Gegeh Toto Kalak Si Tek (Roma 12:9-12)

KHOTBAH TANGGAL 5 MEI 2013.

GEREJA GBKP

Introitus   :    Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu (Matius 7:7).

Ogen        :    Matius 7:7-10 (Anthiponal)

Khotbah   :    Roma 12:9-12 (Tunggal).

Tema        :    Gegeh Toto Kalak Si Tek.

LATER BELAKANG

1.    Sijadi bahan khotbah sekali enda eme sada kata persinget rasul Paulus man perpulungen i Roma kerna nggeluh ibas persadan. Janah kegeluhen sibagenda eme sada penerapen kerna kebenaren Dibata ibas kegeluhen kalak si tek man Yesus Kristus, bagepe merupaken sada bentuk uga kalak kristen ersembah man Tuhan Dibata. Enda itekanken Paulus gelah kegeluhen perpulungen nggeluh ibas keharmonisan. Ntah pe nggeluh selaku gereja situhu-tuhu. Amin gia talenta anggota perpulungen pelain-lain, ula enda sierbahanca anggota perpulungen meganjang ukur. Emaka mengantisipasi enda, sada ngenca siharus ilakoken perpulungen eme nggeluh ibas keleng ate. Sebab keleng ate eme pengerakut ibas persadan.

2.    Terdauhen nina Paulus keleng ate ola min alu pekulah-kulah ras cigalah atendu kerna sijahat. Maksud Paulus eme kegeluhen kalak sitek man Dibata ula bagi main sandiwara. Tapi transparan min, sebab keleng ate eme perwujudan ibas Kesah Si badia nari (band. Galati 5:22).  Alu bage maka keleng ate e reh ibas Dibata nari kap. Emaka keleng ate e harus murni. Sebab kalak singelakoken keleng ate alu pekulah-kulah berarti nggo ncedai pusuh Dibata. Erkiteken keleng ate la banci pekulah-kulah maka kalak si tek harus nggeluh ibas ikaten hubungen simehuli sada ras sidebanna, bagepe kalak si tek la banci bergaul ras nggeluh ibas kejahaten. Ciga ateta min kerna kejahaten, emaka kalak si erbahan kejahaten harus i ipersingeti. Alu bage kegeluhen simehuli ras ngena ate Tuhan me siidalanken kalak si tek man Yesus Kristus.

3.    Sada pengangkan ras pengrealisasian kerna keleng ate eme kalak si tek harus nggeluh sikeleng-kelengen ras sipehagan pekepar. Kalak si tek ibas sada perpulungen bertanggungjawab “menghormati sesamanya” lebih dari pada dirinya. Ibas kegeluhen si bagenda me ate Paulus gelah  anggota perpulungen harus nggeluh ibas kiniteruken ukur. Sebab kiniteruken ukur eme sada biak kalak si tek man Yesus Kristus. Bagepe sada bentuk kegeluhen ibas sada kula.

4.    Tole, ibas kata ajar enda paulus mpersingeti kerna hakekat kalak si tek (gereja) eme ngelai man Tuhan ntah pe ndahiken dahin Tuhan. Dahin pelayanen enda la banci kendor, ntah pe kalak si tek la banci mekisat. Janah gelah kalak si tek la mekisat maka kalak si tek harus ndahiken dahin Tuhan tempa-tempa erdahin guna Tuhan labo guna manusia (nen. Koloes 3:23) Alu bage ergiah-giah me kalak si tek ndahiken dahin Tuhan. Bagepe Kesah Si badia si lit bas kalak si tek mereken kengasupen guna banci ngangkai sura-sura Tuhan, janah uga nggeluh ibas kekelengen, bagepe guna banci ndahiken erbage-bage dahin i tengah-tengah perpulungen. Enda itekanken Paulus, sebab semangat ngelai kalak si tek banci surut erkiteken piga-piga hal eme 1). Mekisat. 2). La lit persadan ibas perpulungen. 3). Penindasan, rsd. Ate Paulus mereken motivasi enda gelah perpulungen tetap nggeluh guna mbangun kula ni kristus.

