Ersaksi Eme Komitmenku (Yeremia 20:7-9)

PERPULUNGEN JABU-JABU

GEREJA GBKP

TANGGAL 29 JANUARI – 4 FEBUARI 2017

Yeremia 20 : 7-9.

Tema : Ersaksi Eme Komitmenku

LATAR BELAKANG

1.      Yeremia idilo Dibata tahun 626-580 ope Kristus, ibas rangka mpeseh sura-sura Tuhan guna ngukum bangsa Yuda erkite-kiteken lanai mbiar ras erkemalangan man Tuhan. bangsa Yuda nggo erdosa. Erkite-kiteken bangsa Yuda nggo erdosa, maka kata Dibata siipeseh Yeremia lanai ibegikenna. Bagepe Yeremia jadi tertawan ras itokoh-tokohi bangsa Yuda.

2.      Mberat akap Yeremia ngaloken beban selaku nabi. Tempa-tempa sia-sia akapna. Janah ibas situasi sibagenda mberatna eme itawai ras ibenci teman, keluarga ras masyarakat, Yeremia nandangi putus asa, ibas pusuh (batin) sierbebe enda me, Yeremia mpersalahkan Tuhan. Yeremia berkesimpulan nggo itipu Tuhan ia. Pendilo Tuhan man bana, la banci itulakna erkite-kiteken gegehen Tuhan asangkan ia.

3.      Ibas perbeben sicukup mberat, janah ngadi ate Yeremia jadi nabi guna pembarkan kataNa. Bagepe ate Yeremia ngelupaken Tuhan. Tapi la banci, sebab kataTuhan bagi api sigurlah bas pusuhna singutkut ibas tulanna,emaka la tersinikken Yeremia nehken kata Dibata nandangi bangsana. Bagepe ibas penggejapen Yeremia, Tuhan tetap ras ia, emaka pindona man Tuhan gelah Tuhan sierbalas kerina singgo ibahan bangsaNa nandangi ia.

4.      Ibas bahan sekali sekali enda, ate Yeremia ngataken man banta, uga pa pe mberatna persoalan ras masalahta, tapi erkiteken kita nggo idilo ras ipilih Tuhan, maka Kata Tuhan la pernah ngadi ibas pusuhta, kata Tuhan bagi api sigurlah simendorong kalak siipilih Tuhan mpeseh kataNa.

5.      Kekecewaan Yeremia eme kai siikatakenna kerna nubuatna langa jadi, emaka enda jadi palas jelma sinterem tawai ras nokoh-nokohi ia.

APLIKASI

            Ersaksi eme pendilo Tuhan man banta kerina, alu bage enda jadi komitmenta ibas kegeluhenta tep-tep wari. Ersaksi la saja alu kata tapi arah perbahanen pe. Ibas kita ersaksi gelah kalak si langa nandai Tuhan banci tandai Tuhan. bagepe kita simonce-once kinitekenna,banci paguh ras megegeh kinitekenna.

            Ibas kita ersaksi, banci saja jumpa perbeben ras kiniseran. banci saja lit singataken man banta sombong rohani, tual, rsd. Emaka banci saja turah bas kita frustrasi ras masa bodoh (nggo me). Tapi ula kita mbiar, sebab siiberitaken kita eme kerna Tuhan, guna keselamatan jelma sinterem ras doni enda.

            Perlu siteh ras sirenungken bas dirinta eme kita ipilih ras ipake Tuhan jadi aronNa guna keselamaten kita kerina. Emaka ula kita mekisat ersaksi. Memang ibas kita ersaksi, mekatep terhalang ibas situasi ras kondisinta. Alu kata sideban, kesibuken-kesibuken si lit bas kita mekatap la kita nggit muat bagin ibas ersaksi (PI). Bagepe kurang pedas ateta mulih ibas PJJ nari. Padahal, khusus kerna PJJ, enda merupaken sarana ibas gereja guna situriken kesaksista kerna er Dibata. uga Dibata ngelengi kita. Alu bage temanta simegi kesaksinta terbangun kinitekenna, janah nggit alu meriah ukur ndalanken kata Dibata ibas kegeluhenna tep-tep wari.

            Ersaksi eme utang siarus igalar. Man ise utangta. Utangta man Kristus, sebab Tuhan nggo nelamatkan kita, janah nggo kita erpadan guna ndalanken ibas kesaksinta tep-tep wari. Janah ibas kita ersaksi, kita arus lebe nandai Tuhan alu payo ras nggejapen kerna keleng ate Tuhan ibas dirinta ras keluarganta gelah kita banci ersaksi alu mehuli ras payo.

