Erlajar Segedang Geluh (Kuan-Kuanen 15:31-33).

BAHAN PJJ GEREJA GBKP

TANGGAL 29 JUNI – 5 JULI 2014.

Kuan – Kuanen 15: 31 – 33.

Tema : Erlajar Segedang Geluh.

LATAR BELAKANG

1.      Salah sada tujun  ibas kitab Kuan-Kuanen enda eme pendidikan, janah pendidiken enda mabai anak  ibas kepentaren. Emaka gelah anak ndatken kepentaren, maka anak harus erlajar, janah erlajar enda idat ibas sekolah formal ras non formal. Siimaksudken sekolah non formal eme arah megiken kai siikataken guru ntah pe orang tua, bagepe arah kalak sideban,  jenari ngelakokenca ibas kegeluhen sitep-tep wari. Adi enda idalanken maka anak la saja nggeluh ibas kepentaren, tapi pe nggeluh ibas pemasu-masun Tuhan (nen = berhasil ibas kegeluhen).

2.      La biar man Tuhan bena-benana kebodohon, emaka la saja kegeluhen kalak bodoh ndauh ibas pasu-pasu Tuhan ntah keberhasilan nggeluh ndauh ibas ia nari, tapi pe kegeluhenna ibas doni enda la iergai kalak, la ihamati kalak. Enda me siharus ipadauh anak ibas kegeluhenna i tengah-tengah masyarakat. Emaka gelah ndatken kehamatan ras ngena ate kalak, maka anak harus  nggeluh ibas mbiar man Tuhan ras harus megiken didikan ras dalanken ajar e ibas kegeluhen tep-tep wari.

3.      Ibasoratenta, lit piga-piga hal siicidahken gelah anak nggeluh ibas kepentaren ras ihamati kalak eme 1). Megiken ajar, sebab ibas anak megiken ajar arah guru ntah pe orang tua  anak e ididik kerna simehuli, sebab guru ntah pe orang tua la saja mereken sada pendidikan tapi memang ia lebih pengalaman asangken anak e. 2). Nggit ipandang.  Kegeluhen manusia, mekatep ngelakoen si la mehuli, emaka enda mabai anak ibas kebodohan ras kejahatan. Adi anak nggo nggeluh ibas kebodohan ras kejatan maka la ngena ate Tuhan man anak e. Erkiteken sie selaku anak harus megiken teguran kalak, gelah anak pe banci sadar maka kai siilakokenna e salah, bagepe sadar anak e kegeluhen singena ate Tuhan eme ngelakoken sibujur ras singena ate Tuhan. 3).  Nggeluh ibas erkemalangan man Tuhan e kap palas persekolahan. Gelah anak jadi pentar maka anak e harus erkemalangan man Tuhan. Sebab ibas anak erkemalangan man Tuhan berarti Tuhan saja jadi Tuhanna ras man Tuhan saja ia patuh. Erkiteken sie la atena sirang ras Tuhan, maka gelah tetap nggeluh ras Tuhan, anak harus nggeluh ibas kebujuren ras ngena ate Tuhan. Gelah anak nggeluh ras Tuhan maka si la mehuli silit i tengah-tengah masyarakat la banci ilakokenna ntah pe ipraktekkenna. Emaka pendidikan cukup penting ibas anak e. Sebab adi pentar anak e, tehna kerna simehuli ras si la mehuli, janah idalankenna si mehuli ibas kegeluhenna tep-tep wari. 4). Ukur meteruk palas ndatken kehamatan. Salah sada sierbahanca manusia nggeluh ibas keriahen ras kemalemen ate eme adi manusia iergai ras ihamati kalak. Gelah ihamati kalak, maka anak harus meteruk ukur, sebab ibas meteruk ukur berarti begikenna ajar orang tua ntah pe guru ras adi ipandang kalak ia, ialokenna alu meriah ukur, sebab guna kiniulinna, bagepe kalak sideban akapna temanna.

4.      Pendidikan la banci ibaikan anak, sebab pendidikan e mbelin gunana. Emaka anak adi atena ipasu-pasu Tuhan  ibas kegeluhenna tep-tep wari maka anak harus ngkelengi pendidikan ras erkemalangan man Tuhan.

5.      Pendidikan ntah pe erlajar berarti nggit mperobahi kegeluhen gelah erdewasana nggeluh ras pentar nggeluh i tengah-tengah masyarakat.     

