Aku, Suruhlah Aku (Yesaya 6:1-8)

PERPULUNGEN JABU-JABU 

GEREJA GBKP

TANGGAL3 MARET - 9 MARET 2019

Jesaya 6:1-8.

Tema : Aku, Suruhlah Aku.

LATAR BELAKANG

1.     Bangsa Yehuda eme bangsa pilihen Tuhan. Tujun Tuhan milih bangsa Israel/Yehuda ibas rangka keselamatan i tengah-tengah doni enda. Bangsa Yehuda ipake Tuhan jadi alatNa, emaka selaku bangsa Tuhan, seharusna min kegeluhen bangsa Yehuda nggeluh ibas kebadian, kebujuren ras keadilan. Tapi si jadi lang. Bangsa Yehuda nggeluh alu erbana-bana. Bangsa Yehuda lanai mbiar ras erkemalangen man Tuhan, emaka terjadi me penindasan, kinilaadilen, la lit kekelengen, ras pang mindo penampat man bangsa Mesir asangkan man Tuhan.

2.     Amin gia bangsa Yehuda nggo nggeluh erbana-bana, lanai setia man Tuhan. Tapi Tuhan tetap erkeleng ate man bangsa Yehuda. Ate Tuhan gelah bangsa Yehuda tetap jadi bangsa pilihen ras alatNa. Emaka ibas palas enda me idilo Tuhan si Yesaya gelah peseh berita penghukuman Tuhan. Ate ibas bangsa Yehuda megiken berita penghukuman Tuhan, bangsa Yehuda minter jera ras mbiar ras erkemalangan man Tuhan. 

3.     Pendilo Tuhan man Yesaya terjadi ibas rumah pertoton. Idah Yesaya kehadiren Tuhan ibas rumah pertoton. Tapi igejapken Yesaya, erkiteken nggo idahna Tuhan, maka sekali enda ia mate. Sebab ibas pustaka si Badia (Taurat Musa), manusia la iperkenankan ngidah Tuhan, sebab manusia e erdosa. Adi manusia ngidah Tuhan maka mate me ia (band. Keluaran 33:20). Apai ka igejapken Yesaya, ia tading ibas bangsa si erdosa, bagepe ia sendiri manusia sierdosa.

4.     Ibas rencana Tuhan simbelin nandangi doni enda, ibenai ibas bangsa Yahuda nari, maka ialemi Tuhan kerina dosa-dosa Yesaya. Arah Malekat Serafim ipebadiakan Tuhan Yesaya. Malekat Serafim maba rara, jenari arah rara e ikuitna biber Yesaya. Pengalemi dosa ras kebadiaan nggeluh merupakan sada hal sipenting ibas nehken sura-sura Tuhan nandangi bangsaNa. Sebab ibas nehken sura-sura Tuhan, perlu kinipangan ras kemurniaan nggeluh, gelah la jadi batu antuken nandangi bangsa Tuhan.

5.     Ibegi Yesaya sada penungkunen ras pengutusen ibas Tuhan nari. Emaka ialoi Yesaya persuruhen Tuhan e. Emaka Yesaya jadi nabi Tuhan. Tugas nabi Yesaya eme mpekena kegeluhen erkiniteken bangsa Yehuda gelah jera ras mulih kempak Tuhan. Emaka lit keselamatan man bangsa Yehuda. Tapi adi lang maka penghukumen Tuhan ipeseh man bangsa Yehuda.

APLIKASI

            Arah oratenta ras tema, kita ngerana kerna pemilihen calon Pertua ras calon Diaken. Ibas kalender gereja GBKP pemilihen calon Pertua ras calon Diaken tingkap PJJ ilakoken ibas bulan April 2019. Janah perlu siteh pemilihen enda merupaken cara Tuhan ndilo kita jadi serayanNa. Jadi penungkunen man banta, ise siipilih Tuhan ? ibas aturen gereja GBKP maka sibanci ipilih jadi Pertua ras Diaken eme umurna nggo 25 tahun (si lenga erjabu), simeganjangna 65 tahun adi ia menjabat denga Pertua ntah Diaken. Tapi adi calon si mbaru maka simeganjangna umurna eme 60 tahun. Tapi ise si jadi tentuna Tuhan sinentuken arah kita. Tuhan erdahin arah pusuhta lako milih serayanNa. Emaka la lit istilah bas kita eme calon pendamping.

            Engkai maka arus nggit kita ngaloken pendilo Tuhan e. Ntah arus kin nggit kita jadi calon Pertua ras caloin Diaken ? Arus kikta nggit sebab : 1). kita nggo dat perkuah ate Tuhan. searusna min kita nggo cilaka (nggo ihukum Tuhan), tapi erkiteken perkuah ate Tuhan, maka ibas Yesus Kristus kita iselamatkan. Ipedauh Tuhan cilaka ibas kita nari. Emaka nggit merupakan sada pengataken bujur man Tuhan sebab Tuhan erdiate man banta. Janah arus siinget amin gia Pertua ras Diaken eme Doulos (hamba), tapi situhuna ipehakan Tuhan me kita. Emaka arus kita ngelai alu mbiar ras erkemalangan man Tuhan. Ibas kita erdahin, erdahinlah kita tempa-tempa ngelai man Tuhan labo man manusia. 2). Ate Tuhan gelah erdewasana kiniteken perpulungen, emaka arus lit serayanNa singarak-ngarak ras ngelai perpulungenNa. 3). Dibata simereken kepentaren ras gegeh man Pertua Diaken ibas ia ngelai. Sebab la ate Dibata serayanNa dat kemalun ibas ngelai. Emaka adi ipilih teman kita ula min itulak. Tapi lit min pengejapen bas kita, Tuhan similih kita arah temanta, emaka ibas pusuhta arus kataken aku, suruhlah aku. Alu bage ipasu-pasu Tuhan kita.

