Jesus Nangkih Ku Surga Man Gunanta (Heber 9:23-26)

PERPULUNGEN JABU-JABU

GEREJA GBKP

TANGGAL 29 APRIL – 5 MEI 2018.

Heber 9 : 23 – 26.

Tema: Jesus Nangkih Ku Surga Man Gunanta.

LATAR BELAKANG

1.      Sijadi oratenta sendah harus ioge ibas ayat 1 (sada) nari, emaka  banci siangkai kerna bahan oratenta. Sebab ibas bahan oratenta Penulis membedakan Jesus Kristus ras barang-barang simerupaken simboli surga nari si lit ibas rumah pertoton ras imam simbelin.

2.      Perbendaan Jesus Kristus ras barang-barang simerupaken simbol surga bagepe imam si mbelin ras banci ngangkai kerna Jesus simerupaken Imam Simbelin merupaken sada keuntungen ras mereken pergegeh nandangi kalak kristen siasalna Jahudi nari sisangana nggeluh ibas penindasan ras kiniseran. Sebab penulis ngidah, kalak kristen siasalna Jahudi nggo mulai ngukuri mulihken ku agama Jahudi. Sederhana alasan mulih ku agama Jahudi, sebab adi agama Jahudi la ndatken kiniseran, kususna la itindas kalak Jahudi, ras banci ersembah alu teneng ibas rumah pertoton. Bagepe ersembah ibas rumah pertoton teridah simbol-simbol surga. Jadi man kalak enda agama Jahudi lit keuntungan.

3.      Ibas konteks rumah pertoton lit telu ruangan eme ruangan umum. Ruangan umum enda iperuntukken man kerina kalak siersembah man Tuhan. Lit ruangan badia. Ruangan badia enda, imam-imam ngenca sibanci bengket (ayat 2). Lit ruangan badia kal. Ruangan enda imam simbelin ngenca sibanci bengket, e pe sekali setahun ngenca (ayat 3). Fungsi imam simbelin eme mpersembahken kurban darah man Tuhan gelah ialemi Dibata dosa-dosaumatNa.

4.      Alu jelas kerina si lit ibas rumah pertoton simbol ngenca, janah imam simbelin kelang-kelang ngenca antara Tuhan ras umat. Tapi Jesus merupaken Imam Si Mbelin situhu-tuhu. Darah ras kula Jesus merupaken persembahen man Dibata.  Janah la bagi imam simbelin ibas agama Jahudi, ia arus bengket  ku ruangan sibadia kal sekali setahun baba kurban dareh guna mindo man Tuhan gelah masapkan salah dosa umat. Alu bage ngataken maka siibaba imam simbelin e la sempurna erkiteken sie harus iulihi tep-tep tahun.  Tapi Jesus, tubuh ras darehNa siikurbankenna, janah Jesus labo bengket ibas ruang si badia kal si lit ibas rumah pertoton, tapi i surga. Janah dareh Jesus e merupaken sempurna. Emaka sekali ngenca persembahen e.

5.      Jesus bengket ku Surga gelah kita selamat. Perlu siteh ibas teologi agama Jahudi, kususna ruangan badia kal si lit ibas rumah pertoton merupakan ingan Dibata. Emaka imam simbelin reh ku ingan si badia ibas rangka jumpai Tuhan. Alu bage kenca imam simbelin jumpai Tuhan alu mbaba kurban dareh merupaken pemindon gelah Dibata mereken pengalemi dosa man umatNa. Emaka terjadi perdamen antara manusia ras Dibata. Tapi Jesus Kristus la bengket ku ingan si badia kal si lit ibas rumah pertoton e, tapi bengket ku Surga ngadap man Dibata gelah kita pe nggeluh ras Jesus i Surga. Sebab merupakan ingan kalak si badia.