APLIKASI

            Erlajar la saja njakiteken kita pentar tapi pe mbentuk karakterta ku simehuli, bagepe njadiken  kita mbeluh  rukur. La saja e, tapi adi kita erlajar maka lit perubahan kegeluhen ibas dirinta, keluarga ras bangsa. Jadi erkiteken nggo pentar kita, maka lit dampakna ibas masyarakat isekelewetta. Emaka erlajar enda, la saja ikhususken man anak, tapi pe man orang tua. Jadi pendidikan la mengenal usia ras waktu. Jadi kita harus tetap tetap erlajar.   

            Pemetehta la lit gunana adi la sipake ibas kegeluhenta, emaka fungsi kita erlajar eme gelah kai sialoken ibas pendidikan e, banci ipraktekken ibas kegeluhenta tep-tep wari.

            Bena-benana kepentaren eme mbiar ras erkemalangan man Tuhan (band. Kuan-kuanen 1:7).  Jadi ibas ateta ndatken pemeteh maka la banci lang kita harus erkemalangan lebe man Tuhan, sebab ibas kita erkemalangan man Tuhan, ipasu-pasu Tuhan me kita, emaka kepentarenta sigejapken ibas Tuhan nari, emaka meteruk ukurta.

Pdt. Steven Kumenit, STh.M.Min.

Bukalah Perukurenndu (Berwawasan Luas). - Amsal 8:1-12.

SERMON PJJ GBKP RUNGGUN KAMPUNG SUSUK

TANGGAL 22 – 28 JUNI 2014

Kuan- Kuanen 8: 1- 12.

Tema : Bukalah Perukurenndu (Berwawasan Luas).

LATAR BELAKANG

1.      Adi ngertiken kerna kepentaren, situhuna kepentaren e la bo siberwujud ntah jelma, tapi ibas bahan oratenta sekali enda ncidahken maka kepentaren e iumpamaken sebage jelma, emaka banci ia ngerana ras erlebuh.

2.      Kepentaren merupaken sada hal sipenting ibas kegeluhen bangsa Israel, sebab kepentaren ibas Dibata nari. Erkiteken sie me raja Salomo paksa Dibata ngataken man bana pindolah kai siatendu Kubereken man bandu. Siipindoken raja Salomo eme kepentaren. Janah adi sinen fungsi kepentaren eme gelah dat hasil simehuli, bagepe menyusun sada rencana simehuli gelah ndatken hasil siisura-surakenna. Erkiteken sie me ingan kepentaren ibas pusuh, sebab i je nari simehuli janah idalanken ibas kegeluhen tep-tep wari. Jadi kepentaren mpereh simehuli ras guna kiniulin sendiri ras jelma sinterem, sebab i je lit kemalemen ate ras kedamen. Emaka ise singgeluh ibas kepentaren ras ndalanken kepentaren e, man bana nggeluh ibas keriahen ras kemalemen ate.

3.      Gelah tuhu-tuhu lit kedamen ras keadilen i tengah-tengah bangsa Israel maka bangsa Israel nggeluh ibas kepentaren, erkiteken sie me kepentaren erlebuh ibas ingan-ingan sipenting ibas bangsa Israel, ingan erbahan sada keputusen guna ngadili sada-sada perkara. Ikataken  i jenda kepentaren  erlebuh ras pemeteh erdilo i datas uruk i tepi dalan, ertina  sada ingan selain ingan majekken rumah pertoton, tapi sada ingan gelah ibas ingan simeganjang kalak banci megi kai siikataken kepentaren. Bagepe ibas serpang-serpang dalan. Sebab ibas serpang-serpang dalan ingan transaksi barang, emaka ate kepantaren, ibas bertransaksi kebenaren ras  kebujuren  irealisasiken. Bagepe kepentaren erlebu ras pemeteh erdilo ibas pintu gerbang kota, sebab ibas pintu gerbang kota ingan erbahan sada-sada keputusen.

4.      Kepentaren la saja erlebuh ras pemeteh erdilo man masyarakat sierpemeteh (pedagang ras pengadilan) tapi man kalak lenge, gelah kalak lenge ndatken kepentaren. Emaka man kalak lenge harus erlajar ndatken kepentaren. Uga carana gelah kalak lenge ndatken kepentaren ? Lit piga-piga hal  gelah ndatken kepentaren eme arah  megiken kai siiajarken guru ras silebih tua,  ntah pe silebih perpengalaman asangken kita. Bagepe erlajar ibas kegeluhen sitep-tep wari, alu ngenen simehuli, sibujur ras adil, rsd.

