Rabu, 09 Agustus 2017

Jadilah Mbisa (Nehemia 4:11-15)



PERPULUNGEN JABU-JABU
GEREJA GBKP
TANGGAL 13-19 AGUSTUS 2017.
Nehemia 4:11-15.

Tema : Jadilah Mbisa.

LATAR BELAKANG
1.      Nggo cukup ndekah kenca bangsa Juda mulih ibas pembuangan i babel nari, tembok Jerusalem lenga dung, emaka Nehemia sipendahinna nikapken inemen man raja (juru minum raja), ceda atena. Emaka ipindona man raja Artaserses gelah raja mereken ijin man bana guna berkat ku Jerusalem mbangun tembok Jerusalem ras pintu-pintu gerbang tembok Jerusalem. Pemindon Nehemia e iueken Raja. Emaka berkat me Nehemia ku Jeruselem guna mpekena-kena tembok Jerusalem ras mbangun pintu-pintu gerbang tembok Jerusalem e.
2.      Sangana pembangunan tembok Jerusalem ras pintu-pitu gerbang ikerjaken, nggo setengah asa ganjangna dung, sebab ergia-gia ukur bangsa Juda erdahin.  Kepeken lit si ate cian eme Sanbalat, Tobia, kalak Arab, Kalak Amon ras kalak Astoto. Emaka erpekat kalak enda guna merang Jerusalem gelah guntar, alu bage bangsa Juda mbiar, janah lanai terterusken pembangunan majekken tembok Jerusalem e.
3.      Kai siatena ilakoken musuh-musuh bangsa Juda (Sanbalat, Tobia ras teman-temanna) iteh Nehemia ras kalak Juda, emaka ibas paksa ku paksa kalak Juda mpersingeti Nehemia kerna rencana e. Emaka ibahan Nehemia sada strategi guna gelawan ras menggagalkan rencana Sanbalat, Tobia ras teman-temanna e. Strategi siibahan Nehemia eme isuruh Jeremia gelah bangsa Juda erpedang, erlembing ras erpanah janah erjaga sue ras terpuk masing-masing i pudi tembok Jerusalem si lenga dung. Bagepe imotivasiken Nehemia gelah bangsa Juda ula mbiar. Enda ikataken Nehemia, sebab iidah Nehemia bangsa Juda nggo mbiar. Motivasi siibereken Nehemia eme ula mbiar man musuh-musuh e, sebab Tuhan e mbelin ras megegeh emaka erjuanglah guna senina-seninanta sada bangsa, guna anak-anak ras ndeharandu ras rumahndu. Motvasi enda ampuh kal, emaka turah kinipangan man kalak Juda sierjaga tembok Jerusalem ras nggit erperang ngelawan musuh-musuhna.
4.      Musuh-musuh bangsa Juda ngidah enda kerina minter ia mbiar, emaka lanai pang ia merang bangsa Juda. Situhuna musuh-musuh bangsa Juda la bo mbiar man bangsa Juda, tapi erkite-kiteken Dibata nggo erdahin man musuh-musuh bangsa Juda. Dibata si naluken kerina sura-sura musuh bangsa Juda. Sebab ate Dibata gelah bangsa Juda banci ndungi tembok Jerusalem ras pintu-pintu gerbangna, gelah kalak Juda banci ersembah alu tenang ras meriah ukur man Tuhan.
5.      Makna tembok Jerusalem eme  benteng perlindungan, gelah kalak Juda banci nggeluh aman, bagepe banci ersembah man Tuhan alu dame ras keriahen. Bagepe mengembalikan identitas bangsa Israel selaku bangsa Dibata, sebab i Jerusalem lit Rumah Pertoton. Enda me sijadi semangat Nehemia mbangun tembok Jerusalem.

APLIKASI
            Temanta sendah eme Jadilah Mbisa. Siimaksudken tema enda eme kalak situhu-tuhu nggit mbela masyarakat, nggit mbangun bangsa ras ngandalkan Tuhan. Jadi lit biak patriotisme ras erguna man kalak sideban. Bagepe keriahen siidat kalak merupaken keriahenna.
            Jadi penungkunen man banta, apakah kita banci jadi kalak si mbisa ? banci. Emaka siutama lebe eme kita arus erkemalangan ras mbiar man Tuhan. sebab ibas kita erkemalangan ras mbiar man Tuhan si lit bas kita eme litna nggeluh erdiate ras mediate nandangi kegeluhen sosial ras mbangun bangsa. Terdilo kita guna banci ngelakoken simehuli singena ate Tuhan i tengah-tengah gereja ras masyarakat. Amin gia kita masyarakat biasa, tapi nggit kita muat bagin ibas mbangun bangsa alu gotong royong, mbayar pajak ras la nggit ambengkeng sampah “sembarangan”. Bagepe la kita mbiar ras terpengaruh adi reh man banta profokator siatena ncadai persadanta. Bagepe adi lit berita-berita si la mehuli, maka tugasta eme ngelaporkan man pemerintah.  Adi kita ipercayakan menjabat ras ngelakoken sada-sada dahin, maka siilakoken kita eme berpihak man masyarakat. Bagepe simotivasikan man masyarakat gelah pembangunan bangsa eme ibas rangka kesejahteraan bangsa kita. Kesejahteraan keluarga kita. Kesejahteraan anak-anak kita pagi. Alu kata sideban adi kita itugasken jadi pemimpin, maka kita harus memotivasikan masyarakat gelah nggit mbangun alu la mementingkan diri sendiri, tapi arus ipikirken kesejateraan bangsa, keluarga ras anak-anak pagi. Isamping sie selaku pemimpin arus lit kepentaren guna ndarami serpang pulah adi kune lit masalah ras tantangan siihadapi ibas mbangun negeri Indonesia enda. Tuhu-tuhu pemimpin e jadi motivasi man masyarakat guna mbangun negera enda alu mehuli. Alu bage kita banci nginani negara Indonesia alu dame ras teneng.

Pdt. Steven Kumenit, STh.M.Min.

4 komentar:

  1. Bujur ibas referensindu Pdt. Tuhan simasu masu pelayanenndu

    BalasHapus
  2. Menambah wawasan ilmu kekristenan...untuk penggejapan ras motivasi teman2 si deban. Bujur.

    BalasHapus
  3. Bujur pendeta. Berngi enda pjj i rumah kami enda tema na.. Bujur

    BalasHapus
  4. Bujur pendeta. Berngi enda pjj i rumah kami enda tema na.. Bujur

    BalasHapus