Kalak Si Tek Man Jesus Jadi Arah Lebe (Lukas 13:23-30)

KHOTBAH MINGGU 16 DESEMBER 2018

GEREJA GBKP

Invocatio    :    Sangap kal kalak si ipilihNdu, dingen kalak siidiloNdu ringan ibas kesain RumahNdu. Puas iakap kami kerna kerina simehuli si lit i bas RumahNdu, inganNdu si badia (Masmur 65:5).

Ogen          :    2 Tesalonika 2: 13-17 (Tunggal).

Khotbah     :    Lukas 13:23-30 (Tunggal).

Tema          :    Kalak Si Tek Man Jesus Jade Arah Lebe.

LATAR BELAKANG 

1.     Sijadi bahan khotbah sekali enda eme turi-turin Jesus ngerana kerna penolaken keselamaten kalak Jahudi ras keselamatan man kerina jelma ibas bangsa sideban nari alu ngelakoken kai singena ate Tuhan. Keselamatan siimaksud eme nggeluh ibas Kinirajan Dibata. Nggeluh ibas kinirajan Dibata eme nggeluh alu meriah ukur.

2.     Keselamatan si reh man kerina jelma raduken ras penghukuman man kalak si la ndalanken kai singena ate Tuhan. Janah enda iandingken Jesus bagi rumah. Rumah eme Kinirajaan Dibata. Tuan rumah eme Jesus jine. Alu bage ngatakenca ibas sada paksa tuan rumah (Jesus) keke (reh ku doni enda mulihken) ngadili kerina jelma. Sibengket ibas rumah (Kinirajaan Dibata) eme kalak si tek man Jesus ras ndalanken kai singena ateNa ngenca.

3.     Enda ikataken Jesus sebab lit pengangkan man kalak Jahudi, ia ngenca siselamat, kalak sideban lang. Banci Kalak Jahudi la selamat adi ia ngelakoken dosa si mberat. Bagepe lit pengangkan man jelma sinterem tupung sie, kalak Jahudi ngenca si selamat. Enda teridah arah penungkunen sekalak jelma tupung Jesus erdalan ku Jerusalem, nina : “ o Tuan, la kin pagi nterem kalak si terkelin”. La ijabab Jesus ue ntah lang. Tapi mereken sada jababan sierbahanca sinungkun e muat sada keputusen guna ngelakoken ntah ntah lang. Nina Jesus cubakenlah  asa ngasupndu bengket arah pintun si kitik. Ate Jesus ngatakenca maka sibanci nggeluh ibas keselamatan eme kalak si la meganjang ukur, nggeluh bayak tapi kebayakenna e rehna erkiteken menindas, nipu, nangko, rsd , bagepe arus  nggeluh alu meteruk ukur. Kegeluhen sibagenda man jelma sinterem mesera. Erkiteken mesera e me bagi bengket ibas pintun si kitik siarus lit pengurbanan diri gelah lewatina pintun sikitik e.

4.     Adi pintun Rumah nggo ieruk, maka nggo terlambat nggeluh ibas keselamatan. Nggo terlambat jera, Bagepe kalak si i darat rumah denga inanamina tangis ras mesui sebab idahna Abraham, Isak, Jakup, bagepe kalak sireh i Timur, i Barat, i Utara ras i Selatan nari ermeriah-meriah ibas Kinirajan Dibata. Bagepe kenca Tuan Rumah eruk pintun rumah, amin gia megang pe sora kalak sitedis i darat rumah e, nina o Tuan buka pintu Rumah e, la i buka Tuan Rumah, sebab la itandai Tuan rumah ia. Bagepe alu make erbage-bage alasan, iantarana eme nggo pernah kami man ras minem ras Kam. Bagepe nggo pernah Kam ngajar i pasar-pasar kuta kami. Tapi nina Tuan Rumah, la kam ku tandai. Laweslah o kam kalak jahat. Perlu siteh ibas rangka keselamatan erbage-bage bentuk ras model Jesus ngerana kerna keselamatan, termasuk ngerana i pasar-pasar tupung Jesus erdalan, bagepe man, minem ras jelma sinterem. Tapi erkiteken la ia tek man Jesus ras pengajaren Jesus maka la itandai Jesus ia. Kalak si tek ras ndalanken pengajarenNa ibas kegeluhenna tep-tep wari siitandai Jesus. Janah kalak siitandai Jesus enda me singgeluh ibas Kinirajan Dibata.