            Erkite-kiteken pemilihen calon Pertua ras Calon Diaken penting kal ibas gerejanta maka kita kerina si lit hak milih arus mpersiapkan diri alu mehuli. Tandana kita mpersiapkan diri alu mehuli, kita arus erdiate ras mediate nandangi pemilihan Calon Pertua ras Calon Diaken e. Bagepe ula sura-suranta (manusia) sipelebeken alu nuka-nukangi pemilihan. ntah nggo ka  erkempanye, ntah nggo ka lit tim suksesna. Ntah lit ka sideban berupaya gelah sisangana ngelai tetap ia ngelai ibas periode selanjutna. Sura-sura enda mehuli nge, tapi ula ka situtupi calon ibas temanta  nari. Bagepe gereja (BPMR/ Majelis/ Pengurus PJJ/ Pengurus Kategorial) arus ikut mensosialisasikan (ermomo) man anggota ngawan gelah anggota ngawan niperpulungen meteh kerna dahin pemilihan calon Pertua ras calon Diaken. Jadi ibas kita ersikap alu mehuli, e tandana kita mbiar ras erkemalangan man Dibata, la ateta kena cilaka ibas Tuhan nari.

Pdt. Steven Kumenit, S.Th.M.Min. 

  

            

Jesus Kap Mesias Si Ipadanken Dibata (Matius 16 :13-20)

KHOTBAH MINGGU

3 MARET 2019

GEREJA GBKP

==================================================================

Invocatio :    Jesus Kristus me si maba kita bengket ku bas lias ate Dibata erkiteken kinitekenta. Janah ibasa lias ate Dibata e me kita nggeluh dingen ringan. Dage meriah ukurta sabab lit pengarapenta maka kita dat bagin ibas kemulian Dibata (Roma 5:2).

Ogen        :    Josua 5:13-15 (Tunggal).

Khotbah   :    Matius 16:13-20 (Tuhnggal).

Tema        :    Jesus Kap Mesias Si Ipadanken Dibata.

LATAR BELAKANG 

1.    Kehadiran ras pelayanan Jesus Kristus ibas doni enda nggo iteh jelma sinterem. Pelayanan Jesus si dem kuasa eme pepalem kalak sakit, ngasup pelawes setan-setan, mpekeke kalak mate ras ngajar alu kuasa, mbaba erbage-bage penandai kerna ise kin Jesus e. 

2.    Paksa Jesus ras ajar-ajar ngadi i daerah Kesarea Pilipi, bagepe kenca Jesus dung ertoto, i sungkunNa man ajar-ajarNa nina kalak ise kin nge Anak Manusia si isuruh Dibata. Nina ajar-ajarNa, lit singatakenca Kam  Johanes Peridiken. Alasanna pernah ikataken Herodes Jesus eme Johanes Peridiken singgo nggeluh mulihi (bdk. Mat. 14:2). Tapi lit ka singatakenna Elia. Alasanna perna inubuatkan Maleaki. bagepe lit ka singatakenca Jeremia. Alasenna, menurut cerita lama kalak Jahudi, paksa Jerusalem italuken bangsa Babel, peti perpadanan ras mesba perembahen ibuniken Jeremia i gua gunung Nebo, janah la lit ise pe simetehsa gua e. Bagepe Jeremia sangana ertoto i Surga guna bangsa Israel, tapi adi nandangi reh Mesias, maka reh lebe Jeremia guna ncidahken i ja peti perpadanen ras mesba e ibuniken. Bagepe lit ka singatakenca sekalak ibas nabi-nabi. Alasenna, lit nabi singgo ngeluh mulihi (bdk. Luk 9:19).

3.    Tempa-tempa Jesus la mediate kerna penandai kalak nandangi Ia, tapi Jesus lebih mediate nandangi ajar-ajarNa. Erkiteken si me isungkun Jesus man ajar-ajarNa, iakapndu ise Aku enda ? Petrus "sebage juru bicara" ajar-ajar Jesus ngatakenca Kam kap Mesias, Anak Dibata singgeluh. Pengakun ajar-ajar Jesus kerna ise Jesus penting, sebab ajar-ajarNa me pagi sinerusken pelayanan keselamatan ibas doni enda.

4.    Pengakun ajar-ajar Jesus, Jesus eme Mesias Anak Dibata singgeluh ngatakenca ajar-ajarNa nggo meteh kerna Jesus eme Mesias. Bagepe ilengkapi (bdk. tegaskan) Anak Dibata singgeluh. Kerna Anak Dibata, tupung Jesus iperidiken lit sora i Sorga nari nina enda me AnakKu (bdk. Mat. 3:17). Bagepe perna ikataken Jesus, Ia me Anak Dibata singgeluh (bdk. Mat. 11:27). Pengidah Jesus kai siikataken Petrus labo asalna ibas manusia nari tapi erkiteken Bapa si i Sorga singatakenca. Alku kata sideban Petrus dat ilham (bdk. bisikan ibas Dibata nari) singatakenca Yesus eme Mesias, Anak Dibata singgeluh. Erkiteken si e nina Jesus Ketuahen me kam Petrus. Terdauhen nina Jesus man Petrus, Petrus me batu sinteguh, janah ibas batu palas enda me Ku pajekken perpulungenKu si la tertaluken aminna  pe alu kinirajan kematen. Bagepe ibereken Jesus kunci kinirajan Sorga. Emaka kai siirakuti i doni enda, i Surga nggo kap irakuti. Tapi kai siiosari i Surga nggo kap iosari i doni. Ate Jesus ngatakenca, arah pengakun Petrus enda me pagi pajek perpulungen ni Tuhan. Janah keselamatan ras kegeluhen i Surga me man kalak singakuken Jesus eme Mesias, Anak Dibata singgeluh.

