Keluarga GBKP Eme Bagin Ibas Bangsa Ras Negara (Mazmur 127:1; Yeremia 29:7)

PEKAN KELUARGA

GEREJA GBKP

WARI VII. SABTU 7 JUNI 2014.

Introitus   :    Ola aloken uang sogok, sabab uang sogok erbahanca kalak lanai ngidah si benar, janah perkara kalak si la ersalah ibalikken (Keluaran 23:8).

Ogen        :    Matius 5:13-16.

Khotbah   :    Mazmur 127:1; Yeremia 29:7

Tema        :    Keluarga GBKP Eme Bagin Ibas Bangsa Ras Negara.

LATAR BELAKANG

A.    Mazmur 127 : 1.

1. Mazmur enda eme Mazmur Ziarah. Siimaksudken mazmur Ziarah eme sada ende-enden siiendeken bangsa Israel paksa ia reh ku Yerusalem guna ersembah man Tuhan. Sebab man bangsa Israel lit perayaan-perayaan agama eme Paskah, rsd. Kerina bangsa Israel harus reh ku Yerusalem guna ersembah man Tuhan i Rumah Pertoton.
2.  Mazmur enda (Bahan khotbahta) eme ncidahken kerna  kuasa Tuhan. Ibas Tuhan bangsa Israel ndat gegeh ras perlindungen, bagepe palas keselamaten eme Tuhan. emaka ula ernalem man pemeteh ras gegeh manusia. Pemazmur  ende-enden Ziarah enda mereken sada pengangkan man bangsa Israel gelah ibas mbangun rumah tangga harus erpalasken Tuhan, emaka megegeh keluarga e. Keluarga nggeluh ibas keharmonisan. Bagepe nggeluh ibas sada kota tentuna siibutuhken masyarakat eme keamanan ras kedamen. Erkiteken sie me ibaa mbangun kota Yerusalem lit tembok Yerusalem ras pengawal sierjaga-jaga, gelah aman ibas musuh nari. Tapi enda kerina la bias. Keamanan eme sada pemere Tuhan man bangsa Israel. Sebab ugapa pe gegehna musuh e, tetap talu adi ras Tuhan. Emaka bangsa Israel harus nggeluh ernalem man Tuhan ngenca.

B.     YEREMIA 29:7.

1. Erkiteken bangsa Israel enggo nggeluh erbana-bana, maka ihukum Tuhan me ia. Iambengken Tuhan bangsa Israel i Babel.Tujun penghukumen Tuhan enda gelah bangsa Israel banci jera ras mulih ku Tuhan. Jadi lit proses pengajaren ras pengelayasi. Tapi tujun penghukumen enda la iangka bangsa Israel. Emaka ibas penghukumen e, si lit eme jungut-jungut, nembeh ate ras merawa, seh pe bangsa Israel sangsi kerna kehadiran Tuhan. Alu kata sideban, akap bangsa Israel Tuhan lanai lit, Tuhan lanai erkuasa ibas kerajaan Babel, Dibata kalak Babel ngenca sierkuasa i je.
2. Gelah ndatken pembebasen maka siilakoken bangsa Israel eme pemberontaken man kerajaan Babel. Ibas situasi bagenda, tentuna sirugi eme bangsa Israel, sebab kerajaan babel ngidah bangsa Israel enda eme bangsa pemberontak, alu bage kegeluhen bangsa Israel la terjamin ibas kerajaan babel.
3. Ibas situasi sibagenda reh surat Yeremia man kerina peminpin, tua-tua bangsa Israel ras man kerina bangsa Israel, ngatakenca lit paksana bangsa Israel ibebasken Tuhan, emaka siharus ilakoken bangsa Israel i tengah-tengah kerajaan Babel eme nggeluh bagi biasana, ula lit pemberontaken ras upaya mbebasken diri ibas kerajaan babel nari. Uga bangsa Israel nggeluh i Israel, bage me siharus ilakoken bangsa Israel ibas kerajaan Babel. Bagepe bangsa Israel harus notoken kerajaan babel, gelah adi sikap kerajaan Babel, maka bangsa Israel ikut sikap. Jadi bangsa Israel harus ndalani wari-wari ibas kerajaan babel alu meriah ukur ras tetap berintropeksi diri. Gelah ibas paksana, Tuhan simbaba mulih bangsa Israel ku Israel. 