5.      Gelah nggeluh ibas kepentaren maka sipentingna eme begiken ras nggeluh ibas kepentaren e sendiri, jenari ergaken kepentaren e lebihen asangken kai si lit ibas doni enda. Adi enda idalanken maka keputusen simehuli, nggeluh ibas kebujuren,  jadi kalak pentar bagepe mpraktekken simehuli ras erlagu langkah simehuli jadi sikerajangenta. Jadi adi kepentaren lit bas manusia, maka si lit bas manusia eme ciga atena kerna si la mehuli ras sijahat. Tapi guna ndatken kerina enda bangsa Israel harus nggeluh ibas erkemalangen man Tuhan. Sebab bena-benana kepentaren eme mbiar ras erkemalangen man Tuhan (Kuan-Kuanen 1:7).

APLIKASI      

      Lit sada perbedaan kalak sipintar (band. Pandai) ras kalak siberwawasan luas. Kalak pintar eme kalak situhu-tuhu ngkuasai salah sada ntah lebih disiplin ilmu (secara akademis), tapi kalak siberwawasan luas eme tehna perkembangan ras situasi siterjadi ibas doni enda ras ikuasaina, bagepe tehna jalan keluar siharus ilakokenna. Jadi kalak pintar lenga tentu ia berwawasan luas, tapi kalak siberwawasan luas, ia igogolongkan kalak pintar.

      Kalak siberwawasan luas la gampang terpengaruh  ibas hal-hal si la mehuli, sebab tehna dampakna, bagepe kalak siberwawasan luas ras mbiar man Tuhan nggit ia mbangun hubungan harmonis, ras mereken masuken-masuken sipotif ibas pelayanan gereja, bagepe kegeluhen nggeluh alu meteruk ukur, sebab tehna kepentaren sibas ia rehna ibas Dibata nari. Jadi kalak siberwawasan luas simbiar man Tuhan lit ibas positif  thingking. Enda me siniharapken lit bas kita. Persoalenna uga carana gelah kita banci nggeluh ibas kepentaren/berwawasan luas. Kita banci nggeluh ibas kepentaren, adi nggit kita ngoge, megi kerna simehuli ras berita-berita, bagepe nggit kita erlajar.

Pdt. Steven Kumenit, STh.M.Min.

Nggeluh I Tengan Jelma Sinterem (Yeremia 7: 1-7)

BAHAN PJJ GEREJA  GBKP

TANGGAL 15 – 21 JUNI 2014

Yeremia 7:1 – 7.

Tema : Nggeluh I Tengan Jelma Sinterem.

LATAR BELAKANG

1.      Nggeluh bangsa Israel, nggeluh ibas ikaten perpadanen. Isi ikaten perpadanen eme bangsa Israel ersembah man sada Dibata saja eme eme Dibata sinjadiken manusia, doni enda ras kerina isina, maka bangsa Israel ipasu-pasu Tuhan. Ikaten perpadanen enda tetap seh rasa lalap.  Erkiteken sie me ope ras enggo bengket bangsa Israel  ku bas tanah Kanaan, lalap ipersingeti Tuhan ia, gelah ula ersembah man dibata-dibata sideban ras ngelakoken sila bujur, gelah bangsa Israel banci nggeluh dame ras mejuah-juah. Tapi sijadi bangsa Israel lanai patuh man Tuhan. Bangsa Israel nggo nggeluh alu erbana-bana, bangsa Israel nggo ersembah man dibata-dibata sideban ras erbahan si la mehuli ras si la bujur. Konsekwensina eme bangsa Israel nggeluh alu la teneng ras la ndatken  kedamen, bagepe nggeluh ibas kearun ate. Sebab i jah – i je lit penindasan, bagepe bangsa Israel nandangi iserang bangsa   Mesir. Kenca bangsa Mesir maka bangsa Israel iserang bangsa Babel.

2.      Ibas bangsa Israel nggeluh alu erbana-bana. Isuruh Tuhan me nabi Yeremia guna mpeseh kataNa. Secara umum nubuat nabi Yeremia eme ngataken penghukuman Tuhan man bangsa Israel, tapi adi bangsa Israel nggit jera, maka ukumen e la surung isehken Tuhan man bangsa Israel.