5.    Mesias eme siniharapken kalak Jahudi. Arah kerehen Mesias kalak Jahudi ndatken keselamatan. Emaka adi ajar-ajar Jesus nggo meteh kerna ise Ia merupaken sada hal sipenting guna keselamaten man kalak Jahudi ras kerina manusia.

APLIKASI

            Temanta sendah eme Jesus kap siipadanken Dibata. Tema enda ngatakenca kai siipadanken Dibata ndube man bangsa Israel nggo igenapi ibas diri Jesus Kristus. Jesus me imulahi bangsa Israel ras kerina bangsa manusia, termasuk kita.

            Dibata reh arah Jesus Kristus sebab idah Dibata manusia la banci mulahi dirina jine, emaka Dibata ibas Jesus Kristus mulahi kita. IsampatiNa kita gelah kita banci nggeluh ibas keselamatan. Emaka ibas rangka keselamatan kita, amin gia Jesus arus ngenanami kiniseran tetap Ia megenggeng, bagepe patuh Ia man BpaNa sini Surga.

            Adi siinget kerna pengakunta ndube tupung kita ingawanken je kita nggo ngaku kerna Dibata si telu sada. Alu bage kita secara langsung nggo ngaku maka Jesus Kristus kap siipadanken Dibata. Jesus Kristus kap Dibata jine. Alu bage la perlu aru ateta ibas ndalani kegeluhenta i tengah-tengah doni enda, sebab Yesus Kristus eme Tuhanta pasti nemani kita. bagi Josua tupung ia ngukuri ibas pusuhna uga gelah kota Jerikho banci irebutna, rempet idahna sekalak dilaki tedis i lebe-lebena janah isungkunna tentera pihak kami nge kam, ntah musuh kami ? nina sidilaki ndai kai pe lang. Aku reh ku jenda sekalak komendan tentera Tuhan. minter mungkuk Josua nembah man bana. Tapi nina tentera komendan Tuhan (Malaikat) tangtangi sepatundu sebab kam sangana tedis ibas teneh si badia. I jenda siidah Dibata ncidahken diriNa bagi Malaikat Tuhan. Erkiteken sie me taneh isekelewet Dibata jadi Badia. Ngatakenca pe Josua la perlu aru ate ibas bengket ku kota Jerikho sebab Dibata sinemani Ia, sebab lenga pe iukuri Josua nggo leben iteh Dibata kai siarus ilakoken Josua, emaka reh Tuhan man Josua guna mpetetap ukur Josua.

            Kita selaku kalak sierkiniteken man Jesus Kristus arus ka patuh nembah man baNa, bagepe arus nggeluh badia, gelah tetap isampatiNa kita ibas kita ndalani kegeluhenta tep-tep wari. Kegeluhenta arus nggeluh badia sebab kita nggeluh ibas persadan ras Jesus Kristus. Sebab arus siinget Jesus Kristus eme simaba kita bengket ku bas lias ate Dibata. Ibas erti kata ibas kita tek man Jesus Kristus ras ndalanken pengajarenNa tep-tep wari, maka lias ate Dibata reh man banta. Dibata simasu-masu kita. Janah kita pe dat bagin ibas kemulian Tuhan eme nggeluh ibas Surga. Jadi marilah kita alu bulat ukur ras meriah ukur tetap ersembah man Jesus Kristus selaku Tuhan ibas kerina kegeluhenta tep-tep wari gelah sialoken lias ate Tuhan ras kita banci dat bagin ibas kemulian Tuhan, eme kesangapen ras kemalemen ate.

Pdt. Steven Kumenit, STh.M.Min.  

             

Kiniseran Jesus (Matius 16 : 21 - 23)

PERPULUNGEN JABU - JABU

GEREJA GBKP

TANGGAL 24 FEBRUARI - 2 MARET 2019.

=========================================================

Matius 16 : 21 - 23

Tema : Kiniseran Jesus.

LATAR BELAKANG

1.    Adi siidah ayat ope denga oratenta, je nggo lit sada pengakun ajar-ajar maka Jesus eme Mesias. Alu bage, ise Jesus ras kuasaNa nggo iangkai ajar-ajarNa, khususna Petrus. Tapi kepeken kenca Jesus nuriken Ia arus lawes ku Jerusalem, jenari i je Ia ngenanami erbage-bage kiniseran ibas pemimpin-pemimpin kalak Jahudi, imam-imam  si mbelin ras guru-guru agama Jahudi, janah Jesus ibunuh tapi keke ibas wari sipeteluken la terangkai ajar-ajar, khususna Petrus. Erkiteken sie me tempa-tempa Petrus ngapuli Jesus alu ngataken mbera-mbera Dibata sipedauh kerina e ibas Jesus nari. Alu bage kerina kiniseran termasuk pembunuhan man Jesus la terjadi. Kai siikataken Petrus man Jesus, kepeken peukuren manusia si nggo ikuasai iblis. Erkiteken sie me nina Jesus laweslah ibas aku nari o iblis, isidingindu kap aku.