APLIKASI

            Kita selaku anggota gereja, la banci terpisahken ibas masyarakat Indonesia, sebab kita enda masyarakat bangsa Indonesia. Tentuna ateta selaku masyarakat, kita banci nggeluh dame. Gelah kita banci nggeluh dame maka siharus lit bas kita eme keterlibatan aktifta ibas bangsanta enda, alu nggeluh bujur ras mehuli. Bagepe harus sitotoken bangsanta enda gelah kerina elemen si lit ibas bangsa Indonesia ngelakoken ntah pe mpraktekken nggeluh bujur. Jadi masyarakat, bagepe peminpin bangsa la banci ngaloken sogok ntah KKN. Sebab enda sierbahanca bangsa Indonesia nggeluh ibas perbeben ras kiniseran.

            Nggeluh bujur ras adil tentuna lit bas Tuhan ngenca. Emaka kita selaku kalak kristen harus ernalem man Tuhan ras pindo kepentaren man baNa, gelah kita ngasup ndalanken kebujuren ras terlibat aktif ibas pembangunan i tengah-tengah bangsanta. Kita harus jadi sira ras terang i sekelwetta. Alu bage kehadirenta i tengah-tengah masyarakat lit manfaatna, ernanam man kalak sideban, emaka kalak sideban pe lanai nggit mpraktekken kegeluhen si la bujur. Ibas perbahanen sibage maka nggeluh bangsa Indonesia jadi sikap.

Pdt. Steven Kumenit, STh.M.Min.

Tanggungjawab GBKP Ibas Kategorial Ras Unit-Unit Pelayan GBKP ( Efesus 4:11-16)

PEKAN KELUARGA

GEREJA GBKP

WARI VI, JUMAT 6 JUNI 2014

Introitus   :    Nehken tanggunjawabndu selaku kalak sitek, nehken keleng ate dingen nggeluh alu dame raduken kalak situtus mindo penampat man Tuhan (2 Timotius 22:22b).

Ogen        :    Pilipi 2:1-4

Khotbah   :    Epesus 4:11-16.

Tema        :    Tanggungjawab GBKP Ibas Kategorial Ras Unit-Unit Pelayan GBKP.

LATAR BELAKANG

1.      Bahan khotbahnta sekali enda eme kata persinget Rasul Paulus man perpulungen i Epesus. Kata persinget enda isuratkenna ibas penjara nari.

2.      Perpulungen Epesus amin gia nggo nggeluh ibas keselamaten ras nggeluh ibas persadan ras Kristus tapi lenga seh ku tingkat kedewasaan Kristus siserta. Emaka banci denga perpulungen nggeluh ibas meganjang ukur, pergelut, la lit kekelengen, rsd. Bagepe kurang penandai perpulungen kerna Anak Dibata. Emaka situhuna ibas gereja, kerina anggota perpulungen harus nggeluh ibas pertobaten ras perubahen nggeluh tep-tep wari.

3.      Ibas rangka pertumbuhen kiniteken, maka ibas perkuah ate Tuhan, iberekenNa i tengah-tengah peerpulungen erbage-bage pemere eme lit deba jadi rasul, deba jadi nabi, lit deba perberita simehuli, lit deba jadi permakan perpulungen ras guru-guru. Pemere Kristus enda ertujun mperlengkapi perpulungen ibas kata Dibata. Alu bage kerina anggota perpulungen banci ngelai. Sebab kerina kalak kristen idilo ibas persadan (gereja) harus terlibat aktif  ngelai i tengah-tengah perpulungen arah kengasupen si lit bas kita.

4.      Lit 5 jabatan siitempatken Tuhan i tengah-tengah perpulungen gelah perpulungen erdewasana nggeluh ibas persadan eme 1) Rasul : Kalak singidah  secara langsung Yesus Kristus ras megi kai siikataken Yesus. Ibas sejarah keselamaten, lit sepuluh telu rasul ngenca. 2). Nabi : Fungsi nabi eme ndatken pengenehen ras peseh pengenehen e man anggota perpulungen. Bagipe jadi pengantara antara Tuhan ras perpulungen. 3). Perberita Simehuli : Nehken Kata Dibata man anggota perpulungen sue ras sura-sura Tuhan. 4). Permakan : Ngkepken anggota perpulungen, gelah anggota perpulungen tetap nggeluh ibas persadan ras Yesus Kristus. Bagepe adi jumpa perbeben ras kiniseran, anggota perpulungen la mbiar sebab lit permakan situhu-tuhu sibanci nampati ia. 5). Guru : Tugas guru eme ngajari anggota perpulungen kerna kata Dibata, gelah anggota perpulungen ndatken kepetaren guna ndalankenca.

