Cidahken Min Sinalsal KemulianNdu (Keluaran 33:14-18

BAHAN KHOTBAH GEREJA GBKP

TANGGAL 10 MARKET 2013.

=========================================================================

Introitus   :    KataNdu kap tendang man nahengku, nerangi dalan si kudalani (Mazmur 119:105).

Ogen        :    Matius 5:13-16 (Tunggal).

Khotbah   :    Keluaran 33: 14-18 (tunggal).

Tema        :    Cidahken Min Sinalsal KemulianNdu.

LATAR BELAKANG

1.    Sijadi bahan khotbahnta sekali enda eme jawaban  Tuhan man Musa erkiteken lit sada pimindon Musa  gelah Tuhan saja sinemani bangsa Israel erdalan ku taneh singgo ipadankenNa eme taneh Kanaan, ula Malekat. Sebab paksa sie erkiteken dosa singgo ibahan bangsa Israel eme arah majekken sada patung lembu emas dingen nembah man patung lembu emas e, bagepe erkiteken “meriah ukurna” maka ibahanna man ras minem piah dungna nggo sambar jadi sada pesta mabuk-mabuk, emaka lagu langkah dilaki ras diberu lanai erpepah, maka Dibata lanai nggit nemani ntah erdalan ras bangsa Israel, tapi isuruhNa malekatna nemani bangsa Israel. Alasen Tuhan gelah bangsa Israel la ikernepken Tuhan i tengah dalan, sebab bangsa Israel, bangsa si mekeng kuduk (nen = pasal 32:1-33:3). 

2.   Percakapen Tuhan ras Musa jadi i ingan erkemah Musa i teruh deleng Sinai/Horeb. Ibas percakapen Tuhan ras Musa (bahan khotbahnta), Nina Tuhan “Aku ras kam, janah aku mereken kemenangen man bandu. Tapi ate Musa, Tuhan sendiri min sinemani bangsa e, ula Malekat. Memang tuhu malekat eme persuruhen Tuhan, arah malekat pe banci bangsa Israel naluken musuh-musuhna (band. Ayat 2).

3.  Sada alasan gelah Dibata sendiri min sinemani ras minpin bangsa Israel ibas perdalanenna ku taneh Kanaan eme gelah tuhu berbeda kal ras bangsa-bangsa sideban. Yahwe eme Tuhan bangsa Israel, bagepe Raja nandangi bangsa Israel. Ibas alasan siituriken Musa enda me dungna Tuhan ngobah keputusenna, Tuhan sendiri sinemani bangsa Israel ku taneh Kanaan.

4.    Pengrealisasian Tuhan nemani ras mbimbing bangsa Israel erkite-kiteken itandai Tuhan Musa ras ngena ate Tuhan man Musa.

5.   Iterusken Musa pemindonna gelah icidahken Tuhan kemulianNa man bana. Tapi erjabab Tuhan nina : "Kerina kiniulinKu banci Kupementas arah lebendu, janah i lebe-lebendu Kukataken gelarKu si badia. Aku kap TUHAN , janah Kucidahken lias ate ras perkuah ateKu man kerina kalak si enggo Kupilih. La Kubere idahndu ayongKu; sabap ise pe la ngasup ngidah ayongKu, tetap nggeluh. Enda kap sada ingan deherKu i ja banci kam tedis i das sada batu. Adi mentas kari sinalsal terang kemulianKu, Kutamaken kam ku bas sada lubang i bas batu e, jenari Kututupi kam alu tanKu seh Aku enggo lepas.Kenca bage Kuagui tanKu gelah banci idahndu gurungKu, tapi labo ayongKu." (ayat 19-23).

APLIKASI

            Temanta sekali enda eme sada pemindon gelah Dibata ncidahken sinalsal kemulianNa. Tapi harus siteh kemulian Tuhan banci icidahkenNa khusus man kalak singena ateNa ras singgo ipilihNa. Persoalenna genduari, janah enda jadi penungkunen man banta pribadi lepas pribadi ngena kin ate Tuhan man banta ntah lang. Adi ngena ate Tuhan, ras nggo ipilihna kita maka kemulian Tuhan e pasti icidahkenNa man banta.