Pdt. Steven Kumenit, STh.M.Min

           

Kundulilah Padanta ! (Mazmur 15:1-5)

KHOTBAH MINGGU 29 JANUARI 2017.

GEREJA GBKP

Invocatio    :    Dage adi kam erpadan man Dibata, minter sehken padanndu e. La ngena ateNa kerna kalak lenge. E maka sehkenlah padanndu (Pengerana 5:4).

Ogen          :    Matius 5:1-12 (Tunggal).

Khotbah     :    Mazmur 15:1-5 (Tunggal).

Tema          :    Kundulilah Padanta !

LATAR BELAKANG

1.      Banci sikataken secara umum, bahan khotbahnta ngerana kerna kebadiaan rumah pertoton. Rumah pertoton badia erkite-kiteken Tuhan ringan i je. Rumah pertoton eme Rumah Tuhan (bdk. Kel.25:8). Alu bage banci sikataken rumah pertoton ingan ketenangen ras kemalemen ate.

2.      Fungsi rumah pertoton eme ingan ersembah man Tuhan, bagepe ingan ndatken pengajaren gelah kegeluhen manusia nggeluh ibas ketenangen ras kedamen (bdk. Yesaya 2:3-4). Emaka merupaken sada kewajiban man bangsa Israel reh ku rumah pertoton. Tapi ibas reh ersembah man Tuhan, bangsa Israel arus nggeluh badia ras ndalanken kai singena ate Tuhan. Alu kata sideban kegeluhen ersembah man Tuhan secara formal i rumah Pertoton arus teridah ibas kegeluhen tep-tep wari.

3.      Bahan khotbahnta sekali enda, merupaken gambaran tradisi bangsa Israel ibas bengket ibas rumah pertoton (kanisah) guna ersembah man Tuhan. Rumah pertoton (kanisah), lit waktu-waktu tertentu ibuka. Ibas tradisi e adi lit siatena bengket ku rumah pertoton maka ia arus dat isin ibas Dibata nari arah imam. Sireh i rumah pertoton arus njawab penungkunen imam nari, janah arus ijawab/ngaloi alu 12 tuntutan simerupaken kewajiban perpadanen.

4.      Ate pemazmur ngataken man bangsa Israel, maka kerembakenta ras Tuhan, la itentuken arah upacara-upacara kebaktin secara formal, tapi ikut pusuh sidem pertobatan (bdk. Amos 5:21-23). Jadi bangsa Israel la banci bengket ku rumah pertoton adi la lit pertobatan nggeluh.

5.       Ibas litna kegeluhen pertobatan siteridah arah perbahanen tep-tep wari eme ngelakoken simehuli, bujur, benar, kekelengen ras erdiate nandangi teman manuia, maka kegeluhenna nggeluh ibas ketenangan, sebab ipasu-pasu Tuhan ia.

APLIKASI

            Temanta sendah eme kata persinget man banta gelah kita banci ngerenungken mulihi kerna perpadanenta singgo iakuken tupung kita gawan. Ibas perpadanenta e, kita erpadan kerna Dibata sitelu sada. Kerna Yesus Kristus eme dalan keselamatan. Nggit ngelawan dosa, tutus megiken Kata Dibata. Bagepe nggit muat bagin arah kinilitenta gelah erbelangna kinirajan Dibata, dingen terpuji gelar Dibata. Adi enda isungkun bas pusuhta masing-masing, tentuna alu jujur ras bertanggungjawab, pasti njawabenta eme lenga maksimal. Padahal adi enda sidalanken maka kegeluhenta pasti nggeluh ibas ketuahen (oi makarioi), sebab ipasu-pasu Tuhan kita. Jadi penungkunen man banta ngkai maka lenga maksimal ? sebab lenga kita ngasup nimbak peraten daging. Padahal adi tutus ateta ndalanken kerna kai singgo ipadanken kita, tentuna ipasu-pasu Tuhan kita. Jadi adi lenga kita cikep padanta, marilah sibebenaken alu erpalasken mbiar ras erkemalangan man Tuhan.