5.    Kata persinget si perpudina ibas kegeluhen persadan i tengah-tengah kalak si tek eme nggeluh ibas keriahen ukur ibas erpengarapen, ras megenggeng ibas kiniseran, janah ertotolah man Dibata alu la erngadi-ngadi. Enda itekanken Paulus gelah perpulungen banci meteh maka kegeluhen kalak sitek eme nggeluh ibas pengarapen. Pengarapen harus idalani alu meriah ukur, labo alu ceda ate. Sebab kai siniarapken kalak si tek ibas sada paksa terealisasi me. Emaka ibas nimai pengrealisasian pengarapen e, banci saja kalak si tek nggeluh ibas kiniseran erkite-kiteken doni enda. Sebab perlu siteh doni enda la bo erngena ate nandangi kalak si tek si nggeluh rembak ras Tuhan. Emaka ibas ebage-bage kesempaten ras bentuk, pasti icubaina kalak sitek e si dungna kalak si tek nggeluh ibas kiniseran. Emaka gelah kalak si tek tetap nggeluh ibas keriahen ukur ibas pengarapen ras nggeluh megenggeng ibas kiniseran. Kalak si tek harus tutus ertoto. Sebab alu tutus ertoto man Dibata, kalak si tek ndatken gegeh guna tetap nggeluh ibas pengarapen ras ngasup megenggeng ibas kiniseran.

APLIKASI

            Nina Yohanes Calvin : manusia ndauh ibas kerina  simehuli, bagepe  la bo lit sarana kai pe bas manusia guna ndatken keselamaten. Manusia e lemah. Emaka ibas rangka nampati kinilangasupen manusia e, maka manusia harus ndarami siidarat dirina. Ibas kinitekenta ngatakenca, penampat e lit man Dibata si lit bas Yesus Kristus. Gelah kita isampatina maka kita harus ertoto mindo penampat man baNa. Sebab pertoton eme penghubung antara manusia ras Tuhan.

            Sisadari, ibas kegeluhenta sigenduari adi la kita ernalem man Tuhan alu tutus banci kita ndabuh ku bas dosa. Sebab sisadari ka kita enda manusia lemah, kita banci megegeh adi kita isampati Tuhan. Ipihak sideban, ibas perkembangen doni sigenduari enda kita iperhadapken alu erbage-bage tuntutan nggeluh, janah siidah nterem denga manusia ndabuh ku bas dosa erkiteken la ngasup  nulak kerincuhan daging, ras man ise inganna minda penampat. Harus siteh la bo pernah ipediat Tuhan kita nggeluh ibas doni enda, tetap iperdiatekenNa nge kita. Emaka selaku kalak si tek, terlebih kita enda anak-anakNa, maka mari ertotolah kita man Tuhan, pindo gegeh ras sehkenlah man Tuhan kai sijadi pemindonta, alu tetap megenggeng nimai penampatNa.

Pdt. Steven Kumenit, STh,M.Min.

Laweslah Jenari Beritaken Berita Keselamaten (Matius 28:16-28).

                                                           BAHAN PJJ GEREJA GBKP

TANGGAL 28 APRIL – 4 MEI 2013.

Matius 28: 16 – 20.

Tema : Laweslah Jenari Beritaken Berita Keselamaten.

LATAR BELAKANG

1.      Sijadi oratenta sendah eme pertama kali Yesus ncidahken diriNa man ajar-ajarNa sisepuluh sada kalak i Galilea kenca Ia keke ibas si mate nari. Ikataken i jenda sepuluh sada ajar-ajar, erkite-kiteken Judas Iskariot la nai i kira, lanai ia ibas bilangen ajar-ajar Yesus. Janah isuruh Yesus senina-seninaNa (ajar-ajarNa) jumpa ras Ia i Galilea, sebab i Galilea melala pelayanen ras tanda-tanda sengget siibahan Yesus i je. Bagepe oratenta sendah pe igelari ‘Amanat Agung”. Ikataken amanat agung sebab Yesus sendiri sinuruhsa ras persuruhen man ajar-ajarNa enda ibas rangka njadiken kerina bangsa jadi ajar-ajarNa, gelah nggeluh ibas keselamaten.  

