Tek Dingen Iperidiken (Markus 16:16)

PERPULUNGEN JABU-JABU

GEREJA GBKP

TANGGAL 3 – 9 APRIL 2016.

Markus 16 : 16.

Tema : Tek Dingen Iperidiken.

LATAR BELAKANG

1.      Yesus kalak Nasaret si lit kuasa ibas kata ras perbahanan subuk iakap Dibata bagepe kerina manusia (band. Lukas 24:19) nggo mate. Erkiteken sie me maka kegeluhen ajar-ajar Yesus nggeluh ibas kebiaran ras putus asa. Sebab lit sada pengarapan jelma sinterem, bagepe ajar-ajar Yesus, gelah Yesus banci mulahi kalak Yahudi ibas kuasa bangsa Romawi nari. Sebab paksa sie bangsa Yahudi sangana iteruh kuasa bangsa Romawi. Bagepe mbiar ajar-ajar Yesus nandangi imam-imam simbelin, guru-guru agama ras penguasa bangsa Romawi, emaka cebuni ia kerina. Janah adi pulung ia, pulung alu cebuni-cebuni.

2.      Kuasa kematen la ngasup naluken kuasa Dibata, emaka ibas wari sipeteluken ipekeke Dibata  Yesus ibas simate nari (band. 1 Korinti 6:14). Kenca Yesus keke ibas simate nari, Yesus ncidahkan baNa man ajar-ajarNa, janah ajar-ajar enda singataken man teman-temanna kerna kekeken ras Yesus nggo nggeluh. Tapi erkite-kiteken mbiar ras putus asa, bagepe pengangkai kerna kematen si leket denga man ajar-ajar Yesus, maka la ia tek. Thomas alu pang ngatakenca, adi lenga ku idah, janah langa ku tamakan tanku ibas awakNa, lenga ku tek (band. Yohanes 20:25). Sebab tupung sie, manusia la banci pulah ibas kematen nari. Lenga lit sejarah ibas kalak Yahudi, manusia banci keke ibas simaten nari. Memang lit si keke ibas si mate nari, tapi e erkiteken Yesus sipekekesa eme Lazarus (band. Yohanes 11:43-44). Padahal nggo piga-piga kali ikataken Yesus kerna kekekenNa. Tuhu Yesus arus ngenanami kiniseran, mate, tapi ibas wari siperteluken keke Yesus ibas simate nari (Matius 16:21).

3.       Dungna Yesus ncidahken diriNa man ajar-ajarNa sisepuluh sada kalak (nen = Yudas Iskariot lanai i je), tupung ajar-ajarNa e sangana man ibas salah sada rumah. Yesus ncidahken diriNa erkite-kiteken ajar-ajarNa singaloken berita kekekenNa kurang tek, emaka la pang ajar-ajarNa mberitaken kekeken Yesus ku jelma sinterem. Erkiteken sie me ipandangi Yesus ia kerina.

4.      Ibas perjumpan Yesus ras ajar-ajarNa, Yesus nuruh gelah ajar-ajarNa mberitaken Berita Si Meriah, janah ise sitek dingen iperidiken terkelin ia, tapi ise si la tek ia pagi iukum. Peridin eme sada tanda maka kalak e tek man Yesus selaku Tuhan. Jadi Peridin eme sada materai kalak e nggo tek man Yesus.

5.      Peridin labo sada alat sibanci mabai manusia nggeluh ibas keselamatan. Tapi peridin eme sada tanda ntah pe materai. Emaka kalak singaloken peridin nggo tek ia man Yesus. Erkiteken sie me palas keselamatan eme tek. Emaka kalak si la tek man Yesus ia pagi iukum. Siimaksudken penghukumen eme la nggeluh ras Yesus ibas Surga.