APLIKASI

            Kenangkihen Jesus Kristus ku Surga ibas rangka ngadap man Dibata gelah gelah kita nggeluh ibas Surga (bdk.ayat 24). Sebab kenca Jesus Kristus mate ras keke ibas simate nari, simerupakan pegancih dareh biri-biri gelah litna pengalemi dosa, maka kita nggo ibersihken ibas kerina dosa-dosa nari, sebab dareh Jesus sibadia mbersihken kita ibas dosa-dosanta nari. Emaka kenca kita nggo nggeluh ibas keselamatan, kita iperkenanken guna nggeluh ibas surga. Jadi surga merupaken ingan kalak singgo iselamatken. Perlu pe siteh ibas Jesus ngadap man Dibata berarti Jesus sebage Imam si Mbelin. Jesus jadi kelang-kelang kita ras Dibata gelah kita singgo iselamatkan nggeluh ibas surga.  Alu kata sideban Jesus Imam Simbelin e ngadap man Dibata, baba darehNa jine man Dibata gelah ialemi Dibata kerina salah ras dosanta.

            Surga merupaken ingan kalak singgo iselamatken, emaka kenangkihen Jesus ku surga ngadap man Dibata gelah kita nggeluh i surga ras Tuhan.  Kenangkihen Jesus ku surga ibas rangka nikapken ingan man kalak si tek ras ndalanken kai singena ate Tuhan.

            Perlu siteh surga ras doni berbeda suasanana. Suasana ibas doni merupaken suasana simereken kecedan ate, ndele ate, mesui, tangis, kiniseran, rsd (Ingan simeluat). Tapi nggeluh ibas surga eme nggeluh ibas kedamen, kemalemen ate, kesenangen. Janah kegeluhen si bage me siisikapken Jesus man banta.

            Amin gia Jesus nangkih ku surga guna kita, labo berarti la lit syaratna. Syaratna eme kegeluhenta harus badia. Emaka gelah tetap badia, kita tetap ipersingeti gelah adi lit salah dosa kita, kita harus mindo pengalemi dosa ibas Tuhan nari, jenari kita harus nggeluh ibas pertobatan.

            Penungkun apakah nggeluh i surga banci sinanami kenca kita mate? banci ue, banci lang. Saja kegeluhen ibas surga banci sinanami kenca Jesus Kristus reh mulihken ku doni enda. Ibas Jesus mulihken ku doni idapetiNa lit simate ras lenga (bdk. 1 Tesalonika 4:16-17).

            Erkiteken Jesus Kristus nggo nangkih ku surga guna kita, emaka marilah sijaga kegeluhenta gelah ibas kerehen Jesus Kristus peduakaliken ibas doni enda, kita banci nggeluh ras Jesus ibas surga.

Pdt. Steven Kumenit, STh.M.Min.      

Ertoto Alu Pusuh Meciho (Matius 6:5-8)

PERPULUNGEN JABU-JABU

TANGGAL 22 – 28 APRIL 2018

GEREJA GBKP

Matius 6 : 5 – 8.

Tema: Ertoto Alu Pusuh Meciho.

LATAR BELAKANG

1.      Sijadi bahan oratenta sendah eme sada bagin si la terpisahkan ibas kotbah Jesus i datas uruk. Ibas kotbah enda, Jesus ngajari jelma sinterem ras ajar-ajarNa kerna ertoto.

2.      Kotbah Jesus kerna ertoto enda la saja ngajarken uga searusna ertoto, tapi pe mengkritik praktek ertoto kalak Farisi. Perlu siteh lit sada aturen agama Jahudi, ija kalak Jahudi arus ertoto telu kali sehari eme jam 09.00, jam 12.00 ras jam 15.00. Janah isi pertoton ntah jenis pertoton erbage-bage bentuk. Emaka adi nggo jam e, ija pa pe ia; i simpang-simpang, i pasar, rsd kalak Fairi arus ertoto.

3.      Kritikan Jesus nandangi kalak Farisi sebab matovasi kalak Farisi ertoto beda. Kalak Farisi ertoto gelah iidah kalak ia eme kalak situtus beragama. Jadi lit pamer pertoton. Harus siteh  ertoto man kalak Jahudi merupakan sada hal sipenting ibas kegeluhenna tep-tep wari. Sebab ncidahken hubungan siharmonis ia ras Tuhan singgo mbebasken ia ibas taneh perbudaken i Mesir nari. Bagepe lit sada pengangkan nandangi kalak Jahudi (Farisi) adi ertoto i ingan – ingan umum/keramaian, bali ras buniken perbahanen simehuli (bdk = pahala).