2.      Perjumpaan Yesus ras ajar-ajarNa i Galilea mbaba perubahen man ajar-ajar, sebab minter isembahna Yesus, amin gia piga-piga ia lit sisangsi. Tapi i jenda ngatakenca maka ajar-ajar e reh tekna maka Yesus eme Yesus si mate ras si keke ibas simate nari. Ibas perjumpan Yesus ras ajar-ajarNa, lit sada hal siikataken Yesus man ajar-ajarNa eme kerina kuasa i surga bagepe i doni nggo ibereken Dibata man Yesus. Enda ikatakenNa gelah ajar-ajar meteh maka lit kuasa bas Yesus, janah kuasa Yesus melebihi kuasa-kuasa si lit ibas doni enda, termasuk kuasa iblis. Janah bukti kuasa Yesus eme Yesus keke ibas simate nari, naluken kuasa kematen  (band. 1 Korinti 15:54b-55).

3.      Kenca Yesus ngataken kerna kuasa si lit bas Ia, maka isuruh Yesus ajar-ajarNa guna lawes ku kerina bangsa manusia. Jelas siman tujun eme manusia. Tujunna eme njadiken kerina bangsa ajar-ajar Yesus : alu tahapan eme mperidiken ibas gelar Bapa, Anak ras Kesah Si Badia. Kenca sie ajari bangsa manusia e ngikutken kerina singgo ipedahken Yesus man ajar-ajar eme nggeluh ibas kekelengen (band. Matius 22:37-40). Gelah  tetap ukur ajar-ajar ndahiken persuruhen Yesus, maka ipetetapNa ukur ajar-ajar alu ngataken Yesus tetap ras ajar-ajar seh ku kedungen zaman. Yesus berimanuel ibas kegeluhen ajar-ajar.  

4.      Perintah Yesus kerna peridin ilakoken ibas gelar Bapa, Anak ras Kesah Si Badia, mereken sada pengangkan simbaru kerna peridin. Sebab biasana sekalak jelma siiperidin harus bengket ibas kolam ntah pe ibas lau simaler. Tujunna eme mbersihken diri. Tapi peridin siitekanken Yesus eme jadi tanda sekalak jelma nggo ia jadi “bangsa” Dibata

5.      Matius nuratken enda, sebab singoge kitab enda ntah pe perpulungen siialamatken eme mayoritas perpulungen siberlatar belakang Yahudi. Emaka imotivasikenna gelah kalak Yahudi kristen sadar maka ia me pewaris sah ibas padan-padan Dibata nandangi bangsa Israel. Bagepe gelah kalak Yahudi Kristen banci meteh kerna tanggungjawabna nandangi kalak sideban, khususna cara rukur misioner ntah pe mberitaken Kata Dibata nandangi kalak sideban (kafir), gelah kalak kafir banci jadi ajar-ajar Yesus. Kalak kafir banci mpelajari ras ndalanken kai siiajarken Guru (Yesus). Tujun kerina enda eme gelah kerina bangsa nggeluh ibas keselamaten. Enda ilakoken Yesus, sebab dosa nggo ndauh erdahin ras nggo nterem kalak si nggeluh ibas dosa.

APLIKASI

            Keselamaten eme guna kerina jelma, janah keselamatan man kalak kristen eme tek man Yesus Kristus. Ibas pemahaman sibagenda me, maka kita  nggo nggeluh ibas keselamaten, sebab kita nggo tek man Yesus Kristus, janah dosa ras kematen nggo italukenNa ibas kayu persilang i uruk Golgota. Tapi selaku kalak singgeluh ibas keselamatan kepeken la banci sinik saja. Kita harus mberitaken Berita Keselamaten man temanta manusia gelah ia pe nggeluh ibas keselamaten. Tandana kita nggeluh ibas keselamaten eme, kita la banci nggeluh alu erbana-bana, tapi harus ngikuti kai siiajarken Yesus man banta. Janah kalak sierbahan dosa banci jera.