5.     Perlu siteh bangsa Jahudi eme bangsa pilihen Dibata. Ia ipilih Tuhan gelah jadi alatNa guna nelamatkan kerina Jelma ibas doni enda. Tapi erkiteken penolakenna man Jesus Kristus selaku Mesias ras kegeluhenna la ncidahken bangsa pilihen Dibata, emaka itulak Tuhan ia. Alu bage Kalak Jahudi sileben ngaloken Dibata ras pengajarenNa, tapi la tutus ras nulak Jesus jadi arah pudi (la selamat). Tapi kalak singaloken Jesus arah pudi jadi arah lebe.

APLIKASI

            Kita ipilih Tuhan arah Berita Si Meriah. Arah Berita Si Meriah kita nggo nggeluh ibas keselamatan. Sebab Berita Si meriah enda me kuasa Dibata guna nelamatken kerina jelma (bdk. Roma 1:16). Emaka meriah ukurta kerna sie. Janah meriah ukurta e harus sicidahken ibas perbahanenta tep-tep wari alu ngelakoken kai singena ate Tuhan. Ibas kita ngelakoken kai singena ate Tuhan berarti nggo sijaga kinitekenta ras pengajaren siiajarken Jesus arah gerejaNa man banta.

            Tuhu erkiteken tek kita man Jesus selaku Tuhan ras ulu keselamatenta, kita genduari nggo arah lebe. Status kita siarah lebe e arus ipertahanken, sebab banci saja erkiteken la kita tutus ras la sidalanken kai singena ate Tuhan, lanai kita jadi arah lebe, tapi nggo arah pudi, sidungna ibas kerehen Jesus peduakaliken kita lanai atan ras nggeluh radu ras Abraham, Isak, Jakup, bagepe kerina kalak situtus ras ndalanken kai singena ate Tuhan ibas Rumah Jesus eme Surga.

            Minggu adven pe 3 ken enda ngingetken kita maka nggeluh ibas Surga eme ngeluh ibas kesenangen. Nggeluh ibas meriah-meriah. Janah nggeluh si arah lebe ngenca sibanci nggeluh i je eme nggeluh tek man Jesus ras ndalanken kai singena ateNa. Tuhu tempa mesera nggeluh ibas erkiniteken man Jesus. Tuhu nggeluh ibas erkiniteken man Jesus tempa-temnpa bagi kita bengket ibas pintun si kitik. Tapi adi nggit, sabar, meteruk ukur ras megenggeng, kita banci erdalan ibas pintun si kitik, janah  kenca lepas pintun si kitik e kita banci nggeluh alu meriah ukur sebab sinanami nggeluh ibas Surga.

Pdt. Steven Kumenit, STh.M.Min.

“Jesus Me Kap Si Mereken Kegeluhen” (Yohanes 11:25-26)

KHOTBAH MINGGU

25 NOVEMBER 2018

GEREJA GBKP

Invocatio  :    Erjabab Jesus man Thomas, “Aku kap dalan nandai Dibata, dingen ndatken kegeluhen. Ise pe la banci ndahi Bapa la arah Aku” (Johanes 14:6).

Ogen        :    Ketangkasen 7:9-17 (Responsoria).

Khotbah   :    Johanes 11: 25-26 (Tunggal).