4.      Tujun pertoton eme man Dibata, janah adi ertoto man Dibata teridah min ibas kegeluhen tep-tep wari. Spritualitas (kesalehan) nggeluh teridah. Emaka nina Yesus adi ertoto ula bagi kalak sipekulah-kulah. Enda ikataken Yesus sebab pertoton kalak Farisi terjeng “pamer” ngenca, emaka ibas kinatana perbahanen si la ngena ate Tuhan ilakoken kalak Farisi eme penindasan, kinilabujuren, kinilaadilen, rsd.

5.      Ope denga ertoto man Dibata, kepeken nggo leben iteh Dibata kai sura-suranta, emaka adi ertoto man Dibata harus “to the point”. Kalak si ertoto mulih-ulih gelah idah kalak gedang pertotonna situhuna ia nggo erdosa man Dibata. Engkai maka ia erdosa man Dibata sebab kewajiban agama (Abineno = keadilan agama) isehkenna   labo erpalaskan ukur siersuruh ras ngataken bujur man Dibata, bagepe mindo man Dibata, tapi gelah idah kalak ia kalak situtus eragama, janah ipuji kalak ia. Jadi labo guna kemulian Dibata. Emaka kalak sibage nggo dat upana. Kai kin upahna ? upahna eme la bengket ku bas Kinirajaan Surga. Ibas palas enda me ikataken Yesus man jelma sinterem adi ertoto, bengket ku bas kamar, eruk pintuna.  Jadi penungkunen, apakah salah ertoto i lebe-lebe jelma sinterem (Umum). Lang. Sebab Jesus pe piga-piga kali ertoto i lebe-lebe jelma sinterem/ umum (Matius 11:25; Yohanes 11:42; Yohanes 17). Siimaksudken Yesus bengket ibas kamar ras eruk kamar e eme harus tenang ras ula pamer pertoton ras terjadi komunikasi antara kita ras Tuhan saja.

APLIKASI

            Napas kalak kristen eme ertoto. Ngkai maka ertoto ikataken napas. Sebab kita ertoto man Dibata simerupaken ulu kegeluhen. Emaka ibas kita ertoto berarti la saja kita nggeluh ibas relasi ras Tuhan, tapi kita ersada ras ulu kegeluhen e. Bagepe kenca kita ertoto teridah min ibas kegeluhenta tep-tep wari.

            Melala bentuk pertoton, tapi pertoton kai pe e harus isehken alu pusuh simeciho. Sebab alu pusuh simeciho pertotonta ibegiken Dibata. Perlu siteh Dibata siisembah kita eme Dibata simeteh kerinana, termasuk kai siibutuhken kita. Janah Dibata e me Dibata simehuli. Siimaksudken ertoto alu pusuh simeciho eme pertotonta man Dibata saja ras la lit tujun sideban. Alu bage meriah ukur Dibata megiken pertotonta, janah terjadi me relasi simehuli antara kita ras Tuhan. Ertoto alu pusuh simeciho ertina kita harus menyampingkan keegoisan, meganjang ukur, nembeh ate, rsd. Sebab enda kerina benteng-benteng simenghalang komunikasinta ras Dibata.

Pdt.Steven Kumenit, STh.M.Min.

             

Keleng Ateku Kam Tuhan ! (Yohanes 21: 15-19)

KHOTBAH MINGGU

TANGGAL 8 APRIL 2018

GEREJA GBKP

Invocatio :    Bagi anak-anak simbaru tumbuh min kam, sirusur muas nandangi susu pertendin si la lit icampurna, gelah alu nginem susu e reh belinna kam dingen selamat (1 Ptrus 2:2).

Ogen        :    Titus 3: 3 – 7 (Tunggal).