            Kemulian Tuhan banci icidahkenNa man banta  alu erbage-bage bentuk. Banci alu “penampakan diriNa”, banci ka ipakeNa kita guna ncidahken kemulianNa man kalak sideban, rsd. Janah kemuliaan Tuhan si lit bas diri kalak si tek me mekatep la teridah. Padahal kenca kita nggo iselamatken, kemuliaan Tuhan e lit bas kita. Emaka cidahkenlah kemuliaan Tuhan e alu erbahan simehuli singena ate Tuhan.

Pdt. Steven Kumenit, STh.M.Min.

      

Kelengilah Teman Manusia (Imamat 19:17-18)

BAHAN SERMON GEREJA GBKP

TANGGAL 3 – 9 MARET 2013.

Imamat 19:17-18.

Tema : Kelengilah Teman Manusia.

LATAR BELAKANG

1.      Sijadi oratenta sendah eme salah sada bagin ibas perentah Tuhan man bangsa Israel. Enda isehken Tuhan erkite-kiteken bangsa Israel kenca bengket ku taneh siipadanken Tuhan man bana, maka bangsa Israel “berhadapan” ras kebiasaan-kebiasaan ntah pe cara ersembah bangsa Kanaan. Emaka ope denga bangsa Israel  bengket ku taneh Kanaan, bangsa Israel harus mpelajari uga situhuna ersembah man Dibata.

2.      Ibas oratenta merupakan sada bagin si la terpisahken ibas konsep kebadiaan. Memang ibas pengertin kebadiaan ibas bangsa Israel, tangtangna “memiliki” dipisahkan (nen = qadosy), eme sada pengertin ibas keagamaan. Tapi ibas perkembangen selanjutna kata badia nggo “memiliki” erti moral. Emaka pengertin kebadiaan menyangkut kesempurnaan Moral. Erkiteken sie me bangsa Israel harus njaga kebadiaan nggeluh, i je nggo termasuk moral. Emaka Tuhan ngelarang bangsa Israel musuhi temanna manusia ibas pusuhna, tapi harus terus terang menogor “sesamana” manusia, gelah bangsa Israel la erdosa. Bagepe bangsa Israel la banci erbalas kejahatan alu kejahaten, tapi harus ngkelengi teman manusia bagi kita ngkelengi dirinta jine.

3.      Ibas bangsa Israel ngelakoken hal sibagenda rupana maka bangsa Israel nggo njaga kebadiaan geluhna sedekah ia nggeluh i taneh Kanaan. Bangsa Israel i perentahken Tuhan la saja nggeluhna berbeda ras kalak sideban, tapi pe harus njaga gelah prinsip-prinsip nggeluh kebadiaan harus ipraktekken ibas kegeluhen bangsa Israel sedekah ia tading i taneh Kanaan.

4.      Perintah Tuhan enda man bangsa Israel ibas oratenta sendah, bali nilaina ras makna ras perintah Tuhan si lit ibas papal 19 enda. Jadi kebadiaan nggeluh harus teridah ibas hubungen ras temanna manusia.  Ibas arti kata, bangsa Israel la banci “mendendam” man temanna manusia. Bangsa israel harus pang ngataken ntah pe negor ise saja sierbahan salah. Bagepe bangsa Israel harus nggeluh ibas kekelengen sapih-sapih ia manusia.

5.      Buniken elem-elem ibas ukur ras erbalas nandangi temanta manusia eme bentuk dosa siilakoken bangsa Israel. Gelah la lit dosa siibahan bangsa Israel, maka kepatuhen nggeluh nandangi perentah Tuhan harus idalanken.

APLIKASI

            Adi siperdiateken isekelewetta, bagepe kai siiberitaken i media masa eme televisi, radio, koran, majalah, rsd.  teridah kal tempa-tempa la lit kekelengen man banta manusia, sebab siterjadi eme perubaten, tawuran, kejahaten sebo kejahaten, rsd. Perbahanen sibagenda rupana ipraktekken pe kalak kristen. Padahal kekelengen eme undang-undang si harus ipraktekken kita ibas kegeluhenta tep-tep wari.