2.    Keadaan sibakal inanami Jesus i Jerusalem erkite-kiteken pemimpin-pemimpin Jahudi, imam-imam si mbelin ras guru-guru agama Jahudi nembeh man Jesus. La teralokenna Jesus eme Mesias, bagepe nggo akapna "terganggu" sebab nggo nterem kalak simegiken ras  ngikuti pengajaren Jesus. Erkiteken sie me ibas kerina paksa idaramina kesempaten guna nidingi Jesus, kenca isidingina maka idatna sada keselahan man Jesus. Erpalasken kesalahan enda me nggo lit dalanna guna ngukum Jesus, tepi mbiar denga ia man jelma sinterem. 

3.    Jerusalem beda ras ingan - ingan si deban siikunjungi Jesus ibas pelayananna. Jerusalem eme pusat agama Jahudi ras pusat pengadilan sahendrin (Pengadilan agama). Bagepe banci sikataken pemimpin-pemimpin kalak Jahudi, imam-imam si mbelin ras guru-guru agama ndeher ras penguasa Roma. Bagepe penguasa Roma mehamat man ia kerina. Palas enda me idah Jesus sierbahanca ia datken kiniseran, ras ibunuh. Sebab ate Jesus ibas Ia lawes ku Jerusalem labo sekedar perkunjungan biasa, tapi ateNa ngajar i je ras pehuli kerina si lepak.

4.    Nggo tempa jadi kebiasan, bagepe tempa-tempa la salah ras la erdosa siibahan  pemimpin-pemimpin kalak Jahudi, imam-imam si mbelin ras guru-guru agama. Kalak enda la jadi permakan man kalak Jahudi, tapi siilakokenna eme penindasan man kalak musil, penipuan, kinilkaadilen, bagepe rumah pertoton lanai bagi rumah pertoton sebab nggo ipake jadi sarang penyamun (erbinaga ras penukaran sen). Maksud sarang penyamun sebab ipediatna kalak erbinaga ras buka lapak guna penukaran sen. Perlu si teh adi kalak Jahudi siatena nehken persembahen pengalemi dosa ras tutungen arus sue ras aturen agama Jahudi eme asuh-asuhen simehuli, emaka melala asuh-asuhen ibas rumah pertoton, janah ergana pe meherga. Bagepe adi mereken persembahen arus make mata uang Jahudi, erkiteken sie melala ingan penukaren-penukaren uang i je. Engkai maka ipediat pemimpin-pemimpin agama, imam-imam si mbelin ras guru-guru agama sebab ia pe dat bagin i je nari. Jadi melala kejahaten i Jerusalem, ras pelaku-pelaku kejahatan nterem "permakan".

5.    Kiniseran, kematen ras kekeken Jesus ibas simate nari ituriken Jesus man ajar-ajarNa gelah ajar-ajarNa meteh kai sinandangi jadi man Jesus, alu bage ajar-ajar la nai sengget, tapi kepeken iblis erdahin janah ipakena Petrus guna gagalken sura-sura Tuhan simbelin eme keselamatan manusia. Keselamatan manusia ras doni enda arus ilakoken, janah Jesus Kristus patuh ibas kerina e, amin gia arus arah kiniseran ras kematen. Enda me siarus iangkai aja-ajar Jesus.

APLIKASI

            Guna keselamatanta maka ibas kepatuhen Jesus man BapaNa i surga nggit Jesus ngenanami kiniseran. Amin gia secara manusia lit sada pemindon Jesus gelah adi banci ibas nelamatkan manusia ras doni enda ula min arah kiniseran. erkiteken si e me tupung i peken Getsemani, ertoto Jesus seh telu kali man Bapa gelah ula inemna calung kiniseran e, tapi erkiteken patuh Ia man BapaNa singutus Ia, ialokenNa kiniseran ras kematen e (bdk. Matius 26:39-44).

            Kiniseran Jesus nelamatkan kita kerina. Emaka patut kita ngataken bujur man Tuhan. Pengataken bujurta man Tuhan arus teridah ibas ketutusenta nembah man Tuhan ibas kebaktin minggu, PJJ, PA, bagepe arus teridah ibas kegeluhenta tep-tep wari. Kita arus ngelakoken kai singena ate Tuhan. Tapi siidah nterem denga kita amin gia nggo nggeluh ibas keselamatan tetap denga meriah siakap ngelakoken si la ngena ate Tuhan. Dosa tetap denga sibahan. Sipediat iblis ngerimrim kita emaka melala salah ras dosa sibahan kita.

            Kiniseran Jesus mereken pengangkan man banta, maka kita selaku kalak kristen sierkiniteken man Jesus meherga kal. Sebab arus arah kiniseran Jesus maka kita selamat. Arah pengangkan enda arusna min siilakokenta eme singena ate Tuhan. Tapi bagi Petrus ka, iblis atena tetap ngkuasai kita, emaka la atena kita nggeluh ibas kepatuhen man Dibata saja, atena nirangken kita ibas Tuhan nari. Erkiteken sie ikuasaina kita janah berekenna simehuli akapna gelah kita lanai patuh man Tuhan. Salah sada pengajaren iblis man banta eme la atena kita nggeluh ibas kiniseran. Kiniseran arus iidah selaku beban simberat, janah ia me sibanci mereken ndalan pulah ras mereken kesenangen, emaka la heran nterem kita adi jumpa perbeben ras kiniseran jungut-jungut ras la tahan ngaloken beban simberat e. Padahal ibas pengajaren Jesus ketuahen me kalak singenanami kiniseran erkiteken nggeluh ibas kepatuhen man Tuhan (bdk. Matius 5:10), bagepe kita arus saber ras megenggeng ibas ngenanami kiniseran (bdk. Jakup 5: 10), bagepe adi kita ngenanami  kiniseran marilah kita ertoto man Dibata gelah Dibata nampati kita (bdk. Jakup 5:13). Arah enda situhuna banci siidah Dibata mereken kemalemen ate ras serpang pulah man banta adi kita jumpa kiniseran. Emaka ula bene ukurta adi jumpa kiniseran tetaplah kita erpengarapen man Tuhan saja amin gia jumpa erbage-bage kiniseran.

