-Juahen Nandangi Bangsa Ras Negara.

LATAR BELAKANG

1.      Raja Darius ersura-sura  ngangkat Daniel jadi wakilna. Palasna erkite-kiteken tupung Daniel jadi wakil raja situgasna mperdiateken pendahin gubernur-gubernue mehuli ras terteki.

2.      Sura-sura raja Darius e erbahanca lit si ate cian, emaka mupakat kalak enda ndarami kesalahan ibas pendahin Daniel, tapi la datca. Arih ka mulihi kalak enda, janah nina :  ibas pendahin Daniel sada pe la lit kesalahanna, emaka mari sijumpai raja Darius janah sipindo gelah raja Darius mpedarat surat perintah gelah sedekah telu puluh wari, kerina rakyat la banci mindo man ise pe seakaten man raja Darius saja. Arah enda ngenca maka banci sidat kesalahan Daniel. Emaka reh kalak enda, jumpai raja Darius janah ipesehna kerna rencana sijahat kalak enda. Raja Darius ngueken pemindon kalak enda, emaka minter isuratken perintah ras i stempelna guna ipebetehken man kerina rakyatna. Kenca iteh Daniel raja Darius nggo nyetujui pemindon imbang-imbangna, minter mulih Daniel ku rumahna, nangkih ia ku loteng, janah ertoto Daniel man Dibata.

3.      Bagi semalna selaku kalak Jahudi situtus, Daniel rusur ertoto man Dibata telu kali sada wari, janah jendela ngadap kempak Jerusalem. Engkai jendela arus ngadap ku Jerusalem, sebab i Jerusalem  lit Rumah Pertoton. Ibas Rumah Pertoton e tading Dibata. Bagepe ertoto telu kali sada wari. Kenca idah imbang-imbang Daniel la mperdiateken perintah raja, sebab Daniel tetap ertoto man Dibata, emaka minter iadukenna ku raja Darius. Megi berita enda ceda kal ate raja Darius, emaka idaramina dalan pulah gelah Daniel banci pulah ibas hukumen nari. Sada wari idaramina dalan pulah, tapi la datca, bagepe nggo reh imbang-imbang Daniel mindo gelah Daniel ihukum alu ngambengken ku lubang singa. Erkite-kiteken perintah ras stembel raja nggo ndarat, emaka amin gia raja pe, ia arus ngelaksanakan perintah e. Alu bage Daniel ihukum alu ngambengken ku lubang singa.

4.      La tetap ukur raja Darius kenca Daniel ihukum, enda teridah ibas gedang-gedang berngi raja Darius la banci tunduh, la man janah la nggit ngenehen keriahen kai pe. Emaka pagi-pagi silampas minter raja Darius ku lubang singa, ibukana tutup lubang singa e, jenari alo sorang megang nina o Daniel suru-suruhen Dibata  singgeluh ! ngasup kang Dibata siisembahndu ngkelini kam bas singa-singa e nari. Ngaloi Daniel : o raja rasa lalap lah kam nggeluh. Dibata nuruh malaikatNa guna nutupi babah singa-singa e gelah ola sakitina aku. Enda ibahan Dibata sebab aku kalak bujur ras la lit salah sikubahan man bandu. Seh kal riahna raja megi sora Daniel, emaka minter isuruh raja gelah Daniel ipedarat ibas lubang singa nari. Jenari imbang-imbang Daniel, termasuk ndehara ras anak-anakna ihukum raja alu iambengken ku lubang singa. Jenari ipedarat raja sada surat perintah man kerina rakyatna gelah rakyatna arus mbiar ras nghamati Dibata siisembah Daniel. Sebab Dibata siisembah Daniel eme Dibata singgeluh simerentah rasa lalap ras la termasapkan. Kuasa Dibata la erkeri-kerin. Dibata singekilini manusia. Ibahan Dibata tanda kuasa simejin subuk i surga bagepe i doni. Ibas singa simerawa nari ipulahi Dibata Daniel.

5.      Dibata nelamatkan Daniel ibas lubang singa nari. Janah kuasa Tuhan siicidahken arah perlindungan man Daniel, erbahanca lit pengakun raja Darius kerna kuasa Tuhan. Pengakun kerna kuasa Dibata si la ersibar e itandai i belang-belang kerajan Babel. Bagepe erkiteken penemani ras kepentaren siibereken Dibata man Daniel, terjadi me perlindungen man kerina bangsa Israel.

APLIKASI

            Tugas gereja ibas doni enda eme mereken sira ras terang (bdk. Matius 5:13-16). Tujun kerina e gelah doni enda ngelakoken simehuli singena ate Tuhan. Emaka gereja arus berpihak nandangi kalak musil, lemah ras kalak siipinggirken (imarginalkan). Alu kata sideban gereja arus peduli nandangi kalak simbutuhken penampat.

            Gereja arus tuhu-tuhu menyuarakan suara kenabianna nandangi doni enda. Gereja ituntut gelah ngenen keadaan bangsa ras negara. Kai situhuna siterjadi ibas bangsa ras negara e. Gereja la banci tutup mata kerna kerina siterjadi ibas bangsa ras negara, khususna bangsa Indonesia.

Sigejapken Malala siarus ipekana ibas bangsa Indonesia,eme penegakan hukum, ekonomi si lenga stabil, KKN, disintegrasi, bagepe lit sician nandangi kehadiran gereja. Amin bage gia status gereja sebage kula Kristus, janah idilo guna mpeseh Berita si mehuli,  la banci kem/sinik saja, ntah pe terkontaminasi kepentaren doni enda. Kehadiran gereja, khususna GBKP arus ernanam man jelma sinterem. Janah enda me singgo ibahan GBKP arah nampati korban erupsi gunung sinabung, mberantas perjudin ras narkoba, nambati kalak si pinakit HIV/AIDS,rsd. Keberpihakan gereja nandangi kalak simbutuhken penampat, ras tetap kritis ibas kebijakan-kebijakan pemerintah arus tetap idalankan. Gereja la perlu mbiar menyuarakan suara kenabianna, sebab Dibata tetap ngarak-ngarak gerejaNa.

            Ipihak sideban, kita selaku gereja pe arus  ncidahken kerna kebadiaan nggeluh. Kita selaku gereja secara individu arus ngelakoken simehuli singena ate Tuhan. Kita ngasup erbahan sibage adi nggeluh spiritualitasta. Tutus kite ergot man Than, Makala bas kita integritas nggeluh.  Adi lit perbeben ibas kegeluhenta, siampeken kerina e man Tuhan. Gelah Tuhan sierdahin ibas pusuhta, janah ikepkepna kita, gelah la kita kena mela. Alu spritualitas si mehuli bas kita, maka kalak sideban banci nggecapkenca. Alu bage fungsi gereja simbaba kejuah-juahen man bangsa ras negara terealisasi ibas gereja secara institusi ras gereja secara pribadi.

Ibas negara nggeluh ibas kejuah-juahen, berarti kita banci nggeluh tenang ras dame. Amin gia enda merupaken proses. Tapi mari sibenaken ibas dirinta nari. Ula kita mbiar ras ikut ibas si la mehuli.

Pdt. Steven Kumenit, STh.M.Min.