5.      Ibas pertumbuhen kiniteken maka anggota perpulungen la nai banci ijola-joleken ibas erbage-bage pengajaren sipapak si  lit ibas doni enda, tapi tuhu-tuhu anggota perpulungen nandai Yesus Kristus selaku Anak Dibata, sireh ku tengah-tengah doni enda guna nelamatken kerina manusia si tek man baNa. Bagepe Ibas Yesus, kalak Kristen nggeluh ibas kebenaren. Ibas kedewasaan kiniteken tuhu-tuhu anggota perpulungen ibentengi Kesah Si Badia ras lit kepentaren man perpulungen, emaka perpulungen tuhu-tuhu ngelakoken kai simehuli singena ate Tuhan ibas kegeluhenna tep-tep wari.

APLIKASI

            Ibas gereja GBKP lit Kategorial (Moria, Mamre, Permata ras KA-KR), bage lit unit-unit pelayanan. Kerina enda ibentuk gereja gelah terlayani anggota perpulungen. Emaka pelayanen siisehken gereja lit secara umum, umur ras gender.

            Kategorial ras unit-unit pelayanan la banci erdalam sisada-sisada, tapi harus ndalanken misi gereja, khusus GBKP. Bagepe pelayanan si nggo jadi visi ras misi gereja GBKP. Jadi pelayanan i tengah-tengah gereja harus terintegrasi ras bersinergi. Erkiteken sie me gereja GBKP nggo merumusken pelayanan siharus idalanken, subuk pelayan sada tahun ras lima tahun. Bagepe lit rapat kordinasi siibahan gereja, subuk tingkat runggun, klasis bagepe sinodal (Moderamen). Bagepe ibas rangka pelayanan kategorial ras unit-unit i tengah-tengah, maka lit subsidi keuangan sue ras program pelayanan.

Pdt. Steven Kumenit, STh.M.Min.

Tanggungjawab Kalak Sitek Nandangi Gereja Tuhan (Ibrani 13:16-21)

PEKAN KELUARGA

GEREJA GBKP

WARI V. KAMIS 5 JUNI 2014.

Introitus   :    Gelah kula e la erbelah-belah, tapi sada-sadai ringring e radu seri mperdiateken ringring sideban (1 Korinti 12:25).

Ogen        :    1 Korinti 16:1-4.

Khotbah   :    Heber 13:16-21.

Tema        :    Tanggungjawab Kalak Sitek Nandangi Gereja Tuhan.

LATAR BELAKANG

1.      Secara umum kitab Heber enda khusus itujuken man kalak Yahudi singgo tek man Yesus Kristus, janah singana ndatken perbeben ras kiniseran. Perbeben ras kiniseran e erbahanca kiniteken kalak kristen nggo mulai kendor. Janah salah sada sebab kalak kristen ndatken kiniseran eme ibas pemerintah nari. Erkiteken sie me penulis mereken sada pergegeh man kalak kristen alu tetap ncikep Yesus Kristus selaku Tuhan ras ula kiniteken. Tapi secara khusus penulis mpersingeti gelah kalak kristen harus tetap nggeluh ibas keleng ate ras kepatuhen, subuk man Tuhan bagepe man pemimpin.

2.      Penulis mereken kata persinget man kalak kristen gelah mpraktekken kekelengen ibas kegeluh tep-tep wari, sebab nehken kekelengen bali kap ras nehken persembahen man Tuhan. Alu kata sideban ate penulis mereken sada pengertin man kerina kalak kristen kerna erti ibadah ras nehken kurban persebahen. Bagi penulis ibadah eme kegeluhen tep-tep wari (band. Roma 12:1), tapi nehken kekelengen ras mereken penampat eme sada bentuk mereken kurban persembahen. Sengaja penulis ngataken kerna kurban persembahen, sebab man kalak Yahudi nehken persembahen eme sada kewajiban siharus ilakokenna. Bagepe lit ulihna ibas nehken persembahen eme pasu-pasu Tuhan.

3.      Kiniteken banci ertumbuh erkiteken lit peminpin i tengah-tengah perpulungen, sebab tugas peminpin eme ngepkep perpulungen. Janah iajarina kerna kata Dibata man perpulungen, janah enda idalanken alu meriah ukur, emaka kewajiban anggota perpulungen eme patuh nandangi peminpin. Jadi ibas litna kepatuhen anggota perpulungen man peminpin maka lit dua aspek sijadi eme kiniteken anggota perpulungen erdewasana, bagepe peminpin perpulungen ndahikenna alu tutus ras meriah ukur. Tapi adi anggota perpulungen la lit kepatuhen man peminpin, maka sada kerugin man anggota perpulungen. Anggota perpulungen banci ijola-joleken erbage-bage pengajaren sipapak, bagepe adi jumpa perbeben ras kiniseran, anggota perpulungen banci ndabuh kubas dosa.