APLIKASI

            Peridin eme salah sada sakramen siiakui gereja GBKP. Lit dua sakramen siiakui gereja GBKP eme peridin ras lakon persadan si badia. Janah ibas gereja GBKP mengenal peridin anak ras peridin dewasa. Tapi palas gereja erbahan dua sakramen enda, erkite-kiteken sakramen enda ngenca siitetapken Tuhan. Janah pengertin sakramen eme 1). Secara harafia eme perbuatan suci. 2). Secara teologis eme imeteraikan Tuhan padanNa, janah iberekenNa man banta pengalemi dosa, bagepe kegeluhen si la ermasap-masap erkite-kiteken pengurbanan Yesus i kayu persilang. Emaka sakramen itetapkan Tuhan gelah kinitekenta iarahkan ku pengorbanan Yesus i kayu persilang. Emaka situhuna sakramen eme khotbah siteridah.

            Peridin eme tanda maka kita e nggo tek man Yesus. Peridin eme simbol kita icuci alu lau gelah kita bersih. Dosa-dosa sierbahanca kita nggeluh melket nggo icuci alu dareh Yesus. Alu bage kita nggo ipebadiaken. Emaka tanda kita nggo ipebadiaken, kita arus ngelakoken kai singena ate Tuhan ibas kegeluhenta tep-tep wari. Emaka labo masalah apakah peridin e ilakoken alu ipirpiri ntah pe iselamken ibas lau.

            Lit sada persoalan si seh genduari jadi masalah man gereja-gereja sideban singelakoken peridin dewasa ngenca. Alu bage ngatakenca maka peridin anak la banci ilakoken sebab ia lenga ngangkai kerna erti peridin ras la iangkaina kerna erti tek. Gereja GBKP tetap ngelakoken peridin anak sebab : 1). Anak-anak pe nggeluh ibas ikaten padan Dibata ras anggota gereja. 2). Anak-anak eme benih si badia. Emaka anak-anak ikut ibas warisan padan-padan Dibata. Alu bage anak-anak kristen arus ibedakan ras anak-anak si la kristen. Ibas erti kata, anak-anak kristen arus isterilkan/ibadiakan ibas kegeluhen si la mehuli nari. 3). Orang tua berkewajiban pebelin-belin anakna ibas Kata Dibata. Gelah seh paksana anak-anak e ngakuken kinitekenna man Tuhan i lebe-lebe perpulungen.

            Uga ka kalak sipindah ibas gereja sideban nari, bagepe agama sideban nari. Adi sipindah ia nggo dewasa janah lenga iperidiken maka ia arus iajari lebe kerna kata Dibata, gelah tek ia man Tuhan, kenca sie maka ia iperidiken (peridin dewasa). Tapi adi nggo ia iperidiken, maka ia lanai iperidiken, tapi ia iajarken kerna pelajaran ngawan gelah ia ingawanken. Tapi adi sipindah ibas agama sideban nari maka ia arus iperidiken. Peridin siibahan gereja nandangi sipindah ibas agama sideban nari eme tanda maka ia nggo tek man Tuhan Yesus.

Pdt. Steven Kumenit, STh.M.Min.

Persadan Ras Kristus Ibas Lakon Persadan Si Badia (Lukas 22:14-20)

PERPULUNGEN JABU - JABU 

GEREJA GBKP

TANGGAL 27 MARET – 2 APRIL 2016.

Lukas 22 : 14 – 20.

Tema : Persadan Ras Kristus Ibas Lakon Persadan Si Badia.

LATAR BELAKANG

1.      Lit dua wari raya siipersada kalak Yahudi eme Paskah ras wari raya roti si la itama ragi. Wari raya Paskah eme wari raya mperingeti pembebasan bangsa Israel ibas tanah perbudaken nari eme Mesir. Tapi wari raya Roti si la itama ragi eme kalak Yahudi ngataken bujur man Tuhan erkite-kiteken pasu-pasu Tuhan jumana. Janah lit persediaan pangan man kalak Yahudi. Perayaan enda ilakoken alu meriah, janah irayaken i Yerusalem. Emaka kerina kalak Yahudi si lit i taneh perlajangan/ simerap i belang-belang doni enda reh ku Yerusalem. Yesus ras ajar-ajarNa ikut ngerayaken wari raya e.