Tema        :    “Jesus Me Kap Si Mereken Kegeluhen” 

LATAR BELAKANG

1.     Sijadi bahan oratenta sendah eme bagin si la terpisahken ibas ayat sada nari. Marta si merupaken turang Lazarus ndahi Jesus janah lit pengakun kerna Yesus eme Tuhan tapi lit ka kekecewaanna man  Jesus, nina Marta o Tuhan bicara i jenda min ndai Kam, labo mate turangku e ! Lit telu palas “keyakinan’ Marta turangna la mate adi jenda Yesus. Sipemena : Lazarus eme teman siikelengi Jesus (ayat 3). Sipeduaken : Jesus banci pepalem kalak sakit. Erkiteken sie me tupung Lazarus sakit, janah Jesus tupung sie lit i Yerusalem Marta ras Maria mbaba berita man Jesus kerna Lazarus sakit. Yerusalem ras Betani telu kilo meter ngenca jarakna. Adi dalan nahe kurang lebih sada jam jarak tempuhna. Sipeteluken : Jesus eme Tuhan. Emaka nina Marta, o Tuhan … (ayat 3). Ibas nada kekecewaan iikataken Marta, maka nina Jesus man Marta “Nggeluh me turangndu mulihken”. Kai siikataken Jesus, akap Marta enda terjeng kata pengapul ngenca, emaka nina Marta ku teh nge maka ibas wari pendungi pagi keke nge ia ibas si mate nari (ayat 23-24). Amin gia teh Marta Jesus eme Tuhan ras lit kuasa man baNa, tapi merupaken sada hal simustahil Jesus banci mpekeke kalak singgo empat wari ikuburken. Sebab lit sada pemahaman kerna kalak singgo mate, khususna adi simate e anak perana denga, maka kenca 4 wari ikuburken maitna nggo “busuk”.

2.     Jesus la saja mereken kata pengapul man Marta, tapi alu la langsung mpebetehken kerna kuasa si lit man baNa. Erkiteken sie guna mpetetap ukur man Marta kerna kuasa si lit man Jesus sibanci pegeluhken kalak singgo mate, nina Jesus Aku kap simereken kegeluhen ras mpekeke kalak mate. Ise si tek man bangKu nggeluh me aminna gia enggo mate. Kalak si nggeluh dingen tek man bangKu ndigan pe la mate. Tek kam katangKu e? Situhuna kata Jesus la saja itujuken man Marta, tapi pe man kalak Saduki si la tek kerna kekeken kula. Ibas Jesus kataken bage man Marta, ate Jesus ngatakenca ibas diriNa lit kuasa guna mpekeke kalak singgo mate, amin gia daging kalak singgo mate e nggo “busuk”. Janah adi si oge terdauhen Lazarus ipekeke Jesus ibas si mate nari (ayat 43-44).

3.     Bahan khotbanta ngataken, sipemena : Ise sitek man Jesus ndatken kegeluhen. Adi kalak si tek mate banci nggeluh mulihken. Janah kegeluhen kenca kematen eme kegeluhen sirasa lalap (kehidupan kekal). Sipeduaken : Jesus eme Tuhan ras pemere kegeluhen.

4.     Kekeken ibas simate nari nandangi kalak si tek man Jesus eme kekeken  totalitas nggeluh manusia, termasuk kekeken kula. Alu bage, ngatakenca ibas kegeluhen kalak si tek man Jesus Kristus kuasa kematen la erkuasa man kalak si tek man Jesus Kristus.

5.     Ibas bahan khotbahta, Yohanes la saja ncidahken kerna kuasa Jesus, tapi ncidahken kerna Yesus eme Tuhan, sebab nterem kalak Jahudi la tek kerna Jesus eme Dibata. Bagepe manusia banci nggeluh adi tek man Jesus ngenca. Alu bage ate Johanes  ncidahken kerna kegeluhen sirasa lalap ibas Jesus Kristus, gelah jelma sinterem banci tek man Jesus ras nggeluh bagi singena ate Tuhan.

