Kemalemen Ate Orang Tua (Mazmur 37: 23-26)

PERPULUNGEN JABU-JABU (PJJ)

GEREJA GBKP

TANGGAL 1-7 OKTOBER 2017.

Masmur 37:23-26.

Tema : Kemalemen Ate Orang Tua.

LATAR BELAKANG

1.      Sijadi bahan oratenta sendah eme raja Daud mereken pengajaren man anak singuda gelah tetap nggeluh ibas kebujuren ras kebenaren. Sebab kalak singgeluh ibas kebujuren ras kebenaren ikawali Tuhan, bagepe anak-anak singgeluh ibas kebujuren, kebenaren ras keleng ate mereken kemalemen ate man orang tua.

2.      Pengajaren enda isehken raja Daud sebab idahna anak singuda mora atena nandangi kalak jahat siitempa-tempa ipasu-pasu Tuhan. La lit penghukuman ibas Tuhan nari nandangi kalak sierbahan kejahaten.  Emaka turah nembeh ate man kalak jahat. Tapi payo bayak ia, amingia kebayakenna datna arah taki pajik ntah pe kajahaten nari. Bagepe la lit kalak jahat nggeluh ibas kekelengen, sebab la ia mbiar ras ernalem man Tuhan.   

3.      Ngidah enda, raja Daud ngajarken man kalak singuda maka tetap kalak jahat ihukum Tuhan emaka ola morahi tapi sabarlah nimai penghukuman Tuhan. Janah olah pelepas dirindu ikuasai nembeh ras aru ate.

4.      Raja Daud pebetehken Pengalamanna eme  kitik-kitikna nari la perna idahna Tuhan nadingken kalak benar. Tuhan ngkawali ras njagai kalak benar. Tuhan jadi permakan nandangi kalak benar (bdk. Mazmur 23). Bagepe keluargana ijamini Tuhan. Keluarga kalak benar (orang tua, anak-anak seh ku kempu) ipasu-pasu Tuhan. Kempu-kempu la jadi kalak pemindo-mindo, amin gia pepinjamkenna sen ras melumbar ia mere. Perlu siteh salah sada tanggungjawab kalak Jahudi eme nampati kalak simusil alu la ngarapken keuntungan. Adi mere pinjaman la banci erbunga. Sebab ibas ndalanken sienda bearti kalak Jahudi nggo nehken ntah pe ndalanken ajaren ras teladan Dibata.

5.      Anak singuda arus nggeluh ibas mbiar ras erkemalangen man Tuhan. Sebab ibas kegeluhen sierkemalangen ras mbiar man Tuhan, maka anak singuda tentuna ndalanken undang-undang Tuhan. Payo banci saja erta kalak sibujur sitik, tapi situhuna ergan ia asangkan kebayaken kalak Jahat. Sebab ibuat Tuhan kuasa kalak jahat. Bagepe amin gia guling kalak jahat, tapi la mekelek penakitna, sebab Tuhan sinegu kalak benar. Emaka arus tadingken kegeluhen sijahat janah nggeluhlah ras Tuhan gelah kalak benar siernalem man Tuhan saja singiani negeri e.

APLIKASI

            Lit piga-piga hal sierbahan malem ate orang tua eme adi anak-anakna megiken cakapna, ras la jadi kalak jahat (tutus ke sekolah, la terikut ibas pinakit masyarakat), jadi kalak pentar, bagepe jadi anak siberhasil (jumpa bulan, matawari ras sangap encari).

            Situhuna kemalemen ate orang tua nandangi anak-anakna lit bas Tuhan. Emaka adi anak-anak megiken kata Dibata ras ndalankenca (bdk. Lukas 11:27), maka kai siikataken i datas otomatis idalanken anak-anak. Termasuk seh anak-anak mperdiateken orang tuana. Ibas erti kata kenca orang tuana nggo lanjut usia, anak-anakna tuhu-tuhu mperdiateken orang tuana. Ugapape kesibuken anak-anak la ia terbeban mperdiateken orang tuana sindube mpebelin-belin ia.

            Tuhu ibas gereja (GBKP) mperdiateken orang tua singgo lanjut usia (Saitun) alu mbentuk PA Saitun, siujunna gelah orang tuanta singgo Saitun ibekali ras ipegegehi alu kata Dibata, gelah Saitun tetap nggeluh ibas ngerembakken diri man Tuhan. Bagepe nggo isikapken gereja eme YAPOS guna mengakomodir anak-anak si nggo sibuk, janah tempa-tempa kurang perhatinna secara pendampingan man orang tua (Saitun).

