Kamis, 28 Juni 2018

Tuhan Sikapken Taneh Mehumur, Erdangilah (Mazmur 107:33-43)


KHOTBAH MINGGU
TANGGAL 1 JULI 2018
GEREJA GBKP
Invocatio :     Kidekah doni enda lit denga, lalap lit paksa nuan ras paksa rani, paksa mbergeh ras mokup, paksa perudan ras paksa perlego, lit suari ras berngi (Kejadin 8:22).
Ogen        :     Kejadin 26:12-18 (Tunggal).
Kotbah    :     Masmur 107:33-43 (Responsoria).
Tema       :     Tuhan Sikapken Taneh Mehumur, Erdangilah.

LATAR BELAKANG
1.      Sijadi bahan khotbahnta sekali enda eme ende-enden pujin bangsa Israel tupung ia ersembah man Tuhan. Ende-enden pujin enda lit erkite-kiteken kiniulin Tuhan siigejapken bangsa Israel.
2.      Bagepe ibas bahan khotbahnta sekali enda teridah uga kerna kuasa, kiniulin ras keadilan Tuhan siisehkenNa nandangi manusia. Lit telu hal ibas bahan khotbahta eme : a.  Kuasa Tuhan. Tuhan ngenca singasup erbahanca lau mbelin jadi kerah, ulu lau jadi taneh kerah. Taneh simehumur jadi taneh masin. b). Tuhan menghukum kalak sierbahan kejahaten. c). Tuhan masu-masu ras mereken keriahen nandangi kalak si setia ras patuh man baNa. Ipulahi Tuhan ia ibas kiniseran nari.
3.      Pasu-pasu Tuhan nandangi kalak sipatuh man bana. Pasu-pasu Tuhan teridah ibas : a). Ibas gurun pasir lit lau silebih asa cukupna. b). Kalak sikelihen dat kebutuhenna, emaka lanai perlu idaramina nakan ibas ingan-ingan sideban tapi ibas sada ingan nggo isikapken Tuhan, emaka je me ia manteki sada kuta ras tading  i je. c). Taneh siianina mereken kesuburen emaka ngerdang ras suanna batang anggur, ras mereken ulih si seh kal buena. d). bangsaNa erteremna ras asuh-asuhen reh buena. e). Adi lit bangsa sideban nerangi bangsa Tuhan, maka Tuhan jadi benteng ras singelawan bagepe naluken bangsa e.
4.      Pemasmur ngidah manusia la ngasup ngelakoken sie, bagepe la lit Dibata sideban singasup ngelakoken sie emaka meriah ukur pemasmur. Igejapken pemasmur Tuhan siisembahna eme Tuhan sierkuasa, perkeleng ras adil. Erkiteken meriah ukur pemasmur maka ipujina Tuhan. Beda ras kalak jahat. Kalak jahat la ngasup ngidah kerna kiniulin Tuhan emaka la ngasup ia ermeriah ukur ras ngataken bujur man Tuhan.
5.      Pemasmur ngajuk gelah kalak sipentar harus ngidah kerna kiniulin ras kuasa Tuhan, janah harus ngakui kerna kuasa ras kiniulin Tuhan e merupaken bentuk keleng ate Tuhan nandangi manusia.

APLIKASI
            Kerina si lit ibas doni enda Tuhan si njadikenca, termasuk taneh ras musim-musim. Ijadiken Tuhan kerina e gelah kegeluhen manusia tercukupi. Siimaksudken tercukupi i jenda eme kita harus erdahin guna ndatken kebutuhen-kebutuhenta.
            Ibas prinsipna la ate Dibata kita nggeluh ibas kekurangen ntah pe kelihen (musil). Tapi ate Dibata gelah kita kerina nggeluh ibas kecukupen bagepe kelebihen. Guna ndatken sienda tentuna kita harus erdahin.
            Temanta sekali enda eme Tuhan nikapken Taneh mehumur, erdangilah. Tentuna tema enda tempa-tempa ikhususken man kalak perjuma ngenca. Tapi situhuna man banta kerina singgit erdahin ras ndatken hasil simbue.   Memang khusus man kalak perjuma, secara umum adi kin ngerdang harus mperdiateken musim-musim si lit. Tapi musim-musim e la bo berarti nentuken kesuksesanta, sebab teneh siisuan kita merupaken taneh pemere Dibata, janah taneh e mehumur, emaka banci sidat hasil adi ngerdang kita.  Kita banci dat hasil simehuli ras melala adi sirawat ras tutus kita erdahin. Emaka ula kita mbiar ntah aru ateta, sipenting man banta eme tutus kita erdahin.
            Genduari nggo paksana kita ngerdang, ingan erdahinta eme taneh simehumur. Maksudna nggo  paksana kita erdahin ras pepulung sen guna kebutuhen-kebutuhenta. Adi Tutus kita erdahin ras pentar kita pepulung sen (ngaturken keuangenta) maka kita banci dat hasil simelala si banci membiayai kebutuhen-kebutuhen keluarga bagepe guna pelayanan gereja. Erkiteken tutus kita erdahin ras pentar kita pepulung sen, erbahanca kalak sideban cian man banta. Amin lit kalak si cian man banta ula kita mbiar,  ula surut motivasi ras kejingkatenta erdahin.
            Banci kita erdahin ntah pe ngerdangerkite-kiteken Tuhan, emaka harus kita ngataken bujur man Tuhan.