Pdt. Steven Kumenit, S.Th.M.Min.

Mere Persembahen Alu Ukur Ersuruh (Keluaran 35: 20 - 29).

PERPULUNGEN JABU - JABU

GEREJA GBKP

TANGGAL 17 - 23 PEBRUARI 2019

==========================================

Keluaran 35 : 20 - 29.

Tema : Mere Persembahen Alu Ukur Ersuruh.

LATAR BELAKANG

1. Tupung Musa erjumpa ras Tuhan i deleng Sinai, Tuhan ngerana ras ncidahken bentuk kemah Si Badia. Isuruh Tuhan gelah bangsa Israel erbahan kemah Si Badia ras perkakas-perkakasna. Tujun majekken Kemah Si Badia eme gelah Tuhan ringan i je. Bagepe gelah bangsa Israel banci ersembah man Tuhan ras erjumpa ras Tuhan.

2. Gelah iangkai ras erdalan alu mehuli pembangunan Kemas Si Badia, maka ipepulung Musa kerina bangsa Israel, janah ngerana Musa. Tangtangna Musa ngerana kerna teologi bangsa Israel arus ersembah man Tuhan. Nina Musa, enda me singgo ipedahken Tuhan : enem wari banci kam erdahin tapi ibas wari sipepituken kam arus pebadiaken wari e. la banci erdahin. ise sierdahin la banci la ibunuh. janah api la banci ipegara ibas rumahndu. Guna sie babalah persembahen khusus man Tuhan gelah sipajekken sada Kemah Si Badia lengkap ras perkakas-perkakasna, bagepe paken imam.

3.  Respon kenca megiken kai siikataken Musa, Lawes bangsa Israel jenari ibabana persembahen man Tuhan guna Kemah Si Badia.  Ipersembahkenna persembahan man Tuhan alu ukur ersuruh. janah persembahen siipersembahkenna eme anting-anting, cincin, bura, emas, lenen halus, wool biru, ungu, biru, megara, uis siibahan ibas bulu kambing nari, kulit bajar biri-biri siicelup megara ntah kulit halus, pirak, kayu jati, benang ibas bulu kambing, bat permata, rempah-rempah, minak guna lampu ras penangkuhen ras gna barang tutungen si merim.

4. Bangsa Israel mbaba persembahen sue ras kiniliten si lit bas ia, janah erpalasken ukur meriah ras ukur siersuruh. Janah adi ibas Keluaren 36:2-7, persembahen bangsa Israel lebih asa siiperluken, si dungna ipindoken Musa gelah isetopken persemben guna Kemah Si Badia sebab nggo bias.

5. Persembahen siibereken bangsa Israel sue ras kebutuhen pembangunan Kemas Si Badia.

APLIKASI

            Temata sendah eme Mere Persembahen Alu Ukur Ersuruh. Arah tema enda kita ngangkai kerna teologi persembahen GBKP.

            Adi siidah persembahen ibas gereja GBKP lit persembahen ibas kebaktin minggu (Kolekte), persepuluhen, Kerja rani, persem,bahen pengataken bujur, ras persembahen-persembahen siiaturken gereja (pembangunan, ekstra, rsd). Persembahen enda kerina tentuna guna kebutuhen ibas tru tugas gereja (Marturiua, Koinonia, Diakonia) ras pembangunan gereja. Tapi siidah persembahen-persembahen siibereken kita lenga maksimal. Emaka lalap sibegi gereja kurang dana guna ndalanken program-program pelayanenna. isamping sie lit denga anggota perpulungen simere persembahen la arah pusuh siersuruh ras la nggit mere persembahen singgo iaturken gereja bagepe mere persembahen siiaturken gereja la sue ras kiniliten si lit bas kita. Jadi penungkunen engkai maka bage?

            Kurangna pengangkanta kerna teologi persembahen erbahanca kita kurang pe la ngasup mere persembahen alu mehuli. Situhuna arus siteh persembahen eme salah sada unsur ibas kebaktin siarus lit bas kita. Janah fungsi persembahen eme guna kemulian Tuhan ras guna ipakeken ibas pelayanan gereja.

            Engkai maka kita arus mere persembahen man Tuhan. Apakah Tuhan e perlu isampati ntah Tuhanta e musil! lang. Tuhanta e bayak. janah kai si lit bas kita pe Ia simerekenca. Mere persembahen eme persuruhen Dibata, janah tanda kepatuhenta man Dibata kai siiperentahken Tuhan sidalanken. Janah ibas kita mere persembahen ulihna eme pasu-pasu Tuhan. Erkiteken sie me nina Tuhan man bangsa Israel ujilah Aku maka ku talangi tingkap-tingkap langit (Maleaki 3:10). Bagepe ibas kita nehken persembahen erkite-kiteken keriahen ukurta, sebab Dibata arah Yesus Kristus nggo erkorban mpersembahken diriNa guna keselamatenta. Yesus Kristus jadi biri-biri guna i persembahken gelah dosa-dosanta iapusi.

