PEKAN DOA
GEREJA GBKP
WARI I, 2 JUNI 2019.
==================================================================
Invocatio : Ertotolah katawari pe (1 Tesalonika 5:17).
Renungan : Roma 12:12.
Tema : Ertotolah La erngadi-Ngadi.
LATAR BELAKANG
1. Sijadi bahan renungenta sekali enda eme sada bagin ibas pasal 12. Janah secara umum Paulus ngerana man perpulungen Roma alu sederhana ras praktis, kerna uga mpraktekken kiniteken ibas kegeluhen tep-tep wari. Kiniteken la terjeng konsep ntah pe konsumsi pemeteh ngenca, tapi arus icidahken ibas kegeluhen tep-tep wari, sebage konsumsi keselamatenta ras jelma si deban.
2. Ibas ayat perenungenta (ayat 12), amin ga sada ayat ngenca, tapi mbages kal pengertinna, sebab enda merupaken nasehat praktis man perpulungen guna ilakoken selaku kalak kristen. Selaku kalak kristen siarus lit eme pengarapen. Janah pengarapen siimaksudken i jenda eme kalak kristen arus megenggeng nimai kerehen Jesus Kristus mulihken ibas doni enda, gelah kalak kristen banci atan ntah pe nggeluh ras Jesus Kristus ibas Surga. Kerehen Jesus Kristus mulihken ku doni enda, sada pihak ngeranaken singgeluh ras singgo mate, ipihak sideban mereken kegeluhen man kalak sierkiniteken man baNa ras singelakoken kai singena ateNa. Emaka kalak kristen arus tetap erpengarapen, janah pengarapen siarus icidahken kalak kristen eme alu meriah ukur. Engkai ? sebab janji kerehen Jesus peduakaliken ibas doni enda merupaken sada kepastin. Alu bage kegeluhen kalak kristen ergegehna ernalem ras ersembah man Jesus Kristus.
3. Idah Paulus salah sada sierbahanca kalak kristen gagal nggeluh ras Jesus ibas Surga eme la ngasup mersan kiniseran. Paulus mereken pergegeh man perpulungen Roma, gelah perpulungen Roma megenggeng ibas kiniseran. Sebab selaku kalak kristen, kiniseran siinanamina erkite-kiteken kalak sideban la ngasup ngaloken persadanta ras Jesus Kristus, kehadiran kalak kristen i tulak ibas doni enda. Tapi amin gia i tulak ras kalak kristen ngenanami kiniseran, kalak kristen arus nginget kematen ras kekeken Jesus Kristus mbaba keselamatan, bagepe kerehenNa mulihken ku doni enda mbaba kita nggeluh ibas Surga. Emaka kalak kristen arus megenggeng. Tuhu kiniseran e mberat, tapi kiniseran siinanami kalak kristen labo kai pe adi sibandingken ras kemalemen ate si pagin ipetangkas Dibata (Roma 8:18).
4. Kalak kristen banci megenggeng adi kalak kristen mengandalkan Tuhan. Erkiteken sie me Paulus mpersingeti perpulungen Roma gelah ertoto man Dibata la erngadi-ngadi. Dibata eme ulu gegeh ras pengapul. Emaka adi ertoto man Dibata tentu iberekenNa man kalak kristen gegeh guna megenggeng ibas ngenanami kiniseran, bagepe ngapuli kalak kristen ibas ngenanami kiniseran. La terjeng e saja, tapi ibereken Dibata kepentaren gelah kalak kristen pulah ibas erbage-bage kiniseran nari.
5. Thomas Aquino : Pertoton mpekeke ketutusen ras mpegara semangat ibas dirinta ras mendorong dirinta guna melayani Tuhan, bagepe tambah keriahen ukur ibas dirinta ras merupaken penampat man banta tupung kita dat penindasan. Alu perpulungen bertekun (la erngadi-ngadi) ertoto, maka perpulungen tuhu-tuhu mengandalkan Tuhan.
APLIKASI
Ertoto eme kesah kegeluhen kalak sierkiniteken man Tuhan. Tuhan e me ulu gegeh, pengapul ras kegeluhen. Bagepe siteh maka kegeluhenta labo kai pe adi la ras Tuhan. Kita banci nggeluh adi kita isampati Tuhan. Erkiteken sie me maka ertoto man Tuhan penting. Bage pe arus siinget ibas kita ertoto man Tuhan, secara la langsung nggo sikataken man Tuhan, kita enda la bo kai pe emaka kita mengandalkan Tuhan.
Banci jadi erkiteken kiniseran kita la ngasup ertoto man Tuhan, tapi erkiteken persadanta ras Tuhan, janah erkiteken kininggiten ertoto man Tuhan maka Kesah Si Badia nampati kita guna ertoto man Tuhan (Roma 8:26). Erkiteken sie, mari kita ngandalkan Tuhan ras ertoto la ergadi-ngadi. Ertoto la erngadi-ngadi ngataken maka i ja pa pe kita banci ertoto. Ertoto la saja soranta ibegi kalak (bdk. kalak Farisi : ertoto ia i tiga, serpang-serpang dalan, rsd. gelah idah kalak ia kalak situtus eragama), tapi ertoto ibas pusuh pe banci, sebab Dibata siisembah kita ngasup megi pertotonta siipenangkih arah pusuhta sekalak-sekalak.
Pdt. Steven Kumenit, S.Th.M.Min.
Ertoto laerngadi2 tp mon2 tdk tulus hati dan tdk diimani sehingga kita mudah terjatuh dlm godaan2 duniawi...keinginan daging. Jangankan ngawan niperpulungen...serayan bahkan pendetapun terjatuh dlm kenikmatan duniawi sesaat. Oleh sebab itu menurut saya doa bukan banyaknya intesitas interval kita berdoa /rogate tapi setiap kita berdoa harus diimani dan dgn hati yg tulus man Dibatanta.
BalasHapus