2.      Kenca seh jam man (jam 6 karaben), kundul Yesus ras rasul-rasul, sebab mesikel kal Yesus ngerayakan wari Paskah ras ia kerina. Janah perayaan wari Paskah ilakoken i salah sada rumah kalak Yahudi (band. Ayat 10-12). Perayaan Paskah enda ibenai kenca matawari nggo terbenam. Kalak Yahudi netapken jam 6 karaben eme jam man.

3.      Perayaan Paskah siibahan Yesus ras ajar-ajarNa eme siterakhir, sebab nggo igejapkenNa  maka kiniseranNa nandangi seh. Sebab imam-imam, tua-tua kalak Yahudi, bagepe kalak Parisi nggo erpakat guna nangkap ras munuh Yesus. Bagepe nggo iteh Yesus sekalak ibas ajar-ajarNa nari nggo ipake iblis guna nangkap Yesus (band. Ayat 21). Penolakan nandangi Yesus, erkite-kiteken la kalak enda ngasup ngaloken Yesus e me Mesias siipadanken Dibata. Bagepe nembeh kalak enda nandangi Yesus, erkite-kiteken rusur ikritik Yesus kegeluhenna si la ngena ate Tuhan silakokekenna tep-tep wari. Kegeluhenna nggeluh alu pekulah-kulah.

4.      Ibas perayaan Paskah kalak Yahudi, kalak Yahudi man roti si la tama ragi, singingetken uga teruduhna bangsa Israel nadingken Mesir. Sebab tupung sie bangsa Israel erbahan roti, janah biasana roti e itama ragi. Fungsi ragi mengembangkan roti e. Janah lit prosesna, ibas erti kata lit piga-piga waktu dekahna maka roti e banci mengembang.Tapi erkiteken teruduh bangsa Israel ndarat nadingken  Mesir, maka roti siibahan bangsa Israel lanai itama ragi. Bagepe kenca ela man ibuat Yesus calung janah ikatakenNa bujur man Tuhan, jenari iberekenNa man ajar-ajarNa. Anggur ngelambangkan dareh siioleskan ipintu rumah bangsa Israel tupung bangsa Israel i Mesir. Sebab nandangi ihukum Tuhan bangsa Mesir alu munuh anak sintua kalak Mesir. Tapi adi lit dareh i pintu, maka mentas saja Tuhan, sebab e nandakan rumah e, rumah kalak Yahudi.

5.      Janah ibas perayaan e, isuruh Yesus gelah rasul-rasul ngelakoken pe bage. Tapi ibas rasul-rasul ngelakoken perayaan Paskah, lanai bagi makna Paskah kalak Yahudi, sebab nggo mperingeti kerna kematen Yesus Kristus. Yesus eme Anak biri-biri Dibata simereken keselamatan man kerina manusia. Emaka tep-tep kali rasul-rasul erbahan bage, ngingetken maka Yesus nggo nebusi kerina dosa manusia. Alu bage rasul-rasul tetap ngataken bujur man Tuhan. Sebab enda merupakan keleng ate Tuhan si mbelin siisehkenNa man manusia.

APLIKASI

            Palas gereja-gereja, termasuk gereja GBKP erbahan Lakon Persadan Si Badia eme kematen Yesus i kayu Persilang. Ibas perayaan Lakon Persadan Si Badia, gereja-gereja mperingeti kematen Yesus.

            Ibas gereja GBKP nggo iatur, maka minimal 4 kali erbahan Lakon Persadan Si Badia, janah enda merupakan sada perayaan. Janah tentuna ibas ngerayaken Lakon Persadan Si Badia e, warga gereja si nggo ingawanken saja sibanci muat bagin ibas Lakon Persadan Si Badia. Bagepe sibanci muat bagin ibas Lakon Persadan Si Badia eme warga gereja situhu-tuhu bersih. Siimaksudken bersih eme si la ikenaken pengepkepen khusus.