Pdt. Steven Kumenit, STh.M.Min.

Jumat, 15 Juni 2018

Pilih Kalak Sierpemeteh Ras Pentar (Kejadian 41:33-36)


PERPULUNGEN JABU-JABU
TANGGAL 17 – 23 JUNI 2018
GEREJA GBKP
Kejadin 41 : 33-36.

Tema : Pilih Kalak Sierpemeteh Ras Pentar.

LATAR BELAKANG
1.      Sijadi man oratenta sendah eme strategi mengantisipasi gelah bangsa Mesir la ngkenai kelihen simesangat. Sebab arah 2 nipi raja Mesir (Firaun) singgo iterangken Jusup, bangsa Mesir iperhadapken alu bahaya kelihen simesangat, emaka harus iantisipasi.
2.      Lit 2 strategi siibereken Jusup man raja Mesir gelah bangsa Mesir terhindar ibas kelihen simesangat eme : a). Harus ipilih raja sekalak sierpemeteh dingen pentar guna ngaturken negeri enda. Alu kata sideban ia bertanggungjawab ngaturken kerina e. b). Raja harus ngangkat pegawai-pegawai guna pepulung seperlima ulih peranin tupung paksa nakan riba-riba sipitu tahun e. pegawai-pegawai e harus lit kuasa buniken ras njagaisa i tep-tep kuta singgo ipepulungna. Enda jadi persediaan kenca reh paksa kelihen si pitu tahun gelah rakyat la mate kelihen.
3.      Strategi jalan keluar siibereken Jusup enda eme kombinasi kalak sierpemeteh ras pentar sidahinna eme ngaturken ras kalak si ndahinna eme pepulung seperlima ibas hasiljuma nari. Erti enda kerina eme konsep kalak sierpemeteh ras pentar harus idalanken ras irealisasiken pegawai-pegawai e.
4.      Pemimpin sierpemeteh ras pentar merupaken pemimpin sibanci ngenen kai sibakal terjadi ras harus cepat antisipasisa. Antisipasi ntah pe ngaturken negeri merupaken tanggungjawabna.  
5.      Strategi jalan keluar siibereken Jusup, la saja guna njaga kelangsungan kegeluhen bangsa Mesir, tapi pe kegeluhen kesusuren Jakup sidungna jadi bangsa Israel. Jadi arah pemeteh ras kepentaren si lit bas Jusup, Dibata erdahin guna njaga anak-anakNa.

APLIKASI
            Tema kita, mabai kita ngangkai peranan ras tanggungjawab kita selaku kalak sierkiniteken singgeluh selaku masyarakat. Erkite-kiteken tahun enda eme tahun politik maka kita harus ngukuri kerna kelangsungen kegeluhen/kemajun bangsa Indonesia, emaka penting kal sipilih  pemimpin-pemimpin sierpemeteh ras pentar. Sebab pemimpin-pemimpin enda me singukuri kai siarus idalanken bangsa negaranta, ntah pe daerahnta ibas wari-wari sireh.
            Khusus i propensi Sumatera Utara (Medan) ibas bulan enda, tepatna tanggal 27 Juni 2018, lit pemilihen kepala daerah. Ibas pemilihen kepala daerah (gubernur ras wakil gubernur), kita isuruh milih pemimpin sierpemeteh ras pentar gelah iaturkenna Sumatera Utara enda alu mehuli.
            Kalak sierpemeteh ras pentar merupaken perpaduan pemeteh kepentaren, janah kalak sierpemeteh ras pentar la lit bas ia egois, sidirina saja iukurina, tapi ipikirkenna eme kesejahteraan masyarakat. pemeteh si lit bas ia ipakena guna banci ngenen kai siarus ikembangkan ras idalanken i daerah siipimpinna, janah kepentaren siberhubungan ras spiritualitas membentengi pemimpine gelah la ngelakoken si la mehuli, bagepe ibas litna kepentaren maka proriatas pengembangan kegeluhen masyarakat em siiukurina. Alu bage masyarakat tuhu-tuhu nggeluh ibas kedamenras kesejahteraan.

Pdt. Steven Kumenit, STh.M.Min.   

Minggu, 10 Juni 2018

PERSEMBAHKEN SIMEHULINA Kejadian 4:3-7; Ibrani 11:4)


PERPULUNGEN JABU – JABU
TANGGAL 10- 16 JUNI 2018.
GEREJA GBKP
Kejadin 4: 3-7; Heber 11:4.