3.       Keadaan bangsa Israel si la teneng ras  la dame e, mbaba sada pengangkan sisalah man bangsa Israel kerna rumah pertoton, Tuhu rumah pertoton ingan Dibata, maka tentuna i je lit rasa aman, sebab Tuhan sinjagai ia kerina. Tuhu Rumah pertoton jadi ingan penalemen bangsa Israel. Tapi enda kerina ialoken ras inanami bangsa Israel adi bangsa Israel tuhu-tuhu mbiar ras ernalem man Tuhan saja. Erkiteken sie me isuruh Tuhan nabi Yeremia gelah berkhotbah i pintu gerbang rumah Pertoton. Isi khotbah Yeremia eme 1). Maka ola iteki bangsa Israel kerna lit singatakenca, enda rumah pertoton kap. Ertina adi bangsa Israel bengket ku bas Rumah Pertoton maka bangsa Israel aman ibas serangan musuh-musuh nari, sebab Tuhan pasti njaga ras nampati ia. Padahal la bage. Keaman enda banci sia-sia adi bangsa Israel la ncidahken nggeluh mbiar ras ernalem man Tuhan 2). Bangsa Israel harus jera ibas dosa-dosana. Ula nai lit penindasan man kalak asing, anak melumang ras diberu balu-balu. Kalak asing, anak melumang ras diberu balu-balu harus ilindungi ras harus isampati, sebab enda sada perintah Tuhan (nen = Kel. 22:21-22; Ul. 10:18-19; 24:17). 3). Adi jera bangsa Israel ibas dosa, maka bangsa Israel tetap ringan I tanah kanaan singgo iiani bangsa israel sedekah enda.

4.      Rumah  Pertoton eme ingan Dibata, emaka ise si reh ku rumah pertoton ndatken ketenangen ras kedamen, sebab ipasu-pasu Tuhan ia. Tapi enda   ibere Tuhan man kalak si patuh ras ndalanken perintah-perintahna, bagepe kalak singgite jera (band. Mazmur 24:3-5;  84:11). Ibas erti kata la ngena ate Tuhan kerna si jahat, emaka amin gia reh bangsa Israel ku rumah pertoton tapi la ia jera, maka rumah pertoton e labo jadi ingan sitenang ras aman, sebab ipediat Tuhan ia. Bagepe rumah pertoton banci iserang musuh ras ikernepken. Enda me sijadi i Silo. Silo enda eme ingan sitangtangna bangsa Israel ersembah. Erkiteken bangsa Israel la patuh maka itadingken Tuhan rumahNa i Silo (nen =  yeremia 7:12; Mazmur 78:60).

5.      Kebobrokan kiniteken ras moral sijadi i tengah-tengah bangsa Israel, la bo mabai Yeremia ikut ibas perbahanen-perbahanen sijahat, tapi sebalikna ciga atena sijahat, emaka alo sora kenabianna, ngerana Yeremia gelah bangsa Israel jera. Erkiteken sie me adi sioge terdauhen maka Yeremia imusuhi kalak, bagepe ate kalak jahat gelah Yeremia enda ibunuh saja.

APLIKASI

            Kita  nggeluh i tengah-tengah jelma sinterem, nggeluh ibas masyarakat simajemuk. Tentuna siidah nge kerna erbage-bage kegeluhen ras perbahanen si lit i je. Lit si mehuli ras la mehuli. Tapi sijadi tantangan man banta eme kerna kegeluhen si la mehuli. Janah kita idilo Tuhan guna mpeseh kerna sura-sura Tuhan eme keselamaten.

            Selaku kalak sierkiniteken kita harus nggeluh sue ras sura-sura Tuhan I tengah-tengah doni enda. Kita la banci terkontaminasi ku bas perbahanen si la mehuli. Tapi kita harus jadi sira ras terang ibas doni enda. Jadi lit tanggungjawabta man doni enda eme merobah si la mehuli jadi mehuli. Memang teridah tempa-tempa mesera, tapi harus sicidahken man jelma sinterem kerna kegeluhenta siberbeda ras perbahanen doni. Jadi ula kita ngadi erbahan simehuli ras singena ate Tuhan. La bo dalih imusuhi kalak kita erkiteken perbahanen simehuli siilakoken kita, sebab kemalemen ate tetap jadi sikerajangenta (band. Matius 5:9-11). Jadi kita harus jadi agen perubahan I tengah-tengah jelma sinterem.

Pdt. Steven Kumenit, STh.M.Min.

Pepayo Ras Tandailah Aku (Mazmur 139:13-24)

BAHAN PJJ GEREJA GBKP

TANGGAL 8 – 14 JUNI 2014.

Mazmur 139 :13-24.

Tema : Pepayo Ras Tandailah Aku

LATAR BELAKANG

1.      Mazmur Daud enda sipatna pertoton. Daud ertoto man Tuhan kerna eksistensi Tuhan simbisa, simelebihi pemeteh manusia. Bagepe ibas penggejapen Daud, Tuhan e sinjadiken ia, ras simembentuk ras ngaturken perdalanen geluhna. Bagepe igejapken Pemazmur TUhan lit i japa pe.