APLIKASI 

            Kegeluhen manusia la ngadi ibas kematen, tapi kenca kematen lit kegeluhen. Janah kegeluhen kenca kematen ibereken Jesus. Sebab kenca Jesus reh mulihken ku doni enda maka kalak singgo mate lebe ipekekeNa, jenari ipepulungNa kerina radu ras kalak singgeluh denga. Kenca sie iadili Jesus kerina manusia. Kalak si la tek man Jesus, bagepe si tek tapi la ndalanken singena ateNa, ihukum Tuhan. Tapi kalak si tek man Jesus ndatken kegeluhen si la ermasap-masap. Alu kata sideban kita banci nggeluh ntah pe selamat adi kita tek man Jesus. Tuhu kematen mbaba kebiaren man jelma sinterem tapi kalak si tek man Jesus Kristus amin gia mate, pagi ipegeluhken Jesus me kita. Emaka sipaling penting man banta eme tek man Jesus selaku Tuhan ras ndalanken kai singena ateNa.

            Jesus Kristus eme Tuhan singgo jadi manusia guna ncidahken kerna Imago Dei situhu-tuhu. Tapi erkiteken keegoisan manusia, maka nterem kalak sinulak Ia. Jesus Kristus guna nelamatken kita nggeluh ibas kiniseran. Tapi erkiteken Jesus Kristus patuh ibas persuruhen BapaNa i surga, maka Jesus Kristus keke ibas si mate nari janah imuliaken i Surga. Mulih ku asalNa ndube eme Surga. Kekeken Jesus Kristus naluken kuasa kematen. Emaka kalak si tek man Jesus Kristus nggeluh me amin gia mate. Bagepe ibas Jesus Kristus imuliaken i surga, Jesus jadi Raja guna ngerajai kita kerina. Emaka ibas tanNa  nge kegeluhenta.

            Kegeluhenta situhu-tuhu lit ibas Jesus Kristus, emaka kegeluhenta arus ncidahken kegeluhen singena ateNa. Adi lit perbahanen si la ngena ateNa, kita arus jera. Kita arus ersembah man baNa. Sebab kenca kita nggeluh ras Jesus ibas surga, siinanami kita eme lanai kita muas ras melihe. Lanai kita iparpari matawari ntah las sebab Jesus Kristus simpermakani kita. Ia sinjaga kita ras mereken cicio man banta. Emaka marilah kita tek alu tuhu-tuhu man Jesus ngenca ibas kegeluhenta tep-tep wari.

Pdt. Steven Kumenit, STh.M.Min.

Pakelah Ringringndu nehken si Ngena Atena (Roma 6:12-14)

PEKAN KEBAKTIN KELUARGA

GEREJA GBKP

WARI IV, RABU 21 NOPEMBER 2018

Invocatio :    Ula kam papak! Pergaulan si la mehuli, encedaken biak simehuli (1 Korinti 15:33).

Ogen        :    1 Samuel 2:12-17

Khotbah   :    Roma 6:12-14.

Tema        :    Pakelah Ringringndu nehken si Ngena Atena.

LATAR BELAKANG

1.     Teologi pembenaren siikataken Paulus ibas pengajarenna, erbahanca kalak Jahudi ras kalak kristen Jahudi nanggapi salah. Teologi Paulus kerna pembenaren eme la lit manusia sibenar, Tuhan sibenarken manusia. Adi bage nina kalak e perbedaan antara simehuli ras la mehuli lanai lit kap e, erbahanca kalak banci erbahan dosa. Ibas pengangkan sisalah enda me Paulus mereken penjelasan kerna pembenaren situhu-tuhu.

2.     Pembenaren siibereken Tuhan man manusia eme keselamatan seutuhna. Keselamatan sialoken manusia erbahanca kalak kristen nggo mate erkiteken dosa, tapi keke radu ras Kristus. Simbol enda lit ibas pridin si Badia. Erkiteken sie me kalak kristen ula nari erbahan dosa. Emaka si jaga kula manusia. Ula nai pelepas dosa ngerajai kula. Moral kalak kristen harus mehuli. Alu kata sideban kalak kristen idilo ibas kegeluhen teptep wari guna mateken dosa. kalak kristen harus nggeluh ibas kepatuhen man Tuhan.