            Persembahen simehulina ras ialoken Tuhan eme mere persembahen alu ukur ersuruh ras meriah ukur. Ula jungut-jungut ntah terpaksa sebab Dibata ngkelengi kalak si mere alu ukur meriah (bdk. 2 Korinti 9:7). 

            Erkite-kiteken persembahen guna pelayanan, maka penting man Majelis runggun/ BPMR (bendahara), ntah si mengelola keuangan e terbuka, pembukuanna harus rapih ras arus ilaporken (bdk. Keluaren 36:4,5). Keuangan si la transparan ras simencurikan ntah pe terjadi pemaken uang si la arusna erbahanca perpulungen mekasiat mere persembahen. Jadi amin gia anggota perpulungen nggo ngangkai kerna mere persembahen alu mehuli. Iangkaina mere persembahen eme guna Tuhan tapi adi persembahen e isalah gunaken, dungna la ia nggit mere persembahen, ntah ipersembahkenna ku gereja si deban. Emaka penting bas gereja pengelolaan keuangan yang baik, gelah anggota perpulungen ergiah-giah mere persembahen.

Pdt. Steven Kumenit, S.Th.M.Min.   

             

Kristus Kap gegeh Ras Kepentaren Dibata (1 Korintus 1: 18-25)

KHOTBAH MINGGU

17 FEBRUARI 2018

GEREJA GBKP

==================================================================

Invocatio    :    Seh kal tuhu bayaknya Dibata ! Seh kal tuhu bagesna kepentaren ras pemetehNa! ise kin ngasup nerangken keputusen-keputusenNa ? Ise ngasup ngikuti dalan  siidalaniNa? (Roma 11: 33).

Ogen          :    Heber 12 : 18 - 24 (Tunggal)

Khotbah     :    1 Korinti 1 : 18 - 25 (Tunggal).

Tema          :    Kristus Kap gegeh Ras Kepentaren Dibata.

LATAR BELAKANG

1. Salib Kristus menjadi pertentangen ibas doni enda. Khusus man kalak sierpemeteh erpalaskan doni enda (kepentaren doni), Yesus Kristus isalibkan merupakan kebodohan Dibata, ntah pe kekalahan Dibata nandangi dosa. seharusna min Dibata siarus naluken dosa, labo dosa sinaluken Dibata. Pemikiren enda berkembang ras mpengaruhi ajaren singgo iajarken rasul Paulus kerna  salib Kristus. Secara sederhana banci siertiken salib Kristus eme keleng ate Dibata nandangi doni enda, khususna manusia. Ibas rangka nelamatken manusia maka Yesus Kristus nggit ngkurbanken diriNa gelah dosa-dosa manusia imasapkan janah manusia nggeluh ibas keselamaten.

2. Adi ngangkai kematen Yesus terjeng i kayu persilang ngenca banci sikataken maka Dibata talu. Tapi harus siidah lit kekeken Yesus Kristus ibas kematen nari. Maka siidah kuasa iblis la ngasup naluken kuasa Dibata. Kuasa kematen la ngasup naluken kuasa Dibata. Janah enda me inti kiniteken. Sebab adi Kristus la keke ibas simate nari maka sia-sia me kiniteken kalak Korinti (bdk. 1 Kor. 15:17). Jadi erkiteken lit kematen ras kekeken Kristus ibas simate nari maka teridah Yesus Kristus eme Dibata. Alu bage ise si tek man Yesus Kristus terkelin me. kalak sitek man Yesus Kristus amin gia mate nggeluh ka mulihi. Ibas erti kata lit kekeken kula nandangi kalak si tek.

3. Dibata nelamatken manusia arah kematen Yesus Kristus i kayu persilang merupaken kepentaren Dibata. Janah enda la ngasup iangkai Dibata. Kalak si la ngangkai kepentaren Dibata arah kematen Yesus Kristus i kayu persilang tentuna la ia tek man Yesus Kristus. Kalak si bage merupaken kalak si bodoh janah perlawesna kempak kematen.

4. Inti berita keselamaten siiberitaken Rasul Paulus eme Yesus Kristus singgo mate i kayu persilang. Janah berita kerna kematen Kristus i kayu persilang merupaken gegeh ras kuasa Dibata guna nelamatken kerina jelma (ayat 1; Roma 1:16). Ertina, Yesus Kristus si nggo mate i kayu persilang ras keke ibas simate nari merupaken berita simbelin man kerina jelma. Janah arah berita enda tek kalak man Yesus Kristus. Alu bage kalak si tek man Yesus Kristus nggeluh ibas keselamaten.

5. Tek man Yesus Kristus arus alu bulat ukur la perlu mindo tanda. ula bagi kalak Jahudi ras kalak Yunani. Kalak Jahudi rusur mindo tanda sengget sebage bukti kuasa Dibata. Bagepe kalak Junani sirusur ndarami kepentaren. kalak Junani erkiteken filsafatna, kerina arus alu ibuktiken alu masuk akal. Situhuna enda merupaken bentuk kebodohan. Erkiteken sie me kalak enda la ngasup ngangkai kepentaren Dibata. Emaka erkiteken la ia ngasup ngangkai kepentaren Dibata maka la ia tek man Yesus Kristus, alu bage perlawesna kempak kebenen. La ia nggeluh ibas keselamatan. Perpulungen Korinti ula bage. Perpulungen Korinti arus tetap tek man Yesus Kristus, sebab Yesus Kristus eme gegeh ras kepentaren Dibata. Bagepe isingetken Paulus man perpulungen Korinti kerna  kepentaren Dibata ndauh ganjangen asa kepentaren doni. Emaka kai si tempa-tempa kebodohen Dibata, situhuna ndauh pentaren asangken kepentaren manusia, janah kai si tempa-tempa kinilangasupen Dibata situhuna gegehen asangken gegeh manusia.