            Yesus Kristus paksa Ia ersoal jabab ras kalak Parisi kerna undang-undang siutama ibas taurat. Nina Yesus : Si peduaken bali ras si ndai e me, 'Kelengilah temanndu manusia bagi kam ngkelengi dirindu. Janah enda ibuat Yesus ibas Imamat 19:18 (band. Matius 22:39).  Jadi kai siikataken ibas taurat Musa, ipertegas Yesus mulihi. Emaka kita selaku kalak sitek la banci lang harus ngkelengi temanta manusia. Janah adi ngerana temanta manusia, la terjeng sada bangsa, suku ntah pe sada denominasi agama  ngenca, tapi temanta manusia eme kerina manusia tinepa Dibata (band. Lukas 10:25-37).

            Gelah tuhu-tuhu teralisasi kerna ngkelengi teman manusia maka kita selaku kalak kristen harus nggeluh ibas moral simehuli. Ibas erti kata kita harus nggeluh ibas penggontrolan diri. Kita harus banci mengendaliken pikirenta gelah banci menahan dorongan ibas nari emaka banci kita erbahan  ntah pe ngelakoken  kerna kebenaren. Bagepe selaku kalak kristen kita harus  ipinpen Kesah Si Badia gelah Kesah Si Badia singajari kita erbahan simehuli.

            Ngkelengi teman manusia berarti la ateta temanta e nggeluh ibas dosa. Emaka adi kin temanta e nggo erbahan salah, maka kita harus negor ia. Persoalen ibegina ntah lang, e persoalen sipeduaken ntah pe persoalen pudi. Tapi sipenting eme kita harus negor ia. Jadi ibas kita ngkelengi temanta, maka lit i je nampati.

Pdt. Steven Kumenit, STh. M.Min.

           

Kerja Rani (Ulangan 16:9-12)

BAHAN PJJ GEREJA GBKP

TANGGAL 24 FEBRUARI – 2 MARET 2013.

Ulangan 16:9-12.

Tema : Kerja Rani.

LATAR BELAKANG.

1.      Kitab ulangen enda berisiken pidato Musa man bangsa Israel sisangana ngadi-ngadi i dataran Moab. Pidato enda ipeseh Musa erkiteken : 1). Bangsa Israel nandangi bengket ku taneh Perpadanen Dibata eme Kanaan. 2). Erkiteken bangsa Israel si lit paksa e eme tading angkatan si mbaru nari, janah angkatan enda la megiken kerna kai perpadanan bangsa Israel ras Tuhan, bagepe undang-undang siharus idalanken bangsa Israel kenca bangsa e bengket ras ngiani taneh Kanaan. Jadi situhuna isi kitab Ulangan enda eme “pengulangan” ibas padan ras undang-undang Tuhan.

2.      Ibas oratenta sekali enda ngerana kerna kerja rani. Kerja rani ilakoken ntah pe ikira ibas pitu minggu kenca rani gandum ntah pe 50 wari kenca Paskah. Ntah pe irayaken kenca panen gandum.  Janah tujun kerja rani eme guna mpehaga Tuhan. Erkiteken sie me kerja rani enda harus ilakoken alu meriah i adep-adepen Tuhan radu ras anak-anak ibas tep-tep jabu, bagepe suruh-suruhen si lit ibas jabu, ras kalak Lewi, kalak pertandang, anak melumang ras diberu balu-balu sitading i rumah bangsa Israel. Bagepe  ilakoken ibas rumah Pertoton. Kerja rani la banci ilakoken ibas rumah-rumah bangsa Israel, ntah pe ibas ingan ersembah si deban, tapi harus ibas rumah pertoton (ingan ersembah).

3.      Ibas bangsa Israel ngelakoken kerja rani ibas Rumah pertoton, kepeken la banci ia reh ngambe-ngambe tapi harus ia reh mbaba persembahen,  janah bentuk persembahenna eme persembahen ukur  meriah ras wajib. Memang ibas oratenta sendah tempa la iaturken kerna persembahen, tapi adi sioge ibas kitab Imamat 23 :15-21, maka ije iaturken alu jelas uga seharusna bangsa Israel mbaba persembahenna ku rumah Pertoton. Jadi ibas kerja rani enda bangsa Israel harus mbaba persembahen ukur meriah ras singgo iwajibken.

4.      Persembahen ukur meriah enda ertujun guna 1). ngataken bujur man Tuhan erkiteken enggo ipasu-pasu Tuhan jumana. 2). Mindo man Tuhan gelah ipasu-pasu Tuhan tole jumana gelah ibas tahun si reh, reh buehna hasil gandumna.

