Jadilah Pemimpin Tupung Nguda (Keluaran 33:11; Bilangan 27:15-23)

KHOTBAH MINGGU

10 SEPTEMBER 2017.

GEREJA GBKP

Invocatio   : Anak-anak kami tupung anak perana, balilah min desken batang kayu siturah alu megegeh. Janah anak-anak kami diberu tupung singuda-nguda, jadilah desken tiang si ihiasi ibas suki-suki istana (Masmur 144:12).

Ogen         : 1 Timotius 4:11-16 (Responsoria).

Khotbah    : Keluaran 33:11; Bilangan 27:15-23 (Tunggal).

Tema         : Jadilah Pemimpin Tupung Nguda.

LATAR BELAKANG

A.    KELUAREN 33:11.

1. Enda merupakan turi-turin perdalanen bangsa Israel ku taneh Kanaan. Ibas perdalanen tupung bangsa Israel ngadi ras majekken kemahna guna istirahat, maka minter ibuat musa Kemas Si badia, jenari ipajekkenna. Makna Kemah Si Badia eme ingan perjumpan Tuhan ras bangsa Israel, ingan Tuhan ngerana man bangsa Israel erkelang-kelangken Musa. Bagepe tanda Tuhan hadir i tengah-tengah bangsa Israel.
2. Kenca dung Musa ngerana ras Tuhan desken teman ibas Kemah Si Badia, mulihken Musa ku ingan erkemah, tapi Josua anak Nun tetap tading ibas kemah e. Josua suruh-suruhen Musa si usiana nguda denga la ikut Musa nadingken Kemah Si Badia, tapi selaku suruh-suruhen Musa sipatuh nandangi pemimpinna (Musa), tetap tading ibas Kemah Si Badia, ingan Dibata guna nggit ergaul ras Tuhan, guna tetap ndeher ras Tuhan. Alu bage Josua erlajar kerna hubungan siintim ras Tuhan.

B.     BILANGAN 27:15-23

1. La ate Tuhan Musa nerusken minpin bangsa Israel bengket ku taneh Kanaan, sebab Musa nimpak pedah Dibata tupung bangsa Israel jungut-jungut i taneh si mesawang Sin.
2. Peraten Tuhan nandangi dirina la isimbak Musa, tapi ertoto Musa man Tuhan gelah Tuhan ngangkat sekalak peminpin singasup minpin bangsa Israel, ras bangsa Israel patuh man bana. Adi suruhna erperang maka bangsa Israel ndalanken perentahna. Tuhu-tuhu peminpin bangsa Israel arus jadi permakan situhu-tuhu man bangsa Israel. Maksudna Peminpim bangsa Israel arus mbaba bangsa Israel ku taneh Kanaan tempa-tempa sekalak permakan simbimbing biri-birina gelah la merap erkite-kiteken mbiar, jenari bene. Ibas kepemimpinan sekalak pemimpin, bangsa Israel banci ndatken sada ketenangen. Bagepe Musa sadar, bangsa Israel eme bangsa Tuhan, emaka ise sijadi pemimpin bangsa Israel merupaken hak preogatif Tuhan. Emaka la lit usulen ibas Musa nari ise sibanci jadi pemimpin bangsa Israel. Ipihak sideban erkite-kiteken lit tanggungjawab simbelin man pemimpin simbaru, maka iendesken kerina e man Tuhan.
3. Guna jadi peminpin sigancih Musa, Tuhan nuruh gelah Musa muat Josua anak Nun sekalak simegegeh guna itangkuhken jadi peminpin. Ibas kepeminpinan Josua, Josua arus patuh nandangi perentah Tuhan. Emaka Josua arus nungkun man Imam Eleasar si jadi perpanjangan tan Tuhan mpeseh sura-sura Tuhan nandangi bangsa Israel. Kai siikataken Tuhan minter ilakoken Musa. Jenari minter Musa momoken man bangsa Israel kerna Josua sijadi peminpin bangsa Israel simbaru man bangsa Israel. Bagepe salah sada palas Tuhan milih Josua (Hosea bin Nun) erkite-kiteken jiwa kepemimpinen Josua nggo teridah, tupung Josua (Hosea bin Nun) ras Kaleb mereken motivasi man teman-temanna gelah ula mbiar menghadapi tantangan, amin gia bangsa Kanaan bagi raksasa. Sebab Tuhan nggo mereken bangsa e man bangsa Israel (bdk. Bilangan 13)

