Kinirugin Kap Kerina Rimbangken Kristus (Pilipi 3:1-11)

PERPULUNGEN JABU-JABU

TANGGAL 4 – 10 FEBUARI 2018.

GEREJA GBKP

Pilipi 3: 1-11

Tema : Kinirugin Kap Kerina Rimbangken Kristus.

LATAR BELAKANG

1.      Sijadi oratenta sendah eme kata persinget ras pergegeh Paulus man perpulungen Pilipi situpung sie lit kelompok kristen Jahudi sireh ngajarken kerna teologi Judaisme eme kalak kristen siasalna la kalak Jahudi nari la selamat adi la sunat ras la ndalanken adat istiadat Jahudi.

2.      Ibas kata persinget ras pergegeh enda gelah perpulungen Pilipi banci metenget  nandangi ajaren e. Sebab ajaren e la mbaba keselamaten situhu-tuhu, sebab  keselematen situhu-tuhu la bo erkiteken ndalanken undang-undang sunat tapi tekman Jesus Kristus.

3.      Ipihak sideban Paulus nerang kelompok sireh ku Pilipi simbaba ajaren Judaisme e. Alu tegas ikataken Paulus kelompok  e ndalanken perbahanen-perbahanen sijahat emaka kalak e biang. Biang eme gelar siitujuken nandangi kalak si la tek man Tuhan, khususna kalak Samaria. Genduari gelar biang itujuken man kalak kristen Jahudi sitetap mpertahanken Taurat ras undang-undang agama Jahudi, khususna suna. Man kalak Jahudi, anak laki-laki arus isunat. Perlu siteh kai siiandalken “biang” e nggo idalanken Paulus. Tutusen Paulus pe asangken ia. Emaka ate Paulus ula megah akapna ndalanken sie kerina.

4.      Gelah la meganjang ukur “biang” e janah jera ia kerna kelepakenna e ituriken Paulus kerna kegeluhen ope denga ia ngaloken Jesus Kristus ulu keselamatenna. Nina Paulus ia isunatken tupung umurna 8 wari (anak dilaki kalak Israel arus isunatken ibas umur 8 wari), Paulus kalak Israel/Heber asli. Kerna ndalanken undang-undang, Paulus merupaken golongan Farisi. Janah erkiteken tutus ndalanken undang-undang e igasgasi Paulus gereja. Emaka nina Paulus adi e palasna ngaloken keselamatan, Paulus me jelma si la pernah ersalah. Tapi enda kerina sada kerugin man Paulus kenca jumpa ras tek man Jesus Kristus. Ntah merupaken sada kinirugin man Paulus rimbangken simeherga e, eme penandai kerna Jesus Kristus selaku Tuhan.

5.      Engkai maka kerina prestasi ras keuntungen-keuntungen siidat Paulus ope denga tek man Jesus rugi akapna janah iambengken kerinana e, sebab ate Paulus nggit ngaloken (memiliki) Kristus alu tuhu-tuhu ras kebenarenNa alu tek tuhu-tuhu ras nandai Kristus alu payo, janah banci igejapken Paulus kerna kuasa kekeken Kristus ibas kegeluhenna tep-tep wari, janah ate Paulus ikut ngenanami kiniseran Kristus alu bage bali ras Kristus ipekeke ibas simate nari, Paulus pe  banci keke ibas simate nari, adi pagi ia mate. Jadi labo arah kebenaren pribadi, bagepe alu ndalanken ras patuh nandangi Taurat maka selamat. Janah enda pe iarapken gelah Perpulungen Pilipi la terpengaruh ibas ajaren e, gelah perpulungen megenggeng ras tetap paguh ibas kiniteken man Jesus Kristus. Perpulungen la terpengaruh ibas ajaren-ajaren sipapak. Alu bage perpulungen arus tetap nggeluh meriah ukur ibas persadan ras Tuhan.

APLIKASI.    