5.      Ibas ngerayaken kerja rani enda, bangsa Israel harus tetap ngiget maka budak kap ia nai i Mesir, tapi erkiteken keleng ate Tuhan, maka bangsa Israel nggeluh bebas ras banci “memiliki” juma sendiri. Emaka la banci lang bangsa israel harus patuh ras ersembah man Tuhan saja. Bagepe kerja rani enda memotivasiken bangsa Israel gelah tetap ersembah man Tuhan saja.

APLIKASI

            Sekali enda kita ngerana kern Kerja Rani. Ibas kalender gereja GBKP kerja Rani ilakoken ibas tanggal 3 Maret 2013. Inti Kerja Rani eme ngataken bujur man Tuhan.

            Sisadari nge tuhu maka latar belakang kegeluhen anggota perpulungen erbeda-beda, lit sierjuma, pegawai, perbinaga, rsd. Tapi amin gia berbeda-beda makna kerja rani harus ilakoken selaku kita kalak sierkniteken man Tuhan. Memang kita si la erdahin i juma (band. Pegawai swasta ras negeri), jumanta eme i kantor, janah hasil jumanta e sidat ibas perkantoran e. Bagepe sierdahin ibas profesi si debanna.

            Persembahen Kerja Rani berbeda nge ras persembahen persepuluhen. Persembahen Kerja Rani eme persembahen pengataken bujur erkiteken Tuhan simasu-masu pendahinta sedekah sada tahun. Amin gia persembahenta bentukna pengataken bujur, tapi sipatna eme ukur meriah. Emaka harus min sipersembahken simehulina. Sebab persembahen simehuli ras erpalasken ukur meriah ialoken Tuhan kap. Bagepe ipasu-pasu Tuhan nge pendahinta tole, emaka geluh kalak singgit nehken persembahen nggeluh ibas kejuah-juahen.

Pdt. Steven Kumenit, STh.M.Min.

Mpekeke Keleng Ate Man Kristus (Ketangkasen 2:1-7)

BAHAN PJJ GEREJA GBKP

TANGGAL 17 – 23 FEBRUARI 2013.

Ketangkasen 2:1-7.

Tema : Mpekeke Keleng Ate Man Kristus

LATAR BELAKANG

1.      Sijadi oratenta sendah eme sada bagin ibas pengenehenen Yohanes sangana ia i buang ku pulau Patmos. Yohanes siimaksudken i jenda labo Yohanes peridiken, tapi rasul Yohanes, salah sada ajar-ajar Yesus. Ibas pengenenen enda, ngerana Yesus kerna perpulungen Epesus.

2.   Epesus eme kota sigalangna i Asia kitik ras jadi pusat administrasi Romawi i wilayah e (ibu kota provinsi).  Paulus cukup ndekah tading i Epesus, janah ia sendiri simajekensa. Kota Epesus jadi salah sada pusat pelayanen Paulus, sebab ndeher ku ja pa pe. Bagepe jadi ingan tading rasul Yohanes. I je nari me Yohanes i buang ku Pulau Patmos.