Kotbah     :    Johanes 21: 15 – 19 (Tunggal).

Tema       :    Keleng Ateku Kam Tuhan !

LATAR BELAKANG

1.      Sijadi bahan kotbahnta sekali enda eme kenca Jesus Kristus keke ibas simate nari, bagepe kenca sarapan pagi Jesus ras ajar-ajarNa i tepi dano Galilea. Ibas Jesus ncidahken diriNa man ajar-ajarNa termasuk Petrus, ngatakenca nggo ialemi Jesus salah ras dosa Petrus. Sebab tupung Jesus itangkap, 3 kali Petrus mersoken Jesus (bdk. Johanes 18:17-27).

2.      Telu kali Jesus nungkun kerna keleng ate man Petrus. Jadi penungkunen, engkai maka harus telu kali isungken Jesus kerna keleng ate man Petrus. Tuhu 2 kali Petrus njawab keleng ateku Kam. Tapi penungkunen petelukaliken, tuhu-tuhu getem pusuh Petrus. Sebab sadar Petrus telu kali isungkunna berarti lit sesuatu siiharapken Jesus man Petrus. Emaka getem pusuh Petrus, emaka jababan peteluken, lanai ikataken Petrus keleng Tuhan ateku Kam, tapi O Tuhan kai pe itehNdu kap. ItehNdu pe keleng ateku Kam.

3.      Nina Jesus man Petrus permakanilah biri-biringKu. Mpermakani biri-biri Jesus la bias terjeng keleng ate philia. Ibas arti kata keleng ate philia la megegeh, emaka harus alu keleng ate Agape. Sebab keleng ate Agape nggit berkorban ras tuhu-tuhu mperdiateken kebutuhen ras persoalan biri-biri. Bagepe ipihak sideban siarus ipermakani Petrus eme biri-biri Tuhan. Emaka keleng ate agape harus lit. Arah Petrus jadi alat Tuhan guna mpermakani biri-biri Jesus Kristus.

4.      Nina Jesus, keleng kin atendu aku, permakanilah biri-biringKu. E ngatakenca, lit pengendesen dahin man Petrus, janah Petrus harus bagi Jesus mpermakani biri-biri. Bagepe gelah keleng ate agape jadi palas Petrus selaku permakan.

5.      Sebage permakan siarus mpermakani biri-biri Jesus melala tantangan. Janah tantangan sibakal ihadapi Petrus banci mbeneken kesahna. Tapi kematen Petrus ibas rangka mpermuliaken Tuhan. Sebab erkiteken pelayanan.          

APLIKASI

            Paskah mereken kita keriahen, sebab Tuhan nggo mereken man banta kegeluhen simbaru. Kegeluhen simereken keselamaten. Erkiteken sie harus lit man banta pengakun secara pribadi kerna keleng ateku Kam o Tuhan. Janah pengakun enda harus teridah ibas perbahanenta tep-tep wari. Ibas erti kata perbahanen ope denga kita iselamatkan eme la teh mehuli, nggit ngelawan dingen erbahan salah, bagepe ikuasai kerincuhan kula ras erbage-bage sura-sura, erbahan sijahat, cian ate, segat ateta man kalak sideban, rsd, enda kerina nggo ikuburken radu ras kematen Jesus. Emaka ibas kekeken Jesus, kita nggo ngaloken perkuah ateNa eme keselamata. Janah kalak singgeluh ibas keselamatan, bagi anak simbaru tubuh min kita, eme muas susuh pertendin si la icampur gelah kita nggeluh rembak ras Tuhan dingen ngaloken kegeluhen situhu-tuhu sila erkeri-kerin. Kita alu la erleja-leja ngelakoken simehuli singena ate Tuhan.

            Keleng ateku Kam Tuhan, berarti la nggit kita ncedai pusuh Tuhan. Tapi arah kegeluhenta singena ate Tuhan. Arah kegeluhen Paskah meriah ukur Tuhan ngenen perbahanen-perbahanenta simehuli singena ateNa.

Pdt.Steven Kumenit, STh.M.Min.