3.     Kalak kristen iperentahken Paulus gelah ula nari erbahan dosa. Amin gia kalak kristen nggo merdeka ibas dosa, tapi kuasa dosa ibas doni enda lenga dung. Kuasa dosa lalap erdahin. Bagepe dosa e lit daya tarik tersendiri, emaka kalak kristen banci tergoda janah mulihi iteruh kuasa dosa. Erkiteken sie isingetken Paulus gelah dosa ula nari erkuasa nandangi kula manusia si ermasap-masap (fana).

4.     Ula min dosa ngkuasai diri manusia, tapi Dibata lah singkuasai manusia, erkiteken sie kalak kristen harus ngendesken dirina man Dibata saja. Alu bage kerina ringring kula manusia ipake guna ngelakoken simehuli singena ate Tuhan. Tuhu-tuhu kalak kristen arus ikuasai Dibata. Kalak kristen harus nggeluh alu moral simehuli. Adi kegeluhen ikuasai Dibata, maka la lit ringring kula ngelakoken si la mehuli.

5.     Keselamatan singgo ialoken kalak kristen, erkite-kiteken lias ate Tuhan. Ikataken Paulus enda sebab lit kalak kristen Jahudi erpengakap maka keselamatan ialoken manusia adi idalankenna undang-undang. Dosa banci italuken adi kalak kristen tetap nggeluh ibas lias ate Tuhan. Alu bage kegeluhen kalak kristen tuhu-tuhu ikuasai kuasa Tuhan.

APLIKASI 

            Ringring kula eme bagin siitepa Dibata ibas diri manusia. Erkiteken sie me manusia ikataken sentudu ras tempat Dibata. Janah ate Dibata ringring e ipake manusia guna ndalanken sura-sura Dibata. Ringring kula la saja terjeng tan ras nahe, tapi panca indra ikut  ibas ringring kula e.

            Sada penungkunen, kai hubungan ringring kula ras keluarga. Sipemena : Ringring kula banci iibaratken anggota keluarga. Anggota keluarga e harus nggeluh ras leket ibas sada keluarga janah ipinpin langsung kepala keluarga. Bagepe anggota keluarga harus nggeluh sisampat-sampaten. Ngidah keadaan sigenduari maka penting peranen keluarga, sebab keluarga eme sada institusi pembentukan mental spiritual anggota keluarga e siutama. Pendidikan keluarga harus megegeh, sebab adi pendidikan keluarga, khususna pendidikan agama megegeh, maka kerina anggota keluarga (ringring kula) banci terhindar ibas penakit-pinakit sosial siberkembang genduari enda.  Anggota keluarga la banci papak ibas dalani kegeluhen i doni enda teptep wari. Sipeduaken ringring kula harus ipake ibas komunikasi i tengah-tengah keluarga. Komunikasi simehuli i tengah-tengah keluarga babai keluarga nggeluh alu harmonis, bagepe babai keluarga ngelakoken simehuli si ngena ate Tuhan. Sumbatna komunikasi ibas keluarga erbahanca anggota keluarga erbahan si la mehuli.

            Temanta sendah eme pakelah ringringndu nehken singena ateNa. Arah tema enda kita iajar gelah selaku orang tua harus min riring kula simerupaken pemere Dibata ipake guna ngajari anak ras isi jabu, subuk ibas baba ntah pe pengajaren praktek (verbal ras non verbal). Selaku anak, harus megiken ras ngenen pengajaren orang tua gelah sangap nggeluh. Bagepe gedang umurna (bdk. Kel. 20:12) . Anak-anak la ngelakoken si la mehuli. Anak-anak makeken ringring kulana guna si mehuli. La bagi anak-anak Eli eme Hopni ras Pinehas, kai sijadi sikerajangen Tuhan pe i tangkona. La ihamatina Tuhan. La ia mbiar man Tuhan. Bagepe kerina keluarga harus megiken kata Dibata gelah ipasu-pasu Tuhan keluarganta.

Pdt. Steven Kumenit, STh.M.Min.     