            Hal sipaling penting gelah orang tua nggeluh ibas kemalemen ate, amin gia gereja nggo berperan aktif ibas ngerawat secara jasmani ras kata Dibata. Tapi selaku anak-anak arus ncidahken nggeluh mbiar ras ernalem man Tuhan. Tandana nggeluh mbiar ras ernalem man Tuhan, anak-anak arus tutus ku gereja, PA, PJJ, ras kegiaten-kegiaten gereja sideban,  bagepe nggeluh bujur ras benar subukibas keluarga, pendahin ras masyarakat.

Pdt. Steven Kumenit,STh.M.Min.

Erdame Biak Kalak Si Ersembah (Matius 5:21-24)

KHOTBAH 24 SEPTEMBER 2017.

GEREJA GBKP

Invocatio   : Si Penguru-nguru guntar ibahanna kuta, tapi kalak sibeluh rukur njadiken ketenangen (Kuan-Kuanen 29:8).

Ogen         : Roma 12: 17-21 (Antiponal).

Khotbah    : Matius 5: 21-24 (Tunggal).

Tema         : Erdame Biak Kalak Si Ersembah.

LATAR BELAKANG

1.      Si jadi bahan khotbahta sendah eme salah sada bagin khotbah Jesus i datas uruk. Ibas khotbah i datas uruk enda perintahken Jesus gelah jelma sinterem simerupakan kalak Jahudi ola merawa. Enda ikataken Jesus, sebab merawa eme palas kalak banci munuh. Merawa eme bagin ibas emosi si banci erbahanca kita la banci mengendalikan diri, si dungna kita banci munuh kalak sideban. Alu bage Jesus mereken sada antisipasi kerna munuh.

2.      Isingetken Jesus man jelma sinterem, nai nggo itehndu ikataken nini-ninindu ula munuh, sebab kalak simunuh iadili. Pengajaren nini-nini kalak Jahudi ngataken ibas 10 pedah Dibata, khususna pedah si peenamken, je ikataken ula munuh. Maksudna gelah kalak Jahudi ula munuh, sebab munuh eme erdosa. Alu bage kalak Jahudi arus menghidarkan diri ibas pembunuhen. Jadi terjeng menghindar ibas perbuatan/praktek membunuh saja. Alu kata sideban, ibas kalak Jahudi nggo menghindarkan diri ibas pembunuhan, maka kalak Jahudi nggo ndalanken 10 pedah Dibata. Tapi ibas perintah Jesus ula merawa, je itekanken Jesus gelah jelma sinterem banci ngkuasai pusuhna ras la mengakibatkan kita erbahan pembunuhan.

3.      Kalak simerawa man seninana, iadili pagin. Menurut Dr.J.L.Ch.Abineno, siimaksud Jesus kerna merawa i jenda eme merawa si berlangsung terus menerus sidungna turah kebencian. Merawa sibagenda bali ras munuh arah pusuh, erkiteken sie ia arus ihukum.  Bagepe ise singisakkan kalak arus iadili ilebe-lebe pengadilen agama (sahendrin). Bagepe ise singataken man senina o kemali, ia pagin itamakan ibas api neraka. Maksud enda kerina gelah ula lit bas kita menghina ras mengejek seninanta, sebab kita pagi kita ihukum TuhaN. Nina John Stott : Amarah dan caci maki merupakan pertanda jelek dari keinginan menghabisi seseorang yang menjadi penghalang bagi kita atau tidak kita sukai.

4.      Pengajaren Jesus enda, la saja terjeng ngataken lit sada hukuman man kalak simunuh. Tapi  jenda ngataken, lit pengadilen Dibata nandangi kalak simunuh kalak sideban amin gia munuh arah pusuh. Jadi pengadilen agama lit, pengadilen Tuhan pe lit. Pengadilen Tuhan nandangi kalak simunuh eme neraka. Jadi la lit pengampunan nandangi kalak simunuh, adi la lit bas ia pertobatan.

5.      Erkite-kiteken beratna penghukuman nandangi kalak simunuh, maka man jelma sinterem arus lit pertobatan. Sebab percuma nehken persembahen man Tuhan ibas rumah pertoton, adi siinget denga sangkut ukur seninanta man banta, erkite-kiteken salahta man bana. Maka siarus ilakoken eme tadingken persembahen e, erdame lebe ras seninanta e. Ibas erti kata, ope nehken persembahen, arus sidungi lebe kerina masalahta gelah lit pusuh simeciho bas kita nehken persembahen, emaka persembahenta e ialoken Tuhan. Jadi ope denga nehken persembahen, arus lit rekonseliasi bas dirinta. Kita arus erdame lebe bas dirinta, ras seninanta, terlebih man Tuhan. Alu bage jelma sinterem isingetken ibas nehken persembahen, lit hubungenna ras kekelengen secara vertikal ras horisental. Persembahenta ialoken adi hubungan vertikal ras horisental mehuli.  