APLIKASI

            Temanta sendah eme Kristus kap gegeh ras kepentaren Dibata. Guna ngertiken tema enda perlu lebe siteh ise kin Yesus Kristus. Yesus eme Dibata jine (bdk. Yohanes 1:1-14). Alu bage ibas Yesus lit gegeh sibanci naluken kerina kuasa si lit ibasa doni enda termasuk gegeh setan/iblis, janah enda nggo ibuktiken Yesus. I ja iblis ngirgir man Yesus, bagepe ipelawes Yesus kerina setan-setan. Ibas Yesus lit kuasa guna mpelawes setan ras pepalem kalak sakit. Bagepe Yesus me ulu kepentaren, emaka ise si rurat ras Yesus pasti dat kepentaren. Tapi ise si lenga lit kepentaren ertotolah ia man Tuhan guna dat kepentaren (Jakup 1:5).

            Yesus eme Dibata jine emaka merupaken sada keriahen man banta sebab la kepe salah kita erkiniteken man baNa. Secara manusia gegeh ras kepentaren Dibata singgo icidahkenNa man banta la ngsup kita ngikutisa. La ngasup kita ndalanisa. Tuhu-tuhu bayak kal Dibatanta ras bages kal kepentarenNa, erkiteken sie la kita ngasup ngangkaisa. Tapi adi kita tetap ersada ras Ia janah kita tetap ertoto man baNa pasti iberekenNa kepentaren man banta guna ngangkai kai sura-suraNa man banta.

            Ibas kita tek man Yesus Kristus la saja nggeluh keselamatan sialoken kita, tapi pe jaminen kita banci nggeluh alu bujur, teneng, dame ras mejuah-juah iberekenNa man banta. La perlu aru ateta ras mbiar kita nggeluh ibas doni enda. Tuhu melala siding-siding siipasang setan. Melala tipu muslihat iblis, tapi erkiteken kita ersada ras Yesus Kristus maka iberekenNa kepentaren man banta guna lewati kerina siding ras tipu muslihat iblis. Bagepe ibas erbage-bage perbeben ras kiniseran, kita arus ernalem ras mindo penampat man Dibata gelah iberekenna gegeh ras kengasupen man banta guna naluken kerina perbeben ras kiniseran e.

Pdt. Steven Kumenit, S.Th.M.Min

  

Ipuji Kami GelarNdu Si Mulia (1 Tawarik 29:10-13)

PERPULUNGEN JABU – JABU

GEREJA GBKP

TANGGAL 10 – 16 FEBRUARI 2019

1 Kronika 29: 10 – 13.

Tema : Ipuji Kami GelarNdu Si Mulia.

LATAR BELAKANG

1.     Lit sada sura-sura raja Daud guna majekken Rumah Tuhan. Palas sura-sura raja Daud majekken Rumah Tuhan eme Tuhan nggo masu-masu ia. Tuhan simereken kinihagan eme jabatan ras erta emaka raja Daud nggo tading ibas rumah mewah (istana), tapi Rumah Tuhan ibahan ibas kema denga. Tapi sura-sura raja Daud enda la ibere Tuhan. Tuhan ersura-sura gelah simajekken RumahNa eme anak Daud, Salomo (2 Samuel 7:1-16).

2.     Rumah Tuhan (Rumah Pertoton) berbeda ras istana manusia. Pemeteh Salomo guna mbangun Rumah Tuhan (Rumah Pertoton) lenga lit. Lenga lit pengalaman Salomo guna majekken Rumah Tuhan (Rumah Pertoton). Erkiteken sie me Raja Daud mpepulung emas, pirak, tembaga, besi, kayu, batu permata syokam, mutiara, batu mosaik ras batu marmar (1 Korinika 29:2) guna persediaan Rumah Tuhan (Rumah Pertoton).

3.     Seh kal riahna raja Daud erkiteken bahan guna Rumah Tuhan (Rumah Pertoton) nggo lit kerina. Erkiteken sie me raja Daud muji ras ngataken bujur man Tuhan. Ibas puji-pujin ras pengataken bujur raja Daud man Tuhan, teridah sipemena : Tuhan Dibata eme Tuhan nini Jakup. Ertina Tuhan bangsa Israel, sebab pengertin Jakup eme Israel. Sipeduaken : Daud muji Tuhan asa lalap. Ertina amin gia ibas perbeben tetap Daud muji Tuhan. Sipeteluken : Tuhan kap simbelin. Ertina mbelinen Dibata asangken dibata-dibata sideban. Sipeempatken : Terberita Dibata siisembah Daud. Engkai maka terberita, sebab Dibata si mpedarat bangsa Israel Israel ibas taneh Mesir nari. Dibata sinaluken musuh-musuh bangsa Israel. Bagepe Dibata sinaruhken bangsa Israel i taneh Kanaan. Sipelimaken : Dibata mulia. Sipeenamken : Dibata e mehuli. Sipepituken : Dibata erkuasa. Sipewaluken : Langit ras doni Dibata simadasa. Sipesiwaken : Dibata e Raja ibobo kerinana. Sipesepuluken : Erta, Dibata simerekenca. Sisepuluhsadaken : Dibata merentah alu kuasa ras gegeh. Sisepuluh duaken : Dibata ngasup erbahan kalak jadi  mbelin ras erkuasa.