            Jesus Kristus eme Tuhan sijadi manusia. Bagepe arah Jesus Kristus me maka kita terkelin. Alu bage ngatakenca ise kita manusia adi sibandingken ras Jesus Kristus. Emaka sada kerugin man banta adi siperimbangken Jesus Kristus. Maksud ibas perimbangken Jesus eme kita la patuh man baNa. I ja ibas kita nggeluh i tengah-tengah doni kai si la ngena ate Tuhan, em silakoken kita. Termasuk kita ngajari kalak papak alu erbage-bage pengajaren, subuk pengajaren arah kata bagepe arah perbahanen, gelah kalak ikut kita. Kita kari sirugi, sebab sialoken kita eme penghukumen ibas Dibata nari. Payo ibas paksa sigenduari, banci saja lenga sialoken penghukumen idur Dibata nari, tapi ibas kerehen Jesus mulihken, je me sialoken penghukumen e, kita nggeluh ibas pernembeh ate Tuhan, ras nggeluh ibas neraka. Emaka ula jago siakap banta. Mari sinen rasul Paulus. Tuhu ope denga ia ngaloken Jesus sebage Tuhan ras keselamatenna, undang-undang ras ketutusen ndalanken taurat akapna sijagona. Tapi kenca ialokenna Kristus, maka kai sisedakah e akapna mehuli, kepeken “sampah” kerina e. Emaka asa gegeh ras kengasupenna, amin gia jumpa perbeben ras kiniseran, simehuli ras singena ate Tuhan saja siibahanna. Tuhu-tuhu nggeluh Paulus nggeluh alu erdame ras Jesus Kristus. Sebab ibas palas enda Paulus banci keke ibas simate nari, adi pagi ia mate. Kita pe arus bage, ula kita perimbangken Jesus, tapi marilah kita nggeluh ibas persadan ras Jesus Kristus, sebab ibas nggeluh ibas persadan ras Jesus Kristus lit keriahen ukur. Ula kita mbiar adi jumpa perbeben ras kiniseran, sebab Kristus eme temanta, Kristus eme Tuhanta si katawari paksa pe nampati kita adi jumpa perbeben ras kiniseran. Emaka mari min ibas pusuh ukurta nggejapken sada kinirugin siakap adi sirimbangken Kristus.

Pdt. Steven Kumenit, STh.M.Min.

Turah Dingen Erbuahlah Kata Dibata Si Ibegikenndu (Lukas 8: 9-15)

KOTBAH MINGGU

4 FEBUARI 2018

GEREJA GBKP

Invocatio   :    Ia bali ras batang kayu siturah deher lau maler,uratna njoler seh kempak lau. La aru atena tupung paksa perlego, erkiteken bulungna tetap meratah.La aru atena tupung paksa perlego, lalap meramis buahna (Jeremia 17:8).

Ogen         :    Jesaya 55:6-9 (Responsoria)

Kotbah      :    Lukas 8:9-15 (Tunggal).

Tema         :    Turah Dingen Erbuahlah Kata Dibata Si Ibegikenndu.

LATAR BELAKANG

1.      Kuasa Yesus nggo mbar, emaka reh kalak ibas erbage-bage ingan njumpai Jesus. Kerehen kalak sinterem jumpai Jesus, kepeken la kerina tuhu-tuhu megiken pengajarenNa ras ndalanken ibas kegeluhenna tep-tep wari.

2.      Ibas palas enda me Jesus mereken pengajaren kerna kalak singaloken Kinirajan Dibata alu perumpamaan. Janah inti kinirajaan Dibata eme Jesus Kristus. Kalak singgeluh ibas kinirajaan Dibata berarti nggeluh ibas keselamaten. Tapi gelah murah ngangkaisa, Jesus mereken pengajaren alu make perumpamaan. Lit empat model kalak singaloken Kata Dibata siisuan Jesus Kristus. Perumpamaan enda ikataken erkite-kiteken lit kalak si la ngasup ngantusisa kerna Kinirajaan Dibata. Kalak si la ngasup ngangkaisa e me iterangken Jesus alu make perumpamaan.

3.      Ibas rangka keselamatan jelma ras doni enda me maka Jesus reh ku doni enda, janah nggo ipeseh Jesus kerna keselamatan arah kata, model kegeluhen Jesus ras tanda-tanda sengget siicidahken Jesus. Tapi erbage-bage model kalak singaloken keselamaten e. Ajar-ajar Jesus pe la ngasup ngantusi perumpamaan siajarken Jesus man jelma sinterem kerna kinirajaan Dibata. Emaka sanga Jesus serap sisada, isungkun ajar-ajarNa kerna maksud ras tujun perumpamaan e. Perlu siteh ibas kegeluhen kalak Jahudi njelasken salah sada hal make perumpamaan sada hal sibiasa, janah mis iteh kalak tujunna. Tapi perumpamaan siipake Jesus mbages kal antusenna emaka ajar-ajarNa pe la ngasup ngangkaisa.