            Lakon Persadan Si Badia eme simbol tubuh ras dareh Kristus. janah enda me simbedakan gereja GBKP (Calvinis) ras gereja sideban eme Katolik ras gereja siberaliran Lutheran. Ibas gereja GBKP erbahan Lakon Persadan, maka situhuna enda menjadi khotbah siteridah. Bagepe ibas warga gereja muat bagin ibas Lakon Persadan Si Badia, maka terjadi me internalisasi kegeluhen antara kita ras Yesus Kristus. Kita ibas Yesus, ras Yesus ibas kita.Ibas erti kata, terjadi kegeluhen persadan kita ras Yesus Kristus. Alu bage maka kegeluhenta reh badiana. Bagepe   ibas kegeluhenta, nggeluh alu dem pengataken bujur man Tuhan ras nggit nggeluh ibas kebadiaan.

Pdt. Steven Kumenit, STh.M.Min

KuasaNa Erbahanca Megegeh Dingen Paguh (Mazmur 118:1,2; 14-28)

KHOTBAH MINGGU (PASKAH)

TANGGAL 27 MARET 2016.

GEREJA GBKP

Invocatio    :    Dibata enggo mpekeke Tuhan i bas si mate nari, janah kita pe ipekekeNa nge pagi alu kuasaNa (1 Korinti 6:14).

Ogen          :    Lukas 21:1-12 (Tunggal).

Khotbah     :    Mazmur 118:1,2, 14-28 (Tungga).

Tema          :    KuasaNa Erbahanca Megegeh Dingen Paguh.

LATAR BELAKANG

1.      Merupakan sada ende-enden pengatakan bujur erkiteken sada kemenangan sebab nggo pulah ibas pembuangan i Babel nari. Emaka bangsa Israel ngendeken ibas rumah pertoton tupung ibas wari raya Pondok Daun.

2.      Ende-enden enda merupakan sada pengajuk man bangsa Israel gelah bangsa Israel ngataken bujur man Tuhan, sebab Tuhan e Tuhan perkeleng ras tetap ikeliniNa bangsaNa. La lit bangsa Israel ikut campur ibas pembebasan i Babel nari. Tapi enda kerina pelin-pelin keleng ate Tuhan man bangsaNa.

3.      Ibas pembuangan i Babel, bangsa Israel nggo piga-piga kali berupaya mbebaskan diri arah pemberontakan-pemberontakan, tapi kerina e sia-sia, sebab ise sicuba erbahan pemberontakan maka ia ihukum pemerintah Babel nari. Bagepe bangsa Israel nggeluh ibas tekanan-tekanan psikologi, ras pe la lit kebebasan ibas beragama. Tuhu-tuhu bangsa Israel lit ibas kiniseran.

4.      Penggejapen bangsa Israel, ia nggo nggeluh ibas kematen, sebab sijadi andalanna eme kuasa Tuhan, tapi tempa-tempa igejapna Tuhan la erkuasa. Akapna kuasa Tuhan la erkuasa i kerajaan Babel. Kuasa Tuhan terjeng teretorial ngenca.

5.      Ibas pembebasan singgo ibereken Tuhan, igejapken bangsa Israel, enda eme sada peraten Tuhan emaka iajuk pemazmur gelah wari kemenangan enda arus sirayakan.

APLIKASI

            Ibas sejarah keselamatan manusia, lit 2 makna paskah, eme Paskah kalak Yahudi eme mperingeti pembebasan bangsa Israel ibas tanah perbudakan nari. Janah peristiwa paskah memegang peranan penting ibas kegeluhen kiniteken kalak Yahudi. Makna Paskah ibas Padan simbaru eme kekeken Yesus mereken keselamatan man manusia si nggo nggeluh ibas dosa nari.

            Paskah ngatakenca maka Yesus sinusur ibas doni kematen, janah Dibata nggo mpekeke  ibas kematen nari. Alu bage doni kematen simerupaken kebiaren man manusia, lanai perlu jadi kebiaren. Maka kita lanai mate, tapi erkiteken keleng ate Tuhan man manusia maka kita pe ikut nggeluh ibas keselamatan.

            Paskah eme pintu gerbang keselamatan manusia. Sebab ibas Paskah, je kita nggeluh ibas keselamatan. Kematen lanai erkuasa ras la lit gegeh ibas kegeluhen kalak sierkiniteken man Tuhan. Je me sierbahanca maka megegeh ras paguh kita ibas ndalani kegeluhenta tep-tep wari.