            Situhuna kita banci ndalanken kerna kai singgo sipadanken ndube, adi tutuslah kita ku gereja. Sedekah enda nterem denga kita lenga meteh fungsi ras makna gereja. Tuhu gereja ingan kebaktin secara kumunal, tapi adi sinen terbagesen maka ibas kita reh ku gereja berarti kita jumpa ras Tuhan. Emaka selain kita ersembah man Tuhan,  kita pe banci megiken kerna kata Dibata, simerupaken kata ajar man banta. Emaka kalak situtus ersembah man Tuhan ras megiken kata Dibata, man bana lit pengejapan muas ras melihe ndalanken Kata Dibata, nggeluh ibas pertobatan, janah nggit ndalaken kata Dibata, amin gia jumpa perbeben ras kiniseran. Alu bage kita banci nggeluh ibas ketenangan, la saja ibas doni enda, tapi pe i surga, sebab kita kap siempuna kinirajaan surga. Janah perlu siteh kesengapan bas kita labo erkiteken ngalo, tapi erkiteken mere. Alu bage makna kita kunduli padanta gelah kita banci ndatken ketenangen ras ketuahen/kemalemen ate. Emaka arus ilakoken ibas kegeluhenta eme mehamat man Tuhan ras ngergai rumah pertoton (gereja) ras ndalanken kai singena ate Tuhan, amin gia jumpa perbeben ras kiniseran.

Pdt. Steven Kumenit, STh.M.Min.

Ikutkenlah Aku (Matius 4:18-25)

KHOTBAH MINGGU  ANGGAL 22 JANUARI 2017

GEREJA GBKP

Invocatio    :    Mekuahlah ateNdu man bangku suru-suruhenNdu, maka alu bage banci aku nggeluh ngikutken ajarNdu (Masmur 119:17).

Ogen          :    Masmur 27:1,4-9 (Responsoria).

Khotbah     :    Matius 4:18-25 (Tunggal).

Tema          :    Ikutkenlah Aku.

LATAR BELAKANG

1.      Ibas Yesus benaken pelayanan keselamatan i doni enda, salah sada siilakoken Yesus eme ndilo piga-piga kalak guna ajar-ajarNa. Janah sipertama idilo Yesus eme Simon siigelari Petrus, Andreas, Sebedeus siigelari Jakup ras Johanes. Pendahin 4 kalak enda eme penjala nurung i dano Galilea. Ibas kesibukenna selaku penjala nurung, janah e kin ndahinna (mata pencarinna), idilo Yesus ia, janah minter itadingkenna pendahin e guna ngikutken Yesus gelah iajari Yesus uga carana ndilo kalak sideban jadi ajar-ajar Yesus. Ibas erti kata sepenuhna tergantung ibas kegeluhen ras Yesus.

2.      Ibas kegeluhen kalak Yahudi, khususna guru-guru agama, memang lit ajar-ajarna. Tapi ajar-ajarna sendiri reh ku guru e mindo gelah ia jadi ajar-ajarna. Jadi ajar-ajar e melamar ku guruna. Janah banci saja la ialoken. Tapi Yesus ndahina calon ajar-ajarNa, janah idiloNa. Ibas pendilo e lit padan eme njadiken ajar-ajar cara gelah kalak sideban jadi ajar-ajar Yesus. Alu kata sideban, alu kuasa si lit bas Yesus, ndilona ajar-ajarna, gelah ajar-ajar banci jadi alat pasu-pasu nandangi kalak sideban.

3.      Pendilo ajar-ajar ibas rangka masa depan ras keselamatan jelma sinterem, emaka ajar-ajar enda iprosen ras iajarken arah kegeluhen Yesus (karakter ras pelayanan). Emaka siitekankan jadi ajar-ajar arus ngikutken kai siiajarken guruna. Jadi situhuna enda merupaken bentuk “pemuridan” (pengajaren kerna simehuli ras singena ate Tuhan) Yesus nandangi ajar-ajarNa.

4.      Kerehen Yesus siutama ibas doni enda eme nehken keselamatan man doni enda. Emaka isiari Yesus kerina daerah i Galilea guna ngajar i rumah-rumah pertoton. janah berita keselamatan siutama siiajarken Yesus eme kerna kinirajan Surga. Bagepe la saja ngajar siisehken Yesus tapi mpepalem kalak sakit ras mpelawes setan. Emaka kerina kalak sakit  sireh man Yesus madan ia kerina.

5.      Amin gia pelayanan Yesus i sekitar tepi dano Galilea ngenca, tapi reh kalak i luar daerah Galilea guna mindo penampat man Yesus, gelah ipepalem Yesus penakitna. Enda jadi erkite-kiteken kuasa Yesus mbar isekelewet dano Galilea.

