Pilihlah Si Bujur (Keluaran 18:21; Mazmur 37:27-31)

PERPULUNGEN JABU-JABU

GEREJA GBKP

TANGGAL 24 - 30 MARET 2019

==================================================================

Keluaran 18:21; Masmur 37:27 - 31.

Tema : Pilihlah Si Bujur.

LATAR BELAKANG

A.   KELUARAN 18 :21

1.    Musa eme pemimpin bangsa Israel siitugasken Tuhan mbaba bangsa Israel ndarat ibas taneh perbudaken (Mesir) nari ku taneh Kanaan. Dahin Musa situhuna la saja terjeng minpin ras naruhken nbangsa Israel ku taneh Kanaan, tapi pe njaga kedamen, bagepe gelah bangsa  Israel  mbiar ras erkemalangan man Tuhan saja. Erkiteken sie me adi lit perkara-perkara, termasuk perubaten si turah ibas bangsa Israel maka ndahin Musa eme ngerunggui ras ndungi perkara-perkara e erpalasken kata Tuhan.

2.    Jetro eme mama Musa. Idahna kai siilakoken Musa mehuli, tapi langa tengteng. Sebab melala kal perkara-perkara siarus idungi Musa. Sisada ngenca Musa dahikenca. Idah Jetro la saja Musa silatih tapi pe masyarakat ikut latih sabab ndekah perkara-perkara e dung, janah masyarakat arus nimai berjam-jam ntah pe berhari-hari. Emaka iusulken Jetro gelah Musa ngangkat pemimpin 1000 kalak, pemimpin 100 kalak , pemimpin 50 kalak ras pemimpin 10 kalak. Pemimpin enda arus kalak simbiar man Tuhan ras terteki. Pemimpin-pemimpin enda nampati Musa guna ndungi perkara-perkara si lit. Alu bage terjadi me pembagin tugas ras pelayanan, emaka perkara-perkara si lit pedas teratasi/ dung. Amin gia terjadi pembagin kepemimpinan, labo berarti ndungi perkara-perkara e erpalasken sura-surana saja, tapi tetap erpalasken kai siisura-suraken Tuhan. Alu bage bangsa Israel erkemalangan man Tuhan.

B.   MASMUR 37:27-31

1.    Enda Masmur Daud, janah sipatna pengajaren man kalak singuda. Tuhu malala kalak jahat sibanci erbahanca kalak nguda emosi ras ngelawan kalak jahat alu cara-cara si la mehuli si langena ate Tuhan. Bagepe ulih kalak jahat la mehuli maka ihukum Tuhan me ia. Emaka ipersingeti pemasmur gelah tadingken sijahat ras lakoken sibujur, alu bage ipasu-pasu Tuhan ia seh ku kesusurenna. Kalak bujur ras singena ate Tuhan saja singinani taneh siibereken Tuhan.

2.    Raja Daud ncidahken kerna Dibata silalap erdiate nandangi kalak singena ateNa. Emaka ula cian ras nembeh man kalak jahat silalap erbahan si la ngena ate Tuhan. Tuhu tempa-tempa sukses ia, tapi ibas paksana, Dibata singerunggui ia, ihukum Dibata me ia pagi. La iianina taneh simehuli siibereken Dibata. Bagepe kesusurenna pe la ngiani negeri siibereken Dibata e. 

3.    Kemakmuran erkite-kiteken dat arah si la ngena ate Tuhan eme dat arah penindasan, penipuan, kinilabujuren, rsd. mbaba penghukuman Tuhan man bana jine, tapi perbahanan-perbahanan simehuli ipasu-pasu Tuhan. Tuhan tetap berpihak man kalak bujur ras singena ate Tuhan. Erkiteken sie me iajuk pemasmur gelah ngkelengi  kebujuren ras lakoken singena ate Tuhan. Kerina enda banci ilakoken adi undang-undang Tuhan ibuniken ibas pusuh. Undang-undang Tuhan singajari kalak erbahan simehuli singena ate Tuhan. Perlu siteh la ngena ate Tuhan kerna si la mehuli. Emaka undang-undang Tuhan ngajarken kai siarusna ibahan anak singuda. Anak singuda ugapa pe la nilah ibas kebenaren nari.

APLIKASI

            Tanggal 17 April 2019 kita iundang Tuhan erkelang-kelangken pemerintah (KPU) guna reh ku ingan-ingan pemilihan siiaturken KPU gelah kita milih Presiden, wakil presiden calon legislatif (DPR RI, DPRD, DPR Kota/ kabupaten). Makna Pemilu ibas kita eme la saja gelah nggo terpilih Presiden, wakil presiden bagepe legislatif ibas negaranta, tapi gelah kai siicita-citaken bangsa Indonesia eme nggeluh adil makmur dan sentosa banci inanami kita. Emaka penting kal man banta sekalak pemimpin ras wakil kita sibanci kundul ibas kursi legislatif.

            Gelah mehuli kegeluhen bangsa Indonesia, siarus ipilih kita eme kalak si bujur, terteki ras sierkemalangan man Tuhan. Enda syarat utama man banta. Tentuna jadi persoalan tersendiri man banta, sebab banci jadi rekam jejak ntah pe kegeluhen calon-calon enda la kal siteh alu mbages, tapi amin bage gia kita nggo banci ngidah sisedekah enda ilakokenna, ntah pribadi siuga ia. Alu bage erpalasken singena ate Tuhan kita banci milih pemimpin-pemimpinta.

            Ibas Pemilu enda ula kita terpengaruh kerna si la mehuli eme politik uang, berita hoax, sebab banci kecewa kita pagi. Perlu siteh pemimpin  singelakoken si la mehulin ibas Pemilu enda berarti karakterna pe la mehuli, emaka erkadiola kita pagi, sebab la diatena kerna pembangunan ras kesejahteraan masyarakat. Erkiteken sie me undang-undang Tuhan arus nggeluh bas pusuhta, gelah iajarina kita kerna simehuli. La kita terpengaruh kerna si la mehuli siilakoken caloin-calon pemimpinta (termasuk tim suksesna), alu bage sidat me pemimpin simehuli, emaka ipimpinna kita ku simehuli. 

            Perlu siteh adi pemimpin negaranta mehuli maka malem ateta nggeluh ibas bangsa Indonesia enda. Sebab si lit eme keadilan, kebujuren, sikeleng-kelengen, kedamen, rsd. Emaka marilah kita ikut Pemilu alu mbiar ras erkemalangan man Tuhan.

Pdt. Steven Kumenit, S.Th.M.Min.