2.      Pemazmur Tuhu-tuhu nandai Tuhan alu payo. Pemazmur nggejapken eksistensina bekas pengaturen Tuhan. Erkiteken sie me Tuhan nandai ia alu payo. Jadi kehadiran Pemazmur ibas doni enda, labo secara kebutulan, tapi kerina enda, nggo iaturken Tuhan. Bagepe ia jadi raja bangsa Israel,erkiteken pengaturen Tuhan. Emaka amin gia ibas pemilihan raja bangsa Israel guna nggantiken Saul, tangtangna ibas keluarga Isai la bo I je Daud, tapi erkiteken Daud nggo ipilih Tuhan, maka Daud  idilo ibas ingan sindauh nari, sangana  ermakan biri-biri.  

3.      Kegeluhen Daud tuhu-tuhu nggo tercatat ibas kitab Tuhan, subuk Daud ibas bertin denga, kenca nggo tubuh. Bagepe ibas kegeluhen Daud sipepagin. Tuhu-tuhu kerina ibas sura-sura ras rancangan Tuhan. Emaka adi Daud erbahan dosa, lit teguran ras hukumen Tuhan nari, bagepe  lit ka kalak simpersingeti ia.

4.      Ibas pemazmur ngataken kerna eksistensi Tuhan, ate pemazmur ngataken maka kegeluhen pemazmur tuhu-tuhu ndeher ras Tuhan, bagepe kegeluhen pemazmur lit ibas perlindungen TUhan. Emaka kegeluhen pemazmur nggeluh ibas mejuah-juah.

5.      Tole Daud ertoto man Tuhan gelah kalak jahat ihukum Tuhan. Enda ikataken Pemazmur, sebab ate pemazmur maka Tuhan si Badia e la ise pe banci ngerana kerna si la mehuli nandangi Tuhan. Bagepe ibas kesetiaan Daud man Tuhan, maka terjadi ikaten siemosional antara Daud ras Tuhan, emaka akap Daud, ise si jadi imbang Tuhan berarti imbangna pe. Alu bage kalak jahat harus ikernepken ibas doni enda nari, sebab adi lanai  kerina ia lit maka sura-sura ras rancangan Tuhan kerna nggeluh ibas kesetiaan man TUhan nggeluh ibas doni enda. Bagepe kerina kalak meteh, ise sijadi imbang Tuhan, mate me ia. Tapi igejapken Daud, banci saja pemindonna e lepak, emaka ipindona man Tuhan gelah ipepayo Tuhan sura-surana e. Tapi sada pemindonna gelah TUhan tetap mbaba ia ibas dalan sibenar.

APLIKASI

            Kita selaku kalak sitek man Tuhan, tentuna itandai Tuhan kita alu payo, bagepe kegeluhenta sitep-tep wari, la saja bekas pengaturen Tuhan, tapi itehna kerina kerna keadaan geluhta. Perbahanenta pe iteh Tuhan, sebab lalit siterbuni i lebe-lebeNa. Bagepe kita. Seharusna min, kita nandai Tuhan alu payo. Tuhan siisembah kita eme Tuhan sierkuasa ras siperkeleng, emaka adi lit kesalahan ras dosa siibahan kita, maka la perlu kita mela ngadap man baNa guna mindo pengalemi dosa ibas Tuhan nari. Ibas kita tutus ras alu meteruk ukur mindo pengalemi dosa man Tuhan, maka ialemina kerina salah dosanta.

            Keluarga kristen eme bekas pendilo Tuhan. Tuhan sinjadiken keluarga e, janah keluarga kristen lit ibas rancangan ras sura-suraNa. Emaka keluarga kristen harus nggeluh harmonis ras nggeluh sisampat-sampaten. Bagepe tanggungjawab gelah keluarga tetap ernalem ras nggeluh ibas sura-sura Tuhan, orang tua harus ndalanken fungsi ras tanggungjawabna. Emaka sipaling penting ibas keluarga, khususna orang tua harus tuhu-tuhu nandai anak jabuna. Sebab ibas orang tua nandai anak jabuna, khususna anak maka orang tua ngasup pebelin-belin anak ibas penandai kerna Tuhan.

            Selaku orang tua karakter anak banci saja erbeda-beda (band. Anak lebih dari satu), emaka penanganan anak harus ka berbeda-beda, enda me siikataken pribadi siunik. Enda me siharus isadari orang tua. Alu bage perkembangen anak tuhu-tuhu berkembang ibas simehuli sisue ras sura-sura Dibata.

Pdt. Steven Kumenit, STh.M.Min.