APLIKASI

            Siidah genduari lit rubat ibas keluarga, lit tawuran sekolah ras perkelahian antar masa, rsd. Tempa-tempa kita gampang kal terprovokasi, emaka sibunuhen kita. Sibunuhen ntah pe simunuh lit kalak kristen. Padahal lit ajaren bas kita kerna ula munuh ras sikeleng-kelengen kita. Jadi penungkunen, engkai maka bage ? enda erkite-kiteken la kita ngasup njaga ntah pe mengelola emosinta. Sebab adi nggo kenca  merawa, janah merawa e la terkendali, si ibahan kita eme ninjui, pekpek, munuh, ntah pe arah kata eme makian. Adi enda sibahan maka sijadi eme ceda hubungenta, subuk kita ersenina bagepe ibas persadan. Bagepe banci ka jiwanta terganggu, la teneng ras stres. Kalak sideban bage ka.

            Ibas ajaren Yesus man banta sekali enda eme sijaga gelah ula kita merawa. Siimaksudken merawa ijenda eme merawa siberkepanjangan simengakibatkan emosinta la terkendali. Bagepe perintah Jesus gelah ula kitik ukur kalak erkiteken kita. Jadi situhuna banci kita merawa ibas inganna, janah arus pedas bene rawanta. 

            Sekali enda kita isingetken uga nggeluh dame. Nggeluh dame berarti arus lit bas kita pusuh simeteruk ukur ras sialem-alemen salah. Adi lit kitik ukur kalak erkiteken kita, maka alu jiwa besar kita arus mindo maaf man bana. Bagepe adi lit kalak erbahan salah man banta, kita singgo tek man Jesus Kristus la perlu sibalas salahna e. Jadi ula subuki si jahat alu sijahat. Inget,  mbalas kejahatan alu kejahatan, berarti kita nggo erdosa. Bagepe la lit hakta balas kejahatan alu kejahatan. Penghukuman eme hak Tuhan. Alu bage adi lit temanta erbahan salah man banta, mari sitotoken gelah ia banci robah.

            Perlu siteh nggeluh erdame eme biak anak-anak Dibata. Kita me anak-anak Dibata e. Tandana kita anak-anak Dibata teridah arah rusurna kita ersembah man baNa. Ersembah man Dibata, berarti kita ngkelengi Dibata. Tapi selaku anak-anak Dibata la banci terjeng ngkelengi Dibata saja. Tapi arus pe ngkelengi temanta manusia. Emaka sepatutna man banta biak ersembah man Tuhan teridah ibas nggeluh erdame. Jadi nggeluh erdame ngataken kita nggo erdame ras Tuhan, bagepe kita nggo erdame ras temanta manusia. Alu bage ibas kita praktekken nggeluh erdame, berarti kita nggo ersembah man Tuhan. Enda me salah sada persembahen simerim man Tuhan (bdk.Roma 12:1).

            Bagepe arus siteh adi rusur kita ersembah man Tuhan, berarti siendesken dirinta ras pusuhta ipinpin Kesah Si Badia. Alu bage erdewasana kinitekenta man Tuhan. Erkite-kiteken erdewasana kinitekenta man Tuhan, maka pusuhta nggeluh alu ketenangen. Bagepe la saja pusuhta siteneng, tapi beluh kita rukur. Emaka ngasup kita ngkuasai emosinta. Bagepe la tenang ukurta ras la tenang kita ersembah man Tuhan adi lit denga temanta sikitik ukurta erkite-kiteken kita. Ibas sienda pusuh ras ukurta ersuruh gelah lit rekonsiliasi kita ras temanta. Adi nggo lit rekonseliasi maka hubungenta singgo ceda banci mehuli mulihi. Enda me siikataken biak kalak siersembah man Tuhan.

Pdt. Steven Kumenit, STh.M.Min.

Dibata Ngukumsa Kalak Si Erlua-Lua (Epesus 5:1-5)

PERPULUNGEN JABU-JABU (PJJ).

GEREJA GBKP

TANGGAL 24 – 30 SEPTEMBER 2017.

Epesus 5:1-5.

Tema : Dibata Ngukumsa Kalak Si Erlua-Lua.

LATAR BELAKANG

1.      Sijadi bahan oratenta sendah eme kata persinget rasul Paulus man perpulungen Epesus gelah ngusih keleng ate Kristus. Keleng ate Kristus sinelamatkan manusia ikayu persilang, merupaken kurban si merim man Dibata. Perpulungen Epesus arus ngusih Kristus, sebab perpulungen Epesus anak-anak Dibata. Perlu siteh perpulungen Epesus kenca tek man Jesus selaku Tuhan, minter ia jadi anak-anak Dibata.