            Memang ibas paksa genduari lit denga kalak kristen si la tutus ras la erkemalangen man Tuhan. Nandangi kalak sibage kita harus ngajarken uga seharusna erkemalangen man Tuhan. Bagepe lit temanta manusia si la ia tek man Yesus selaku Tuhan. Nandangi kalak sibage, tentuna la kita banci make metode sindekah eme alu ngataken mari ikutlah ras kami tek man Yesus Kristus. Tapi mari pake metode dialog sosial (nampati kalak si kekurangan, terlibat aktif nandangi kalak si datken musibah bencana alam, rsd), bagepe  tetaplah kita nggeluh ibas kebujuren ras kekelengen. Ibas perbahanen sibage tek kita ngena atena nandangi persadanta ras Yesus Kristus, emaka nggit ia jadi ajar-ajar Yesus (band. Perbahanen Rasul-Rasul 2:43-47; 4:32-37).

Pdt. Steven Kmenit, STh.M.Min.

           

IkelengiNa Kerina Jelma (Miha 4:1-4)

BAHAN PJJ GBKP

TANGGAL 21 – 27 APRIL 2013.

Miha 4: 1 – 4.

Tema : IkelengiNa Kerina Jelma

LATAR BELAKANG

1.      Nabi Miha erdahin selaku nabi ibas zaman telu raja, eme raja Yotam, Ahas ras Hizkia. Bagepe Nabi Miha melayani ibas sada zaman ras nabi Jesaya, saja nabi Jesaya erdahin ibas ibu kota Yerusalem, tapi nabi Miha erdahin/ ernubuat ibas kuta. Nubuat nabi Miha eme mengkritik pemimpin-pemimpin Yehuda si korup, mengkritik nabi-nabi palsu ras imam-imam si fasik, pedagang-pedagang si la jujur, ras hakim-hakim si korup. Emaka ibas situasi sibagenda eme nggeluh erbana-bana, nggeluh la erkemalangan man Tuhan, maka  nina Miha, bangsa Yehuda nandangi ndabuh me, janah rumah pertoton pe kernep (nen 3:9-12). Padahal man bangsa Yehuda rumah pertoton eme sentral kegeluhenna, sebab i je Dibata hadir ras simbol i ja bangsa Yehuda eme bangsa Dibata.

2.      Selain Nabi Miha ernubuat kerna ndabuhna Yerusalem erkite-kiteken dosa siibahanna, nabi Miha pe ernubuat kerna sada pengarapen ntah pe pemulihen bangsa Yehuda. Enda ikataken Nabi Miha erkiteken la ate Dibata bangsaNa kernep. Sebab amin gia Dibata jadi hakim ngukum bangsa Yehuda, tapi Dibata tetap nge erdiate nandangi bangsaNa. Emaka bangsa Yehuda siihukum Dibata arah bangsa si deban, dingen i taban ibas negara si deban, tapi ibas sada paksa/ ibas wari-wari si reh pagi kalak Yehuda ras kerina bangsa-bangsa reh ku Sion guna ersembah  i je sebab nggo pajek mulihi Rumah pertoton.  

3.      Bangsa-bangsa si reh ku deleng Sion erkite-kiteken nggo inenna kerna kuasa ras keleng ateNa bagepe uga nggeluh ibas keleng ate ras kebujuren. Emaka selain reh guna ersembah man Dibata tapi pe guna megiken pengajaren ibas Dibata nari. Gelah bangsa-bangsa si reh ndatken kepentaren ibas Dibata nari. Sebab kepentaren ibas Dibata nari mereken ketenangen ras kedamen man manusia. Bagepe mereken pengangkan man manusia uga seharusna nggeluh ibas doni enda selaku tinepa Dibata.

4.      Bangsa-bangsa si reh ku deleng Sion i rumah pertoton, simegiken ajar Dibata lanai mpraktekken kinilabujuren ras peperangen, tapi kegeluhenna eme nggeluh ibas kedamen, emaka terjadi me kedamen ibas doni enda.

5.      Nubuat nabi Miha enda ngataken maka ibas wari-wari si reh Dibata sendiri sijadi pemimpin ibas doni enda, Dibata sendiri simerentah doni enda, emaka erkiteken Dibata si jadi pemimpin ibas doni enda, terjadi me kemalemen ate ras keriahen. Janah Sion ntah pe Rumah pertoton jadi pusat pemerintahen Dibata. Pemerintahen Dibata eme adil ras bujur.