Pdt. Steven Kumenit, STh.M.Min.

KematenNa Mereken Kemenangen (Yohanes 19:28-30)

KHOTBAH JUMAT AGUNG

TANGGAL 25 MARET 2016.

GEREJA GBKP

Invocatio    :    Serko Jesus alu megang soraNa nina, "O Bapa, ku bas tanNdu Kuendesken tendingKu!" Kenca ikatakenNa si e, mate Ia (Lukas 23:46).

Ogen          :    Mazmur 39:1-6 (Tunggal).

Khotbah     :    Yohanes 19:28 – 30 (Tunggal).

Tema          :    KematenNa Mereken Kemenangen.

LATAR BELAKANG

1.      Sijadi bahan khotbahta eme sada kesaksin kerna akhir kegeluhen Yesus i kayu persilang. Lit dua kata terakhir siibelaskan Yesus ibas akhir kegeluhenNa eme muas Aku ras enggo dung. Janah muas aku tuhu-tuhu lit ibas pustaka si badia eme ibas Mazmur 29:22. Jadi situhuna enda kerina penggenapan nubuat ibas Padan Sindekah.

2.      Teridah i je, ibas kayu persilang nggo igejapken Yesus maka kerina dahinNa i tengah-tengah doni enda nggo dung.

3.      Memang teridah kematen Yesus tempah-tempah kemanusiaan Yesus siteridah, tapi situhuna lang, sebab kemanusiaan Yesus la banci ipisahkan ibas ke-IlahianNa. Emaka ibas kematen Yesus, merupakan sada rencana Tuhan guna keselamatan manusia. Jadi penungkunen apakah lalit dalan sideban sibanci ipake Tuhan guna nelamatken manusia arah kayu persilang ? Situhuna banci. Siibahan Tuhan eme nggunakan teologi pengalemi dosa kalak Yahudi eme ibas agama kalak Yahudi pengalemi dosa arus lit pengurbanan (kurban pengalemi dosa). Tuhan njadiken anak siikelengiNa selaku anak biri-biri guna ngalemi kerina dosa manusia. Janah cara enda me sipaling tinggi pengurbanan Yesus. Alu bage terjadi me perdamen antara manusia ras Tuhan.

4.      Perlu siteh salib eme hukuman paling berat ibas kerajaan Romawi. Ibas erti kata adi lit kalak jahat si la terampuni kejahatanna, maka ia arus ihukum alu cara isalibkan. Berarti Yesus ipeseri, bali ras kalak jahat si la terampuni kejahatanna.

5.      Ibas kayu persilang Yesus e teridah Tuhan ikut ibas kiniseran manusia. Emaka situhuna ibas kayu persilang Yesus teridah kiniseran Yesus eme salah sada hakekat Tuhan.

APLIKASI

            Adi siperdiaten ibas bahan khotbahnta maka kegeluhen Yesus nggo dung ibas kayu persilang. Adi sinen ibas pengakun kiniteken, berarti Yesus nusur ku doni kematen. Doni kematen eme doni siikuasai setan.

            Kematen Yesus eme kahulta. Berarti arah kematen, je lit kemenangan sebab Yesus nggo nebusi kerina dosa-dosanta. Janah enda me keleng ate Tuhan simbelin man banta manusia.

            Jadi penungkunen, uga gelah kematen Yesus, kita pe ikut ibas kemenangan e ? situhuna nggo jelas man banta, maka kematen Yesus mereken kemenangan man banta. Tapi e banci jadi sia-sia adi ibas kegeluhenta ngelokoken ras mprakteken si la mehuli si la ngena ate Tuhan. Kemenangan eme keselamatan ras nggeluh ras Yesus, adi kita tetap nggeluh ibas ketutusen ras tetap ndalankan kai singena ate Tuhan. Amin gia kita nggeluh ibas kiniseran, kita ula jungut-jungut, tapi tetap ernalem lah man Tuhan.

Pdt. Steven Kumenit, STh.M.Min.