Pakelah Ringringndu nehken si Ngena AteNa (Roma 6:12-14)

PEKAN KEBAKTIN KELUARGA

GEREJA GBKP

WARI IV, RABU 21 NOPEMBER 2018

Invocatio :    Ula kam papak! Pergaulan si la mehuli, encedaken biak simehuli (1 Korinti 15:33).

Ogen        :    1 Samuel 2:12-17

Khotbah   :    Roma 6:12-14.

Tema        :    Pakelah Ringringndu nehken si Ngena AteNa.

LATAR BELAKANG

1.     Teologi pembenaren siikataken Paulus ibas pengajarenna, erbahanca kalak Jahudi ras kalak kristen Jahudi nanggapi salah. Teologi Paulus kerna pembenaren eme la lit manusia sibenar, Tuhan sibenarken manusia. Adi bage nina kalak e perbedaan antara simehuli ras la mehuli lanai lit kap e, erbahanca kalak banci erbahan dosa. Ibas pengangkan sisalah enda me Paulus mereken penjelasan kerna pembenaren situhu-tuhu.

2.     Pembenaren siibereken Tuhan man manusia eme keselamatan seutuhna. Keselamatan sialoken manusia erbahanca kalak kristen nggo mate erkiteken dosa, tapi keke radu ras Kristus. Simbol enda lit ibas pridin si Badia. Erkiteken sie me kalak kristen ula nari erbahan dosa. Emaka si jaga kula manusia. Ula nai pelepas dosa ngerajai kula. Moral kalak kristen harus mehuli. Alu kata sideban kalak kristen idilo ibas kegeluhen teptep wari guna mateken dosa. kalak kristen harus nggeluh ibas kepatuhen man Tuhan.

3.     Kalak kristen iperentahken Paulus gelah ula nari erbahan dosa. Amin gia kalak kristen nggo merdeka ibas dosa, tapi kuasa dosa ibas doni enda lenga dung. Kuasa dosa lalap erdahin. Bagepe dosa e lit daya tarik tersendiri, emaka kalak kristen banci tergoda janah mulihi iteruh kuasa dosa. Erkiteken sie isingetken Paulus gelah dosa ula nari erkuasa nandangi kula manusia si ermasap-masap (fana).

4.     Ula min dosa ngkuasai diri manusia, tapi Dibata lah singkuasai manusia, erkiteken sie kalak kristen harus ngendesken dirina man Dibata saja. Alu bage kerina ringring kula manusia ipake guna ngelakoken simehuli singena ate Tuhan. Tuhu-tuhu kalak kristen arus ikuasai Dibata. Kalak kristen harus nggeluh alu moral simehuli. Adi kegeluhen ikuasai Dibata, maka la lit ringring kula ngelakoken si la mehuli.

5.     Keselamatan singgo ialoken kalak kristen, erkite-kiteken lias ate Tuhan. Ikataken Paulus enda sebab lit kalak kristen Jahudi erpengakap maka keselamatan ialoken manusia adi idalankenna undang-undang. Dosa banci italuken adi kalak kristen tetap nggeluh ibas lias ate Tuhan. Alu bage kegeluhen kalak kristen tuhu-tuhu ikuasai kuasa Tuhan.

APLIKASI 

            Ringring kula eme bagin siitepa Dibata ibas diri manusia. Erkiteken sie me manusia ikataken sentudu ras tempat Dibata. Janah ate Dibata ringring e ipake manusia guna ndalanken sura-sura Dibata. Ringring kula la saja terjeng tan ras nahe, tapi panca indra ikut  ibas ringring kula e.