APLIKASI

            Dibata eme Dibata pengkelengi. Emaka la ateNa sada pe tinepaNa e nggeluh ibas “dosa/kematen”. Erkiteken sie me reh Ia ku doni enda, emaka ise si tek man baNa terkelin me (band. Yohanes 3:16). Maksudna kalak si terkelin adi ibegikenna ajar Dibata nari, janah idalankenna ibas kegeluhenna tep-tep wari.

            Adi siperdiateken ibas kegeluhenta maka, keleng ate Dibata tetap la erleka bas kita nari, termasuk pe man kalak si la setia man baNa. Tapi la bo berarti Dibata “merestui” perbahanen kalak jahat, lang. Dibata ngkelengi kalak jahat pe, ibas pengertin Dibata tetap mereken kesempaten man kalak jahat guna robah ibas perbahanenna si la mehuli nari, lit pertobatan ibas ia nari, emaka terkelin me ia pagi.

            Dibata engkelengi kerina jelma, ate Dibata gelah kita kerina nggeluh ras Ia. Janah kita si tek man baNa harus ngkelengi Ia. Sebab adi kita ngkelengi Tuhan maka alu sendirina kita ngkelengi temanta manusia, sebab enda merupaken undang-undang ibas Dibata nari (nen Matius 22:37-40). Alu bage kita singgeluh ibas pengkelengi Dibata mpraktekken kekelengen ibas kegeluhenta tep-tep wari, emaka kegeluhenta idemi alu pusuh singkelengi kedamen. La kita nggit nggeluh ibas perjenggilan, perubaten, emaka bentuk-bentuk sierbahanca peturah perubaten nggit kita hindari, sebab e kerina merugiken kita, la saja ibas doni enda tapi pe kita lanai nggeluh ras Tuhan pagi. Emaka adi kita nggeluh ibas pengkelengi Dibata, sipaling penting bas kita eme patuh nandangi pengajarenNa, janah tetaplah nggeluh ibas kepentaren Tuhan nari. Emaka malem ateta nggeluh ibas kedamen. La sibalas kejahatan alu kejahaten, tapi kejahaten alu kedamen.

Pdt. Steven Kumenit, STh.M.Min.

Pujilah Tuhan Erkiteken Keleng AteNa (Mazmur 150:1-6).

BAHAN PJJ GEREJA GBKP

TANGGAL 14 – 20 APRIL 2013.

Mazmur 150:1 - 6.

Tema : Pujilah Tuhan Erkiteken Keleng AteNa.

LATER BELAKANG

1.      Mazmur sijadi oratenta sendah eme pasal pendungi ibas kitab Mazmur, janah adi sinen Mazmur enda   
      eme sada pengajuk man kerina sierkesah guna muji Tuhan i rumah pertoton. Pengajuk gelah muji Tuhan i 
      Rumah Pertoton sebab Rumah Pertoton eme Rumah Dibata, Dibata ringan i je, janah puji-pujin e hanya 
      patut ibereken man Tuhan saja. Bagepe bagi Pemazmur, Rumah Pertoton eme sentral kegeluhen  
      manusia (bangsa Israel). Enda me sierbahanca raja Daud madin iakapna ia tading sada wari ibas Rumah 
      Pertoton, asangken seribu wari ibas ingan sideban (Maz.84:11).

2.      Pengajuk pemazmur guna muji Tuhan erkiteken piga-piga hal, eme : a). Dibata sierkuasa ibas Surga. 
     Enda sada pengakun pemazmur kerna ise kin Dibata. Dibata siringan ibas Surga eme tuhu-tuhu Dibata 
     sierkuasa i je. Lalit sideban sierkuasa i je. Dibata ngenca penguasa tunggal i surga. B). Perbahanen   
     Dibata simbisa. Enda ikataken pemazmur sebab nggo idahna tinepa Dibata simejilena eme matawari, 
     bulan, bintang siitamaken Dibata ibas langit enda.  C). Kemulian Dibata me simeganjangNa. Enda harus 
     iertiken ibas keleng ateNa, iselamatkenNa bangsa Israel ibas erbage-bage hal. Bagepe uga Dibata 
     ncidahken “keajaiban-keajaibanNa man bangsa Israel ibas rangka nampati bangsa Israel, termasuk raja 
     Daud.