3.   Ibas oratenta lit 3 hal siitekanken, 1). Tuhan meteh kecibal i perpulungen Epesus. I jenda gelah iteh perpulungen Epesus min maka  Tuhan tetap meteh kegeluhen perpululungen Epesus, bicara Ia ndauh ringan i Surga, iteh Tuhan nge kerna kegeluhen perpulungen Epesus. Siilakoken perpulungen Epesus eme : a. Iteh Tuhan uga latihna perpulungen e (band. Perpulungen Epesus nggo ncidahken kelatihenna ras ketutusenna ibas kegeluhenna tep-tep wari selaku kalak kristen). b. Iteh Tuhan kerna kesabaren perpulungen. Siimaksudken i jenda eme uga alu sabar ate Perpulungen Epesus la terpengaruh ku bas godaan-godaan sindilo ia, eme ibas kalak kristen asal Yahudi sindilo ia gelah ngikuti undang-undang (taurat), sebab nina alu ngikuti ras ndalanken undang-undang nge maka kalak kristen nggeluh ibas keselamaten si tuhu-tuhu.  Bagepe uga perpulungen la terpengaruh nandangi situasi isekelewetna eme ersembah man dibata-dibata sideban. Perlu pe siteh i Epesus lit sada kuil sitermegah i doni eme kuil Artemis.  c. Enggo iuji perpulungen Epesus kalak singakuken dirina rasul tapi situhuna labo ia rasul. Alu kata sideban perpulungen Epesus nulak kerina guru-guru palsu. Perlu siteh ibas abad-abad sipemena ras peduaken guru-guru palsu biasana mpetandaken dirina alu rasul-rasul ntah pe nabi.  Iteh Tuhan nge uga la ngenana ate perpulungen Epesus kerna perbahanen kalak Nikola. 2). Tuhan mandang  (band. Bah Ind = Tuhan mencela) perpulungen Epesus erkite-kiteken perpulungen Epesus enggo lanai ngkelengi Tuhan bagi tangtangna perpulungen Epesus jadi kristen, sebab perpulungen Epesus enggo erdosa, emaka ipersingeti Tuhan gelah perpulungen Epesus jera, janah nggeluhlah bagi uga tangtangna ia jadi kristen. 3). Lit penghukumen ibas Tuhan nari.  Penghukumen Tuhan man perpulungen Epesus jadi me adi perpulungen Epesus la nggit Jera. (band. Ibuat Tuhan nahe lampu ibas inganna nari, ayat 5).

4.      Si jadi penungkunen man banta kai kin perbahanen kalak Nikola. Memang cukup mesera ndarami ise kin situhuna kalak Nikola e. Lit singatakenca kalak Nikola enda eme pengikut ajaren Nikola eme salah sada ibas pitu “diaken” siipilih rasul-rasul guna nampati ia (Perbahanen 6:5), tapi pengikut enda enggo menyimpang ibas ajarenna. Lit ka singatakenca bagin ibas ajaren Gnostik, rsd. Tapi sipaling penting i jenda eme kalak Nikola eme kalak si la ngena ate Tuhan erkiteken perbahanen-perbahanenna. Khususna salah mengartiken kerna kebebasan. Nina erkiteken Kristus nggo mbebasken manusia ibas dosa nari, maka dosa lanai erkuasa man manusia, emaka manusia banci nggeluh rate-ate, dingen ngenanami geluh enda alu sepuas-puasna.

5.       Ibas oratenta enda pe Yohanes mpertegas kerna keselamaten, janah sienda reh  ibas Kesah Si Badia nari. Emaka kalak siercuping harus megikenca. Jadi enda me siharus iteh perpulungen. Keselamaten hanya ibereken man kalak si tuhu-tuhu jera. Janah kegeluhenna eme i Pardis. Ipardis lit buah batang kayu kegeluhen. Kalak singgeluh ibas keselamaten bebas ia man buah batang kayu kegeluhen. Perlu siteh paksa e Dibata njadiken manusia, ras namaken  manusia e i peken Eden, janah i tengah-tengah peken Eden lit dua batang kayu, eme batang kayu kegeluhen ras batang kayu  simereken pemeteh kern sibujur ras si jahat (band. Kej.3:9).

APLIKASI

            Temanta sendah eme mpekeke keleng ate man Kristus. Perlu siteh keleng ate Tuhan man banta jelas kal ras nggo terbukti. Tapi adi kita uga ? enda jadi penungkunen simbelin man banta selaku kalak kristen. Sebab gia kita nggo jadi kalak kristen, lenga tentu kita ngkelengi Kristus. Inget salah sada undang-undang/hukum eme ngkelengi Dibata asa ukurndu, asa tendindu ras asa gegehndu lit (Matius 22:37).

            Kita ngasup ngkelengi Dibata adi lalap kita ergaul intim ras Tuhan. Carana kita ergaul intim ras Tuhan eme kita harus nggeluh ibas kerembaken ras Ia, eme tutus ku gereja ras ngoge Pustaka Si Badia, bagepe tetap ertoto man Tuhan, sebab alu rusurna kita rembak ras berkomunikasi ras Tuhan, maka ngasup kita meteh ras ngangkai kern kiniulin Tuhan man banta. Alu bage turah bas kita tetap ukur singkelengi Tuhan. Tandana kita ngkelengi Kristus eme teridah ibas kata ras perbahanenta si mehuli.

Pdt. Steven Kumenit, STh.M.Min.