4.       Bagepe kewajiban anggota perpulungen eme notoken Penulis, gelah penulis lit ibas sehat-sehat, emaka banci penulis reh ndahi perpulungen. Enda sada harapen penulis nandangi perpulungenna. Tujun gelah penulis banci reh mulihi i tengah-tengah perpulungen, la saja erkiteken tedeh ate, tapi gelah penulis banci ngajari anggota perpulungen erbagesna kerna Kata Dibata, emaka kiniteken anggota perpulungen tetap ras paguh.

5.      Penulis ndungi   kata persingetna alu pasu-pasu ibas Tuhan nari. Tujun pasu-pasu e gelah Tuhan erdahin i tengah-tengah anggota perpulungen, gelah anggota perpulungen nggeluh ibas kedamen ras ngelakoken kerna kai simehuli singena ate Tuhan. Enda banci ilakoken adi anggota perpulungen nggeluh ibas kepentaren. Janah anggota perpulungen banci ndalanken simehuli singena ate Tuhan adi isampati Tuhan. Tuhan sierdahin man perpulungen e. Emaka erkiteken simehuli ras  singena ate Tuhan siilakoken anggota perpulungen kedungenna Tuhan termulia seh rasa lalap.

APLIKASI

            Gereja banci erkembang adi anggota perpulungen aktif ibas gereja. Erkiteken sie rusur ipersingeti gereja gelah lit min keterlibatan anggota gereja ibas erbage-bage kegiaten gereja. Bagepe harus isadari anggota perpulungen, selaku anggota gereja lit tanggungjawabta guna kemajun ras pelayanan itengah-tengah gereja. Tanggungjawabta lit ibas telu  bentuk eme sipemena selaku anggota gereja kita harus njaga persadan ras kiniersadan gereja, alu bage kita jadi gereja simegegeh si la banci icedai erbage-bage pengajaren sipapak. Bagepe selaku gereja simegegeh maka kita nggeluh ibas kekelengen ras sisampat-sampaten. Sipeduaken : kita harus naggung tangungenta. Janah enda nggo siakuken paksa kita ingawanken ibas gereja. Sebab perlu siteh pelayanen-pelayanen gereja selain harus isampati arah pertoton, tapi pe arah dana, emaka anggota perpulungen nggo min meteh kerna sie. Alu bage nggo lit dana sirusur isikapken guna pelayanen gereja. Sebab ibas kita ngelakoken si bage maka teridah man banta kerna kedewasaan kinitekenta. Sipeteluken : anggota perpulungen harus notoken serayan Tuhan singelai ibas perpulungen, gelah serayan Tuhan ngelai alu meriah ukur ras tetap ukur.

Pdt. Steven Kumenit, STh.M.Min

Keluarga Sierkoinonia, Erdiakonia ras ermarturia (Mazmur 112:1-6)

PEKAN KELUARGA

GEREJA GBKP 

WARI IV, RABU 4 JUNI 2014.

Introitus   :    Kenca tiap pesta enggo dung, lampas erpagi-pagi keke Jop, jenari ipersembahkenna persembahen tutungen guna pebadiaken anakna e sekalak-sekalak. Si e ilakokenna sebab rukur ia, banci jadi anakna e nggo erbahan dosa si la teridah, janah erkiteken si e ceda ukur Dibata alu la iarapna (Jop 1:5).

Ogen        :    Kolose 3: 12-17.

Khotbah   :    Mazmur 112:1-6.

Tema        :    Keluarga Sierkoinonia, Erdiakonia ras ermarturia.

LATAR BELAKANG

1.      Bangsa Israel eme bangsa singgeluh ibas ikaten-ikaten perpadanan ras Tuhan. Ibas ikaten perpadanan e,  i je ikataken, adi bangsa Israel patuh man Tuhan ras ndalanken kataNa ibas kegeluhen tep-tep wari, maka bangsa Israel ndatken pasu-pasu ibas Tuhan nari. Janah erbage-bage pasu-pasu sierbereken Tuhan, banci umur gedang, erta, kemalemen ate ras perlindungen Tuhan.