3.    Pemazmur ngajuk gelah ibas muji Tuhan harus make alat musik, si kin alat musik rusur ipake ibas 
     kebaktin-kebaktin bangsa Israel. Tujunna gelah kerina alat musik ipersada gelah tercipta sada sora 
     simejile. Bagepe ibas make alat musik mpeturah semangat guna muji Tuhan. Ipihak sideban  muji Tuhan 
     make alat musik merupaken sada kebiasaan raja Daud.

4.   Pemazmur ngajuk bangsa Israel guna muji Tuhan ibas rumah pertoton, sebab pemazmur ibas hal enda 
     raja Daud nggo ngejapken uga kuasa ras pengkelengi Dibata nandangi ia. Emaka mazmur enda banci  
     sikataken sada pengalamen kiniteken pemazmur.

5.   Terdauhen ate pemazmur, gelah bangsa Israel meteh maka muji Tuhan eme merupaken  tujun ibas kerina 
    tinepa Dibata singgeluh, janah enda merupaken kegeluhen manusia. Sebab ibas manusia muji Tuhan   
    berarti manusia ngakui kerna kinimbisan ras keleng ate Tuhan ibas kerina kegeluhen manusia, emaka   
    Tuhan ngenca sipatut isembah ras ipuji manusia, khususna bangsa Israel.

APLIKASI

            Selaku kalak sierkiniteken harus nge sigejapken maka erkiteken keleng ateNa nge maka kita genduari nggeluh ibas keterkelinen. Sebab erkiteken keleng ateNa e me maka nggit Dibata nusur ku doni enda jadi seri ras manusia, bagepe nggit mate guna nelamatken kita kalak perdosa. Bagepe gelah la kita nggeluh ibas dosa mulihi, maka Kesah Si Badia ngarak-ngarak kita. Ituduhken Kesah Si Badia dalan simanbentasenta.  Bagepe sigejapken seh genduari kita lit ibas pengepkepenNa, kita lit ibas sehat-sehat, janah adi jumpa perbeben ras kiniseran, iberekenNa serpang pulah man banta. Bagepe arah gerejaNa, lalap kita ipersingeti gelah kita tetap jadi sikerajangenNa alu tetap ndalanken kai singena ateNa. Emaka patut nge sikataken bujur man Dibata, janah sipujilah Tuhan.

            Ibas kita muji Tuhan berarti la kita ngelupaken kerina kiniulin Tuhan singgo sialoken ibas kegeluhenta. Janah ibas kita muji Tuhan berarti kita memproklamirkan maka Tuhan ngenca sipatut isembah. Emaka ibas kita rende i gereja, ibas kebaktin harus ibas pusuh nari. Bagepe gelah rende enda pe mejile maka alat musik siipake (kibord) kita harus min imainken alu mejile ka, gelah ibas kita muji Tuhan banci mejile sebab ipandu alu musik.

            Muji Tuhan la terjeng arah babah bagi mbelasken haleluya, bagi teptep kali kita merespon perbahanen Dibata man banta sibelasken puji Tuhan ntah pe Haleluya. Ntah pe sipuji Tuhan alu rende, tapi pe mari sicidahken alu perbahanen. Sebab siidah nterem ka sirusur mbelasken kata haleluya ras rusur rende muji Tuhan, la ncidahken perbahanenna simehuli sinandaken ia sangana muji Tuhan. Muji Tuhan (Haleluya) harus menguasai kerina kegeluhenta. Alu bage muji Tuhan e harus mewarnai kerina kegeluhenta.

            Ibas Pjj sekali enda berhubungen ras HUT KA-KR pe 123 tahunken. Perdalanen pelayanen nandangi anak-anak nggo cukup dekah. Siniharapken gelah kita selaku orang tua tetap mereken kontribusi simehuli guna mendukung pelayanen KA-KR, subuk toto bagepe materi, alu bage KA-KR tetap ikut berperan ibas perdalanen gereja GBKP genduari ras paksa si reh.

Pdt. Steven Kumenit, STh,M.Min.