            Sada penungkunen, kai hubungan ringring kula ras keluarga. Sipemena : Ringring kula banci iibaratken anggota keluarga. Anggota keluarga e harus nggeluh ras leket ibas sada keluarga janah ipinpin langsung kepala keluarga. Bagepe anggota keluarga harus nggeluh sisampat-sampaten. Ngidah keadaan sigenduari maka penting peranen keluarga, sebab keluarga eme sada institusi pembentukan mental spiritual anggota keluarga e siutama. Pendidikan keluarga harus megegeh, sebab adi pendidikan keluarga, khususna pendidikan agama megegeh, maka kerina anggota keluarga (ringring kula) banci terhindar ibas penakit-pinakit sosial siberkembang genduari enda.  Anggota keluarga la banci papak ibas dalani kegeluhen i doni enda teptep wari. Sipeduaken ringring kula harus ipake ibas komunikasi i tengah-tengah keluarga. Komunikasi simehuli i tengah-tengah keluarga babai keluarga nggeluh alu harmonis, bagepe babai keluarga ngelakoken simehuli si ngena ate Tuhan. Sumbatna komunikasi ibas keluarga erbahanca anggota keluarga erbahan si la mehuli.

            Temanta sendah eme pakelah ringringndu nehken singena ateNa. Arah tema enda kita iajar gelah selaku orang tua harus min riring kula simerupaken pemere Dibata ipake guna ngajari anak ras isi jabu, subuk ibas baba ntah pe pengajaren praktek (verbal ras non verbal). Selaku anak, harus megiken ras ngenen pengajaren orang tua gelah sangap nggeluh. Bagepe gedang umurna (bdk. Kel. 20:12) . Anak-anak la ngelakoken si la mehuli. Anak-anak makeken ringring kulana guna si mehuli. La bagi anak-anak Eli eme Hopni ras Pinehas, kai sijadi sikerajangen Tuhan pe i tangkona. La ihamatina Tuhan. La ia mbiar man Tuhan.  Bagepe kerina keluarga harus megiken kata Dibata gelah ipasu-pasu Tuhan keluarganta.

Pdt. Steven Kumenit, STh.M.Min.    

Kuendesken Diringku Man Tuhan (Lukas 1: 38; Filipi 2:5-11)

PERPULUNGEN JABU-JABU

GEREJA GBKP

TANGGAL 11 – 17 NOVEMBER 2018.

Lukas 1 : 38; Pilipi 2:5-11.

Tema : Kuendesken Diringku Man Tuhan.

LATAR BELAKANG

A.   Lukas 1:38.

1.     Sada respon Maria ngaloken perkuah ate Tuhan kenca Gabriel eme Malaikat Tuhan mpetetap ukur pusuh Maria. Sebab tangtangna Maria la tek kerna kai siikataken Malaikat Gabriel. Ibas ukur Maria, janah enda siikatakenna man Malaikat Gabriel eme la kap mungkin ia banci mupus, sebab ia lenga erjabu. Tapi kenca ikataken Gabriel kerna la lit simetahat man Dibata, maka tek Maria. Tek Maria erkite-kiteken ia sekalak situtus ibas eragama/ersembah man Tuhan.

2.     Maria eme sekalak diberu sipatuh man Tuhan, amin gia situhuna nggo iteh Maria kai bakal ialokenna ibas kegeluhenna kenca ialokenna sura-sura Dibata e. Sialoken Maria eme kiniseran sebab secara manusia, sekalak diberu si lenga erjabu janah mehuli kulana ras lit pupusna, banci isingkirkan kalak. Banci icekuraki kalak. Tapi selaku diberu situtus erkiniteken man Tuhan maka patuh ia ibas rencana keselamatan Tuhan man doni enda arah dirina. Arah dirina, Tubuh Jesus anak Dibata. Jesus jadi Raja ras kinirejanNa la erkeri-kerin. Erkiteken sie me nina Maria “Kuendesken diringku man Tuhan. Janah jadilah ibas aku bagi singgo ikatakenndu e!”. Lit pengendesen diri guna ipake Tuhan.

B.    Pilipi 2:5-11. 

1.     Paulus mpersingeti perpulungen Pilipi gelah nggeluh alu kepatuhan ras kiniteruken ukur bagi Yesus Kristus. Perpulungen arus meneladani Yesus Kristus ibas kegeluhen berjemaat. Karakter Kristus Yesus lit min man perpulungen Pilipi.  Alu bage kiniersadan perpulungen Pilipi tetap terjaga. Enda ikataken Paulus sebab nggo lit anggota perpulungen rubat ras dirina saja siiukurina. Tapi nggeluh ibas kiniteruken ukur bagi Kristus banci mbaba perpulungen nggeluh ibas kiniersadan ras mateken biak doni singgeluh denga ibas diri perpulungen.