APLIKASI

            Temanta sendah eme kata persinget man banta, gelah sirenungken mulihi kerna pendilo Tuhan man banta selaku kalak kristen.

            Ibas gerejanta lit 2 bentuk pendilo Tuhan man banta eme pendilo khusus eme serayan Tuhan ras pendilo umum eme man kerina anggota ngawa. Janah kerina anggota ngawan nggo nggeluh ibas pengajaran ras nggo nggeluh ibas proses keselamatan. Emaka nggo paksana ncidahken e ibas kegeluhenta tep-tep wari.

            Ikutkenlah Aku, ngataken maka sindilo kita  eme Yesus. Alu bage kita nggo iajarken gelah kita erbahan simehuli. Ikutkenlah aku, la saja ikut-ikut saja tapi ndalanken kai singena ate Tuhan, bali ras siidalanken Yesus.

            Selaku kalak kristen lit min ketedehen ate muat bagin ibas dahin-dahin pelayanan ras kekelengen i tengah-tengah gereja Tuhan (bdk. Invocatio). Tapi ibas ndalanken sura-sura Tuhan arus erpalasken sura-sura Tuhan. Janah ibas ndalaken sura-sura Tuhan ntah pe ngikutken Tuhan, la perlu kita mbiar sebab Tuhan tetap nemani kita. Bagepe perlu siteh adi kita nggeluh i luar Tuhan, kegeluhenta la lit ertina. Emaka man banta sipaling penting gelah kita banci ngikutken Tuhan, maka lit min ketedehen ate ibas rumah Tuhan, sebab i je lit pengajaren kerna kata Dibata, janah lakokenlah kata Dibata ibas kegeluhenta tep-tep wari. Alu bage kita pe banci ngajari kalak sideban jadi ajar-ajar Yesus. Emaka ugapa pe kesibukenta ula lupa kebaktin minggu, PJJ ras PA, sebab ibas kebaktin kegiaten e kita banci jumpa ras Tuhan, bagepe iajariNa kita kerna simehuli ras singena ate Tuhan eme nehken kekelengen, erberita kerna kata Dibata (PI) ras kekiaten-kegiaten sideban. Ula mbiar ibas kita ngikutken Yesus pasti ipasu-pasuNa kita.

Pdt. Steven Kumenit, STh.M.Min.

Cidahken Kinitekenndu Arah Perbahanenndu (Yesaya 6:8; Roma 13:8-14)

PERPULUNGEN JABU-JABU

GEREJA GBKP

TANGGAL 22-28 JANUARI 2017.

Yesaya 6:8; Roma 13:8-14.

Tema : Cidahken Kinitekenndu Arah Perbahanenndu.

LATAR BELAKANG

A.     Yesaya 6:8.

1.    Sijadi oratenta sendah eme turi-turin pendilo Yesaya jadi nabi man bangsa Yehuda. Sebab tupung sie bangsa Yehuda nggo nggeluh erbana-bana. Bangsa Yehuda lanai mbiar man Tuhan. Bangsa Yehuda nggo erdosa. Emaka pendilo Yesaya jadi nabi gelah Yesaya banci mpeseh berita penghukuman man bangsa Yehuda.

2.    Pendilo Yesaya jadi nabi ibas rumah pertoton. Ibas rumah pertoton iidahna Tuhan. erkiteken nggo idahna Tuhan maka ibas penggejapenna, sekali enda mate me ia. Sebab la saja Yesaya tading ibas bangsa sierdosa, tapi igejapkenna ia pe erdosa.

3.    Tangtangna pendilo Tuhan man Yesaya jadi nabi eme Yesaya ipebadiaken Tuhan arah arah malekat Serafim.  I ja ibuat malekat serafim sada rara janah ikuit Malekat Serafim biber Yesaya.  Enda ngatakenca dosa Yesaya nggo ialemi, janah Yesaya genduari nggo badia. Kenca Yesaya nggo badia, ibegina sora Tuhan nina. Ise ndia banci ku suruh ? ise dia nggit maba berita ibas aku nari. Emaka nina Yesaya ngaloisa, aku, suruhlah aku. Adi siidah, pendilo Yesaya jadi nabi la erpalaskan perintah Tuhan nari, tapi merupaken tawaran. Emaka irespon Yesaya alu meriah ukur. Yesaya sendiri simenawarken dirina guna jadi nabi