2.      Bahan khotbanta sekali enda eme ncidahken uga malemna bangsa simbiar ras ndalanken perintahNa sebab kegeluhenna ipasu-pasu Tuhan. Enda ikataken Pemazmur, sebab iidah ras igajepken pemazmur kerna keleng ate Tuhan e tetap. Bagepe iidah pemazmur manusia bali kap ras batang kayu siturah itepi lau sitetap nggeluh ras erbuah ibas paksana (band. Mazmur 1:3)

3.      Ibas bangsa Tuhan mbiar ras ndalanken peintah Tuhan, la saja ndatken erta tapi pe bangsa Tuhan nggeluh ibas kinipangen nggeluh. Bangsa Tuhan la mbiar jumpa musuh, sebab lit Tuhan tetap nampati bangsaNa. Sebab ibas pengalaman pemazmur, idahna la lit kuasa ibas doni enda sibanci naluken kuasa Tuhan.

4.      Ibas bangsa Tuhan mbiar ras ndalanken perintah-perintahna maka lit bas bangsa Tuhan kepentaren. Kepentaren enda mbaba bangsa Tuhan erdiate ras nampati  kalak sideban simbutuhken penampat. Sebab man bangsa Tuhan, la akapna meriah adi lit kalak si nggeluh ibas perbeben ras kiniseran, emaka iberekenna penampat man kalak simbutuhken penampat, labo erkiteken keterpaksaan, tapi ilakokenna erpalasken meriah ukur. Sebab kalak si mbiar man Tuhan, la saja ikelengina Tuhan tapi pe ikelengina kalak sideban bagi dirina jine. Memang ibas kegeluhen bangsa Israel soal nampati man kalak musil harus idalankenken sebab enda perintah Tuhan

5.      Pemazmur ngataken enda, gelah bangsa Israel tetap termotivasi nggeluh mbiar man Tuhan. Sebab inti nggeluh ibas kemalemen ate ras keriahen eme nggeluh mbiar ras ndalanken perintahNa.

APLIKASI

            Nggeluh ibas kemalemen ate ras keriahen eme sada sura-sura kerina jelma. Tapi mekatep salah kita ndatkenca. Memang ibas doni enda melala tawaran-tawaran guna ndatken kemalemen ate ras keriahen. Tapi selaku kalak kristen harus siteh kemalemen ate ras keriahen situhu-tuhu lit man Dibata ngenca. Emaka guna ndatken kemalemen ate ras keriahen situhu-tuhu e harus kita mbiar man Tuhan ras ndalanken perintah-perintahNa. Erkiteken sie me ibas perintah Tuhan salah sada i je ikataken kelengilah Tuhan Dibatandu asa ukur, tendi ras gegehndu. Bagepe ngkelengilah manusia, bagi kam ngkelengi dirindu jine (band. Ulangan 6:5; Matius 22:37-40).

            Ngkelengi Tuhan ras manusia harus teridah ibas telu aspek (tri tugas gereja). Janah enda la saja program grereja secara konstitusi siharus idalanken, tapi pe man banta kerina kita kalak kristen. Janah ibas dalanken enda harus alu ukur meriah.

            Mbiar man Tuhan alu bulat ukur mbaba kita nggeluh ibas ndalanken perintah-perintah Tuhan, khususna tri tugas gereja (Koinonia, Diakonia ras Merturia). Emaka lit bas pusuhta erburak-burak ndalanken perintah Tuhan. Emaka kai pe kesibukenta, ateta tetap reh ku perpulungen sebab ibas kita ersembah man Tuhan lit i je perjumpan kita ras Tuhan, bagepe  banci berkomunikasi ras Tuhan, bagepe ras sapih-sapihta manusia. Bagepe tentuna la meriah ukurta adi lit temanta manusia silit ibas perbeben, emaka terdilo kita guna nampatisa. Bagepe adi lit temanta si erceda ate, reh kita ngapulisa. Sebab enda salah sada ujung tombak gereja nehken pelayanan man anggotana. Bagepe kita harus muat bagin ibas ermarturia. Apai ka genduari lit program-program gereja kerna kerjasama antar runggun, enta pe er-PI ibas ingan-ingan tertentu. Mari ibas pusuh siersuruh nggit kita muat bagin ikut ibas pelayanan er-PI. Alu bage la saja kita ndatken kemalemen ate, tapi kalak sideban pe nggeluh ibas kemalemen ate.

Pdt. Steven Kumenit, STh.M.Min.