2.     Pindo Paulus gelah Perpulungen nggeluh bagi Kristus Yesus, sebab lit piga-piga hal sibanci iikuti perpulungen eme sipemena : ibas Yesus Kristus lit biak Dibata, erkuasa ras ermulia, bagepe Yesus Kristus bali ras Dibata tapi enda kerina la ipertahanken Yesus. ItadingkenNa kerina e, jadi seri ras manusia, nggeluh bagi sekalak juak-juak janah teridah bagi sekalak jelma. Sipeduaken : Amin gia lit biak Dibata, Bali ras Dibata tapi nggeluh Yesus nggeluh ibas meteruk ukur. Erkemalangan man Dibata seh mate. Ibas kegeluhen siicidahken Yesus e dungna ipehaga Dibata Yesus Kristus. Ibereken Dibata kuasa simeganjangna kal gelah kerina  si enggeluh i surga bagepe i doni ras i teruh doni erjimpuh nembah man baNa, janah ngakuken Yesus Kristus eme Tuhan. Alu bage kiniteruken ukur si lit man perpulungen labo kiniteruken ukur si abstrak tapi nyata siteridah arah perukuren, penggejapen, pergaulan ras nggeluh ibas persadan i tengah-tengah perpulungen.

3.     Kepatuhan ras kegeluhen kiniteruken ukur man Yesus selaku Tuhan, mabai perpulungen nggejapken kerna ise situhuna ia. Perpulungen nggo iselamatkan Tuhan, emaka perpulungen pe arus jadi pancur guna keselamatan doni. Bagepe ibas kegeluhen teptep wari nggeluh alu meteruk ukur ras nggeluh ibas persadan. Alu bage  nterem kalak ngakuken Yesus Kristus eme Tuhan. Jadi ibas kegeluhen perpulungen Pilipi lit permberitaan kerna Yesus Kristus.

APLIKASI

      Nggeluh ibas gereja arus nggeluh ibas persadan situhu-tuhu. Sebab nggeluh ibas persadan maka sidalanken tugas gereja. Bagepe ibas kita nggeluh ibas persadan berarti nggo siberitaken kerna Yesus Kristus simerupaken Tuhan jine. I ja ibas rangka keselamatan  doni ras manusia nggit Dibata nusur ku doni enda jadi seri ras manusia. Erkiteken sie me ipake Tuhan si Maria jadi sarana keselamatan doni ras kerina manusia. Maria selaku diberu sierkemalangan man Tuhan patuh ia ibas sura-sura Dibata. Iendesken Maria geluhna guna ipake Tuhan mpeseh sura-suraNa nelamatkan kita kerina.

      Perlu siteh kita jadi kristen, labo kebetulan, tapi memang erkiteken pendilo Tuhan man banta. Erkiteken sie me kita arus patuh man Tuhan. Sebab sebage kalak kristen kita arus mberitaken kerna Yesus Kristus eme Tuhan sinelamatkan manusia. Kita nggeluh ibas rencana ras rancangan Tuhan. Emaka gelah seh sura-sura Yesus Kristus ibas doni enda perukurenta arus seri ras Yesus Kristus. Biak kemanusiaan (keegoisan, meganjang ukur) arus ibeneken. Kita arus patuh man sinuruh kita eme Yesus Kristus. Alu bage kegeluhen persadan ibas gereja erdewasana, bagepe  keselamatan  tetap jadi sikerajangenta. Alu kata sideban palas kita nggeluh ibas persadan gereja ras nggeluh ibas keselamatan eme pengendesen diri alu tuhu-tuhu. Nggit kita ipake Tuhan ibas mpeseh sura-suraNa.

Pdt. Steven Kumenit, STh.M.Min.