4.      Lit empat model kalak singaloken Kata Dibata (benih) siisuan Jesus. a). Benih sindabuh ku dalan iandingken man kalak simegiken berita e, ibegikenna, tapi reh iblis muat kata e ibas ukurna gelah ula ia tek dingen terkelin. b).Benih sindabuh ku taneh sierbatu-batu iandingken man kalak simegiken berita e, ibegikenna dingen ialokenna alu meriah ukur, tapi la mbages uratna, kentisik ngenca ia tek. Reh kenca percuban minter ia murtad. c). Benih sindabuh ku peren duri, iandingken man kalak simegiken berita e, tapi aru atena janah jadi kalak bayak atena. Ersenang-senang atena ibas doni enda. Kerina sie nindih ia seh maka buahna la sempat metua. d). Benih sindabuh ibas taneh simehumur, iandingken man kalak si megiken berita e, ibegikenna, ibunikenna ibas ukurna simehuli dingen tetap, janah megenggeng seh erbuah.

5.      Perumpamaan enda ipeseh gelah jelma sinterem ras ajar-ajar Jesus ngaloken berita e ras tek tuhu-tuhu man Jesus Kristus. Alu bage jelma sinterem bagepe ajar-ajar Jesus ula nari ngukuri ras salah ngangkai kerna kinirajaan siibaba Jesus. Sebab nterem kalak bagepe ajar-ajar Jesus ngangkai maka kinirajan siibaba Jesus bali ras kinirajaan ibas doni enda.

APLIKASI.

            Sinen ibas kegeluhen genduari nterem denga anggota perpulungen bagi perumpamaan 1-3 ibas bahan khotbahnta. Jadi penungkunen man banta uga gelah anggota perpulungen bali ras perumpamaan sipeempatken. Alu bage gereja banci jadi gereja sidewasa. Siarus ibahan anggota perpulungen gelah banci ndarat ibas perumpamaan 1-3 eme perpulungen arus ngukuri ras nandai Jesus alu payo. Arus lit bas ukurta hanya ibas Jesus maka kita ndatken keselamatan, emaka lit ketutusen ndarami Jesus guna keselamatenta. Erkiteken Jesus ulu keselamaten maka tutus kita megiken Kata Dibata, sebab Kata Dibata ntah pe Berita Si Meriah eme kuasa Dibata guna keselamaten manusia (bdk. Roma 1:16).

            Kata Dibata eme la saja mereken pengajaren man banta tapi mereken persinget ntah tegoran man banta gelah kita tetap nggeluh ibas keselamaten. Emaka adi lit cupingta begikenlah. Maksudna adi nggo seh Kata Dibata man banta, janah adi sigejap lit salah dosanta, maka jeralah kita, gelah kita nggeluh ibas keselamaten.

            Nggeluh kata Dibata bas kita berarti lit buah bas kita, sebab kita nggeluh ulu keselamatan. Maksudna kita merupaken batang kayu siturah deher lau anak siuratna njoler seh kempak lau. Kita nggeluh ibasulu kegeluhen eme Yesus Kristus, emaka ugapa pe keadaan kegeluhenta,jumpaperbeben ras kiniseran la kita mbiar ras aru ateta sebab Dibata sinampati kita emaka lalap batang kayu (kita) “sehat” ras erbuah.

Pdt. Steven Kumenit, STh.M.Min.

Jadilah Dewasa (Ibrani 5:8-14)

PERPULUNGEN JABU-JABU

GEREJA GBKP

TANGGAL 28 JANUARI – 3 PEBUARI 2018.

Heber 5:8-14.

Tema : Jadilah Dewasa.

LATAR BELAKANG

1.      Sijadi bahan oratenta sendah eme kata pergegeh ras kata persinget man kalak kristen sisangana ngenanami kiniseran simesangat. Kalak kristen tupung sie ngenanami kiniseran erkite-kiteken lit penganiayaan. Erkiteken sie me kalak kristen asal Jahudi nggo mulai mikirken mulihi kerna status kalak Jahudi siersembah ibas rumah pertoton i Jerusalem. Kalak kristen Jahudi enda nggo mulai lit ukurna nadingken keristenanna, ntah nadingken kinitekena man Jesus Kristus. Pengakap kalak enda sederhana saja, adi ia eragama Jahudi ersembah i rumah pertoton berarti ia la dat penganiayaan erkite-kiteken agama.