4.     Puji-pujin ras pengataken bujur raja Daud man Tuhan secara umum ngataken Dibata e tuhu-tuhu “luar biasa”. Adi kuasa Tuhan erdahin maka kuasa manusia ras kuasa-kuasa ibas doni enda la ngasup nahansa. Bukti kerina e me Daud banci jadi raja erkiteken kuasa Tuhan. Lit upaya-upaya Saul menggagalkan Daud jadi raja, tapi erkiteken kuasa Tuhan, Daud jadi raja bangsa Israel. Bagepe lit sura-sura Daud majekken Rumah Tuhan (Rumah pertoton) tapi la ibere Tuhan. Bagepe kuasa Tuhan simendorong maka pemimpin-pemimpin bangsa Israel alu meriah ukur muat bagin ngelitken bahan Rumah Tuhan (Rumah Pertoton). Meriah ukur pemimpin-pemimpin bangsa Israel mereken sumbangan guna dahin Rumah Tuhan.

5.     Puji-puji ras pengataken bujur sekaligus ngataken maka manusia la lit “ertina”/sebanding ras Dibata. Erkiteken sie me bangsa Israel harus mengandalkan Tuhan ibas kegeluhenna. Ula musuhi Tuhan alu nggeluh ibas kesangsin ras kinilapatuhan man Dibata. Bagepe ula mbiar kerna erta, sebab erta si lit ibas bangsa Israel rehna ibas Dibata nari. Pasu-pasu Tuhan man kalak sipatuh man baNa.

APLIKASI

            Arah oratenta sekali enda kita isingetken mulihi kerna ibadah. Janah gereja GBKP nggo lit konfesina (pengakun iman) kerna ibadah. Ibas konfesi kerna ibadah ikataken, kami percaya :

• Ibadalah adalah ungkapan rasa syukur orang kristen yang telah diselamatkan oleh Allah yang dinampakkan melalui pikiran, ucapan dan tindakan dalam kehidupannya (bdk. Rom. 121:1; Yak. 2:17).
• Ibadah merupakan panggilan untuk memuliakan Tuhan Allah melalui sesuatu yang diberikan Allah dalam hidup orang kristen, baik pengetahuan, bakat atau talenta dan harta milik (bdk. 1 Taw. 29:14; 1 Sam. 2:7).
• Ibadah dilakukan setiap saat dalam konteks ruang dan waktu dalam bentuk ibadah pribadi, ibadah rumah tangga, ibadah minggu maupun ibadah jemaat lainnya.
• Ibadah dari awal hingga akhir adalah satu kesatuan yang utuh. Ibadah dalam bentuk sakramen hanya 2 (dua): baptisan kudus untuk orang dewasa dan anak (bdk. Mat. 28:18-19; Rom. 6:3-4; 1 Kor. 6:11) dan Perjamuan Kudus (1 kor. 11:23-28; Yoh. 17:23; Mat. 26:26-29).

Ngidah konfesi enda maka ibadahta  itujukan man Tuhan, janah harus ilakoken alu 

meriah ukur bagepe alu teratur.  Kita harus muji ras ngataken bujur man Tuhan saja. La banci kita ngataken bujur man dibata-dibata sideban. Harus siamini kai si lit bas kita termasuk kegeluhenta Tuhan simerekenca. 

            Temanta sendah eme Ipuji kami gelarNdu Si Mulia. Enda ngatakenca Dibata ngenca sipatut ipuji. Bagepe la banci belasken gelar Dibata alu rate-ate. Gelar Dibata mulia kal. Emaka ise sirate-ate melasken gelar Tuhan, erdosa ia man Tuhan. Bagepe ipuji kami gelarNdu Si mulia arus teridah ibas kegeluhenta tep – tep wari. Ibas kita ngelakoken simehuli singena ate Tuhan kita nggo muji Tuhan.

            Secara umum lit dua bentuk ibadah eme 1). Ibadah formal eme ibadah minggu ras ibadah-ibadah siiaturken gereja. 2). Kegeluhenta tep-tep wari. Perlu siteh ibadah berarti sitempatken dirinta iteruh kuasa Tuhan. Bagepe lit kepatuhenta man Dibata. Alu bagepe ibas kita gelakoken simehuli singena ate Tuhan berarti kita nggo muji Tuhan ras nggeluh ibas kepatuhan man Dibata bagepe nggo sipersembahken dirinta man Dibata saja.

            Harus siinget kita ersembah man Dibata erkiteken nggo iselamatkenNa kita. Emaka bentuk kita ersembah eme muji ras ngataken bujur man Tuhan.  Bagepe ersembah man Tuhan ibas kebaktin harus siikuti awal nari seh dung (votum seh pasu-pasu). Perlu siteh rangkaian ibadah, ntah pe unsur-unsur ibadah merupaken sada kesatuan yang utuh. Jadi, la lit bas kita, inti ibadah eme khotbah. Adi siikuti awal nari seh dung malem ateta, sebab : sipemena : sihamati Tuhanta. Sipeduakan : kita banci ngaloken pasu-pasu idur Dibata nari.

Pdt. Steven Kumenit, S.Th.M.Min.

-->