Maranatha, Tuhan Re Me (1 Korintus 16:13-24)

PERPULUNGEN JABU-JABU (PJJ)

GEREJA GBKP

TANGGAL 4 – 11 NOPEMBER 2017.

1 Korinti 16 : 13-24.

Tema : Maranatha, Tuhan Re Me.

LATAR BELAKANG

1.      Sijadi oratenta sendah eme kata persinget Paulus man perpulungen Korinti sehubungen ras kerehen Jesus Kristus pedua kaliken. Ibas kerehen Jesus pedua kaliken tentuna menentuken keselamaten kalak sitek man Jesus Kristus. Amin gia arah  Jesus Kristus, bagepe ibas kematen ras kekekenNa, kalak sitek nggo nggeluh ibas keselamatan, tapi la menutup kemungkinan ibas kegeluhen kalak sitek celus/ndabuh ku bas dosa erkite-kiteken perbeben ras kiniseran si la ngasup kalak kristen mersansa, bagepe litna penganiayaan-penganiayaan ras ancaman-ancaman man kalak kristen.

2.      Ibas kerehen Jesus pedua kaliken kalak kristen tetap nggeluh ibas keselamatan, Paulus mereken motivasi ras pergegeh gelah perpulungen Korinti arus erjaga-jaga,tetaplah erkiniteken,janah perpulungen arus bagi dilaki dingen arus megenggeng. Maksudna perpulungen Korinti arus metenget, waspada ras tetap ncikep kiniteken ras kata Dibata, bagepe arus pang ibas mpertahanken kiniteken. Sebab alu cara sibagenda me maka perpulungen Korinti ibas kerehen Jesus pagi banci atan ibas persadan ras Jesus Kristus. Alu kata sideban,ibas nimaikerehen Jesus Kristus, perpulungen arus tetap kerjakan kegeluhen keselamatan ras nggeluh ibas keleng ate kristen.

3.      Paulus ngajuk perpulungen ibas nimai kerehen Jesus Kristus, maka perpulungen pe arus ngergai, mehamat,  ras jadi contoh man Istepanus ras jabuna, Portunet, ras Akaikus, sebab kalak enda la saja sebage serayan Tuhan tapi tutus ngerjaken pendilo Tuhan. Perbahanen sibagenda rupana merupaken salah sada bentuk keleng ate si rehna ibas Tuhan nari. Au bage ibas perpulungen Korinti nggeluh ibas kekelengen maka perpulungen Korinti nggeluh ibas persadan kekristenan. Emaka kalak si la nggeluh ibas kekelengen, terlebih la lit bas ia kelengate man Kristus, berarti idalankenna si la ngena ate Kristus. Emaka kalak sibagepatut ijauhi, ras la banci nggeluh ibas persadan gereja. Bagepe kalak sibage patut kena sumpah.

4.      Gelah tetap nggeluh ibas keselamatan, perpulungen Korinti arus tetap berjuang ndalanken kinitekenna, maka ipeseh Paulus salam ibas teman-temanna sisada kiniteken, janah enda merupaken bentuk ikatan persadan kalak sitek man Tuhan.

5.      Ibas rangka mpegegehi ras mereken motivasi man perpulungen, lit 2 hal siikataken Paulus eme 1). Maranatha siertina rehlah Kam O Tuhan. Ngataken maka Tuhan pernah reh ibas doni enda guna nelamatken kita. 2). Sada permohonan ras pengharapan gelah Tuhan singgo keke ras nangkih ku surga gelah reh ku tengah-tengah perpulungen.  Kenca sienda, Paulus masu-masu perpulungen gelah perpulungen nggejapken Tuhan tetap ras ia.

APLIKASI

            Adi kita ngerana kerna kerehen Jesus mulihken, ibas pustaka sibadia ngatakenca : 1). KerehenNa eme sada kepastin, saja waktu ras tanggalna ise pe la metehsa. KerehenNa bagi pinangko (bdk. Matius 24:43-44; Perbahanen Rasul-Rasul 1:11). 2). KerehenNa guna ngeranaken singgeluh ras singgomati (bdk. Pengakun kiniteken). Arah enda arusna min mereken kemalamen ate man banta.

            Erkite-kiteken kerhenenna la siteh katawari Jesus reh mulihken, maka siarus lit man banta eme nggeluh ibas pengarapen, megenggeng ras tetap ndalanken kai singena ate Tuhan. Janah arus siteh ibas kita nimai kerehenna lit  si la meriah ukur man bantaeme iblis/setan. Guna sie kita arus megegeh bagepe tahan uji. Kita arus bagi dilaki eme ngasup njemak kiniteken, pang ngelawan erbage-bage tipu muslihat, ras tetap nggeluh ibas kepentaren Tuhan.jadi lagampang terpengaruh ibas erbage-bage perbeben ras kiniseran, sierbahanca kinitekenta lanai man Jesus. Alu kata sideban perpulungen Korinti arus metenget, waspada ras tetap ncikep kiniteken ras kata Dibata, bagepe arus pang ibas mpertahanken kiniteken.

Pdt. Steven Kumenit, STh.M.Min.

Mpelimbarui Kegeluhen Ersembah (2 Tawarik 35:20-26)

KHOTBAH MINGGU

TANGGAL 5 NOPEMBER 2017.

GEREJA GBKP

Invocatio    :     Sendah kubereken man bandu kuasa nandangi bangsa-bangsa ras kerajan-kerajan lako mbungkarken dingen ngeruntuhken, lako ngkernepken dingen ngeradasken, lako menteki dingen nuan (Jeremia 1:10).