B.     Roma 13:8-14.

1. Ibas Surat Paulus man perpulungen Roma, Paulus ngerana kerna kekelengen. Kekelengen arus icidahken ibas kegeluhen tep-tep wari. Sebab kekelengen eme palas kristen nggeluh. Sebab ibas ncidahken kekelengen maka kalak kristen nggo ndalanken undang-undang Dibata (bdk. Matius 22:37-40).
2. Kekelengen arus idalanken sebab enda me utang kalak kristen. Utang arus igalar. Ibas erti kata kalak kristen berkewajiban nehken kekelengen man ise saja. Bagepe ndalanken kai singena ate Tuhan. ula kita rutang man kalak sideban, eme si la mehuli. Ntah pe perbahanen ibas pengakapmanusia. Tapi arus utang erkitekeng keleng ate. Jadi kekelengen berarti ngkelengi kalak sideban ras ngkelengi dirinta sendiri. Kita la banci erbahan si la ngena ate Tuhan. Emaka ibas ndalanken kekelengen berarti nggo nggeluh ibas terang ras nggo ndalanken biak Yesus Kristus. Tole ikataken Paulus maka wari Tuhan  nggo ndeher, emaka lagu langkah kalak kristen arus mehuli. Lagu langkah kalak kristen arus ncidahken ia nggeluh ibas terang, eme ndalanken kai singena ate Tuhan.

APLIKASI

            Arus siteh ras-ras palas kinitekenta eme Yesus. Yesus eme Tuhan ras Raja. Yesus erkuasa i doni ras i surga. Janah erkiteken Yesus Kristus, maka kita nggeluh ibas keselamatan. Erkiteken Yesus Kristus kita nggo nggeluh ibas terang. Tapi ibas kita nggeluh ibas terang ntah pe keselamatan la kepeken terjeng kita tutus ersembah man Tuhan secara formal eme reh ku kebaktin minggu, PJJ, PA ras kegiatan-kegiatan gereja sideban. Tapi ibas kita nggeluh ibas terang/keselamatan, kita arus nehken kekelengen. Kita arus praktekken perbahanen-perbahanen si ngena ate Tuhan. Sebab ibas kita praktekken ntah pe ndalanken kai singena ate Tuhan alu meriah ukur ras meteruk ukur berarti kita nggo mpermuliaken Tuhan. Tentuna arus siteh ras-ras ngkai kita arus mpraktekken/ndalanken kai singena ate Tuhan ? sebab enda merupaken utangta siarus sisehken ibas kegeluhenta tep-tep wari. Siinget Yesus Kristus nggo mate ras keke ibas simate nari erkite-kiteken nelamatken kita. Emaka tandana kita nggo nggeluh ibas keselamatan, kita arus ikut mberitaken berita keselamatan arah kata ras perbahanen.

            Kita arus ngkelengi dirinta sendiri. Ibas erti kata kerehen Tuhan nggo ndeher, emaka kita arus erbahan simehuli ibas kegeluhenta tep-tep wari. Perbahanenta tep-tep wari arus ncidahken kita anak-anak Dibata. Alu bage la saja kita singgeluh ibas keselamatan, tapi kalak sideban pe nggeluh ka ibas keselamatan. Jadi kiniteken arus teridah ibas perbahanen (bdk. Jakup 2:17). Mari sinen kerna Yesaya. Yesaya kenca ia ipebadiaken,  lit sada pebetehen kerna ndahin Tuhan, emaka minter iayuken Yesaya. Yesaya jadi nabi erkite-kiteken Tuhan nggo pebadiaken ras nelamatken ia. Emaka kita pe arus tetap berkomitmen/ertekad, i ja Tuhan nggo ndilo ras milih kita jadi aronNa emaka kita arus nehken kai singena ateNa ibas kegeluhenta tep-tep wari. Kita arus bali ras Yesaya, nintalah ibas pusuhta enda aku suruhlah aku. Ula enda aku suruhlah man kalak sideban. Tapi pe arus ka sisadari maka perbahanen simehuli,labo berarti e sinentuken keselamatenta, tapi keselamaten itentuken ibas perkuah ate Tuhan. Bagepe teologi perbahanen eme erkiteken Tuhan nggo leben ngkelengi kita ras nelamatken kita, maka ibas rangka ngataken bujur man Tuhan, kita ndalanken kai singena ate Tuhan.

Pdt. Steven Kumenit, STh.M.Min