APLIKASI

            Minggu enda eme minggu Permata, sekaligus mperingeti HUT Permata pe 69 ken. Tepatna HUT Permata eme tanggal 12 September 2017.

            Sehubungen ras HUT Permata, Permata isingetken gelah tupung nguda denga arus tetap erkemalangen man Tuhan. Tanda erkemalangan man Tuhan nggit ergaul ras Tuhan. Nggit ku gereja ersembah man Tuhan (bdk. Josua). Nggeluh bujur ras patuh ndalanken kai singena ate Tuhan. Ibas kegeluhen sibage la kalak mapas man Permata amin gia usiana nguda denga.

            Tuhu pemimpin eme sekalak siminpin salah sada organisasi/kelompok. Secara umum ras ideal guna memimpin organisasi/kelompok tuhu-tuhu arus lit jiwa kepemimpinan. Tapi ibas pemimpin la saja terjeng memerintah saja tapi lit kuasa man bana sibanci kalak sideban ngikuti perintahna. Bagepe guna jadi pemimpin la itentuken umur ras arus dilaki. Tapi sipenting eme ngasup ia mimpin.

            Tuhu secara ideal pemimpin e arus mimpin sada organisasi ntah pe kelompok. Tapi lit pemimpin amin gia la ipimpinna sada organisasi/kelompok, tapi erkiteken lit jiwa kepemimpinan, khususna ibas gereja, maka nggit ia ngiah-ngiahi (bdk. Mpengaruhi) anggota perpulungen gelah nggeluh erkemalangan man Tuhan. Arah kata ras perbahanen, anggota perpulungen mehamat man bana, emaka la mapas anggota perpulungen si lebih dewasa umurna asangkan Permata (bdk. Ogen). Permata arah Kata Dibata siipelajarina ngasup pe mbimbing si lebih dewasa asangkan ia kerna kegeluhen sibenar si erkemalangan man Tuhan. Bagepe mimpin temanna gelah la jadi Permata si la erkemalangan man Tuhan eme ngelakoken si la benar : Narkoban, main judi, premanisme, mpraktekken pinakit sosial, rsd. Tapi tuhu-tuhu nggeluh ibas erkemalangan ras mbiar man Tuhan. Alu bage babana temanna reh ku gereja ras perpulungen jabu-jabu. Sebab siidah Permata la nterem reh ku gereja. Situhuna enda pe jadi tantangan tersendiri man Permata. Gelah Permata ngasup ndalanken tanggungjawabna selaku anak singuda ibas gereja siarus ikut ibas gelai, maka Permata arus nggeluh tutus ermalangan man Tuhan. Tutus ku gereja ras tutus ertoto man Tuhan. Alu bage Permata, subuk dilaki bagepe diberu ngasup jadi arapan ras penobang kegeluhen bergereja (bdk. Invocatio).

            Sinen genduari, lit piga-piga hal sierbahanca kita jadi pemimpin : 1). Faktor umur. 2). Kinirawan. 3). Kerna jabatan. 4). Kebayaken.

            Ibas rangka anak singuda jadi pemimpin, maka penting orang tua mereken sada pengajaren man anak singuda kerna simehuli, khususna mbiar ras erkemalangan man Tuhan. Alu bage anak singuda terbentuk jiwa kepemimpinenna. Mari sinen  arah Josua ras Timotius. Josua ibimbing Musa. Bagepe Timotius ibimbing Paulus. Jadi litna proses kepemimpinan, subuk i luar diri kita, bagepe I bas kita.

Pdt. Steven Kumenit, STh.M.Min.