Tema : PERSEMBAHKEN SIMEHULINA

LATAR BELAKANG
1.      Sijadi oratenta sendah eme turi-turin kerna persembahan dua anak Adam ras Hawa eme Kain ras Abil sinehken persembahen man Tuhan arah latar belakang pendahinnna. Kain sipendahinna petani ras Abil silatar belakang pendahinna eme peternak. Tapi ibas nehken persembahen man Tuhan, persembahen Abil ialoken Tuhan. Persembahen Kain lang. Erkiteken sie me merawa ras jutjut Kain.
2.      Jadi penungkunen engkai maka persembahen Kain la ialoken Tuhan ? memang secara jelas la ituriken ibas bahan oratenta, tapi adi sinen alu mbages, kepeken berhubungen ras keadaan rohani sinehken persembahen. Siimaksudken keadaan rohani eme pusuh ras kiniteken. Pusuh ras Kiniteken simehuli mbabai Abil nehken persebahen simehulina man Tuhan. La saja nehken persembahen simehulina man Tuhan alu materi simehuli, tapi ibas Abil nehken persembahen man Tuhan, ipersembahkenna alu dem pengataken bujur ras mbiar man Tuhan. Emaka persembahen Abil ialoken Tuhan erkiteken ia kalak bujur.
3.      Tuhu la ituriken kerna persembahen ialoken ras la ialoken Tuhan. Saja ibas teologi padan sindekah lit tanda-tanda persembahen sesekalak jelma ialoken ntah lang. Sipemena : Adi persembahen ialoken Tuhan, adi reh api i langit nari nutungi persembahen e. sipeduaken : Asap persembahen e nagkih lurus ku das.  
4.      Ngenen persembahen kain ras Abil, maka persembahen sesekalak jelma la ialoken Tuhan, labo erkiteken bentuk/jenis barang/materi, tapi pusuh ras batin sesekalak jelma. Jadi inen Tuhan pusuh ras batin sesekalak jelma sinehken persembahen e. Apakah pusuhna bersih ras tek man baNa ntah lang. Adi bersih ras tek man Tuhan, maka ialoken Tuhan persembahenna.
5.      Erkiteken la ialoken Tuhan persembahen Kain, nembeh ras merawa Kain man Abil. Keadaan batin Kain si ”berkecamuk” erkiteken merawa ras jutjut, kepeken merupaken “santapan empuk” dosa. Emaka ipersingeti Tuhan si Kain. Situasi sibage banci ikuasai dosa, emaka siarus ilakoken Kain eme tendingken perbahanen sijahat, badin Kain harus bersih gelah mabai ia cirem. Adi lang maka ikuasai dosa.  Kain arus naluken dosa. Alu bage banci sekali nari persembahen Kain ialoken Tuhan.

APLIKASI
            Persembahen eme bentuk pengataken bujurta man Tuhan erkite-kiteken mehuli Tuhan man banta. Ipasu-pasuNa kita emaka kebutuhen-kebutuhenta tercukupi. Bagepe persembahen sipersembahken kita, sada tanda kita patuh ras mbiar man Tuhan. Siimaksudken mbiar eme litna bas kita nghamati Tuhan. Mbiar kita man Tuhan sebab nggo sitandai Tuhan siisembah kita eme Tuhan sierkuasa ras perkeleng.
            Ibas gerejanta lit bentuk-bentuk ntah pe jenis-jenis persembahen. Lit persembahen kolekte (persembahen ibas kebaktin ras PA), pengataken bujur, persepuluhen ras Kerja Rani. Persembahen - persembahen enda beda maknana, termasuk persembahen Kerja Rani. Persembahen Kerja Rani eme persembahen simehulina ibas hasil juma nari. Siimaksudken hasil juma eme hasil pendahinta sekalak-sekalak. Jadi la saja sierdahin ibas juma, tapi pe sierdahin ibas kantor ras profesi-profesi sideban. Amin gia bentukna berbeda tapi intina seri eme nehken persembahen man Tuhan. Jenari persembahen siipersembahken kita man Tuhan, ialoken Tuhan, janah Tuhan mereken kepercayaan man gerejana guna ngelola persembahen e ibas rangka pelayanan-pelayanan gereja. Ipakeken ibas pelayanan tri tugas gereja ras pembangunan gereja.
            Persembahken simehulina gelah persembahenta ialoken Tuhan. Jadi penungkunen, kai siimaksudken persembahen simehulina. Apakah erpalasken mbue ntah uang siipersembahken e harus rapi. Selaku kalak sierkiniteken man Tuhan tentuna nehken persembahen erkiteken pusuh siersuruh ras  litna kinitekenta. Kiniteken si lit bas kita pasti ngerana uga simehulina, adi tuhu mbiar kita man Tuhan, maka kinitekenta ngerana, ibas kita nehken persembahen man Tuhan, khususna ibas Kerja Rani enda la banci meros. Ibas erti kata tuhu-tuhu siibereken man Tuhan sue ras pemere Tuhan man banta. Emaka banci ka melala ras rapih persembahenta e. Bagepe marilah ibas kita nehken persembahen Kerja Rani simuat ukur Tuhan. Alu bage ialoken Tuhan persembahenta, emaka ipasu-pasu Tuhan kita, subuk pendahinta, jumanta bagepe tubuhta enda. kitakerina lit ibas kejuah-juahen.

Pdt. Steven Kumenit, STh.M.Min.