KHOTBAH MINGGU, 20
AGUSTUS 2017.
GEREJA
GBKP
Invocatio : Kusikapken lebe pangan man bandu, gelah banci
nambahi gegehndu guna nerusken perdalanenndu. Sabap ego kami rah cu
infancy enda,
e sada kehamaten man bangku, emaka kuelai ateku kam asa bancina (Kejadin
18:5b).
Ogen : Rut 2:14-19 (Tunggal).
Khotbah : Lukas 10:30-37 (Tunggal).
Tema : Ngelai E Sada Kehamaten.
LATAR BELAKANG
1. Bangsa
Israel (Jahudi) tertima-tima kerna Mesias. Sebab Mesias eme padan Dibata guna
nelamatkan bangsa Israel. Tapi kenca reh Mesias eme Jesus Kristus, itulakna. Khususna
sinulaksa eme guru-guru agama Jahudi, peminpin-pemimpin agama Jahudi ras kalak
Farisi. Emaka ibas erbage-bage kesempaten idaramina keselahan Jesus, gelah arah
keselahan e, Jesus banci itangkap, janah ihukum. Palas kinilasenanganna eme :
a). Jesus tubuh selaku manusia, ibas
keluarga musil ras tubuh i karang asuh-asuhen. b). Terusik kalak Parisi,
guru-guru agama ras pemimpin-pemimpin agama kalak Jahudi kerna pelayanan Jesus.
c). Jesus la nggit kompromi kerna si la benar ras Jesus rususr mbela kalak si
imarginalkan, rsd.
2. Ibas
rangka ncubai Jesus reh sekalak guru agama Jahudi man Jesus guna nungkun kerna
kegeluhen si rasa lalap. Penungkunen enda la ijabab Jesus secara langsung, tapi
Jesus balik nungkun man guru agama Jahudi, nina kai kin si tersurat ibas
Pustaka Si badia ras kai siiogendu e. Jabab guru agama : ngkelengi Dibata ras
manusia. Jenari nina Jesus payo jababndu e. Bahanlah bage. Tapi ibas rangka
pebujur-bujur bana, nina ise kin teman manusia e.
3. Ibas
rangka mereken pengangkan kerna teman manusia, maka penungkunen kerna ise teman
manusia, ijabab Jesus alu perumpamaan : lit sekalak singincuah i Jerusalem nari
ku Jeriho. I tengah dalan jumpa ia ras perampuk, la saja barang sirampukna tapi
igudamina ia seh menam mate. Jenari mentas sekalak imam arah dalan e, tapi
isilahkenna. Ibahan imam bage erkite-kiteken mbiar ia adi dadapna mis ia lanai
bersih. Sebab ibas aturen agama, kalak sidadap mait, ia la bersih sedekah pitu
wari (Bilangan 19:11). Jadi akap imam kalak e nggo mate. Bagepe reh ka sekalak
Lewi arah dalan e. Nilah kalak Lewi. La nggit kalak Lewi nampatisa. Bahanna bage,
sebab kalak Lewi itugasken/ngelai i rumah pertoton, emaka mbiar ka ia adi la
bersih. Bagepe mbiar pe ia adi e merupakan umpan perampuk. Sebab biasa perampuk
erbahan bage guna ngerampuk kalak. Tapi reh kalak Samaria ibas dalan e, idahna
kurban perapuk, turah mekuah ate, emaka minter isampatina. Itamaken minak ras
anggur ku luka-luka dingen ibalutina luka-luka e. Jenari iangkatna ku datas
kelede, ibabana ku ingan penginapen guna itambari. Tapi erkite-kiteken kalak
Samaria arus berkat, emaka ibereken kalak Samaria dua duit pirak man siempuna
penginapan gelah siempuna penginapan banci nambari ia. Bahkan nina kalak
Samaria, adi kari la bias duit e, pagi asum reh mulihken itambahi kalak Samaria
duitna. Enda ngatakenca kalak Samaria la memikirken kerna aturen agama, tapi i dorong
kerna motivasi nggit nampati erpalaskan mekuah ate. Bagepe perbahanen simehuli
siibahanna la erpalaskan jasa. Emaka kalak Samaria enda nggit berkorban ibas
rangka keselamatan.
4. Kenca
ituriken Jesus perumpamaan, minter i sungkun Jesus man guru agama Jahudi. Menurutndu
si telu enda (Imam, kalak Lewi ras kalak Samaria), ise teman manusia man kalak
si korban perampokan e. Nina guru agama Jahudi kalak sinampati ia. Perlu siteh
: a). Man kalak Jahudi teman manusia eme sapih-sapih ia kalak Jahudi. b). Najis
akapna gelari gelar Samaria, sebab akap kalak Jahudi kalak Samaria e kalak najis.
Kalak si la sada kiniteken ras ia. Kalak sirusur ihina kalak Jahudi.
5. Alu
nuriken perumpamaan, janah kalak Samaria sindalanken keleng ate. Ate Jesus
ngatakenca. Teman manusia eme kalak sindalanken keleng ate alu la mperhitungken
agama, suka ras golongan, bagepe aturen
agama “sikaku”. Mpraktekken teman manusia eme ngkelengi Tuhan arus teridah ibas
ngkelengi manusia. Undang-undang kekelengen arus irealisasikan ibas kegeluhen
tep-tep wari. Enda me simbedaken kalak Samaria ras imam bagepe kalak Lewi. Jadi
keselamatan/kegeluhen rasa lalap la terjeng pemeteh saja, tapi arus idalanken
ibas kegeluhen tep-tep wari.
APLIKASI
Mamre GBKP nggo berumur 22 tahun, sebab ibas tanggal 26
Agustus 1995 i PPWG/Zentrum GBKP Kabanjahe secara resmi ibentuk. Motto Mamre
eme Mamre Erdiate ras Mamre Erpemere. Jadi penungkunen nggo kin motto enda
idalanken Mamre. Tuhu motto enda njadiken Mamre lebih mperdiateken teman
manusia isekelewetna, ras la saja terjeng mperdiateken tapi lit aksi.
Sehubungen HUT Mamre bagepe minggu Mamre, sekali enda
Mamre isingetken kerna ngelai eme sada kehamatan. Ngelai eme karakter Tuhan.
Janah ngelai eme persuruhen Tuhan. Bagepe ibas kita ngelai berarti kita nggo
nehken kekelengen.
Erkite-kiteken ngelai merupaken karakter Tuhan ras pe
merupaken persuruhen Tuhan, maka ibas kita ngelai berarti merupaken sada
kehamatan man banta, kita banci jadi alat Tuhan guna nehken kekelengen man
kalak sideban. Janah perlu siteh ibas kita ngelai berarti kalak sideban banci
tersampati. Alu bage kita dat pasu-pasu idur Dibata nari.
Erpalaskan bahan khotbahnta sekali enda, kita isingetken
adi tuhu kita ngkelengi Tuhan, teridah min ibas kegeluhenta tep-tep wari. Adi
tuhu kin kita tutus ku gereja ncidahken biak ngelai ibas kegeluhenta tep-tep
wari alu la mertimbangken untung rugi, ntah pe aturen-aturen agama sikaku. Tapi
ngelai arus arah pusuh siersuruh.
Palas kita ngelai eme keleng ate ibas Tuhan nari ras ate
mekuah. Alu bage ngasup kita ngelai alu mehuli.
Pdt.
Steven Kumenit, STh.M.Min.
Tidak ada komentar:
Posting Komentar