Ogen           :     Markus 11:15-19 (Tunggal).

Kotbah        :     2 Kronika 35:20-26 (Tunggal).

Tema           :     Mpelimbarui Kegeluhen Ersembah.

LATAR BELAKANG

1.      Sijadi bahan kotbahnta sendah eme turi-turin kerna raja Josia, raja Juda. Lit 2 hal siiturikeni jenda eme kematen raja Josia ras kepatuhen raja Josia ngikutken undang-undang Tuhan.

2.      Dibata make raja Mesir (Neko) guna munuh musuh-musuh Tuhan, eme kerajaan Asyur. Tapi rencana Tuhan siidalanken raja Neko la ngasup iangkai raja Josia, amin gia situhuna nggo ipersingeti raja Neko. Perang enda labo ras kam, tapi tetap raja Josia ngelawan, emaka raja Josia mate ibas perang e. Akap raja Josia la kap mungkin kalak kafir ipake Tuhan, emaka ihambat raja Josia.  Kematen raja Josia enda erbahan nabi Jeremia erbahan sada ende-enden perngandungen guna mperingeti kematen raja Josia.

3.      Raja Josia memerintah bangsa Juda tupung umurna 8 tahun. Ibas pemerintahenna ibersihkenna kegeluhen beragama bangsa Juda, sebab tupung sie bangsa Juda simerupaken bangsa Dibata, siarus ersembah man Dibata saja (monoteisme) nggo ersembah man dibata-dibata sideban (poloteisme), emaka nembeh ras merawa Dibata.

4.      Pertama-tama Josia mpersihken kegeluhen beragama gelah ersembah man Dibata saja eme dirina sendiri lebe, itadingkenna praktek-praktek politeisme, jenari ibersihkenna rumah pertoton, simerupaken sentral kegeluhen kalak Juda, sebab i je Tuhan hadir. Rumah pertoton merupaken rumah Tuhan.  Kenca ibersihkenna Rumah pertoton datna undang-undang Musa (Taurat). Kenca datna Taurat e, iogena ibas kebaktin gelah kerina kalak Juda mulihi patuh man Tuhan Dibata saja.

5.      Josia ngenen guna ndatken pasu-pasu Tuhan ras ilindungi Tuhan hanya patuh ras ndalanken sura-sura Tuhan saja. Ibas palas enda me Josia mbersihken kegeluhen beragama bangsa Juda arah reformasi agama.

APLIKASI

            Arus sipahami maka keselamatan merupaken hak preogatif Tuhan. Kalak sindalanken sura-sura Dibata nge sindatken keselamatan e. Jadi la lit upaya ibas manusia nari.

            Adi siperdiateken kerna Marthen Luther. Marthen Luther alu pang ngelawan pemimpin-pemimpin agama (Paus) singgo menyimpang ibas ajaran keselamatan situhu-tuhu. Tupung sie Paus ndayaken surat penghapusan dosa (pengampunan dosa) erkite-kiteken pembangunan gereja. Perlawanan Marthen Luther ibahanna alu mengedarkan 95 dalil, siintina eme kerna pertobatan ras keselamatan. Perlawanan Marthen Luther enda me melahirkan reformasi : Sala gracia, Sola sciptura ras solafide. Ibas reformasi enda me dungna lahir gereja protestan. Janah genduari gereja-gereja protestan ngerayan hari reformasi pe 500 tahunken. Hut reformasi tanggal 31Oktober.

            Genduari adi sinen, reformasi ibas kegeluhen beragama siilakoken para reformasi nggo ndauh bergeser. Adi sinen gereja lanai jadi ingan ersembah man Tuhan, nggo sipake jadi ingan sideban, apakah lelang-lelang guna pembangunan gedung gereja ntah ipake jadi ingan man, rsd. La saja e, cara ersembah man Tuhan pe arus ipelimbarui, sebab nggo mulai berbeda-beda. Bagepe la lit persikapen secara pribadia ibas kita ersembah. Sebab lit kita reh  ku gereja terjeng ndarami kepuasan, emaka tempa-tempa gereja nggo bagi interteimen. Adi la dat kepuasan maka idaramina i luar GBKP. Tapi adi sinen ibas perkembangen gereja GBKP, ibas rangkamengantisipasi ketidakpuasan anggota perpulungen, maka gereja GBKP nggo mereformasi bentuk ras kemasan kebaktin arah liturgi kebaktin.  

            Adi siperdiateken ogenta: merawa Jesus erkite-kiteken rumah pertoton nggo ipake jadi ingan erbinaga. Erkiteken siemaka ipersihken Jesus rumah pertoton, amin gia lit simerawa. Kita pe adi ateta nggeluh ibas keselamatan maka si la mehuli ibas dirinta, bagepe ibas gereja arus iradaskan janah ipekena mulihi, gelah kegeluhenta nggeluh ibas kemalemen ate. Bagepe arus sinen adi kita ngerana kerna ersembah la saja terjeng ku gereja, tapi pe ersembah ibas aktivitasta tep-tep wari. Jadi ersembah siidalanken kita secara formal arus teridah ibas kegeluhenta tep-tep wari (kantor, juma, binaga, bagepe ibas bergaul ras nggeluh, rsd). Alu bage si la mehuli arus siambengken. Gana-gana arus siambengken.

Pdt.Steven Kumenit, STh.M.Min.