2.      Ibas palas enda maka penulis Heber mereken sada pergegeh man kalak kristen gelah inenna kerna Jesus Kristus selaku  Anak Dibata. Selaku Anak Dibata, Jesus erlajar patuh ibas kiniseranNa. Erkiteken kepatuhenNa e dungna Jesus jadi serta ras ulu keselamaten manusia. Bagepe Jesus itetapken Dibata jadi Imam Si Mbelin rikutken gologen Imam Malkisedek. Ibas buku Enseklopedia masa kini ngataken Malkisedek eme Imam Dibata si meganjangna (Heber 7:2).

3.      Jesus Kristus ikataken Imam Simbelin rikutken golongen Malkisedek sebab kalak kristen Jahudi ngangkai alu tuhu-tuhu fungsi imam. Imam eme iangkat ibas rangka jadi kelang-kelang manusia ras Dibata. Imam nehken persembahen siibaba kalak Jahudi tupung ersembah man Tuhan. Emaka ialemi Dibata dosa-dosana. Jesus selaku Imam Simbelin merupaken kelang-kelang kalak kristen guna ndatken keselamatan. Emaka siarus lit man kalak kristen eme kepatuhen nandangi kiniseran “sambil” tek man Jesus Kristus. Sebab kalak kristen pasti ndatken kegeluhen siserta ntah pe nggeluh ibas keselamatan.   

4.      Situhuna Jesus Kristus ulu keselamatan merupaken inti kegeluhen kalak kristen, tapi idah penulis erkite-kiteken baga denga kegeluhen kalak kristen maka ibuatna sada kesimpulan kegeluhen kalak kristen bali ras sekalak anak-anak siminem susu denga, lenga ngasup man nakan keras. Adi minem susu denga berarti lenga siteh kai sibenar ras sisalah. Enda ikataken gelah kalak kristen Jahudi tehna kai siilakokenna eme sada hal sisalah.

5.      Perbedaan minem susu ras man nakan keras eme adi minem susu denga berarti lenga itehna kerna sisalah ras benar, emaka arus iajarken alu manjar-anjar kerna kebenaren situhu-tuhu gelah amin gia kalak kristen nggeluh ibas kiniseran, tetap kalak kristen patuh ras ernalem man Tuhan saja. Adi man nakan keras berarti kalak kristen nggo jadi kalak simbelin, siarah pengalaman ngasup ia meteh apai sibujur ras apai si jahat, janah ngelakoken si bujur ibas kegeluhenna tep-tep wari.

APLIKASI

            Ngerana kita kerna dewasa berarti la saja soal dewasa umur, tapi dewasa kiniteken. Sebab dewasa umur lenga tentu dewasa kiniteken. Kalak si lenga dewasa kiniteken amin gia nggo dewasa umur mekatep kegeluhenna nggeluh alu mbiar, cian ate ras ndalanken ka isi la ngena ate Tuhan. Tapi sebalikna amin gia umurna lenga dewasa tapi kinitekenna nggo dewasa, meriah ras malem atena ndalanken kai singena ate Tuhan, sebab tehna kai siilakokenna eme ibas rangka keselamatenna. Siialokenna eme kebujuren keadilen ras kai singena ate, amin gia jumpa perbeben ras kiniseran la masalah man banta, sebab siteh Tuhan pasti nemani kita ras mereken serpang pulah. Bagepe la kita, mbiar adi kin kita arus mate, sebab nggo siteh kerna inganta eme i surga.

            Temanta ngajuk man banta gelah jadilah dewasa. Uga carana gelah kita banci jadi dewasa ibas kiniteken. Kita arus tuhu-tuhu ernalem man Tuhan selaku ulu kegeluhenta. Kai sisedekah enda sipelajari subuk ibas gereja bagepe ibas kegeluhenta tep-tep wari harus ipraktekken ibas kegeluhenta tep-tep wari. Emaka kenca kita jadi dewasa, kita pe ngajarken man kalak sideban uga seharusna ernalemman Tuhan. Uga kalak sidewasa kinitekenna ibas kegeluhen tep-tep wari. Alu bage erkiteken nterem singgo dewasa maka sijadi ibas kegeluhenta, subuk ibas keluarga, gereja ras masyarakat eme nggeluh mehuli singena ate Tuhan. Nggeluh kita kerina ibas sikeleng-kelengen. Kusus ibas kegeluhen bergereja maka  gereja sidewasa eme program pelayanenna erdalan alu mehuli. Kerina anggota perpulungen muat bagin ibas pelayanen diakonia, koinonia ras marturia. Janah adi kune lit masalah ibas gereja, banci terdungi alu mehuli. Bagepe kai siikataken ibas tata gereja eme Tata laksana pasal 1 banci erdalan alu mehuli.

Pdt. Steven Kumenit, STh.M.Min.