Kalak Si Tek Man Jesus Jadi Arah Lebe (Lukas 13:23-30)

KHOTBAH MINGGU 16 DESEMBER 2018

GEREJA GBKP

Invocatio    :    Sangap kal kalak si ipilihNdu, dingen kalak siidiloNdu ringan ibas kesain RumahNdu. Puas iakap kami kerna kerina simehuli si lit i bas RumahNdu, inganNdu si badia (Masmur 65:5).

Ogen          :    2 Tesalonika 2: 13-17 (Tunggal).

Khotbah     :    Lukas 13:23-30 (Tunggal).

Tema          :    Kalak Si Tek Man Jesus Jade Arah Lebe.

LATAR BELAKANG 

1.     Sijadi bahan khotbah sekali enda eme turi-turin Jesus ngerana kerna penolaken keselamaten kalak Jahudi ras keselamatan man kerina jelma ibas bangsa sideban nari alu ngelakoken kai singena ate Tuhan. Keselamatan siimaksud eme nggeluh ibas Kinirajan Dibata. Nggeluh ibas kinirajan Dibata eme nggeluh alu meriah ukur.

2.     Keselamatan si reh man kerina jelma raduken ras penghukuman man kalak si la ndalanken kai singena ate Tuhan. Janah enda iandingken Jesus bagi rumah. Rumah eme Kinirajaan Dibata. Tuan rumah eme Jesus jine. Alu bage ngatakenca ibas sada paksa tuan rumah (Jesus) keke (reh ku doni enda mulihken) ngadili kerina jelma. Sibengket ibas rumah (Kinirajaan Dibata) eme kalak si tek man Jesus ras ndalanken kai singena ateNa ngenca.

3.     Enda ikataken Jesus sebab lit pengangkan man kalak Jahudi, ia ngenca siselamat, kalak sideban lang. Banci Kalak Jahudi la selamat adi ia ngelakoken dosa si mberat. Bagepe lit pengangkan man jelma sinterem tupung sie, kalak Jahudi ngenca si selamat. Enda teridah arah penungkunen sekalak jelma tupung Jesus erdalan ku Jerusalem, nina : “ o Tuan, la kin pagi nterem kalak si terkelin”. La ijabab Jesus ue ntah lang. Tapi mereken sada jababan sierbahanca sinungkun e muat sada keputusen guna ngelakoken ntah ntah lang. Nina Jesus cubakenlah  asa ngasupndu bengket arah pintun si kitik. Ate Jesus ngatakenca maka sibanci nggeluh ibas keselamatan eme kalak si la meganjang ukur, nggeluh bayak tapi kebayakenna e rehna erkiteken menindas, nipu, nangko, rsd , bagepe arus  nggeluh alu meteruk ukur. Kegeluhen sibagenda man jelma sinterem mesera. Erkiteken mesera e me bagi bengket ibas pintun si kitik siarus lit pengurbanan diri gelah lewatina pintun sikitik e.

4.     Adi pintun Rumah nggo ieruk, maka nggo terlambat nggeluh ibas keselamatan. Nggo terlambat jera, Bagepe kalak si i darat rumah denga inanamina tangis ras mesui sebab idahna Abraham, Isak, Jakup, bagepe kalak sireh i Timur, i Barat, i Utara ras i Selatan nari ermeriah-meriah ibas Kinirajan Dibata. Bagepe kenca Tuan Rumah eruk pintun rumah, amin gia megang pe sora kalak sitedis i darat rumah e, nina o Tuan buka pintu Rumah e, la i buka Tuan Rumah, sebab la itandai Tuan rumah ia. Bagepe alu make erbage-bage alasan, iantarana eme nggo pernah kami man ras minem ras Kam. Bagepe nggo pernah Kam ngajar i pasar-pasar kuta kami. Tapi nina Tuan Rumah, la kam ku tandai. Laweslah o kam kalak jahat. Perlu siteh ibas rangka keselamatan erbage-bage bentuk ras model Jesus ngerana kerna keselamatan, termasuk ngerana i pasar-pasar tupung Jesus erdalan, bagepe man, minem ras jelma sinterem. Tapi erkiteken la ia tek man Jesus ras pengajaren Jesus maka la itandai Jesus ia. Kalak si tek ras ndalanken pengajarenNa ibas kegeluhenna tep-tep wari siitandai Jesus. Janah kalak siitandai Jesus enda me singgeluh ibas Kinirajan Dibata.

5.     Perlu siteh bangsa Jahudi eme bangsa pilihen Dibata. Ia ipilih Tuhan gelah jadi alatNa guna nelamatkan kerina Jelma ibas doni enda. Tapi erkiteken penolakenna man Jesus Kristus selaku Mesias ras kegeluhenna la ncidahken bangsa pilihen Dibata, emaka itulak Tuhan ia. Alu bage Kalak Jahudi sileben ngaloken Dibata ras pengajarenNa, tapi la tutus ras nulak Jesus jadi arah pudi (la selamat). Tapi kalak singaloken Jesus arah pudi jadi arah lebe.

APLIKASI

            Kita ipilih Tuhan arah Berita Si Meriah. Arah Berita Si Meriah kita nggo nggeluh ibas keselamatan. Sebab Berita Si meriah enda me kuasa Dibata guna nelamatken kerina jelma (bdk. Roma 1:16). Emaka meriah ukurta kerna sie. Janah meriah ukurta e harus sicidahken ibas perbahanenta tep-tep wari alu ngelakoken kai singena ate Tuhan. Ibas kita ngelakoken kai singena ate Tuhan berarti nggo sijaga kinitekenta ras pengajaren siiajarken Jesus arah gerejaNa man banta.

            Tuhu erkiteken tek kita man Jesus selaku Tuhan ras ulu keselamatenta, kita genduari nggo arah lebe. Status kita siarah lebe e arus ipertahanken, sebab banci saja erkiteken la kita tutus ras la sidalanken kai singena ate Tuhan, lanai kita jadi arah lebe, tapi nggo arah pudi, sidungna ibas kerehen Jesus peduakaliken kita lanai atan ras nggeluh radu ras Abraham, Isak, Jakup, bagepe kerina kalak situtus ras ndalanken kai singena ate Tuhan ibas Rumah Jesus eme Surga.

            Minggu adven pe 3 ken enda ngingetken kita maka nggeluh ibas Surga eme ngeluh ibas kesenangen. Nggeluh ibas meriah-meriah. Janah nggeluh si arah lebe ngenca sibanci nggeluh i je eme nggeluh tek man Jesus ras ndalanken kai singena ateNa. Tuhu tempa mesera nggeluh ibas erkiniteken man Jesus. Tuhu nggeluh ibas erkiniteken man Jesus tempa-temnpa bagi kita bengket ibas pintun si kitik. Tapi adi nggit, sabar, meteruk ukur ras megenggeng, kita banci erdalan ibas pintun si kitik, janah  kenca lepas pintun si kitik e kita banci nggeluh alu meriah ukur sebab sinanami nggeluh ibas Surga.

Pdt. Steven Kumenit, STh.M.Min.