2.      Selaku anak-anak Dibata berarti arus nggeluh badia. Biak-biak kegeluhen ope denga jadi anak-anak Dibata arus itadingken. Em sebabna Paulus mpersingeti gelah perpulungen Epesus ula ngelakoken kegeluhen si la ngena ate Tuhan. Kegeluhen si la biak anak-anak Dibata eme erlua-lua, erlagu la mehuli ntah pe merangap. Belasken saja pe la banci. Bagepe la banci belasken cakap caram, cakap si lang-lang ntah pe cakap sikemali ula min ilakoken ibas perpulungen. Enda isingetken Paulus sebab perpulungen Epesus ope tek man Jesus Kristus, perbahanen-perbahanen sibage rusur ilakoken, janah la merupaken sada masalah man bana. La merupaken dosa man bana.  Bagepe lit ajaren Gnostik si ngatakenca, pertendin ngenca si penting.

3.      Ipersingeti Paulus man perpulungen Epesus, kalak singelakoken kegeluhen si la ngena ate Tuhan la dat bagin ibas kinirajaan Kristus ras Dibata. Ibas erti kata lit penghukuman nandangi kalak si erbahan si la ngena ate Tuhan e, sebab perbahanen-perbahanen si bage bali kap ras ersembah man dibata-dibata sideban. Alu bage kalak sinembah man dibata-dibata sideban ras la nggit nggeluh man sada Dibata saja eme Dibata sinelamatkan manusia ibas Jesus Kristus arus ihukum. Kalak sinembah man dibata-dibata sideban nggo ngelanggar sepuluh pedah Dibata, khususna pedah sipemenah ras sipeduaken. Jadi kejahaten-kejahaten arus ijauhi perpulungen Epesus. Kejahatan-kejahatan e la banci nggeluh ibas persadan perpulungen Epesus. Jadi kajahaten-kejahaten e la banci ilakoken perpulungen Epesus subuk perbahanen bagepe perkatan.  

4.      Kegeluhen perpulungen arus nggeluh ibas muji Dibata. Muji Dibata enda la saja terjeng kata, tapi teridah ibas perbahanen-perbahanen simehuli. Perbahanen-perbahanen simehuli e me siikataken Paulus nggeluh ibas keleng ate Kristus. Sebab perbahanen-perbahanen muji Dibata, la saja nelamatken dirinta, sebab kita tetap nggeluh ibas persadan ras Jesus Kristus, tapi pe nelamatkan kalak sideban. Sebab alu ncidahken kegeluhen keleng ate, kegeluhen si badia, kalak sideban banci ngidah ras mprakteken perbahanen-perbahanen smehuli e. Bagepe la sibaba kalak sideban nggeluh si la mehuli.

5.      Kata persinget Paulus man perpulungen Epesus gelah perpulungen nggeluh ibas moral/etika simbaru (Moral Kristus). Moral/etika simbaru enda ilakoken erkite-kiteken bas nari la bo erkiteken ikontrol darat nari. Alu bage kegeluhen sibersih ras muji Dibata lit man perpulungen.

APLIKASI

             Siidah genduari erlua-lua merupakan standart moral doni, emaka la masalah erlua-lua adi sinen ibas standart doni. Tapi kita enda anak-anak Dibata, emaka lit standart kalak si tek man Dibata siarus nggeluh bas kita eme standart kiniteken. Erlua-lua bali ras nembah man berhala. Alu bage enda ilarang man banta. Sebab ibas kita mpraktekken erlua-lua berarti kita nggo mpraktekkan nembah man berhala. Alu bage merawa Dibata man banta. Emaka ihukum Dibata kari kita.

            Kita anak-anak Dibata emaka kita arus nggeluh ibas keleng ate Kristus. Maksudna keleng ate Kristus sibentengi kita, gelah kita la nggeluh erlua-lua. Maka kegeluhenta eme nggeluh alu ersembah man Dibata. Sibereken geluhta, dagingta korban simerim man Tuhan. Bagepekita nggo mujiDibata ibas kegeluhenta tep-tep wari. Situhuna adi kita erlua-lua maka nembeh ate Tuhan man banta. Dibata ngukum man banta. Penghukuman Tuhan banci sinen ibas dua dampar, eme : 1). Banci ka kita dat pinakit kelamin, HIV/AIDS. 2). La kita atan ibas kinirajan surga.

Pdt. Steven Kumenit, STh.M.Min.